Áttunda og næstsíðasta umferð Stórmeistaramóts hefst kl. 15

Áttunda og næstsíðata umferð Stórmeistaramóts Taflfélags Reykjavíkur hefst kl. 15 í dag og eru skákir umferðarinnar sýndar beint. 

Í umferð dagsins mætast Fedorchuk - Oleksienko, Guðmundur -Sigurbjörn, Bragi - Henrik og Ziska - Bekker-Jensen.

Beinar útsendingar frá umferð dagsins má nálgast hér.

• Vefur mótsins
• Chess-Results
• Myndir (ÁK)

Nýtt félag verður til: GM-Hellir

Á félagsfundum Taflfélagsins Hellis og Skákfélagsins Goðans-Máta í gær var samþykkt að Goðinn-Mátar og Hellis sameinuðust í eitt félag Skákfélagið GM Hellir skv. samrunasamningi sem lagður var fram á fundunum. Líflegar umræður voru á fundunum um samninginn og skákmálefni en fram kom vilji fundarmann að ná fram markmiðum með sameiningunni.

Samkvæmt samningnum renna Hellir og Goðinn Mátar saman í nýtt félag sem mun fá heitið „Skákfélagið GM Hellir" sem stendur fyrir "Goðinn, Mátar og Hellir". Á næsta ári yrði tekin ákvörðun um endanlega nafngift félagsins.

Hið sameinaða félag verður starfrækt á tveimur svæðum, norðursvæði og suðursvæði. Á norðursvæði verða höfuðstöðvar GM Hellis í Þingeyjarsýslu og aðal stafsvettvangur Þingeyjarsýsla og nágrenni.  Á suðursvæði verða höfuðstöðvar félagsins í Reykjavík og aðal starfsvettvangur Reykjavík og nágrenni. Formaður GM Hellis verður Hermann Aðalsteinsson og varaformaður Vigfús Vigfússon. Aðrir í starfsstjórn félagsins fram að aðalfundi 2014 verða Andrea Margrét Gunnarsdóttir, Jóhanna Björg Jóhannsdóttir, Jón Þorvaldsson, Pálmi Ragnar Pétursson, Sigurbjörn Ásmundsson, Steinþór Baldursson og Magnús Teitsson

Meðal helstu markmiða með samrunanum eru:

Öflugt skákfélag

Nýja félagið verður eitt öflugasta skákfélag landsins þar sem jafnframt verður hlúð að ólíkum þörfum félagsmanna í skáklegu tilliti. Traustur bakgrunnur beggja félaga og augljós samlegðaráhrif, ásamt sterkum félagaskrám og góðum liðsanda, munu tryggja að þetta nái fram að ganga. Jafnframt er vilji til að félagið leggi sitt af mörkum til nýsköpunar og framþróunar í íslenskum skákheimi.

Efling ungmennastarfs

Með öflugu ungmennastarfi er lagður grunnur að framtíð félagsins. Gróskumikið ungmennastarf Hellis á suðursvæði sem á sér sterkt bakland í Breiðholtinu og víðar leggst vel að þessu markmiði. Ungmennastarfið á norðursvæði, sem þegar er komið á góðan rekspöl, mun einnig styrkjast. Aðilar stefna að því að tryggja öflugt ungmennastarf á báðum starfssvæðum, m.a. með samstarfi um kennslu og samnýtingu kennsluefnis en bæði félögin búa yfir mjög færum kennurum á þessu sviði. Með tengingu við öflugt starf á meistaraflokksstigi mun ungmennastarfið styrkjast enn frekar. Aðilar eru sammála um að stofna barna- og unglingaráð sem fær það hlutverk að annast útfærslu þessara markmiða.

Styrking afreks- og fullorðinsstarfs

Aðilar eru sammála um að auka enn frekar tækifæri fullorðinna félagsmanna til skákiðkunar og þátttöku í félagsstarfi. Hér gegnir lykilhlutverki sterkur grunnur GM varðandi utanumhald um skákiðkun á meistaraflokksstigi og þátttöku þeirra í mótum, þ.m.t. Íslandsmóti skákfélaga. Aðilar eru sammála um að koma á laggirnar meistaraflokksráði sem fær það hlutverk að annast útfærslu þessara markmiða.

Efling mótahalds

Aðilar eru sammála um að styrkja enn frekar mótahald á báðum starfssvæðum nýja félagsins. Verður þar m.a. unnið að því að standa fyrir alþjóðlegum mótum og fitja upp á fleiri nýjungum í mótahaldi, ásamt því að efla þau mót sem þegar eru á dagskrá, svo sem Framsýnarmótið, Gestamót GM, Meistaramót Hellis og Unglingameistaramót Hellis. Jafnframt stendur metnaður félagsins til að taka þátt í Evrópumóti taflfélaga. Áhersla verður lögð á að auka aðgengi ungmenna félagsins að heppilegum kappskákmótum. Aðilar eru sammála um að stofna sérstaka mótanefnd sem fær það hlutverk að annast útfærslu þessara markmiða.

Styrking félagstarfs

Aðilar eru sammála um að tryggja að félagsmönnum standi til boða aðgengi að fjölbreyttum tækifærum til að iðka skák, fræðast um hana í gegnum öflugt félagsstarf og taka framförum. Einnig er afar mikilvægt að eiga kost á því að njóta skemmtilegs samneytis í góðum hópi. Markmiðið er að með aðild að félaginu upplifi félagsmenn sig njóta forréttinda með þátttöku í starfseminni. Þannig verður hagur félagsins til langframa best tryggður.

Efling kvennastarfs

Sérstök áhersla verður á að byggja upp kvennaskák hjá félaginu og styðja viðhana. Hér skiptir miklu máli að kvennalið Hellis er þegar öflugt. Á þessu má því byggja - því er það markmið félagsins að laða stúlkur, bæði sunnan heiða og norðan, til þessarar skemmtilegu og þroskandi hugaríþróttar. Það er verðugt markmið að leiðrétta þá slagsíðu á þátttöku kynjanna í skák sem fyrir hendi er. Aðilar eru sammála um að stofna sérstakt kvennaskákráð sem fær það hlutverk að annast útfærslu þessara markmiða.

Með þessum samruna verður til öflugt skákfélag sem mun vinna að enn frekari útbreiðslu skáklistarinnar. Áhersla verður lögð á markvisst barna- og unglingastarf á skemmtilegum nótum ásamt því að slá öflugum ramma um skákiðkun fullorðinna, jafnt afreks- sem áhugamanna. Félagið mun leggja sig fram um að laða til leiks lítt virka skákunnendur af báðum kynjum og skapa þeim aðstöðu til að njóta þess að tefla saman í góðum hópi. Byggt verður á sáttmála félaganna um gagnkvæma virðingu, góðan starfsanda og vilja til að ná árangri.

Atkvöld hjá GM Helli í kvöld

Taflfélagið Hellir heldur atkvöld mánudaginn  7. október 2013 og hefst mótið kl. 20:00. Fyrst eru tefldar 3 hraðskákir þar sem hvor keppandi hefur 5 mínútur til að ljúka skákinni og síðan þrjár atskákir, með fimmtán mínútna umhugsun. Teflt er í félagsheimili Hellis í Álfabakka 14a í Mjóddinni. 

Sigurvegarinn á atkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna
möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Gagnaveitumótið: Skákir sjöundu umferðar

Kjartan Maack hefur slegið inn skákir sjöundu umferðar Gagnaveitumótsins - Haustmóts TR sem fram fór í gær. Þær fylgja með sem viðhengi.

Áttunda og næstsíðasta umferð fer fram miðvikudaginn 16. mars og hefst kl. 19:30

• Heimasíða TR
• Chess-Results

Einar Hjalti efstur á Gagnaveitumótinu

FIDE-meistarinn Einar Hjalti Jensson (2305) er efstur á Gagnaveitumótinu - Haustmóti TR, að lokinni sjöundu umferð sem fram fór í kvöld. Einar gerði jafntefli við Jón Viktor Gunnarsson (2409) sem er í 2.-3. sæti ásamt stórmeistaranum Stefáni Kristjánssyni (2491) sem átti einu vinningsskák dagsins þegar hann vann Jóhann H. Ragnarsson (2037). Núna er 10 daga hlé a mótinu eða til 16. október en eitthvað er þó um frestaðar skákir sem tefldar verða í millitíðinni.

B-flokkur:

Jón Trausti Harðarson (1930) er efstur með 6,5 vinning, Ingi Tandri Traustason (1817) er annar með 5,5 vinning og Þórir Benediktsson (1942) er þriðji með 4,5 vinning.

C-flokkur:

Sigurlaug R. Friðþjófsdóttir (1735) er efst með 4,5 vinning, Valgarð Ingibergsson (1892) og Sigurjón Haraldsson (1846) eru næstir með 4 vinninga.

Opinn flokkur:

Haukur Halldórsson (1689) er efstur með 6 vinninga. Sóley Lind Pálsdóttir (1412) er önnur með 5,5 vinning. Í 3.-5. sæti með 4,5 vinning eru Hilmir Hrafnsson (1351), Ragnar Árnason (1537) og Guðmundur Agnar Bragason (1319).

• Heimasíða TR
• Chess-Results 
• Myndaalbúm (GB)

Stórmeistaramót TR: Úkraínumenn í sérflokki

Yfirburðir úkraínsku ofurstórmeistaranna í Stórmeistaramóti Taflfélags Reykjavíkur eru algjörir.  Þegar tvær umferðir lifa af móti eru Sergey Fedorchuk (2656) og Mikhailo Oleksienko (2608) jafnir í efsta sæti með 6,5 vinning, 2,5 hálfum vinningi meira en næstu keppendur sem eru danski alþjóðlegi meistarinn Simon Bekker-Jensen (2420) og alþjóðlegi meistarinn Guðmundur Kjartansson (2434).

Það er magnað að fylgjast með svo sterkum skákmönnum tefla og þeir hafa margoft sýnt í mótinu hversvegna þeir hafa á milli 2600 og 2700 Elo stig.  Heilt yfir hafa þeir verið í litlum vandræðum þó að stöku sinnum hafi Íslendingarnir náð að sitja í þeim en hafa svo misst stöðurnar niður, oftar en ekki í endatöflum.  Til fróðleiks má geta þess að Oleksienko hafði það á orði að íslensku skákmennirnir þyrftu að stúdera endatöfl.  Gaman að þessu og vissulega aðeins vel meint hjá þeim úkraínska.

Áttunda umferð fer fram á morgun og hefst kl. 15.  Þá mætast m.a. Fedorchuk og Oleksienko og einhverjir myndu sjálfsagt ganga svo langt að spá stuttu jafntefli.  Á vef mótsins eru ítarlegri pistlar með uppgjöri hverrar umferðar fyrir sig þar sem Ingvar Þór Jóhannesson fer hamförum í skemmtilegum og fróðlegum skrifum sínum.

• Chess-Results
• Vefur mótsins
• Myndir (ÁK)

EM ungmenna: Besta umferð Íslendinga

Vel hefur gengið í tveimur síðustu umferðum EM ungmenna sem fram fer í Budva í Svartfjallalandi. Í gær náðust 4 vinningar af 8 í hús sem var besti árangurinn hingað til. Það þýddi að Hjörvar Steinn Grétarsson, annar þjálfari krakkana, fór í sund í öllum fötunum, en því hafði hann lofað þegar 50% árangur kæmi í hús.

Í dag gekk enn betur þegar 5 vinningar komu í hús. Bíða nú menn spenntir eftir að Helgi Ólafsson, skólastjóri Skákskóla Íslands feti í fótspor Hjörvars.

Óskar Víkingur Davíðsson (U8), Hilmir Freyr Heimisson (U12), Jón Kristinn Þorgeirsson (U14), Dawid Kolka (U14) unnu í dag en Felix Steinþórsson (U12) og Veronika Steinunn Magnúsdóttir (U16) gerðu jafntefli. Aðrir töpuðu.

Vignir Vatnar Stefánsson (U10) er efstur íslensku keppendanna með 4,5 vinning. Óskar Víkingur, Hilmir Freyr og Jón Kristinn hafa 3,5 vinning.

Úrslit 7. umferðar:

Name	FED	Rtg	Result	Name	FED	Rtg
Davidsson Oskar Vikingur	ISL	1379	1 - 0	Manzanov Igor	RUS	0
Stefansson Vignir Vatnar	ISL	1782	0 - 1	Szczurek Krzysztof	POL	1729
Nordquelle Daniel	NOR	0	0 - 1	Heimisson Hilmir Freyr	ISL	1742
Poliakov Artem	RUS	1709	½ - ½	Steinthorsson Felix	ISL	1513
Thorgeirsson Jon Kristinn	ISL	1824	1 - 0	Demidov Jan	FIN	1921
Kolka Dawid	ISL	1666	1 - 0	Ly Dominik	AUT	1872
Karlsson Mikael Johann	ISL	2068	0 - 1	Kjoita Henning	NOR	2033
Magnusdottir Veronika Steinun	ISL	1577	½ - ½	Kyrkjebo Hanna B.	NOR	1615

 
Staða íslensku keppendanna:

SNo	Name	RtgI	Pts.	Rk.	Rp	rtg+/-	Group
12	Davidsson Oskar Vikingur	1379	3.5	45	0	0.00	Open8
12	Stefansson Vignir Vatnar	1782	4.5	26	1683	-9.90	Open10
72	Heimisson Hilmir Freyr	1742	3.5	70	1673	-7.20	Open12
108	Steinthorsson Felix	1513	2.5	107	1589	5.40	Open12
88	Thorgeirsson Jon Kristinn	1824	3.5	62	1916	12.15	Open14
108	Kolka Dawid	1666	3.0	88	1859	23.85	Open14
57	Karlsson Mikael Johann	2068	2.0	72	1977	-15.15	Open18
59	Magnusdottir Veronika Steinun	1577	1.5	62	1482	-13.50	Girls16

 

Mikael Jóhann teflir í flokki 18 ára og yngri, Jón Kristinn og Dawid í flokki 14 ára og yngri, Hilmir Freyr og Felix í flokki 12 ára og yngri, Vignir Vatnar í flokki 10 ára og yngri, Óskar Víkingur í flokki 8 ára og yngri og Veronika Steinunn í flokki stúlkna 16 ára og yngri. Fararstjórar og þjálfarar eru Helgi Ólafsson og Hjörvar Steinn Grétarsson.

• Heimasíða mótsins
• Facebook-síða íslenska hópsins
• Chess-Results (úrslit Íslendinga)
• Bloggsíða Óskars Víkings

Sigurður A. efstur á Haustmóti SA - Arion bankamótinu

Haustmót SA-Arion bankamótið hófst sl. fimmtudagskvöld 3. október. Mótið var auglýst sem sjö umferða mót með fyrirvara um minniháttar breytingar ef þurfa þætti þegar fjöldi þátttakenda lægi fyrir.  Þegar til kom mættu níu keppendur til leiks; heldur færri en vænta mátti. Kom reyndar í ljós að ýmsir sem höfðu áhuga voru forfallaðir á síðustu stundu.  Í samráði keppenda og mótsstjóra var nú ákveðið að breyta fyrirkomulagi mótsins nokkuð. Þá hafði það áhrif á fyrirfram ákveðna dagskrá að leikur Akureyrar og IBV í handbolta var átti að fara fram á laugardag og skv. reynslu er heldur hljóðbært í Íþróttahöllinni til þess að hægt sé að tefla þar meðan slíkur stórleikur fer fram. Því varð úr að þrjár fyrstu umferðirnar fóru fram á fimmtudagskvöldið og tvær þær næstu á föstudagskvöld. Þannig voru fimm fyrstu umferðirnar tefldar með atskáksniði. Sjötta umferðin var svo háð í dag, sunnudag og þá með umhugsunartímanum 60 mínútur á skák að viðbættri hálfri mínútu fyrir hvern leik. Þau tímamörk gilda líka fyrir þrjár síðustu umferðirnar sem verða tefldar 18. 19. og 20. október nk., að afloknu Íslandsmóti skákfélaga.  

Margt hefur gengið á á mótinu og nokkuð um óvænt úrslit. Þar ber hæst að Akureyrarmeistaranum sjálfum , Haraldi Haraldssyni, voru mjög mislagðar hendur í atskákunum og tapaði þremur fyrstu skákunum. Þetta tækifæri gripu þeir Sigurður og Smári og þustu fram úr keppinautum sínum, eins og sjá má af stöðunni eftir sex umferðir:  

Sigurður Arnarson          5 (af 5)

Smári Ólafsson              4,5 (af 5)

Símon Þórhallsson         4 (af 6)

Hjörleifur Halldórsson    2,5 (af 5)

Rúnar Ísleifsson            2,5 (af 5)

Sveinbjörn Sigurðsson   2 (af 6)

Haraldur Haraldsson     1,5 (af 5)

Karl Steingrímsson        1,5 (af 5)

Logi Rúnar Jónsson       0,5 (af 6)

Nánar má fræðast um einstök úrslit á Chess-results.          

Skákþáttur Morgunblaðsins: Stúlkurnar setja svip á Gagnaveitumót TR

Jón Viktor Gunnarsson og Einar Hjalti Jensson eru efstir þegar tefldar hafa verið fjórar umferðir á Haustmóti TR - Gagnaveitumótinu sem nú stendur yfir. Þeir Jón Viktor og Einar Hjalti hafa unnið allar skákir sínar en mega búast við harðri samkeppni frá Stefáni Kristjánssyni sem er með 3 ½ vinning. Ólokið er innbyrðis viðureign þessara efstu manna.

Gagnaveitumótið er undanfari alþjóðlegs móts TR sem hefst 1. október nk. og lýkur skömmu fyrir Íslandsmót taflfélaga. Þar munu tíu skákmenn tefla allir við alla. Hinn nýi formaður TR, Björn Jónsson, hefur ásamt stjórn félagsins skipulagt ýmsa hliðarviðburði í tengslum við það mót sem hefur á að skipa Úkraínumönnunum Sergei Fedorsjúk og Mikhaylo Oleksienko sem einnig munu tefla fyrir TR á Íslandsmóti skákfélaga.

Haustmót TR fer að þessu sinni fram í þrem tíu keppenda riðlum og opnum flokki. Keppni B-riðils er athyglisverð en þar tefla m.a. þrjár landsliðskonur, Hallgerður Helga Þorsteinsdóttir, Jóhanna Björg Jóhannsdóttir og Tinna Kristín Finnbogadóttir. Hallgerður Helga er sem stendur í efsta sæti með 3 ½ vinning.

Og fleiri af okkar fremstu skákkonum setja sterkan svip á haustmótið. Elsa María Kristínardóttir leiðir í C-riðli ásamt Kristófer Ómarssyni, bæði með 3 vinninga. Hin margreynda Sigurlaug Friðþjófsdóttir, sem varð Norðurlandameistari árið 1981, lét í vor af formennsku í TR eftir farsælan feril, hefur auk félagsmálavafsturs verið dugleg við að tefla á innlendum mótum. Í viðureign hennar við hina 17 ára gömlu Hrund Hauksdóttur varð hún að láta í minni pokann eftir kraftmikla taflmennsku Hrundar sem sparaði ekki púðrið undir lokin skákarinnar:

Sigurlaug Friðþjófsdóttir - Hrund Hauksdóttir

Spænskur leikur

1. e4 e5 2. Rf3 Rc6 3. Bb5 Rge7

Þessi leikur sést alltaf annað veifið. Bent Larsen beitti honum stundum og í seinni tíð Ivan Sokolov.

4. O-O g6 5. d4 exd4 6. Rxd4 Bg7 7. Rxc6 Rxc6 8. Bxc6 bxc6 9. Dd3 O-O 10. Rc3 a5 11. He1 Ba6 12. Df3 Hb8 13. Hb1 d6 14. Bd2 Dd7 15. b3 c5 16. Ra4 f5!

Eftir fullrólega taflmennsku hvíts hrifsar svartur til sín frumkvæðið. Biskuparnir njóta sín vel í opnum stöðum.

17. exf5 Hxf5 18. Dh3 Df7 19. Be3 Be5 20. Dg4 Hb4 21. Dd1?

Sigurlaugu gast ekki að 21. c4 Bxc4 og svartur vinnur peð. Þetta var samt besta leiðin þar sem hrókurinn kemst nú yfir á h5.

21. ... Hh4 22. h3 Bb7 23. Rxc5 Bc6 24. Rd3 Bc3 25. Hf1 Hf3!

Lamar kóngsstöðu hvíts og heldur vakandi hótunum á borð við 26. .... Df5 og í sumum tilvikum hróksfórn á h3.

26. Kh2

Þessi leikur bætir ekki úr skák en það var enga vörn a finna.

26. ...Hfxh3+! 27. gxh3 Bf3 28. Dc1 Hxh3+! 29. Kxh3 Df5 30. Kg3 Dg4+

- og hvítur gafst upp. Það er mát í næsta leik.

Hou Yifan heimsmeistari kvenna í annað sinn

Kínverska stúlkan Hou Yifan sem tefldi á alþjóðlega Reykjavíkurskákmótinu í fyrra er nú 19 ára gömul og hefur ekkert slakað á. Í fyrra missti hún óvænt heimsmeistaratitilinn í hendur úkraínsku skákkonunnar Önnu Usheninu. Í flóknu ferli vann Hou Yifan aftur áskorunarréttinn og HM-einvígi hennar við Önnu Usheninu fór fram á dögunum í Jiangsu í Kína. Hou Yifan hafði yfirburði á öllum sviðum skákarinnar og vann 5 ½ : 1 ½ og er því nýkrýndur heimsmeistari kvenna.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 22. september 2013

Skákþættir Morgunblaðsins

[Event "Haustmot TR - C flokkur"] [Site "Reykjavik"] [Date "2013.09.22"] [Round "3"] [White "Fridthjofsdottir, Sigurlaug R"] [Black "Hauksdottir, Hrund"] [Result "0-1"] [ECO "C60"] [WhiteElo "1735"] [BlackElo "1679"] [PlyCount "60"] [EventDate "2013.09.15"] [Source "lmi"] [SourceDate "2013.06.25"] 1. e4 e5 2. Nf3 Nc6 3. Bb5 Nge7 4. O-O g6 5. d4 exd4 6. Nxd4 Bg7 7. Nxc6 Nxc6 8. Bxc6 bxc6 9. Qd3 O-O 10. Nc3 a5 11. Re1 Ba6 12. Qf3 Rb8 13. Rb1 d6 14. Bd2 Qd7 15. b3 c5 16. Na4 f5 17. exf5 Rxf5 18. Qh3 Qf7 19. Be3 Be5 20. Qg4 Rb4 21. Qd1 Rh4 22. h3 Bb7 23. Nxc5 Bc6 24. Nd3 Bc3 25. Rf1 Rf3 26. Kh2 Rfxh3+ 27. gxh3 Bf3 28. Qc1 Rxh3+ 29. Kxh3 Qf5+ 30. Kg3 Qg4+ 0-1

Sjöunda umferð Stórmeistaramóts TR hefst kl. 14

Sjöund umferð Stórmeistaramóts Taflfélags Reykjavíkur hefst kl. 14 í dag og eru skákir umferðarinnar sýndar beint. 

Í umferð dagsins mætast Sigurbjörn - Fedorchuk, Olekseinko - Ziska, Guðmundur-Bragi, Bekker-Jensen - Þorvarður. Henrik situr yfir.

Beinar útsendingar frá umferð dagsins má nálgast hér.

• Vefur mótsins
• Chess-Results
• Myndir (ÁK)