Velheppnað afmælismót Gylfa - Ólafur hafði sigur

Nýlega er lokið afburða skemmtilegu afmælismóti Gylfa Þórhallssonar. Afmælisbarnið var það framarlega í flokki en varð þó hálfum vinningi á eftir sínum gamla félaga Ólafi Kristjánssyni þegar upp var staðið. Þriðji varð Stefán Bergsson. Allir 13 keppendur þótt standa sig með sóma, ekki síst þeir sem komu langan veg til að tefla í þessu móti. 

Röð efstu manna:

1. Ólafur Kristjánsson 9,5 v. af 12
2. Gylfi Þórhallsson 9 v.
3. Stefán Bergsson 8,5 v.
4. Áskell Örn Kárason 8 v.
5. Jón Kristinn Þorgeirsson 7 v.
6. Sigurður Arnarson 6,5 v.

Mótstöflu má finna á heimasíðu SA

Skákþáttur Morgunblaðsins: Heimsmeistaraeinvígi í uppnámi

Helstu niðurstöður ólympíumótsins í Tromsö eru þær að Kínverjar verða stórveldi skákarinnar á 21. öld og Rússar, sem ekki hafa unnið ólympíugull síðan 2002, eru hættir að geta stillt upp sigurstranglegu liði. Þeim verður hins vegar betur ágengt í baktjaldamakki og ósvífnum vinnubrögðum sem kristölluðust í kosningunni til forseta FIDE þegar Kasparov var bókstaflega málaður eins og skrattinn á vegginn í plöggum sem gefin voru út af Kirsan FIDE-forseta og kónum hans. Á heimasíðu FIDE var strax birt heillaóskaskeyti frá Pútín Rússlandsforseta en sendiráð Rússa í aðildarlöndum FIDE voru fengin til að beita sér í þágu Kirsans. Norski mótshaldarinn mátti starfa undir hótunum Rússa og sum þau mál verða síðar útkljáð fyrir dómstólum. Nýjustu fréttir herma að heimsmeistaraeinvígi Magnúsar Carlsen við Anand, sem á að hefjast í Sotchi við Svartahaf eftir tíu vikur, sé komið í uppnám. Magnús hefur enn ekki undirritað einvígisskilmálana en frestur til þess rennur út sunnudaginn 31. ágúst. Hann hefur farið fram á að einvíginu verði frestað og hyggst einbeita sér að skákmóti sem hófst á miðvikudaginn í Saint Louis í Bandaríkjunum. Tregða hans á sér m.a. þá skýringu að hið eldfima ástand eystra gerir Rússland ekki fýsilegt til heimsókna en meira býr undir: sá sem fjármagnar einvígið mun vera Alexander Tkachev, einn af leiðtogum aðskilnaðarsinna í Donetsk-héraði í Úkraínu, sem er á valdi uppreisnarmanna. Magnús hefur engan áhuga á að vera spyrtur við stríðið sem þar geisar. Pútín Rússlandsforseti var viðstaddur athöfn þar sem tilkynnt var um einvígisstaðinn.

Aftur að hinni skáklegu hnignun Rússanna. Hafi þeir einhvern tíma gert sér vonir um að Kramnik myndi ná að leysa Kasparov af hólmi sem leiðtogi innan liðsins hafa þær vonir algerlega brugðist. Kramnik, sem tefldi á 1. borði, tapaði tveimur skákum í Tromsö og báðum á fremur niðurlægjandi hátt. Í sögulegu samhengi má rifja upp þá staðreynd að fyrstaborðsmaður Sovétmanna tapaði yfirleitt ekki skák á ólympíumóti og fyrir kom að liðið þeirra tapaði ekki einni einustu skák á þeim vettvangi. FIDE-heimsmeistarinn frá 2004 leikur Kramnik grátt í 6. umferð:

Rustam Kazimdzanov - Vladimir Kramnik

Drottningarbragð

1. d4 Rf6 2. c4 e6 3. Rf3 d5 4. Rc3 Rbd7 5. Bf4 dxc4 6. e3 Bd6

Linkulegur leikur. Hvassara er 6.... Rd5 sbr. skák Portisch og Roberts Byrnes frá millisvæðamótinu í Biel 1976.

7. Bxd6 cxd6 8. Bxc4 a6 9. a4 d5 10. Bd3 b6 11. 0-0 0-0 12. Db3 De7 13. Hac1 Bb7 14. Hc2 Hfc8 15. Hfc1 Dd6 16. Re5!

Snarplega leikið og svartur gerir best í því að láta riddarann standa á e5.

16.... Rxe5 17. dxe5 Dxe5 18. Dxb6 Hcb8 19. Re2 Rd7 20. Dd4 Dd6 21. f4 e5 22. fxe5 Rxe5 23. Df4 De7?

Tapleikurinn. Hann gat jafnað taflið með 23.... Hc8 en varla áttað sig á að eftir 24. Df5 kemur 24.... g6! 25. Hxc8+ Bxc8 26. Hxc8+ Kg7! og má þá vel við una.

24. Hc7! De8 25. Bf5 Rc4 26. Bd7 Df8

26.... Dxe3 stoðar lítt: 27. Dxe3 Rxe3 28. Rd4! og vinnur.

27. b3 Rb6 28. Bf5 d4

Reynir að losa um sig en nú kemur þrumuleikur.

29. Hxf7! Kxf7

Eða 29.... Dxf7 30. Bxh7+ Kf8 31. Dd6+ De7 32. Hf1+ o.s.frv.

30. Bxh7+

- og Kramnik gafst upp. Framhaldið gæti orðið 30.... Ke7 31. De5+ Kd8 32. Dc7+ Ke8 33. Bg6+ og mát í næsta leik.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Laugardagsmogganum, 30. ágúst 2014.

Skákþættir Morgunblaðsins

[Event "Chess Olympiad"] [Site "Tromso NOR"] [Date "2014.08.08"] [EventDate "2014.08.02"] [Round "6.5"] [Result "1-0"] [White "Rustam Kasimdzhanov"] [Black "Vladimir Kramnik"] [ECO "D37"] [WhiteElo "2700"] [BlackElo "2760"] [PlyCount "59"] 1. d4 Nf6 2. c4 e6 3. Nf3 d5 4. Nc3 Nbd7 5. Bf4 dxc4 6. e3 Bd6 7. Bxd6 cxd6 8. Bxc4 a6 9. a4 d5 10. Bd3 b6 11. O-O O-O 12. Qb3 Qe7 13. Rac1 Bb7 14. Rc2 Rfc8 15. Rfc1 Qd6 16. Ne5 Nxe5 17. dxe5 Qxe5 18. Qxb6 Rcb8 19. Ne2 Nd7 20. Qd4 Qd6 21. f4 e5 22. fxe5 Nxe5 23. Qf4 Qe7 24. Rc7 Qe8 25. Bf5 Nc4 26. Bd7 Qf8 27. b3 Nb6 28. Bf5 d4 29. Rxf7 Kxf7 30. Bxh7+ 1-0

Björn Þorfinnsson sigurvegari minningarmóts Ragnheiðar Jónu

Alþjóðlegi meistarinn Björn Þorfinnsson (2390) sigraði á Minningarmóti Ragnheiðar Jónu Ármannsdóttur  sem fram fór í húsnæði Hjálpræðishersins í Mjódd í gær. Bragi, bróður Björns, varð annar og Guðmundur Gíslason varð þriðji. Það var Eyjólfur Ármannsson bróðir Ragnheiðar Jónu sem stóð fyrir mótinu sem var í senn.

Við upphaf mótsins færði Eyjólfur Sigurði Ingimarssyni frá

 Hjálpræðishernum 60.000 kr. styrk sem Eyjólfur safnaði.

Röð efstu manna

• 1. Björn Þorfinnsson 7 v. af 9
• 2. Bragi Þorfinnsson 6,5 v.
• 3. Guðmundur Gíslason 6 v.
• 4.-5. Guðmundur Kjartansson og Einar Hjalti Jensson 5,5 v.
• 6. Davíð Kjartansson 5 v.

Mótstöflu mótsins má finna á Chess-Results.

Björn er með afar skemmtilega umfjöllun um mótið á Skákhorninu. Þar segir meðal annars:

Ég vildi gjarnan skrifa nokkur orð um Minningarmótið um Ragnheiði Jónu Ármannsdóttur, sem bróðir hennar, Eyjólfur Ármannsson og fjölskylda stóðu fyrir í húsnæði Hjálpræðishersins í Mjódd.

Afar fallegt framtak og virkilega vel af því staðið í alla staði. Salurinn bjartur, rúmgóður og fagur og allt framkvæmt af alúð og umhyggju. 

Myndaalbúm (GB)

Rimaskóli vann sænska Ekenässkólann 4 - 0 á NM grunnskóla í lokaumferðinni

Skáksveit Rimaskóla endaði í 2. sæti á Norðrulandamóti grunnskóla sem nýlokið er í Stokkhólmi í . Svíþjóð. Með góðum endaspretti náði Rimaskóli 2. sæti á mótinu og hlaut 14 vinninga af 20 mögulegum. Norski Kannik ungingaskólinn frá Stavanger tryggði sér Norðurlandameistaratitilinn 2014, titil sem Rimaskóli vann sl. tvö ár. Norski skólinn hlaut 15,5 vinninga.

Í lokaumferðinni tefldu Þau Oliver Aron, Nansý, Jóhann Arnar oSg Kristófer Jóel öll til sigurs gegn Svíþjóð II sveitinni og með 4-0 sigri komust þau uppfyrir Mälarhöjdens skólann sænska sem vann danska skólann með minnsta mun 2,5 - 1,5. Norski skólinn vann finnska skólann 3-1 í  lokaumferðinni og þar með nokkuð öruggan sigur á mótinu.

Oliver Aron vann allar sínar 5 skákir á 1. borði sem er frábær árangur því að andstæðingar hans voru sterkir. Oliver Aron hækkar alþjóðlegu stigin sín um ca 20 stig. Eins og áður hefur komið fram þá voru þrjár sveitir áberandi sterkastar og jafnar og röðun efstu sætanna réðist mest á innbyrðis viðureignum þeirra.

Mjög vel var að mótinu staðið að hálfu Sænska skáksambandsins. keppendur gistu á glæsilegu hóteli, góð aðstaða á mótsstað og þar var í boði matur sem allir þátttakendur höfðu góða lyst á.

Í silfursveit Rimaskóla á NM grunnskóla 2014 eru þau Oliver Aron Jóhannesson, Nansý Davíðsdóttir, Jóhann Arnar Finnsson og Kristófer Jóel Jóhannesson. Þau voru öll í sigursveit Rimaskóla á NM barnaskólasveita 2011 í Danmörku. Liðstjóri var Jón Trausti Harðarson sem var í liði Rimaskóla árin 2008 - 2013. Þessi frumraun hans í nýju hlutverki lofar góðu enda vel skólaður af Hjörvari Steini og Davíð Kjartanssyni.

Helgi Árnason skólastjóri var að vanda fararstjóri og er þetta í 9. sinn sem hann fylgir skáksveitum Rimaskóla á Norðurlandamót erlendis.

• Heimasíða mótsins
• Chess-Results
• Myndaalbúm (HÁ)

 

Öllum skákum lokaumferðarinnar lauk með jafntefli

Öllum skákum lokaumferðar Sinquefield Cup-mótsins lauk með jafntefli í gær - rétt eins og í næstsíðustu umferðar. Topalov og Carlsen gerðu stysta jafntefli mótsins þegar þeir þrátefldu eftir 19 leiki. Aronian og Caruana gerðu jafntefli eftir 30 leiki en í St. Louis var Sofíu-reglan, sem einnig verður á Reykjavíkurskákmótinu 2015, það er það er óheimilt að semja jafntefli í færri en 30 leikjum nema að það komi til þráteflis. Skák MVL og Nakamura lauk einnig með jafntefli. 

Lokastaðan:

• 1. Caruana (2801) 8,5, v..
• 2. Carlsen (2877) 5,5 v.
• 3. Topalov (2772) 5 v.
• 4.-5. Vachier-Lagrave (2768) og Aronian (2805) 4 v.
• 6. Nakamura (2787) 3 v.

• Heimasíða mótsins
• Beinar útsendingar

Rimaskóli vann finnska skólann í fjórðu umferð

Skáksveit Rimaskóla vann finnska Moisio skólann 3-1 í fjórðu og næstsíðustu umferð á Norðurlandamóti  grunnskóla í dag. Þau Oliver Aron, Nansý og Kristófer Jóel unnu örugglega sína andstæðinga en Jóhann Arnar tapaði slysalega eftir að hafa náð yfirburðarstöðu. Hann flýtti sér of mikið að knésetja andstæðinginn, uggði ekki að sér og fékk á sig óverjandi mát.

Þar féll dýrmætur vinningur í hafið í baráttunni um 2. sætið. Efstu sveitirnar, Noregur og Svíþjóð 1 gerðu jafntefli, en lengi leit út fyrir stóran sænskan sigur sem hefði þá fært þeim forystuna á mótinu. Norski Kannik Ungdomskolen er nánast búinn að tryggja sér sigur en Rimaskóli og Mälarhöjdensskóli berjast um silfur og bronsverðlaun. Þessar þrjár sveitir eru mun sterkari en hinar sem eru í neðri sætunum. Í fimmtu og síðustu umferð Norðurlandamótsins má búast við miklum mun í öllum viðureignum því þær sterkari tefla allar gegn veikari sveitunum. Skáksveit Rimaskóla þarf einn vinning umfram Svíana til að ná silfrinu þar sem hún er hálfum vinningi undir og með einu "machpoint" stigi minna en sænski Mälarhöjdens skóli. Síðasta umferðin verður tefld á morgun sunnudag og hefst kl. 07:00 á íslenskum tíma. 

 

• Heimasíða mótsins
• Chess-Results

 

Jafnt gegn Svíunum í 3. umferð á NM grunnskóla

Tveir af sigursælustu grunnskólum Norðurlandanna, Rimaskóli og sænski Mälarhöjdens Skola, tefldu saman í 3.umferð á Norðurlandamóti grunnskóla í Stokkhólmi. Sveitirnar voru í 2. - 3. sæti fyrir umferðina og það breyttist ekkert því úrslit viðureignarinnar urðu jöfn 2-2.

Bræðurnir Oliver Aron og Kristófer Jóel unnu sínar skákir en Nansý og Jóhann Arnar töpuðu. Norska sveitin frá Stavangri er efst og hefur unnið allar viðureingir sínar nokkuð örugglega. Tvær efstu sveitirnar frá Noregi og Svíþjóð mætast í 4. umferð og þar kunna úrslitin að ráðast endanlega. Rimaskóli á eftir að tefla við tvær neðstu sveitirnar í 4. og 5. umferð. Skólinn á ágætis möguleika á að ná öðru sæti mótsins með góðri frammistöðu í lokaumferðum. 

• Heimasíða mótsins
• Chess-Results

 

Öllum skákum níundu umferðar lauk með jafntefli - Caruana og Carlsen klúðruðu vinningsstöðum

Öllum skákum níundu og næstsíðustu umferðar Sinquefield Cup-mótsins lauk með jafntefli í gær. Það er í fyrsta sinn sem það gerist. Það breytir því ekki að hart var barist en bæði Caruana og Carlsen klúðruðu vinningsstöðum niður í jafntefli.

Það stefndi flest í öruggan sigur Caruana gegn Nakamura en hann missti af laglegri vinningsleið í 40. leik og varð að sætta sig við jafntefli.

Caruana sagði eftir skákina aðspurður hvaða leik hann sæi eftir:

Nearly every move for about 10 moves.

Nakamura lét hafa eftir sér á Twitter að lokinni skákinni

Everyone loves to make fun of me for blowing +12 against Carlsen, but if Caruana can blow +15 against me...anything is possible!  

Sömu sögu má segja af Magnusi Carlsen, sem missti af vinningsleið í 46. leik gegn Aronian og varð að sætta sig við jafntefli.

MVL og Topalov gerðu jafntefli í hörkuskák. 

Bent er góða umfjöllun um umferð gærdagsins á Chess.com.

Í kvöld fer fram lokaumferð mótsins. Þá teflir Caruana við Aronian en Carlsen við Topalov. 

Staðan:

• 1. Caruana (2801) 8v.
• 2. Carlsen (2877) 5 v.
• 3. Topalov (2772) 4,5 v.
• 4.-5. Vachier-Lagrave (2768) og Aronian (2805) 3,5 v.
• 6. Nakamura (2787) 2,5 v.

• Heimasíða mótsins
• Beinar útsendingar

Bikarsyrpa TR hófst í gær

Það var mikil eftirvænting í augum barnanna 25 sem mættu í skákhöll Taflfélags Reykjavíkur fyrr í kvöld til að tefla í hinni nýju Bikarsyrpu. Það var sérstaklega gaman að fylgjast með því hve mörg barnanna notuðu tímann sinn vel og stóðu sig vel í að skrifa skákirnar niður.

Skákir 1.umferðar voru margar hverjar æsispennandi þar sem reyndari skákmenn átti sumir í mesta basli með óreyndari andstæðinga sína. Úrslit 1.umferðar urðu þó flest eftir bókinni og má þau finna hér.

Pörun 2.umferðar má finna hér.

Heimasíða TR

Minningarmót um Ragnheiði Jónu Ármannsdóttur haldið í dag

Minningarmót um Ragnheiði Jónu Ármannsdóttur verður haldið í dag, laugardaginn, 6. september í húsnæði Hjálpræðishersins í Mjódd. Það er Eyjólfur Ármannsson, sem stendur fyrir mótinu í minningu systur sinnar.

Ragnheiður hefði orðið 45 ára í sumar hefði hún lifað en hún lést 2011. Hún var foringi í Hjálpræðishernum. 

Mótið er ægisterkt en meðal keppenda eru 4 alþjóðlegir meistarar og 5 FIDE-meistarar. Keppendalistinn er sem hér segir:

1. AM Guðmundur Kjartansson (2439)
2. AM Bragi Þorfinnsson (2437)
3. AM Jón Viktor Gunnarsson (2426)
4. AM Björn Þorfinnsson (2389)
5. FM Magnús Örn Úlfarsson (2380)
6. FM Einar Hjalti Jensson (2349)
7. FM Davíð Kjartansson (2331)
8. FM Guðmundur Gíslason (2309)
9. FM Þorsteinn Þorsteinsson (2242)
10. Kristján Eðvarðsson (2167)

Keppendur tefla allir við alla og umhugsunartíminn verður 10 mínútur + 5 sekúndur í viðbótartíma á hvern leik.

Fyrstu verðlaun verða 30.000 kr., önnur verðlaun 20.000 kr. og þriðju verðlaun 10.000 kr. Hjálpræðishernum verður auk þessu veittur 60.000 kr. styrkur.  

Mótið hefst kl. 14 og stendur til um að vera kl. 18. Áhorfendur velkomnir.