Alþjóða geðheilbrigðismótið: Stórmót í Faxafeni á fimmtudagskvöld!

Fimmtudaginn 17. október kl. 19.30 er komið að hinu árlega stórmóti í tilefni alþjóða geðheilbrigðis-vikunnar. Vinaskákfélagið stendur að mótinu í samvinnu við Taflfélag Reykjavíkur og fer mótið fram í skákhöllinni, Faxafeni 12. Tefldar verða sjö umferðir með 7 mínútna umhugsunartíma. Mótið er öllum opið og er þátttaka ókeypis. Sigurvegari á mótinu í fyrra var Jóhann Hjartarson stórmeistari.

Geðheilbrigðismótið hefur unnið sér sess sem eitt skemmtilegasta hraðskákmót ársins. Veit eru verðlaun í ýmsum flokkum, m.a. fyrir bestan árangur 12 ára og yngri, 17 ára og yngri, 60 ára og eldri, og bestan árangur kvenna.

Fjölmörg góð og vegleg verðlaun eru í boði, m.a. brakandi nýjar bækur frá Forlaginu og Sögum útgáfu, auk þess gjafabréf á fyrsta flokks veitingastaði, leiksýningar í Þjóðleikhúsinu og fleira.

Áhugasamir eru hvattir til að skrá sig sem allra fyrst hjá Róbert Lagerman, forseta Vinaskákfélagsins, í [e-mail]. 

 

Frétt um geðheilbrigðismótið 2012. 

Íslandsmót skákfélaga: Pistlar frá Fjölni og SA

Tveir pistlar frá formönnum félaga hafa verið birtir að loknum fyrri hlutanum. Það er þau félög sem best stóðu sig miðað við það sem gera mátt ráð fyrir fyrirfram í efstu deild, þ.e. SA og Fjölnir.

Pistil Áskels Arnar, formanns SA, má finna á heimasíðu SA.

Pistill Helga Árnarsonar, formanns Fjölnis, fylgir hér að neðan.

Fjölnismenn flugu upp yfir fallsætin í fyrri umferð Íslandsmótsins

Viss tímamót urðu í sögu Íslandsmóts félagsliða um liðna helgi þegar liðum í 1. deild var fjölgað úr 8 í 10. Tefldar voru 5 viðureignir í hverri umferð. Skákdeild Fjölnis hafði endurheimt sæti sitt í 1. deild eftir aðeins árs viðveru í 2. deild.

Nú á 10. starfsári skákdeildarinnar eru markmið stofnenda deildarinnar að rætast svo um munar með sýnilegum árangri kröftugs starfs á barna-og unglingastigi. Helmingur liðsmanna A sveitar Fjölnis eru uppaldir Fjölnisunglingar sem gefst tækifæri á að tefla gegn hinum bestu og þeir láta ekki bjóða sér það sæti tvisvar heldur sanna rækilega styrkleika sinn við fyrstu reynslu. Öll þessi 10 ár hefur einn eða fleiri Fjölniskrakki teflt með A sveit Fjölnis á Íslandsmótum, Landsmótum UMFÍ og Hraðskákkeppni taflfélaga.

 

Eftir fyrri hluta Íslandsmótsins í Rimaskóla um liðna helgi má segja að Fjölnissveitin hafi blásið rækilega á spár liðsstjóra og ritstjóra www.skak.is um fall sveitarinnar niður í 2. deild. Kemur þar helst til frábær frammistaða "ungu ljónanna" Dags Ragnarssonar, Olivers Arons Jóhannessonar (taplaus) og Jóns Trausta Harðarsonar sem allir hlutu 60% vinningshlutfall í 5 skákum. Þeir tefldu upp fyrir sig nánast allar skákirnar. Ljónin ungu tefldu af miklum krafti allan tímann og hefur þétt keppnisdagskrá þessa árs ábyggilega hjálpað til, því að taflmennska þeirra varð kröftugari með hverri umferð. Ég veit að þessi heilaga þrenning ásamt Degi Andra Friðgeirssyni, sem nú er mættur að nýju til liðs við Fjölni eftir þriggja ára Noregsdvöl, hafi stoðlið senunni frá stórmeistarahóp efstu liða.

Það hefur líka reynst uppörvandi og hvetjandi fyrir unga skákmenn Fjölnis að hafa leiðandi í sínum sveitum erlenda skákmenn. Skákdeild Fjölnis hefur undantekningarlítið fengið til liðs við sig skemmtilega baráttuskákmenn og meðal þeirra er tvímælalaust Þjóðverjinn Thomas Henrichs (2476) sem átti mjög góða helgi í Rimaskóla,  vann 4 skákir í röð eftir að lúta í gras fyrir TV stórmeistaranum Eduardas Rozentalis (2616) í 1.umferð. Sigurskák Thomasar gegn "Bolvíkingnum" og Grafarvogsbúanum Braga Þorfinnssyni var sérstaklega glæsileg og hlýtur sú skák að hafa verið ein sú skemmtilegasta á mótinu og áhugaverð fyrir alla skákáhugamenn að skoða. Í sveit Fjölnis var einnig annar erlendur skákmaður að þessu sinni, Floris van Assendeflt (2383) að nafni, frá Haag. Því miður urðu honum nokkuð mislagðar hendur í skákum sínum en skák hans við Nils Grandelius (2547) í viðureigninni við TV í fyrstu umferð var afar skemmtileg. Bréfskákmeistarinn Jón Árni Halldórsson er traustur liðsmaður og einstakur liðsfélagi sem okkur Fjölnismönnum þykir gott að hafa í sveitinni. Jón Árni var á 3. borði og átti við mun stigahærri skákmenn að stríða. Hann tapaði þó slysalega í síðustu umferð fyrir Kjartani Maack eftir besttefldu skákina sína. Sama átti við um Erling Þorsteinsson sem tefldi við "ofurefli" í meirihluta skákanna. Hann tefldi sína bestu skák á móti Gumma Gísla í 4.umferð og var með hann lengst af undir. En Erlingi varð illilega á í messunni undir lok skákarinnar og tapaði henni. Fjölnismenn unnu viðureignir sínar við b sveitir GM Hellis og TR en töpuðu fyrir TV, TB og SA. Sveitin er með 19,5 vinning af 40 mögulegum.

Skákdeild Fjölnis er í 7. sæti 1. deildar þegar að mótið er rúmlega hálfnað. Sveitin virðist nokkuð örugg um að halda sæti sínu en álíka fjarlæg því að ná verðlaunasæti. Fjölnismenn mega vel við una og framganga ungu ljónanna sem hafa notið leiðsagnar Helga Ólafssonar, Davíðs Kjartanssonar, Hjörvars Steins, Héðins ofl. í gegnum árin er uppörvandi fyrir framtíð skákarinnar á Íslandi.

B og C sveitir Fjölnis tefldu í 4. deild og nýttu fjölda ungra skákmanna til að tefla þessar keppnisskákir sem er þeim öllum mikilvæg og góð reynsla. Frammistaða Jóhanns Arnar Finnssonar (1433) var mjög góð en þessi 13 ára Rimaskólastrákur tapaði engri skák og vann sigur m.a á 1750 stiga manni. Hörður Aron Hauksson sem lítið hefur teflt frá því hann útskrifaðist frá Rimaskóla árið 2009 tefldi líka mjög vel á 1. borði og ætti þessi frammistaða að virka hvetjandi á hann við að stúdera og tefla meira í næstu framtíð. Skákdrottningarnar Hrund og Nansý stóðu fyrir sínu og á neðstu borðum í C sveit voru nokkrir ungir skákmenn að tefla sínar fyrstu keppnisskákir. Þeir áttu það allir sameiginlegt að vinna a.m.k. eina skák sem er aðeins byrjunin á því sem koma skal að feta í fótspor þeirra fjölmörgu barna og unglinga sem náð hafa góðum árangri innan raða Fjölnis. Íslandsmót skákfélaga er ávallt mikil skákhátíð þar sem þátttakendur skapa stemmninguna með fjölbreytileika sínum í aldri, háttum og hæfni. Einkunnarorð skákhreyfingarinnar "Við erum ein fjölskylda" eiga vel við á Íslandsmóti félagsliða.

Helgi Árnason formaður skákdeildar Fjölnis

Mótsstjórn Íslandsmóts skákfélaga vísar frá kærum TR og TG

Mótsstjórn Íslandsmóts skákfélaga hefur vísað frá kærum TR og TG frá vegna Íslandsmóts skákfélaga. TR hafði kært þrjár viðureignir. Annars vegar viðureignir a- og b-liða sinna gegn a-sveit GM Hellis í efstu deild og hinsvegar viðureign c-lið síns gegn e-liði GM Hellis í þriðju deild.

TG kærði viðureignina gegn Skákfélagi Íslands í 2. deild.

Kært var á þeim forsendum að liðsmenn hinna sameinuðu félaga væru ólöglegir með sameinuðu félagi í ljósi að þess að sameiningar félaganna hefðu átt sér stað eftir að félagaskiptaglugganum var lokað.

Mótsstjórn vísaði málunum frá þar sem hún taldi þau ekki heyra undir sig. Félögin geta áfrýjað til Dómstóls SÍ innan 3ja sólarhringa.

Úrskurðirnir fylgja með PDF-viðhengi.

Skrár tengdar þessari bloggfærslu:

• TR - GM Hellir
• TG - SFÍ

Henrik með jafntefli í fyrstu umferð

Stórmeistarinn Henrik Danielsen (2501) gerði jafntefli við danska alþjóðlega meistarann Jens Ove Fries Nielsen (2386) í fyrstu umferð NM í skák sem fram fór í dag í Køge Kyst í Danmörku. Guðmundur Kjartansson (2447) tapaði fyrir litháíska stórmeistaranum Eduardas Rozentalis (2616). 

Önnur umferð fer fram á morgun. Þá teflir Henrik við bandaríska FIDE-meistarann Kassa Korley (2329) en Guðmundur við Danann Martin Percivaldi (2173).

80 skákmenn frá 11 löndum taka þátt í mótinu. Þar af eru níu stórmeistarar og jafnmargir alþjóðlegir meistarar. 

Henrik er nr. 6 í stigaröð keppenda en Guðmundur er nr. 12. Henrik er næststigahæstur Norrænna keppenda en Guðmundur er nr. 8. Stigahæsti keppandi mótsins er danski stórmeistarinn Peter Heine Nielsen (2649).

• Heimasíða mótsins
• Beinar útsendingar (hefjast flestar kl. 16)

Skákþing Garðabæjar hefst 24. október

Skákþing Garðabæjar hefst fimmtudaginn 24. október 2013. Tefldar verða 7 umferðir og verður mótið reiknað til íslenskra og alþjóðlegra stiga.

Skráningarsíða fyrir mótið

Skráðir keppendur

Mótsstaður: Garðatorg 1. (gamla Betrunarhúsið). 2. hæð. Inngangur til hægri við verslunina Víði.

Umferðatafla:

• 1. umf. Fimmtudag 24. okt. kl. 19.30. (B flokkur kl. 18:00)
• 2. umf. Fimmtudag 31. okt. kl. 19.30 (B flokkur kl. 18:00)
• 3. umf. Fimmtudag 7. nóv. kl. 19.30 (B flokkur kl. 18:00)
• 4. umf. Fimmtudag 14. nóv. kl. 19.30 (B flokkur kl. 18:00)
• 5. umf. Fimmtudag 21. nóv. kl. 19.30 (B flokkur kl. 18:00)
• 6. umf. Fimmtudag 28. nóv. kl. 19.30 (B flokkur kl. 18:00)
• 7. umf. Fimmtudag 5. des. kl. 19.30 (B flokkur kl. 18:00)

Keppnisfyrirkomulag er svissneskt kerfi. Skákstjóri er Páll Sigurðsson. Tímamörk eru 90 mínútur og 30 sek sem bætist við hvern leik. Mótið er opið öllum og geta því stigalágir valið milli flokka.
B flokkur bara fyrir skákmenn með 1499 stig eða minna. Umhugsunartími þar er 45 mín + 30 sek. á leik.

Verðlaun í A flokki auk verðlaunagripa:

• 1. verðlaun. 25 þús.
• 2. verðlaun 12 þús.
• 3. verðlaun 8 þús.

Verðlaun í B flokki:

• Verðlaun. 5000 kr. úttektar í bóksölu Sigurbjarnar auk verðlaunagrips.
• Verðlaun. 4000 kr. Útttekt í bóksölu Sigurbjarnar.
• Verðlaun. 3000 kr. Úttekt í bóksölu Sigurbjarnar.

Verðlaun fyrir Skákmeistara Garðabæjar er bókaúttekt hjá Bóksölu Sigurbjarnar fyrir allt að 4000 kr.

Mótið er um leið skákþing Taflfélags Garðabæjar. (keppt er um titilinn ef jafnt)

Aukaverðlaun:

• Efst(ur) 16 ára og yngri.(1997= Efstur TG-inga í B flokki. Bókarvinningur að verðmæti 4000.

ATH. Ekki er hægt að vinna til fleiri en einna verðlauna. Peningaverðlaunum er skipt, en ekki aukaverðlaunum. Fari fjöldi borgandi keppenda yfir 40 manns verður bætt við verðlaun.

Sæmdartitilinn Skákmeistari Garðabæjar geta aðeins fengið félagsmenn taflfélags í Garðabæ eða skákmaður með lögheimili í Garðabæ.

Þátttökugjöld:

Félagsmenn. Fullorðnir 2500 kr. 17 ára og yngri ókeypis.
Utanfélagsmenn. Fullorðnir 3500 kr. Unglingar 17 ára og yngri 2000 kr.

NM í skák: Henrik og Guðmundur í beinni

Norðurlandamótið í skák hefst í dag í Køge Kyst í Danmörku. Fulltrúar landans eru stórmeistarinn Henrik Danielsen (2501) og alþjóðlegi meistarinn Guðmundur Kjartansson (2447). Þeir verða báðir í beinni útsendingu sem hefst nú kl. 16. Guðmundur mætir litháíska stórmeistaranum Eduardas Rozentalis (2616) og Henrik teflir við danska alþjóðlega meistarann Jens Ove Fries Nielsen (2386).

80 skákmenn frá 11 löndum taka þátt í mótinu. Þar af eru níu stórmeistarar og jafnmargir alþjóðlegir meistarar. 

Henrik er nr. 6 í stigaröð keppenda en Guðmundur er nr. 12. Henrik er næststigahæstur Norrænna keppenda en Guðmundur er nr. 8. Stigahæsti keppandi mótsins er danski stórmeistarinn Peter Heine Nielsen (2649) sem átti að gegna stöðu skákskýrenda en ákvað í dag að taka fremur þátt!

• Heimasíða mótsins
• Beinar útsendignar (hefjast flestar kl. 16)

Umfjöllun um Íslandsmót skákfélaga hjá RÚV

RÚV lætur sitt ekki eftir liggja þegar kemur að skákumfjöllun. Á netinu má finna góða umfjöllun um Íslandsmót skákfélaga og þar má meðal annars finna stórgott viðtal við Björn Þorfinnsson

Frétt á RÚV.is

 

Skákþáttur Morgunblaðsins: Með bjartsýni að vopni

Í byrjun þessa árs urðu Íslendingar í efsta sæti á Norðurlandamóti ungmenna sem fram fór á Bifröst. Þar var tekin saman vinningatala í öllum fimm aldursflokkum einstaklingskeppninnar. Á Norðurlandamóti grunnskóla fyrr í þessum mánuði bar Álfhólsskóli úr Kópavogi sigur úr býtum í yngri aldursflokkunum og í eldri flokknum vann sveit Rimaskóla öruggan sigur. Samanburður við Norðurlönd er okkur því hagstæður um þessar mundir. Evrópumót ungmenna 8-18 ára sem nú fer fram í Budva í Svartfjallandi í sex aldursflokkum pilta og stúlkna er verðugt verkefni fyrir íslenska hópinn sem í eru átta keppendur. Það er auðvitað við ramman reip að daga því austurblokkin eins og hún leggur sig stimplar sig sterkt inn: Rússland, Úkraína, Armenía, Aserbaídsjan, svo nokkur af fyrrverandi lýðveldum Sovétríkjanna séu nefnd „sturta niður" keppendum í hvern einasta flokk. Og fyrir þessar þjóðir er mun styttra að ferðast; vettvangur þessara móta er oftast sá sami, Tyrkland, Búlgaría, Tékkland og nú Svartfjallaland.

Af íslensku keppendunum ætti hinn tíu ára gamli Vignir Vatnar Stefánsson að eiga mesta von um verðlaunasæti en hann er með 3 ½ vinning þegar lokið er fjórum umferðum af níu. Óskar Víkingur Davíðsson sem er aðeins átta ára gamall er einnig til alls líklegur með 2 vinninga en átti um tíma vinningsstöðu í tapskák sinni í þriðju umferð. Ýmsir aðrir hafa teflt vel. Dawid Kolka sem er með 2 vinninga og Hilmir Freyr Heimisson sem er með 1 ½ vinning hafa báðir unnið sannfærandi sigra og eru til alls líklegir. Í viðureign sinni í eftirfarandi skák mætti Hilmir Freyr til leiks með bjartsýni og sókndirfsku að vopni. Svartur missti vissulega af tækifærum til að verjast betur en í skákinni sem hér fer á eftir hefði hann vissulega getað varist betur en líkt og í skákum Mikhaels Tal í gamla daga kom það ekki ljós fyrr en í rannsóknum eftir á:

Hilmir Freyr Heimisson - Kai Pannwitz

Sikileyjarvörn

1. e4 c5 2. Rc3 a6 3. Rge2

Hilmir hefur dálítið verið að fást við „Grand prix-afbrigðið" sem hefst með 3. f4 en ákvað að hvíla það að þessu sinni.

3. ... e6 4. g3 b5 5. a3 Bb7 6. Bg2 d5 7. exd5 Rf6 8. O-O Rxd5 9. Rxd5 Bxd5 10. Bxd5 Dxd5 11. d4 Rc6 12. Rf4!?

Fórnar peði fyrir frumkvæðið.

12. ... Dxd4 13. Df3 Dd7 14. Be3 Be7 15. Had1?

Hér var sennilega öruggara að leika 15. Rd3 og ná peðinu aftur þar sem 15. .. c4 strandar á 16. Re5! o.s.frv.

15. .... Dc7 16. Dg4 g6

Gott var einnig að hrókera stutt.

17. Rxe6!?

Með bjartsýni að vopni!

17....Dc8

Gott var einnig 17. ... fxe6 18. Dxe6 Dc8 19. De4 Kf7 .

18. Rg7+ Kf8 19. Dxc8 Hxc8 20. Bh6 Kg8 21. Hfe1

Hilmir ætlaði að mæta besta leiknum 21. ... Bf8 með stórskemmtilegri vendingu, 22. Hd6!? Hugmyndin er 22. ... Bxg7 23. Hxc6! og vinnur eða 22. ... Bxd6 23. Re8 Be7 24. Hxe7! Rxe7 25. Rf6 mát. En svartur á 22. ... Rd4 sem vinnur!

21. ...Bf6? 22. He8+! Hxe8 23. Rxe8 Be5

Eða 23. ... Bxb2 24. Hd6 Re7 25. Hd8 og mátar.

24. Hd6! f6 25. Hxc6

Manni undir þráast svartur við í nokkra leiki.

25. ... Kf7 26. Rd6+ Bxd6 27. Hxd6 g5 28. f4 g4 29. f5 He8 30. Hd7+ Kg8 31. Hg7+ Kh8 32. Hf7 c4 33. Hxf6 Kg8 34. Kf2 a5 35. He6 Hd8 36. Hf7 Hd2+ 37. Bxd2

- og Pannwitz gafst upp.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 6. október 2013

Skákþættir Morgunblaðsins

[Event "23rd EYCC 2013 - OPEN U12"] [Site "Budva"] [Date "2013.09.30"] [Round "2.48"] [White "Heimisson, Hilmir Freyr"] [Black "Pannwitz, Kai"] [Result "1-0"] [ECO "B23"] [WhiteElo "1742"] [BlackElo "1522"] [PlyCount "73"] [EventDate "2013.09.29"] 1. e4 c5 2. Nc3 a6 3. Nge2 e6 4. g3 b5 5. a3 Bb7 6. Bg2 d5 7. exd5 Nf6 8. O-O Nxd5 9. Nxd5 Bxd5 10. Bxd5 Qxd5 11. d4 Nc6 12. Nf4 Qxd4 13. Qf3 Qd7 14. Be3 Be7 15. Rad1 Qc7 16. Qg4 g6 17. Nxe6 Qc8 18. Ng7+ Kf8 19. Qxc8+ Rxc8 20. Bh6 Kg8 21. Rfe1 Bf6 22. Re8+ Rxe8 23. Nxe8 Be5 24. Rd6 f6 25. Rxc6 Kf7 26. Nd6+ Bxd6 27. Rxd6 g5 28. f4 g4 29. f5 Re8 30. Rd7+ Kg8 31. Rg7+ Kh8 32. Rf7 c4 33. Rxf6 Kg8 34. Kf2 a5 35. Re6 Rd8 36. Re7 Rd2+ 37. Bxd2 1-0

Taflfélag Vestmannaeyja leiðir eftir fyrri hluta Íslandsmóts skákfélaga

Taflfélaga Vestmanneyja leiðir eftir fyrri hluta Íslandsmóts skákfélaga. Þeir hafa 28,5 vinning eftir að hafa gert 4-4 jafntefli í fimmtu umferð gegn Íslandsmeisturum Víkingaklúbbsins. Skákfélagið GM Hellir er í öðru sæti með 28 vinninga eftir sigur á Taflfélagi Reykjavíkur 4,5-3,5. Víkingaklúbburinn er í þriðja sæti með 27 vinninga. Búast við harðri baráttu þessara þriggja félaga um Íslandsmeistaratitilinn í síðari hlutanum sem fram fer 27. febrúar - 1. mars nk.

Önnur úrslit fimmtu umferðar voru að Bolvíkingar unnu b-sveit GM Hellis naumlega, Fjölnir vann öruggan sigur á b-sveit TR. Það sama gerði Skákfélag Akureyrar gegn Vinaskákfélaginu.

Fjórar viðureignir á Íslandsmóti skákfélaga hafa verið kærðar til mótsstjórnar Íslandsmóts skákfélaga. A- og b-sveitir TR hafa kært viðureignirnar gegn a-sveit GM Hellis í efstu deild. Taflfélag Garðabæjar hefur kært viðureignina gegn Skákfélagi Íslands í þriðju deild og c-sveit TR hefur gert kært úrslitin gegn e-sveit GM Hellis í þriðju deild. Allar kærurnar eru á svipuðum grundvelli, þ.e. á þeim forsendum að liðsmenn sveitanna séu ekki löglegir með sameinuði félagi.

Staðan í efstu deild

 

Rk.	Team	TB1	TB2
1	Taflfélag Vestmannaeyja a-sveit	28,5	9
2	GM Hellir a-sveit	28	8
3	Víkingaklúbburinn a-sveit	27	9
4	Taflfélag Reykjavíkur a-sveit	24,5	4
5	Taflfélag Bolungarvíkur a-sveit	24	6
6	Skákfélag Akureyrar a-sveit	23,5	8
7	Skákdeild Fjölnis a-sveit	19,5	4
8	GM Hellir b-sveit	11,5	0
9	Vinaskákfélagið	7	2
10	Taflfélag Reykjavíkur b-sveit	6,5	0

Mótstöflu má finna á Chess-Results.

 
2. deild

Taflfélag Garðabæjar er efst með 16 vinninga, Skákfélag Reykjanesbæjar er í öðru sæti með 15,5 vinning og b-sveit Víkingaklúbbsins er í þriðja sæti með 14 vinninga.

Stöðuna í 2. deild má finna á Chess-Results .

3. deild

Skákdeild KR er í efsta sæti með 7 stig. B-sveit Skákfélags Akureyrar, Skákfélag Selfoss og nágrennis og b-sveit Skákfélag Íslands eru í 2.-4. sæti með 6 stig. 

Stöðuna í 3. deild má finna á Chess-Results.

4. deild

B-sveit Skákfélags Reykjanesbæjar er efst með 8 stig. Í 2.-4. sæti eru d- og c-sveitir Skákfélags Akureyrar og a-unglingasveit TR.

Stöðuna í 4. deild má finna á Chess-Results.

• Heimasíða Íslandsmóts skákfélaga
• Chess-Results
• Myndaalbúm (HÁ og ESE)

Vestmannaeyingar efstir á Íslandsmóti skákfélaga - toppslagur Víkinga og TV á morgun

Taflfélaga Vestmanneyja náði forystu á Íslandsmóti skákfélaga með stórsigri á b-sveit Taflfélags Reykjavíkur, 7,5-0,5. Skákfélagið GM Hellir er í öðru sæti þrátt fyrir tap gegn Víkingaklúbbnum 3,5-4,5. A-sveit Taflfélags Reykjavíkur er í fjórða sæti eftir stórsigur á Vinaskákfélaginu 7,5-0,5. Bolvíkingar unnu svo Skákdeild Fjölnis 5,5-2,5 og eru í fimmta sæti.

Fimmta og síðasta umferð fyrri hlutans fer fram á morgun og hefst kl. 11. Þá eru tvær toppviðureignir. Annars vegar Eyjamenn og Víkingar og hins vegar GM Hellir og Taflfélag Reykjavíkur. 

Staðan í efstu deild

 

Rk.	Team	TB1	TB2
1	Taflfélag Vestmannaeyja a-sveit	24,5	8
2	GM Hellir - a-sveit	23,5	6
3	Víkingaklúbburinn a-sveit	23	8
4	Taflfélag Reykjavíkur a-sveit	21	4
5	Taflfélag Bolungarvíkur a-sveit	19	4
6	Skákfélag Akureyrar a-sveit	16,5	6
7	Skákdeild Fjölnis a-sveit	13	2
8	GM Hellir - b-sveit	8,5	0
9	Vinaskákfélagið	6	2
10	Taflfélag Reykjavíkur b-sveit	5	0

2. deild

Taflfélag Garðabæjar og Skákfélag Reykjanesbæjar eru efst með 11 vinninga. B-sveit Víkingaklúbbsins er í þriðja sæti með 10,5 vinning. Það stefnir jafna og afar spennandi toppbaráttu.

Stöðuna í 2. deild má finna á Chess-Results .

3. deild

B-sveit Skákfélags Akureyrar er efst í þriðju deild með 6 stig. Skákdeild KR og Ungmennasamband Borgfirðinga eru í 2.-3. sæti með 5 stig.

Stöðuna í 3. deild má finna á Chess-Results.

4. deild

A-unglingasveit Taflfélags Reykjavíkur og b-sveit Skákfélags Reykjanesbæjar eru efst í 4. deild með 6 stig. Þrjár sveitir koma næstar með 4 stig en það eru d- og c- sveitir Skákfélags Akureyrar, Skákfélags Mosfellsbæjar og b-sveit Taflfélags Garðabæjar.

Stöðuna í 4. deild má finna á Chess-Results.

• Heimasíða Íslandsmóts skákfélaga
• Chess-Results
• Myndaalbúm (HÁ)