Lokapistill Ólympíuskákmótsins

Íslensku sveitirnar enduðu í 39. og 55. sæti á Ólympíuskákmótinu sem lauk í gær í Tromsö. Bæði liðin stóðu því sig betur en upphaflega styrkleikaröðun gaf til kynna (43. og 66. sæti).

Varðandi toppbaráttuna bendir ritstjóri á ljómandi úttekt Hrafns Jökulssonar á heimasíðu Hróksins.

Æfintýrið hófst 1978

Margt hefur ritað um sigurgöngu Kínverjanna. Frábær frammistaða og virkilega öruggur og sanngjarn sigur. Tefldu einfaldlega best allra. Jón L. og Helgi rifjuðu það upp að Kínverjarnir tóku fyrst þátt í Ólympíuskákmótinu árið 1978 í Buenos Aires. Í fyrstu umferð mættu þeir Íslendingum og unnu mjög óvænt 3-1.

Jóni L. og Helgi upplifuðu því upphafið af kínverska ævintýrinu sem og hápunktinn á því! Helgi endaði umræðuna á þessum nótum

„Rétt er að taka fram að það var ég sem vann"

Lokaumferðin

Til að byrja með stefndi í jafna skemmtilega viðureign við Egypta en þegar tímamörkin fóru að nálgast fór að halla undan fæti. Þröstur lék af sér í tímapressu í hróksendatafli gegn Ahmed Adly og Hannes Hlífar tapaði einnig. Helgi Ólafsson lék sig í mát og Hjörvar Steinn mátti sætta sig við jafntefli. Verulega svekkjandi úrslit gegn sterkri sveit Egypta.

Kvennaliðið vann hins vegar afar góðan sigur á Jamaíka. Halla, Tinna og Jóhanna unnu en Lenka gerði jafntefli.

Opinn flokkur

Íslenska liðið hlaut 13 stig og endaði í 39. sæti. Okkur finnst þessi staða ekki endurspegla frammistöðu liðsins. Hún var betri.

Hannes, Þröstur og Hjörvar eru allir í stigaplús. Hannes hækkar um 13 stig, Þröstur um 11 stig og Hjörvar um 5 stig. 

Gummi og Helgi lækka á stigum. Gummi um 9 stig en Helgi um 12 stig.

Hannes var taplaus þar til í lokaumferðinni og var ákaflega traustur á mótinu. Hjörvar stóð sig vel á öðru borði. Hann var taplaus og traustur. Hans besta Ólympíuskákmót til þessa.

Gummi náði sér ekki strik á sínu fyrsta Ólympíuskákmóti. Gumma skortir smá reynslu, eðli málsins samkvæmt. Það er öðruvísi að tefla á Ólympíuskákmóti en á öðrum mótum t.d. vegna þess að þar ekki teflt alla daga og rytminn er annar.

Þröstur, stóð sig venju samkvæmt vel. Þröstur er ákaflega traustur og góður liðsmaður og vert er að minnast frammistöðu hans á Ólympíuskákmótinu fyrir tveimur árum síðan. Sú ákvörðun Jóns að velja Þröst var skynsamleg.

Það var frábært að fá Helga Ólafsson aftur í landsliðið. Helgi var taplaus þar til í lokaumferðinni þegar hann lék sig slysalega í mát. Það veitir liðinu gífurlegt öruggi að vita af svo traustum manni á fjórða borði.

Svo er vert að benda á Jón L. Árnason sem kom frábær inn í liðsstjórahlutverkið. Jón er ákaflega jákvæður einstaklingur sem liðsmenn bera mikla virðingu fyrir og er jafnframt félagi liðsmanna. Slíkt er gríðarlega mikilvægt fyrir liðsstjóra og ég sannarlega vona að Jón sé kominn til að vera

Semsagt. Mjög ásættanlegur árangur þrátt fyrir mótið hefði mátt enda á annan hátt.

Kvennaflokkur

Íslenska liðið endaði í 55. sæti en var fyrirfram raðað í það í 66. á stigum.

Hallgerður stóð sig afar vel og hækkar um 26 stig. Ákaflegur traustur liðsmaður en hún tefldi allar skákirnar. Eini íslenski liðsmaðurinn sem gerði það.

Elsa hækkar um 8 stig og Tinna um 7 stig. Jóhanna stóð í stað. Lenka tapaði átta stigum.

Það er komin gríðarleg reynsla í kvennaliðið. Hins vegar er ljóst að töluverðar breytingar geta orðið á liðinu fyrir EM 2015 þar sem bæði Hallgerður og Jóhanna stefna út í nám.

Ingvar kom sterkur inn í liðsstjórahlutverkið. Mikill gleðigjafi rétt eins og Jón.

Lokahófið

Skáksamband Íslands bauð keppendum og skákstjórum í veislu að loknu móti. Þar gerðum við okkur góðan dag. Sérstaka kátínu vakti ljóðabálkur Jóns L. Árnasonar en hann samdi vísu eftir hverja umferð.

Lokahófið var að mörgu leyti fínt. Reyndar var ekki bar á staðnum fyrir þyrsta keppendur.

Veitt voru verðlaun fyrir bestan árangur í ýmsum flokkum. Vinir okkar Egyptarnir unnu b-flokkinn eftir burstið í lokaumferðinni. Það var sérstakt að veitt voru verðlaun í a-flokki (lið styrkleikaröðuð 1-35) og þau veitt liðinu í fjórða sæti Rússunum sem höfðu engan áhuga á þeim! Einn þeirra hafði greinilega fengið sér í vel staupinu og hvorki Kramnik né Svidler létu sjá sig.

Það var einnig sérstakt að veitt voru fyrst verðlaun í opnum flokki og svo í kvennaflokki. Tilgangurinn var ljósleg sjá að enda mótið á rússneska þjóðsöngnum. Mjög svo lýsandi fyrir Ólympíuskákmótið 2014 - þar sem rússneski björninn hefur að mörgu leyti vakað yfir og stjórnað.

 

 

Tveir menn létust

Eins og fram hefur komið létust tveir skákmenn síðasta daginn. Afar sorglegt og sérkennileg tilviljum að slíkt skuli gerast. Um var að ræða skákmann frá Seychelles-eyjum sem lést á skákstað og heyrnarlausan skákmann frá Úsbekistan sem lést á hótelherbergi sínu.

Ég og Róbert Lagerman sitjum inn á VIP-barnum í lokaumferðinni. Allt í einu sjáum við 20-30 manns hlaupa framhjá okkur og út. Við botnum ekkert í þessu og höldum okkar striki. Héldum jafnvel að hér væri eitthvað grín á ferð. Við sjáum fljótt að svo var ekki en sáum einnig að engin hætta væri á ferðinni því sumir eru rólegir við dyr skáksalarins. Á leiðinni upp á hótel mætum við sjúkrabíl

Jón L. var inn í skáksal. Hann upplifir það að það kemur maður hlaupandi og öskrar „medic". Einhvern riðlast allt og sumir virðast hafa uppskilið upphrópunina og héldu að hér hafi átt sér einhver sprengjuhótun. Jón L. sýndist Kínverjarnir vera fyrstir til þar sem þeir hlupu út. Skiptu þá engu máli að fjöldi fólks hleypur út í paník. Jón L. fylgdi með og hljóp einnig. Þegar Jón er kominn út sér þarna Þröst Þórhallsson sér við hlið.

Einn erlendur vinur minn var úti að reykja. Sér hann þar allt í einu fullt af fólki koma hlaupandi út bæði út um VIP-útganginn og aðalútganginn. Hleypur svo fólkið að einhverju leyti á móti hvoru öðru.

Reynt var að lífga manninn en því miður gekk það ekki upp. Eftir hlé á mótinu komu þeir skákmenn sem enn voru að tefla og kláraðu sínar skákir við þessi erfiðu skilyrði

Hinn maðurinn lést á hótelherbergi sínu. Um kvöldið verð ég var við sjúkraliða en vissi ekkert hvað var að gerast. Ég frétti svo af því degi síðar hvað hefði gerst.

Reykjavíkurskákmótið

Ég hafði ætlað að koma frá mér þessum pistli í gær en hafði ekki tök á því að klára það. Dagurinn var að einhverju leyti notaður til vinnu því ég hitti tvo aðila. Annars hitti ég Lawrence Trent, sem hefur verið með skákskýringar (live commentary) á ýmsum mótum. Þar með talið Ólympíuskákmóinu.

Hins vegar hitti ég Macauley Peterson frá Chess24 sem hefur áhuga á samstarfi varðandi Reykjavíkurskákmótið og EM landsliða en þeir sáu um beinar útsendingar og heimasíðu Ólympíuskákmótsins.

Ég skynja gríðarlegan áhuga á Reykjavíkurskákmótinu 2015. Jafnvel meiri en nokkurn sinni fyrr.

Að lokum

Minnisstæðu Ólympíuskákmóti er lokið. Íslensku fulltrúarnir voru kátir og glaðir eftir skemmtilegt mót. Þeir stóðu sig með sóma og stemmingin og glaðværðin í hópnum mjög góð. Liðsstjórarnir nýju, Jón L. og Ingvar Þór, eru einnig miklir gleðigjafar.

Eitt alskemmtilegasta og minnisstæðasta Ólympíuskákmót sem ég hef upplifað!

Gunnar Björnsson

Gróskumikið starf T.R. á komandi vetri

Mótahald Taflfélags Reykjavíkur á 115. starfsári þess hófst með pomp og prakt á sunnudag þegar fimm skákmenn deildu efsta sætinu á fjölmennu Stórmóti félagsins í samstarfi við Árbæjarsafn. Á mánudag fór síðan fram hið árlega Borgarskákmót sem Taflfélag Reykjavíkur stóð að í samstarfi við hið nýja skákfélag Hugin. 61 keppandi tók þátt og deildu alþjóðlegi meistarinn Jón Viktor Gunnarsson og Ólafur B. Þórsson efsta sætinu.

Taflfélag Reykjavíkur stendur fyrir vel á annan tug skákviðburða á komandi haustvertíð og eru þá ekki meðtaldar hinar fjölmörgu barna- og unglingaæfingar ásamt fimmtudagsmótunum sem hefjast nú aftur eftir nokkurt hlé. Af nægu er að taka en stærsti viðburðurinn verður án efa áttatíu ára afmælismót Haustmóts félagsins sem hefst um miðjan september. Þá má nefna nýjan byrjendaflokk á barnaæfingunum, bikarsyrpu ætlaða yngri kynslóðinni og framhald á skemmtikvöldunum sem vöktu mikla lukku á síðastliðnu starfsári.

Þeim sem hafa gaman að skáklistinni, hvort sem er sem iðkendur eða áhorfendur, er bent á að fylgjast vel með starfi félagsins í vetur því þar verður sannarlega eitthvað í boði fyrir alla. Hægt er að sækja starfsáætlun félagsins með því að smella á hlekkinn hér að neðan.

Við hlökkum til að vera með ykkur og eiga saman skemmtilegt skáktímabil!

Starfsáætlun TR starfsárið 2014-15

Kínverjar og Rússar Ólympíumeistarar

Helstu úrslit eru nú ljós á Ólympíuskákmótinu. Kínverjar eru Ólympíumeistarar í opnum flokki og Rússar í kvennaflokki. Vel gekk hjá íslenska kvennaliðinu sem vann stórsigur á Jamaíka 3,5-0,5 en liðið í opnum flokki steinlág 0,5-3,5 fyrir Egyptum.

Gerð verður nánari grein fyrir mótinu síðar þegar öll úrslit liggja fyrir.

Reglulegar fréttir eru á Chess24.com um ganga mála. Heimasíða Hróksins sinnir auk þess Ólympíuskákmótinu afar vel.

 

Dagur 14 - teflt til verðlauna í dag!

Íslenska liðið hefur möguleika á verðlaunasæti á Ólympíuskákmóti. Mótið er skipt um fimm flokka eftir meðalstigum í b-flokki liðin sem er styrkleikaraðað 36.-70. Við erum þar efstir með 13 stig ásamt sjö öðrum þjóðum en erum efstir á oddastigum (tiebreak). Stöðuna má finna á Chess-Results. Sigur í dag er því nauðsynlegur í verðlaunasæti.

Við erum einnig efstir í Norðurlandakeppninni og þar er sigur einnig nauðsynlegur því Norðmenn sem eru jafnir okkur að stigum en með lægri oddastig en við og örugglega vinna í dag.

Umferð dagsins

Egyptar eru hins vegar sterkir. Hafa meðalstigin 2547 skákstig í dag á móti 2515 meðalstigum okkar. Við erum stigahærri á 2. og 4. borði þar sem við höfum hvítt en þeir á 1. og 3. borði. Í okkar tilfelli væri því gott að ná þar 1½ vinningi með hvítu mönnunum.

Við höfum einu teflt við áður. Það var árið 2002. Þá unnum við 2½-1½ en á þeim tíma vorum við mun sterkari en Egyptar. Þrír af þeim fjórum sem tefla í dag tefldu þá þ.e. Hannes, Helgi og Þröstur. Auk þeirra tefldi Helgi Áss. Hannes vann á fyrsta borð. 

Stelpurnar tefla við Jamaíka. Við tefldum við í lokaumferðinni í Khanty Mansiesk 2010 en þá var ég liðsstjóri sveitarinnar. Sá viðureign er mér mjög minnisstæð. Um þá viðureign sagði á Skák.is:

Viðureign kvennasveitarinnar í lokaumferðinni varð ekki síður æsileg. Til að byrja með leit viðureignin vel út. Bæði Hallgerður og Jóhanna unnu örugga sigra, Sigurlaug hafði góða stöðu og lék af sér og tapaði. Lenka tefldi æsilegustu skák umferðarinnar. Hún fékk betra en tefldi ónákvæmt og skyndilega var staðan á borðinu orðin hrikalega spennandi og Lenka gat hæglega tapað. Ég var eini Íslendingurinn sem eftir var en þarna voru örugglega um 8-10 Jamaíkabúar sem voru á nálum enda væntanlega hafði þetta verið einn þeirra besti árangur ef þeir hefðu náð 2-2 jafntefli. Lenka lék einu sinni þegar hún átti 1 sekúndu eftir og heyrði ég þá vonbrigðastunurnar fyrir aftan mig. Ekki urðu þær minni þegar Lenka snéri á Jamaísku. Þegar Lenka hafði unnið ákvað ég að sýna mikla hógværð í virðingaskini við þessu stuðningsmenn. 

Hér ætti sigur að tryggja okkur viðunandi sæti.

FIDE-þing

Ritstjóri hefur verið býsna upptekinn síðustu þrjá daga á FIDE-þingi og hefur Ingvar Þór Jóhannesson leyst mig með miklum sóma. Í dag  hélt reyndar FIDE-þingið áfram en ég ákvað að sleppa því enda allar kosningar búnar og mun mikilvægara að fylgjast með mínu fólki á skákstað.

Sérstök samkoma þessi þing. Í gær var ég að til rúmlega 22 og í upphafsdaginn til 23. Fólk tengt Kirsans vann hverja einustu kosningu og unnu t.d. heimsálfukosningarnar. Greinilega var listum dreift og það fór ekki framhjá manni að sumir gerðu samninga.

Evrópulönd sem að öllu jöfnu ættu að styðja Kasparov opinberlega en kusu að gera það ekki - fengu svo tilnefningar í góð embætti og greinilega á listum Kirsans-manna.

Garry Kasparov var fremur niðurbrotinn í gær Í stað þess að leita samninga og óska eftir 1-2 góðum embættum gerði hann það ekki. FIDE-menn hefðu örugglega verið tilbúnir að gefa eitthvað eftir en Kirsan hefur verið þekktur fyrir að ná gömlum andstæðingum til sín á þann hátt. Þess í stað var Garry að reyna að sprikla með fólk á sínum vegum sem aldrei náði árangri í neinum kosningum.

Kosningaferlið er saga út fyrir sig. Mjög flókið ferli er í gangi og þurfti oft að kjósa aftur. Kosið er eftir nafnakalli í stað þess að taka upp einhvers konar rafrænt kerfi. Á meðan talið var þurftu svo allir bíða á meðan. Veitingar af skornum skammti og fulltrúar nánast sveltir?

Nigel Short lýsti þessu svo á Twitter:

I have had a glimpse of Hell. It resembles an endless FIDE General Assembly.

Til að fullkomna „ekki mínir dagar" fyrir Kasparov fékk Batumi í Georgíu Ólympíuskákmótið 2018 en ekki Durban í Suður-Afríku í kosningunum í gær. Eftir að hafa verið í kringum Kasparov undanfarið er ljóst að hann hefur stóra veikleika. Hann gerir ekki málamiðlanir. Stundum má t.d. gefa eitthvað eftir og fá annað í staðinn. Það virðist hann aldrei geta gert.

Hátíð í kvöld

Sama hvernig allt fer - ætlar íslenska að borða saman í kl. 17 í boði SÍ. Við förum svo í lokahófið kl. 20 og gerum okkur góðan dag. Enda er brottfor ekki fyrr en kl. 18:40 á morgun.

Áfram Ísland!

 

 

Gunnar Björnsson

Lokaviðureignir - Egyptar og Jamaíka

Lokaviðureignir Ólympíuskákmótsins fara fram snemma á morgun, fimmtudag, klukkan 09:00 að íslenskum tíma!

Baráttan á toppnum verður hörð en líklegast geta aðeins Kínverjar og Ungverjar hampað titlinum. Skemmtileg væri ef Ungverjar tækju þetta í líklegast síðustu kappskák Judit Polgar. Hinsvegar hafa Kínverjarnir átt frábært mót og eiga sigurinn fyllilega skilinn.  Kínverjar fá Pólverja en Ungverjar erfiðar viðureign gegn Ivanchuk og félögum frá Úkraínu.

Í kvennaflokki ættu Rússar að eiga sigurinn vísann nema Búlgarir nái að stríða þeim nóg í síðustu umferð með Stefanovu í broddi fylkingar. Takist það þurfa Kínverjar að taka erfiðar viðureign gegn Úkraínu.

Viðureignir okkar liða:
 

 Egyptaland - Ísland

Ísland fær gríðarlega mikilvæga viðureign gegn Egyptum en fyrir hana sitjum við í 27. sæti efst Norðurlandaþjóða. Egyptarnir eru vissulega hættulegir og með virkilega hæfileikaríka skákmenn í þeim Bassem Amin og Ahmed Adly en hisnvegar sluppum við mögulegar ofursveitir sem hefðu verið erfiðari viðureignar. 

Egyptar eru í raun örlítið hærri en við á töflunni en eins og menn hafa verið að tefla í mótinu eigum við fulla möguleika á að hafa sigur í þessari viðureign.

Ef það hefst má fastlega gera ráð fyrir að við náum besta árangri síðan 1996 í Yerevan þegar 12. sætið varð niðurstaðan. Besti árangur þar á milli var 22. sætið árið 2002 þar sem við unnum einmitt Egypta 2,5-1,5 en þó er vert að taka fram að sveit þeirra þá var mun veikari.

Guðmundur hvílir og því reynslumestu mennirnir sem taka slaginn í þessari gríðarlega skemmtilegu viðureign sem kemur til með að ákveða hreinlega hvort mótið verður gott eða frábært. Norðurlandameistaratitilinn yrði jafnframt okkar auk þess sem ritstjóri fær ekki betur séð en að við tækjum hina svokölluðu B-keppni en liðum er skipt niður í flokka eftir styrkleika svo allir hafi í raun eitthvað að keppa að. 

 

Bein útsending verður hér >> 

 

Jamaíka - Ísland

 

 

 

 

Það kemur í hlut Elsu Maríu að hvíla í síðustu umferðinni í kvennaflokki. Ísland mætti einnig Jamaíku árið 2010 í síðustu umferð. Og því í annað skiptið sem stelpurnar fá "deja-vu" í þessu móti en Namibía sem við fengum í fyrstu umferð var einnig andstæðingurinn í fyrstu umferð 2012.

Við erum mun stigahærri á öllum borðum og margir keppendur frá Jamaíku óreyndir. Hér er full krafa sett á að sigri verði skilað í hús.

Liðið situr sem stendur í 66. sæti og sigur í lokaumferð myndi skila liðinu ofar í töfluna en staðan í byrjun sagði til um. Það myndi gera mótið vel viðunandi og skila liðinu á svipaðar slóðir og í fyrri mótum en stefnan var þó sett hærra fyrir mótið.

 

Bein útsending verður hér >> 

Munið að umferðin hefst 09:00 að íslenskum tíma! 

Meistaramót Hugins (suðursvæði) hefst 25. ágúst

Meistaramót Hugins (suðursvæði) 2014 hefst mánudaginn 25. ágúst klukkan 19:30. Mótið er 8 umferða opið kappskákmót sem lýkur 9. september. Leyft verður að taka 2 yfirsetur í 1.-6 umferð sem tilkynna þarf um fyrir lok næstu umferðar á undan. Vegleg og fjölbreytt verðlaun eru í boði.  Umhugsunartíminn verður 1½ klst. á skákina auk hálfrar mínútu á hvern leik.

Mótið er öllum opið og er reiknað til alþjóðlegra skákstiga.  Skráning verður hér Skákhuganum og hér á Skák.is.

Teflt er á mánudögum, þriðjudögum og miðvikudögum.

Aðalverðlaun:

1. 50.000
2. 40.000
3. 30.000

Upplýsingar um aukaverðlaun koma síðar.

Þátttökugjöld:

• Félagsmenn kr. 3.500; aðrir 4.500-
• Unglingar 15 ára og yngri: Félagsmenn: 2.500; Aðrir 3.500.
• Allir titilhafar fá frítt í mótið

Umferðartafla: 

• 1. umferð, mánudaginn, 25. ágúst, kl. 19:30
• 2. umferð, þriðjudaginn, 26. ágúst, kl. 19:30
• 3. umferð, miðvikudaginn, 27. ágúst, kl. 19:30
• 4. umferð, mánudaginn, 1. september, kl. 19:30
• 5. umferð, þriðjudaginn, 2. september, ágúst, kl. 19:30
• 6. umferð, miðvikudaginn, 3. september, kl. 19:30
• 7. umferð, mánudaginn, 8. september, kl. 19:30
• 8. umferð þriðjudaginn, 9. september, kl. 19:30

Judit Polgar leggur kónginn á hilluna

Hin óumdeilda skákdrottning og stigahæsta skákkona allra tíma, Judit Polgar, hefur ákveðið að leggja taflmennskuna til hliðar og snúa sér að öðru.

Þetta var tilkynnt af vefnum The-Times sem virðast hafa keypt réttinn á því að birta þessa frétt fyrstir og er í raun bara hægt að lesa hana með því að borga fyrir efnið.

Ákvörðunin liggur engu að síður fyrir. Líklegt er að Judit Polgar tefli sína síðustu kappskák á morgun og einhverjir möguleikar eru á því að Judit gæti endað ferilinn með Ólympíugulli með sveit Ungverja. Það væri í raun sanngjarn endir á frábærum ferli.

Ekki þarf að fjölyrða um hversu mikinn ægishjálm Judit hefur borið yfir kvennaskák. Í raun er rangt að tala um kvennaskák og Judit Polgar í sömu andrá þar sem Judit hefur ávallt neitað að tefla í Heimsmeistaraeinvígjum kvenna og alla tíð teflt á jafnfréttisgrundvelli við bestu skákmenn heims.

Hæst náði Judit 2735 elóstigum og númer 8 á Heimslistanum. Judit var þekkt fyrir mjög skarpan og skemmtilegan stíl og hafa ófaír heimsklassa skákmennirnir legið í valnum eftir stórsókn drottningarinnar.

Ljóst er að Judit verður að öllum líkindum talinn fremsta skákkona allra tíma þegar sögubækur verða skoðaðar í framtíðinni. Hin kínverska Hou Yifan gerir nú atlögu að ná Judit að stigum en langt er í að hún geti borið sig saman við drottninguna.

Polgar er orðin tveggja barna móðir og orkan sem fer í að viðhalda skákferli á æðstu stigum íþróttarinnar er eitthvað sem hún getur ekki sameinað því hlutverki. Því hefur hún tekið þessa ákvörðun.

Hver veit þó...eitthvað segir okkur að Judit eigi nú eftir að grípa í eina til tvær bröndóttar þegar fram líða stundir. Hvað svo sem gerist í framtíðinni, ekki missa af skák Judit Polgar á morgun!

Hraðskákkeppni taflfélaga: Reyknesingar unnu Akureyringa

Reyknesingar unnu nokkuð óvæntan sigur á Akureyringum í viðureign félaganna sem fram fór sl. sunnudag í húsnæði Skáksambandsins. Reyknesingar sigruðu 39-33.

Lið Reyknesinga skipuðu Björgvin Jónsson, Jóhann Ingvason, Örn Leó Jóhannsson, Siguringi Sigurjónsson, Agnar Ólsen og Guðmundur Sigurjónsson.

Fyrir Akureyringa tefldu Halldór Brynjar Halldórsson, Stefán Bergsson, Jón Þ. Þór, Loftur Baldvinsson, Sigurjón Sigurbjörnsson, Símon Þórhallsson og Óskar Long Einarsson.

 

Íslenska liðið í 27. sæti fyrir lokaumferðina - gríðarleg spenna

Íslenska liðið er í 27. sæti að lokinni tíundu og næstsíðustu umferð sem fram fór í gær. Þá náði sveitin afar góðum úrslitum gegn sterkri sveit Tyrkja 2-2. Sveitin er efst norrænna þjóða og mætir öflugri sveit Egypta á morgun en frídagur er í dag. Íslenska sveitin hefur ekki tapað viðureign síðan í fjórðu umferð. Sveitin hefur 13 stig af 20 mögulegum. 

Vert er að benda á frábæra frammistöðu Hannesar sem hefur 6 vinninga af 8 mögulegum á fyrsta borði. Árangur hans samsvarar 2693 skákstigum! Hjörvar, Þröstur og Helgi hafa einnig staðið sig afar vel. Hjörvar hefur 6,5 vinning af 9 mögulegum en Þröstur og Helgi hafa 5,5 vinning af 8 mögulegum. 

Það er þó skammt í næstu sveitir en a- og b-sveitir Norðmanna, Svíar og Finnar hafa 12 stig. Það er því mikil spenna hver hampar hinum óformlega Norðurlandameistaratitli.

Staðan:

• 27. Ísland 13 stig
• 39. Noregur 12 stig
• 43. Noregur II 12 stig
• 47. Svíþjóð 12 stig
• 50. Finnland 12 stig
• 64. Færeyjar 11 stig
• 75. Danmörk 10 stig
• 83. Noregur III 10 stig

 
Kínverjar eru efstir á sjálfu Ólympíuskákmótinu en þeir hafa 17 stig. Ungverjar eru aðrir með 16 stig. Átta lið hafa 15 stig og þar á meðal Rússar, Úkraínumenn og Frakkar. Kínverjar mæta Pólverjum í lokaumferðinni, Ungverjar keppa við Úkraínumenn og Rússar tefla við Frakka.

Kvennaflokkur

Íslenska kvennasveitin hefur 10 stig og er í 66. sæti. Svíar og Norðmenn eru efstir Norðurlandaþjóðanna með 12 stig

Flestir stefnir þar í sigur Rússa sem hafa 18 stig. Kínverjar og Úkraínumenn koma næstir með 17 stig. Rússar tefla við Búlgari en Kínverjar og Úkraínumenn mætast í mjög mikilvægri viðureign.

Lokaumferðin hefst kl. 9 í fyrramálið.

Rétt er að benda á heimasíðu Hróksins sem gerir Ólympíuskákmótin afar góð skil.

• Heimasíða mótsins
• Beinar útsendingar
• Chess-Results (opinn flokkur)
• Chess-Results (kvennaflokkur)
• Myndaalbúm (Facebook)

Jómfrúin (Jón Viktor Gunnarsson) sigurvegari Borgarskákmótsins

Jón Viktor Gunnarsson, sem tefldi fyrir Jómfrúnna og Ólafur B. Þórsson sem tefldi fyrir  Gámaþjónustuna   voru efstir og jafnir með 6v af sjö mögulegum á vel skipuðu Borgarskákmóti sem fram fór í Ráðhúsi Reykjavíkur í gær. Eftir stigaútreikning var Jón Viktor úrskurðaður sigurvegari. Héðinn Steingrímsson sem tefldi fyrir Landsbankann, Sverrir Þorgeirsson sem tefldi fyrirÍslandspóst, og Gunnar Freyr Rúnarsson sem tefldi fyrir Eflingu stéttarfélag urðu næstir með 5,5 vinninga.

61 keppandi tók þátt sem sæmileg þátttaka miðað við að Ólympíumótið stendur yfir á sama tíma. Nýr formaður ÍTR Þórgnýr Thoroddsen, setti mótið og lék fyrsta leikinn í skák í Héðins Steingrímssonar og Johns Ontiveros.

Skákstjórar voru Vigfús Ó. Vigfússon, Erla Hlín Hjálmarsdóttir og Andrea Margrét Gunnardóttir. Það voru Skákfélagið Huginn og Taflfélag Reykjavíkur sem héldu mótið sem fram hefur farið árlega síðan á 200 afmæli Reykjavíkurborgar árið 1986.

Lokastaðan:

Röð      Nafn                                                            Vinn.  M-Buch.

1-2       Jón Viktor Gunnarsson, Jómfrúin,  6     21.5
Ólafur Þórsson, Gámaþjónustan, 6     19.0
3-5       Héðinn Steingrímsson, Landsbanki Íslands, 5.5   22.5
Sverrir Þorgeirsson, Íslandspóstur, 5.5   22.5
Gunnar Freyr Rúnarsson, Efling stéttarfélag, 5.5   19.5
6-9       Davíð Kjartanson, Þrír Frakkar-Hjá Úlfari, 5       24.5
Oliver Aron Jóhannesson, Ölstofan, 5      21.5
Þorsteinn Þorsteinsson, Suzuki bílar, 5      19.0
10-19 Helgi Brynjarsson, Slökkvilið höfuðborgarsv.   4.5   23.0
Gauti Páll Jónsson, Reykjavíkurborg, 4.5   22.5
Símon Þórhallsson, Malbikunarstöðin Höfði, 4.5   22.0
Dagur Ragnarsson, Hótel Borg, 4.5   21.5
Guðfinnur Kjartansson, 4.5   19.5
Friðgeir Hólm, 4.5   19.0
Kristján Halldórsson, Samiðn,  4.5   19.0
Þorvarður Fannar Ólafsson, Faxaflóahafnir, 4.5   18.5
Gylfi Þórhallsson, Guðmundur Arason ehf, 4.5   17.5
Loftur Baldvinsson, Gagnaveita Reykjavíkur, 4.5  15.5
20-29 Vignir Vatnar Stefánsson, Hamborgarabúllan, 4       22.5
Jón Þór Bergþórsson, Húsasmiðjan, 4       20.5
Bjarni Hjartarson, MP banki, 4     20.5
Sæbjörn Guðfinnsson, 4     20.0
Jóhann Örn Ingvason, Tapas barinn, 4     19.5
Stefán Þór Sigurjónsson, Mjólkursamsalan, 4     19.0
Jón Trausti Harðarson, Einar Ben, 4     19.0
Ögmundur Kristinsson, Verkís, 4     19.0
Kristján Örn Elíasson, Sorpa, 4     18.5
Lárus H. Bjarnason, 4     15.5
30-34 Stefán Bergsson, Hlölla bátar, 3.5   20.0
Ingvar Örn Birgisson, Íslandsbanki, 3.5   18.0
Sveinbjörn Jónsson, 3.5   17.0
Ingi Tandri Traustason, Valitor, 3.5   16.0
Finnur Kr. Finnsson, 3.5   15.0
35-46 John Ontiveros, Perlan, 3     19.0
Jóhann Arnar Finnsson, 3     18.0
Ólafur Kjartansson, ÍTR, 3     18.0
Sturla Þórðarson, 3     17.0
Ásgeir Sigurðsson, 3     17.0
Jón Víglundsson, 3     16.5
Óskar Long Einarsson, 3     16.0
Óskar Víkingur Davíðsson, 3    16.0
Kristmundur Ólafsson,  3     15.5
Karl Egill Steingrímsson, 3     15.0
Sigurður Freyr Jónatansson, 3     14.5
Guðmundur G. Guðmundsson, 3      9.5
47-50   Magnús V. Pétursson, Jói Útherji, 2.5   18.0
Hjálmar Sigurvaldason, 2.5   15.5
Gunnar Örn Haraldsson, 2.5   15.0
Bragi Þór Thoroddsen, 2.5   12.5
51-56    Guðmundur Agnar Bragason, 2       17.5
Arnljótur Sigurðsson, 2      17.0
Heimir Páll Ragnarsson, 2      15.0
Aron Þór Mai, 2      14.5
Stefán Orri Davíðsson,  2      14.0
Alexander Oliver Mai, 2      14.0

57-58   Þorsteinn Magnússon,  1.5   13.5
Halldór Atli Kristjánsson, 1.5   13.5
59-61    Pétur Jóhannesson, 1      14.5
Björgvin Kristbergsson, 1     13.5
Brynjar Haraldsson, 1      7.5