Íslensku liðin á EM landsliða

Landsliðsþjálfarar Íslands í skák hafa tilkynnt liðsskipan íslensku liðanna á Evrópumóti landsliða sem hefst 12. nóvember. Mótið fer fram í Laugardalshöll. 

Ísland a-sveit 

1. SM Hannes Hlífar Stefánsson (2602)
2. SM Héðinn Steingrímsson (2566)
3. SM Hjörvar Steinn Grétarsson (2561)
4. SM Henrik Danielsen (2509)
5. AM Guðmundur Kjartansson (2465) 

Liðsstjóri er Ingvar Þór Jóhannesson 

Ísland – gullaldarlið 

1. SM Helgi Ólafsson (2549)
2. SM Jóhann Hjartarson (2529)
3. SM Jón L. Árnason (2497)
4. SM Margeir Pétursson (2520)
5. SM Friðrik Ólafsson (2392) 

Liðsstjóri er Halldór Grétar Einarsson 

Ekki er útlit fyrir það að þriðja lið Íslands fái keppnisrétt en til þess þarf að standa á stöku á mótinu. 36 lið eru skráð til leiks mánuði fyrir mót. 

Kvennasveit Íslands 

1. KSM Lenka Ptácníková (2228)
2. Elsa María Kristínardóttir (1896)
3. KFM Guðlaug Þorsteinsdóttir (1955)
4. Hrund Hauksdóttir (1773)
5. Veronika Steinunn Magnúsdóttir (1773)

Liðsstjóri er Einar Hjalti Jensson.

Eingöngu verður send a-sveit í kvennaflokki.

Heimasíða mótsins

Íslandsmót ungmenna - teflt um 10 Íslandsmeistaratitla næstu helgi!

Íslandsmót ungmenna fer fram helgina 17.–18. október í Rimaskóla. Teflt er í fimm flokkum. Krýndir verða 10 Íslandsmeistarar - efsta strákur og stelpa í öllum flokkunum fimm.

Skráning fer fram á Skák.is (guli kassinn efst) - Upplýsingar um þegar skráðar kepepndur má finna hér.

Allir flokkar hefjast 12:00 á laugardeginum. Tekið verður við þátttökugjöldum og staðfestingu á mætingu frá 11:20 – 11:50. Þeir keppendur sem mæta eftir 11:50 geta misst sæti sitt í mótinu.

Glæsilegar vinningar í boði - auk þess sem happdrætti verður að loknu móti.

Þátttökugjald er krónur 1.500 og greiðist með reiðufé við staðfestingu á mætingu.

Stelpur og strákar tefla saman í flokkum en veitt eru verðlaun fyrir bæði kyn. Sigurvegari í flokki 9-10 ára tryggir sér sæti á Norðurlandamótinu í skák sem fer fram í febrúar í Svíþjóð. Sigurvegarar í elstu flokkunum þremur tryggja sér sæti á Unglingameistaramóti Íslands.

Verði menn jafnir í efstu sætum er teflt um Íslandsmeistaratitla en stig reiknuð um önnur sæti.

Skráning er á Skák.is til og með 14. október. Mikilvægt er að mæta tímanlega milli 11:20 – 11:50 á laugardeginum til að staðfesta mætingu. Ekki er tekið við skráningum eftir 14. október.

8 ára og yngri (f. 2007 og síðar)

Umhugsunartími: 7 mínútur.

Fjöldi umferða: Allir keppendur tefla fimm umferðir á laugardeginum. Eftir fimm umferðir verður niðurskurður þannig að keppendur með þrjá vinninga eða fleiri komast áfram og mæta líka á sunnudegi. Umferðafjöldi á sunnudegi verður tvær til fjórar umferðir eftir heildarfjölda keppenda.

Dagskrá: Mótið hefst 12:00 á laugardeginum og 12:00 á sunnudeginum fyrir þá sem komast áfram. 

9-10 ára (f. 2005 og 2006)

Umhugsunartími: 10 mínútur.

Fjöldi umferða: Allir keppendur tefla fimm umferðir. Eftir fimm umferðir verður niðurskurður þannig að keppendur með þrjá vinninga eða fleiri komast áfram og mæta líka á sunnudegi. Umferðafjöldi á sunnudegi verður tvær til fjórar umferðir eftir heildarfjölda keppenda.

Dagskrá: Mótið hefst 12:00 á laugardeginum og 12:00 á sunnudeginum fyrir þá sem komast áfram.

11–12 ára (f. 2003 og 2004)

Umhugsunartími: 15 mínútur með 5 sekúndna viðbótartíma fyrir hvern leik.

Fjöldi umferða: 9

Dagskrá: Mótið hefst 12:00 á laugardeginum og verða þá tefldar 5 umferðir. Mótinu verður framhaldið 12:00 á sunnudeginum og verða þá tefldar fjórar umferðir.

13–14 ára (f. 2001 og 2002)

Umhugsunartími: 15 mínútur með 5 sekúndna viðbótartíma fyrir hvern leik.

Fjöldi umferða: 9

Dagskrá: Mótið hefst 12:00 á laugardeginum og verða þá tefldar 5 umferðir. Mótinu verður framhaldið 12:00 á sunnudeginum og verða þá tefldar fjórar umferðir.

15–16 ára (f. 1999 og 2000)

Umhugsunartími: 15 mínútur með 5 sekúndna viðbótartíma fyrir hvern leik.

Fjöldi umferða: 9

Dagskrá: Mótið hefst 12:00 á laugardeginum og verða þá tefldar 5 umferðir. Mótinu verður framhaldið 12:00 á sunnudeginum og verða þá tefldar fjórar umferðir.

 

Einar Hjalti og Bragi efstir á Haustmóti TR

Alþjóðlegu meistararnir Einar Hjalti Jensson (2392) og Bragi Þorfinnsson (2414) eru eftir með 5½ vinning að lokinni sjöundu umferð Haustmóts sem fram fór í gærkveldi. Bragi vann Benedikt Jónasson (2230) en Einar gerði jafntefli við Lenku Ptácníková (2235). Oliver Aron Jóhannesson (2198) er þriðji með 4 vinninga en hann á inni frestaða skák gegn Sævari Bjarnsyni (2108) og getur því blandað sér í baráttuna um sigurinn á mótinu.

Nánar á Chess-Results.

B-flokkur:

Agnar Tómas Möller (1854) og Guðlaug Þorsteinsdóttir (1934) eru jöfn og efst með 5 vinninga en þau gerðu bæði jafntefli í gær. Guðlaug við Vigni Vatnar Stefánsson (1921) en Agnar við Ólaf Gísla Jónsson (1926)

Guðlaug á inni frestaða skák gegn Ólafi Gísla og stendur því betur að vígi en Agnar. Vignir er þriðji með 4½ vinning.

Úrslit má nálgast á Chess-Results.

C-flokkur:

Gauti Páll Jónsson (1769), kókómjólkurdrykkjumaður, virðist vera í algjörum sérflokki er efstur með fullt hús. Veronika Steinunn Magnúsdóttir (1843) er önnur 5½ vinning og Heimir Páll Ragnarsson (1712), frændi hennar, er þriðji með 4 vinninga.

Opinn flokkur:

Arnar Heiðarsson (1055) er efstur með 5½ vinning. Alexander Oliver Mai (1242), Guðmundur Agnar Bragason (1354) og Jón Þór Lemery (1275) eru í 2.-4. sæti með 5 vinninga.

Sjá nánar á Chess-Results

Áttunda og næstsíðasta umferð fer fram á miðvikudag og hefst kl. 19:30. 

• Heimasíða TR
• Chess-Results

Jóhann og Helgi hafa 4½ vinning eftir 10 umferðir

Heimsmeistaramótið í atskák er í fullum gangi í Berlín. Nú er 10 umferðum af 15 lokið. Jóhann Hjartarson (2529) og Helgi Ólafsson (2542) hafa 4½ vinning, Hannes Hlífar Stefánsson (2510) hefur 4 vinninga og Margeir Pétursson (2454) hefur 2½ vinning. 

Heimsmeistarinn í skák (og reyndar einnig í atskák og hraðskák), Magnus Carlsen (2847) er efstur með 8 vinninga ásamt hvít-rússneska stórmeistaranum Sergei Zhigalko (2698). Kramnik (2798), Ivanchuk (2825) og Igor Kovalenko (2687) eru í 3.-5. sæti með 7½ vinning.

Síðustu fimm umferðirnar verða tefldar á morgun. Taflmennskan hefat á kl. 12. Á þriðjudag byrjar svo heimsmeistaramótið í hraðskák. 

Hægt er að fylgjast með mótinu beint á Chess24. 

Hægt er að fylgjast með stöðu og úrslitum á Chess-Results.

U-2000 mótið hefst miðvikudaginn 28. október

Taflfélag Reykjavíkur fer nú aftur af stað með hið vinsæla U-2000 mót sem síðast var haldið fyrir sléttum áratug. Undanfarin ár hefur sífellt bæst í flóru viðburða hjá félaginu og er hugmyndin með endurvakningu U-2000 mótanna sú að koma til móts við þá skákmenn sem ekki hafa náð 2000 Elo-stigum og vilja gjarnan spreyta sig í opnu móti þar sem stigamunur á milli keppenda er minni en ella.

Þátttökurétt hafa allir þeir sem hafa minna en 2000 Elo-stig og er þá almennt miðað við alþjóðleg Fide-stig. Tefldar eru sjö umferðir eftir svissneska kerfinu og er umhugsunartími 90 mínútur fyrir alla skákina auk 30 sekúndna sem bætast við eftir hvern leik. Leyfðar eru tvær yfirsetur í umferðum 2-5 sem skal tilkynna fyrir lok umferðarinnar á undan en 1/2 vinningur fæst fyrir yfirsetu. Teflt er einu sinni í viku, á miðvikudagskvöldum kl. 19.30, í Skákhöll félagsins að Faxafeni 12.

Dagskrá
1. umferð: 28. október kl. 19.30
2. umferð: 4. nóvember kl. 19.30
3. umferð: 11. nóvember kl. 19.30
4. umferð: 18. nóvember kl.19.30
5. umferð: 25. nóvember kl. 19.30
6. umferð: 2. desember kl. 19.30
7. umferð: 9. desember kl. 19.30

Tvær yfirsetur leyfðar í umferðum 2-5

Tímamörk
90 mín + 30 sek viðbót eftir hvern leik

Verðlaun
1. sæti kr. 30.000 og sæti í B-flokki Wow-air Vormóts TR 2016
2. sæti kr. 20.000
3. sæti kr. 10.000

Þátttökugjöld
18 ára og eldri kr. 5.000, kr. 3.000 fyrir félagsmenn í TR
17 ára og yngri kr. 2.000, kr. 1.000 fyrir félagsmenn í TR

Skráningarform

Skráðir keppendur

Hjörvar sigraði á geðheilbrigðismótinu

Eins og alltaf var Geðheilbrigðismótið frábær skemmtun! Hjörvar Steinn Grétarsson sigraði með fullu húsi. TR þakkar Hróknum og Vinaskákfélaginu fyrir ánægjulegt samstarf og öllum þeim fjölda skákmanna á öllum aldri sem tóku þátt!

Jón Viktor Gunnarsson, Omar Salama og Dagur Ragnarsson urðu í 2.-4. sæti með 5,5 vinning.

Úrslit má finna á Chess-Results.

Myndaalbúm frá Birni Jónssyni má finna á Facebook.

Skákþáttur Morgunblaðsins: Vert að gefa þessum unga manni gætur

Bragi Þorfinnsson er efstur í A-flokki Haustmóts Taflfélags Reykjavíkur þegar tefldar hafa verið fjórar umferðir. Bragi hefur hlotið 3½ vinning en á hæla hans kemur Oliver Aron Jóhannesson með 3 vinninga. Tíu skákmenn tefla í efsta flokki en Bragi og Oliver munu mætast í lokaumferðinni.

Haustmótið hefur um áratuga skeið verið eitt helsta skákmótið hér innanlands og er gjarnan nefnt í sömu andrá og Skákþing Reykjavíkur og Skákþing Íslands. Margir ungir og efnilegir skákmenn öðlast þarna mikilsverða reynslu en að þessu sinni er teflt fjórum flokkum. Í B-riðli hefur Guðlaug Þorsteinsdóttir örugga forystu en hún hefur unnið allar skákir sínar fjórar talsins. Guðlaug verður í kvennaliði Íslands sem teflir á Evrópumóti landsliða í næsta mánuði. Í C-flokki leiðir Gauti Páll Jónsson með 3 vinninga af þrem mögulegum og í opna flokknum er efstur Oliver Alexander Mai með 3½ vinning af fjórum mögulegum.

Meistaramót Hugins var heldur fyrr á ferðinni en Haustmót TR og þar sigraði Einar Hjalti Jensson eftir harða keppni við Davíð Kjartansson, hlaut 6½ vinning af sjö möguleghum. Davíð kom næstur með 6 vinninga. Bárður Örn Birkisson og Birkir Karl Sigurðsson komu næstir með 5 vinninga. Alls voru keppendur 34 talsins. 

Glæsilegur sigur Jóns Kristins á Skákþingi Norðlendinga

Skákþing Norðurlands sem fram fór helgina 18.-20. september varð ekki sú svefnganga vanans sem sumir bjuggust við. Er þá vísað til þess að gestir tveir „að sunnan“ voru langstigahæstu keppendurnir: Guðmundur Kjartansson og Einar Hjalti Jensson. En hinn 16 ára gamli Akureyringur Jón Kristinn Þorgeirsson gerði sér lítið fyrir og vann þá báða! Jón tapaði skák sinni í 1. umferð en vann allar skákir sínar eftir það og varð einn efstur á mótinu og hlaut sæmdarheitið Skákmeistari Norðlendinga 2015. Það er vert að gefa þessum unga manni gætur í framtíðinni. Byrjunarleikirnir í skáknni við Einari Hjalta í 6. umferð féllu þannig: 

Jón Kristinn Þorgeirsson – Einar Hjalti Jensson

Caro Kann

1. e4 c6 2. Rc3 d5 3. d4 dxe4 4. Rxe4 Rd7 5. Rf3 Rgf6 6. Rg3 Dc7 7. Bd3 e6 8. 0-0 b6 9. De2 Bb7 10. He1 c5 11. Rg5 Dc6 12. R3e4 a6 13. Bf4 cxd4 

Einar Hjalti hefur ekki verið nægilega á varðbergi í Caro-Kann vörninni og nú féll sprengjan:

14. Rxf7! Kxf7 15. Rd6+!

Einari hafði ekki tekið þennan leik með í reikninginn, 15. Rg5+ mátti svara með 15.... Kg8.

15.... Dxd6

15.... Ke7 leiðir til máts: 16. Dxe6+ Kd8 17. Rf7+ Kc8 18. De8+! Rxe8 19. Hxe8 mát.

16. Bxd6

Eftir að drottning féll átti Jón Kristinn ekki í vandræðum með að innbyrða vinninginn. Þó að Einar Hjalti hafi barist vel gafst hann upp eftir 52. leiki. 

Svidler vann fyrstu skákina í úrslitaeinvíginu

Þegar tveir standa eftir í heimsbikarmóti FIDE í Khanty Manyisk þarf ekki að koma á óvart að þeir sem frammistöðu sinni hafa tryggt sér sæti í áskorendamótinu á næsta áru skyldu koma frá Rússlandi og Úkraínu: Peter Svidler og Sergei Karjakin eru báðir vanir því andrúmslofti sem ríkir á keppnisstaðnum í Síberíu. Karjakin vann Pavel Eljanov í undanúrslitum, 3½ : 2½ og Svidler lagði Anish Giri, 1½ : ½. Þeir munu tefla fjórar skákir til úrslita og þá fyrstu vann Svidler fremur auðveldlega á fimmtudaginn. 

Grein þessi birtist í Morgunblaðinu 3.október

Skákþættir Morgunblaðsins

Heimsmeistaramótið í atskák í beinni - fjórir íslenskir taka þátt

Heimsmeistaramótið í atskák hófst í dag í Berlín í Þýsklandi. Fjórir íslenskir stórmeistarar taka þátt. Það eru þeir Hannes Hlífar Stefánsson, Helgi Ólafsson, Jóhann Hjartarson og Margeir Pétursson tefla. Fimmti stórmeistarinn, Friðrik Ólafsson, er í þeirri virðingastöðu að vera formaður áfrýjunarnefndar mótsins.

Hægt er að fylgjast með mótinu beint á Chess24. 

Hægt er að fylgjast með stöðu og úrslitum á Chess-Results.

Íslandsmót unglingasveita fer fram í dag

Íslandsmót Unglingasveita 2014 verður haldið þann 10. október næstkomandi í Garðalundi í Garðabæ. (Garðaskóli)

Mótið hefst kl. 13 og stendur líklega fram til 17. Umhugsunartími eru 15 mínútur á mann.

Mótið er liðakeppni Taflfélaga og eru 4 í hverju liði auk varamanna.

Reglugerð mótsins má finna á vefnum skaksamband.is http://www.skaksamband.is/?c=webpage&id=249

Þátttökurétt hafa öll taflfélög sem og/eða íþrótta/héraðssambönd svo framarlega að ekki er taflfélag á sama svæði.

Skráning fer fram í tölvupósti til félagsins [e-mail]

Benda ber sérstaklega á

• að sameinuð lið geta ekki orðið Íslandsmeistarar
• hverju liði skal fylgja liðsstjóri sem sér um liðið og að fylla út öll úrslit í mótinu. Hver liðsstjóri skal ekki stýra meira en 2 liðum
• Þátttökugjöld eru 4000 kr. á hvert lið.
• Mótið verður reiknað til alþjóðlegra atskákstiga. Fæðingardagar þeirra keppenda sem eru ekki á stigalista þurfa fylgja með skráningu.

Íslandsmeistarar 2014 voru Taflfélag Reykjavíkur. 

Móitð á Chess-Results.

Arnar aftur formaður TV eftir 53 ára hlé!

Hinn 5. september sl. fór fram aðalfundur Taflfélags Vestmannaeyja. Fram kom að afkoma félagsins hefur verið góð undanfarin ár, en mest púður hefur farið í þátttöku félagsins á íslandsmóti skákfélaga og höfum við verið þar með vaska sveit innlendra og erlendra skákmanna á okkar snærum undir öruggri stjórn liðsstjóra okkar, Þorsteins Þorsteinssonar. Þrátt fyrir alla þessa viðleitni með gífurlega sterkum skákmönnum, þá tókst okkur ekki að landa titlinum en urðum 4 sinnum í 2 sæti og jafnoft í því þriðja síðustu 11 ár, en margir myndu telja góðan árangur. Á engan er hallað þó segja megi að hitann og þungann af A-sveitinni hafi Þorsteinn (Stone) borið og er honum þakkað góð störf fyrir félagið. Þá er ekki úr vegi að þakka hollum liðsmönnum félagsins, sem nú eru horfnir til annarra félaga, en þetta eru þeir ; Helgi Ólafsson GM, Björn Ívar Karlsson, Ingvar Þór Jóhannesson, Henrik Danielsen GM, Sigurbjörn Björnsson, Kristján Guðmundsson og Björn Freyr Björnsson. Takk strákar, við tökum þetta síðar !

Það var þó alltaf jafnljóst að sinna þyrfti starfinu í heimahögunum, reyna að byggja upp starfið í Eyjum, lagfæra húsnæði félagsins og greiða niður lán á húsnæðinu, en allt þetta hefur að undanförnu setið á hakanum.

Það var því tímamótaákvörðun sem tekin var í sumar að draga lið okkar úr keppni í 1 deild og bakka "down to the basics" og senda skraplið í 4 deild. Það tókst ágætlega og ánægjulegt að nokkrir strákar sem ekki hafa teflt lengi létu sjá sig og stóðu sig bara fjári vel.

Á aðalfundinum voru lagðar línur í þessa veru. Þegar kom að stjórnarkjöri kom fram að formaðurinn, Ægir Páll gæfi ekki kost á sér áfram, þar sem hann er að flytjast búferlum frá Eyjum. Formaður var því kjörinn, Arnar Sigurmundsson sem hefur verið skoðunarmaður reikninga í einhver ár eða áratugi. Það sem er athyglisvert við formannskjör Arnars er að hann var síðast kjörinn formaður í félaginu haustið 1962 eða fyrir 53 árum síðan og er líklega vandfundið það félag sem hefur á að skipa jafn dyggum félagsmönnum. Gott er til þess að vita að fleiri formenn frá sjöunda áratugnum eru enn virkir í félaginu,t.d. bæði Andri Valur Hrólfsson og Ólafur Hermannsson og enn fleiri frá áttunda áratugnum svo ekki þarf að leita langt með forystusveit á komandi árum.

Heimasíða TV