Æfingar skákdeildar Fjölnis hefjast miðvikudaginn 16. september

Vikulegar skákæfingar Skákdeildar Fjölnis fyrir börn og unglinga hefjast miðvikudaginn 16. september og verða þær framvegis alla miðvikudaga í vetur frá kl. 17:00 – 18:30. Æfingarnar eru í Rimaskóla og er gengið inn um íþróttahús skólans. Árangur þeirra barna sem sótt hafa reglulega skákæfingar Fjölnis hefur verið mjög góður á undanförnum árum og skákdeildin hlotið mörg verðlaun og viðurkenningar fyrir árangursríkt starf.

Foreldrar áhugasamra barna í Grafarvogi og á höfuðborgarsvæðinu öllu eru hvattir til að nýta sér skemmtilegar og áhugaverðar skákæfingar Fjölnis sem bjóðast ókeypis.

Í fyrra mættu að jafnaði 30 krakkar á hverja æfingu. Æfingarnar miðast við að þátttakendur kunni góð skil á öllum grunnatriðum skáklistarinnar og tefli sér til ánægju. Foreldrar eru hvattir til að mæta með börnunum sínum og aðstoða sem alltaf er þörf fyrir. Reynt er að hafa æfingarnar fjölbreyttar og skemmtilegar, kennsla og skákmót til skiptis. Boðið er upp á veitingar á hverri æfingu svo sem ávexti, kexmeti og vatn. Öllum skákæfingum lýkur með verðlaunaafhendingu. Meðal leiðbeinenda í vetur verða m.a. afreksunglingar í skáklistinni úr úrvalsflokki Skákskóla Íslands.

Umsjón með skákæfingum Fjölnis í vetur hefur líkt og undanfarin ár Helgi Árnason formaður skákdeildarinnar. Munið fyrstu skákæfinguna 16. september.

Skákþing Norðlendinga 2015 - Haustmót Skákfélags Akureyrar

Skákþing Norðlendinga 2015 verður haldið á Akureyri dagana 18.-20. september 2015. Mótið er jafnframt Haustmót Skákfélags Akureyrar.

Telfdar verða sjö umferðir. Fyrstu fjórar umferðirnar verða atskákir (25 mín) en lokaumferðirnar þrjár verða kappskákir (90 mín + 30 sek fyrir hvern leik).

Dagskrá:

• 1-4. umferð föstudaginn 18. september kl. 20.00.
• 5. umferð laugardaginn 19. september kl. 10.00.
• 6. umferð laugardaginn 19. september kl. 15.00 (eða a.m.k. 45 mín eftir lok 5. umferðar)
• 7. umferð sunnudaginn 20. september kl. 10.00.

Hraðskákmót Norðlendinga/Hausthraðskákmótið kl. 15.00 (eða a.m.k. 25 mín eftir lok 7. umferðar) 

Verðlaunafé að lágmarki 100.000 kr. Nánar auglýst síðar. 

Titlar og verðlaun:

Mótið er öllum opið og allir keppa um sömu verðlaun, óháð búsetu eða félagsaðild.

Titilinn „Skákmeistari Norðlendinga“ getur aðeins sá hlotið er á lögheimili á Norðurlandi.

Titilinn „Skákmeistari Skákfélags Akureyrar“ getur aðeins hlotið félagsmaður í SA.

Verði fleiri en einn jafn í keppni um titilinn „Skákmeistari Norðlendinga“ munu stig ráða og eru keppendur hvattir til að kynna sér stigaútreikning áður en móti lýkur.

Verði fleiri en einn jafn í keppni um titilinn „Skákmeistari Skákfélags Akureyrar“ verður telft um titilinn.

Glæsisigur Nakamura á So - Carlsen og Aronian efstir

Hikaru Nakamura (2814) stal athyglinni á Sinquefield-mótinu í gær með glæsisigri í mikilli fórnarskák í Kóngsindverjanum á landa sínum Wesley So (2779). Á Chess.com er því velt upp hvort skákin verði hin "ódauðlega fórnarskák". Nakamura náði öðru sæti á lifandi stigalistanum.

 

Garry Kasparov var hrifinn af taflmennsku Nakamura og tísti:

 

Congrats to @GMHikaru on his victory today. The King's Indian requires the courage of your convictions & courage to ignore machine opinions!

— Garry Kasparov (@Kasparov63) August 29, 2015

 

Carlsen (2853) og Aronian (2765) gerðu jafntefli og eru sem fyrr efstir. Nakamura, Giri (2793) og MVL (2731) sem vann Topalov (2816) eru hálfum vinningi á eftir þeim.  

Sjöunda umferð fer fram í kvöld og hefst kl. 18. Þá teflir Carlsen við Grischuk (2771) og Aronian við Nakamura. 

• Heimasíða mótsins
• Beinar útsendingar

[Event "Sinquefield Cup"] [Site "Saint Louis USA"] [Date "2015.08.29"] [EventDate "2015.08.23"] [Round "6.4"] [Result "0-1"] [White "Wesley So"] [Black "Hikaru Nakamura"] [ECO "E99"] [WhiteElo "2779"] [BlackElo "2814"] [PlyCount "78"] 1. d4 Nf6 2. c4 g6 3. Nc3 Bg7 4. e4 d6 5. Nf3 O-O 6. Be2 e5 7. O-O Nc6 8. d5 Ne7 9. Ne1 Nd7 10. f3 f5 11. Be3 f4 12. Bf2 g5 13. Nd3 Ng6 14. c5 Nf6 15. Rc1 Rf7 16. Kh1 h5 17. cxd6 cxd6 18. Nb5 a6 19. Na3 b5 20. Rc6 g4 21. Qc2 Qf8 22. Rc1 Bd7 23. Rc7 Bh6 24. Be1 h4 25. fxg4 f3 26. gxf3 Nxe4 27. Rd1 Rxf3 28. Rxd7 Rf1+ 29. Kg2 Be3 30. Bg3 hxg3 31. Rxf1 Nh4+ 32. Kh3 Qh6 33. g5 Nxg5+ 34. Kg4 Nhf3 35. Nf2 Qh4+ 36. Kf5 Rf8+ 37. Kg6 Rf6+ 38. Kxf6 Ne4+ 39. Kg6 Qg5# 0-1

Orðsending til eldri skákmanna - Æsir hefja taflmennsku á þriðjudaginn

Æsir eru að vakna eftir sumarsvefninn. Þeir byrja að tefla þriðjudaginn 1 september í Ásgarði, félagsheimili eldri borgara í Reykjavík sem er í Stangarhyl 4.

Allir eldri borgarar sem hafa gaman af skák hjartanlega velkomnir til leiks, karlar 60+ og konur 50+.

Við teflum alla þriðjudaga frá kl 13.00 til 16.30

Þátttökugjald er kr. 500 innifalið kaffi og meðlæti.

Hittumst hress á hvítum reitum og svörtum.

Stjórn Ása.

 

Skákþáttur Morgunblaðsins: Guðmundur efstur í Litháen

Hjörvar Steinn Grétarsson, Guðmundur Kjartansson og Oliver Aron Jóhannesson luku um síðustu helgi keppni á sterku, opnu móti í höfuðborg Lettlands, Riga. Alexei Shirov bar sigur úr býtum, hlaut 7 ½ vinning af níu mögulegum. Jafn honum en lægri á stigum var Armeninn Hovhannisjan. Hjörvar endaði í 11.- 38. sæti með 6 vinniga, Guðmundur fékk 5 ½ vinning og varð í 39.- 56. sæti en Oliver fékk 3 vinninga og endaði neðar í mótstöflunni. Keppendur voru 191 talsins. Í Riga hefur á torgi einu verið reist stytta af Mikhael Tal og margir skákunnendur gera sér ferð þangað og hylla „töframanninn“ sem lést sumarið 1992 eftir langvarandi vanheilsu, aðeins 55 ára að aldri.

Guðmundur Kjartansson sat ekki lengi auðum höndum og degi eftir mótið í Riga hóf hann að tefla á lokuðu alþjóðlegu móti í Panevezys í Litháen. Ef marka má frammistöðu hans og taflmennsku þar verður þess væntanlega ekki langt að bíða að hann nái lokaáfanga sínum að stórmeistaratitli. Eftir sjöttu umferð, sem fram fór á fimmtudaginn, var hann með 5 vinninga af sex mögulegum og deildi efsta sætinu með heimamanninum Titas Stremavicius. Hann þarf 1 ½ vinning úr þrem síðustu skákunum til að ná lokaáfanga að stórmeistaratitli. Nú um stundir er hann með 2447 elo-stig en þarf að ná 2500 elo-stigum til að uppfylla skilyrði þau sem Alþjóðaskáksambandið FIDE setur varðandi útnefningu titilsins. Að ná þessu stigamarki ætti ekki að vefjast fyrir honum, elo-stigin eru reiknuð í hverjum mánuði.

Þar sem skákir nú til dags eru aðgengilegar í beinum útsendingum á netinu, t.d. á vefnum Chessbomb, hefur gefist ágætt tækifæri til að rýna í skákir Guðmundar frá Litháen. Sigur hans i fjórðu umferð var stórglæsilegur:

Panevezys 2015; 4. umferð:

Guðmundur Kjartansson – Ottormar Ladva

Pirc-vörn

1. e4 g6 2. d4 Bg7 3. Rc3 c6 4. Rf3 d6 5. a4 Rf6 6. Be2 O-O 7. O-O Rbd7 8. h3 e5 9. dxe5 dxe5 10. Be3 De7 11. Rd2 Rc5 12. Dc1 a5 13. Hd1 Be6 14. b3 Hfd8 15. Da3 Bf8 16. He1 Rfd7 17. Had1 f5!?

Eftir mikla liðsflutninga telur svartur óhætt að opna stöðuna. En við það myndast ýmsir veikleikar í stöðunni.

18. exf5 gxf5 19. Bc4 Df6 20. Dc1 e4?! 21. Re2 Bd6?

Tveir síðustu leikir svarts voru vanhugsaðir. En andstæðingur Guðmundar hefur varla áttað sig á því sem í vændum var.

22. Rxe4!

Glæsileg mannsfórn. Hugmyndin kristallast eftir 26. leik hvíts.

22. ... Rxe4 23. Hxd6! Rxd6 24. Bg5! Df7 25. Bxe6 Dxe6 26. Bxd8

Nú rann upp fyrir Ladva að eftir 26. ... Hxd8 + leikur hvítur 27. Dg5+ og hrókurinn felur óbættur. Þó að hvítur hafi aðeins eitt peð upp úr krafsinu er ómögulegt að verja veikleikana á kóngsvæng.

26. ... Re4 27. Bc7 De7 28. Rg3 Rdf6 29. Dg5+!

Annar bráðskemmtilegur leikur og nú fellur annað peð.

29. ... Dg7 30. Dxg7+ Kxg7 31. Rxf5+ Kg6 32. Rg3 Rxg3 33. Bxg3 Hd8 34. He7

Öruggara var 34. He2 en þessi dugar líka.

34. ... Hd2 35. Hxb7 Hxc2 36. Ha7 Re4 37. Hxa5 Rd2

Hyggst bjarga sér með þráskák: 38. ... Hc1+ og 39. ... Rf1+.

38. h4! Rxb3 39. h5+ Kg7 40. Ha7+ Kh6 41. Bf4+ Kxh5 42. Hg7! Rc5 43. Hg5+ Kh4 44. f3!

– Svartur er fastur í mátneti og á enga vörn við hótuninni 45. g3+ Kh3 46. Hh5 mát. Ein tilraun 44. ... Hc1+ 45. Kh2 Hc2 dugar skammt vegna 46. Hf5! sem hótar 47. Bg3 mát. 

 

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu 

Grein þessi birtist í Morgunblaðinu 22. ágúst 2015

Skákþættir Morgunblaðsins

Huginn b-sveit lagði Taflfélag Garðabæjar örugglega

Huginn b-sveit og Taflfélag Garðabæjar (TG) áttust við í 8 liða úrslitum Hraðskákkepni taflfélaga í gærkvöldi. Viðureignin fór fram í glæsilegum húsakynnum TG í Garðabænum. Skemmst er frá þvi að segja að Huginn vann öruggan sigur með tölunum 60-12 en nokkra lykilmenn vantaði í lið Garbæinga.

Bestum árangri Huginsmanna náði Sæberg Sigurðsson sem hlaut 11½ vinning í 12 skákum. Næstir í liði Hugins voru þeir Sigurður Daði Sigfússon og Kristján Eðvarðsson, báðir með 11 vinninga í 12 skákum. Þorsteinn Þorsteinsson hlaut svo 10 vinninga í 11 skákum en þetta var hans fyrsta viðureign með sínu nýja félagi. Bestum árangri í liði heimamanna náði Páll Andrason sem hlaut 4½ vinning í 12 skákum.

Hraðskákeppni taflfélaga

Úrslit/pörun annarrar umferðar:

• Skákfélag Akureyrar - Víkingaklúbburinn 45-27
• Taflfélag Bolungarvíkur - TRuxvi (Sunnudaginn, 30. ágúst í TR, kl. 19:30)
• Taflfélag Reykjavíkur - Skákfélagið Huginn a-sveit (Mánudaginn, 31. ágúst í TR, kl. 20:00)
• Skákfélagið Huginn b-sveit - Taflfélag Garðabæjar 60-12

Litla bikarkeppnin

Úrslit/pörun fyrstu umferðar

• Skákfélag Íslands - Skákgengið (dags. ekki vituð)
• Ungmennasamband Borgarfjarðar - Skákfélag Selfoss og nágrennis 34-38
• Vinaskákfélagið - Skákddeild Fjölnis (dags. ekki vituð)
• Skákdeild Hauka - Skákfélag Reykjanesbæjar (dags. ekki vituð)

Átta liða úrslitum á að vera lokið í sl. 31. ágúst.

 

Meistaramót Víkingaklúbbsins í golfi 2015

 

Meistaramót Víkingaklúbbsins í golfi 2015 verður haldið í Mýrinni Golfklúbbi Garðarbæjar sunnudaginn 30. ágúst og hefst mótið kl:11.00.  Spilaðar verða 9. holur (einn hringur) og keppt verður bæði í höggleik án forgjafar og punktakeppni með fullri forgjöf. Sigurvegarinn í höggleik hlýtur sæmdarheitið:  Golfmeistari Víkingaklúbbsins 2015. 

Einnig verður á sama móti haldið liðakeppni milli skákfélaga, en veitt verða verðlaun fyrir besta samanlagðan árangur liða, en tveir keppendur eru í hvoru liði.  Liðið sem sigrar á fæstum samanlögðum höggum fær titilinn Íslandsmeistari Skákfélaga í golfi 2015. Þau lið sem reiknað er með að mæti til leiks, eru m.a:

Víkingaklúbburinn (liðstjóri, Gunnar Fr. Rúnarsson), Skákfélag Vinjar (Ingi Tandi Traustason), Breiðablik (Halldór Grétar Einarsson), Huginn og TR og Kristján Örn frá Skákfélaginu hefur m.a skráð sig til leiks.  Mótið er opið öllum golfskákmönnum.  Reiknað er með að keppendur verði á bilinu 12 -16 (3-4 holl).

Mótsgjald verður c.a 3500 kr og skráning fer fram á facebook eða í gsm:  8629744 (Gunnar).

Eftir hádegishlé verður haldið niður í Skáksamband, þar sem fer fram 5. mínútna hraðskákmót (allir við alla), þar sem keppt verður í samanlögðum árangri í golfskák, með og án forgjafar.  Nánari upplýsingar um mótið gefa Gunnar Fr. Rúnarsson (gsm:  8629744) og Halldór Grétar Einarsson (gsm:  6699784).

Vinsamlegast verið i samband á mótsdag, vegna hugsanlegra breytinga.

Skákstjóri og tæknimeistari mótisins er Halldór Grétar Einarsson.  

Úrslit mótsins 2014 hér og hér:

Einar Hjalti og Davíð efstir á Meistaramóti Hugins

FIDE-meistararnir Einar Hjalti Jensson (2394) og Davíð Kjartansson (2366) eru efstir með fullt hús að lokinni þriðju umferð Meistaramóts Hugins sem fram fór í gærkvöldi. Þeir lögðu tvíburana, Björn Hólm (1907) og Bárð Örn (1854) að velli í hörkuskákum. Loftur Baldvinsson (1988), Snorri Þór Sigurðsson (1956) og Jón Trausti Harðarson (2117) eru í 3.-5. sæti með 2½ vinning.

Mikið var um óvænt úrslit í 1. og 2. umferð en í 3. umferð var lítið sem ekkert um óvænt úrslit. 

Nú verður hlé á mótinu þar til á mánudag. Þá mætast meðal annars: Einar Hjalti - Davíð, Jón Trausti - Loftur og Snorri Þór - Björn Hólm.

• Skákhuginn
• Chess-Results

 

Carlsen og Aronian efstir í St. Louis

Magnus Carlsen (2853) er kominn á mikinn skrið á Sinquefield-mótinu. Í fimmtu umferð, sem fram fór í gær, vann hann Wesley So (2779). Norðmaðurinn er efstur ásamt Levon Aronian (2765) sem gerði jafntefli við Grischuk í hörkuskák (2771). Topalov (2816) sem var efstur fyrir umferðina tapaði hins vegar vegar fyrir Caruana (2808) og er í 3.-4. sæti ásamt Anish Giri (2793) með 3 vinninga. 

Vert er að benda á góða umfjöllum á Chess24.

Frídagur er í dag. Sjötta umferð fer fram á morgun og hefst kl. 18. Þá mætast forystusauðirnir Aronian og Carlsen.

• Heimasíða mótsins
• Beinar útsendingar

 

 

Íslandsmót skákfélaga hefst 24. september

Fyrri hluti Íslandsmóts skákfélaga 2015-2016 fer fram dagana 24. – 27. sept.  nk.  Mótið fer fram í Rimaskóla í Reykjavík.  1. umferð (eingöngu í 1.deild) mun hefjast kl. 19.30 fimmtudaginn 24. september. Aðrar deildir munu hefja taflmennsku föstudaginn 25. september. kl. 20.00 og síðan tefla laugardaginn 26. september. kl. 11.00 og kl. 17.00 sama dag.  Síðasta umferðin í fyrri hlutanum hefst kl. 11.00 sunnudaginn 27. september.

Umhugsunartími er 90 mín. á skákina + 30 sek. viðbótartími bætist við eftir hvern leik.

Þátttökugjöld:                       

• 1. deild kr. 55.000.-
• 2. deild kr. 50.000.-
• 3. deild kr. 15.000.-
• 4. deild kr. 15.000.-

Skáksamband Íslands mun greiða fargjöld utan stór-Reykjavíkursvæðisins samkvæmt reikningum fyrir sveitir í 1. og 2. deild.  Miða skal við einn brottfararstað á hverju svæði, t.d. Akureyri, Egilsstaði, Ísafjörð.  Sami háttur verður hafður í 3. og 4. deild og áður, þ.e. þátttökugjöld höfð lág en sveitirnar verða sjálfar að sjá um ferðakostnað á skákstað. 

Meðfylgjandi er 3. kafli skáklaga Skáksambands Íslands sem varða Íslandsmót skákfélaga.  Ný reglugerð verður send fljótlega.

Vakin er athygli á viðbót við 2. grein reglugerðar um Íslandsmót Skákfélaga:

2. gr.

Framkvæmdanefnd Íslandsmóts skákfélaga, sem skipuð er af stjórn Skáksambands Íslands, ákveður töfluröð og skipar skákstjóra og umsjónarmenn Íslandsmóts skákfélaga.  Öllum taflfélögum, sem eiga sveitir í 1. deild, ber að útvega einn skákstjóra.  

Athugið að tilkynningar v. Keppendaskrár Skáksambands Íslands skulu hafa borist SÍ í síðasta lagi 4. september nk. sbr. 18. gr. skáklaga. 

Vakin er athygli á eftirfarandi texta í 19. grein skáklaga:  „Fyrir upphaf 1.umferðar fyrri hluta ÍS skulu félögin skila inn styrkleikaröðuðum lista allra þeirra keppenda sem þeir hyggjast nota í keppninni.“ 

Skráning fer fram á Skák.is. Að gefnu tilefni er minnt á að nauðsynlegt er að skrá sveitir í keppnina, ekki síst í 4. deild.

Stjórn SÍ mælist til – af gefnu tilefni - að félögin skrái ekki fleiri sveitir til keppni en þau treysta sér til að manna í báðum hlutum keppninnar.