Haustmót Taflfélags Reykjavíkur er hafið

Í dag hófst eitt af stórmótum ársins þegar tefld var fyrsta umferð í Hausmóti Taflfélags Reykjavíkur. Fimmtíu og átta keppendur eru skráðir til leiks að þessu sinni sem er mesti fjöldi keppenda í mótinu síðan 2010, en mótið á nú áttatíu ára afmæli. Keppt er í þremur lokuðum flokkum A, B og C og einum opnum flokk D. Nokkuð mikið var um frestanir og yfirsetur í fyrstu umferð sem til eru komnar vegna Norðurlandamóts barnaskólasveita sem nú fer fram á Selfoss.

Í A flokki eru margir reyndir meistarar í bland við yngri og upprennandi skákmenn.  Fide meistararnir Davíð Kjartansson og Þorsteinn Þorsteinsson eru stigahæstir en sá síðarnefndi er nú að taka þátt í haustmótinu í fyrsta sinn síðan 1979. Gamla kempan og alþjóðameistarinn Sævar Bjarnason sem nýverið gékk í raðir Taflfélags Reykjavíkur lætur sig að sjálfsögðu sig ekki vanta frekar en Gylfi Þórhallsson en þeir tveir hafa teflt flestar kappskákir af öllum hér á landi. "Rimaljónin" þrjú eru öll með, Oliver Aron Jóhannsson, Dagur Ragnarsson og sigurvegari B flokksins í fyrra, Jón Trausti Harðarson. Jón Árni Halldórsson er að sjálfsögðu mættur til leiks og flokkinn fylla svo þeir Kjartan Maack og Þorvarður F. Ólafsson. Þeir tveir síðastnefndu ásamt Sævari Bjarnasyni eru allir félagsmenn í Taflfélagi Reykjavíkur og munu býtast um sæmdarheitið og titilinn Skákmeistari Taflfélags Reykjavíkur. Kjartan Maack ber þann titil núna eftir frækna frammistöðu á mótinu í fyrra.

Í fyrstu umferð var viðureign Davíðs og Jóns Trausta frestað meðan Dagur og Kjartan, Þorsteinn og Gylfi sem og Þorvarður og Sævar skildu jafnir.  Eina sigurskákin kom í viðureign Olivers og Jóns Árna, en þar bar fyrrnefndi sigur úr býtum.

B flokkurinn er athyglisverður. Þar eru stigahæstir Spánverjinn Damia Morant Benet (2058) og Þjóðverjinn Christopher Vogel (2011) sem lítið er vitað um! Þeir stunda báðir nám í Háskóla Íslands og gengu nýverið í Taflfélag Reykjavíkur. Verður gaman að fylgjast með framgöngu þeirra. Meðal annarra keppenda í flokknum eru efnilegir strákar á borð við Gauta Pál Jónsson, Björn Hólm Birkisson og Dawid Kolka.

Bárður Örn Birkisson er stigahæstur í C flokknum og ætlar sér eflaust ekkert nema sigur. Fleiri ungir og efnilegir skákmenn sem gaman verður að fylgjast með eru í þessum flokk. Þar má nefna Guðmund Agnar Bragason, Felix Steinþórsson og skákprinsessuna Nansý Davíðsdóttur. Meðal annarra í þessum flokki má nefna félagana úr Vinaskákfélaginu Hauk Halldórsson og Hjálmar Sigurvaldason sem láta sig sjaldan vanta á mót í Feninu.

Tuttugu og átta keppendur eru í opna flokknum. Þar má finna fjölmarga krakka sem eru að taka þátt í fyrsta, eða einu af fyrstu kappskákmótum sínum. Þar á meðal eru margir sem tóku þátt í fyrsta móti Bikarsyrpu Taflfélagsins um seinustu helgi og demba sér nú út í djúpu laugina með því að taka þátt í Haustmótinu. Það verður gaman að fylgjast með hvernig þeim reiðir af í baráttunni við nokkrar eldri og reynslumeiri kempur, t.a.m Björgvin Kristbergsson og Olaf Evert Ulfsson sem er nú að tefla eftir langt hlé.

Úrslit í öllum flokkum má nálgast hér.

Hægt er að nálgast skákir fyrstu umferðar í flokkum A-C hér.

Önnur umferð Haustmótsins fer fram á miðvikudagskvöldið og hefst kl. 19.30. Allir skákáhugamenn velkomnir og hið rómaða Birnukaffi að sjálfsögðu opið!

• Heimasíða TR
• Chess-Results

Skákþáttur Morgunblaðsins: Einstæð sigurganga Fabiano Caruana

Sérfræðingar ýmsir reyna nú að finna sambærileg dæmi við það sem gerst hefur á „ofurmótinu" í Saint Louis í Bandaríkjunum þar sem Ítalinn Fabiano Caruana, sigurvegari Reykjavíkurskákmótsins 2012, hefur unnið allar skákir sínar í sjö fyrstu umferðunum og hafði tryggt sér efsta sætið þegar þrjár umferðir voru eftir. Árangur hans var mældur upp á 3.593 elo stig. Það kom í hlut heimsmeistarans Magnúsar Carlsen að stöðva Ítalann með harðsóttu jafntefli í 8. umferð sem fram fór á fimmtudagskvöldið. Magnús situr þegar þetta er ritað í 2. sæti með 4½ vinning.

Ef taka á önnur dæmi úr skáksögunni ber að rifja upp Linares-mótið 1994 þegar Anatolí Karpov vann sex fyrstu skákir sínar og þessi sigurganga leiðir einnig hugann að ýmsum 100% afrekum Bobby Fischers í mótum og einvígjum og geta má þess að Viktor Kortsnoj vann átta fyrstu skákir sínar í Wijk aan Zee 1968. Það mót nálgast ekki þá styrkleikagráðu sem um ræðir í Saint Louis.

Ekki er nema von að andstæðingar Ítalans: heimsmeistarinn Magnús Carlsen, Levon Aronjan, Venselin Topalov, Vachier-Lagrave og Hikaru Nakamura hafi virst ráðvilltir á svip þar sem þeir sátu við taflið í hinni hátimbruðu frægðarhöll skákarinnar í Saint Louis. Hún stendur ekki langt frá Mississippi-fljótinu sem ekki hefur náð að hrífa með sér þau vandamál sem Magnús Carlsen stendur frammi fyrir þessa dagana varðandi heimsmeistaraeinvígið við Anand sem sett hefur verið á 7. nóvember nk. FIDE gaf Magnúsi viku frest til viðbótar til að ákveða sig en aðstandendur Magnúsar hafa ekkert gefið upp um lyktir þessa máls.

Hvað varðar sigurvegarann í Saint Louis liggur fyrir að bókstaflega allt hefur fallið með honum en því verður ekki á móti mælt að sigrar hans hafa verið sannfærandi og áreynslulausir. Hann mætir Nakamura og Aronjan í lokaumferðunum en mótinu lykur á morgun, sunnudag:

Saint Louis; 6. umferð:

Fabiano Caruana - Venselin Topalov

Sikileyjarvörn

1. e4 c5 2. Rf3 e6 3. d4 cxd4 4. Rxd4 Rc6 5. Rc3 a6 6. Rxc6 bxc6 7. Bd3 d5 8. 0-0 Rf6 9. He1 Be7 10. e5 Rd7 11. Dg4 Kf8 12. Ra4!

Svartur gat ekki hrókað stutt vegna leik 12. Bh6 o.s.frv. En til viðbótar við áætlanir um kóngssókn nær hvítur líka að þenja út áhrifasvæði sitt á drottningarvæng.

12.... Da5 13. He2 h5 14. Df4 g5 15. Bd2 Dc7 16. Dg3 h4 17. Dg4 Hg8?

Eftir þennan leik ver að halla undan færi hjá Topalov. Ekki gekk 17.... Rxe5 vegna 18. Hxe5! Dxe5 19. Bc3. Hann gat hinsvegar leikið leikið 17.... h3! og á þá ágætis færi þar sem eftir 18. g3 má nú svara 18. ... Rxe5 þar sem 19. Hxe5 Dxe5 20. Bc3 strandar á 20.... d4! t.d. 21. Bxd4 Dd5 sem hótar máti á g2.

18. Hae1 c5 19. c4 dxc4 20. Bxc4 Bb7 21. h3 Hd8 22. Bc3 Rb8 23. He3 Rc6?

Það er eins og Caruana hafi beðið eftir þessum slaka leik. Hann varð að reyna 23.... Bd5.

24. Bxe6! fxe6 25. Hf3+ Ke8

Leikurinn 25.... Kg7 sem Topalov virðist hafa stólað dugar skammt, hvítur vinnur skjótlega með 26. Dh5! Hdf8 27. Hf6! o.s.frv.

26. Dxe6 Hg7 27. Dh6 Rd4 28. e6!

Annar magnaður leikur, peðið heldur svarta kónginum í herkví.

28.... Rxf3 29. gxf3 Bf8 30. Dh5+ Ke7 31. Bxg7

- og Topalov gafst upp. Eftir 31.... Bxg7 kemur 32. Df7+ Ld6 33. e7! og vinnur létt.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Laugardagsmogganum, 6. september 2014

Skákþættir Morgunblaðsins

[Event "Sinquefield Cup"] [Site "Saint Louis USA"] [Date "2014.09.02"] [EventDate "2014.08.27"] [Round "6"] [Result "1-0"] [White "Fabiano Caruana"] [Black "Veselin Topalov"] [ECO "B46"] [WhiteElo "?"] [BlackElo "?"] [PlyCount "61"] 1.e4 c5 2.Nf3 e6 3.d4 cxd4 4.Nxd4 Nc6 5.Nc3 a6 6.Nxc6 bxc6 7.Bd3 d5 8.O-O Nf6 9.Re1 Be7 10.e5 Nd7 11.Qg4 Kf8 12.Na4 Qa5 13.Re2 h5 14.Qf4 g5 15.Bd2 Qc7 16.Qg3 h4 17.Qg4 Rg8 18.Rae1 c5 19.c4 dxc4 20.Bxc4 Bb7 21.h3 Rd8 22.Bc3 Nb8 23.Re3 Nc6 24.Bxe6 fxe6 25.Rf3+ Ke8 26.Qxe6 Rg7 27.Qh6 Nd4 28.e6 Nxf3+ 29.gxf3 Bf8 30.Qh5+ Ke7 31.Bxg7 1-0

Henrik endaði í 2.-5. sæti í Skovbo

Stórmeistarinn Henrik Danielsen (2488) endaði í 2.-5. sæti á alþjóðlegu skákmóti sem lauk í Skovbo í Danmörku í dag. Henrik hlaut 6,5 vinning í 9 skákum eftir góðan endasprett en hann hlaut 2,5 vinning í síðustu þremur umferðunum.

Einstök úrslit í skákum Henriks má finna hér. Árangur hans samsvaraði 2510 skákstigum og hann hækkar hann um 5 skákstig fyrir frammistöðuna.

Danski alþjóðlegi meistarinn Simen Bekker-Jensen (2442) sigraði á mótinu þrátt fyrir tap gegn Henriki í lokaumferðinni. Simen hlaut 7 vinninga.

Alls tóku 52 skákmenn þátt í mótinu og þar af voru fimm stórmeistarar. Henrik var nr. 3 í stigaröð keppenda.

• Heimasíða mótsins
• Beinar útsendingar 

 

Álfhólsskóli vann og er í öðru sæti - Rimaskóli tapaði - Norðmenn efstir

Skáksveit Álfhólsskóla vann 3-1 sigur á sveit Svía í fjórðu og næstsíðustu umferð NM barnaskólasveita sem fram fór fyrr í dag á Hótel Selfossi. Felix Steinþórsson, Guðmundur Agnar Bragason og Róbert Luu unnu sínar skákir. Sveitin er nú tveimur vinningum á eftir norsku sveitinni en sveitirnar mætast í lokaumferðinni. Norska sveitin er því í bílstjórasætinu en 3-1 sigur myndi tryggja Álfhólsskóla Norðurlandameistaratitilinn. Rimaskóli tapaði 1-3 fyrir dönsku sveitinni er í fimmta sæti.

Staðan:

1. Noregur 13,5 v.
2. Álfhólsskóli 11,5 v.
3. Danmörk 10,5
4. Svíþjóð 6,5 v.
5. Rimaskóli 6 v.
6. Finnland 0 v.

Lokaumferðin hefst kl. 15:30.

• Heimasíða mótsins
• Chess-Results
• Myndaalbúm (GB og SSB)

Huginn mætir írskri sveit í fyrstu umferð EM taflfélaga

EM taflfélaga hefst í dag í Bilbao. Skákfélagið Huginn tekur þátt, eitt íslenskra skákfélaga. Fyrsta umferð hefst kl 13:00 og mætir lið Hugins Adare Chess Club frá Írlandi, en meðalstig Íranna eru 2048 en okkar manna 2419.

Hér má skoða lista yfir öll liðin

Gawain, Kampen, Þröstur, Einar, Hlíðar og Magnús tefla í dag, en Vigfús hvílir. Lið Hugins er númer 21 á styrkleikalista mótssins í opnum flokki, en alls taka 52 lið þátt í honum.

Vefur mótsins.

Aðalfundur SA í dag

Aðalfundur Skákfélags Akureyrar verður haldinn nk. sunnudag, 14. september. Fundurinn hefst kl. 13 og fara þá fram venjuleg aðalfundarstörf. Þau eru þessi, skv. lögum félagsins:

• 1.              Formaður félagsins setur fundinn og lætur kjósa fundarstjóra og fundarritara.
• 2.              Kynnt fundargerð síðasta aðalfundar.
• 3.              Formaður flytur skýrslu stjórnar.
• 4.              Lesin árskýrsla ritara um starfsemi félagsins.
• 5.              Gjaldkeri gerir grein fyrir reikningum félagsins.
• 6.              Umræður umstörf stjórnar og afgreiðsla reikninga.
• 7.              Inntaka nýrra félaga.
• 8.              Kosning stjórnar og annarra fastra starfsmanna.
• 9.              Kosning tveggja endurskoðenda.
• 10.          Ákveðið árstillag félagsmanna.
• 11.          Umræður um lög og keppnisreglurfélagsins.
• 12.          Önnur mál

 

Félagið hvetur félaga til að mæta og taka þátt í fundinum. Minnt er á að fundurinn er eigi gildur nema 10 manns mæti. Það hefur einhvertíma staðið tæpt.

Álfhólsskóli og Rimaskóli unnu í dag - Norðmenn efstir

Skáksveitir Álfhólsskóla og Rimaskóla unnu báðar sínar viðureignir í þriðju umferð NM barnaskólasveita sem fram fór í morgun. Álfhólsskóli vann stórsigur, 4-0, á finnsku sveitinni en Rimaskóli vann sigur á sænsku sveitinni með minnsta mun 2,5-1,5. Norska sveitin, sem vann hina dönsku með minnsta mun, leiðir á mótinu. Ekki er teflt í kvöld í mótinu en þess í stað verður boðið upp á hraðskákmót í Fischer-setri. 

Staðan:

1. Noregur 9,5 v.
2. Álfhólsskóli 8,5 v.
3. Danmörk 7,5 v.
4. Svíþjóð 5,5 v.
5. Rimaskóli 5 v.
6. Finnland 0 v.

Fjórða umferð fer fram í fyrramálið og hefst kl. 10. Þá mætir Álfhólsskóli sænsku sveitinni og Rimaskóli þeirri dönsku.

• Heimasíða mótsins
• Chess-Results
• Myndaalbúm (GB og SSB)

Haustmót TR - skráningu lýkur kl.18 i dag

Haustmót Taflfélags Reykjavíkur 2014 hefst sunnudaginn 14. september kl.14. Mótið á 80 ára afmæli í ár, er eitt af aðalmótum vetrarins í reykvísku skáklífi og er jafnframt meistaramót T.R. Mótið er flokkaskipt og öllum opið.

Haustmótið fer fram í félagsheimili Taflfélags Reykjavíkur, skákhöllinni að Faxafeni 12. Tefldar verða tvær umferðir á viku. Alls eru níu umferðir í hverjum flokki. Lokuðu flokkarnir eru skipaðir tíu keppendum hver þar sem allir tefla við alla, en í opna flokknum er teflt eftir svissnesku kerfi.

Skráning fer fram á skak.is og einnig á heimasíðu T.R. Fylgjast má með skráningu hér.

Skráningu í alla lokaða flokka lýkur laugardaginn 13. september kl. 18.
Lokaumferð fer fram föstudaginn 17. október en mótinu lýkur með verðlaunaafhendingu sunnudaginn 19. október þegar Hraðskákmót T.R. fer fram.

Núverandi skákmeistari Taflfélags Reykjavíkur er Kjartan Maack.
 
Dagskrá:
1. umferð: Sunnudag 14. september kl.14.00
2. umferð: Miðvikudag 17. september kl.19.30
3. umferð: Sunnudag 21. september kl.14.00
4. umferð: Miðvikudag 24. september kl.19.30
5. umferð: Sunnudag 28. september kl.14.00

---Hlé vegna Islandsmóts skákfélaga---

6. umferð: Miðvikudag 8. október kl.19.30
7. umferð: Sunnudag 12. október kl.14.00
8. umferð: Miðvikudag 15. október kl. 19.30
9. umferð: Föstudag 17. október. kl.19.30

Verðlaun í A-flokki:
1. sæti kr. 100.000
2. sæti kr. 50.000
3. sæti kr. 25.000
4. og 5. sæti ókeypis í Skákþing Reykjavíkur 2015

Verðlaun í B-flokki:
1. sæti kr. 20.000
2.-3. sæti ókeypis í Skákþing Reykjavíkur 2015

Verðlaun í C-flokki:
1. sæti kr. 15.000
2. og 3. sæti ókeypis í Skákþing Reykjavíkur 2015

Verðlaun í opnum flokki:
1. sæti kr. 10.000
2. og 3. sæti ókeypis í Skákþing Reykjavíkur 2015

Ef lokuðum flokkum fjölgar þá verða verðlaun í þeim þau sömu og í C-flokki. Að auki ávinnur sigurvegari hvers flokks sér þátttökurétt í næsta styrkleikaflokki að ári liðnu. Verði keppendur jafnir í efstu sætum verður peningaverðlaunum skipt en stigaútreikningur látinn ráða lokaröð keppenda. Taflfélag Reykjavíkur áskilur sér jafnframt rétt til þess að halda eftir 25% af verðlaunafé þeirra sem ekki mæta á verðlaunaafhendinguna.

Tímamörk:
1 klst. og 30 mín. + 30 sek. á leik. Að loknum 40 leikjum bætast við 15 mínútur.

Þátttökugjöld:
3.500 kr. fyrir félagsmenn T.R. 16 ára og eldri (5.000 kr. fyrir aðra).
1.500 kr. fyrir félagsmenn T.R. 15 ára og yngri (2.500 kr. fyrir aðra).

Byrjendaæfingar hefjast hjá TR í dag kl. 11

Næstkomandi laugardag kl. 11:00 - 12:15 hefjast skákæfingar fyrir byrjendur hjá Taflfélagi Reykjavíkur í húsnæði félagsins að Faxafeni 12. Um er að ræða nýja barnaæfingu sem ætluð er þeim sem eru að taka sín fyrstu skref í skáklistinni.

Kennsluefni á þessum æfingum er eins og best verður á kosið og reyndist það afar vel á síðasta starfsári. Þjálfun og kennsla er í höndum þaulreyndra skákþjálfara sem allir hafa reynslu af starfi með börnum auk þess að vera sterkir skákmenn. Þeir krakkar sem ekki treysta sér til þess að taka beinan þátt á æfingunni eru velkomnir að koma á æfinguna og horfa á til að byrja með.

Byrjendaæfingarnar verða á hverjum laugardegi í vetur kl. 11:00 - 12:15. Hefðbundinn Laugardagsæfing fer einnig fram á hverjum laugardegi líkt og áður, klukkan 14:00 - 15:00. Félagsæfingar fyrir börn í TR eru svo haldnar strax í kjölfar Laugardagsæfinganna, eða klukkan 15:00 - 16:00.

Við hlökkum til að taka á móti ykkur á laugardaginn!

Álfhólsskóli með jafntefli - Rimaskóli tapaði - Norðmenn efstir

Álfhólsskóli gerði 2-2 jafntefli við dönsku sveitina í 2. umferð NM barnaskólasveita sem er nýlokið. Felix Steinþórsson vann í hörkuskák, Róbert Luu og Óðinn Örn Jakobsen gerðu jafntefli. Rimaskóli tapaði 1-3 fyrir norsku sveitinni þar sem Nansý Davíðsdóttir vann góðan sigur. Það voru því fyrsta borðs mennirnir sem stóðu sig best íslensku keppendanna í dag. 

Norðmenn eru efstir með 7 vinninga, Danir eru aðrir með 6 vinninga og Álfhólsskóli er í þriðja sæti með 4,5 vinning. Rimaskóli er í fimmta sæti með 2,5 vinning.

Þriðja umferð fer fram í fyrramálið. Þá teflir Álfhólsskóli við finnsku sveitina, Rimaskóli við sænsku sveitina. Svo verður toppviðureign Dana og Norðmanna.

• Heimasíða mótsins
• Chess-Results
• Myndaalbúm (GB og SSB)