Gríðarleg spenna í Bikarsyrpunni

Á morgun fer fram síðasta umferð í Bikarsyrpunni hjá Taflfélagi Reykjavíkur. Mótið er sérsniðið fyrir unga og efnilega skákmenn og gefur þeim færi á að ná sér í mikilvæga keppnisreynslu. Fyrir síðustu umferð eru fjórir keppendur efstir og jafnir og tefla innbyrðis í lokaumferðinni!

Efstir og jafnir eru TR-ingarnir Guðmundur Agnar Bragason, Mikhailo Kravchuk og Aron Þór Mai ásamt Óskari Víkingi Davíðssyni úr Hugin. Þessir knáu piltar eru með 3.5 vinning af fjórum mögulegum.

Í lokaumferðinni sem fram fer á morgun kl. 17.30 mætast Óskar Víkingur og Mikhailo meðan Aron Þór teflir við Guðmund Agnar.

Keppendur eru alls 33 í mótinu sem er núme tvö í syrpunni. Mikhailo Kravchuk varð sigurvegari í fyrsta mótinu.

Upplýsingar um einstök úrslit og stöðu má nálgast á Chess-Results

 

Henrik og Lenka að tafli í Danmörku

Tveir af okkar sterkustu skákmönnum sitja nú að tafli í Koge í Danmörku. Henrik tekur þátt í nokkuð sterkum opnum flokk þar sem 8 stórmeistarar eru mættir til leiks auk fjölda titilhafa. Henrik er 6. í stigaröðinni og hefur byrjað nokkuð traust með 2,5 vinning af 3. Henrik lagði fyrst FIDE Meistarann David Bekker-Jensen (2278) eftir slæma yfirsjón þess danska. Í 2. umferð gerði Henrik stutt jafntefli við stigahæsta keppenda mótsins, Vladimir Baklan (2656). Í þriðju umferðinni lá stigalár keppandi í valnum og Henrik situr í 1-7. sæti.

Opni flokkurinn

Lenka teflir í lokuðum kvennaflokki og er fjórði stigahæsti keppandinn. Í fyrstu umferð beið Lenka lægri hlut fyrir hinni vaxandi Ellinor Frisk (2311). Frisk þessi átti gott Ólympíumót og náði sér m.a. í borðaverðlaun.

Lenka lét þetta ekki á sig fá og vann í 2. umferð sem og 3. umferð gegn sterkum keppendum. Hin rússneska Lidia Tomnikova (2240) lá í 2. umferð og svo lagði Lenka stigahæsta keppandann, Ninu Maisuradze (2349) og er jöfn ásamt öðrum í 2. sæti með 2 vinninga en Ellinor Frisk leiðir með 2,5 vinning.

Kvennamótið

Caruana tapar aftur - Gríðarlega jafnt mót

Eftir mikla siglingu virðist allur vindur úr seglum Fabiano Caruana sem hefur nú aðeins fengið 1/2 vinning úr síðustu þremur skákum. Honum til happs er mótið þó mjög jafnt og allir eru að vinna alla. Boris Gefland fékk líka skell í dag og því eru nú sex efstir með 5 vinninga að loknum 9 umferðum.

Ítarlega umfjöllun má finna á Hrokurinn.is en þar er m.a. fjallað um stigabaráttu Caruana og Carlsen og ljóst að Norðmaðurinn andar léttar en fyrir nokkrum dögum!

Haustmóti Skákfélags Akureyrar lokið

Haustmóti S.A. lauk í dag. Fyrir umferðina var ljóst að Símon Þórhallsson yrði efstur að vinningum en tveir skákmenn voru þó í stöðu til að ná honum með sigri þar sem Símon sat yfir. Sigurði Arnarsyni mistókst að hafa sigur gegn nafna sínum Eiríkssyni og því kom það í hlut Jóns Kristins Þorgeirssonar að ná Símoni á toppnum en hann fékk vinning gegn Ulker Gasanovu.

Gaman að sjá ungu strákana í örri framför á Akueyri og Símon hækkar ríflega á stigum fyrir árangurinn.

Jón Kristinn hafði örlítið betur á stigum (tie-break) og telst því í efsta sæti.

 

Lokastaðan:

Rk.	SNo		Name	FED	Rtg	Pts.	TB1	TB2	TB3
1	4		Thorgeirsson Jon Kristinn	ISL	1844	6.5	25.75	0.0	6
2	5		Thorhallsson Simon	ISL	1588	6.5	21.75	0.0	6
3	1		Arnarson Sigurdur	ISL	2030	6.0	23.00	0.0	5
4	9		Eiriksson Sigurdur	ISL	1939	5.0	16.00	0.0	4
5	2		Bjorgvinsson Andri Freyr	ISL	1646	4.0	12.50	0.0	3
6	3		Haraldsson Haraldur	ISL	2001	3.0	9.25	0.0	2
7	7		Steingrimsson Karl Egill	ISL	1663	3.0	6.50	0.0	3
8	8		Hallberg Kristjan	SWE	0	2.0	6.00	0.0	1
9	6		Gasanova Ulker	ISL	1615	0.0	0.00	0.0	0

 

Chess-Results

Skákþáttur Morgunblaðsins: Hörð barátta fram undan á Íslandsmóti skákfélaga

Fjölmennasta og sennilega vinsælasta keppni skákhreyfingarinnar, Íslandsmót skákfélaga hófst í Rimaskóla á fimmtudagskvöldið með keppni í 1. deild þar sem 10 skákfélög heyja baráttu um Íslandsmeistaratitilinn. Reikna má með að 400 skákmenn sitji að tafli í Rimaskóla um helgina í hinum ýmsu deildum en almennt er búist við harðri keppni um efstu sætin milli Taflfélags Reykjavíkur, Hugins, Taflfélags Vestmannaeyja og Skákfélags Bolungarvíkur. 40 ár eru liðin frá fyrsta Íslandsmótinu sem hófst á Akureyri haustið 1974 með viðureign Taflfélags Reykjavíkur og Skákfélags Akureyrar.

Vignir í 36. sæti á HM ungmenna í Durban

Vignir Vatnar Stefánsson varð í 36. sæti af 104 þátttakendum í flokki 12 ára og yngri á heimsmeistaramóti ungmenna sem lauk í Durban í Suður-Afríku á mánudaginn. Vignir hlaut 6 vinninga af 11 mögulegum en hann var á yngra ári í flokknum. Sigurvegarar dreifðust á fjölmargar þjóðir en einungis Indverjar fengu sigurvegara í fleiri en einum flokki. Vignir hefur ávallt verið með vinningshlutfall yfir 50% á stóru mótunum, EM og HM, og tekur þátt í Evrópumótinu sem hefst í Batumi í Georgíu í lok þessa mánaðar. Aðrir þátttakendur Íslands þar verða eru Oliver Aron Jóhannesson, Dagur Ragnarsson, Símon Þórhallsson og Gauti Páll Jónsson.

Anand til alls líklegur i Sotsj í

Þann 7. nóvember nk. hefst í Sotsjí við Svartahaf einvígi Magnúsar Carlsen og Viswanathan Anand um heimsmeistaratitilinn. Sömu keppendur og í fyrra - en breytt hlutverk. Tefldar verða 12 skákir og verði jafnt er gripið til styttri skáka. Þó að Magnús verði að teljast sigurstranglegri hefur Anand nánast gengið í endurnýjun lífdaga á þessu ári; hann vann áskorendakeppnina í mars og á fjögurra manna skákmóti í Bilbao á Spáni á dögunum varð hann efstur í keppni fjögurra manna. Gefin voru 3 stig fyrir sigur og eitt fyrir jafntefli. Anand, sem tapaði fyrir Aronjan í lokaumferðinni, hlaut 11 stig (4 vinninga), Aronjan kom næstur með 10 stig (einnig 4 vinninga) og Ponomariov og Spánverjinn Vallejo Pons hlutu báðir 5 vinninga. Það er miklu meiri kraftur og léttleiki í taflmennsku Anands en í mörg undanfarin ár og hann er því til alls líklegur í Sotsjí eftir mánuð:

Bilbao 2014; 4. umferð:

Viswanathan Anand - Vallejo Pons

Drottningarbragð

1. d4

Það er ekki ósennilegt að Anand velji drottningarpeðsbyrjanir sem sitt aðalvopn með hvítu gegn Magnúsi Carlsen.

1. ... d5 2. c4 dxc4 3. e4 Rc6 4. Rf3 Bg4 5. d5 Re5 6. Bf4 Rg6 7. Be3 e5 8. Bxc4 Rf6 9. Rc3 a6 10. Be2 Bd6 11. Rd2 Bxe2 12. Dxe2 O-O 13. O-O De7 14. Hfd1 Hac8 15. g3 h6 16. Hac1 c6 17. Rc4

Anand hefur gert lítið annað en að fylgja góðum reglum um liðsskipan og hefur náð traustu frumkvæði.

17. ... cxd5 18. Rxd5 Rxd5 19. Hxd5 Bc5 20. Hcd1 Bxe3 21. Rxe3 Db4 22. Rf5!

Ólíkt hafast þeir að riddararnir, sá á g6 á fárra kost vel á meðan þessi er stórhættulegur.

22. ... Hc4 23. Rd6 Hc6 24. a3 Db3 25. H5d3 Db6 26. Rf5 He8 27. Hd7!

Hindrar 27. ...Re7 og undirbýr framrás h-peðsins.

27. ... Hf6 28. Dg4 Dc6 29. h4 h5

Það er fátt sem annað svartur getur aðhafst.

30. Dxh5 Dxe4 31. Hd8! Dc6

32. Dg5!

Einfaldur leikur sem aftur hótar 33. h5. Svartur er varnarlaus.

32. ... De6 33. H1d6

- og svartur gafst upp.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Laugardagsmogganum, 4. október 2014

Skákþættir Morgunblaðsins

[Event "Bilbao Masters"] [Site "Bilbao ESP"] [Date "2014.09.18"] [EventDate "2014.09.12"] [Round "4"] [Result "1-0"] [White "Viswanathan Anand"] [Black "Francisco Vallejo-Pons"] [ECO "D20"] [WhiteElo "2785"] [BlackElo "2712"] [PlyCount "65"] 1. d4 d5 2. c4 dxc4 3. e4 Nc6 4. Nf3 Bg4 5. d5 Ne5 6. Bf4 Ng6 7. Be3 e5 8. Bxc4 Nf6 9. Nc3 a6 10. Be2 Bd6 11. Nd2 Bxe2 12. Qxe2 O-O 13. O-O Qe7 14. Rfd1 Rac8 15. g3 h6 16. Rac1 c6 17. Nc4 cxd5 18. Nxd5 Nxd5 19. Rxd5 Bc5 20. Rcd1 Bxe3 21. Nxe3 Qb4 22. Nf5 Rc4 23. Nd6 Rc6 24. a3 Qb3 25. R5d3 Qb6 26. Nf5 Re8 27. Rd7 Rf6 28. Qg4 Qc6 29. h4 h5 30. Qxh5 Qxe4 31. Rd8 Qc6 32. Qg5 Qe6 33. R1d6 1-0

Milljónamótið - Dagur með jafntefli við stórmeistara

Dagur Arngrímsson er að standa sig best íslensku keppendanna í opnum flokki á Milljónamótinu í Las Vegas. Dagur gerði jafntefli við stórmeistara í þriðja skiptið í þessu móti, að þessu sinni Ruben Felger frá Argentínu. Guðmundur Kjartansson gerði jafntefli við Kazim Gulamali en Björn Þorfinnsson vann sína skák. Íslensku keppendurnir hafa nú allir 3,5 vinning af 6 mögulegum.

Ólafur Kjartansson tapaði í sínum flokki og sömu sögu er að segja af Hermanni Aðalsteinssyni. Hermann hefur 3,5 vinning en Ólafur 3 vinninga.

Keppni heldur áfram klukkan 18:00 og á morgun fer fram svokallaður "Millionaire Monday" þar sem efstu keppendur keppa um gull og græna skóga.

Róðurinn verður þungur en allir fá Íslendingarnir erfiða andstæðinga í 7. umferðinni.

 

• Staðan
  
  
• Beinar útsendingar

• Chess-Results

• U1600 staða/pörun (Hermann)

• U2200 staða/pörun (Ólafur Kj.)

 

Milljónamótið - Úrslit 5. umferðar

Úrslit 5. umferðar samkvæmt upplýsingum frá Ólafi Kjartanssyni eru eftirfarandi:

Björn tapaði fyrir Hvít-Rússanum Sergey Azarov (2639) en Dagur gerði jafntefli við Kúbverjann Ortiz Suarez (2611). Guðmundur Kjartansson lagði Sam Schmakel (2305).

Ólafur lagði að velli Arhtur Guo (2050) og Hermann knésetti Pedro Casillas (1451) .

6. umferð hefst klukkan 01:00. Wesley So, Yu Yangyi og Daniel Naroditski leiða mótið en þeir hafa aðeins misst hálfan vinning hver.

 

• Staðan
  
  
• Beinar útsendingar

• Chess-Results

• U1600 staða/pörun (Hermann)

• U2200 staða/pörun (Ólafur Kj.)

Spenna á Haustmóti S.A.

Skákfélag Akureyrar heldur sitt Haustmót líkt og Taflfélag Reykjavíkur. Þegar einni umferð er ólokið er spennan þó nokkur á toppnum í jöfnu móti.

Fyrir síðustu umferð leiðir Símon Þórhallsson með 6,5 vinning af 8 mögulegum og hefur farið mikinn enda er hann að hagnast um heil 75 elóstig fyrir frammistöðuna.

Skammt undan eru þeir Sigurður Arnarson og Jón Kristinn Þorgeirsson með 5,5 vinning en þeir geta báðir náð Símoni þar sem Símon situr hjá í síðustu umferð. 

Sigurður verður að leggja nafna sinn Eiríksson til að ná Símoni en Jón Kristinn þarf að leggja Ulker Gasanovu til að jafna þáá toppnum. Möguleiki er því að þrír keppendur verði efstir og jafnir.

Síðasta umferðin fer fram á morgun, sunnudag og hefst klukkan 13:00.

Chess-Results

Þrír efstir í Bikarsyrpu TR eftir þrjár umferðir

Um helgina er í fullum gangi annað mótið í Bikarsyrpu Taflfélags Reykjavíkur. Alls eru 33 hressir og skemmtilegir krakkar mættir til leiks til að glíma á reitunum 64.

Þrem umferðum er lokið en fjóra umferðin fer fram snemma á sunnudeginum og sú síðasta á mánudeginum. Eftir þessar þrjár umferðir eru þrír keppendur með fullt hús. 

Þetta eru þeir Guðmundur Agnar Bragason, Alec Elias Sigurðarson og Óskar Víkíngur Davíðsson. Skammt á eftir þeim koma Mykhaylo Kravchuk og Aron Thor Mai með 2.5 vinning. Mykhaylo varð sigurvegari á fyrsta mótinu.

Fjörið heldur áfram á morgun og er þetta mót skemmtileg nýbreytni en þarna fá yngri skákmenn tækifæri í lengri skákum gegn sínum jafnöldrum. Bikarsyrpan fer fram í Skákhöllinni Faxafeni 12 en mikið verður um að vera því Haustmót T.R. heldur einnig áfram á morgun.

Úrslit eru á Chess-Results

Hvíldardagur í Baku

Nú er lokið 8 umferðum af 11 á Grand Prix mótinu í Baku. Framundan er spennandi lokasprettur en mikilvægt er að eiga gott mót þar sem allir keppendur munu taka þátt í þremur mótum í mótaröðinni og gilda þau öll samanlagt. Tveir efstu í mótaröðinni vinna sér svo rétt á næsta Áskorendamót.

Þeir Fabiano Caruana og Boris Gelfand leiða með 5 vinninga eftir þessar 8 umferðir. Caruana byrjaði frábærlega og var einn í forystu með 4.5 vinning af 6 og hélt áfram að hala inn elóstigum. Þegar þarna var komið við sögu var hann aðeins 12 stigum á eftir Magnus Carlsen. 

Þá dundi ógæfan við og Caruana tapaði mjög óvænt fyrir Dmitri Andreikin sem hafði átt afleitt mót fram að þessu. Með tapinu endaði 27 skáka hrina þar sem Caruana annahvort vann, gerði auðvelt jafntefli eða vann næstum því og gerði jafntefli. Hann semsagt tapaði engri skák á þessu tímabili. Eftir jafntefli í 8. umferð við Rustam Kazimdzhanov er munurinn aftur orðið 21 stig.

Hvað gerist í framhaldinu? Klárar Caruana mótið eða missir hann flugið?

Skákirnar hefjast snemma eða fyrir hádegi að íslenskum tíma og hægt er að fylgjast með á ICC, Chess24 og ChessBomb ásamt eflaust fleiri stöðum.

Chess24 (velja Baku)

ChessBomb