Alþjóðlegt hraðskákmót T.R. fer fram í kvöld

Þrjár af erlendu stórstjörnum stórmeistaramóts Taflfélags Reykjavíkur, þeir Sergey Fedorchuk (2667), Mikhaylo Oleksienko (2608) og Helgi Dam Ziska (2485), munu á miðvikudagskvöldið 9. október kl. 20 tefla á sex manna alþjóðlegu hraðskákmóti, Reykjavik Chess Club - Tölvutek International Blitz 2013, þar sem allir tefla við alla í tvöfaldri umferð. 

Íslenskir skákmenn kepptu nýverið um þrjú laus sæti í mótinu og munu Helgi Áss Grétarsson, Daði Ómarsson og Oliver Aron Jóhannesson etja kappi við erlendu meistarana.  Verðlaun í mótinu verða kr. 30.000, 15.000 og 10.000 fyrir þrjú efstu sætin.

• Stórmeistaramót Taflfélags Reykjavíkur

Fyrirlestur og spjall um Fischer í Fischers-setri

Gunnar Finnlaugsson verður með umfjöllun um bækur sem skrifaðar hafa verið um Bobby Fischer n.k. miðvikudagskvöld 9. okt. Kl: 19:00. Á annaðhundrað bækur hafa verið skrifaðar um ævi Fischers og hefur Gunnar lesið fjölmargar af þeim og hefur því frá mörgu athyglisverðu  að segja. Að loknu kaffi og spjalli verður tefld hraðskák á vegum skákfélagsins. Allir eru velkomnir og þá sérstaklega "riddararnir" sem stóðu vaktina í sumar í setrinu. Hraðskákin hefst um kl. 20:00. 

Einnig munu félagsmenn leggja á ráðin varðandi komandi Íslandsmót skákfélaga sem hefst næstu helgi.  Vel gegnur að manna liðin tvö sem SSON sendir í keppnina og birtist liðskipan von bráðar á SSON síðunni.

Óskar, Vignir og Verónika unnu í lokaumferðinni

Níunda og síðasta umferð EM ungmenna fór fram í dag í Budva í Svartfjallalandi. Óskvar Víkingur Davíðsson (U8), Vignir Vatnar Stefánsson (U10) og Veronika Steinunn Magnúsdóttir (U16) unnu en Felix Steinþórsson (U12) og Mikael Jóhann Karlsson (U18) gerðu jafntefli. 

Vignir varð efstur íslensku krakkannan en hann hlaut 6 vinninga og endaði í 11.-24. sæti (12. sæti á stigum). Óskar, Hilmir og Jón Kristinn Þorgeirsson (U14) hlutu 4,5 vinning.

Dawid Kolka (U14) og Jón Kristinn hagnast mest á stigum af íslenskum krökkunum. Dawid um 26 stig en Jón Kristinn um 19 stig.

Lokastaða íslensku keppendanna:

 

SNo	Name	RtgI	Pts.	Rk.	Rp	rtg+/-	Group
12	Davidsson Oskar Vikingur	1379	4.5	46	0	0.00	Open8
12	Stefansson Vignir Vatnar	1782	6.0	13	1683	-9.90	Open10
72	Heimisson Hilmir Freyr	1742	4.5	72	1750	-2.40	Open12
108	Steinthorsson Felix	1513	3.0	111	1546	2.25	Open12
88	Thorgeirsson Jon Kristinn	1824	4.5	59	1936	19.35	Open14
108	Kolka Dawid	1666	3.5	94	1831	25.50	Open14
57	Karlsson Mikael Johann	2068	2.5	73	1944	-24.60	Open18
59	Magnusdottir Veronika Steinun	1577	3.0	59	1490	-15.45	Girls16

 

Mikael Jóhann tefldi í flokki 18 ára og yngri, Jón Kristinn og Dawid í flokki 14 ára og yngri, Hilmir Freyr og Felix í flokki 12 ára og yngri, Vignir Vatnar í flokki 10 ára og yngri, Óskar Víkingur í flokki 8 ára og yngri og Veronika Steinunn í flokki stúlkna 16 ára og yngri. Fararstjórar og þjálfarar voru Helgi Ólafsson og Hjörvar Steinn Grétarsson.

• Heimasíða mótsins
• Facebook-síða íslenska hópsins
• Chess-Results (úrslit Íslendinga)
• Bloggsíða Óskars Víkings

Fjöltefli Mikhailo Oleksienko við börnin í T.R.

Miðvikudaginn 9. október kl. 16.00 mun úkraínski ofurstórmeistarinn Mikhaylo Oleksienko (2608)  tefla fjöltefli við nemendur Taflfélags Reykjavíkur í skákhöll Taflfélagsins.  Oleksienko, sem teflir áStórmeistarmóti félagsins 1. -8. október, er félagsmaður T.R. og hefur margsinnis keppt fyrir félagið á Íslandsmóti skákfélaga.

Með þessum viðburði vill félagið gefa ungum og upprennandi skákkrökkum tækifæri á að spreyta sig á taflborðinu gegn einni af aðalstjörnum félagsins.  Áhugasamir geta skráð sig með því að senda tölvupóst á [e-mail] , en einnig munum við kynna betur fjölteflið og taka við skráningum á félagsæfingum Taflfélagsins.

Takið endilega þátt í fjölteflinu og skráið ykkur á [e-mail](nafn, fæðingarár og símanúmer).

Fedorchuk sigurvegari Stórmeistaramóts TR - Guðmundur með jafntelfi við Oleksienko

 

Úkraínumaðurinn Sergei Fedorchuk (2656) sigraði á Stórmeistaramóti TR sem lauk í dag. Fedorchuk vann Simon Bekker-Jensen (2420) í lokaumferðinni. Landi hans Oleksienko (2608) varð annar hálfum vinningi á eftir en þeir kumpánar höfðu mikla yfirburði. Nýjasti landsliðsmaður Íslendinga, Guðmundur Kjartansson (2447), tefldi Íslendinga best og gerði jafntefli við Oleksienko í lokaumferðinni.

 

Guðmundur varð í 3.-4. sæti ásamt Henrik Danielsen (2501), sem vann Þorvarð F. Ólafsson (2266) en þeir tveir verða fulltrúar Íslands á NM í Danmörku síðar í mánuðnum.

Guðmundur hækkar um 13 stig fyrir frammistöðuna sína og Henrik um 2 stig. Hinir íslensku keppendurnir lækka eitthað á stigum.

• Chess-Results
• Vefur mótsins
• Myndir (ÁK)

Garry Kasparov í forsetaframboð hjá FIDE

Garry Kasparov tilkynnti í gærkvöldi um forsetaframboð hjá FIDE árið 2014 en kosningar fara fram á FIDE-þingi í Tromsö á næsta ári.  Kasparov virðist hafa unnið heimavinnuna mjög vel og virðist þetta framboð vera mun betur undirbúið en framboð Karpov árið 2010. Kasparov hefur fengið í lið með sér sterka meðframbjóðendur.

Kirsan Ilyumzhinov, forseti FIDE frá 1995, hélt mjög sérstaka ræðu í gær á FIDE-þingi. Vissu menn lengi vel ekki hvort hann væri að draga sig til baka eða ekki eða hvort hann ætlaði að bjóða sig fram að ári og lokinni ræðu var salurinn eitt spurningamerki. 

Eftir ræðuna var hann spurður hreint út af einu þingfulltrúa hvort hann væri í framboði og þá kom loks hreint já!

Nánar má lesa um framboð Kasparovs á Chessvibes.

 

 

 

Níunda og síðasta umferð Stórmeistaramóts TR hefst kl. 11

Níunda og síðasta umferð Stórmeistaramóts Taflfélags Reykjavíkur hefst kl. 11 í dag og eru skákir umferðarinnar sýndar beint. 

Í umferð dagsins mætast Oleksienko - Guðmundur, Bekker-Jensen - Fedorchuk, Sigurbjörn - Bragi og Henrik - Þorvarður.

Beinar útsendingar frá umferð dagsins má nálgast hér.

• Vefur mótsins
• Chess-Results
• Myndir (ÁK)

Íslandsmót skákfélaga hefst á fimmtudaginn í Rimaskóla

Íslandsmót skákfélaga 2013-14 hefst á fimmtudegi í ár en sú breyting hefur átt sér stað að fyrsta deildin hefst fyrr vegna þess að fjölgað hefur um tvö lið í efstu deild. Vegna sameiningar Taflfélagsins Hellis og Goðans-Máta losnaði eitt sæti í efstu deild, þar sem hvert félag má hafa aðeins hafa þeir tvær sveitir, en það sæti tók Vinaskákfélagið eftir að allmargar sveitir höfðu beðist undan keppnisrétt í efstu deild.

Verður það teljast afar athyglisvert að þar með fer hið nýlega félag Vinaskákfélag alla leið úr þriðju deild í þá efstu en félagið hafði áunnið sér keppnisrétt í 2. deild með góðum árangri á síðasta Íslandsmóti skákfélaga.

Keppnin í fyrstu deild hefst á fimmtudagskvöld kl. 19:30 en keppni í öðrum deildum á föstudagskvöld kl. 20. Rétt er að vekja athygli á því að leik Íslands og Kýpur á föstudagskvöld verður varpað á risaskjá í Rimaskóla fyrir fótboltaáhugamenn.

Endanleg töfluröðun í 1. og 2. deild liggur loks fyrir eftir hrókeringar síðustu daga og má finna á neðangreindum tenglum. Enn hefur ekki verið dregið um töfluröð í 3. deild (þar sem þó fyrir liggur hvaða lið taka þátt) né í 4. deild þar sem endanlegur keppendalisti liggur ekki enn fyrir.

• Töfluröð 1. deildar
• Töfluröð 2. deildar
• Þátttökulið í 3. deildar (töfluröð ekki tilbúin)
• 4. deild (ekki tilbúin)

Að öðru leyti er vitnað í eldri upplýsingar á Skák.is og tölvupósts sem sendur var nýlega til aðildarfélaga SÍ en þar sagði meðal annars:

Fyrri hluti Íslandsmóts skákfélaga 2013-2014 fer fram dagana 10.-13. október nk. Mótið fer fram í Rimaskóla í Reykjavík.  Fyrsta umferð (eingöngu í 1.deild) mun hefjast kl. 19.30 fimmtudaginn 10. október. 

Aðrar deildir munu hefja taflmennsku föstudaginn 11. október kl. 20.00 og síðan verður teflt laugardaginn 12. október kl. 11.00 og kl. 17.00 sama dag. Síðasta umferðin í fyrri hlutanum hefst kl. 11.00 sunnudaginn 13. október.

Umhugsunartími er 90 mín. á skákina + 30 sek. viðbótartími bætist við eftir hvern leik.

Reglur:

• Skáklög SÍ (16.-21. grein á við Íslandsmót skákfélaga)
• Reglugerð um Íslandsmót skákfélaga

EM ungmenna: Hilmir Freyr og Jón Kristinn unnu í næstsíðustu umferð

Hilmir Freyr Heimisson (U12) og Jón Kristinn Þorgeirsson (U14) unnu báðir í áttundu umferð EM ungmenna sem fram fór í Budva í Svartfjallalandi í dag. Báðir hafa þeir farið mikinn í síðustu umferðunum og hefur Jón Kristinn t.a.m. unnið þrjár skákir í röð.

Vignir Vatnar Stefánsson (U10), Dawid Kolka (U14) og Veronika Steinunn Magnúsdóttir (U16) gerðu jafntefli. Alls komu því 3,5 vinningur í hús í dag og einhver bið því í sundsprett Helga Ólafssonar sem vonandi verður tekinn að lokinni lokaumferðinni.

Vignir er efstur íslensku krakkanna með 5 vinninga. Hilmir og Jón Kristinn eru næstir með 4,5 vinning. Óskar Víkingur Davíðsson (U8) og Dawid hafa 3,5 vinninga.

Lokaumferðin fer fram á morgun.

Úrslit 8. umferðar:

Name	FED	Rtg	Result	Name	FED	Rtg
Vdovin Georgy	RUS	0	1 - 0	Davidsson Oskar Vikingur	ISL	1379
De Boer Eelke	NED	0	½ - ½	Stefansson Vignir Vatnar	ISL	1782
Heimisson Hilmir Freyr	ISL	1742	1 - 0	Baenziger Fabian	SUI	1679
Steinthorsson Felix	ISL	1513	0 - 1	Maksimovic Bojan	BIH	1744
Kavon Rastislav	SVK	1989	0 - 1	Thorgeirsson Jon Kristinn	ISL	1824
Kali Omer	ISR	1909	½ - ½	Kolka Dawid	ISL	1666
Danov Radi	BUL	2031	1 - 0	Karlsson Mikael Johann	ISL	2068
Mendes Ines Goncalves Alves R	POR	1482	½ - ½	Magnusdottir Veronika Steinun	ISL	1577

Staða íslensku keppendanna:

SNo		Name	RtgI	Pts.	Rk.	Rp	rtg+/-	Group
12		Davidsson Oskar Vikingur	1379	3.5	54	0	0.00	Open8
12		Stefansson Vignir Vatnar	1782	5.0	30	1683	-9.90	Open10
72		Heimisson Hilmir Freyr	1742	4.5	52	1744	-1.05	Open12
108		Steinthorsson Felix	1513	2.5	110	1546	2.25	Open12
88		Thorgeirsson Jon Kristinn	1824	4.5	44	1968	22.95	Open14
108		Kolka Dawid	1666	3.5	83	1866	28.35	Open14
57		Karlsson Mikael Johann	2068	2.0	76	1929	-23.40	Open18
59		Magnusdottir Veronika Steinun	1577	2.0	62	1490	-15.45	Girls16

Mikael Jóhann teflir í flokki 18 ára og yngri, Jón Kristinn og Dawid í flokki 14 ára og yngri, Hilmir Freyr og Felix í flokki 12 ára og yngri, Vignir Vatnar í flokki 10 ára og yngri, Óskar Víkingur í flokki 8 ára og yngri og Veronika Steinunn í flokki stúlkna 16 ára og yngri. Fararstjórar og þjálfarar eru Helgi Ólafsson og Hjörvar Steinn Grétarsson.

• Heimasíða mótsins
• Facebook-síða íslenska hópsins
• Chess-Results (úrslit Íslendinga)
• Bloggsíða Óskars Víkings

Úkraínumenn með yfirburði fyrir lokaumferðina

Eins og margir spáðu gerðu Úkraínumennirnir Sergey Fedorchuk (2656) og Mikhailo Oleksienko (2608) stutt jafntefli í áttundu og síðustu umferð Stórmeistaramóts TR sem fram fór í dag. Þeir hafa mikla yfirburði, hafa tveggja vinninga forskot á Guðmund Kjartansson (2434) sem er þriðji eftir sigur á Sigurbirni Björnssyni (2395).

Henrik Danielsen (2501) vann Braga Þorfinnsson (2483) í skák þessara landsliðsmanna en öðrum skákum lauk með jafntefli. Lokaumferðin fer fram á morgun og hefst kl. 11. Þá mætast meðal annars Oleksienko og Guðmundur.

• Chess-Results
• Vefur mótsins
• Myndir (ÁK)