Aronian með vinningsforskot fyrir lokaumferðina

Armeninn Levon Aronian (2765) hefur vinningsforskot fyrir lokaumferð Sinquefield-mótins sem hefst nú kl. 18. Í gær gerði hann jafntefli við Vishy Anand (2816). Öðrum skákum umferðarinnar lauk einnig með jafntefli og aldrei þessu vant tókst Carlsen (2853) ekki að leggja Nakamura (2814) að velli. Carlsen er í 2.-4. sæti ásamt Grischuk (2771) og MVL (2731).

Í lokaumferðinn teflir Aronian við Topalov (2816), Carlen við Anand, Grischuk við Nakamura og MVL við Giri. 

Gæti orðið mjög spennandi umferð sérstaklega þar sem Topalov hefur hvítt gegn Aronian.

Góða umfjöllun um umferð gærdagsins má finna á Chess24.

 

 

• Heimasíða mótsins
• Beinar útsendingar

Skákæfingar Breiðabliks hefjast 7. september

Viltu æfa skák af alvöru og ná afreksmörkum Skáksambands Íslands ?

Skákdeild Breiðabliks í samstarfi við Skákakademíu Kópavogs og Skákskóla Íslands býður í vetur upp á öfluga skákþjálfun með það að markmiði.

Boðið er upp á æfingatíma í Glersalnum í stúkunni við Kópavogsvöll mánudaga til föstudaga frá 16:00 – 17:30.

Þjálfari er Birkir Karl Sigurðsson FIDE National Instructor

Æfingarnar henta skákkrökkum á grunnskólaaldri sem hafa náð grunnfærni í skák, hafa mikinn áhuga og vilja æfa af alvöru til að stefna að því að verða í fremstu röð á Íslandi og  að standa sig með sóma á alþjóðlegum barna- og unglingaskákmótum.

Hver iðkandi velur sér þrjár æfingar í viku, en frjálst verður að hafa þær fleiri eða færri. Einnig verður hægt að velja um að mæta seinna og fara fyrr ef tíminn t.d. rekst á aðrar tómstundir. Við búumst við að geta myndað tvo kjarna, eldri og reyndari krakkar og svo hóp af ungum og efnilegum.

Iðkendur utan Kópavogs og í hvaða taflfélagi sem er eru velkomnir. Allir geta mætt í nokkur skipti til að prófa án æfingagjalds.

Fyrsta æfing: Mánudaginn 7.september

Æfingagjöld veturinn 2015-16: (eru styrkhæf sem tómstundastyrkur hjá Kópavogsbæ og Reykjavíkurborg):

Þrisvar sinnum eða oftar í viku: 30.000 kr.
Tvisvar sinnum í viku: 20.000 kr.
Einu sinni í viku: 10.000 kr. 

Skráning á  https://breidablik.felog.is/ eða bara að mæta á æfingu til að prófa!   

Skák eflir skóla - kennari verður skákkennari: heimasíða komin í loftið

Verkefnið Skák eflir skóla - kennari verður skákkennari er nú hafið. Megin inntak verkefnisins er að fjölga skákkennurum innan grunnskólanna. Skáksambandið sinnir verkefninu fyrir hönd mennta- og menningarmálaráðuneytisins. Verkefnisstjóri er Stefán Bergsson.

Lesa má um verkefnið á heimasíðu þess:

www.skakkennari.is

Einar Hjalti, Davíð og Loftur efstir á Meistaramóti Hugins

Einar Hjalti Jensson (2394), Davíð Kjartansson (2366) og Loftur Baldvinsson (1988) eru efstir með 3,5v eftir fjórar umferðir á Meistarmóti Hugins. Í fjórðu umferð bar það helst til tíðinda á efstu borðum að Davið og Einar Hjalti sömdu stutt jafntefli og tók Einar Hjalti stefnuna á Faxafenið strax að henni lokinn. Loftur vann svo Jón Trausta á öðru borði og tók sér stöðu meðal efstu manna. Næstir koma svo Snorri Þór Sigurðsson (1956), Bárður Örn Birkisson (1854) og núverandi skákmeistari Hugins (suðursvæði) Dawid Kolka (1819) en þeir eru allir með 3v.

Í fimmtu umferð þá mætast meðal annars: Loftur – Einar Hjalti, Davíð – Dawid, Veronika – Bárður og Elvar Örn -Jón Trausti.

• Skákhuginn
• Chess-Results

Æsir hefja taflmennsku í dag eftir sumarfrí

Æsir eru að vakna eftir sumarsvefninn. Þeir byrja að tefla þriðjudaginn 1 september í Ásgarði, félagsheimili eldri borgara í Reykjavík sem er í Stangarhyl 4.

Allir eldri borgarar sem hafa gaman af skák hjartanlega velkomnir til leiks, karlar 60+ og konur 50+.

Við teflum alla þriðjudaga frá kl 13.00 til 16.30

Þátttökugjald er kr. 500 innifalið kaffi og meðlæti.

Hittumst hress á hvítum reitum og svörtum.

Stjórn Ása.

Aronian með vinningsforskot - Carlsen tapaði fyrir Grischuk

Armeninn Levon Aronian (2765) náði vinningsforskoti á Sinquefield-mótinu með því að leggja Nakamura (2814) að velli í sjöundu umferð sem fram fór í gær. Carlsen (2853) tapaði hins vegar fyrir Grischuk (2771) og eru þeir í 2.-5. sæti ásamt MVL (2731) og Giri (2793).

Góða umfjöllun um umferð gærdagsins má finna á Chess24.

Áttunda og næstsíðasta umferð hefst nú kl. 18. Þá teflir Carlsen við Nakamura og Aronian við Anand (2816) sem hefur engan veginn náð sér á strik.

 

• Heimasíða mótsins
• Beinar útsendingar

Áskell sigurvegari Startsmóts SA

Hið árlega startmót Skákfélags Akureyrar var haldið næstsíðasta dag ágústmánaðar og markar mótið að venju upphaf skákvertíðarinnar nyðra. Flautað var til leiks kl. 13 en þá voru níu keppendur mættir til leiks - þannig að greinilegt er að ekki eru allir skákskörungar enn vaknaðir af sumardvala. Tefld var tvöföld umferð, en vegna anna þurfti Smári Ólafsson að draga sig í hlé eftir fyrri hlutann, þá komin með þrjá og hálfan vinning.

Úrslit urðu annars sem hér segir:

Áskell Örn Kárason	13
Jón Kristinn Þorgeirsson	10½
Símon Þórhallsson	10
Haraldur Haraldsson	9
Sigurður Arnarson	8½
Sveinbjörn Sigurðsson	4½
(Smári Ólafsson	3½)
Sigurður Eiríksson	3
Karl Steingrímsson	2

Dramatískur sigur Bolvíkinga á unglingasveit TR

Unglingasveit TR og Bolvíkingar áttust við í 8 liða úrslitum hraðskákkeppni taflfélaga í kvöld. TR-ingar sýndu strax að þeir eru í mun betri æfingu og sneggri á klukkunni. Auk þess sem Bolvíkingar voru ekki alveg með nýjustu hraðskákreglur og hreinu og köstuðu frá sér vinningum með því að drepa kóng og vekja upp drottningu á rangan hátt. TR vann 4 af fyrstu 6 viðureignunum og höfðu öruggt forskot í hálfleik 21-15.

Bolvíkingar gerðu þá skiptingu þegar Halldór Grétar kom inn fyrir Gísla Gunnlaugs. Halldór lenti í vinnu útkalli snemma dags og kom beint úr því í seinni umferðina. Þessi skipting reyndist afdrifarík því strax í fyrstu umferð seinni hálfleiks unnu Bolvíkingar 5-1 sigur. Keppnin var því orðin spennandi en í næstu 4 umferðum urðu 3 jafntefli og 1 sigur með minnsta mun. Fyrir síðustu umferð var TR með eins vinnings forskot. Eftir mikla baráttu náðu Bolvíkingar að vinna loka umferðina með minnsta mun og keppnin endaði því 36-36.

Bolvíkingar unnu eftir bráðabana

Reglur keppninnar kveða á um að þá sé tefldur bráðabani og höfðu Bolvíkingar sigur 3,5-2,5. Þetta gat því ekki orðið mjórra á munum.

Jóhann Hjartarson dró bolvíska vagninn og Guðni Stefán var mjög öflugur. Halldór Grétar kom svo sterkur inn í seinni hlutann. Við hinir kroppuðum nokkra vinninga en ekkert meira en það. Höfum oft teflt mun betur en í kvöld en tökum ekkert af öflugum andstæðingum.

Hjá unglingunum dreifðust vinningarnir betur og ljóst er að TR á marga sterka og efnilega unglinga. Það sýndu þeir svo sannarlega í kvöld og eiga mikið hrós skilið fyrir frammistöðuna. Framtíðin er björt hjá hinu öfluga og virka Taflfélagi Reykjavíkur.

Guðmundur M. Daðason

Hraðskákkeppni taflfélaga: Risaleikur í Feninu í kvöld

Í kvöld, mánudag, fer fram risaleikur í hraðskákkeppni taflfélaga þegar A sveit Hugins mætir A sveit Taflfélags Reykjavíkur.

Líkleg lið liðanna eru:

Huginn: Hjörvar Steinn Grétarsson, Helgi Ólafsson, Stefán Kristjánsson, Helgi Áss Grétarsson, Þröstur Þórhallsson, Einar Hjalti Jensson, Ingvar Þór Jóhannesson og Magnús Örn Úlfaarsson.

TR: Hannes Hlífar STefánsson, Henrik Danielsen, Jón Viktor Gunnarsson, Karl Þorsteins, Guðmundur Kjartansson, Arnar Gunnarsson, Bragi og Björn Þorfinnssynir.

Eins og sjá er liðin ákaflega áþekk af styrkleika.

Viðureignin fer fram á heimavelli TR í Feninu (Faxafen 12) og keppnin hefst 20:00. Áhorfendur velkomnir!

Hraðskákeppni taflfélaga

Úrslit/pörun annarrar umferðar:

• Skákfélag Akureyrar – Víkingaklúbburinn 45-27
• Taflfélag Bolungarvíkur – TRuxvi 39,5-38,5 eftir bráðabana
• Taflfélag Reykjavíkur – Skákfélagið Huginn a-sveit (Mánudaginn, 31. ágúst í TR, kl. 20:00)
• Skákfélagið Huginn b-sveit – Taflfélag Garðabæjar 60-12

Litla bikarkeppnin

Úrslit/pörun fyrstu umferðar

• Skákfélag Íslands – Skákgengið (Skákgengið gaf án taflmennsku)
• Ungmennasamband Borgarfjarðar – Skákfélag Selfoss og nágrennis34-38
• Vinaskákfélagið – Skákddeild Fjölnis (dags. ekki vituð)
• Skákdeild Hauka – Skákfélag Reykjanesbæjar (Haukar gáfu án taflmennsku).

Átta liða úrslitum á að vera lokið í sl. 31. ágúst.

Bikarsyrpa TR hefst á föstudaginn

Bikarsyrpa Taflfélags Reykjavíkur fer nú af stað annað árið í röð eftir góðar móttökur í fyrra. Mótum syrpunnar hefur verið fjölgað og telur hún alls sex kappskákmót sem eru ætluð börnum á grunnskólaaldri (fædd 2000 og síðar) sem ekki hafa náð 1600 skákstigum. Þar með gefst þeim tækifæri til að næla sér í alþjóðleg skákstig á skákmótum sem sérhönnuð eru fyrir þau.

Fyrsta mótið í syrpunni hefst föstudaginn 4. september og stendur til sunnudagsins 6. september. Tefldar eru 5 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo við leggjum ætíð áherslu á að krakkarnir vandi sig og noti tímann vel, þá má gera ráð fyrir að margar skákir taki mun styttri tíma.

Mótið er sérstaklega hugsað fyrir krakka sem hafa sótt skákæfingar TR (og/eða annarra taflfélaga) reglulega síðastliðinn vetur eða lengur. Það er gott að byrja sem fyrst að keppa á kappskákmótum, en hingað til hefur þeim krökkum sem vilja tefla á “alvöru mótum” mestmegnis staðið til boða að taka þátt í opnum mótum. Þar er styrkleikamunurinn oft mikill, mótin taka langan tíma, auk þess sem marga krakka óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því.

Einungis börn og unglingar á grunnskólaaldri sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og krakkarnir njóta þess betur að tefla kappskákir. Tímamörkin eru líka styttri, og henta krökkunum betur en langar 90 mínútna skákir sem tíðkast á venjulegum kappskákmótum. Mótið uppfyllir öll skilyrði Alþjóða skáksambandsins FIDE og er reiknað til alþjóðlegra skákstiga sem gott er að byrja að safna snemma. Eins og á aðra viðburði félagsins þá er frítt í mótin fyrir krakka í Taflfélagi Reykjavíkur. Fyrir krakka í öðrum taflfélögum er þátttökugjaldið 1000 krónur fyrir hvert mót Bikarsyrpunnar.

Dagskrá:
1. umferð 17.30 á föstudegi (4. september)
2. umferð 10.30 á laugardegi (5. september)
3. umferð 14.00 á laugardegi (5. september)
4. umferð 10.30 á sunnudegi (6. september)
5. umferð 14.00 á sunnudegi  (6. september). (Lokaumferð + verðlaunaafhending).

Vinsamlegast skráið þátttakendur sem fyrst, það hjálpar við undirbúning mótsins!

• Skráningarform
• Skráðir keppendur

Bikarsyrpan samanstendur af sex mótum í vetur. Bikarar og medalíur eru í verðlaun fyrir efstu sætin í hverju
 móti, en auk þess verða veitt sérstök verðlaun fyrir samanlagðan árangur á mótunum.

Hlökkum til að sjá ykkur!

Sigurvegarar Bikarsyrpunnar 2014-2015:

• Mót 1: Mykhaylo Kravchuk
• Mót 2: Aron Þór Mai
• Mót 3: Jóhann Arnar Finnsson
• Mót 4: Mykhaylo Kravchuk
• Bestur samanlagður árangur: Mykhaylo Kravchuk

Pistill um lokamót Bikarsyrpunnar 2014-2015.