Skák.is

Færsluflokkur: Spil og leikir

28.5.2014 | 16:56

Fimmta umferð Íslandsmótsins hafin

Fjórða umferð Íslandsmótsins í skák hófst nú kl. 16. Í henni mætast tveir stigahæstu menn mótsins, Héðinn og Hannes mætast Hjörvar og Henrik sem eru nr. 3 og 4 í stigaröð keppenda. Afar mikilvæg umferð sem gæti ráðið miklu um lokaröð keppenda.

Heimasíða mótsins
Chess-Results
Bein útsending (hefðbundin)
Bein útsending (áskorendaflokkur)
Bein útsending (tölvuskýringar)
Bein útsending (Ingvar Þór - lifandi)
Myndaalbúm fimmtu umferðar (GB)

Spil og leikir | Slóð | Facebook | Athugasemdir (0)

28.5.2014 | 12:00

Fimmta umferð Íslandsmótsins fer fram í dag - Stigahæstu menn mætast

Fimmta umferð Íslandsmótsins fer fram í dag og hefst kl. 16 í Stúkunni. Afar spennandi umferð er framundan en í dag mætast tveir stigahæstu keppendur mótsins Hannes Hlífar Stefánsson og Héðinn Steingrímsson. Einnig mætast keppendur nr. 3 og 4 í stigaröðinni Henrik Danielsen og Hjörvar Steinn Grétarsson sem báðir eru meðal efstu manna.

Umferðin í kvöld gæti því ráðið gríðarlega miklu um úrslit mótsins.

Hannes er efstur með 3½ vinning, Henrik og Guðmundur Kjartansson koma næstir með 3 vinninga og Hjörvar er fjórði með 2½ vinning. Bragi Þorfinnsson er fimmti með 2 vinninga en Héðinn og Helgi Áss hafa 1½ vinning og þurfa því á sigri á halda ætli þeir að blanda sér í toppbaráttuna.

Umferð dagsins:

Héðinn (1½) - Hannes (3½)
Hjörvar (2½) - Henrik (3)
Helgi Áss (1½) - Guðmundur K. (3)
Bragi (2) - Guðmundur G. (1)
Þröstur (1) - Einar Hjalti (1)

Mótstöflu má finna á Chess-Results.

Áskorendaflokkur

Magnús Teitsson er einn efstur með 4 vinninga. Sævar Bjarnason, Davíð Kjartansson og Lenka Ptácníková eru í 2.-4. sæti með 3½ vinning.

Magnús tekur yfirsetu í dag og fær fyrir hana hálfan vinning. Sævar og Lenka mætast og Davíð teflir við Sigurð Daða Sigfússon.

Mótstafla á Chess-Results.

Íslandsmót kvenna

Íslandsmót kvenna er hluti af áskorendaflokknum. Þar er Lenka efst með 3½ vinning en Hallgerður Helga Þorsteinsdóttir og Jóhanna Björg Jóhannsdóttir eru í 2.-3. sæti með 3 vinninga.

Spil og leikir | Breytt s.d. kl. 13:07 | Slóð | Facebook | Athugasemdir (0)

28.5.2014 | 11:00

Björgvin sigurvegari Vorhraðskákmóts Ása - Guðfinnur Vetrarhrókur Ása

Æsir héldu sitt vorhraðskákmót í gær og með því lauk vetrardagskrá skákfélagsins í ár. Tuttugu og átta heiðursmenn mættu til leiks í gær. Tefldar voru níu umferðir með sjö mínútna umhugsunartíma. Björgvin Víglundsson fór með sigur af hólmi, eins og hann hefur oft gert í vetur á skákviðburðum hjá Ásum en hann hlaut 8½ vinning af 9. Í öðru sæti varð Guðfinnur R Kjartansson með 7½ vinning

Í þriðja til fjórða sæti urðu þeir Stefán Þormar og Sigurður G Daníelsson jafnir með 6 vinninga en Stefán var hærri á stigum og fékk bronsið.

Þegar skákmótinu var lokið þá fengu menn sér gott kaffi og smurbrauð hjá henni Jóhönnu, í boði klúbbsins. Það var gott eins og allt sem hún ber á borð fyrir okkur og þökkum við henni kærlega fyrir þjónustuna í vetur.

Að lokinni kaffidrykkju fór fram verðlauna afhending, fyrst voru afhent verðlaun fyrir hraðskákmótið.

Síðan voru afhent verðlaun fyrir samanlagðan árangur á skákdögum vetrarins.

Guðfinnur R Kjartansson varð Vetrarhrókur nr. 1. Guðfinnur tefldi 290 skákir og fékk 205 vinninga sem er 71% vinningshlutfall. Hann fékk afhentan farandgrip sem er veglegur Hrókur, sérsmíðaður til varðveislu í eitt ár. Guðfinnur vann Hrókinn einnig síðast ár.

Vetrarhrókur nr. 2 varð Páll G Jónsson hann tefldi 250 skákir og fékk 160 vinninga sem er 64 % hlutfall. Vetrarhrókur nr 3. varð Jón Víglundsson, hann tefldi 300 skákir og fékk 156 vinninga sem er 52 % hlutfall. Jón fékk sérstakt klapp fyrir góða ástundun en hann var sá eini sem mætti á alla skákviðburði vetrarins.

Það má svo geta þess að Björgvin Víglundsson var með besta vinningshlutfallið hann byrjaði að tefla með okkur í janúar og tefldi 150 skákir og fékk 134½ vinninga sem er 90% hlutfall.

Æsir byrja síðan aftur að tefla 2. september í haust, en það má benda skákþyrstum köppum á að Riddararnir tefla alla miðvikudaga í Hafnarfjarðarkirkju.

Skákstjórar í gær voru þeir Finnur Kr Finnsson og Jónas Ástráðsson.

Spil og leikir | Breytt s.d. kl. 10:06 | Slóð | Facebook | Athugasemdir (0)

28.5.2014 | 09:37

Aðalfundur TR

Aðalfundur Taflfélags Reykjavíkur verður haldinn mánudaginn 2. júní 2014 kl. 20 í húsnæði félagsins að Faxafeni 12.

Dagskrá fundarins er venjuleg aðalfundarstörf.

Stjórn T.R.

Spil og leikir | Slóð | Facebook | Athugasemdir (0)

27.5.2014 | 17:26

Grantas Grigorianas 1954-2014 - Kveðja frá SSON

Við liðsmenn í Skákfélagi Selfoss og nágrennis hörmum fráfall Grantas félaga okkar en hann féll frá 15. maí sl.
Grantas hafði einstaklega gaman af því að tefla og var einn virkasti félagsmaður skákfélagsins og ávallt boðinn og búinn til að tefla fyrir félag sitt SSON.

Grantas var mikill keppnismaður og úrræðagóður í flóknum stöðum. Grantas var bæði glettinn og snarpur og kom það vel fram í skákum hans.

Sjaldan höfðum við séð Grantas jafn glaðan og þegar hann hitti og átti gott spjall við Kasparov fyrrverandi heimsmeistara í skák í mars sl. í Fischersetri en báðir ólust þeir upp í Bakú í Azerbaijan.

Við í Sákfélagi Selfoss og nágrennis kveðjum nú ljúfan félaga, Grantas, sem féll því miður frá langt fyrir aldur fram. Við þökkum honum allar góðar stundir.

Við vottum eftirlifandi eiginkonu, börnum og aðstandendum okkar dýpstu samúð.

Stjórn Skákfélags Selfoss og nágrennis.

Spil og leikir | Slóð | Facebook | Athugasemdir (0)

27.5.2014 | 13:42

Fjöltefli í Fischersetri á sunnudaginn

Næstkomandi sunnudag 1. júní kl. 14:00 mun Björgvin Smári Skákmeistari Selfoss tefla fjöltefli í Fischersetri. Fjölteflið er opið öllum sem áhuga hafa á að tefla, og eru ungir sem gamlir hvattir til að koma.

Þeir sem vilja taka þátt í fjölteflinu vinsamlegast mætið ekki seinna en 13:45, en einnig er hægt að skár sig með því að senda tölvupóst á fischersetur@gmail.com

Framkvæmdastjórn Fischerseturs

Spil og leikir | Breytt s.d. kl. 18:33 | Slóð | Facebook | Athugasemdir (0)

27.5.2014 | 09:00

Sex efstir í skák-getrauninni

Eins og fram hefur komið tóku 106 skákákhugamenn þátt í getraun um röð fimm efstu manna Íslandsmótsins í skák. Að lokinni þriðju umferð reyndist einn einstaklingur, Björn Jónsson, formaður TR, vera efstur með fullt hús stiga. Staðan í getrauninni breyttist hins vegar töluvert eftir fjórðu umferð. Nú eru sex þátttakendur efstir með 12 stig af 15 mögulegum. Það eru:

Jóhannes L. Harðarson
Jón Páll Haraldsson
Óskar Long Einarsson
Pálmi Sveinbjörnsson
Þorsteinn Magnússon
Tryggvi Marteinsson

Ljóslega hafa allir þessir spáð Hannesi efsta sæti og annaðhvort Henrik eða Guðmundi Kjartanssyni því öðru en veitt eru 5 stig fyrir rétt efsta sæti, 4 stig fyrir það annað og svo koll af kolli.

Gera má ráð fyrir miklum sveiflum á milli umferða en staðan verður birt aftur að lokinni umferð morgundagsins.

Spil og leikir | Breytt s.d. kl. 08:28 | Slóð | Facebook | Athugasemdir (0)

27.5.2014 | 08:00

Vorhraðskákmót Ása fer fram í dag

Æsir halda sitt vorhraðskákmót á þriðjudaginn 27. maí. Mótstaður er Stangarhylur 4. Tefldar verða níu umferðir með sjö mínútna umhugsun. Þá verða afhent verðlaun til þeirra sem hafa fengið flesta vinninga samanlagt á öllum skákdögum vetrarins en viðkomandi eru kallaðir Vetrarhrókar.

Vetrarhrókur 2013 var Guðfinnur R Kjartansson.

Allir skákmenn velkomnir sem orðnir eru 60+ og konur 50+

Við byrjum að tefla kl. 13.00.

Spil og leikir | Breytt s.d. kl. 08:31 | Slóð | Facebook | Athugasemdir (0)

27.5.2014 | 07:00

Aðalfundur Taflfélags Kópavogs fer fram í kvöld

Aðalfundur Taflfélags Kópavogs, Kt. 470576-3919, verður haldinn þriðjudaginn 27. maí kl. 20.00 í húsakynnum Skáksambands Íslands að Faxafeni 12. Á dagskrá fundarins eru öll hefðbundin aðalfundarstörf.

Stjórnin

Spil og leikir | Breytt 13.5.2014 kl. 09:54 | Slóð | Facebook | Athugasemdir (0)

26.5.2014 | 21:21

Hannes Hlífar efstur eftir sigur á Hjörvari

Hannes Hlífar Stefánsson vann Hjörvar Stein Grétarsson í fjórðu umferð Íslandsmótsins í skák sem fram fór kvöld. Hannes er nú einn í forystu en hann hefur hlotið 3,5 vinning. Henrik Danielsen sem vann Braga Þorfinnsson og Guðmundur Kjartansson sem lagði Þröst Þórhallsson í maraþonskák eru í 2.-3. sæti með 3 vinninga. Öðrum skákum umferðarinnar með jafntefli. Hjörvar Steinn er fjórði með 2,5 vinning.

Mótstöflu má finna á Chess-Results.

Á morgun er frídagur en fimmta umferð fer fram á miðvikudag og hefst kl. 16. Þá mætast fjórir stigahæstu keppendur mótsins innbyrðis. Annars vegar Héðinn Steingrímsson og Hannes Hlífar og hins vegar Hjörvar og Henrik.

Áskorendaflokkur

Magnús Teitsson fer mikinn í áskorendaflokki og er efstur með fullt hús. Hann vann Sigurð Daða Sigfússon í kvöld. Davíð Kjartansson, Lenka Ptácníková og Sævar Bjarnason koma næst með 3,5 vinning. Sævar gerði jafntefli við Gylfa Þórhallsson í kvöld en þar tefldu tvær reyndustu skákmenn landsins - en þeir hafa teflt flestar kappskákir Íslendinga frá upphafi!

Tveir efstu menn áskorendaflokks ávinna sér keppnisrétt í landsliðsflokki að ári.

Mótstöflu má finna á Chess-Results.

Íslandsmót kvenna

Íslandsmót kvenna er hluti af áskorendaflokki. Þar er Lenka efst með 3,5 vinning. Hallgerður Helga Þorsteinsdóttir og Jóhanna Björg Jóhannsdóttir koma næstar með 3 vinninga.