Þriðja mót Bikarsyrpu TR

Bikarsyrpa Taflfélags Reykjavíkur er nýjung í mótahaldi á Íslandi. Syrpan samanstendur af nokkrum kappskákmótum og er ætluð börnum á grunnskólaaldri (fædd 1999 og síðar) sem ekki hafa náð 1600 skákstigum. Þar með gefst þeim tækifæri til að næla sér í alþjóðleg skákstig á skákmótum sem sérhönnuð eru fyrir þau.

Þriðja mótið í syrpunni hefst föstudaginn 13. febrúar og stendur til mánudagsins 16. febrúar. Tefldar eru 5 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo við leggjum ætíð áherslu á að krakkarnir vandi sig og noti tímann vel, þá má gera ráð fyrir að margar skákir taki mun styttri tíma.

Mótið er sérstaklega hugsað fyrir krakka sem hafa sótt skákæfingar Taflfélagsins (og/eða annarra taflfélaga) reglulega síðastliðinn vetur eða lengur. Það er gott að byrja sem fyrst að keppa á kappskákmótum, en hingað til hefur þeim krökkum sem vilja tefla á “alvöru mótum” mestmegnis staðið til boða að taka þátt í opnum mótum. Þar er styrkleikamunurinn oft mikill, mótin taka langan tíma, auk þess sem marga krakka óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því.

Einungis börn og unglingar á grunnskólaaldri sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og krakkarnir njóta þess betur að tefla kappskákir. Tímamörkin eru líka styttri, og henta krökkunum betur en langar 90 mínútna skákir sem tíðkast á venjulegum kappskákmótum. Mótið uppfyllir öll skilyrði Alþjóða skáksambandsins FIDE og er reiknað til alþjóðlegra skákstiga sem gott er að byrja að safna snemma. Eins og á aðra viðburði félagsins þá er frítt í mótin fyrir krakka í Taflfélagi Reykjavíkur. Fyrir krakka í öðrum taflfélögum er þátttökugjaldið 1000 krónur fyrir hvert mót Bikarsyrpunnar.

Dagskrá:
1. umferð 17.30 á föstudegi (13. febrúar)
2. umferð 10.30 á laugardegi (14. febrúar)
3. umferð 14.00 á laugardegi (14. febrúar)
4. umferð 10.30 á sunnudegi (15. febrúar)
5. umferð 14.00 á sunnudegi  (15. febrúar). (Lokaumferð + verðlaunaafhending).

Sigurvegari fyrsta móts Bikarsyrpunnar var TR-ingurinn Mykhaylo Kravchuk og TR-ingurinn Aron Þór Mai sigraði á öðru mótinu.

Skráning fer fram á heimasíðu Taflfélags Reykjavíkur.
Vinsamlegast skráið þátttakendur sem fyrst, það hjálpar við undirbúning mótsins!  Skráðir keppendur.

Stefnt er að því að Bikarsyrpan samanstandi af fjórum mótum í vetur. Bikarar og medalíur eru í verðlaun fyrir efstu sætin í hverju
 móti, en auk þess verða veitt sérstök verðlaun fyrir samanlagðan árangur á mótunum.

Hlökkum til að sjá ykkur!

• Bikarsyrpa #1
• Bikarsyrpa #2

Guðmundur með góða frammistöðu í Gíbraltar - nálgast 2500 skákstig

Guðmundur Kjartansson (2484) stóð sig afar vel á Gíbraltar-mótinu sem lauk í dag. Guðmundur gerði tvö góð jafntefli í lokaumferðunum tveimur og endaði með 6 vinninga í 10 umferðum og hækkaði um sjö stig fyrir frammistöðuna. Hann vantar því aðeins 9 stig í 2500 skákstigin sem eru honum nauðsynleg til að verða stórmeistari. 

Í lokaumferðunum tveimur gerði Gummi jafntefli við Ju Wenjun (25479 eina sterkustu skákkonu heims og við rúmenska stórmeistarann Ioan-Cristian Chirila (2548).

Flott frammistaða hjá Gumma. Slæmur kafli um miðbiki mótsins en hann vann sig vel út úr því í lokaumferðunum.

Hannes Hlífar Stefánsson (2573) hlaut 5 vinninga. Hann átti góða byrjun en missti dampinn um miðbik mótsins, þ.e. eftir að hann tók sér yfirsetu (bye) í sjöttu umferð. Hann lækkar um 13 stig. 

Magnús Kristinsson (1744) hlaut 4 vinninga eftir frábæran endasprett. Hann hækkar um 26 stig fyrir frammistöðuna. Dóttir hans, Veronika Steinunn (1566), átti líka góðan endasprett og endaði með 2,5 vinning. Hún hækkar um 5 stig fyrir frammistöðuna.

Hikaru Nakamura (2776) sigraði á mótinu en hann hlaut 8,5 vinning. David Howell (2670) varð annar með 8 vinninga. 

Alls tóku 253 skákmenn þátt frá 46 löndum þátt í efsta flokki mótsins. Þar af voru 72 stórmeistarar. Hannes var nr. 40 í stigaröð keppenda en Guðmundur var nr. 82.

• Heimasíða mótsins
• Beinar útsendingar (hefjast kl. 14)
• Skákskýringar

Naiditsch vann Carlsen - aftur!

Þjóðverjinn geðþekki, Arkadij Naiditsch (2706) vann heimsmeistarann Magnus Carlsen (2866) í þriðju umferð GRENKE-mótins í Baden Baden í dag. Athyglisvert ekki síst í ljósi að Naiditsch vann Carlsen einnig á ólympíuskákmótinu í Tromsö. Carlsen tefldi djarft í dag - fórnaði manni fyrir óljósar bætur. Heimsmeistarinn náði síðar góðri stöðu en tefdli ónákvæmt í endataflinu og laut í gras.

Caruana (2811) vann Aronian (2777) og er efstur með 2 vinninga ásamt Þjóðverjanum geðþekka.

• Heimasíða mótsins
• Beinar útsendingar (Chess24)

 

Skákkeppni vinnustaða fer fram miðvikudaginn 11. febrúar

 

Taflfélag Reykjavíkur býður öllum vinnustöðum að taka þátt íSkákkeppni vinnustaða 2015 sem fram fer í félagsheimili T.R., Skákhöllinni Faxafeni 12, miðvikudaginn 11. febrúar og hefst kl. 19.30.  Mótið, sem er styrktarmót Taflfélags Reykjavíkur,  er kjörið fyrir hinn almenna skákáhugamann þar sem vinnufélagar geta myndað lið og spreytt sig gegn skákmönnum annarra vinnustaða.

Dagsetning

Miðvikudagur 11. febrúar kl. 19.30

Staður

Taflfélag Reykjavíkur, Faxafeni 12

Keppnisfyrirkomulag

Þriggja manna lið með 1-2 varamönnum
Vinnustaður getur sent nokkur lið til keppni sem verða þá auðkennd sem A-lið, B-lið o.s.frv.
Svissneskt pörunarkerfi og flestir vinningar gilda
7-11 umferðir (bundið þátttöku)
Umhugsunartími er 10 mínútur á mann

Verðlaun

1. Eignabikar fyrir vinnustaðinn og farandbikar til vörslu í 1 ár auk verðlaunapeninga fyrir keppendur
2. Eignabikar fyrir vinnustaðinn auk verðlaunapeninga fyrir keppendur
3. Eignabikar fyrir vinnustaðinn auk verðlaunapeninga fyrir keppendur

Þátttökugjald

15.000 kr fyrir hvert lið

Nánari upplýsingar

Ríkharður Sveinsson, stjórnarmaður í Taflfélagi Reykjavíkur. Netfang:[e-mail] gsm: 7722990.

Skráning og staðfesting þátttöku

Skráning fer fram á heimasíðu Taflfélags Reykjavíkur

Þátttökugjaldið greiðist inn á reikning Taflfélags Reykjavíkur. Reikningsnúmer: 0101-26-640269. Kennitala: 640269-7669. Vinsamlegast setjið í skýringu: VINNUST

Verið velkomin að taka þátt í Skákkeppni vinnustaða 2015 – hlökkum til að sjá ykkur!

Nýtt fréttabréf SÍ

Nýtt Fréttabréf SÍ kom út í gær. Meðal efnis í Fréttabréfinu er:

• GAMMA aðalstyrktarðili Reykjavíkurskákmótsins
• Friðrik heiðursborgari Reykjavíkur
• Reykjavíkurborg styður Skáksamband Íslands
• Valgerður, Nansý, Freyja og Elsa Kristín Íslandsmeistarar stúlkna
• Rimaskóli og Smáraskóli Íslandsmeistarar stúlknasveita
• Jón Viktor skákmeistari Reykjavíkur
• NM í skólaskák
• Tómas Veigar sigraði á Janúarmóti Hugins
• Reykjavíkurskákmótið 2015 - Nýjustu skráningar
• Mót á döfinni

Fréttabréfið má nálgast hér.

Hægt er að skrá sig fyrir Fréttabréfinu sem kemur að jafnaði út tvisvar á mánuði yfir vetrarmánuðina ofarlega á vinstri hluta Skák.is.

Eldri fréttabréf má nálgast hér.

Björgvin og Guðfinnur í sérflokki í Ásgarði

Það var þó nokkur atgangur í Ásgarði í gær þar sem 29 heiðursmenn börðust við skákborðin. Tveir vígamenn reyndust áberandi vígfimari en aðrir í gær en það voru þeir Björgvin Víglundsson sem fékk 10 vinninga eða fullt hús og Guðfinnur R Kjartansson með 9 vinninga. Guðfinnur tapaði aðeins fyrir sigurvegaranum Björgvini.

Jafnir í þriðja til fjórða sæti urðu þeir Stefán Þormar og Valdimar Ásmundsson með 6,5 vinning.

Síðan kemur miðjumoðið þar sem aðeins einn vinningur skilur að fimmta sæti (6 vinningar) og það nítjánda (5 vinningar).

Þetta má allt  sjá  nánar á meðf. töflu og myndir frá ESE

Guðmundur með sigur í dag í Gíbraltar

Guðmundur Kjartansson (2484) hefur 5 vinninga að loknum átta umferðum á Gíbraltar-mótinu. Eftir góða byrjun kom smá hiksti um miðbikið en vonandi eigum við von á góðum endaspretti hjá Gumma eins og svo oft áður. Í lokaumferðinni mætir hann kínversku stúlkunni Wenjun Ju (2547) sem er fimmta stigahæsta skákkona heims.

Hannes Hlífar Stefánsson (2473) hefur 4,5 vinning. 

Magnús Kristinsson (1744) hefur 2 vinning og dóttir hans Veronika Steinunn (1566) hefur ekki náð sér á strik.

Hikaru Nakamura (2776) er efstur með 7,5 vinning. Í 2.-4. sæti með 6,5 vinning eru Dawid Howell, Daniel Naroditsky (2622), sem verður meðal keppenda á Reykjavíkurskákmótinu og Axel Bachmann (2629) sem hefur aðeins tapað einni skák, þ.e. gegn Guðmundi! 

Alls taka 253 frá 46 löndum þátt í efsta flokki mótsins. Þar eru 72 stórmeistarar. Hannes er nr. 40 í stigaröð keppenda en Guðmundur er nr. 82.

• Heimasíða mótsins
• Beinar útsendingar (hefjast kl. 14)
• Skákskýringar

Carlsen byrjar best í Baden-Baden

Heimsmeistarinn í skák, Magnus Carlsen (2865), byrjar best allra á GRENKE-mótinu sem hófst í gær í Baden-Baden í gær. Magnús vann í dag Englendinginn Mickey Adams (2738) en öllum hinum skákunum sjö í fyrstu umferðunum tveimur hefur lokið með jafntefli.

Átta skákmenn taka þátt í mótinu. Auk Carlsen og Adams má finna Caruana (2820), Anand (2797), Aronian (2797) meðal annarra á keppendalistanum.

• Heimasíða mótsins
• Beinar útsendingar (Chess24)

 

Reykjavíkurmót grunnskólasveita fer fram á mánudag

Reykjavíkurmót grunnskólasveita í skák 2015 fer fram mánudaginn 9. febrúar n.k. og hefst kl.17.

Tefldar verða 7 umferðir með 10 mín. umhugsunartíma á skák. Allar sveitirnar keppa í einum opnum flokki, og veitt verða verðlaun fyrir þrjár efstu sveitirnar sem og þrjár efstu stúlknasveitirnar. Hver sveit skal skipuð fjórum nemendum frá hverjum skóla auk 1-4 varamanna.

Hverjum skóla er heimilt að senda fleiri en eina sveit til þátttöku og skal þá sterkasta sveitin nefnd A, sú næststerkasta B, o.s.frv. Sigursveitin verður Reykjavíkurmeistari grunnskólasveita 2015 og hlýtur farandbikar til vörslu í eitt ár. Mótið hefst, sem áður segir, kl. 17 og lýkur um kl. 20. Verðlaunaafhending verður strax að móti loknu.

Sveitakeppni grunnskóla í Reykjavík er haldin í samvinnu Taflfélags Reykjavíkur og Skóla-og frístundasviðs Reykjavíkur og fer keppnin fram í félagsheimili Taflfélags Reykjavíkur að Faxafeni 12.

Mikilvægt er að skólarnir sendi fylgdarmann með sínu liði, keppendum til halds og trausts.

Þátttaka tilkynnist til skrifstofu Skóla og frístundasviðs eða á[e-mail] Einnig er hægt að senda skráningu á [e-mail] eigi síðar en föstudaginn 6. febrúar.

Ekki verður hægt að skrá lið á mótsstað.

Þátttökurétt hafa eingöngu nemendur í grunnskólum Reykjavíkur.

Hraðskákmót Reykjavíkur fer fram á sunnudaginn

Hraðskákmót Reykjavíkur verður haldið í félagsheimili Taflfélags Reykjavíkur að Faxafeni 12 sunnudaginn 8. febrúar kl. 14.

Tefldar verða 11 umferðir með tímamörkunum 3+2 (3 mínútur auk 2 sekúndna viðbótartíma eftir hvern leik).

Þátttökugjald er kr 500 fyrir 16 ára og eldri en frítt fyrir 15 ára og yngri. Skráning fer fram á skákstað.

Þrenn verðlaun í boði.

Eftir Hraðskákmótið fer fram verðlaunaafhending fyrir Skákþing Reykjavíkur 2015.

Núverandi hraðskákmeistari er Róbert Lagerman.

• Hraðskákmeistarar Reykjavíkur
• Lokastaða Skákþings Reykjavíkur 2015