Hjörvar í Víkingaklúbbinn

Alþjóðlegi meistarinn Hjörvar Steinn Grétarsson (2505) einn stigahæsti og efnilegasti íslenski skákmaður landsins gekk í dag til liðs við Víkingaklúbbinn, en Hjörvar var áður félagi í Taflfélaginu Helli.  Hjörvar hefur verið að bæta sig mikið síðustu árin, er með tvö stórmeistaraáfanga af þrem og hefur þegar náð stigalágmarkinu fyrir stórmeistaratitilinn, 2500 elóstig.  Hjörvar á eftir að koma sterkur inn á Íslandsmót skákfélaga, en Víkingaklúbburinn stefnir á að verja Íslandsmeistaratitil sinn frá því í vor.

Heimasíða Víkingaklúbbsins

Skáktímar hefjast í Stúkunni næta föstudag

Samvinnuverkefni Skákskóla Íslands og Skákakademíu Kópavogs fer aftur af stað í Stúkunni á Kópavogsvell og verður fyrsti tími næsta föstudag þann 13.  september kl. 14.30 og stendur til að verða kl. 16.30. Sem fyrr verður það Helgi Ólafsson stórmeistari og skólastjóri Skákskóla Íslands sem hefur umsjón með þessum tímum. Kennsla verður einkum miðuð við börn og unglinga í  grunnskólum Kópavogs sem hafa verið dugleg við að tefla á skólaskákmótum.  

Haustmót TR hefst 15. september

Haustmót Taflfélags Reykjavíkur 2013 hefst sunnudaginn 15. september kl.14. Mótið er eitt af aðalmótum vetrarins í reykvísku skáklífi og jafnframt meistaramót T.R. Það er áratuga gömul hefð fyrir hinu vinsæla Haustmóti og er það flokkaskipt.  Mótið er öllum opið. 

Mótið fer fram í félagsheimili Taflfélags Reykjavíkur, skákhöllinni að Faxafeni 12. Sú nýbreytni verður að teflt er tvisvar í viku.  Alls eru níu umferðir í hverjum flokki. Lokuðu flokkarnir eru skipaðir tíu keppendum hver þar sem allir tefla við alla, en í opna flokknum er teflt eftir svissnesku kerfi.

Skráning fer fram hér á Skák.is og á heimasíðu Taflfélags Reykjavíkur.

Hægt er að fylgjast með skráningu hér..

Skráningu í alla lokaða flokka lýkur laugardaginn 14. september kl. 18.

Lokaumferð fer fram föstudaginn 18. október en mótinu lýkur með verðlaunaafhendingu sunnudaginn 20. október ásamt Hraðskákmóti T.R.

Núverandi skákmeistari Taflfélags Reykjavíkur er Daði Ómarsson.

Dagskrá:

1. umferð: Sunnudag 15. september kl.14.00 
2. umferð: Miðvikudag 18. september kl.19.30

3. umferð: Sunnudag 22. september kl.14.00 
4. umferð: Miðvikudag 25. september kl.19.30

5. umferð: Sunnudag 29. september kl.14.00

6. umferð: Miðvikudag 2. október kl.19.30 
7. umferð: Sunnudag 6. október kl.14.00

---Hlé vegna Islandsmóts skákfélaga---
8. umferð: Miðvikudag 16. október kl. 19.30 
9. umferð: Föstudag 18. október. kl.19.30 

Verðlaun í A-flokki: 
1. sæti kr. 100.000 
2. sæti kr. 50.000 
3. sæti kr. 25.000 
4. og 5. sæti ókeypis í Skákþing Reykjavíkur 2014

Verðlaun í B-flokki: 
1. sæti kr. 20.000
2.-3. sæti ókeypis í Skákþing Reykjavíkur 2014

Verðlaun í C-flokki: 
1. sæti kr. 15.000 
2. og 3. sæti ókeypis í Skákþing Reykjavíkur 2014

Verðlaun í opnum flokki:

1. sæti kr. 10.000 
2. og 3. sæti ókeypis í Skákþing Reykjavíkur 2014

Ef fjöldi lokaðra flokka eykst, verða verðlaun í þeim þau sömu og í C-flokki.

Að auki ávinnur sigurvegari hvers flokks sér þátttökurétt í næsta styrkleikaflokki að ári liðnu.

Verði keppendur jafnir í efstu sætum verður peningaverðlaunum skipt en stigaútreikningur látinn ráða lokaröð keppenda.

Tímamörk:

1 klst. og 30 mín. + 30 sek. á leik. 

Þátttökugjöld:

3.500 kr. fyrir félagsmenn T.R. 16 ára og eldri (5.000 kr. fyrir aðra). 
1.500 kr. fyrir félagsmenn T.R. 15 ára og yngri (2.500 kr. fyrir aðra).

Skákþáttur Morgunblaðsins: Oliver Aron efstur á Meistaramóti Hellis

Margir af yngri skámönnum okkar undirbúa sig af kappi fyrir haustvertíð skákarinnar sem er alveg að bresta á. Norðurlandamót grunnskóla í tveimur aldursþrepum mun fram í Finnlandi og Noregi á næstu dögum og Evrópumót ungmenna hefst í Svartfjallalandi undir lok mánaðarins. Í byrjun október mun Taflfélag Reykjavíkur standa fyrir glæsilegu alþjóðlegu móti, Íslandsmót skákfélaga kemur í kjölfarið og Víkingaklúbburinn hyggur á þátttöku í Evrópukeppni taflfélaga á Rhodos. Meistaramót Hellis sem lýkur næsta mánudagskvöld hefur reynst ágætur vettvangur fyrir undirbúning en þar ber helst til tíðinda þegar ein umferð er eftir að 15 ára gamall piltur Oliver Aron Jóhannesson hefur ½ vinnings forystu með 5 vinninga af sex mögulegum en í 2. - 5. koma Mikhael Jóhann Karlsson, Kjartan Maack, Sverrir Örn Björnsson og Jón Árni Halldórsson. Hinn 10 ára gamli Vignir Vatnar Stefánsson tapaði tveim fyrstu skákunum en Monrad-meðvindurinn hefur skilað fjórum sigrum hans í röð og er hann jafn Stefáni Bergssyni, Veroniku Steinunni Magnúsdóttur, og Atla Jóhanni Leóssyni að vinningum í 6.-9. sæti.

Oliver Aron, sem var næstum því orðinn heimsmeistari áhugamanna í fyrra hefur á Hellis-mótinu unnið kappa á borð Mikhael Jóhann Karlsson og Sævar Bjarnason.

Sá síðastnefndi, alþjóðlegi meistarinn Sævar Bjarnason, á heiður skilinn fyrir dugnað sinn við að tefla á innlendum mótum. Hann tekur yfirleitt þátt í Haustmóti TR, Skákþingi Reykjavíkur, Íslandsmótinu og er mættur á Meistaramóti Hellis. Það er gott veganesti fyrir yngri kynslóðina að fá að kljást við svo sterkan meistara í kappskák. Í viðureign þeirra í 3. umferð greip Oliver Aron greip tækifærið og sýndi allar sínar bestu hliðar:

Sævar Bjarnason - Oliver Aron Jóhannesson

Reti byrjun

1. Rf3 d5 2. g3 c6 3. Bg2 Bg4 4. 0-0 Rd7 5. d3 e6 6. Rbd2 Bd6 7. h3 Bh5 8. c4 Re7 9. a3 a5 10. b3 0-0 11. Bb2 e5 12. cxd5 cxd5 13. Hc1 Rc6 14. Hc2 De7 15. Da1

Þessi uppstilling sem oft kom fyrir í skákum Richard Reti og þeirra sem aðhylltust vængtöfl er úr sér gengin og bitlaus. Og Oliver bregst hart við.

15. ...f5! 16. e3 e4 17. dxe4 fxe4 18. Rd4 Rxd4 19. Bxd4 Be2 20. He1 Bd3 21. Ha2 Re5!

Með hnitmiðaðri taflmennsku hefur svartur náð yfirburðastöðu.

22. Rf1 a4 23. Bxe5?

23. b4 var skárra en pressan er þung eftir t.d. 23. ...Hf7.

23. ...Bxe5 24. Dd1 axb3 25. Dxb3 Bc4 26. Dc2 Df7

Það liggur ekkert á að hirða skiptamun.

27. Rh2 Bxa2 28. Dxa2

28. ...Hxa3!

Ekki batnar ástandið í herbúðum hvíts eftir þennan öfluga leik, 29. Dxa3 strandar vitaskuld á 29. ...Dxf2+ o.s.frv. Eftirleikurinn er auðveldur.

29. De2 h5 30. Hf1 Ha1 31. Hxa1 Bxa1 32. Rf1 Be5 33. Rd2 g5 34. Rb3 Kg7 35. Dc2 De6 36. Da2 b6 37. Da4 Df6 38. Da2 Bb2!

Línurof. Nú er ekki lengur hægt að verja f2-peðið.

39. Da7 Hf7 40. Da8 Dxf2+

- og hvítur gafst upp án þess að bíða eftir 41. Kh2 Dxe5+! 42. Kxg3 Be5 mát.

Kramnik vann heimsbikarmótið

Vladimir Kramnik vann lokaeinvígið við landa sinn Dmitry Andreikin á heimsbikarmótinu í Tromsö sem staðið hefur síðan í byrjun ágúst. Lokaniðurstaðan varð 2 ½ : 1 ½. Kramnik fór í gegnum mótið án þess að tapa skák, vann níu - þar af fimm kappskákir - og gerði 13 jafntefli.

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 8. september 2013.

Skákþættir Morgunblaðsins

[Event "Meistaramót Hellis 2013"] [Site "?"] [Date "2013.08.28"] [Round "3.2"] [White "Bjarnason, Saevar"] [Black "Johannesson, Oliver"] [Result "0-1"] [ECO "A07"] [WhiteElo "2116"] [BlackElo "2008"] [PlyCount "80"] [EventDate "2013.08.26"] [Source "lmi"] [SourceDate "2013.06.25"] 1. Nf3 d5 2. g3 c6 3. Bg2 Bg4 4. O-O Nd7 5. d3 e6 6. Nbd2 Bd6 7. h3 Bh5 8. c4 Ne7 9. a3 a5 10. b3 O-O 11. Bb2 e5 12. cxd5 cxd5 13. Rc1 Nc6 14. Rc2 Qe7 15. Qa1 f5 16. e3 e4 17. dxe4 fxe4 18. Nd4 Nxd4 19. Bxd4 Be2 20. Re1 Bd3 21. Ra2 Ne5 22. Nf1 a4 23. Bxe5 Bxe5 24. Qd1 axb3 25. Qxb3 Bc4 26. Qc2 Qf7 27. Nh2 Bxa2 28. Qxa2 Rxa3 29. Qe2 h5 30. Rf1 Ra1 31. Rxa1 Bxa1 32. Nf1 Be5 33. Nd2 g5 34. Nb3 Kg7 35. Qc2 Qe6 36. Qa2 b6 37. Qa4 Qf6 38. Qa2 Bb2 39. Qa7+ Rf7 40. Qa8 Qxf2+ 0-1

Goðinn-Mátar hraðskákmeistari taflfélaga eftir gríðarlega spennandi úrslitaviðureign

 

Sigursveit Goðans-Máta: Sigurður Daði Sigfússon, Þröstur Árnason, Kristján Eðvarðsson, Þröstur Þórhallsson, Jón Þorvaldsson (liðsstjóri), Helgi Áss Grétarsson, Tómas Björnsson, Einar Hjalti Jensson, Arnar Þorsteinsson, Magnús Teitsson og Ásgeir P. Ásbjörnsson.

 

Það var gríðarlega spenna fyrir úrslitaviðureign Hraðskákkeppni taflfélaga sem fram fór í húsnæði Skákskóla Íslands í dag. Um var að ræða endurtekið efni en Goðinn-Mátar og Víkingaklúbburinn mættust í úrslitum rétt eins og fyrra. Þá þurfti að grípa til bráðabana eftir að sveitirnar urðu jafnar 36-36. Þá hafði Víkingaklúbburinn betur í bráðabana 3,5-2,5. En nú sneru heilladísirnar sér á sveif á Goðum-Mátum sem unnu með sama mun eftir bráðabana!

Ljóst var fyrirfram að sveitirnar væru gríðarlega jafnar. Margir spáðu jafnri viðureign og jafnvel bráðabana. Í sveit Víkingaklúbbsins vantaði Magnús Örn Úlfarsson en í sveit Goðans-Máta vantaði Hlíðar Þór Hreinsson. Goðinn-Mátar mátti hins vegar betur við forföllum enda með töluvert meiri breidd en Víkingarnir.

Í upphafi einvígisins var sunginn afmælissöngurinn til heiðurs Gunnari Frey Rúnarssyni liðsstjóra Víkingaklúbbsins sem á afmæli í dag.

Goðinn-Mátar byrjaði með látum, vann fyrstu umferðina 5-1. Víkingar komu hins vegar sterkir til baka og með sigrum með annarri og þriðju umferð voru þeir skyndilega komnir yfir. Víkingar leiddu svo 19-17 í hálfleik.

GoðMátar byrjuðu svo seinni hlutann með látum þegar þeir unnu fyrstu viðureignina eftir hálfleik (7. umferð) 4,5-1,5 og höfðu þar með endurheimt forystuna. Þeir héldu forystunni fram til 10. umferðar þegar Víkingar jöfnuðu metin. Staðan orðin 30-30.

Goðinn-Mátar vann svo elleftu umferðina 4-2 og leiddu 34-32 fyrir lokaumferðina. Tekið var 5 mínútna hlé og liðsfundnir haldnir. GoðMátar byrjuðu lokaumferðina vel, voru komnir með aðra höndina á titilinn 36-33 en Víkingar unnu þrjár síðustu skákirnar og jöfnuðu þar með metin 36-36!

Og þá var komið að bráðabana. Þetta var í þriðja skipti í sögu keppninnar sem það gerist. Fyrsti bráðabaninn var á fyrsta keppnisári keppninnar 1995 þegar Taflfélag Garðabæjar vann Skákfélag Hafnarfjarðar í átta liðum úrslitum eftir bráðabana. Síðan liðu 17 ár þ.e. þar til úrslitum keppninnar í fyrra.

Spennan var nánast óbærileg fyrir bráðabanann. GoðMátar byrjuðu vel og í stöðunni 3-2 þráskákaði Þröstur Þórhallssyni á móti Stefáni Kristjánssyni og þar með ljóst að sigurinn væri Goðans-Máta, samtals 39,5-38,5.

Goð-Mátar voru ákaflega vel að þessu komnir. Fengu erfiða andstæðinga í öllu umferðum þ.e. TR, Helli og Bolvíkinga fram að úrslitunum. Jón Þorvaldsson, liðsstjóri þeirra, er ákaflega klókur sem slíkur, en hann stjórnaði sveit félagsins í ár í keppninni ásamt Pálma R. Péturssyni.

Skor liðsmanna Goðans-Máta var tiltölulega jafnt. Einar Hjalti Jensson hlaut 7,5 vinning, Ásgeir P. Ásbjörnsson, Þröstur Þórhallsson og Sigurður Daði Sigfússon fengu 7 vinninga. Daði reyndist ákaflega dýrmætur "varamaður" en hann kom inn í liðið í fjórðu umferð og var því með 70% skor.

Hannes Hlífar Stefánsson bar höfuð og herðar yfir félaga sína í Víkingaklúbbnum og hlaut 11 vinninga í 13 skákum. Ótrúlega gott skor í svo sterkri keppni. Davíð Kjartansson hlaut 8,5 vinning en Stefán Kristjánsson og Björn Þorfinnsson 8 vinninga. Það sem reyndist Víkingum í raun og veru að falli að enginn vinningur kom í hús á sjötta borði. Afmælisbarnið Gunnar Freyr, formaður og liðsstjóri félagsins gerði sér lítið fyrir og vann Helga Áss 2-0.

Einstaklingsskor má nálgast hér. Þar vantar reyndar úrslit bráðabanans en þar urðu úrslit sem hér segir:

• Helgi Áss Grétarsson - Hannes Hlífar Stefánsson 0-1
• Þröstur Þórhallsson - Stefán Kristjánsson 0,5-0,5
• Ásgeir P. Ásbjörnsson - Björn Þorfinnsson 0-1
• Einar Hjalti Jensson - Davíð Kjartansson 1-0
• Sigurður Daði Sigfússon - Gunnar Freyr Rúnarsson 1-0
• Kristján Eðvarðsson - Stefán Þór Sigurjónsson 1-0

Fjöldi áhorfenda var viðstaddur keppnina og stemming á skákstað mjög mikil.

Það var Taflfélagið Hellir sem stóð fyrir keppninni nú sem endranær en keppnin fór nú fram í 19. sinn. Skákstjórar voru Rúnar Berg og Gunnar Björnsson.

Myndaalbúm (HJ)

Skákþáttur Morgunblaðsins: Kramnik á sigurbraut

Rússneska stórmeistaranum Vladimir Kramnik skaut upp á stjörnuhimininn á ólympíumótinu í Manila 1992 þegar hann hlaut 8½ vinning af 9 mögulegum fyrir sigurlið Rússa rétt nýorðinn 17 ára gamall. Honum var spáð mikilli velgengni á næstu árum og það gekk eftir þótt gamli heimsmeistarinn Botvinnik hafi á stundum ekki verið ánægður með þennan gamla nemanda sinn: „Hann reykir, drekkur og tapaði með skömm fyrir Kamsky í einvígi," sagði hann í viðtali árið 1994. Kramnik er löngu búinn að hlaupa af sér hornin; sigurganga hans undir lok síðustu aldar var mögnuð og svo kom HM-einvígið við Kasparov í London haustið 2000 sem Kramnik vann 8½:6½ án þess að tapa skák. Herstjórnarkænska hans þar tók öllu fram sem áður hafði sést á þessum vettvangi.

En næstu ár voru Kramnik erfið, sviptur titli tókst Kasparov auðvitað að markaðssetja sig sem skákmann nr. 1 í heiminum en árið 2005 dró hann sig í hlé. Kramnik vann heimsmeistaraeinvígið við Topalov í Elista 2006 en tapaði svo titlinum í hendur Anand árið 2008. Hann var afar nálægt því að vinna áskorunarréttinn í London í vor en tapaði í síðustu umferð fyrir hinum óútreiknalega Vasilí Ivantsjúk. Á heimsbikarmótinu í Tromsö er hann kominn í úrslitaeinvígið og teflir þar við landa sinn Dimitry Andreikin. Það er stór spurning hvort Kramnik sé ekki sá skákmaður í dag sem gengur næstur Magnúsi Carlssyni að styrkleika. Í Tromsö náði Kramnik að jafna sakirnar við téðan Ivantsjúk í fjórðu umferð. Hann er afar slægur í tæknilegum stöðum á borð við þá sem kom upp eftir flækjur miðtaflsins:

Ivantsjúk - Vladimir Kramnik

Drottningarbragð

1. d4 Rf6 2. c4 e6 3. Rf3 d5 4. Rc3 Be7 5. Bf4 0-0 6. e3 Rbd7 7. c5 Rh5 8. Bd3 Rxf4 9. exf4 b6 10. b4 a5 11. a3 c6 12. 0-0 Dc7 13. g3 Ba6 14. Bxa6 Hxa6 15. De2 Hfa8 16. b5 cxb5 17. Rxd5 exd5 18. Dxe7 Hc8 19. Hab1 bxc5 20. Hxb5 He6 21. Dg5 h6!

Endurbót Kramniks á skák Aronjans og Giris í Wijk aan Zee 2012. Þar var leikið 21.... Hb6 22. a4 og hvítur vann eftir 43 leiki.

22. Dxd5 Hd6 23. Da2 Dc6 24. De2 cxd4 25. Hfb1 a4 26. Re1 Rc5 27. Rd3 Rxd3 28. Dxd3 Dc3 29. Hd1 He6!

Með hugmyndinni 30. Dxd4 He1+! 31. Kg2 Dc6+ og vinnur hrók.

30. He5 Hxe5 31. fxe5 Db3 32. Dxd4 Dxa3 33. Kg2 Db3 34. Dd7 Ha8 35. Hd3 De6! 36. Db7

Ivantsjúk gast ekki að 36. Dxe6 fxe6 37. Ha3 Kf7 þótt jafnteflið sé ekki langt undan í því tilviki.

36.... Dc8 37. Df3 Ha5 38. Ha3 De8 39. De4 g6 40. f4 h5 41. h4 Kg7

Vegna frípeðsins á svartur nokkra vinningsmöguleika í þessari stöðu. Án þess að Kramnik hafi spilað út nokkru sem máli skiptir leikur Ivantsjúk af sér, 42. Kf2 eða 42. Kh2 ætti að duga til jafnteflis .

42. Db4? Dc6+ 43. Kf2 Hb5! 44. Dd4

Eða 44. Dxa4 Hb2'45. Ke3 Dc5'46. Kd3 Hg2! o.s.frv.

44.... Dc2+ 45. Kf3 Hb2!

Þungu fallstykkin sjá um mátsóknina. Svartur gafst upp.

Lausnin

Gunnar Finnlaugsson sem býr í Svíþjóð var fljótur að finna lausnina á hjálparmáts-dæminu sem birt var fyrir viku:

Mát í 5. leik, RxH mát. Hvernig féllu leikir?

Fyrsti leikurinn,1. e2-e4, er gefinn. Síðan kemur 1.... Rf6 2. f3 Rxe4 3. De2 Rg3 4. Dxe7+ Dxe7 5. Kf2 Rxh1 mát!

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 1. september 2013.

Skákþættir Morgunblaðsins

[Event "World Cup"] [Site "0:12:33-0:15:33"] [Date "2013.08.20"] [EventDate "2013.08.11"] [Round "4.1"] [Result "0-1"] [White "Vassily Ivanchuk"] [Black "Vladimir Kramnik"] [ECO "D37"] [WhiteElo "?"] [BlackElo "?"] [PlyCount "90"] 1.d4 Nf6 2.c4 e6 3.Nf3 d5 4.Nc3 Be7 5.Bf4 O-O 6.e3 Nbd7 7.c5 Nh5 8.Bd3 Nxf4 9.exf4 b6 10.b4 a5 11.a3 c6 12.O-O Qc7 13.g3 Ba6 14.Bxa6 Rxa6 15.Qe2 Rfa8 16.b5 cxb5 17.Nxd5 exd5 18.Qxe7 Rc8 19.Rab1 bxc5 20.Rxb5 Re6 21.Qg5 h6 22.Qxd5 Rd6 23.Qa2 Qc6 24.Qe2 cxd4 25.Rfb1 a4 26.Ne1 Nc5 27.Nd3 Nxd3 28.Qxd3 Qc3 29.Rd1 Re6 30.Re5 Rxe5 31.fxe5 Qb3 32.Qxd4 Qxa3 33.Kg2 Qb3 34.Qd7 Ra8 35.Rd3 Qe6 36.Qb7 Qc8 37.Qf3 Ra5 38.Ra3 Qe8 39.Qe4 g6 40.f4 h5 41.h4 Kg7 42.Qb4 Qc6+ 43.Kf2 Rb5 44.Qd4 Qc2+ 45.Kf3 Rb2 0-1

NM öldunga: Friðrik vann í dag

Önnur umferð Norðurlandamóts öldunga fór fram í dag í Borgundarhólmi. Friðrik Ólafsson (2407) vann sænska alþjóðlega meistarann Peder Berkell (2201) í vel tefldri sóknarskák.

Áskell Örn Kárason gerði jafntefli við danska FIDE-meistarann Jörgen Hvenekilde (2109). Sigurður Kristjánsson (1912) vann sína skák. Friðrik hefur 1,5 vinning en Áskell og Sigurður hafa 1 vinning.

Danirnir Jens Kristiansen (2405), sem er núverandi heimsmeistari öldunga, og Jörn Sloth (2322) sem er núverandi Norðurlandameistari öldunga eru efstir með 2 vinninga. Friðrik er í 3.-8. sæti. Friðrik teflir á morgun við stigalágan heimamann (1788).

32 skákmenn taka þátt í mótinu frá öllum Norðurlöndunum nema Færeyjum. Þar af eru þrír stórmeistarar og fjórir FIDE-meistarar.

Friðrik er stigahæstur keppenda, Áskell er nr. 7 í stigaröðinni og Sigurður nr. 18.

• Heimasíða mótsins
• Beinar útsendingar (hefjast almennt kl. 11)

Hraðskákkeppni taflfélaga: Úrslitin hefjast kl. 14

Úrslit Hraðskákkeppni taflfélaga hefjast nú kl. 14 í dag. Það eru Goðinn-Mátar og Víkingaklúbburinn sem tefla til úrslita. Viðureignin fer fram í húsnæði Skákskólans.

Hægt verður að fylgjast með gangi mála á Chess-Results en úrvalsaðstæður verða á skákstað. Úrslitum hverrar umferðar verður varpað upp á vegg.

Álit nokkurra skákspekinga hafa borist til viðbótar og svo virðist sem skákspekingarnir þjóðarinnar hallist að sigri Goðans-Máta þrátt fyrir lið Víkingaklúbbsins sé heldur stigahærra á pappírnum. Allir spá þó afar jafnri viðureign!

Björn Ívar Karlsson, Taflfélagi Vestmannaeyja

37,5 - 34,5 fyrir Goðann/Máta. Goðinn/Mátar fara langt á mikilli breidd sem þeir búa yfir. Auk þess eiga Helgi Áss og Þröstur eftir að standa fyrir sínu á fyrstu tveimur borðunum. Víkingaklúbburinn hefur engu að síður innan sinna raða marga frábæra hraðskákmenn en breiddin sigrar í þetta skiptið.

Stefán Bergsson, Skákfélagi Akureyrar

Goðinn-Mátar mun standa uppi sem sigurvegari. Fyrir því eru aðallega tvær ástæður: Mikil breidd og góður liðsandi. Það hefur sýnt sig að það skiptir máli að hafa um 10 sterka hraðskákmenn í hverri viðureign, þannig að það sé hægt að deila álaginu, rugla andstæðingana í ríminu með tíðum innáskiptingum og láta þá tefla mest sem eru í stuði það og það skiptið. Svo skiptir liðsandi alltaf máli og hann er afar góður hjá Goðunum. Spái nokkuð öruggum sigri: 40-32.

Hjörvar Steinn Grétarsson, Taflfélaginu Helli

Þetta verður hörkuviðureign milla tveggja stórfélaga. Þetta eru þau félög sem hafa teflt hvað best í þessari keppni í ár. Úrslitin munu að mínu áliti ráðast á því hvort liðið verður betur mannað á morgun. Ef bæði lið verða fullmönnuð þá tel ég að úrslitin ráðist á því hversu góður Helgi Áss verður, hann hefur hingað til verið frekar slakur í keppninni og á mikið inni. Ég býst við því að Goðinn taki þetta með minnsta mun 37-35 og þar verður Þröstur Þórhallsson með 9,5 vinninga, grjótharður eins og alltaf í hraðskákinni. 

Vonandi gefa flestir sér tíma til að koma og horfa enda um algjört augnakonfekt að ræða þegar þessi lið mætast.

Gunnar Björnsson, Taflfélaginu Helli 

Þetta verður epísk spenna. Víkingaklúbburinn er með heldur stigahærra lið á efri borðunum. Á móti kemur að margir Goð/Mátar eru sterkari hlutfallslega í hraðskák en kappskák. Goðinn/Mátar hefur auk þess töluvert stærri hóp sterkra skákmanna en Víkingar. Liðsstjóri þeirra Jón Þorvaldsson er ákaflega mikill keppnismaður og mikill refur sem slíkur.

En Víkingar hafa söguna með sér. Þeir eru sigurvegarar. Þeir unnu Íslandsmót skákfélaga nokkuð örugglega í vor og lögðu Goðann í úrslitum í fyrra. Gunnar Freyr þekkir ekki og skilur það að lenda í öðru sæti. Hefðin, þótt hún sé ekki löng, er því með Víkingum. Gunnar hefur margsannað sem ákaflega snjall og útsmoginn liðsstjóri sem gefst aldrei upp.

En hvernig fer þá? Ég spái bráðabana 36-36 og að breiddin skili Goðanum/Mátum sigri í bráðabana.

NM öldunga: Íslendingarnir byrja ekki vel

NM öldunga hófst í gær í dönsku eyjunni Borgundarhólmi. Þrír íslenskir skákmenn taka þátt; Friðrik Ólafsson (2407), Áskell Örn Kárason (2205) og Sigurður E. Kristjánsson (1912). Ekki gekk vel í fyrstu umferð. Friðrik og Áskell gerði jafntefli við stigalægri andstæðinga og Sigurður tapaði sinni skák.

Önnur umferð fer fram í dag. Þá teflir Friðrik við sænska FIDE-meistarann Peter Berkell (2201) og Áskell við danska FIDE-meistarann Jörgen Hvenekilde (2109).

32 skákmenn taka þátt í mótinu frá öllum Norðurlöndunum nema Færeyjum. Þar af eru þrír stórmeistarar og fjórir FIDE-meistarar.

Meðal keppenda auk Íslendinga eru Daninn Jens Kristiansen (2405), sem er núverandi heimsmeistari öldunga, Daninn Jörth Sloth (2322) sem er núverandi Norðurlandameistari, sigraði á mótinu í Reykjavík 2011 og Finninn Heikki Westerinen (2281).

Friðrik er stigahæstur keppenda, Áskell er nr. 7 í stigaröðinni og Sigurður nr. 18.

• Heimasíða mótsins
• Beinar útsendingar (hefjast almennt kl. 11)

 

Hvað segja skákspekingarnir?

Skák.is hefur leitað til nokkurra valinkunnra skákspekinga og þeir beðnir um að spá til um úrslit í úrslitaviðureignar Goðans-Máta og Víkingaklúbbsins í Hraðskákkeppni taflfélaga á morgun. Heyrum hvað nokkrir þeirra segja en fleiri spár verða birtar á morgun. Skákspekingum er velkomið að senda spár sínar í netfangið [e-mail].

Halldór Brynjar Halldórsson, Skákfélagi Akureyrar

Víkingaklúbburinn 36,5 - Goðinn Mátar 35,5

Arnar Þorsteinsson missir af bráðabana fyrir sitt lið með því að patta Davíð Kjartansson viljandi með drottningu og hrók gegn kóng. Arnar saknar heimahagana og á í kjölfarið glæsta endurkomu í SA, þar sem hann leggur hvern málaliðann á fætur öðrum að velli á ÍS næsta vetur. Hann missir þó niður hálfan þann veturinn með hæpnu jafntefli við Jón Árna Jónsson.

Snorri G. Bergsson, Taflfélagi Reykjavíkur

Þarf ekkert að spá. Allir vita að Goðmátar verða með minnstu mögulegu forystu fyrir síðustu umferð en Víkingar ná að jafna þegar ein skák er eftir. Síðasta skákin verður Helgi Áss og Björn Þorfinnsson þar sem Helgi mátar Björn um leið og hann fellur á tíma. Goðmátar vinna með minnsta mun. Eftir matchinn mun þó Gunnar Freyr sigra Jón Þorvaldsson örugglega í sjómanni en Hermann Aðalsteinsson leggja Magnús Örn í bónda.

Halldór Grétar Einarsson, Taflfélagi Bolungarvíkur

37,5 - 34,5 fyrir GoðaMáta.

Díselvélin sigrar bensínvélina!

Björgvin S. Guðmundsson, Skákfélagi Selfoss og nágrennis

Þar sem ég var sannspár í viðureign Goðinn-Mátar gegn Bolungarvík þá vil ég leyfa mér að spá GM sigri á Víkingaklúbbnum. Bæði liðin gríðarlega sterk en GM sigrar þetta með 5-7 vinningum.

Viðureignin hefst kl. 14 á morgun. Teflt verður í húsnæði Skákskólans, Faxafeni 12. Það er Taflfélagið Hellir sem stendur fyrir keppninni nú sem endranær.