Íslandsmót 50 ára + og 65 ára + ekki haldið í ar

Íslandsmót 50 ára + og 65 ára + verður ekki haldið í ár. Skipuleggjendur stefndu að a.m.k. 20 manna móti en þegar um vika er í upphaf móts er ljóst að það markmið næst ekki að sinni. Stefnt er að mótinu að ári.

Engu að síður er stefnt á að halda atskákmót fyrir þennan hóp helgina 14.-16. nóvember - þegar seinni hluti Íslandsmótsins átti að fara fram.

Nánar um það síðar.

Nýtt Fréttabréf SÍ

Nýtt Fréttabréf SÍ kom út í dag. Meðal efnis í fréttabréfinu er:

• Skákfélagið Huginn efst á Íslandsmóti skákfélaga - TR og TV skammt undan
• Fimm manna hópur heldur á EM ungmenna
• TR hraðskákmeistari taflfélaga
• Tólf íslenskir skákmenn tóku þátt í Västerås Open 
• Mykhaylo sigraði á fyrstu Bikarsyrpu TR
• Reykjavíkurskákmótið 2015 - Nýjustu skráningar
• Mót á döfinni

Sú villa er í bréfinu að Símon og Gauti tefla í flokki 14 ára og yngri á EM ungmenna. Hið rétta er að þeir tefla í flokki 16 ára og yngri. Beðist er velvirðingar á því.

Fréttabréfið má nálgast hér.

Hægt er að skrá sig fyrir Fréttabréfinu sem kemur að jafnaði út tvisvar á mánuði yfir vetrarmánuðina ofarlega á vinstri hluta Skák.is.

Eldri fréttabréf má nálgast hér.

Caruana efstur í Bakú

Ítalski stórmeistarinn Fabiano Caruana (2844) heldur áfram að brillera. Í sjöttu umferð Grand Prix-mótsins í Bakú sem fram fór í dag vann hann Peter Svidler (2732). Ítalinn ungi er efstur með 4½ vinning og hækkar enn á lifandi skákstigum. Þar hefur hann nú 2851 skákstig og er aðeins 12 stigum á eftir Carlsen.

Aðrar sigurvegarar dagsins voru Radjavov sem vann Grischuk og Kasimdzhanov sem hafði betur gegn Andreikin (2722). Öðrum skákum lauk með jafntefli.

Staðan efstir sex umferðir

 

Rank	Name	Rtg	FED	Pts
1	Caruana Fabiano	2844	ITA	4½
2	Gelfand Boris	2748	ISR	4
3	Radjabov Teimour	2726	AZE	3½
4	Nakamura Hikaru	2764	USA	3½
	Kasimdzhanov Rustam	2706	UZB	3½
6	Tomashevsky Evgeny	2701	RUS	3
7	Karjakin Sergey	2767	RUS	3
8	Svidler Peter	2732	RUS	3
9	Dominguez Perez Leinier	2751	CUB	2½
10	Grischuk Alexander	2797	RUS	2
11	Mamedyarov Shakhriyar	2764	AZE	2
12	Andreikin Dmitry	2722	RUS	1½

 

• Heimasíða mótsins
• Beinar útsendingar (hefjast kl. 10)

 

Björgvin efstur hjá Ásum í dag

Eins og alla aðra þriðjudaga þá mætti vaskur hópur eldri skákmanna í Stangarhyl 4 í dag og tefldu sér til gamans. Það voru tuttuguogfimm skákmenn sem settust við skákborðin á mínútunni kl. 13.00

Björgvin Víglundsson hélt sínu striki og varð efstur eins og oft áður en hann fékk átta og hálfan vinning af tíu mögulegum.

Guðfinnur R Kjartansson fékk sjö og hálfan vinning í öðru sæti.

Sæbjörn Guðfinnsson fékk svo sjö vinninga í þriðja sæti.

Það voru margir sterkir karlar þarna í dag.

Sjá nánari úrslit í töflu.

 

 

Eitt skemmtilegasta mót ársins: Alþjóða geðheilbrigðismótið á fimmtudagskvöld!

Alþjóða geðheilbrigðismótið í skák verður haldið í Skákhöll Taflfélags Reykjavíkur, Faxafeni 12, fimmtudaginn 9. október kl. 20. Þetta er tíunda árið í röð sem mótið er haldið, en það er eitt fjölmennasta og skemmtilegasta skákmót ársins.  

 

Mótið er liður í hátíðarhöldum vegna Alþjóða geðheilbrigðisdagsins, og er opið skákmönnum á öllum aldri og er þátttaka ókeypis. 

Að mótinu standa Taflfélag Reykjavíkur, Hrókurinn og Vinaskákfélagið. Meðal sigurvegara fyrri ára á Alþjóða geðheilbrigðismótinu eru stórmeistararnir Helgi Ólafsson og Jóhann Hjartarson.

Forlagið og Sögur útgáfa gefa vinninga og eru verðlaun veitt í ýmsum flokkum.

Tefldar verða 7 umferðir með 7 mínútna umhugsunartíma. Keppendur eru hvattir til að skrá sig sem fyrst í netfangið [e-mail].

Annað mótið í Bikarsyrpu TR hefst á föstudaginn

 

 

Bikarsyrpa Taflfélags Reykjavíkur er nýjung í mótahaldi á Íslandi. Syrpan samanstendur af nokkrum kappskákmótum og er ætluð börnum á grunnskólaaldri (fædd 1999 og síðar) sem ekki hafa náð 1600 skákstigum. Þar með gefst þeim tækifæri til að næla sér í alþjóðleg skákstig á skákmótum sem sérhönnuð eru fyrir þau.

Annað mótið í syrpunni hefst föstudaginn 10. október og stendur til mánudagsins 13. október. Tefldar eru 5 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo við leggjum ætíð áherslu á að krakkarnir vandi sig og noti tímann vel, þá má gera ráð fyrir að margar skákir taki mun styttri tíma.

Mótið er sérstaklega hugsað fyrir krakka sem hafa sótt skákæfingar Taflfélagsins (og/eða annarra taflfélaga) reglulega síðastliðinn vetur eða lengur. Það er gott að byrja sem fyrst að keppa á kappskákmótum, en hingað til hefur þeim krökkum sem vilja tefla á "alvöru mótum" mestmegnis staðið til boða að taka þátt í opnum mótum. Þar er styrkleikamunurinn oft mikill, mótin taka langan tíma, auk þess sem marga krakka óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því.

Einungis börn og unglingar á grunnskólaaldri sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar.  Þannig er styrkleikamunurinn minni en ella og krakkarnir njóta þess betur að tefla kappskákir. Tímamörkin eru líka styttri, og henta krökkunum betur en langar 90 mínútna skákir sem tíðkast á venjulegum kappskákmótum. Mótið uppfyllir öll skilyrði Alþjóða skáksambandsins FIDE og er reiknað til alþjóðlegra skákstiga sem gott er að byrja að safna snemma. Eins og á aðra viðburði félagsins þá er frítt í mótin fyrir krakka í Taflfélagi Reykjavíkur. Fyrir krakka í öðrum taflfélögum er þátttökugjaldið 1000 krónur fyrir hvert mót Bikarsyrpunnar.

Dagskrá:
1. umferð 17.30 á föstudegi (10.október)
2. umferð 10.30 á laugardegi (11.október)
3. umferð 14.00 á laugardegi (11.október)
4. umferð 10.30 á sunnudegi (12.október)
5. umferð 17.30 á mánudegi. (Lokaumferð + verðlaunaafhending) (13. október).

ATH. breyting frá fyrsta mótinu.  Þá fór seinasta umferð fram seinnipart sunnudags.  Vegna Haustmóts T.R. fer lokaumferðin fram á mánudegi.

Sigurvegari fyrsta móts Bikarsyrpunnar var TR-ingurinn Mykhaylo Kravchuk.

Skráning fer fram á heimasíðu Taflfélags Reykjavíkur og á Skák.is (guli glugginn efst).

Vinsamlegast skráið þátttakendur sem fyrst, það hjálpar við undirbúning mótsins!

Stefnt er að því að Bikarsyrpan samanstandi af fjórum mótum í vetur. Bikarar og medalíur eru í verðlaun fyrir efstu sætin í hverju
 móti, en auk þess verða veitt sérstök verðlaun fyrir samanlagðan árangur á mótunum.

Hlökkum til að sjá ykkur!

Íslandsmót 50+ ára og 65+ ára hefst 16. október

Íslandsmót skákmanna sem eru 50 ára + og 65 ára + verða haldin í fyrsta skipti nú í haust. Fyrri hluti mótsins verður haldinn 16.-19. október í Reykjavík og sá síðari á Hótel Selfossi 14.-16. nóvember. 

Fyrirkomulag

Tefldar verða sjö umferðir eftir svissneska kerfinu. Tímamörk eru 90 mín. + 30. sek. viðbótartími á hvern leik.

Flokkaskipting

Teflt verður í tveimur flokkum 50 ára + (1964 og fyrr) og 65 ára + (1949 og fyrr). Þeir sem eru 65+ geta valið um í hvorum flokkum þeir tefla.  

Verði skráðir keppendur í öðrum hvorum flokknum færri en 12 verði teflt í einum flokki en engu að síður teflt um tvo Íslandsmeistaratitla

Verði tveir eða fleiri efstir og jafnir verður stigaútreikningur látinn ráða.

Dagskrá mótsins

Fyrstu fjórar umferðir mótsins verða haldnar í Reykjavík.

• 1. umf., fimmtudaginn 16. október, kl. 19
  3. umf., laugardaginn, 18. október, kl. 13
  4. umf., sunnudaginn, 19. október, kl. 13

• 4. umf., fimmtudaginn, 13. nóvember, kl. 19

Síðustu þrjár umferðir mótsins verða haldnar á Hótel Selfossi.

• 5. umf., föstudaginn, 14. nóv., kl. 19
  6. umf., laugardaginn, 15. nóv., kl. 13
  7. umf., sunnudaginn, 16. nóv., kl. 13

Tilboð frá Hótel Selfossi

 Hótel Selfoss býður keppendum upp á fæði og gistingu á eftirfarandi verði:

• Tvíréttaður hádegisverður frá 2.800- kr
• Þriggja rétta kvöldverður pr. skipti. 6.100.- kr
• Þriggja rétta hátíðarkvöldverður. 7.200.- kr.

Gisting á föstudegi     10.500 tveggja manna herbergi
                                      8.500 eins manns herbergi

Gisting á laugardegi   18.000 tveggja manna herbergi
                                   16.000 eins manns herbergi

Nánari upplýsingar og pantanir sendist í [e-mail].

Verðlaun

• Fyrstu verðlaun í hvorum flokki eru 50.000 kr. styrkur á HM eða EM öldunga
• 2.-3. verðlaun - gripir
• Einnig gripir í flokkum 70+, 75+ og 80+

Þátttökugjöld:

6.000 kr. fyrir alla. Kaffi innifalið í verði.

Skráning

www.skak.is eða hér.

Skákþáttur Morgunblaðsins: Vignir Vatnar í námunda við toppinn á HM ungmenna

Durban, Suður-Afríku 25. september

Hafgolan sveigir pálmatrén við ströndina, hvítfyssandi öldur en stórskipalægi í fjarska; svo byrjar barnakór að syngja á gangstéttinni umkringdur mannmergð og maður er kominn til Suður-Afríku. Durban, sem er vettvangur heimsmeistaramóts ungmenna 8-18 ára, þar sem Vignir Vatnar Stefánsson er eini keppandi Íslands, liggur næstum því eins langt suður frá Íslandi og hægt er að komast. Flugleiðin London-Jóhannesarborg tekur 11 klst. sem er þó varla nema eins og „ein vakt á stíminu" svo maður noti nú orðalag Stefáns Péturssonar, gamals sjómanns og föður Vignis Vatnars sem er með í för. Truflun á dægursveiflunni er þó ekki mikil; tímamismunur á Íslandi og Durban eru tvær klukkustundir. Þeir glíma við beltahrollinn sem koma frá Eyjaálfu og nærliggjandi svæðum og það er eini gallinn við skipulag þessa móts að fyrstu dagana hafa krakkarnir stundum verið látnir tefla tvær skákir á dag. Vignir Vatnar, sem er 11 ára gamall og er á fyrra ári í sínum flokki, tefldi langar og strangar morgunumferðir en brast úthald í seinni skákinni, og missti t.d. af rakinni vinningsleið snemma tafls í 6. umferð. Hann er með 4½ vinning af sjö mögulegum og við gerum okkur góðar vonir um lokasprettinn enda hefur pilturinn teflt vel.

Skákmót af þessari stærðargráðu, þar sem sem keppendur eru í kringum þúsund talsins, hefur ekki verið haldið áður í Suður-Afríku en afar vel skipulagt. Keppnin fer öll fram í einum sal í fimm stjörnu ráðstefnuhöll í miðborginni. Norðurlandaþjóðirnar eiga a.m.k einn fulltrúa á mótinu en Norðmenn, sem sigla á bylgju Magnúsar Carlsens, senda hvorki fleiri né færri en 27 keppendur til leiks. Skáksambandið leggur meiri áherslu á EM ungmenna sem hefst í Georgíu í næsta mánuði þar sem fimm íslenskir skákmenn taka þátt en kostnaður við þátttöku Vignis Vatnars er auðvitað mikill. Sameinaðir kraftar leystu málið. Vignir tefldi við gamlan kunningja frá Noregi í fimmtu umferð. Framan af var skákin í járnum en í miðtaflinu var Vignir úrræðabetri og vann með snarpri kóngssókn:

5. umferð:

Vignir Vatnar Stefánsson - Andre Nielsen

Drottningarindversk vörn

1. d4 Rf6 2. Rf3 e6 3. c4 b6 4. g3 Ba6 5. Da4 Be7 6. Bb7 Bb7 7. 0-0 0-0 8. Rc3 Re4 Dc2 Rxc3 10. Dxc3 d5

Þessi eðlilegi leikur hefur ekki gott orð á sér. Eftir 11.... c5 eða 11.... f5 á svartur að jafna taflið.

11. cxd5 exd5 12. Bf4 c5 13. Hfd1 Rc6 14. dxc5 bxc5 15. h4!?

Vignir vildi hindra framrás g-peðsins en þessi leikur nýtist vel að ýmsu öðru leyti.

15.... d4 16. Dc4 Ra5 17. Dc2 Db6 18. Hb1 Hac8 19. Bh3 Ha8 20. Re5 Hfd8 21. Kh2 f6 22. Rf3 Bxf3?

Gefur eftir hvítu reitina, 22.... c4 leit vel út en eftir 23. b4! d3 24. exd3! Bxf3 25. bxa5 Bxd1 á hvítur millileikinn 26. Dxc4+! og vinnur.

23. exf3 Bd6 24. Bd2 Hb8 25. h5 He8 26. Bf5 h6 27. He1! He5 28. Be6+ Kh8 29. Dg6 Bf8 30. Hxe5 fxe5

Hægt og bítandi hefur hvítur náð að byggja upp sterka sóknarstöðu. Nú rífur hann upp kóngsstöðuna.

31. Bxh6!

Vitaskuld ekki 31.... gxh6 32. Dg8 mát.

31.... c4 32. Bxg7+! Bxg7 33. h6 Dc7 34. Bf7

- og svartur gafst upp.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Laugardagsmogganum, 27. september 2014

Skákþættir Morgunblaðsins

[Event "World Youth Championship 2014 u12"] [Site "?"] [Date "2014.09.23"] [Round "5"] [White "Stefansson, Vignir Vatnar"] [Black "Nielsen, Andre"] [Result "1-0"] [ECO "E19"] [WhiteElo "1963"] [PlyCount "67"] [EventDate "2014.??.??"] [TimeControl "900"] 1. d4 Nf6 2. Nf3 e6 3. c4 b6 4. g3 Ba6 5. Qa4 Be7 6. Bg2 Bb7 7. O-O O-O 8. Nc3 Ne4 9. Qc2 Nxc3 10. Qxc3 d5 11. cxd5 exd5 12. Bf4 c5 13. Rfd1 Nc6 14. dxc5 bxc5 15. h4 d4 16. Qc4 Na5 17. Qc2 Qb6 18. Rab1 Rac8 19. Bh3 Ra8 20. Ne5 Rfd8 21. Kh2 f6 22. Nf3 Bxf3 23. exf3 Bd6 24. Bd2 Rab8 25. h5 Re8 26. Bf5 h6 27. Re1 Re5 28. Be6+ Kh8 29. Qg6 Bf8 30. Rxe5 fxe5 31. Bxh6 c4 32. Bxg7+ Bxg7 33. h6 Qc7 34. Bf7 1-0

Huginn efstur í hálfleik eftir sigur á TR

 

Skákfélagið Huginn er efst eftir fyrra hluta Íslandsmóts skákfélaga eftir 5-3 sigur á Taflfélagi Reykjavíkur í fimmtu umferð Íslandsmóts skákfélaga sem fram fór í dag í Rimaskóla. Huginn náði þar með forystusætinu af TR en aðeins munar hálfum vinningi. Taflfélag Vestmannaeyja er svo öðrum hálfum vinningi þar á eftir, eftir góðan 6,5-1,5 á Fjölnismönnum. Félögin þrjú hafa öll góðan möguleika á Íslandsmeistaratitlinum en síðari hlutinn fer fram í mars 2015.

 

Úrslit 5. umferðar:

No.	Team	Team	Res.	:	Res.
1	Skákfélagð Huginn a-sveit	Taflfélag Reykjavíkur	5	:	3
2	Skákfélag Íslands	Víkingaklúbburinn	3	:	5
3	Skákdeild Fjölnis	Taflfélag Vestmannaeyja	1½	:	6½
4	Skákfélag Akureyrar	Taflfélag Bolungarvíkur	3½	:	4½
5	Skákfélag Reykjanesbæjar	Skákfélagið Huginn b-sveit	4	:	4

Staðan:

1. Skákfélagið Huginn 28,5 v.
2. Taflfélag Reykjavíkur 28 v.
3. Taflfélag Vestmanneyja 27,5 v.
4. Skákdeild Fjölnis 23 v.
5. Taflfélag Bolungarvíkur 21,5 v.
6. Skákfélagið Huginn b-sveit 18 v. (5 stig)
7. Skákfélag Akureyrar 18 v. (4 stig)
8. Víkingaklúbburinn 12,5 v.
9. Skákfélag Reykjanesbæjar 12 v.
10. Skákfélag Íslands 11 v.

Sjá nánar á Chess-Results

Staða efstu liða í 2. deild:

1. Taflfélag Reykjavíkur b-sveit 16,5 v.
2. Skákdeild KR 16 v.
3. Taflfélag Garðabæjar 14,5 v.
4. Skákfélag Akureyrar b-sveit 14,5 v..

Sjá nánar á Chess-Results.

Staða efstu liða í 3. deild:

1. Taflfélag Reykjavíkur c-sveit 8 stig (18,5 v)
2. Skákfélag Selfoss og nágrennis 7 stig (14 v.)
3. Skákdeild Fjölnis b-sveit 6 stig (16 v.)

Sjá nánar á Chess-Results

Staða efstu liða í 4. deild:

1. Taflfélag Reykjavíkur d-sveit 8 stig (20,5 v.)
2. Skákfélag Sauðárkróks 6 stig (17 v.)
3. Taflfélag Garðabæjar 6 stig (15 v.)
4. Skákfélag Siglufjarðar 6 stig (13,5 v)

Sjá nánar á Chess-Results

• Heimasíða mótsins
• Chess-Results
• Myndaalbúm (GB, HÁ og ESE)

TR með 1,5 vinnings forskot á Hugin - sveitirnar mætast á morgun

Skáksveit Taflfélags Reykjavíkur hefur 1,5 vinnings forskot á Skákfélagið Huginn að lokinni fjórðu umferð Íslandsmót skákfélaga sem fram fór í kvöld í Rimaskóla

TR vann Skákfélag Reykjanesbæjar 7-1 og Skákfélagið Huginn vann Íslandsmeistara Víkingaklúbbsins með sama mun.

Skákdeild Fjölnis er í þriðja sæti 2 vinningum á eftir Hugin eftir góðan sigur á Bolvíkingum 5,5-2,5. Eyjamenn, sem gersigruðu Skákfélag Íslands, 7,5-0,5, eru fjórðu hálfum vinningi þar á eftir. Þessar sveitir virðast vera í sérflokki.

Sveitirnar mætast innbyrðis á morgun. Annars vegar mætast TR og Huginn og hins vegar mætast Fjölnir og Eyjamenn.

Taflfélag Garðabæjar er í forystu í 2. deild. TR-c og TR-d eru svo efstar í 3. og 4. deild

Staðan í 1. deild:

1. Taflfélag Reykjavíkur 25 v.
2. Skákfélagið Huginn 23,5 v.
3. Skákdeild Fjölnis 21,5 v.
4. Taflfélag Vestmannaeyja 21 v.
5. Taflfélag Bolungarvíkur 17 v.
6. Skákfélag Akureyrar 14,5 v
7. Skákfélagið Huginn b-sveit 14 v.
8. Skákfélag Íslands 8 v.
9. Skákfélag Reykjanesbæjar 8 v.
10. Víkingaklúbburinn 7,5 v

Sjá nánar á Chess-Results

Staða efstu liða í 2. deild:

1. Taflfélag Garðabæjar 13 v.
2. Taflfélag Reykjavíkur b-sveit 12 v.
3. Vinaskákfélagið 11 v.
4. Skákfélag Akureyrar 11 v.

Sjá nánar á Chess-Results.

Staða efstu liða í 3. deild:

1. Taflfélag Reykjavíkur c-sveit 6 stig (13,5 v.)
2. Skákfélag Selfoss og nágrennis 5 stig (10 v.)
3. Ungmennasamband Borgarfjarðar 4 stig (12 v.)
4. Skákdeild Fjölnis b-sveit 4 stig (12 v.)
5. Skákdeild KR b-sveit 4 stig (12 v.)

Sjá nánar á Chess-Results

Staða efstu liða í 4. deild:

1. Taflfélag Reykjavíkur d-sveit 6 stig (16,5 v)
2. Skákfélag Siglufjarðar 6 stig (12 v.)
3. Skákgengið 4 stig (13 v.)

Sjá nánar á Chess-Results

• Heimasíða mótsins
• Chess-Results