Haustmót TR hefst á sunnudaginn

Haustmót Taflfélags Reykjavíkur 2015 hefst sunnudaginn 13. september kl.14. Mótið, sem er hið 82. í röðinni, er eitt af aðalmótum vetrarins í reykvísku skáklífi og er jafnframt meistaramót T.R. Mótið er flokkaskipt og öllum opið.

Haustmótið fer fram í félagsheimili Taflfélags Reykjavíkur, skákhöllinni að Faxafeni 12. Tefldar verða tvær umferðir á viku. Alls eru níu umferðir í hverjum flokki. Lokuðu flokkarnir eru skipaðir tíu keppendum hver þar sem allir tefla við alla, en í opna flokknum er teflt eftir svissnesku kerfi.

Skráningu í alla lokaða flokka lýkur laugardaginn 12. september kl. 18.

Lokaumferð fer fram föstudaginn 16. október en mótinu lýkur með verðlaunaafhendingu sunnudaginn 18. október þegar Hraðskákmót TR fer fram.

Núverandi skákmeistari Taflfélags Reykjavíkur er Þorvarður Fannar Ólafsson.

Skráningarform

Skráðir keppendur

Dagskrá:

• 1. umferð: Sunnudag 13. september kl. 14.00
• 2. umferð: Miðvikudag 16. september kl. 19.30
• 3. umferð: Sunnudag 20. september kl. 14.00
• —Hlé vegna Íslandsmóts skákfélaga—
• 4. umferð: Miðvikudag 30. september kl.19.30
• 5. umferð: Sunnudag 4. október kl. 14.00
• 6. umferð: Miðvikudag 7. október kl. 19.30
• 7. umferð: Sunnudag 11. október kl. 14.00
• 8. umferð: Miðvikudag 14. október kl. 19.30
• 9. umferð: Föstudag 16. október. kl. 19.30

Verðlaun í A-flokki:
1. sæti kr. 100.000
2. sæti kr. 50.000
3. sæti kr. 25.000
4. og 5. sæti ókeypis í Skákþing Reykjavíkur 2016

Verðlaun í B-flokki:
1. sæti kr. 20.000
2.-3. sæti ókeypis í Skákþing Reykjavíkur 2016

Verðlaun í C-flokki:
1. sæti kr. 15.000
2. og 3. sæti ókeypis í Skákþing Reykjavíkur 2016

Verðlaun í opnum flokki:
1. sæti kr. 10.000
2. og 3. sæti ókeypis í Skákþing Reykjavíkur 2016

Ef lokuðum flokkum fjölgar þá verða verðlaun í þeim þau sömu og í C-flokki. Að auki ávinnur sigurvegari hvers flokks sér þátttökurétt í næsta styrkleikaflokki að ári liðnu. Verði keppendur jafnir í efstu sætum verður peningaverðlaunum skipt en stigaútreikningur látinn ráða lokaröð keppenda. Taflfélag Reykjavíkur áskilur sér jafnframt rétt til þess að halda eftir 25% af verðlaunafé þeirra sem ekki mæta á verðlaunaafhendinguna.

Tímamörk:
1 klst. og 30 mín. + 30 sek. á leik. Að loknum 40 leikjum bætast við 15 mínútur.

Þátttökugjöld:
3.500 kr. fyrir félagsmenn T.R. 16 ára og eldri (5.000 kr. fyrir aðra).
1.500 kr. fyrir félagsmenn T.R. 15 ára og yngri (2.500 kr. fyrir aðra).

Uppgjör Haustmótsins 2014

Skákæfingar Breiðabliks hefjast í dag

Viltu æfa skák af alvöru og ná afreksmörkum Skáksambands Íslands ?

Skákdeild Breiðabliks í samstarfi við Skákakademíu Kópavogs og Skákskóla Íslands býður í vetur upp á öfluga skákþjálfun með það að markmiði.

Boðið er upp á æfingatíma í Glersalnum í stúkunni við Kópavogsvöll mánudaga til föstudaga frá 16:00 – 17:30.

Þjálfari er Birkir Karl Sigurðsson FIDE National Instructor

Æfingarnar henta skákkrökkum á grunnskólaaldri sem hafa náð grunnfærni í skák, hafa mikinn áhuga og vilja æfa af alvöru til að stefna að því að verða í fremstu röð á Íslandi og  að standa sig með sóma á alþjóðlegum barna- og unglingaskákmótum.

Hver iðkandi velur sér þrjár æfingar í viku, en frjálst verður að hafa þær fleiri eða færri. Einnig verður hægt að velja um að mæta seinna og fara fyrr ef tíminn t.d. rekst á aðrar tómstundir. Við búumst við að geta myndað tvo kjarna, eldri og reyndari krakkar og svo hóp af ungum og efnilegum.

Iðkendur utan Kópavogs og í hvaða taflfélagi sem er eru velkomnir. Allir geta mætt í nokkur skipti til að prófa án æfingagjalds.

Fyrsta æfing: Mánudaginn 7.september

Æfingagjöld veturinn 2015-16: (eru styrkhæf sem tómstundastyrkur hjá Kópavogsbæ og Reykjavíkurborg):

Þrisvar sinnum eða oftar í viku: 30.000 kr.
Tvisvar sinnum í viku: 20.000 kr.
Einu sinni í viku: 10.000 kr. 

Skráning á  https://breidablik.felog.is/ eða bara að mæta á æfingu til að prófa!   

Barna- og unglingaæfingar Hugins hefjast í dag

Barna- og unglingaæfingar Hugins í Mjóddinni hefjast aftur eftir sumarfrí mánudaginn 7. september 2015.

 

Æfingarnar byrja kl. 17:15 og þeim lýkur yfirleitt rétt fyrir kl. 19.

 

Æfingarnar eru opnar öllum 15 ára og yngri en skipt verður í tvo flokka eftir aldri og styrkleika á flestum æfingum.

 

Engin þátttökugjöld.

 

Æfingarnar verða haldnar í félagsheimili Hugins í Álfabakka 14a, Mjódd. Inngangur er milli Fröken Júlíu og Subway en salur félagsins er á þriðju hæð hússins.

 

Á æfingunum verða 5 eða 6 umferðir með umhugsunartíma 10 eða 7 mínútur. Einnig verður farið í dæmi og endatöfl eins og tíma vinnst til.

 

Þegar starfsemin verður komin vel af stað verður unnið í litlum verkefnahópum á einni æfingu í mánuði og þannig stuðlað að því að efla einingu og samstöðu innan hópsins.  Þær æfingar verða eingöngu fyrir félagsmenn og verða kynntar síðar. Jafnframt verður þegar tímabilið er komið vel af stað í boði kennsla fyrir félagsmenn á miðvikudögum og laugardagsmorgnum.

 

Umsjón með æfingunum hefur Vigfús Ó. Vigfússon, sem hefur lokið þjálfaraprófi frá FIDE.

Skákæfingar hjá SA fyrir börn og unglinga hefjast í dag

Námskeið fyrir 7-10 ára hefst nk. mánudag 7. september kl. 16.00, skráning frá kl. 15.00, eða í [e-mail]. Námskeiðið tekur fyrir 10 mánudaga á haustmisseri, auk lokamóts. 

Gert er ráð fyrir að nemendur kunni mannganginn... (að mestu) og verður kennslan við það miðuð. 

Umsjón hefur Áskell Örn Kárason, FIDE-þjálfari.

Æfingar í framhaldsflokki (11-16 ára) verða á miðvikudögum kl. 17-18.30. Fyrsta æfing 9. september og eru foreldrar boðaðir til fundar hálftíma fyrir æfingu, eða kl. 16.30. Framhaldsflokk skipa þau börn og unglingar sem náð hafa 11 ára aldri og sóttu æfingar hjá félaginu sl. vetur. Til viðbótar geta komið aðrir iðkendur sem hafa sambærilega getu eða færni. Skráning er á staðnum kl. 16.30, eða í [e-mail].

Umsjón hefur Sigurður Arnarson, FIDE-þjálfari.

Æfingagjald í báðum flokkum er kr. 5.000 á önn og er innifalið í því ókeypis þátttaka í öllum mótum félagsins.

Allar nánari upplýsingar gefa þeir Áskell (s. 897-8055) og Sigurður (s. 892-1105), í síma, með tölvupósti eða skilaboðum á Facebook-síðu félagsins

Róbert Luu sigraði á fyrsta móti Bikarsyrpunnar!

Stigahæstu keppendurnir þeir Aron Þór Mai (1502) og Róbert Luu (1490) tóku snemma forystu og mættust svo báðir með fullt hús í fjórðu umferðinni sem fram fór í morgun. Þeirri skák lauk með jafntefli og því ljóst að úrslitin myndu ráðast í lokaumferðinni sem fram fór seinnipartinn.

Róbert tefldi þá við hina efnilegu Freyju Birkisdóttir (1308) meðan Aron Þór beið það erfiða verkefni að þurfa helst sigur gegn Guðmundi Agnari Bragasyni (1368) með svörtu mönnunum.  Róbert vann sína skák örugglega, meðan Aron og Guðmundur tefldu lengstu skák umferðarinnar.  Aron vann þar peð í miðtaflinu en Guðmundur varðist fimlega og náði að læsa stöðunni í endatafli.  Í staðinn fyrir að sættast á skiptan hlut brá Aron Þór á það ráð að þyrla upp ryki og fórna biskup til að koma kóngi sínum inn fyrir varnir Guðmundar.  Hugmyndin var góð, en Guðmundur var vandanum vaxinn, fann réttu leikina og sigraði að lokum.  Þessi sigur fleytti honum upp í annað sætið á stigum en jafn honum í mark með fjóra vinninga kom Jón Þór Lemery sem sigraði Björn Magnússon í vel tefldri skák.

Jafnir í fjórða til fimmta sæti komu svo bræðurnir Aron Þór og Alexander Oliver með þrjá og hálfan vinning hvor.

Af stúlkunum stóð Freyja sig best en hún hlaut þrjá vinninga og tapaði einungis skák sinni gegn sigurvegara mótsins.

Margir af þeim krökkum sem nú tóku þátt í Bikarsyrpunni eru þrátt fyrir ungan aldur orðin sjóuð í að tefla með “Bikarsyrpu tímamörkunum” sem eru lengri en gengur og gerist í mörgum barna og unglingamótum.  Það er sífellt sjaldnar sem ólöglegir leikir eða slæmir fingurbrjótar sökum þess að krakkarnir séu að flýta sér sjáist.

Nokkrir ungir keppendur sem áttu það til að vera með fullkvika putta í fyrra voru í þessu móti hinir rólegustu, notuðu tímann vel og uppskáru samkvæmt því.  Þar má t.d. nefna Adam Omarsson, Arnar Milutin Heiðarsson og Kristján Dag Jónsson sem allir hlutu þrjá vinninga og voru að tefla skínandi vel og af yfirvegun.

Alls tóku 28 keppendur þátt í fyrsta móti Bikarsyrpunnar sem verður að teljast ágætt í byrjun tímabilsins. 20 keppendur komu úr TR, fjórir úr Hugin, þrír frá Fjölni og einn frá Breiðablik.  Næsta mót í syrpunni fer fram eftir mánuð og hefst sjötta október.

Taflfélag Reykjavíkur óskar sigurvegurum mótsins til hamingju og þakkar öllum þeim sem tóku þátt. Vonumst til að sjá sem flest ykkar á næstu viðburðum félagsins!

Úrslit og lokastöðuna má finna hér.

Myndskreytta frásögn má finna á heimasíðu TR.

Skákþáttur Morgunblaðsins: Guðmundur náði lokaáfanganum í Litháen

Guðmundur Kjartansson sigraði á skákmótinu í Panevezys í Litháen sem lauk um síðustu helgi. Með sigrinum sló Guðmundur tvær flugur í einu höggi: vann mótið og náði lokaáfanga að stórmeistaratitli. Nú þarf hann aðeins að bæta við stigatölu sína til að hljóta útnefningu hjá FIDE; stigatala hans stendur nú í 2.474 Elo-stigum en markið er 2.500 Elo-stig. Guðmundur, sem varð Íslandsmeistari í fyrra, hefur átt misjöfnu gengi að fagna undanfarið en hrökk í gang í Litháen. Árangur hans mælist upp á 2.661 Elo-stig, en hann hlaut ½ vinningi meira en til þurfti. Margir þekktir meistarar voru með í mótinu en lokastaðan varð þessi: 1. Guðmundur Kjartansson 7 v.(af 9) 2. Maxim Lugovskí (Rússland) 6½ v. 3. Titas Stremavcius (Litháen) 6 v. 4. Normund Miezes (Lettland) 5 v. 5.-6. Tapani Sammalvuo ( Finnland) og Lukasz Jarmula (Pólland) 4 v. 7.-8. Andrei Maksimenko ( Úkraína ) og Ottomar Ladva ( Eistaland) 3½ v. 9. Ilmars Starotits (Lettland) 3 v. 10. Roland Lötcher (Sviss) 2½ v. Meðal næstu verkefna Guðmundar er „Milljón dollara mótið“ í Las Vegas.

 

Aftur tapar Magnús Carlsen fyrir Topalov

Helsti skákklúbbur Bandaríkjanna um þessar mundir er í St. Louis í Missouri-ríki en þar stendur nú yfir stórmót sem ber nafnið Sinquefield-bikarinn. Kostnaðarmaður mótsins og klúbbsins er bandaríski auðjöfurinn Rex Sinquefield, sem jafnframt rekur þar frægðarhöll skákarinnar. Þetta er í þriðja sinn sem þetta mót fer fram. Árið 2013 sigraði Magnús Carlsen en á mótinu í fyrra vann Fabiano Caruana fyrstu sjö skákir sínar og sigraði með yfirburðum. Sem fyrr beinist athyglin að Magnúsi Carlsen, sem aftur hóf stórmót með því að tapa fyrir Veselin Topalov. Hann vann svo heppnissigur yfir Caruana í 2. umferð og skákir sínar í þriðju umferð og fimmtu umferð og er greinilega staðráðinn í að berjast um efsta sætið. Staðan eftir fimm umferðir: 1. -2. Aronjan og Carlsen 3 ½ v. 3. - 4. Topalov og Giri 3 v. 5. - 6. Nakamura og Vachier Lagrave 2 ½ v. 7. - 8. Caruana og Grischuk 2 v. 9. - 10. So og Anand 1 ½ v.

Armenar hafa lengi bundið miklar vonir við sinn fremsta mann, Levon Aronjan, en hann hefur fallið í skuggann af yngri mönnum og á erfitt uppdráttar þegar hann teflir við Magnús Carlsen. En hann hefur teflt manna best í St. Louis, sbr. glæsilega sigurskák hans í 4. umferð:

Wesley So – Levon Aronjan

Nimzo-indversk vörn

1. d4 Rf6 2. c4 e6 3. Rc3 Bb4 4. f3 c5 5. d5 O-O 6. e4 d6 7. Rge2 a6

Í þessu vinsæla afbrigði hefur áður verið reynt að leika 7. ... b5. Aronjan lætur sér nægja að hóta þeim leik.

8. a4 Ba5 9. Bd2 exd5 10. cxd5 Rh5 11. g3 Rd7 12. Bg2 b5 13. g4?!

Vafasamur leikur sem Aronjan er fljótur að refsa.

13. ... b4! 14. Rb1 Dh4+ 15. Kf1 Re5!

Aldrei að víkja! 16. gxh5 er nú svarað með 16. ... f5! með sterkri sókn eftir f-línunni.

16. Be1 Df6 17. gxh5 Rxf3 18. Bf2 Bg4 19. Dc1 Rd4 20. Rxd4 cxd4 21. e5?! dxe5 22. Rd2 Hac8 23. Db1 b3! 24. Rxb3

Eða 24. Re4 Df4 o.s.frv.

24. ... Bb6 25. a5 Ba7 26. Kg1 Bf5 27. Be4 Dg5+ 28. Kf1 Df4!

Laglegur lokahnykkur. Eftir 29. Bxf5 kemur 29. ... d3! og eftir 30. De1 Hc2 er hvítur varnarlaus. So lagði því niður vopn.

Hægt er að fylgjast með beinum útsendingum á vefnum Chess24. Útsendingar hefjast kl. 18. 

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu 

Grein þessi birtist í Morgunblaðinu 29. ágúst 2015

Skákþættir Morgunblaðsins

[Event "Sinquefield Cup"] [Site "Saint Louis USA"] [Date "2015.08.26"] [EventDate "2015.08.21"] [Round "4"] [Result "0-1"] [White "Wesley So"] [Black "Levon Aronian"] [ECO "E20"] [WhiteElo "2779"] [BlackElo "2765"] [PlyCount "56"] 1. d4 Nf6 2. c4 e6 3. Nc3 Bb4 4. f3 c5 5. d5 O-O 6. e4 d6 7. Nge2 a6 8. a4 Ba5 9. Bd2 exd5 10. cxd5 Nh5 11. g3 Nd7 12. Bg2 b5 13. g4 b4 14. Nb1 Qh4+ 15. Kf1 Ne5 16. Be1 Qf6 17. gxh5 Nxf3 18. Bf2 Bg4 19. Qc1 Nd4 20. Nxd4 cxd4 21. e5 dxe5 22. Nd2 Rac8 23. Qb1 b3 24. Nxb3 Bb6 25. a5 Ba7 26. Kg1 Bf5 27. Be4 Qg5+ 28. Kf1 Qf4 0-1

Einar Hjalti og Davíð efstir á Meistaramóti Hugins

Sjötta umferð á Meistarmóti sem fram fór sl. , hófst meðan á landsleik Hollands og Íslands stóð. Keppendur skiluð sér samt vel í hús þótt einhverjir hefðu tekið sótt fyrr um daginn og látið vita. Keppendur ákváðu að seinka umferðinni um nokkrar mínútur meðan fyrri hálfleikur var að klárast og horfa á lok hans á tjaldinu í keppnisalnum. Meðan á seinni hálfleik stóð var fyrst hægt að fylgjast með stöðunni á tjaldinu í gegnum mbl.is. Síðar þegar skákstjóraherbergið losnaði var bein útsending sett aftur í gang tölvu skákstjóra þar inni sem menn gátu litið á leikinn meðan andstæðingurinn var að hugsa. Það var samt ekki mikið um stutt jafntefli og t.d. stóð skák Arons Þórs Mai (1478) og Björns Hólm Birkisonar (1907) fram yfir miðnætti.

Davíð Kjartansson (2366) og Einar Hjalti Jensson (2394) eru efstir með 5½ vinning eftir sjöttu umferð. Einar Hjalti lagði Bárð Örn Birkisson (1854)  og Davíð vann Loft Baldvinsson (1988). Snorri Þór Sigurðsson (1956), sem vann Eirík Björnsson (1959), er þriðji með 4,5 vinninga. Snorri er líka sá eini sem getur náð forystusauðunum að vinningum í lokaumferðinni en til þess þarf mikið að ganga á.

Sjöunda og síðasta umferð fer fram á mánudaginn. Þá teflir við Einar Hjalti við Snorra Þór og Davíð við Jón Trausta.

• Skákhuginn
• Chess-Results

Barna- og unglingaæfingar Hugins í Mjóddinni hefjast á mánudaginn

Barna- og unglingaæfingar Hugins í Mjóddinni hefjast aftur eftir sumarfrí mánudaginn 7. september 2015.

 

Æfingarnar byrja kl. 17:15 og þeim lýkur yfirleitt rétt fyrir kl. 19.

 

Æfingarnar eru opnar öllum 15 ára og yngri en skipt verður í tvo flokka eftir aldri og styrkleika á flestum æfingum.

 

Engin þátttökugjöld.

 

Æfingarnar verða haldnar í félagsheimili Hugins í Álfabakka 14a, Mjódd. Inngangur er milli Fröken Júlíu og Subway en salur félagsins er á þriðju hæð hússins.

 

Á æfingunum verða 5 eða 6 umferðir með umhugsunartíma 10 eða 7 mínútur. Einnig verður farið í dæmi og endatöfl eins og tíma vinnst til.

 

Þegar starfsemin verður komin vel af stað verður unnið í litlum verkefnahópum á einni æfingu í mánuði og þannig stuðlað að því að efla einingu og samstöðu innan hópsins.  Þær æfingar verða eingöngu fyrir félagsmenn og verða kynntar síðar. Jafnframt verður þegar tímabilið er komið vel af stað í boði kennsla fyrir félagsmenn á miðvikudögum og laugardagsmorgnum.

 

Umsjón með æfingunum hefur Vigfús Ó. Vigfússon, sem hefur lokið þjálfaraprófi frá FIDE.

Jón L. með jafntefli í maraþonskák

Stórmeistarinn Jón L. Árnason (2499) gerði jafntefli við slóvenska stórmeistarann Luka Lenic (2629) í mikilli maraþonskák (129 leikir) í fjórðu umferð alþjóðlegs móts í Rhodos í gær. Baráttujafntefli hjá Jóni sem var lengi peði undir.

Jón er efstur ásamt fimm öðrum með 3½ vinning. Í fimmtu umferð, sem hefst kl. 14 í dag, teflir Jón við stigahæsta keppenda mótsins, ísraleska stórmeistarann Evgeny Postny (2653).

Alls taka 70 skákmenn frá 17 löndum þátt í mótinu. Þar af eru sjö stórmeistarar. Jón L. er nr. 7 í stigaröð keppenda. 

• Heimasíða mótsins
• Chess-Results
• Beinar útsendingar (
• Chessbomb

 

Flugfélagshátíð Hróksins: Kætin allsráðandi í Kulusuk

Flugfélagshátíð Hróksins í Kulusuk lauk á fimmtudag með trommudansi Anda Kuitse, sem er einn kunnasti listamaður Grænlands. Kulusuk, sem er næsta nágrannaþorp Íslands, hefur iðað af skáklífi og gleði í vikunni og á miðvikudag tóku öll börnin í grunnskólanum þátt í meistaramóti í skák.

Hátíðin hófst formlega á þriðjudag með skákkennslu fyrir börnin í grunnskólanum, sem eru 45 að tölu. Að því loknu var efnt til Ísspor-fjölteflis Róberts Lagerman og Hrafns Jökulssonar, en auk þeirra var Jóhanna Engilráð Hrafnsdóttir, 6 ára, meðal leiðangursmanna Hróksins að þessu sinni.

Meistaramótið á miðvikudag var æsispennandi og bráðskemmtileg. Hin 14 ára gamla Mikilina Maratse fór með sigur af hólmi, Enos Utuaq hreppti silfrið en Jootut Maratse og David Siniale urðu jafnir í 3. sætinu. Öll fengu börnin vinninga og verðlaun, og var gleðin allsráðandi. 

Á hátíðinni hófst dreifing á 300 taflsettum sem Flugfélag Íslands leggur Hróknum til í gjafir handa börnum á Grænlandi, og 100 til viðbótar sem velunnarar félagsins lögðu til. 

Við lok hátíðarinnar lýsti Justine Boassen skólastjóri mikilli ánægju með hátíðina og starf Hróksins í Kulusuk, en liðsmenn félagsins hafa margoft komið þar í heimsókn, og voru síðast á ferðinni í febrúar á þessu ári.

Hróksmenn heimsóttu líka leikskólann í þorpinu og færðu börnunum vandaðan prjónafatnað frá prjónahópi Rauða krossins í Reykjavík.

Samhliða skákhátíðinni var efnt til sýningar í skólanum á myndum sem stúlkur í 1. bekk Barnaskólans í Reykjavík teiknuðu fyrir börnin í Kulusuk, sem þökkuðu fyrir sig með því að teikna og lita bráðskemmtilegar myndir sem sýndar verða í ýmsum skólum á Íslandi á næstunni. Veitt voru verðlaun fyrir bestu og frumlegustu myndirnar og var dómefnd skipuð þeim Friðriku Hjördísi Geirsdóttur og Jóhönnu Engilráð.

Hróksmenn hafa nú skipulagt fimm leiðangra til Grænlands á árinu og fleiri eru á döfinni í vetur. Hrókurinn þakkar öllum sem lögðu lið við hina vel heppnuðu Flugfélagshátíð í Kulusuk. Meðal bakhjarla voru FÍ, HENSON, Ísspor, Hjallastefnan, Penninn, Kjarnafæði, Einar Ben restaurant og Nói Síríus.

Fleiri myndir má finna á heimasíðu Hróksins.