Skák.is

Færsluflokkur: Spil og leikir

27.1.2014 | 08:41

Friðriksmótið í Vin í dag!

Vinaskákfélagið og Hrókurinn bjóða til Friðriksmótsins í Vin, Hverfisgötu 47, í dag mánudaginn 27. janúar klukkan 13. Friðriksmótið í Vin er haldið í tilefni af Skákdegi Íslands. Það var fyrst haldið í fyrra og þá fór Helgi Ólafsson stórmeistari með sigur af hólmi, og var sjálfur Friðrik meðal keppenda.

Tefldar verða 6 umferðir með 7 mínútna umhugsunartíma og er þátttaka ókeypis. Veitt verða verðlaun fyrir þrjú efstu sætin og í leikhléi er boðið upp á gómsætar veitingar einsog jafnan í Vin.

Skáklífið í Vin blómstrar sem aldrei fyrr um þessar mundir. Þar er teflt daglega, reglulega er efnt til stórmóta og annarra viðburða, auk þess sem Vinaskákfélagið er í eldlínunni á Íslandsmóti skákfélaga. Allir eru hjartanlega velkomnir í Vin!

Spil og leikir | Slóð | Facebook | Athugasemdir (0)

27.1.2014 | 08:19

Skákþing Reykjavíkur: Skákir sjöundu umferðar

Kjartan Maack hefur slegið inn skákir sjöundu umferðar Skákþings Reykjavíkur. Þær fylgja með sem viðhengi. Þar má finna margar athyglisverðar skákir en brot af því besta úr umferðinni verður að finna í skákdálki Fréttablaðsins næstu daga.

Veljið skák (34 alls):

Spil og leikir | Slóð | Facebook | Athugasemdir (0)

26.1.2014 | 20:49

Jón Viktor og Einar Hjalti efstir á Skákþingi Reykjavíkur

Jón Viktor Gunnarsson (2412) og Einar Hjalti Jensson (2347) halda áfram sigurgöngu sinni á Skákþingi Reykjavíkur. Í sjöundu umferð, sem fram fór í dag, vann Jón Viktor Dag Ragnarsson (2073) en Einar Hjalti hafði betur gegn Þorvarði F. Ólafssyni (2256). Þeir hafa 6½ vinning. Davíð Kjartansson (2336) og Örn Leó Jóhannsson (1954) koma næstir með 5½ vinning.

Sem fyrr er sitthvað um óvænt úrslit. Örn Leó heldur áfram að gera góða hluti og gerði jafntefli við Júlíus Friðjónsson (2175), Jón Trausti Harðarson (2003) vann Sigurbjörn Björnsson (2375), Ólafur Gísli Jónsson (1871) lagði Stefán Bergsson (2122) að velli og Hörður Jónasson (1524) gerði jafntefli við Sigurlaug R. Friðþjófsdóttur (1752).

Áttunda og næstsíðasta umferð fer fram á miðvikudagskvöld. Pörun liggur ekki enn fyrir vegna frestaðrar skákar.

Spil og leikir | Slóð | Facebook | Athugasemdir (0)

26.1.2014 | 20:00

Skákþáttur Morgunblaðsins: Teflt í námunda við Næturvörðinn

Tata Steel-mótið í Wijk aan Zee hófst um síðustu helgi. Litli strandbærinn í grennd við Amsterdam hefur haldið þessu móti úti í næstum 80 ár og hollenskir skákáhugamenn flykkjast þangað bæði til að tefla og fylgjast með. Á mótinu í ár sakna menn hins nýbakaða heimsmeistara, Magnúsar Carlsen, sem sigraði með glæsibrag í fyrra og jafnaði í vinningum talið gamalt staðarmet Kasparovs frá 1999. Í efsta flokknum sem í eru 12 keppendur fór fram fjórða umferðin á Rikjsmuseum í Amsterdam.

Fyrir umferðina stilltu keppendur sér upp til myndatöku við frægasta málverk safnsins, Næturvörðinn eftir Rembrandt. Undirrituðum fannst nú aðeins halla á skáklistina í samanburði við snilldarverk gömlu meistaranna, a.m.k. ef tekin er til meðferðar sigurskák Aronjans yfir Nakamura. Byrjunin tók þekkta stefnu og Aronjan hafði svo sem aldrei neitt nema örlítið betri stöðu þar sem riddarinn átti alls kostar við biskupinn. Samt gat Nakamura haldið jafntefli en hann kiknaði undan pressunni:

Levon Aronjan _ Hikaru Nakamura

Kóngsindversk vörn

1. d4 Rf6 2. Rf3 g6 3. c4 Bg7 4. Rc3 d6 5. e4 O-O 6. Be2 e5 7. Be3 Rg4 8. Bg5 f6 9. Bh4 g5 10. Bg3 Rh6 11. c5 g4 12. Rh4 Rc6 13. cxd6 cxd6 14. dxe5 dxe5 15. Bc4 Kh8 16. Dxd8+ Hxd8 17. O-O Rd4 18. Had1

Allt hefur þetta sést áður, 11. leikur hvíts er dálítið erfiður viðfangs og svartur situr uppi með lakara endatafl þar sem hann hefur enga vinningsmöguleika en jafnteflisfæri. Þannig gerast kaupin á eyrinni í dag; með góðri byrjunarþekkingu geta menn oft tryggt sér örlítið betri stöðu og teflt til sigurs án þess að taka áhættu.

18. ... Bxe6 Rxe6 20. f3 gxf3 21. gxf3 Hxd1 22. Hxd1 Hd8

Nakamura bauð jafntefli eftir þennan leik sem Aronjan hafnaði og taldi boðið klárt dæmi um vanmat á hættum stöðunnar. Það liggur í augum uppi að vinningsmöguleikar ef einhverjir eru liggja hjá Aronjan.

23. Hxd8 Rxd8 24. Bf2 a6 25. Kf1 Kg8 26. Ke2 Kf7 27. Be3 Ke6 28. Ra4 Bf8 29. Bxh6 Bxh6 30. Rc5+ Kf7 31. Kd3 Bf4 32. h3 Bg5 33. Rf5 Re6 34. Rxe6?

Enginn heimsmeistaraklassi yfir þessum leik, eftir 44. Rxb7! Rf4+ 45. Kc4 Rxh3 36. b4 Rf4 37. a4 h5 38. b5 axb5 39. axb5 á hvítur að vinna.

34. ... Kxe6 35. Kc4 b6 36. a4 Bd2 37. b3 h5 38. b4 a5 39. bxa5 bxa5 40. Kb5

Riddarinn stendur vel þar sem ekki verður sótt að honum. Nakamura var að ná tímamörkunum við 40. leik og stígur feilspor.

40. ... Kd7??

Eftir 40. ... Kf7 er erfitt að sýna fram á vinning, t.d. 41. Rd6+ Kg6 42. Rc4 Be1 43. Rxa5? Kg5! og hvítur getur hæglega tapað þessari stöðu!

41. Rg7! h4 42. Rf5 Be1 43. Re3 Ke6 44. Rc4

- og svartur gafst upp.

1. Aronjan 3 v. 2.-5. Harikrishna, Giri, Karjakin og So 2 ½ v. 6.-8. Dominguez, Caruana og Nakamura 2 v.

Þrír efstir á Skákþingi Reykjavíkur

Þrír skákmenn eru efstir að loknum fjórum umferðum á Skákþingi Reykjavíkur sem nú stendur yfir. Sá sigurstranglegasti meðal þeirra er tvímælalaust Jón Viktor Gunnarsson. Hann er með fullt hús ásamt Þorvarði Ólafssyni og Einari Hjalta Jenssyni. Davíð Kjartansson er enn í fjóra sæti eð 3 ½ vinning. Í fimmtu umferð sem fram fer í dag, 19. janúar, tefla saman Einar Hjalti og Jón Viktor, Davíð og Þorvarður. Tefldar verða níu umferðir og er teflt tvisvar í viku á sunnudögum og miðvikudögum.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 19. janúar 2014.

Skákþættir Morgunblaðsins

Spil og leikir | Breytt 20.1.2014 kl. 14:16 | Slóð | Facebook | Athugasemdir (0)

26.1.2014 | 18:24

Skák í Ölduselsskóla í tilefni Skákdagsins

Í fyrra skoraði skólalið Ölduselsskóla í skák, starfsfólk skólans á hólm, og fóru leikar ansi illa fyrir starfsfólk. Það var námsráðgjafi skólans, Arnar Þorsteinsson (ELO 2205) sem hélt heiðri starfsfólks á lofti og sigraði báðar sínar skákir. Í ár ætlar Arnar einn og óstuddur að taka upp hanskann fyrir hönd starfsfólks og tefla fjöltefli með klukkum við skólaliðið.

Skólaliðið skipa m.a. skákkapparnir ungu Mykhaylo Kravchuk, Alec Elías Sigurðarson, Óskar Víkingur Davíðsson, Brynjar Haraldsson og Stefán Orri Davíðsson. Skólaliðið hefur náð undraverðum árangri á skólamótum á síðustu árum, þrátt fyrir að vera að mestu skipað bráðungum skákmönnum. Þess má geta að Mykhaylo mun tefla fyrir Íslands hönd í flokki undir 10 ára á Norðurlandamótinu í skólaskák í næsta mánuði, að Óskar Víkingur keppti á Evrópumóti ungmenna í haust, og að skákbræðurnir knáu Óskar Víkingur og Stefán Orri urðu jafnframt á dögunum Íslandsmeistarar í átta og sjö ára aldursflokkum. Liðið hefur æft stíft undanfarið ár og kemur ákveðið til leiks og því er ljóst að Arnar þarf að beita öllum brögðunum í bókinni til að tryggja sigur.

Fjölteflið fer fram í Ölduselsskóla kl. 11:30 mánudaginn 27, janúar.

Spil og leikir | Breytt s.d. kl. 18:26 | Slóð | Facebook | Athugasemdir (0)

26.1.2014 | 18:20

Aronian öruggur sigurvegari Tata Steel-mótsins

Armeninn Levon Aronian (2812) vann öruggan sigur á Tata Steel-mótinu sem lauk í Sjávarvík (Wijk aan Zee) í Hollandi í dag þrátt fyrir tap gegn Loek van Wely (2672) í lokaumferðinni. Aronian hlaut 8 vinninga í 11 skákum. Anish Giri (2734) og Sergey Karjakin (2759) urðu í 2.-3. sæti með 6½ vinning.

Króatinn Ivan Saric (2637) vann b-flokkinn með yfirburðum, hlaut 10 vinninga í 13 skákum. Gamla hetjann Jan Timman (2607) og Baadur Jobava (2710) komu næstir með 8½ vinning.

Spil og leikir | Slóð | Facebook | Athugasemdir (0)

26.1.2014 | 16:02

Toyotaskákmót eldri borgara fer fram á föstudaginn

Íslenska skákvikan er hafin, þá teflum við öll til heiðurs okkar fyrsta stórmeistara Friðriki Ólafssyni. Eldri borgarar ætla að tefla mikið þessa viku eins og þeir gera yfirleitt. Föstudaginn 31. janúar býður Toyota á Íslandi eldri borgurum til skákmóts í höfuðstöðvun sínum í Kauptúni 6 Garðabæ þ.e. við hliðina á IKEA. Toyota gefur öll verðlaun sem eru vegleg, þetta er sjöunda Toyotaskákmótið sem haldið er.

Sigurvegari á síðasta Toyotamóti var Bragi Halldórsson. Æsir skákfélag F E B í Reykjavík og Riddarar úr Hafnarfirði hjálpast að við framkvæmd mótsins. Skákmótið hefst stundvíslega kl. 13.00

Þátttakendur eru vinsamlega beðnir að mæta vel tímanlega fyrir kl. 13.00

Það er best að forskrá sig hjá Garðari Guðmundssyni í síma 8984805 og í netfangið rokk@internet.is.og hjá Finni Kr. Finnssyni í síma 8931238 og netfangið finnur.kr@internet.is

Það verða tefldar níu umferðir með 10 mínútna umhugsun. Allir skákmenn 60+ og þeir sem verða 60 ára á árinu velkomnir.

Spil og leikir | Slóð | Facebook | Athugasemdir (0)

26.1.2014 | 13:50

Friðriksmótið í Vin á mánudag!

Vinaskákfélagið og Hrókurinn bjóða til Friðriksmótsins í Vin, mánudaginn 27. janúar klukkan 13. Friðriksmótið í Vin er haldið í tilefni af Skákdegi Íslands. Það var fyrst haldið í fyrra og þá fór Helgi Ólafsson stórmeistari með sigur af hólmi, og var sjálfur Friðrik meðal keppenda.

Spil og leikir | Slóð | Facebook | Athugasemdir (0)

26.1.2014 | 10:35

Gleðilegan Skákdag!

Skák.is óskar skákmönnum um allt land til hamingju með Skákdaginn. Afmælisbarnið, Friðrik Ólafsson, fær sérstakar hamingjuóskir en hann á afmæli í dag enda Skákdagurinn haldinn til heiðurs honum. Mikið hefur verið um að vera í skáklífi landans og verður áfram í dag og næstu vikur.

Af viðburðum í dag má nefna:

Sjöunda umferð Skákþings Reykjavíkur verður tefld í Skákhöll TR-inga.
Opið hús hjá Skákfélagi Akureyrar og keppni milli Lundarskóla og Brekkuskóla.
Víkingar tefla Víkingaskák á Classic Rock.
Ungir skákmenn skora á pottverja í sundlaug Breiðholts kl. 10:30.
Íslandsmót stúlkna fer fram í Skáksambandinu.

Skákmenn eru hvattir til að taka upp taflið hvar sem er í dag. Senda má skemmtilegar myndir á ritstjóra í frettir@skaksamband.is

Spil og leikir | Slóð | Facebook | Athugasemdir (1)

25.1.2014 | 17:28

Rimaskóli Íslandsmeistari grunnskólasveita í stúlknaflokki

Rimaskóli sigraði á Íslandsmóti grunnskólasveita í stúlknaflokki sem fram fór í dag í Rimaskóla. Þetta var í tíunda skipti sem skólinn vinnur keppnina á síðustu tólf árum og í fjórða skipti í röð. Sigurinn í ár var þó verulega tæpur en aðeins munaði hálfum vinningi á Rimaskóla og Álfhólsskóla sem varð í öðru sæti. Mjög litlu munaði að skólarnir yrðu jafnir og þá hefði komið til aukakeppni.

Melaskóli tók þriðja sætið mjög óvænt. Í lokaumferðinni vannst stórsigur, 4-0, á Breiðholtsskóla. Jöfn Melaskólasveitinni í þriðja sæti en lægri á stigum var sveit Salaskóla.

Alls tóku 16 sveitir þátt sem er næstbesta þátttakan í sögu mótsins. Það var ánægjulegt að sjá skóla koma utan höfuðborgarsvæðisins en grunnskólarnir í Grindavík og Hellu tóku þátt í mótinu. Árangur Breiðholtsskóla vakti einnig athygli, en fjölmargar stelpur í unglingadeild eru í skákvali í tvo tíma á viku.

Bros var á hverju andliti og leikgleðin í fyrirrúmi.

Stelpuskákinni um helgina er engan veginn lokið með þessu móti. Á morgun fer fram Íslandsmót stúlkna (fæddar 1998 og síðar) í húsnæði Skáksambandsins, Faxafeni 12. Mótið hefst kl. 11. Hægt er að skrá sig til leiks hér og upplýsingar um þegar skráða keppendur má finna hér. Stúlkur eru hvattir til að skrá til leiks!

Sigursveit Rimaskóla