Einar Hjalti efstur á Haustmóti TR eftir sigur á Braga

Alþjóðlegi meistarinn Einar Hjalti Jensson (2392) er efstur á Haustmóti TR eftir sigur á Braga Þorfinnssyni (2414) í sjöttu umferð sem fram fór í gær. Einar hefur 5 vinninga. Bragi er annar með 4½ vinning og Oliver Aron Jóhannesson (2198) er þriðji með 4 vinninga auk þess að eiga frestaða skák til góða.  

Nánar á Chess-Results.

B-flokkur:

Landsliðskonan Guðlaug Þorsteinsdóttir (1934) er efst með 5½ vinning en það þurfti Vigni Vatnar Stefánssn (1921) til að stöðva sigurgöngu hennar en þau gerðu jafntefli í gær. Agnar Tómas Möller (1854) er annar með 4½ vinning og Vignir er þriðji með 4 vinninga.

er óstöðvandi í b-flokki. Í gær vann hún Bj og Siguringi Sigurjónsson (1989) eru í 3.-4. sæti með 2½ vinning.

Úrslit má nálgast á Chess-Results.

C-flokkur:

Gauti Páll Jónsson (1769) hefur fullt hús eftir 6 vinninga. Veronika Steinunn Magnúsdóttir (1843) er önnur með 4½ vinning. Ólafur Guðmarsson og Heimir Páll Ragnarsson (1712) koma næstir með 3 vinninga.

Opinn flokkur:

Alexander Oliver Mai (1242) er efstur með 5 vinninga þrátt fyrir að vera aðeins tíundi í stigaröð 20 keppenda. Arnar Heiðarsson (1055) og Guðmundur Agnar Bragason (1354) eru næstir með 4½ vinning.

Sjá nánar á Chess-Results

Næsta umferð verður tefld á sunnudaginn.

 

• Heimasíða TR
• Chess-Results

Óskar Víkingur unglingameistari Hugins - Vignir Vatnar sigraði á mótinu

Vignir Vatnar Stefánsson sigraði á Unglingameistaramóti Hugins sem lauk á þriðjudaginn. Vignir Vatnar fékk 6,5 vinning í sjö skákum og það var Björn Hólm Birkisson sem náði jafntefli í næst síðustu umferð. Vignir Vatnar tefldi af öryggi í mótinu, lenti sjalda í vandræðum og landaði sigrinum af öryggi. Jafnir í öðru og þriðja sæti með 5,5v voru þeir bræður Bárður Örn Birkisson og Björn Hólm Birkisson. Fjórði kom svo Óskar Víkingur Davíðsson með 5v og komst hann fram úr Dawid Kolka á lokametrunum og þar með efstur Huginsmanna í mótinu og unglingameistari Hugins í fyrst sinn. Óskar er ungur að árum og getur bætt fleiri titlum í safnið síðar og Dawid hefur tvívegis unnið þennan titil þótt nokkuð sé um liðið.

Vignir Vatnar var einnig í efsta sæti í flokki 12 ára og yngri en þar var Óskar Víkingur Davíðsson í öðru sæti og Alexander Oliver Mai náð fjórða sætinu með 4v og fleiri stig en Óttar Örn Bergmann Sigfússon, Baltasar Máni Wedholm Gunnarsson og Gabriel Sær Bjarnþórsson sem einnig fengu 4v.  Stúlknameistari Hugins varð Freyja De Lelon.

Mótshaldið gekk vel fyrir sig og allir keppendurnir 28 sem hófu mótið luku því nema þrír sem tók mótið eins og venjulega mánudagsæfingu og  mættu bara fyrri daginn en létu vita af því að þeir myndu ekki mæta seinni daginn. Seinni daginn bættist svo nýr keppandi við þannig að alls voru það 29 sem tóku þátt í mótinu sem er með betri þátttöku í þessu móti. Þetta telst líka harla gott þegar horft er til þess að um er að ræða tveggja daga mót, með 20 mínútur í umhugsunartíma og nokkra unga þátttakendur með enga mótareynslu,.sem allir stóðu sig svo vel og létu deigan síga þótt stundum blési á móti.

Nánar á Skákhuganum.

 

Elsti öldungurinn efstur hjá Ásum

Tuttugu og sex öðlingar mættu til leiks í Stangarhyl í gær. Það sannaðist í gær að sumir harðna bara með aldrinum. Sá elsti, baráttujaxlinn Páll G. Jónsson, varð einn efstur með átta og hálfan vinning. Páll tapaði aðeins einni skák fyrir Þór Valtýssyni og gerði jafntefli  við Stefán Þormar. Það er nú nánast regla að Páll er í efsta hópnum.

Það má nú segja að þeir elstu hafi staðið sig nokkuð vel í dag, því að þeir fjórir semu komnir eru yfir áttrætt voru allir fyrir ofan miðju.

Þór Valtýsson og Guðfinnur R. Kjartansson urðu svo jafnir í öðru til þriðja sæti með sjö og hálfan vinning. Þór örlítið hærri á stigum. Sæbjörn Larsen og Stefán Þormar komu svo fast á hæla þeim. Þessir fjórir síðast töldu eru nánast í unglinga deildinni miðað við þá elstu. 

Sjáum nánar i úrslit í töflu og myndir frá ESE.

 

11. Alþjóðlega geðheilbrigðismótið á fimmtudagskvöld

Alþjóða geðheilbrigðismótið í skák verður haldið í Skákhöll Taflfélags Reykjavíkur, Faxafeni 12, fimmtudaginn 8. október kl. 20. Þetta er ellefta árið í röð sem mótið er haldið, en það er eitt fjölmennasta og skemmtilegasta skákmót ársins. Mótið er liður í hátíðarhöldum vegna Alþjóða geðheilbrigðisdagsins, og er opið skákmönnum á öllum aldri og er þátttaka ókeypis.

Að mótinu standa Taflfélag Reykjavíkur, Hrókurinn og Vinaskákfélagið. Meðal sigurvegara fyrri ára á Alþjóða geðheilbrigðismótinu eru stórmeistararnir Helgi Ólafsson, Hannes Hlífar Stefánsson og Jóhann Hjartarson.

Forlagið og Sögur útgáfa leggja til vinninga og eru verðlaun veitt í ýmsum flokkum. Tefldar verða 7 umferðir með 7 mínútna umhugsunartíma. Keppendur eru hvattir til að skrá sig sem fyrst á Facebook-síðu mótsins.

 

 

Áskell endurkjörinn formaður SA

Aðalfundur Skáfkfélags Akureyrar var haldinn þriðjudagskvöldið 29. september sl. Áskell Örn Kárason var endurkjörinn formaður félagsins.

Með honum í stjórn voru kjörnir (verkaskipting innan sviga):

Sigurður Arnarson (varaformaður)

Smári Ólafsson (gjaldkeri)

Andri Freyr Björgvinsson (ritari)

Haraldur Haraldsson (áhaldavörður)

Pia Vinikka (meðstjórnandi)

Að auki hefur stjórnin hvatt tvo félagsmenn til liðs við sig skv. heimild í lögum félagsins. Þetta eru þau Dalrós J. Halldórsdóttir (fulltrúi foreldra) og Hjörleifur Halldórsson (umsjónarmaður húsnæðis).

 

Brögðóttur Bragi í forystu á Haustmótinu eftir 5.umferð

Félagsheimili Taflfélags Reykjavíkur hýsti mikla hugsuði sl. sunnudag er 5.umferð Haustmóts TR var tefld. Skákmenn létu rigningarsuddann, sem lamdi rúðurnar, hvorki trufla reiknigáfu sína né innsæi. Var barist fram í rauðan dauðann á öllum borðum og margir fallegir leikir framleiddir.

Í A-flokki stýrði Einar Hjalti Jensson hvítu mönnunum til sigurs gegn hinum eitilharða Benedikt Jónassyni. Með meira rými á borðinu og biskupaparið þrengdi Einar Hjalti að svörtu stöðunni hægt og rólega þar til eitthvað varð undan að láta. Bragi Þorfinnsson beitti sinni alþekktu og lymskulegu kænsku er hann snéri á Örn Leó Jóhannsson í endatafli. Þar með heldur Bragi efsta sæti A-flokks með 4,5 vinning, en Einar Hjalti fylgir honum eins og skugginn með 4 vinninga. Þeir félagarnir mætast einmitt í 6.umferð, næstkomandi miðvikudagskvöld, og búast gárungarnir við kyngimögnuðum tilþrifum. Lenka Ptacnikova og Sævar Bjarnason áttust við í lengstu skák mótsins til þessa en hún taldi heila 112 leiki. Linntu þau ekki látum fyrr en þau höfðu leikið 50 leiki án þess að hreyfa peð eða drepa mann. Vakti Lenka máls á því og þar með var hin fræga 50 leikja regla virkjuð. Hætt er við því að innsláttarþræll Taflfélagsins muni dreyma eltingaleik riddara og biskups í nótt.

Í B-flokki hélt Agnar Tómas Möller uppteknum hætti og vann Siguringa Sigurjónsson. Agnar Tómas er því enn taplaus í mótinu og hefur 4 vinninga. Bárður Örn Birkisson sýndi fádæma seiglu er hann lagði Snorra Þór Sigurðsson í endatafli. Þeir kunna endatöflin sín strákarnir í Taflfélaginu, enda ræður þar ríkjum endataflsróbótinn Torfi Leósson. Vignir Vatnar Stefánsson lagði taflfélagsbróður sinn Björn Hólm Birkisson næsta örugglega að velli eftir að Birni Hólm varð fótaskortur snemma tafls. Ekkert varð af baráttunni um heilbrigðiskerfið því skák Ólafs Gísla Jónssonar og Guðlaugar Þorsteinsdóttur var frestað. Sú viðureign verður án efa þrungin spennu enda næsta víst að Ólafur Gísli ætlar sér að rétta sinn hlut í mótinu eftir þunga byrjun. Guðlaug er sem fyrr í efsta sæti B-flokks með fullt hús og virðist hún vera í feyknafínu formi nú um stundir. Lofar það góðu fyrir íslenska kvennalandsliðið sem í nóvember mætir rjóma evrópskrar kvennaskákar í Laugardalshöll.

Í C-flokki hélt Gauti Páll Jónsson uppteknum hætti er hann lagði Ingvar Egil Vignisson að velli með sannfærandi hætti. Gauti Páll leiðir flokkinn með fullu húsi og virðist formaður TRUXVI samtakanna staðráðinn í því að leita uppi hvert einasta skákstig sem hann glataði fyrr á árinu. Í 2.sæti er Veronika Steinunn Magnúsdóttir með 3,5 vinning eftir þægilegan sigur á ungstirninu Óskari Víkingi Davíðssyni. Þá gerði Róbert Luu vandað jafntefli gegn Heimi Páli Ragnarssyni, en á þeim munar heilum 222 skákstigum.

Í Opnum flokki var hart barist sem fyrr og unnu hinir stigalægri þá stigahærri á þremur efstu borðunum. Alexander Oliver Mai tefldi vel á 1.borði gegn hinum sterka Hjálmari Hrafni Sigurvaldasyni og komst í vænlegt endatafl. Pilturinn lét ekki tímahrak á sig fá og fann góða leiki sem tryggði honum sigur á Hjálmari Hrafni þrátt fyrir að á þeim muni 246 skákstigum. Alexander Oliver er í mikilli uppsveiflu um þessar mundir sem sýnir sig í því að hann leiðir nú opna flokkinn með 4,5 vinning og er með 104 skákstig í plús eftir aðeins 5 skákir. Á 2.borði vann Jón Þór Lemery skák sína gegn Halldóri Atla Kristjánssyni og situr Jón Þór í 2-3.sæti með 4 vinninga. Jafn honum að vinningum er Arnar Milutin Heiðarsson en hann lagði Jason Andra Gíslason að velli.

Staðan í Haustmótinu er aðgengileg hér.

6.umferð Haustmótsins fer fram næstkomandi miðvikudagskvöld og eru gestir sem fyrr velkomnir á meðan húsrúm leyfir.

 

• Heimasíða TR
• Chess-Results

Skák eflir skóla fer vel af stað

Skák eflir skóla hefur farið vel af stað. Kennararnir í verkefninu eru mjög áhugasamir sem skiptir hvað mestu varðandi árangur verkefnisins. Þá hafa skólarnir nýtt styrk sinn frá Skáksambandinu í að endurnýja taflsettakost sinn sem skiptir miklu máli. Undanfarnar vikur hefur Stefán Bergsson verkefnisstjóri farið í heimsókn í skólana. Í heimsóknunum hjálpar Stefán til við kennsluna og leggur línurnar næstu vikurnar í kennslunni en reynt er að heimsækja hvern skóla á um 3-5 vikna fresti.

Á fimmtudag voru skólarnir í Keflavík heimsóttir og í gær var Þjórsárskóli heimsóttur í fyrsta sinn. Þar var mikill áhugi meðal nemenda í fyrsta til fjórða bekk sem taka þátt í verkefninu. Hugmyndir eru uppi um að stofna til vikulegra æfinga í skólanum fyrir utan skólatíma þar sem öllum nemendum væri boðin þátttaka. Sterkir skákmenn búa í grennd við skólann eins og Úlfhéðinn Sigurmundsson sem áður hefur staðið fyrir skákstarfi í skólanum.

Frétt um kennsluna í Keflavík birtist í Víkurfréttum og má nálgast með því að smella á myndina sem fylgir með þessari frétt.

Vignir Vatnar efstur á Unglingameistaramóti Hugins

Unglingameistaramót Hugins (suðursvæði) hófst í gær með fjórum umferðum. Vignir Vatnar Stefánsson hefur unnið allar sínar viðureignir og er efstur eftir fyrri hlutann með 4v.Jafnir í 2. og 3. sæti eru Dawid Kolka og Björn Hólm Birkisson með 3,5v. Síðan koma fjórir skákmenn jafnir með 3v en það eru Aron Þór Maí, Felix Steinþórsson, Bárður Örn Birkisson og Alexander Oliver Maí. Þátttakendur eru 28.

Fjórða umferð verður tefld í dag þriðjudaginn 6. október og hefst kl. 16.30 og þá verða þrjár síðustu umferðirnar tefldar í framhaldinu. Þá tefla m.a. eftirtaldir saman: Vignir Vatnar og Dawid, Aron Þór og Björn Hólm, Bárður Örn og Felix, Óskar Víkingur og Alexander Oliver.

Viltu taka þátt í skákævintýrinu mikla og vera sjálfboðaliði á EM?

Bragi Halldórsson og Donika Kolica verða meðal sjálfboðaliða á EM. Hvað með þig?

Skáksamband Íslands mun í vetur ráðast í eitt stærsta verkefni íslenskrar skáksögu þegar Evrópumeistaramót landsliða verður haldið í Laugardalshöllinni dagana 12. – 22. nóvember. Framkvæmdin er gríðarlega umfangsmikil. Skáksambandið leitar um þessar mundir að sjálfboðaliðum til að starfa við mótið. Ýmis störf eru í boði og verður unnið á tveimur vöktum. Önnur vaktin er frá 14:00 – 18:00 og hin frá 18:00 – 21:00. Sjálfboðaliðarnir munu m.a. vinna við miðasölu, móttöku keppenda, veitingasölu, vörslu verðmæta,uppsetningu og frágang, upplýsingagjöf og öryggisgæslu.

Óskað er eftir 50-60 sjálfboðaliðum en nú þegar eru sjálfboðaliðar þegar orðnir um 40 talsins. Skráning verður opin til 8. október. Fundir með sjálfboðaliðum verða haldnir sunnudaginn 11. október. Annar klukkan 13:00 og hinn 20:00 en farið verður yfir sömu atriði á fundunum og geta sjálfboðaliðar valið hvorn fundinn þeir sækja.

Skáksambandið mun leggja mikla áherslu á góðan aðbúnað sjálfboðaliða. Þeir munu fá góða leiðsögn og þjálfun svo störfin verði sem auðveldust að vinna. Sérstakt herbergi í Höllinni verður tekið frá fyrir sjálfboðaliða þar sem þeir geta hvílst og notið veitinga. Þeir sjálfboðaliðar sem taka sjö vaktir eða fleiri fá boð á lokhóf mótsins, veglega gjöf frá Skáksambandinu að móti loknu og boð á uppskeruhátíð mótsins í desember þar sem landsliðsmenn munu koma í heimsókn og fara yfir þátttöku sína á mótinu. Allir sjálfboðaliðar fá gefins minjagrip mótsins.

Skáksambandið hvetur fólk á öllum aldri til að skrá sig sem sjálfboðaliða og taka þátt í því skákævintýri sem framundan er.

Bragi Halldórsson og Donika Kolica ætla bæði að vera sjálfboðaliðar á EM!  Viltu slást í hópinn?

Skráning hér.

 

Skákþáttur Morgunblaðsins: Hörkubarátta Hugins og TR á Íslandsmóti skákfélaga

Skákfélagið Huginn og Taflfélag Reykjavíkur hafa algera yfirburði yfir önnur lið í 1. deild Íslandsmóts Skákfélaga en fimm umferðir af níu fóru fram fyrri hluta keppninnar í Rimaskóla frá fimmtudagskvöldi og fram á sunnudag. Munurinn á liðunum er vart marktækur og skilur aðeins ½ vinningur sveitirnar að og þær eiga eftir að tefla saman í seinni hlutanum sem samkvæmt hefð fer fram í kringum Reykjavíkurskákmótið í marsmánuði nk. Á milli þrjú og fjögur hundruð skákmenn tóku þátt í Íslandsmótinu um helgina og var teflt í fjórum deildum. Alls tóku á fjórða hundrað skákmenn þátt í keppninni um helgina.

Huginn tefldi fram tveim erlendum stórmeisturum en Taflfélag Reykjavíkur hafði innan sinna vébanda eingöngu íslenska skákmenn með Hannes Hlífar Stefánsson á 1. borði og Margeir Pétursson á 4. borði. Staðan í 1. deild er þessi: 1. Huginn 32 v. 2. Taflfélag Reykjavíkur 31 ½ v. 3. Skákfélag Akureyrar 23 v. 4. Fjölnir 21 v. 5. Víkingaklúbburinn 20 ½ v. 6. Huginn b-sveit 18 ½ v. 7. Bolungarvík 16 v. 8. 10. KR – skákdeild, Skákfélag Akureyrar og Taflfélag Reykjavíkur b-sveit 12 ½ v.

Nokkrir skákmenn náðu afbragðs árangri um helgina. Hollendingurinn Van Kampen og Þröstur Þórhallsson sem tefldu fyrir Skákfélagið Huginn unnu allar fimm skákir sínar og það gerði einnig Björn Þorfinnsson fyrir Taflfélag Reykjavíkur.

Í keppni 2. deildar hefur Skákfélag Reykjanesbæjar mikið forskot með 19. vinninga af 24 mögulegum. Þar teflir á 1. borði Björgvin Jónsson og vann hann allar fjórar skákir sínar um helgina rétt eins og Hauka-maðurinn Sverrir Þorgeirsson.

Í 3. deild leiðir Vinaskákfélagið með Róbert Harðarson sem vann allar skakir sínar á 1. borði og í 4. deild eiga í harðri keppni Hrókar alls fagnaðar með 20 vinninga en Taflfélag Vestmannaeyja sem byrjaði aftur 4. deild kemur skammt á eftir með 18 vinninga.

Mikið var um óvænt úrslit á mótinu. Jón Kristinsson sem varð Íslandsmeistari 1971 og aftur 74 hefur lítið teflt undanfarna áratugi en ekki er langt síðan hann vann Henrik Danielsen. Á fimmtudagskvöldið sýndi hann styrk sinn og vann stórmeistarann Stefán Kristjánsson. Nýr liðsmaður Skákfélags Akureyrar, Björn Ívar Karlsson, vann TR-inginn Jón Viktor

3. umferð:

Björn Ívar Karlsson (SA) – Jón Viktor Gunnarsson (TR)

Skileyjarvörn

1. Rf3 c5 2. e4 Rc6 3. Bb5 g6 4. Bxc6 bxc6 5. O-O Bg7 6. He1 e5 7. b4!

Eftir að Bobby Fischer lék þessum skarpa leik í seinna einvíginu við Spasskí í Sveti Stefan árið 1992 hefur afbrigðið sem hefst með 6. .. e5 verið talið næstum því óteflandi fyrir svartan.

7. ... cxb4 8. a3 b3 9. Bb2 d6 10. cxb3 Bg4?

Eftir þennan leik er svarta staðan erfið. Hann varð að reyna að spyrna á móti framrás d-peðsins og leika 10. ... c5 t.d. 11. b4 Hb8 o.s.frv.

11. d4! exd4 12. Bxd4 Bxf3 13. gxf3 Dg5+ 14. Kf1 Be5 15. Bxe5 dxe5 16. Rd2!

Skeytir engu um h2-peðið, riddarinn er á leiðinni til c4.

16. ... Dxh2 17. Rc4 Hd8 18. Dd4 f6 19. Had1 Df4 20. Rxd6 + Kf8

21. Dxa7!

Vinningsleikurinn.

21. ... Hxd6 22. Db8+ Kg7

Jón sá að léki hann 22. .. Ke7 kæmi 23. e5! Hxd1 24. exf6+ Kf7 25. Dxf4 með auðunnu tafli. En nú er eftirleikurinn auðveldur.

23. Dxd6 Dxf3 24. Dc7+ Kh6 25. Dh2+ Kg5 26. Hd8 Rh6 27. Hxh8 Rg4 28. Dg2

– og svartur gafst upp.

Grein þessi birtist í Morgunblaðinu 28. september 2015

Skákþættir Morgunblaðsins