Skák.is

Færsluflokkur: Spil og leikir

11.6.2014 | 07:20

Dagur að tafli í Albena

Alþjóðlegi meistarinn Dagur Arngrímsson (2390) situr nú um þessar mundir að tafli í Albena í Búlgaríu og teflir þar í tveimur mótum.

Fyrra mótinu er lokið og þar hlaut 5,5 vinning og endaði í 28.-44. sæti en fyrirfram var honum raðað í 51. sæti á stigum. Hann hækkaði um 1 stig fyrir frammistöðuna. Einstaklingsúrslit Dags má finna á Chess-Results.

Strax í kjölfarið hófst annað mót á sama stað og þar er lokið einni umferð. Dagur vann í fyrstu umferð en mætir í annarri umferð í dag armenska stórmeistaranum Vladimir Akopian (2667).

Spil og leikir | Slóð | Facebook | Athugasemdir (0)

11.6.2014 | 07:00

Mjóddarmót Hugins fer fram á laugardaginn

Mjóddarmótið fer fram laugardaginn 14. júní í göngugötunni í Mjódd. Mótið hefst kl. 14 og er mótið öllum opið. Góð verðlaun í boði. Á síðasta ári sigraði Gámaþjónustan ehf en fyrir þá tefldi Daði Ómarsson. Tefldar verða sjö umferðir með sjö mínútna umhugsunartíma. Skráning fer fram í síma 866-0116 og á heimasíðu Hugins Þátttaka er ókeypis!

Mjóddarmótið var fyrst haldið 1999 og hét þá Kosningamót Hellis og fór fram á kjördegi. Á fyrsta mótinu sigraði Hannes Hlífar Stefánsson sem tefldi fyrir Símvirkjann. Mótið fékk fljótlega nafnið Mjóddarmót Hellis enda ekki hægt að halda kosningamót á hverju ári og ekki var mögulegt að halda mótið á kjördegi eftir Taflfélagið Hellir flutti í núverandi húsnæði. Núna tekur Skákfélagið Huginn við mótinu eftir sameiningu félaganna Goðans-Máta og Hellis undir nafni Hugins.

Verðlaun eru sem hér segir:

1. 15.000
2. 10.000
3. 5.000

Skráning:

Heimasíða Hugins
Sími: 866 0116

Spil og leikir | Breytt 8.6.2014 kl. 07:40 | Slóð | Facebook | Athugasemdir (0)

10.6.2014 | 06:22

Sardinia: Stefán með jafntefli gegn stórmeistara í fórnarskák

Stefán Bergsson (2077) gerði jafntefli í gær við rússneska stórmeistarann Sergei Beshukov (2424) í afar æsilegri skák í þriðju umferð í gær í Sardinina. Stefán fórnaði hrók fyrir óljósar bætur og átti um tíma afar vænlegar vinningsleiðir. Skákinni lauk um síðir með jafntefli þegar stórmeistarinn fórnaði drottningu til að tryggja sér þráskák. Þröstur Þórhallsson (2425) og Gunnar Björnsson (2063) unnu en Heimir Páll Ragnarsson (1423) tapaði.

Stefán hefur 2,5 vinning og er í 2.-6. sæti, Þröstur og Gunnar hafa 2 vinninga og eru í 7.-45. sæti og Heimir hefur 1,5 vinning og er í 46.-74. sæti.

Í dag verða tefldar tvær umferðir. Þær hefjast kl. 7 og 13:30. Í þeirri fyrri verða bæði Stefán og Þröstur í beinni. Stefán teflir við ítalska FIDE-meistarann Miragha Aghayev (2370) og Þröstur við ítalska alþjóðlega meistarann Mario Lanzani (2295).

113 skákmenn taka þátt frá 16 löndum. Þröstur er sjötti í stigaröð keppenda.

Heimasíða mótsins
Beinar útsendingar (kl. 13)

Spil og leikir | Slóð | Facebook | Athugasemdir (0)

10.6.2014 | 05:59

Skákir Meistaramót Skákskóla Íslands

Skákir Meistaramóts Skákskóla Íslands úr 4.-7. umferð eru nú aðgengilegar. Það var Lenka Ptácníková sem sló þær inn.

Veljið skák (42 alls):

Spil og leikir | Breytt s.d. kl. 06:01 | Slóð | Facebook | Athugasemdir (0)

9.6.2014 | 10:07

Stefán og Heimir Páll byrja vel í Sardinia.

Stefán Bergsson (2077) og Heimir Páll Ragnarsson (2423) hafa byrjað afskaplega vel á Porto Mannu-mótinu á ítölsku eyjunni Sardinia. Í gær unnu þeir sínar skákir. Það gerði Gunnar Björnsson (2063) einnig en Þröstur Þórhallsson (2425) tapaði fyrir kínverska stórmeistaranum Ni Hua (2653). Stefán hefur 2 vinninga, Heimir Páll 1,5 vinning en Þröstur og Gunnar hafa 1 vinning.

Stefán mætir í dag rússneska stórmeistaranum Sergei Beshukov (2424) og geta áhugasamir fylgst með skák hans sem og skák Þrastar gegn Dananum Finn Nohr (2080) í beinni á netinu.

113 skákmenn taka þátt frá 16 löndum. Þröstur er sjötti í stigaröð keppenda.

Heimasíða mótsins
Beinar útsendingar (kl. 13)

Spil og leikir | Slóð | Facebook | Athugasemdir (0)

9.6.2014 | 09:39

Kramnik efstur á No Logo Norway Chess eftir sigur á Caruna

Kramnik náði foyrstunni á No Logo Norway Chess með sigri í 5. umferð á Caruna í gær. Carlsen, sem hafði gert jafntefli í öllum sínum hingað til, vann Aronian og Giri lagði Topalov að velli sem hefur átt hörmulegt mót. Kramnik hefur 3,5 vinning og Carlsen og Caruna hafa 3 vinninga. Frammistaða Agdestein heldur áfram að vekja athygli en hefur gert jafntefli í öllum sínum skákum.

Sjötta umferð hefst kl. 13:30. Nigel Short og Dirk Jan Geuzendam með skákskýringar.

Spil og leikir | Slóð | Facebook | Athugasemdir (0)

9.6.2014 | 07:00

Sumarnámskeið Hugins fyrir stelpur

Í júní ætlum við að vera með námskeið fyrir stelpur í 1-7 bekk. Í boði verða tvær vikur, vikan 16.-20. júní og svo 23.-27. júní. Fyrri vikuna verðum við frá 9-14, þar sem þriðjudagurinn dettur út (17. júní) en seinni vikuna verðum við frá 9-13. Staðsetning Víkingsheimilið.

Vikan er á 10.000 kr en ef báðar eru teknar er það 15.000 kr. Veittur er 20% systkinaafsláttur.

Ýmislegt munum við bralla, t.d skákkennsla, tvískákir, heilin og höndin og margt fleira!

Væri gaman að sjá sem flestar! Um að gera að halda sér við yfir sumartímann.

Við setjum takmörkun á fjölda þátttakenda og miðum við ca. 20 stelpur.

Skráning fer fram á elsamk1208@gmail.com. Um að gera að skrá sig sem fyrst!

Kennarar eru Elsa María Kristínardóttir og Jóhanna Björg Jóhannsdóttir landsliðskonur í skák.

Spil og leikir | Breytt 7.6.2014 kl. 22:26 | Slóð | Facebook | Athugasemdir (0)

8.6.2014 | 20:22

Dagur Ragnarsson sigraði á Meistaramóti Skákskóla Íslands

Dagur Ragnarsson sigraði á Meistaramóti Skákskóla Íslands sem lauk um undir kvöld í dag. Dagur vann Felix Steinþórsson í lokaskákinni og hlaut því 6 ½ vinning af 7 mögulegum. Skák hans við Felix var lengi vel jafnteflisleg og jafnteflisúrslit hefðu þýtt að til einvígis hefði komið milli Dags og helsta keppinautar hans Olivers Aron Jóhannessonar sem vann Bárð Birkisson í lokumferðinni. En Felix missti peð í hróksendatafli, þar sem báðir áttu tvö peð, og gafst upp enda var staðan þá vonlaus. Dagur og Oliver Aron, sem varð í 2. sæti höfðu nokkra yfirburði yfir aðra keppendur en í 3. sæti kom Birkir Karl Sigurðsson með 4 ½ vinning og Gaut Páll Jónsson varð í 4. sæti einnig með 4 ½ vinning.

Fjölmargir skákmenn fengu 4 vinninga en meðal þeirra var Akureyringurinn Símon Þórhallsson hæstur á stigum var og var hann úrskurðaður i 5. sæti sem var verðlaunasæti.

1. verðlaun í flokki 12 ára og yngri hlaut Hilmir Freyr Heimisson en í 2. sæti varð Vignir Vagnar Stefánsson og í 3. sæti Felix Steinþórsson. Við mótslit þakkaði Helgi Ólafsson skólastjóri Skákskóla Íslands keppendum fyrir þátttökuna en mótið fór fram i sannkallaðri bongóblíðu. Helgi vék að góðri frammistöðu bræðranna Bárðar Arnar og Björns Hólm en systir þeirra Freyja Birkisdóttir var einnig með í mótinu en hún er aðeins átta ár gömul. Allir keppendur 9 ára og yngri fengu sérstaka viðurkenningu fyrir þátttökuna.

Nánar um mótið á chess_results
Myndalbúm

Spil og leikir | Breytt s.d. kl. 20:25 | Slóð | Facebook | Athugasemdir (0)

8.6.2014 | 20:00

Skákþáttur Morgunblaðsins: Guðmundur Kjartansson efstur - æsispennandi Íslandsþing

Þegar þetta er ritað eru þrjár umferðir eftir í keppni landsliðsflokks á Skákþingi Íslands sem fram fer í Stúkunni á Kópavogsvelli og alt bendir til þess að lokaumferðirnar verði æsispennandi en úrslit margra skáka hafa komið hressilega á óvart. Fyrir mótið lét greinarhöfundur þau orð falla að Guðmundur Kjartansson væri til alls vís. Hann er einn efstur eftir sex umferðir með 4 ½ vinning og hefur náð að vinna löng og ströng endatöfl og hefur teflt af mestu öryggi allra keppenda. Henrik Danielsen kemur næstur með 4 vinninga, hefur m.a. unnið Hjörvar Stein og Braga. Í 3.-5. sæti koma svo Héðinn Steingrímsson, Hannes Hlífar Stefánsson og Bragi Þorfinnsson, með 3 ½ vinning.

Hannes komst í toppsætið eftir fjórar umferðir en tapaði þá fyrir Héðni og lék gróflega af sér í vænlegri stöðu gegn Þresti Þórhallssyni og tapaði aftur. Þröstur er í 6. sæti með 3 vinninga en sex efstu eiga allir möguleika á Íslandsmeistaratitlinum. Geta má þess að lokaumferðin sem tefld verður á morgun, sunnudag, býður uppá skákir Hannesar og Henriks, Hjörvars og Guðmundar og Héðins og Braga.

Aðstæður í Stúkunni á Kópavogsvelli, þar sem einnig fer fram keppni í áskorendaflokki, en þar er Magnús Teitsson efstur með 5 ½ vinning af sex, eru prýðilegar. Hrósa ber frábærri heimasíðu sem býður uppá fjölbreyttar beinar útsendingar frá öllum skákum landsliðsflokks og valinna skáka áskorendaflokks. Hins vegar fær Stefán Kristjánsson ekki mikið hrós fyrir að hætta við þátttöku 2 klst. áður en keppni hófst. Þeir sem hlaupa í skarðið með stuttum fyrirvara geta ekki undirbúið sig fyrir svo harða keppni og tefla þ.a.l. við ójafnar aðstæður á við aðra keppendur.

Þröstur Þórhallsson er alltaf sami baráttujaxlinn og vann glæsilegan sigur á Héðni Steingrímsson í 3. umferð en hafði tapað í tveim fyrstu umferðunum:

Héðinn Steingrímsson - Þröstur Þórhallsson

Vængtafl

1. c4 e6 2. g3 d5 3. Bg2 Rf6 4. Rf3 Be7 5. O-O O-O 6. b3 c5 7. Bb2 Rc6 8. e3 b6 9. Rc3 Ba6 10. De2 Hc8 11. Hac1 Dd7 12. Rb5

Þetta ferðalag riddarans lítur ekki illa út en svartur gerir best í því að láta hann afskiptalausan.

12. ... Hfd8 13. d4 cxd4 14. exd4 De8 15. Hfd1 h6 16. a4

Óþarfur leikur sem skapar vissa veikleika á drottningarvængum. Gott var 16. Re5.

16. ... Bb7 17. Re5 a6 18. Rxc6 Hxc6 19. Rc3 Hcc8 20. cxd5 exd5 21. Dd3?!

Annar ónákvæmur leikur. Betra var 21. Bh3.

21. ... Dd7 22. Hc2 Bb4 23. Hdc1 He8 24. Ra2 Hxc2 25. Dxc2 Bd6 26. Rc3 h5!

Smátt og smátt hefur svartur náð frumkvæðinu og þessi framrás h-peðsins á eftir að reynast örlagarík.

27. Dd2 Df5 28. Dd1

Það er erfitt að finna áætlun, 28. He1 strandar á 28. ... Hxe1+ 29. Dxe1 Dc2! o.s.frv.

28. ... h4 29. Df3 Dg5 30. Hd1 hxg3 31. hxg3 Rg4!

Óveðursskýin hrannast upp, 32. Bh3 má svara með 32. .. Bc8 með ýmsum hótunum tengdum riddaranum.

32. Bc1 Dh5 33. Bf4 Bb4!

Ein hugmynd svarts er að skipta uppá c3 og leika - a5 til að finna a6-reitinn fyrir biskupinn.)

34. Rxd5

34. ... Be1!

Beint til upprunans! Byrjendur vita flestir að f7- og f2-peðin eru sérstaklega viðkvæm.

35. Rf6+ gxf6 36. Dxb7 Bxf2+ 37. Kf1 Rh2+ 38. Kxf2 Dxd1 39. Be4 Rg4+ 40. Kg2 De2+

- og Héðinn gafst upp. Tapið hægði á honum en sló hann þó ekki út af laginu.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Laugardagsmogganum, 31. maí 2014

Skákþættir Morgunblaðsins

Spil og leikir | Breytt 9.6.2014 kl. 09:19 | Slóð | Facebook | Athugasemdir (0)

8.6.2014 | 16:00

Dagur Ragnarsson efstur fyrir lokaumferð Meistaramóts Skákskóla Íslands

Dagur Ragnarsson hefur ½ vinning forskot á sinn gamla félaga sinn úr sveit Rimaskóla, Oliver Jóhannesson, á Meistaramóti Skákskóla Íslands sem nú stendur yfir. Dagur geri jafntefli við Oliver Jóhannesson í fimmtu umferð en hefur unnið aðrar skákir. Oliver gerði jafntefli við Akureyringinn Símon Þórhallsson í at-skákhluta mótsins sem fram fór á föstudaginn.

Lokaumferð mótsins hefst kl. 15 í dag og teflir dagur þá við Felix Steinþórsson. Oliver Jóhannesson hefur hlotið 5 vinninga og mætir Bárði Erni Birkissyni og hefur svart. Bárður hefur náð eftirtektarverðum árangir og er í 3. – 5. ásamt ásamt Felix og Birki Karli Sigurðssyni. Þeir eru allir með 4 vinninga. Nokkuð hefur verið um óvænt úrslit á mótinu sem lýkur í dag. Verðlaunaafhending fram strax að lokinni sjöundu og síðustu umferð.