Mjóddarmót Hugins fer fram í dag

Mjóddarmótið fer fram laugardaginn 14. júní í göngugötunni í Mjódd.  Mótið hefst kl. 14 og er mótið öllum opið. Góð verðlaun í boði.  Á síðasta ári sigraði Gámaþjónustan ehf en fyrir þá tefldi Daði Ómarsson.  Tefldar verða sjö umferðir með sjö mínútna umhugsunartíma.  Skráning fer fram í síma 866-0116 og á heimasíðu Hugins Þátttaka er ókeypis!

Mjóddarmótið var fyrst haldið 1999 og hét þá Kosningamót Hellis og fór fram á kjördegi. Á fyrsta mótinu sigraði Hannes Hlífar Stefánsson sem tefldi fyrir Símvirkjann. Mótið fékk fljótlega nafnið Mjóddarmót Hellis enda ekki hægt að halda kosningamót á hverju ári og ekki var mögulegt að halda mótið á kjördegi eftir Taflfélagið Hellir flutti í núverandi húsnæði. Núna tekur Skákfélagið Huginn við mótinu eftir sameiningu félaganna Goðans-Máta og Hellis undir nafni Hugins. 

Verðlaun eru sem hér segir:

• 1. 15.000
• 2. 10.000
• 3.   5.000

Skráning:

• Heimasíða Hugins
• Sími: 866 0116

Þröstur, Stefán og Gunnar unnu í dag - allir í beinni í fyrramálið

Þröstur Þórhallsson (2425), Stefán Bergsson (2077) og Gunnar Björnsson (2063) unnu allir í áttundu og næstsíðustu umferð Portu Mannu-mótsins sem fram fór í Sardiníu í dag. Heimir Páll Ragnarsson (1423) tapaði sinni skák.

Þröstur hefur 5,5 vinning, Stefán og Gunnar hafa 5 vinning og Heimir Páll hefur 3,5 vinning. Níunda og síðasta umferð fer fram í fyrramálið og þá verða Þröstur, Gunnar og Stefán allir í þráðbeinni útsendingu. Eru íslenskir skákáhugamenn hvattir til að taka daginn snemma og vakna kl. 7 til að horfa á fulltrúa landans að tafli.

Þröstur mætir danska stórmeistaranum Lars Schandorff (2524) en Gunnar og Stefán tefla við ítalska alþjóðlega meistara.

113 skákmenn taka þátt frá 16 löndum. Þröstur er sjötti í stigaröð keppenda.

• Heimasíða mótsins
• Beinar útsendingar (kl. 13)

Kennimark Hugins og nýr vefur félagsins

Skákfélagið Huginn hefur eignast kennimark (logo) sem verður framvegis kjarni sjónrænna auðkenna félagsins.

Kennimarkið speglar metnaðarfullt félagsstarf og þau eilífu átök sem eiga sér stað á skákborðinu, auk þess að vísa til þeirrar blöndu af baráttuanda, herkænsku og háttvísi sem félagið vill hafa í öndvegi.

Enn fremur talar nafnið Huginn sínu máli um hugvit og hugrekki sem prýða má sérhvern iðkanda göfugrar íþróttar.

 

 

Nýja kennimarkið er í senn nútímalegt og sígilt. Það kallast á við skjaldarmerki konunga og drottninga sem er vel við hæfi þegar skák er annars vegar.

Merkið skírskotar jafnt til beggja kynja enda er ekki nokkur leið að skera úr um hvort mannveran í hertygjunum er karl í anda riddarasagna miðaalda eða kvenhetja á borð við Jóhönnu af Örk.

Höfundur kennimarksins er Kristján E, Karlsson, grafískur hönnuður.

Nýr vefur Hugins

Jafnframt er kynnt til sögunnar ný heimasíða Hugins þar sem nálgast má upplýsingar um helstu viðburði á vegum félagins ásamt öðru skáktengdu efni og fréttum.

Lögð er áhersla á að upplýsingar séu aðgengilegar og notendavænar í þessum glugga Hugins að umheiminum. Sérstakir hnappar eru fyrir barnastarf og kvennastarftil að undirstrika áherslu félagsins á að sinna þessum mikilvægu þáttum af kostgæfni.

Skákhuginn.is

Karjakin efstur fyrir lokaumferð No Logo Norway Chess

Karjakin er efstur á No Logo Norway Chess eftir sigur Kramnik í áttundu og næstsíðustu umferð sem fram fór í gær.  Topalov vann Agdestein en öðrum skákum lauk með jafntefli.  Carlsen og Caruana eru í 2.-3. sæti hálfum vinningi á eftir Karjakin. Caruana mætir Karjakin en Carlsen teflir við landa sinn Agdestein.

Lokaumferðin hefst fyrr en venjulega að kl. 12:30. Nigel Short og Dirk Jan Geuzendam með skákskýringar í gegnum vefsíðu mótsins.

• Heimasíða mótsins
• Beinar útsending

Þröstur, Gunnar og Heimir Páll unnu í gær

Þröstur Þórhallsson (2425), Gunnar Björnsson (2063) og Heimir Páll Ragnarsson (1423) unnu sínar skákir í sjöundu umferð Portu Mannu-mótsins í Sardiníu sem fram fór í gær. Stefán Bergsson (2077) tapaði fyrir ítalska stórmeistaranum Axel Rombaldonini (2501).

Þröstur er efstur Íslendinganna með 4,5 vinning, Stefán og Gunnar hafa 4 vinninga og Heimir Páll hefur 3,5 vinning.  Ni Hua (2653) er efstur með 6,5 vinning en Lars Schandorff (2524) er kominn í annað sæti með 5,5 vinning eftir mikinn sprett í síðustu umferðum.

Þröstur mætir Þjóðverjanum Andreas Hoenick (2133) í dag. Sú skák verður beinni en umferðin hefst kl. 13.

Í gær stóðu Gunnar og Stefán fyrir afar vel heppnaðri skákspurningakeppni á skákstað sem var að mestu leyti byggð á eldri spurningum Sigurbjörns Björnssonar úr Reykjavík Open Pub Quiz en þó aðlöguð að þörfum heimamanna og höfð eitthvað léttari.

Sigurvegarar eftir harða baráttu voru Axel Rombaldoni og Íslandsvinurinn Luca Barillaro sem mætti á skákstað í gær klæddur Hellisbúningi! Spurningar og svör gærdagsins fylgja með sem viðhengi.

113 skákmenn taka þátt frá 16 löndum. Þröstur er sjötti í stigaröð keppenda.

• Heimasíða mótsins
• Beinar útsendingar (kl. 13)

Skrár tengdar þessari bloggfærslu:

• Spurningar
• Svör

Sumarnámskeið Hugins fyrir stelpur

Í júní ætlum við að vera með námskeið fyrir stelpur í 1-7 bekk. Í boði verða tvær vikur, vikan 16.-20. júní og svo 23.-27. júní. Fyrri vikuna verðum við frá 9-14, þar sem þriðjudagurinn dettur út (17. júní) en seinni vikuna verðum við frá 9-13.  Staðsetning Víkingsheimilið. 

Vikan er á 10.000 kr en ef báðar eru teknar er það 15.000 kr. Veittur er 20% systkinaafsláttur.

Ýmislegt munum við bralla, t.d skákkennsla, tvískákir, heilin og höndin og margt fleira!

Væri gaman að sjá sem flestar! Um að gera að halda sér við yfir sumartímann.

Við setjum takmörkun á fjölda þátttakenda og miðum við ca. 20 stelpur.

Skráning fer fram á [e-mail]. Um að gera að skrá sig sem fyrst!

Kennarar eru Elsa María Kristínardóttir og Jóhanna Björg Jóhannsdóttir landsliðskonur í skák.

Fjórir skákmenn efstir og jafnir á No Logo Norway Chess

Næstsíðasta umferð No Logo Norway Chess fer fram í dag. Mótið er afar jafnt og eru fjórir skákmenn efstir og jafnir með 4 vinninga að loknum sjö umferðum. Það eru þeir Kramnik, Carlsen, Karjakin og Caruana. Karjakin vann Giri í 131 leik í sjöundu umferð og Topalov vann Kramnik í þeirri sjöttu en öðrum skákum lauk með jafntefli í tveimur síðustu umferðunum. 

Allir keppendur hafa 3-4 vinninga svo segja má að allir keppendur geti enn unnið mótið.

Í umferð dagsins mætast meðal annars: Svidler-Carlsen, Karjakin-Kramnik og Aronian-Caruana. 

Umferðin hefst nú kl. 13:30. Nigel Short og Dirk Jan Geuzendam með skákskýringar í gegnum vefsíðu mótsins.

• Heimasíða mótsins
• Beinar útsending

Þröstur og Heimir Páll unnu í gær

Þröstur Þórhallsson (2425) og Heimir Páll Ragnarsson (1423) unnu sínar skákir í sjöttu umferð Portu Mannu-mótsins í Sardiníu sem fram fór í gær. Stefán Bergsson (2077) tapaði fyrir Mikhail Marin (2577) og Gunnar Björnsson (2063) tapaði einnig sinni skák.

Stefán hefur 4 vinninga, Þröstur hefur 3,5 vinning, Gunnar hefur 3 vinninga og Heimir Páll hefur 2,5 vinning. Ni Hua (2653) er efstur á mótinu með 5,5 vinning en Marin og Teh Eu Wen Aron (2228) frá Malasíu koma næstir með 5 vinninga.

Sjöunda umferð hefst nú kl. 13. Þá teflir Stefán við ítalska stórmeistarann Axel Rombaldoni (2501) en Þröstur við Ítalann Fabrizio Vita (2059). Skákir beggja verða sýndir beint.

Í kvöld standa svo Stefán og Gunnar fyrir skákspurningakeppni á skákstað sem byggt er að mestu á spurningum úr hinu heimsfræga Reykjavik Open Pub Quiz.

113 skákmenn taka þátt frá 16 löndum. Þröstur er sjötti í stigaröð keppenda.

• Heimasíða mótsins
• Beinar útsendingar (kl. 13)

Fjöltefli við útitaflið þann 17. júní

Eins og síðustu ár stendur Skákakademía Reykjavíkur fyrir fjöltefli á 17. júní við útitaflið í Lækjargötu. Að þessu sinni verða það landsliðsmennirnir Hjörvar Steinn Grétarsson og Guðmundur Kjartansson sem tefla við gesti, en Guðmundur er nýkrýndur Íslandsmeistari eins og alkunna er.

Hefja þeir félagar taflið um 14:00 og stendur það til 16:00. Engin skráning, bara mæta.

 

Stefán í banastuði í Sardiníu

Stefán Bergsson (2077) er fantaformi á Portu Mannu-mótinu sem er í gangi á ítölsku eyjunni Sardiníu . Það er ekki nóg um að það að hann sé efstur á getraunaleik mótsins (þar sem spáð er til um úrslit - í verðlaun eru boð á næsta mót) heldur er hann í 2.-6. sæti á sjálfu mótinu með 4 vinninga eftir 5 umferðir. Tvær umferðir fóru fram í gær.

Stefán gerði í gær jafntefli ítalska FIDE-meistarann Miragha Aghayev (2370) í þeirri fyrri en vann stigalágan Ítala í þeirri síðari.

Gunnar Björnsson (2063) er næstur Íslendinga með 3 vinninga en hann tapaði fyrir Mikhail Marin (2578) í síðari skák gærdagsins.

Þröstur Þórhallsson (2425) og Heimir Páll Ragnarsson (2423) áttu ekki góðan gærdag. Þröstur hefur 2,5 vinning en Heimir Páll hefur 1,5 vinning.

Efstur með 4,5 vinning er kínverski stórmeistarinn Ni Hua (2653) en því hefur verið haldið fram að nafn hans sé borið fram "ný húfa". Sel það ekki dýrara.

Stefán teflir við Marin í umferð dagsins sem hefst kl. 13. Áhugasamir geta fylgst með honum í þráðbeinni á vefsíðu mótsins.

113 skákmenn taka þátt frá 16 löndum. Þröstur er sjötti í stigaröð keppenda.

• Heimasíða mótsins
• Beinar útsendingar (kl. 13)