Joshua og Anton Breki verðlaunaðir á lokaskákæfingu Fjölnis 2014 - 2015

Bekkjarbræðurnir Joshua Davíðsson og Anton Breki Óskarsson í 4. bekk Rimaskóla hlutu afreks-og æfingabikar skákdeildar Fjölnis sem afhentir voru á lokaæfingu skákdeildarinnar miðvikudaginn 29. apríl. Mikil aðsókn hefur verið á allar skákæfingar vetrarins og þátttakendur alltaf á bilinu 25 - 35. 

Helgi Árnason formaður skákdeildar Fjölnis afhenti hina árlegu afreks-og æfingabikara. Joshua fékk afreksbikarinn líkt og í fyrra. Frammistaða hans á æfingunum og á Íslandsmótum hefur verið árangursrík. Hann varð í 1. - 3. sæti á Íslandsmóti barna og var í A sveit Rimaskóla sem vann ótal sigra í vetur, Jólamót SFS og TR, Reykjavíkurmót grunnskóla og Íslandsmót grunnskóla. Anton Breki Óskarsson hefur að mati dómnefndar (HÁ og HÓl) tekið mestum framförum allra í vetur auk þess að mæta á allar æfingar vetrarins. Anton Breki er í sveit Rimaskóla sem vann Íslandsmeistaratitilinn í flokki 1. - 4. bekkjar á Íslandsmóti barna í apríl sl. Svo skemmtilega vildi til að á lokaæfingu Fjölnis urðu þeir Joshua og Anton Breki efstir og jafnir 35 keppenda. Skákmótin á æfingum Fjölnis eru afar vinsæl enda alltaf keppt um fjölda vinninga og dregið í happadrætti. Þeir Dagur Ragnarsson, Oliver Aron og Jón Trausti hafa séð um kennslu á flestum æfingum og tekist vel upp. .

Bragi kom sá og sigraði í Stangarhyl í gær

Bragi Halldórsson var sterkastur í Stangarhyl í gær þar sem tuttugu og fimm heldri skákmenn skemmtu sér við skákborðin. Björgvin Víglundsson var sá eini sem náði að vinna kappann. Bragi fékk 9 vinninga af tíu mögulegum. Björgvin varð í öðru sæti með  8 ½  vinning, hann tapaði fyrir Jóhanni Erni og gerð jafntefli við Jón Úlfljótsson. Jóhann Örn Sigurjónsson varð svo í þriðja sæti með 7 vinninga.

Þetta er orðinn býsna sterkur og skemmtilegur skákklúbbur þar sem menn skemmta sér við að drepa mann og annan.

Garðar formaður okkar sá um skákstjórn í gær. 

Nánari úrslit má sjá í töflu og myndir frá ESE

Velheppnaðar skákbúðir Fjölnis í Vatnaskógi 30. apríl og 1. maí

Það voru 27 skákkrakkar á aldrinum 8 - 15 ára sem tóku þátt í Sturlubúðum í Vatnaskógi, skákbúðum Fjölnis í samstarfi við Skákakademíu Reykjavíkur og Skákskóla Íslands. Þetta var í annað skipti sem krakkarnir lögðu af stað í Vatnaskóg en eins og skákmönnum er í fersku minni þá varð skelfilegt óhapp í fyrri ferðinni þegar rútunni hvolfdi í flughálku í brattri brekku. Nú átta vikum síðar var hópurinn mættur í skóginn og þar beið krakkanna frábær tveggja daga dvöl frá fyrstu mínútu til þeirrar síðustu. Tíminn í Vatnaskógi var velnýttur til skákkennslu og þar fóru þau Hannes Hlífar, Stefán Bergsson og Lenka Ptacnikova á kostum og héldu krökkunum vel við efnið í allt að tvær klukkustundir í senn. Frjálsi tíminn á milli skákæfinga var líka vel þeginn því þú þustu krakkarnir í leik í íþróttahúsinu þar sem hoppukastali, borðtennis, þytborðspil, pool og boltaleikir voru í boði.

Aðstaðan í Vatnaskógi er alveg frábær til gistingar og í matar-og kaffitímum er boðið upp á fullt borð kræsinga. Um kvöldið var farið í bingó sem fararstjórarnir Helgi Árnason formaður skákdeildarinnar og Hjalti Magnússon foreldri stjórnuðu og buðu upp á fjölda vinninga. Bingóin hjá Fjölni eru bæði hefðbundin og óhefðbundin til skiptis sem gera þau ótrúlega skemmtileg og spennandi. Eftir kennslustund síðari dagsins lauk skákbúðunum með glæsilegu GÓU-skákmóti þar sem átta glæsileg páskaegg frá Helga í Góu voru í verðlaun. Stefán Bergsson stjórnaði mótinu og grunnskólameistararnir úr Rimaskóla þeir Jóhann Arnar Finnsson og Joshua Davíðsson urðu þar í efstu sætum. Hilmir Arnarson Íslandsmeistari með Rimaskóla 10 ára og yngri og Ágúst Ívar Árnason sem var í bestu E sveit Íslandsmóts barnaskólasveita með Rimaskóla urðu í næstu sætum. Aðrir verðlaunahafar voru þau Kristján Dagur sem leiðir sveit Langholtsskóla, yngsti þátttakandinn Adam Ómarsson, Ylfa Ýr Welding skákdrottning Foldaskóla og Arnór Gunnlaugsson enn einn Rimaskóla- Íslandsmeistarinn frá Íslandsmóti barnaskólasveita í 1. - 4. bekk. Veðrið lék við skákbúðarkrakka sem mynduðu einstaklega þægilegan og samstæðan hóp. Á báðum leiðum til og frá skákbúðunum var krökkunum boðið að ganga óhappabrekkuna frá í mars og var það áhrifaríkt og gott til að vinnast á við mögulegan ótta eftir að lenda í hættulegum aðstæðum. 

Skákdeild Fjölnis naut styrkja og stuðnings frá Sturlu Péturssyni í Gúmmívinnustofunni sem heiðrar minningu afa síns og alnafna með myndarlegum stuðningi, BYKÓ og Ásbirni ehf. 

Henrik sigraði á alþjóðlegu móti í Kaupmannahöfn

Henrik Danielsen (2520) sigraði á alþjóðlega mótinu, Copenhagen Chess Challange, sem lauk í Kaupmannahöfn í gær. Henrik hlaut 7 vinninga í 9 skákum og var jafn þýska alþjóðlega meistaranum Thorsten Michael Haub (2412) að vinningum en fékk gullið eftir stigaútreikning.

Frammistaða Henriks samsvaraði 2599 skákstigum og hækkar hann um 9 stig fyrir hana.

Einstaklingsárangur Henriks má nálgast hér.

Heimasíða mótsins

 

 

Vesturbæjarbiskupinn fer fram á fimmtudaginn

Skákakademían og Vesturgarður standa fyrir Vesturbæjarbiskupnum sem tefldur verður 7. maí. Mótið fer fram í Hagaskóla er ætlað nemendum á grunnskólaaldri og eru krakkar úr Vesturbænum sérstaklega hvattir til að mæta.

Skráning fer fram á Skák.is (guli kassinn efst). ATH. Aðeins 50 sæti í boði.

Upplýsingar um þegar skráða keppendur má finna hér.

 

Hraðkvöld hjá Hugin í kvöld

Mánudaginn  4. maí 2015 verður atkvöld hjá Skákfélaginu Huginn í Mjóddinni og hefst mótið kl. 20:00. Fyrst eru tefldar 3 hraðskákir þar sem hvor keppandi hefur 5 mínútur til að ljúka skákinni og síðan þrjár atskákir, með fimmtán mínútna umhugsun. Teflt er í félagsheimili Hugins í Álfabakka 14a í Mjóddinni.

Sigurvegarinn á atkvöldinu fær í verðlaun máltíð fyrir einn á Saffran eða pizzu frá Dominos. Einnig verður dreginn út af handahófi annar keppandi sem fær sama val. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Nansý Norðurlandmeistari í skólaskák - Hrund með silfur

Nansý Davíðsdóttir varð í dag Norðurlandameistari í stúlkna í c-flokki (12 ára og yngri). Mótið fór fram um helgina í Kolding í Danmörku. Nansý hlaut 4,5 vinning í 5 skákum. Hrund Hauksdóttir varð í 1.-2. sæti í a-flokkur (20 ára og yngri) með 4 vinninga en fékk silfrið eftir stigaútreikning. Frábær árangur hjá þeim Grafarvogsstöllum!

A-flokkur (u20)

Árangur Hrundar er mjög eftirtektarverður ekki síst í ljósi þess að hún var næststigalægst átta keppenda! Það var Jessica Bengtson (2012), sem var langstigahæst keppenda sem náði gullinu.

Veronika Steinunn Magnúsdóttir (1631) varð 5. sæti með 2 vinninga en hún var stigalægst keppenda.

Þær stöllur hækka báðar vel á stigum fyrir frammistöðuna. Hrund um 39 stig en Veronika um 29 stig.

Lokastöðuna má finna á Chess-Results.

B-flokkur (u16)

Hildur Berglind Jóhannsdóttir (1150) hlaut 2 vinninga og varð í sjöunda sæti af 10 keppendum. Svava Þorsteinsdóttir (1000) hlaut 1,5 vinning og varð í áttunda sæti. 

Það var vitað fyrirfram að þetta yrði erfitt hjá þeim. Þeir mega ágætlega við una enda fyrirfram raðað í 8. og 10. sæti miðað við skákstig. 

Lokastöðuna má finna á Chess-Results.

C-flokkur (u12)

Nansý Davíðsdóttir (1676) vann mótið með nokkrum yfirburðum. Nansý hlaut 4,5 vinning og varð vinningi fyrir ofan Anna Cramling Bellon (1925) sem er dóttir Piu Cramling. 

Freyja Birkisdóttir (1001), vann í lokaumferðinni og varð í 9.-12. sæti með 1,5 vinning. Getur vel við unað miðað við ungan aldur. 

Fararstjóri stelpnanna var Einar Hjalti Jensson, landsliðsþjálfari. Hann skilaði frábæru verki með stelpurnar.

• Heimasíða mótsins
• Beinar útsendingar
• Myndaalbúm (EHJ)

Björn Hólm og Vignir Vatnar Íslandsmeistarar í skólaskák

Íslandsmótið í skólaskák fór fram um helgina í Fischersetri á Selfossi. Mótið var afar spennandi og skemmtilegt. Svo fór að báðir titlarnir fóru til Kópavogs. Björn Hólm Birkisson, Smáraskóla, hampaði titlinum í eldri flokki og Vignir Vatnar Stefánsson, Hörðuvallaskóla, í þeim yngri. 

Eldri flokkur

Björn Hólm Birkisson hlaut 11 vinninga í 12 skákum og var 1,5 vinningi fyrir ofan Akureyringinn Jón Kristin Þorgeirsson og Hilmir Freyr Heimisson úr Patreksfirði sem urðu í 2.-3. sæti. Jón hlaut silfrið eftir stigaútreikning.

Röð efstu manna:

• 1. Björn Hólm Birkisson 11 v.
• 2. Jón Kristinn Þorgeirsson 9,5 v. (50,25)
• 3. Hilmir Freyr Heimisson 9,5 v. (48,5)
• 4. Dawid Kolka 9 v.
• 5. Bárður Örn Birkisson 8 v.
• 6. Felix Steinþórsson 7,5 v.
• 7.-8. Heimir Páll Ragnarsson og Gauti Páll Jónsson 6,5 v.

Mótstöfluna má finna á Chess-Results.

Yngri flokkur

Vignir Vatnar Stefánsson hlaut 10 vinninga í 11 skákum í yngri flokki. Róbert Luu, sem einnig er úr Kópavogi, nánar tekið Álfhólsskóla, varð annar með 9,5 vinning og Óskar Víkingur Davíðsson úr Ölduselsskóla í Reykjavík varð þriðji. Þessir þrír voru í nokkrum sérflokki.

Röð efstu manna:

• 1. Vignir Vatnar Stefánsson 10 v. 
• 2. Róbert Luu 9,5 v.
• 3. Óskar Víkingur Davíðsson 9 v.
• 4. Halldór Atli Kristjánsson 7 v.
• 5. Stefán Orri Davíðsson 6,5 v.
• 6.-7. Alexander Oliver Mai og Almar Máni Þorsteinsson 5,5 v.
• 8. Katla Torfadóttir 4,5 v.
• 9. Sindri Snær Kristófersson 4 v.

Góður árangur Sunnlendinganna Almars og Kötlu er ánægjulegur og vert er að benda á góðan árangur yngsta keppendans Stefáns Orra.

Mótstöfluna má finna á Chess-Results.

Landsmótsstjóri var Stefán Bergsson. Honum til aðstoðar við skákstjórn voru Steinþór Baldursson og Gunnar Björnsson. Fyrir hönd heimamanna báru Aldís Sigfússon, frá Fischersetri og Björgvin G. Guðmundsson, formaður Skákfélag Selfoss og nágrennis, hitann og þungann af mótshaldinu og gerðu þeð með miklum sóma!

Mótið var langt og strangt og það má vel greina töluverða þreytu í myndunum af verðlaunahöfunum!

Mykhaylo sigurvegari lokamóts Bikarsyrpunnar

Í dag fóru fram tvær síðustu umferðirnar í fjórða og síðasta móti Bikarsyrpu TR þetta tímabilið og var loftið sannarlega lævi blandið í Skákhöll félagsins að Faxafeni.  Upp úr klukkan tíu í morgun tóku keppendur að tínast á skákstað, enn á ný tilbúnir að murka líftóruna úr andstæðingum sínum, alltsvo á hinum mögnuðu 64-reita borðum. 

Fyrir fjórðu umferð leiddi Nikulás Ýmir Valgeirsson með fullt hús vinninga en Hjörtur Kristjánsson, Bjarki Ólafsson og Mykhaylo Kravchuk komu í humátt með 2,5 vinning.  Þeir fjórir mættust í innbyrðis viðureignum og ljóst var að hart yrði barist til að vera í sem bestri stöðu fyrir loka-orrustuna síðar um daginn.  Svo fór að Bjarki vann Nikulás nokkuð örugglega með hvítu mönnunum, stillti mönnum sínum vel upp á meðan svörtu fótgönguliðarnir voru fullrólegir.  Endaði sú barátta með mikilli beyglu svarts þar sem drottningin var á óæskilegu flandri í kringum menn sína, sem þvældust fyrir hennar hátign, og hlaut fyrir vikið skjótan endi á sínu lífi er Bjarki slátraði henni með laglegri fráskák. 

Með sigrinum skaust Bjarki frammúr Nikulási en við hlið þeirra, á öðru borði, stýrði Hjörtur hinum ljósu taflmönnum gegn eilítið dekkri hermönnum Mykhaylos.  Hart var barist en að lokum sættust þeir félagar á skiptan hlut í stöðu sem virtist gefa ágætis tilefni til þess enda höfðu báðir einn riddara og jafnmörg peð hvor. 

Með fyrrgreindu jafntefli var Bjarki kominn í kjörstöðu fyrir lokaumferðina, einn á hinum kalda toppi með 3,5 vinning, en heil strolla sex keppenda beið rétt fyrir neðan tindinn eftir tækifæri til að hrifsa hásætið af honum, enda aðeins hálfum vinningi á eftir. 

Þegar keppendur settust gegnt hver öðrum í fimmtu og síðustu umferð mátti nánast skera loftið, svo mikil var spennan.  Ef rýnt var vel í hinar sex gerðir vígamannanna á hinum ferköntuðu og köflóttu reitum var líkt og blóð drypi af tönnum þeirra og vopn þeirra væru þyngri og öflugri en gengur og gerist. 

Á efsta borði stýrði Mykhaylo hvítu mönnunum gegn svörtum bandítum Bjarka og úr varð löng og ströng barátta þar sem stöðuleg togstreita einkenndi fyrri hluta rimmunnar.  Jafnt og þétt saumaði Mykhaylo þó að kóngi Bjarka og var skjól hins dökkklædda kóngs orðið allgisið sem leiddi til þyngri og þyngri varnar hinna vinnandi hermanna.  Bjarki barðist vel, reyndi að kreista fram gagnsókn en varð að lokum að játa sig sigraðan eftir hetjulega baráttu. 

Með sigrinum ruddi Mykhaylo Bjarka úr toppsætinu en bíða þurfti eftir lokum annarra viðureigna til að fá á hreint hver stæði uppi sem sigurvegari þar sem mjótt var á munum.  Á þriðja borði höfðu Kristján Dagur Jónsson og Alexander Már Bjarnþórsson gert jafntefli eftir að sá fyrrnefndi hafði haft vænlega stöðu í hróksendatafli.  Því var ljóst að hvorugur þeirra næði Mykhaylo að vinningum. 

Augu viðstaddra beindust því að öðru borði þar sem fram fór verulega svakaleg barátta á milli Nikulásar og Hjartar þar sem sá fyrrnefndi fékk að hefja skákina, enda stýrandi hvítu mönnunum.  Eftir að mönnum hafði verið stillt upp blés Nikulás í herlúðra, öllu heldur stríðslúðra, því hann fórnaði manni til að komast betur að kóngi Hjartar.  Úr varð að sóknin var ekki nægilega öflug og virtist Hjörtur vera með vörnina á hreinu allan tímann, en smámsaman skapaðist algjör glundroði á vígvellinum þar sem Hjörtur var með margskonar máthótanir á hendur hvíta kónginum.  Nikulás stríddi kóngi svarts þó lengi vel með hrókum sínum tveimur ásamt biskupi enda staðan á borðinu opin í alla enda.  Að lokum þvarr þó skákir hvíts og eftirleikurinn var auðveldur fyrir svartan. 

Hjörtur jafnaði þarna Mykhaylo að vinningum en eftir stigaútreikning var sá síðarnefndi eilítið ofar og vann því sitt annað mót í Bikarsyrpunni – glæsilegt hjá Mykhaylo.  Árangur Hjartar er eftirtektarverður þar sem hann hefur ekki sést á mótum áður og hóf taflmennsku fyrir skömmu síðan.  Þrír keppendur komu næstir í mark með 3,5 vinning; Alexander Már, Bjarki og Kristján Dagur en Alexander hlaut þriðja sætið eftir þrefaldan stigaútreikning. Umræddur Mykhaylo hlaut einnig vegleg verðlaun fyrir bestan samanlagðan árangur í mótunum fjórum en fyrir hann fékk hann fimm fría einkatíma hjá einum af alþjóðlegu meisturunum í TR auk glæsilegs farandbikars.  Aron Þór Mai og Guðmundur Agnar Bragason urðu í öðru og þriðja sæti yfir samanlagðan árangur og hlutu sömuleiðis einkatíma að launum. 

Vel heppnaðri eldskírn Bikarsyrpunnar er lokið og viljum við í Taflfélagi Reykjavíkur koma á framfæri þökkum til allra glæsilegu keppendanna ásamt foreldrum og forráðamönnum fyrir að búa til með okkur skemmtilega mótasyrpu sem verður án nokkurs vafa endurtekin á næsta tímabili.

• Úrslit, staða og pörun
• Dagskrá og upplýsingar
• TR á facebook (myndir o.fl.)

Hrund og Nansý efstar á NM stúlkna

Íslensku stúlkunum gengur vel á NM stúlkna sem nú er í gangi í Kolding í Danaveldi. Sérstaklega Nansý Davíðsdóttir sem er ein efst í c-flokki og Hrund Hauksdóttir sem er efst í a-flokki ásamt annarri skákstúlku. Mótinu lýkur í fyrramálið með fimmtu og síðustu umferð.

A-flokkur (u20)

+Hrund Hauksdóttir (1730) hefur 3 vinninga og er efst ásamt Jessicu Bengstsson (2012). Veronika Steinunn Magnúsdóttir (1631) er í 4.-5. sæti með 2 vinninga. Veronika mætir Jessicu í lokaumferðinni.

B-flokkur (u16)

Svava Þorsteinsdóttir (1000) hefur 1,5 vinning og er í 7. sæti. Hildur Berglind Jóhannsdóttir (1150) hefur 1,5 vinning og er í 8.-9. sæti.

C-flokkur (u12)

Nansý Davíðsdóttir (1676) er efst með 3,5 vinning. Freyja Birkisdóttir (1001) er í tólfta sæti með 0,5 vinning. 

Fararstjóri stelpnanna er Einar Hjalti Jensson. Lokaumferðin hefst kl. 8 í fyrramálið. 

• Heimasíða mótsins
• Beinar útsendingar
• Myndaalbúm (EHJ)