Unglingameistaramót Íslands (20 ára og yngri) fer fram 2. og 3. nóvember á Akureyri

Keppni á Unglingameistaramóti Íslands, 20 ára og yngri (fædd 1993 og síðar) verður haldið í félagsheimili Skákfélags Akureyrar, Íþróttahöllinni, dagana 2. og 3. nóvember nk.  Tefldar verða 9 umferðir eftir svissneska kerfinu og er umhugsunartíminn 20 mín. + 5 sek. Teflt verður í einum flokki.

Mótshaldari: Skákfélag Akureyar

Skákstaður: Íþróttahöllin á Akureyri

Laugardagur 3. nóvember 

Fyrsta umferð hefst kl. 14. Tefldar verða 5 umferðir. Áætlað er að taflmennsku ljúki fyrir kl. 19. Stutt hlé verður gert eftir þriðju umferð

Sunnudagur 4. nóvember   

Sjötta umferð hefst kl. 11. Tefldar verða 4 umferðir. Stutt hlé verður gert eftir sjöundu umferð. Verðlaunaafhending og mótsslit um kl. 15.

Þátttökugjöld: kr. 2.000

Verðlaun: Sigurvegari á mótinu hlýtur titilinn "Unglingameistari Íslands 2013" og í verðlaun farseðil - að hámarki kr. 50.000.-  á skákmót erlendis.  Farseðilinn gildir í eitt ár.

Ferðir og gisting

Kynningarfundur vegna mótanna með formönnum/umsjónarmönnum æskulýðsstarfs verður haldinn nk. þriðjudagskvöld kl. 20 í SÍ. Ætlunin með þeim fundi er að skoða mögulegt samstarf félaganna varðandi ferðatilhögun og gistingu. Tilgangurinn með fundinum er einnig að athuga mögulegan keppendafjölda svo skipulagning mótshaldara geti verið með besta móti.

Skráning

Hægt er að skrá sig til leiks hér. Upplýsingar um þegar skráða keppendur má finna hér.

Pistill um Íslandsmót skákfélaga

Ritstjóri Skák.is hefur skrifað pistil um fyrri hluta Íslandsmóts skákfélaga. Hann má finna á síðu tileinkaðri pistlum um Íslandsmót skákfélaga.

Pistlar um Íslandsmót skákfélaga.

Einar Hjalti efstur fyrir lokaumferð Gagnaveitumótsins

FIDE-meistarinn Einar Hjalti Jensson (2305) er efstur fyrir lokaumferð Gagnaveitumótsins - Haustmóts TR. Í áttundu og næstsíðustu umferð, sem fram fór í kvöld, vann hann Sverri Örn Björnsson (2136). Einar hefur 7 vinninga. Jón Viktor Gunnarsson (2409) og Stefán Kristjánsson (2491) eru í 2.-3. sæti með 6,5 vinning. Jón vann Dag Ragnarsson (2040) en Stefán lagði nafna sinn Bergsson (2131).

Önnur úrslit eru þau að Oliver Aron Jóhannesson (2007) vann Gylfa Þórhallsson (2154) og Jóhann H. Ragnarsson (2037) vann Kjartan Maack (2128).

Í lokaumferðinni sem fram fer á föstudagkvöld mætast Jón Viktor og Stefán en Einar teflir við Oliver.

Mótstöflu flokksins má nálgast á Chess-Results.

B-flokkur:

Jón Trausti Harðarson (1930) er efstur með 7 vinninga Ingi Tandri Traustason (1817) er annar með 6 vinninga og Þórir Benediktsson (1942) er þriðji með 5,5 vinning.

Mótstöflu má nálgast á Chess-Results.

C-flokkur:

Gríðarleg spenna er í c-flokknum. Þar eru Valgarð Ingibergsson (1892), Sigurjón Haraldsson (1846) og Elsa María Kristínardóttir (1787) efst með 5 vinninga.

Mótstöflu má nálgast á Chess-Results.

Opinn flokkur:

Sóley Lind Pálsdóttir (1412) og Haukur Halldórsson (1689) eru efst með 6 vinninga. Í 3.-5. sæti með 5,5 vinning eru Hilmir Hrafnsson (1351), Björn Hólm Birkisson (1231) og Guðmundur Agnar Bragason (1319).

• Heimasíða TR
• Chess-Results 
• Myndaalbúm (GB)

Stórmeistarar, áhugamenn, börn og byrjendur meðal keppenda á geðheilbrigðismótinu

Jóhann Hjartarson stórmeistari og landsliðsmaðurinn Hjörvar Steinn Grétarsson verða meðal keppenda á opnu hraðskákmóti, sem haldið er í kvöld í skákhöllinni í Faxafeni, í tilefni af alþjóða geðheilbrigðisvikunni sem nú er að ljúka.

Geðheilbrigðismótið hefur unnið sér sess sem eitt skemmtilegasta hraðskákmót ársins. Veitt eru verðlaun í ýmsum flokkum, m.a. fyrir bestan árangur 12 ára og yngri, 17 ára og yngri, 60 ára og eldri, og bestan árangur kvenna.

 

Fjölmörg góð og vegleg verðlaun eru í boði, m.a. brakandi nýjar bækur frá Forlaginu og Sögum útgáfu, auk þess gjafabréf á fyrsta flokks veitingastaði, leiksýningar í Þjóðleikhúsinu og fleira.

 

Vinaskákfélagið stendur að mótinu í samvinnu við Taflfélag Reykjavíkur og fer mótið fram í skákhöllinni, Faxafeni 12.

 

Tefldar verða sjö umferðir með 7 mínútna umhugsunartíma. Mótið er öllum opið og er þátttaka ókeypis.

 

Keppendur eru hvattir til að skrá sig á www.skak.is eða hjá Róbert Harðarsyni í [e-mail].

 

Guðmundur og Henrik unnu báðir í þriðju umferð

Henrik Danielsen (2501) og Guðmundur Kjartansson (2447) unnu báðir í þriðju umferð NM í skák sem fram fór í dag í Køge Kyst í Danmörku. Guðmundur vann Svíann Sven Degerfeldt (1929) en Henrik vann Danann Jesper Pondal (1915). Guðmundur hefur 2 vinninga en Henrik hefur 1,5 vinning.

Stórmeistararnir Peter Heine Nielsen (2647), Danmörku, Eduardes Rozentalis (2616), Litháen, og Yuri Solodovnichenko (2583), Úkraínu, eru efstir með fullt hús.

Fjórða umferð fer fram á morgun. Þá teflir Guðmundur dönsku skákkonuna Oksana Vovk (2111) sem er alþjóðlegur meistari kvenna en Henrik mætir Dananum Frank Severinsen.

80 skákmenn frá 11 löndum taka þátt í mótinu. Þar af eru níu stórmeistarar og jafnmargir alþjóðlegir meistarar. Henrik er nr. 6 í stigaröð keppenda en Guðmundur er nr. 12. Henrik er næststigahæstur Norrænna keppenda en Guðmundur er nr. 8. Stigahæsti keppandi mótsins er danski stórmeistarinn Peter Heine Nielsen (2649).

• Heimasíða mótsins
• Beinar útsendingar (hefjast flestar kl. 16)

Nýtt fréttaskeyti Skákakademíunnar

Nýtt Fréttaskeyti Skákakademíunnar kom út í dag. Meðal efnis er:

• Landsbyggðin: Kraftur í Þingeyingum
• Viðtalið: Björn Ívar Karlsson
• Heilræðahornið: Ráð landsliðsmanna 

Fréttaskeytið er í meðfylgjandi PDF-viðhengi.

 

Skrár tengdar þessari bloggfærslu:

• Fréttaskeyti Skákakademíunnar - 16. október 2013

Pistlar um Íslandsmót skákfélaga

Eins og venjulega eru forráðamenn taflfélaga og liðsstjóra duglegir að fjalla um Íslandsmót skákfélaga. Í gær var vakin athygli á pistli frá Fjölni og SA.

Í dag eru það pistlar frá formanni Skákfélags Selfoss og nágrennis, Björgvini S. Guðmundssyni, og formanni Taflfélags Bolungarvíkur, Guðmundi Daðason.

Einnig er grein um mótið á sænsku síðunni Inte bara schack en þar er vitnað í Þorsteinn Þorsteinsson, liðsstjóra TV og Nils Grandelius einni liðsmanna félagsins.

Lesendur eru hvattir til að skoða efnið!

• Pistill á heimasíðu SSON
• Pistill á heimasíðu TB
• Inte bara schack

Gagnaveitumótinu áframhaldið í kvöld

Eftir tíu daga hlé á Gagnaveitumótinu - Haustmóti TR verður því áframhaldið í kvöld. Einar Hjalti Jensson (2305) er efstur í a-flokki með 6 vinninga en Jón Viktor Gunnarsson (2409) og Stefán Kristjánsson (2491) eru skammt undan með 5½ vinning. Aðrir hafa ekki möguleika á sigri.

Í kvöld teflir Einar Hjalti við Sverri Örn Björnsson (2136), Jón Viktor við Dag Ragnarsson (2040) og Stefán við nafna sinn Bergsson (2131).

Skákir áttundu umferðar eru sýndar beint og hægt að nálgast hér. 

Rétt er að rifja upp stöðu mála!

B-flokkur:

Jón Trausti Harðarson (1930) er efstur með 6½ vinning, Ingi Tandri Traustason (1817) er annar með 5½ vinning og Þórir Benediktsson (1942) er þriðji með 4½ vinning.

C-flokkur:

Sigurlaug R. Friðþjófsdóttir (1735) og Sigurjón Haraldsson (1846) eru efst með 4½ vinning. Valgarð Ingibergsson (1892) og Elsa María Kristínardóttir (1787) eru næst með 4 vinninga.

Opinn flokkur:

Haukur Halldórsson (1689) er efstur með 6 vinninga. Sóley Lind Pálsdóttir (1412) er önnur með 5 vinninga. Í 3.-7. sæti með 4½ vinning eru Hilmir Hrafnsson (1351), Björn Hólm Birkisson (1231), Bárður Örn Birkisson (1478), Ragnar Árnason (1537) og Guðmundur Agnar Bragason (1319). Pörun umferðarinnar í kvöld má finna hér.

• Heimasíða TR
• Chess-Results 
• Myndaalbúm (GB)

Vetrarmót öðlinga hefst 30. október

Vetrarmót öðlinga 40 ára og eldri hefst miðvikudaginn 30. október kl. 19.30 í félagsheimili T.R. að Faxafeni 12. Tefldar verða sjö umferðir og er umhugsunartíminn 90 mínútur á alla skákina + 30 sekúndna viðbótartími á hvern leik.

Þetta nýja mót, sem nú er haldið í þriðja sinn, hefur fengið góðar viðtökur og er án efa góð viðbót í öfluga skákmótaflóru landans.  Fyrirkomulag mótsins hentar vel þeim sem ekki hafa tök á að tefla oft í viku eða yfir heila helgi því aðeins er teflt einu sinni í viku, á miðvikudagskvöldum kl. 19.30.  Dagskráin er því ekki stíf og jafnframt lýkur mótinu vel fyrir jólaösina.

Þátttökurétt hafa allir öðlingar fertugir (á árinu) og eldri.

Dagskrá:

• 1. umferð miðvikudag 30. október kl. 19.30
• 2. umferð miðvikudag 6. nóvember kl. 19.30
• 3. umferð miðvikudag 13. nóvember. kl. 19.30
• 4. umferð miðvikudag 20. nóvember kl. 19.30
• 5. umferð miðvikudag 27. nóvember kl. 19.30
• 6. umferð miðvikudag 4. desember kl. 19.30
• 7. umferð miðvikudag 11. desember kl. 19.30

Keppt er um veglegan farandbikar, en auk hans eru verðlaun fyrir þrjú efstu sætin.

Þátttökugjald er kr. 4.000. Innifalið er frítt kaffi allt mótið.

Skráning fer fram á taflfelag.is.

NM í skák: Guðmundur vann í dag

Alþjóðlegi meistarinn Guðmundur Kjartansson (2447) vann Danann Martin Percivaldi (2173) í 2. umferð NM í skák skák sem fram fór í dag í Køge Kyst í Danmörku. Henrik Danielsen (2501) tapaði hins vegar fyrir  bandaríska FIDE-meistaranum Kassa Korley (2329). Guðmundur hefur 1 vinning en Henrik hefur 0,5 vinning. Sex skákmenn eru efstir með 2 vinninga.

Þriðja umferð fer fram á morgun. Þá verða Íslendingarnir ekki í beinni. Guðmundur teflir við Svíann Sven Degerfeldt (1929) og Henrik við Danann Jesper Pondal (1915).

80 skákmenn frá 11 löndum taka þátt í mótinu. Þar af eru níu stórmeistarar og jafnmargir alþjóðlegir meistarar. 

Henrik er nr. 6 í stigaröð keppenda en Guðmundur er nr. 12. Henrik er næststigahæstur Norrænna keppenda en Guðmundur er nr. 8. Stigahæsti keppandi mótsins er danski stórmeistarinn Peter Heine Nielsen (2649).

• Heimasíða mótsins
• Beinar útsendingar (hefjast flestar kl. 16)