Unglingalið TR sigraði Kvennalandsliðið!

Tvær viðureignir í Hraðskákkeppni taflfélaga fóru fram í skákhöll TR í gærkvöldi.

Í forkeppni um sæti í 16. liða úrslitum mættust Unglingalið Taflfélags Reykjavíkur (Truxvi) og Kvennalandsliðið. Fyrirfram var búist við jafnri keppni og sú varð líka raunin.

Sveit Truxvi leiddi Hilmir Freyr Heimisson sem nýverið gékk til liðs við TR úr Hugin, en með honum í sveit að þessu sinni tefldu þeir Vignir Vatnar Stefánsson, tvíburabræðurnir Björn og Bárður Birkissynir, Gauti Páll Jónsson, Aron Þór Mai og hinn kornungi Róbert Luu.

Allt kvennalandsliðið var mætt með stórmeistara kvenna Lenku Ptacnikovu í broddi fylkingar. Með henni tefldu þær Hallgerður Helga, Jóhanna Björg, Elsa María, Tinna Kristín, Veronika og Guðlaug Þorsteinsdóttir.

Unglingalið TR tók strax forystu með 4 ½ – 1 ½ sigri í fyrstu umferð. Liðin skiptust svo á að sigra í næstu umferðum og í hálfleik leiddi TRuxvi með 20 vinningum gegn 16 vinningum Kvennalandsliðsins. Enn dró sundur með liðunum í áttundu umferði sem Truxvi vann 4 ½ – 1 ½ en landsliðið svaraði strax fyrir sig í næstu umferð á eftir, 5 – 1. Munaði þá einungis þremur vinningum á sveitunum en í tíundu umferð má segja að Unglingaliðið hafi gert út um viðureignina með öruggum 4 ½ – 1 ½ sigri. Fyrir lokaumferðina munaði sex vinningum á sveitunum og þurfti Kvennalandsliðið því á kraftaverki að halda til að tryggja sér framlengingu. Ekkert slíkt gerðist og Truxvi sigldi í sextán liða úrslit með öruggum 4 ½ – 1 ½ sigri. Lokatölur urðu 40 ½ – 31 ½ .

Bárður stóð sig best í unglingaliði TR með 10 vinninga úr 12 skákum. Hilmir hlaut 7 ½ vinning í 11 skákum og Björn 7 vinninga úr 12 skákum.

Lenka dró vagninn fyrir Kvennalandsliðið með 8 vinninga úr 11 skákum, Hallgerður krækti í 6 ½ vinning úr 12 skákum og Elsa 5 ½ vinning af 11 mögulegum.

Sannarlega glæsilegur sigur hinnar sterku unglingasveitar félagsins og verður gaman að fylgjast með sveitinn kljást við lið Hauka í 16 liða úrslitum. Meðlimir Kvennalandsliðsins geta huggað sig við að flestar geta þær keppt áfram með sínum félagsliðum í keppninni.

Hin viðureign kvöldsins var ójöfn enda mikill styrkleikamunur á sveitum UMSB og TR. Ríkjandi meistarararnir úr TR unnu stórsigra í hverri umferð og unnu sannfærandi í lokin 65 ½ – 6 ½

Í sigursveit TR voru alþjóðlegu meistararnir Jón Viktor Gunnarsson, Arnar E. Gunnarsson, Bragi Þorfinnsson, alþjóða dómarinn Omar Salama, Daði Ómarsson, Björgvin Víglundsson og þeir Björn Jónsson og Kjartan Maack.

Jón Viktor, Arnar, Bragi, Omar, Daði og Björn voru allir með fullt hús vinninga.

Bestum árangri í liði UMSB náði Einar Valdimarsson en hann krækti í 2 ½ vinning í ellefu skákum.

TR vill koma á framfæri þökkum til UMSB og Kvennalandsliðsins fyrir drengilega og skemmtilega keppni!

Heimasíða TR

Nýir félagar í SA

Á síðustu vikum hafa þrír ágætismenn félagar gengið á ný í Skákfélag Akureyrar. Þetta eru þeir Björn Ívar Karlsson, Arnar Þorsteinsson og Jón Árni Jónsson. Björn Ívar er reyndar fæddur og uppalinn Vestmannaeyingur, en telfdi um hríð með SA fyrir nokkrum árum. Hann kemur úr Taflfélagi Vestmannaeyja. Þeir Arnar og Jón Árni slitu sínum fyrstu skákskóm á Akureyri og eiga sér langa sögu sem Skákfélagsmenn. Þeir voru meðal stofnenda Máta fyrir nokkrum árum en koma nú úr taflfélaginu Hugin.

Mikill fengur er að þessum góða liðsauka og býður Skákfélag Akureyrar þá félaga alla velkomna til sín.

Heimasíða SA

Skáksambandið fékk styrk úr Samfélagssjóði Landsbankans

Samfélagsstyrkjum að upphæð tíu milljónir króna var úthlutað úr Samfélagssjóði Landsbankans fimmtudaginn 6. ágúst. Alls hlutu 26 verkefni styrki að þessu sinni. Tvö verkefni á vegum Rauða krossins og Geðhjálpar hlutu samtals eina milljón króna, tólf verkefni 500 þúsund krónur hvert og önnur tólf fengu 250 þúsund króna styrk. Um 300 umsóknir bárust sjóðnum að þessu sinni. Samfélagsstyrkir verða veittir tvisvar á þessu ári en umsóknarfrestur fyrir seinni úthlutun rennur út í október nk.

Samfélagsstyrkir Landsbankans eru mikilvægur þáttur í stuðningi bankans við samfélagið. Með þeim leggur bankinn bæði einstaklingum, hópum og félagssamtökum lið við verkefni sem er sinnt af einlægni og ómetanlegum áhuga og sem vert er að verðlauna. Styrkjunum er einkum ætlað að styðja mannúðar- og líknarmál, menntamál, rannsóknir og vísindi, forvarnar- og æskulýðsstarf, sértæka útgáfustarfsemi og verkefni á sviðum menningar og lista.

Dómnefnd um úthlutun samfélagsstyrkja var að þessu sinni skipuð þeim Ármann Jakobssyni, prófessor við Háskóla Íslands, Kristjáni Kristjánssyni upplýsingafulltrúa Landsbankans og Guðrúnu Agnarsdóttur lækni, en hún var jafnframt formaður dómnefndar.

Skáksamband Íslands hlaut styrk til ritunar og útgáfu á bók um sögu Reykjavíkurskákmótanna í fimmtíu ár. Fyrsta Reykjavíkurskákmótið í skák var haldið árið 1964. Mótið hefur haft afgerandi áhrif á þróun og stöðu Íslands sem skáklands og Reykjavíkur sem háborgar í skákheimum. Reykjavíkurmótið er elsta hátíðin sem enn er haldin reglulega og ber nafn borgarinnar í titli og hróður hennar víða um heim. Helgi Ólafsson stórmeistari er höfundur söguritsins en Gunnar Björnsson framkvæmdastjóri Skáksambandsins tók við styrknum.

Hjörvar og Guðmundur unnu - Oliver tapaði naumlega fyrir Shirov

Opið skákmótið hófst í gær í Riga í Lettlandi. Hjörvar Steinn Grétarsson (2567) og Guðmundur Kjartansson (2447) unnu sínar skákir í gær. Oliver Aron Jóhannesson (2263) átti þó skák dagsins þrátt fyrir tap gegn Alexei Shirov (2702). Um var að ræða hörkuskák þar sem Lettinn lagði gríðarlega á stöðuna og fórnaði manni. Oliver var grátlega nærri því að halda jafntefli. 

Tvær skákir eru tefldar í dag. Sú fyrri hefst nú kl. 8 og sú síðari kl. 14. 

• Heimasíða mótsins
• Chess-Results
• Beinar útsendingar
• Chessbomb

 

Borgarskákmótið fer fram á föstudag

Borgarskákmótið fer fram föstudaginn 14. ágúst, og hefst það kl. 16:00. Mótið fer fram venju samkvæmt í Ráðhúsi Reykjavíkur og standa  Taflfélag Reykjavíkur og Skákfélagið Huginn, að mótinu, eins og þau hafa gert síðustu ár. Gera má ráð fyrir að margir af sterkustu skákmönnum þjóðarinnar taka þátt í því. Skákmenn eru hvattir til að skrá sig sem fyrst eftir að opnað verður fyrir skráningu. Mótið er öllum opið og er þátttaka ókeypis en skráning fer fram á Skák.is.

Einnig er hægt að skrá sig í í síma 866 0116 (Vigfús) og 899 9268 (Björn). Tefldar verða 7 umferðir með 7 mínútna umhugsunartíma. Þetta er í 28. sinn sem mótið fer fram og er þetta iðulega eitt best sótta skákmót hvers árs. Í fyrra sigraði Jón Viktor Gunnarsson, sem þá tefldi fyrir Jómfrúnna.

Andri Áss Íslandsmeistari í skákgolfi

Fjórtán keppendur mættu til leiks. Það var teflt við ágætis aðstæður í Glersalnum í stúkunni við Kópavogsvöll, en það rigndi fyrri part golfsins og vindur var á móti.

Úrslitin komu á óvart og sýna að á góðum degi þá eiga margir möguleika á Íslandsmeistaratitlinum sem við vorum farnir að halda að Helgi Ólafsson væri búinn að eigna sér að eilífu. 

Íslandsmeistari skákmanna í golfi&skák:

1. Andri Áss Grétarsson 2235
2. Helgi Ólafsson 2229
3. Hrafn Loftsson 2097
4. Arnaldur Loftsson 2064
5. Siguringi Sigurjónsson 2058
6. Ásgeir Þór Árnason 2054
7. Halldór Grétar Einarsson 2032

Andri Áss vann mikilvægan sigur á Helga í skákmótinu og skapaði sér þannig 87 stiga forystu. Helgi var samt enn í góðri stöðu því hann þurfti bara að vinna Andra Áss með fjórum höggum. Munurinn á vallarforgjöf þeirra var 17 högg þannig að mikið þyrfti að ganga á í golfinu til þess að Andri ætti möguleika á sigri. En Helga gekk erfiðlega í óveðrinu á meðan Andri Áss hélt haus. Helgi kom inn á 100 höggum og Andri fylgdi á eftir með þrem höggum lakara skor. Það dugði til þess að velta Helga úr sessi sem ósigrandi í þessari tvíkeppni.

Bræðurnir Hrafn og Arnaldur Loftsynir stimpluðu sig vel inn og tóku 3. og 4. sætið.  Siguringi tók fimmta sætið með besta skorinu í golfinu (87 högg) og Ásgeir Þór náði líka góðum árangri og stórbætti sig. 

Punktameistari  skákmanna í golfi&skák:

1. Andri Áss Grétarsson  35,80
2. Arnaldur Loftsson 32,58
3. Ásgeir Þór Árnason 30,14
4. Sindri Snær Kristófersson 30
5. Magnús Kristinsson 29,74 

Andri Áss átti bestan dag keppenda og varð einnig punktameistari. Það má helst þakka 42,6 punktum úr skákinni. Magnús Kristinsson stóð sig einnig vel í skákinni með 41,48 punkt. Tveir af okkur náðu að komast í gegnum niðurskurðinn og fengu þá að spila daginn eftir í Bylgjan Open mótinu. Það voru Arnaldur á 34 punktum og Ásgeir Þór á 33 punktum. 

Unglingameistari varð Sindri Snær Kristófersson með 1568 stigum sem er bæting hjá honum um 218 stig frá því í fyrra. Það má mest þakka frábærum golfleik. 

Ásgeir Þór Árnason sigraði púttkeppnina og notaði einungis 29 pútt allan hringinn. Í öðru sæti varð Siguringi Sigurjónsson með 31 pútt.

Andri Áss bætti sinn árangur mest allra eða um 267 stig og vann framfaraverðlaunin. Sindri Snær bætti sig svo eins og áður sagði um 218 stig og Ásgeir Þór um 141 stig

Skákdeild Breiðabliks sá um framkvæmd mótsins.  Mótstjóri og skipuleggjandi var Halldór Grétar Einarsson. 

Nánari úrslit á: http://chess.is/golf

Páll Agnar fékk 50% vinningshlutfall í Badalona

Páll Agnar Þórarinsson (2249) endaði með 4½ af 9 möglegum á alþjóðlegu móti í Badalona á Spáni sem lauk í dag. Björn náði mörgum prýðisgóðum úrslitum sér í lagi í upphafi móts.

Einstök úrslit má finna hér. Páll hækkar um 3 stig fyrir frammistöðu sína.

• Heimasíða mótsins
• Chess-Results

Aron Þór sigurvegar Sumarsyrpu Breiðabliks

Aron Þór Mai sigraði á seinni Sumarsyrpu Breiðabliks sem fram fór um helgina. Aron Þór endaði jafn Þorsteini Magnússyni með fjóra vinninga úr fimm skákum, en varð hærri á stigum.

Í yngri flokki vann Alexander Már Bjarnþórsson, en hann vann líka fyrri sumarsyrpuna.

Átján efnilegir krakkar á grunnskólaaldri tóku þátt í mótinu og var keppnin mjög jöfn að þessu sinni.  Sjö keppendur af átján voru 10 ára og yngri. 

1. Aron Þór Mai 4,0 vinninga
2. Þorsteinn Magnússon 4,0
3. Halldór Atli Kristjánsson 3,5
4. Birkir Ísak Jóhannsson 3,5 

10 ára og yngri

1. Alexander Már Bjarnþórsson 3,0
2. Freyja Birkisdóttir 3,0
3. Stefán Orri Davíðsson 2,5 

• Nánari úrslit: http://chess-results.com/tnr183056.aspx?lan=1&art=1&rd=5&wi=821
• Myndaalbúm: http://skak.blog.is/album/sumarsyrpur_breidabliks_2015/
• Auglýsing: http://skak.blog.is/blog/skak/entry/1904536/

Stórmót TR og Árbæjarsafns fer fram næsta sunnudag

Stórmót Taflfélags Reykjavíkur og Árbæjarsafns fer fram í ellefta sinn sunnudaginn 16. ágúst. Teflt verður í Árbæjarsafni og hefst taflið kl. 14. Tefldar verða sjö umferðir með umhugsunartímanum 7 mín. á skák. Veitt verða verðlaun fyrir þrjú efstu sætin í Stórmótinu, 15.000 kr., 10.000 kr. og 5.000 kr.

Þátttökugjöld í Stórmótinu eru kr. 1.300 fyrir 18 ára og eldri, en ókeypis fyrir yngri en 18 ára, eldri borgara (67) og öryrkja. Þátttökugjöld eru jafnframt aðgangseyrir að safninu en þeir sem þegar hafa aðgang, t.d. með menningarkorti, þurfa ekki að borga þátttökugjald.

Frekari upplýsingar veitir Torfi Leósson, netfang: ([e-mail]) eða í síma 697-3974. Mótið er jafnan einn af upphafsviðburðum skákársins, og við vonumst til að sjá sem flesta á þessu skemmtilega móti.

Hann sigurvegari Eistenstein-mótsins - rífur 2600 stiga múrinn!

Stórmeistarinn Hannes Hlífar Stefánsson (2593) er í gríðarlega miklu stuði þessa dagana. Hann sigraði á alþjóðlega mótinu í þýska fjallaþorpinu Bayerisch-Eisenstein sem lauk í gær. Í lokaumferðinni gerði hann jafntefli við þýska stórmeistaranum Michael Prusikin (2486).

Þeir urðu efstir og jafnir og hafði Hannes sigurinn á mótinu eftir stigaútreikning. Verðlaunum er ekki skipt og runnu efstu verðlaunin því alfarið til Hannesar.

Árangur Hannesar er afar góðar. Hann hækkar um 7 stig fyrir frammistöðuna og er því kominn upp í 2600 skákstig. Annar sigur Hannesar í röð á alþjóðlegu móti!

Þetta er í fyrsta skipti síðan 2002 að Hannes nær 2600 skákstigum en hannes hefur hækkað jafnt og þétt á stigum síðustu misseri og er alls líklegur á EM landsliða í haust. Væntnanlega mun Hannes þar tefla á fyrsta borði fyrir a-sveit Íslands. 

96 skákmenn tóku þátt í mótinu og þar af eru sjö stórmeistarar. Hannes var stigahæstur keppenda.

Heimasíða mótsins