Afmælismót Gylfa hefst í dag

Eins og áður hefur komið fram varð Gylfi Þórhallsson, sem manna lengst hefur setið í stjórn Skákfélags Akureyrar -  þar af formaður þess í nær tvo áratugi - sextugur sl. vor. Í tilefni af því efnum við til skákmóts nú um helgina og vonumst eftir sem bestri þátttöku ungra sem aldinna. Gylfi sjálfur verður auðvitað meðal keppenda - og tekur þátt í baráttunni um sigurlaunin ef við þekkjum hann rétt. 

Mótið hefst laugardaginn 6. september kl. 13.00 í Skákheimilinu á Akureyri. Tefldar verða 10 mínútna skákir og áformað að tefla 7 umferðir á laugardeginum og 6 á sunnudeginum, en þá hefst taflið einnig kl. 13.00. Fjöldi umferða ræðst þó endanlega þegar þátttaka liggur fyrir, en skráning verður í netfangið [e-mail], eða á skákstað, kl. 12.30-12.50 fyrir upphaf móts.

Peningaverðlaun verða veitt sem hér segir:

1. verðlaun    kr. 15.000

2. verðlaun    kr. 10.000

3. verðlaun    kr.   5.000

Við hlökkum til skemmtilegs og spennandi móts.

Rimaskóli lagði danska skólann 4-0 í annarri umferð

NM grunnskóla hélt áfram í Stokkhólmi eftir hádegi og tefldi Rimaskólasveitin við dönsku sveitina frá Kirkebakkeskolen í 2. umferð. Þrátt fyrir að danska sveitin hefði unnið góðan sigur í fyrstu umferð þá virtust þau lítil fyrirstaða fyrir Oliver Aron, Nansý, Jóhann Arnar afmælisbarn og Kristófer Jóel. Sigur Rimaskóla var í höfn 4-0 eftir tæpar tvær klukkustundir.

Rimaskóli er í 3. sæti á mótinu með 5 vinninga af 8. Oliver Aron hefur unnið báðar skákirnar en hann er stigahæstur allra keppenda á mótinu. Norska sveitin er þrælsterk og leiðir með 7 vinninga eftir 4-0 sigur á Svíþjóð2 sveitinni. Þetta gerðu þau á sama tíma og þau leyfðu 1. borðs manninum að hvíla sig. Í 2. sæti á NM grunnskóla er sænski Mälarhöjdens skólinn en í 3. umferð tefla Svíarnir einmitt við Rimaskóla.

• Heimasíða mótsins
• Chess-Results

 

Startmótið - Jón Kristinn byrjar með stæl!

Hið árlega startmót Skákfélags Akureyrar var haldið í gær 4. september og markar að venju upphaf nýs skákárs.  Það má með sanni segja að mótið lofi góðu fyrir áframhaldið, því alls mættu 16 keppendur til leiks og tveir að auki sem komu of seint og urðu að sætta sig við að horfa á!

Tveir keppenda skáru sig úr hópi keppenda með því að vinna allar skákir sínar framyfir mitt mót, annar á áttræðisaldri, en hinn tæpum 60 árum yngri. Ungstirnið hélt hreinu skori (Caruana hvað?) út allt mótið en sá gamli var samt skammt undan þegar komið var í mark. Réðust úrslitin í innbyrðis viðureign forystusauðanna í næstsíðustu umferð.  Aðrir fengu minna, eins og gefur að skilja.

Heildarúrslit:

Jón Kristinn Þorgeirsson	15
Ólafur Kristjánsson	13½
Áskell Örn Kárason	12
Símon Þórhallsson	11½
Smári Ólafsson	10
Sigurður Eiríksson	9
Kristinn P Magnússon	9
Karl Egill Steingrímsson	9
Andri Freyr Björgvinsson	8½
Haraldur Haraldsson	7
Kristján Hallberg	5½
Benedikt Stefánsson	4
Gabríel Freyr Björnsson	3
Oliver Ísak Ólason	2
Auðunn Elfar Þórarinsson	1
Gunnar Breki Gíslason	0

Við minnum svo á afmælismót Gylfa sem byrjar á morgun, laugardag kl. 13

Minningarmót Ragnheiðar Jónu Ármannsdóttur haldið á morgun

Minningarmót um Ragnheiði Jónu Ármannsdóttur verður haldið á morgun, laugardaginn, 6. september í húsnæði Hjálpræðishersins í Mjódd. Það er Eyjólfur Ármannsson, bróðir hennar, sem stendur fyrir mótinu í minningu systur sinnar.

Ragnheiður hefði orðið 45 ára í sumar hefði hún lifað en hún lést 2011. Hún var foringi í Hjálpræðishernum. 

Mótið er ægisterkt en meðal keppenda eru 4 alþjóðlegir meistarar og 5 FIDE-meistarar. Keppendalistinn er sem hér segir:

1. AM Guðmundur Kjartansson (2439)
2. AM Bragi Þorfinnsson (2437)
3. AM Jón Viktor Gunnarsson (2426)
4. AM Björn Þorfinnsson (2389)
5. FM Magnús Örn Úlfarsson (2380)
6. FM Einar Hjalti Jensson (2349)
7. FM Davíð Kjartansson (2331)
8. FM Guðmundur Gíslason (2309)
9. FM Þorsteinn Þorsteinsson (2242)
10. Kristján Eðvarðsson (2167)

Keppendur tefla allir við alla og umhugsunartíminn verður 10 mínútur + 5 sekúndur í viðbótartíma á hvern leik.

Fyrstu verðlaun verða 30.000 kr., önnur verðlaun 20.000 kr. og þriðju verðlaun 10.000 kr. Hjálpræðishernum verður auk þessu veittur 60.000 kr. styrkur.  

Mótið hefst kl. 14 og stendur til um að vera kl. 18. Áhorfendur velkomnir. 

Rimaskóli tapaði í fyrstu umferð á NM grunnskólasveita

Rimaskólasveitin tapaði fyrir sterkri sveit Kannik Ungdomskolen frá Noregi í 1. umferð NM grunnskóla í Stokkhólmi. Oliver Aron vann á 1. borði en Nansý, Jóhann Arnar og Kristófer Jóel töpuðu fyrir stigahærri andstæðingum. Það eru komin þrjú ár síðan sveit Rimaskóla tapaði síðast viðureign á NM grunnskóla enda munar líka um minna en að sjá á bak Degi og Jóni Trausta frá síðasta ári. Nokkuð ljóst að Rimaskóli teflir við þrjár sterkustu sveitirnar í fyrstu þremur umferðunum og því spennandi viðureignir framundan hjá Rimaskólakrökkunum næsta sólarhringinn. 

• Heimasíða mótsins
• Chess-Results

Golfskákmóti aflýst

Golfskákmóti LEK og Nesklúbbsins hefur verið aflýst vegna dræmrar þátttöku.

LEK vill þakka Nesklúbbnum og styrktaraðilum fyrir samstarfið þó ekki hafi tekist að kveikja áhuga nægilega margra á þessu óvenjulega móti.

Þeir sem skráðu sig er beðnir velvirðingar á óþægindunum.

Fh. LEK

Eggert Eggertsson

 

 

Huginn og TR mætast í úrslitum

Í gærkvöldi skýrðist hvaða lið mætast í úrslitum Hraðskákkeppni taflfélaga. Huginn vann mjög öruggan sigur á Skákfélagi Reykjanesbæjar 56,5-15,5 en TR-ingar unnu Bolvíkinga einnig fremur örugglega 41,5-30,5 en þar var spennan nokkur um miðbik keppninnar áður en TR tók öll völd í lokin.

Hjörvar Steinn Grétarsson fór mikinn fyrir Hugin og hlaut 11,5 vinning í 12 skákum. Þröstur Þórhallsson hlaut 10, Magnús Örn Úlfarsson 9,5, Sigurður Daði Sigfússon 9 og Kristján Eðvarðsson 8,5 v.

Björgvin Jónsson var langbestur Reyknesinga en hann hlaut 7,5 vinning í 12 skákum. Jóhann Ingvason var næstur með 3 vinninga.

Úrslitin má nálgast á Chess-Results.

Hannes Hlífar Stefánsson var bestur TR-inga með 10,5 vinning í 12 skákum, Benedikt Jónasson nsætur með 9 vinninga og Guðmundur Kjartansson þriðji með 7 vinninga.

Bragi Þorfinnsson var bestur Bolvíkinga með 7,5 vinning og Guðmundur S. Gíslason næstur með 6,5 vinning.

Úrsltin má nálgast á Chess-Results

Úrslit Hugins og TR fara væntanlega fram 27. september nk. 

Caruana hefur tryggt sér sigur á Sinquefield Cup þrátt fyrir jafntefli við Carlsen

Það kom að því að sigurganga Fabiano Caruana (2801) yrði stöðvuð. Þar þurfti til sjálfan heimsmeistarann Magnus Carlsen (2877) sem náði við hann jafntefli með svörtu eftir að hafa haft lengi vel vonda stöðu. Með jafnteflinu tryggir Caruana sér sigur á mótinu en hann hefur hefur 3 vinninga forskot á Carlsen þegar aðeins tvær umferðir eru eftir.

Topalov (2772) vann Nakamura (2787) sem virðist alvegum heillum horfinn. Jafntefli varð í skák Aronian (2805) og MVL (2768)

 Staðan:

• 1. Caruana (2801) 7,5 v.
• 2. Carlsen (2877) 4,5 v.
• 3. Topalov (2772) 4 v.
• 4.-5. Vachier-Lagrave (2768) og Aronian (2805) 3 v.
• 6. Nakamura (2787) 2 v.

Í kvöld teflir Caruana við Nakamura, sem hefur oft haft hrokafull ummæli í garð Ítalans, og Carlsen teflir við Aronian.

Séu lifandi skákstig (live chess ratings) skoðuð er Caruana nú kominn upp í 2836 skákstig og er nú aðeins 29 stigum á eftir heimsmeistaranum. Aðeins tveir einstaklingar hafa náð ofar á lifandi stigum en Caruana en það eru Carlsen (2889) og Kasparov (2857). Caruana fór yfir Aronian með jafnteflinu í gær.

• Heimasíða mótsins
• Beinar útsendingar

Bikarsyrpa Taflfélags Reykjavíkur hefst í dag

Bikarsyrpa Taflfélags Reykjavíkur er nýjung í mótahaldi á Íslandi. Syrpan samanstendur af nokkrum kappskákmótum og er ætluð börnum á grunnskólaaldri (fædd 1999 og síðar) sem ekki hafa náð 1600 skákstigum. Þar með gefst þeim tækifæri til að næla sér í alþjóðleg skákstig á skákmótum sem sérhönnuð eru fyrir þau.

Fyrsta mótið í syrpunni hefst föstudaginn 5. september og stendur til sunnudagsins 7.september. Tefldar eru 5 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo við leggjum ætíð áherslu á að krakkarnir vandi sig og noti tímann vel, þá má gera ráð fyrir að margar skákir taki mun styttri tíma.

Mótið er sérstaklega hugsað fyrir krakka sem hafa sótt skákæfingar Taflfélagsins (og/eða annarra taflfélaga) reglulega síðastliðinn vetur eða lengur. Það er gott að byrja sem fyrst að keppa á kappskákmótum, en hingað til hefur þeim krökkum sem vilja tefla á "alvöru mótum" einungis staðið til boða að taka þátt í opnum mótum. Þar er styrkleikamunurinn oft mikill, mótin taka langan tíma, auk þess sem marga krakka óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því.

Einungis börn og unglingar á grunnskólaaldri sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar.  Þannig er styrkleikamunurinn minni en ella og krakkarnir njóta þess betur að tefla kappskákir. Tímamörkin eru líka styttri, og henta krökkunum betur en langar 90 mínútna skákir sem tíðkast á venjulegum kappskákmótum. Mótið uppfyllir öll skilyrði Alþjóða skáksambandsins FIDE og er reiknað til alþjóðlegra skákstiga sem gott er að byrja að safna snemma. Eins og á aðra viðburði félagsins þá er frítt í mótin fyrir krakka í Taflfélagi Reykjavíkur. Fyrir krakka í öðrum taflfélögum er þátttökugjaldið 1000 krónur fyrir hvert mót Bikarsyrpunnar.

Dagskrá:

1. umferð 17.30 á föstudegi (5. september)

2. umferð 10.30 á laugardegi (6. september)

3. umferð 14.00 á laugardegi (6. september)

4. umferð 10.30 á sunnudegi (7. september)

5. umferð 14.00 á sunnudegi. (Lokaumferð + verðlaunaafhending) (7. september).

Skráning fer fram á heimasíðu Taflfélags Reykjavíkur www.taflfelag.is. Vinsamlegast skráið þátttakendur sem fyrst, það hjálpar við undirbúning mótsins!

Stefnt er að því að Bikarsyrpan samanstandi af fjórum mótum í vetur. Bikarar og medalíur eru í verðlaun fyrir efstu sætin í hverju móti, en auk þess verða veitt sértök verðlaun fyrir samanlagðan árangur á mótunum. 

Hlökkum til að sjá ykkur!

Golfskákmót - Spassky-bikarinn í golfi - skráningu lýkur kl. 16 í dag

Nesklúbburinn haldur óvenjulegt golfmót 7. september næstkomandi. Mótið er sambland af golfmóti og hraðskák.
Tilefnið er að eftir heimsmeistaraeinvígið í skák 1972 hittust þeir Boris Spassky og Bobby Fischer á Bessastöðum 5. september. Eftir fundinn fór Fischer til Keflavíkur að spila keilu en Spassky fór út á Nesvöll að slá golfkúlur. Til að minnast þessa og 50 ára sögu Golfklúbbs Ness er golf-skákmótið haldið.

Golf-skák fer þannig fram að keppendur keppa fyrst í golfi og síðan í hraðskák. Leikinn verður 9 holu höggleikur og ræst er út á öllum teigum samtímis. Eftir golfleikinn er sest niður við tafl og leiknar 7 hraðskákir eftir Monradkerfi.

Sigurvegari verður sá sem hefur bestan samanlagðan árangur, sætaskipan, í golfleiknum og skákinni. Verði tveir eða fleiri jafnir ræður betri árangur í golfinu hver hlýtur Spasky-bikarinn.

Boðið verður upp á súpu eftir golfmótið áður en skákmótið hefst. Golf-skákmótið er opið öllum sem kunna bæði skák og golf. Keppendur eru beðnir að hafa með sér taflmenn, klukku og golfkylfur. Styrktaraðilar mótsins eru WOW-air, AGA-Gas og Nói-Síríus.

Nánari upplýsingar um skráningu hér.