Íslandsmót grunnskólasveita - stúlknaflokkur fer fram á laugardag

Íslandsmót grunnskóla - stúlknaflokkur fer fram í Rimaskóla laugardaginn 30. janúar klukkan 12:00.

Teflt verður í þremur flokkum.

Fyrsti og annar bekkur.

Fimm umferðir með fimm mínútna umhugsunartíma.

Þriðji til finmmti bekkur.

Sex umferðir með sjö mínútna umhugsunartíma.

Sjötti til tíundi bekkur.

Sex umferðir með tíu mínútna umhugsunartíma.

Umferðafjöldi getur breyst með tilliti til fjölda þátttökuliða.

Keppendur geta teflt upp fyrir sig, þ.e. með eldri sveit síns skóla.

Í hverri sveit skulu vera fjögur borð. Varamenn mega vera allt að þrír.

Þátttökugjald á sveit: 5000 kr. Hámark 10.000 á skóla.

Skákakademía Reykjavíkur sér um framkvæmd mótsins.

Skráning og fyrirspurnir á [e-mail]

Skráningar þurfa að berast fyrir föstudaginn 29. janúar.

Grunnskólinn í Hólmavík iðaði af skáklífi á Skákdaginn

Frá Kolbrúnu Þorsteinsdóttur:

Það var mikið teflt hjá okkur í Grunnskólanum á Hólmavík í gær. Við fengum skákáhugamanninn Gunnlaug Bjarnason til að tefla fjöltefli við hverja bekkjardeild fyrir sig. Fyrst tefldi hann við unglingana sem voru í húsi 8 stk. svo við miðstigið 15 stk. og svo að lokum 3. og 4. bekk 14 stk. 1. og 2. bekkur fóru í einfaldara verkefni :)

Sextíu krakkar á Siglufirði hlustuðu á stórmeistarann

Skákdeginum var víða fagnað í dag. Á Siglufirði hélt enginn annar en Þröstur Þórhallsson, stórmeistari, kynningu á töfrum skákarinnar fyrir áhugasama nemendur grunnskólans. 

Kynningin var vel sótt en alls sóttu 60 krakkar fyrirlestur Þrastar sem á ættir að rekja til Siglufjarðar. Bæjarstjórinn í Fjallabyggð er þekktur skákáhugamaður en það er enginn annar en Gunnar I. Birgisson. 

Skáksögufélagið - Ný vefsíða opnuð

Hið íslenska skáksögufélag var stofnað fyrir rúmu ári síðan með það að markmiði að stuðla að því að sögu manntaflsins og skáklistarinnar á Íslandi, að fornu og nýju, verði sem best til haga haldið. Jafnframt skyldi félagið beita sér fyrir því að saga fræknustu skákmeistara okkar og helstu skákviðburða hérlendis yrði skráð, auk þess að vinna að varðveislu hvers konar skákminja og muna, eftir föngum. Ærin verkefni sem óvíst er hvort félagið eða stjórnarmenn þess fái nokkurn tíma undir risið nema með öflugum stuðningi skákunnenda og annarra.

Stjórn félagsins er því mikið ánægjuefni að greina frá því að tekist hefur að ljúka fyrsta stóra viðfangsefni þess, að byggja upp mikla og efnisríka vefsíðu tileinkaða fyrsta stórmeistara okkar FRIÐRIKI ÓLAFSSYNI og glæstum skákferli hans.

Heimasíðan var formlega opnuð af Illuga Gunnarssyni, mennta- og menningarmálaráðherra, á  afmælisdegi Friðriks, 26. janúar, sem jafnframt er íslenski skákdagurinn honum helgaður, í upphafi vikulegs skákmóts eldri borgara í félagsheimili FEB, Ásgarði við Stangarhyl, þar sem Friðrik Ólafsson, var heiðursgestur.  

Um er að ræða afar fjölbreytta upplýsingasíðu með ótal gömlum blaðafréttum, greinum og viðtölum við meistarann, auk yfirlits um öll mót hans, með flestum skákum hans og úrslitum gegn einstökum mótherjum. Síðan er ríkulega myndskreytt með ljósmyndum frá ferli Friðriks auk fjölda annarra úr íslensku skáklífi frá miðbiki síðustu aldar fram til þessa dags.

Þeir Hrafn Jökulsson, skákfrömuður m.m. og Tómas Veigar Sigurðarson, vefhönnuður, eiga mestan heiður af  gerð hennar en til verksins naut félagið fjárstyrks frá hinu opinbera. 

Helstu efnisþættir:

ÆVIFERILL – þar er stiklað á helstu æviatriðum Friðriks og skákferill hans rakinn  í tímaröð.  GREINAR - um Friðrik og glæstan afreksferil hans, sem á eftir að fjölga. HELSTU MÓT - þar sem fjallað er um einstök mót með ítarlegum hætti, með fréttum og mótstöflum. Allar skákir hans eru birtar með fáeinum undantekningum, sem hægt er að skoða rafrænt.  ÁRABILIN – þar er hægt að nálgast fréttir um mót og viðburði eftir áratugum með auðveldum hætti.   FORSETI FIDE – fréttir og myndir frá þeim tíma sem Friðrik gegndi hinu virðulega embætti forseta Alþjóðaskáksambandsins.  SARPURINN – gamlar fréttir, fjölmargar frásagnir og skákpistlar frá árum áður.  TÖLFRÆÐI – Skákmót og Mótherjar  geysilega viðamikil samantekt um öll skákmót sem Friðrik hefur tekið þátt í. Ítarleg skrá um alla mótherja hans og árangur gagnvart hverjum og einum.  Þá fylgir mjög ítarleg  ATRIÐISORÐASKRÁ til að hagræðis fyrir áhugasama lesendur með nær óendalegu efnisvali.    Efni síðunnar er ríkulega myndskreytt – auk þess sem sérstakt MYNDASAFN fylgir bæði frá ferli Friðriks, af ýmsum viðburðum, frænkum skákmeisturum og fjölmörgum þátttakendum í íslensku skáklífi. 

Síðuna má nálgast hér: www.skaksogufelagid.is  eða www.fridrikolafsson.com

ESE – 26.01.16  Skáksögufélagið: http://hrokurinn.is/flokkar/skaksogufelagid/

 

Lenka sigurvegari Friðriksmóts í Vin

Meistari Friðrik Ólafsson mætti glaðbeittur þegar Hrókurinn & Vinaskákfélagið efndu til Friðriksmótsins, í tilefni af afmæli hans og Skákdegi Íslands, í gær. Friðrik lék fyrsta leikinn í skák Róberts forseta Vinaskákfélagsins gegn Hauki Halldórssyni, og snaraði að sjálfsögðu kóngspeðinu fram um tvo reiti.

Sextán vaskir meistarar þreyttu taflið, en Lenka Ptacnikova kom, sá og sigraði -- í öllum skákunum sex. Silfrið kom í hlut Róberts, en Stefán Bergsson hreppti bronsið. Þau fengu bækur í verðlaun og forláta verðlaunapeninga, með ágrafinni mynd af Friðriki.

Þeir heiðursmenn úr Gallerí skák, Guðfinnur Kjartansson og Einar S. Einarsson komu líka færandi hendi, með kærleikstré úr súkkulaði, sem ungi snillingurinn Arnljótur Sigurðsson vann í happdrætti -- en deildi af miklu örlæti með öðrum keppendum. Ingi Hans bauð uppá pönnukökur og súkkulaðitertu í mótslok, svo allir fóru glaðir og mettir á braut.

Maður mótsins, að öðrum ólöstuðum, var Björgvin Kristbergsson, sem hlaut 3 vinninga og lagði nokkra mun stigahærri skákmenn.

Gens una sumus -- Við erum ein fjölskylda.

Gleðilegan Skákdag!

Skákdagurinn verður haldinn hátíðlegur um allt land í dag , 26. janúar á afmælisdegi Friðriks Ólafssonar. Þá sameinast Íslendingar um að taka upp taflborðin þjóðhetjunni til heiðurs.

Friðrik verður 81. árs á Skákdaginn. Hann tefldi nýlega með Gullaldarliði Íslands á EM landsliða sem haldið var í Laugardalshöll og hefur síðustu árin verið virkur í taflmennsku.

Nú liggja fyrir ýmsir viðburðir á sjálfan Skákdaginn sem og í allri afmælisvikunni.

Skákfélagið Huginn hélt hraðkvöld í gær. Í verðlaun var bókin um feril Friðriks; „50 valdar sóknarskákir“. Bók sú er orðin fágæt.

Skákdeild KR í samstarfi við Gallerí Skák stendur fyrir hinu árlega kapptefli um Friðrikskónginn. Um er að ræða mótaröð og hófst taflmennska í gær í Skákherberginu í Frostaskjóli.

ÆSIR sem tefla nær alla þriðjudaga ársins munu tefla Friðriki til heiðurs á sjálfan Skákdaginn í húsakynnum sínum að Stangarhyl. Friðrik verður þar sjálfur heiðursgestur.

Riddarinn í Hafnarfirði efnir til sérstaks Friðriksmóts miðvikudaginn 27. janúar.

Grunnskólinn í Hveragerði hefur verið með mikla skákkennslu í vetur og tekur m.a. þátt í verkefni Skáksambandsins Skák eflir skóla – kennari verður skákkennari. Alþjóðlegi meistarinn. Guðmundur Kjartansson teflir fjöltefli við nemendur skólans á Skákdaginn.

Þröstur Þórhallsson verður með skákkennslu og fjöltefli á Siglufirði. Heimamaðurinn Gunnlaugur Bjarnason, verður með fjöltefli í Hólmavík. 

Stefán Bergsson heimsækir nemendur Kerhólsskóla á Skákdaginn og verður með skákkynningu- og kennslu.

Þá verða vígð skáksundlaugarsett um allt land m.a. á Þórshöfn á Langanesi, Hvammstanga, Eskifirði og Reyðarfirði.

Skák- og skákáhugamönnum er óskað kærlega til hamingju með daginn!

Nánar verður fjallað um afrakstur Skákdagsins á komandi dögum.

Carlsen efstur í Wijk aan Zee

Heimsmeistarinn í skák, Magnus Carlsen (2844) er efstur með 5½ vinning að lokinni áttundu umferð Tata Steel-mótsins sem fram fór í Wijk aan Zee í gær. Carlsen gerði jafntefli við Karjakin (2789). Caruana (2787) sem var efstur ásamt Carlsen fyrir umferðina tapaði fyrir David Navara (2730) í afar vel tefldri skák og er engu að síður annar með 5 vinninga.

Wesley So (2723), Ding Liren (2766) og Anish Giri (2798) eru í 3.-5. .sæti með 4½ vinning.

Mótstafla (tvíklikka til að stækka):

 

 

Magnus á eftir að tefla við keppendurna í 3.-5. sæti. Í níundu umferð sem fram fer á morgun teflir Magnus við Michael Adams (2744) sem er neðstur á mótinu. Caruana mætir hins vegar Karjakin.

Ákaflega góða og vandaða umfjöllun um mótið má nálgast á Chess24

 

• Heimasíða mótsins
• Beinar útsendingar
• Chess24

Hraðkvöld hjá Hugin í kvöld - bók Friðriks í verðlaun

Hraðkvöld Hugins verður mánudaginn 25. janúar nk.  og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili Hugins í Álfabakka 14a í Mjóddinni. Í vetur verða svo hraðkvöldin fyrsta og síðasta mánudag í hverjum mánuði að því undanskildu þegar mánudag ber upp á stórhátíð eða aðrir viðburðir eru til staðar..

Sigurvegarinn á hraðkvöldinu fær í verðlaun máltíð fyrir einn á Saffran eða pizzu frá Dominos Einnig verður dreginn út af handahófi annar keppandi sem einnig fær sama val. Þar eiga allir jafna möguleika, án tillits til árangurs á mótinu. Í tilefni af skákdeginum 26. janúar þá verður skákbókin 60 valdar sóknarskákir með Friðriki Ólafssyni í verðlaun fyrir sigurvegara mótsins og að auki annað eintak dregið út. Þó ekki sá sami og er dreginn í hinu happdrættinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Hinir fjórir fræknu efstir á Skáþingi Reykjavíkur

Þeir voru baráttuglaðir skákmennirnir sem mættu til leiks í 7.umferð Skákþings Reykjavíkur. Hart var tekist á á nær öllum borðum og réðust úrslit oft ekki fyrr en eftir djúpar flækjur og fallegar fléttur.

Á efsta borði glímdi Jón Viktor Gunnarsson við Stefán Kristjánsson. Þeir buðu áhorfendum upp á djúpa stöðubaráttu framan af sem síðar leystist upp í hróksendatafl. Jón Viktor virtist pressa nokkuð á Stefán í miðtaflinu en stórmeistarinn var vandanum vaxinn og leysti þau verkefni sem fyrir hann voru lögð. Gengu þeir félagarnir út í kvöldmyrkrið með hálfan vinning hvor.

Það sem af er móti hefur Vignir Vatnar Stefánsson brennt ör á sál tveggja titilhafa. Fídemeistarinn galvaski, Dagur Ragnarsson, fékk það hlutskipti að glíma við titilhafabanann unga. Dagur mætti afar einbeittur til leiks og hreyfði menn sína fimlega um borðið. Varð snemma ljóst að Vignir Vatnar átti fyrir höndum erfiðan Dag. Dagur pressaði undrabarnið stíft allt þar til varnarmúrinn brast og Vignir Vatnar lagði niður vopn. Fyrir vikið skaust Dagur upp í 2.sætið og ætlar pilturinn sér greinilega að gera atlögu að Reykjavíkurmeistaratitlinum, enda til alls líklegur þegar hann gefur frjóum huga sínum lausan tauminn.

Á 3.borði stýrði Björn Þorfinnsson hvítu mönnunum gegn Þorvarði Fannari Ólafssyni. Eftir nokkurn barning þá týndi Björn peði, og voru áhorfendur ekki á einu máli um hvort þar væri um að kenna kænsku Þorvarðar eða lævísri áætlunargerð Björns. Í kjölfarið fann Björn veikleika á b7 sem hann nýtti sér til hins ýtrasta. Björn vann skákina og hefur pilturinn því unnið fjórar skákir í röð eftir að hafa beðið lægri hlut gegn fyrrum lærisveini sínum, Vigni Vatnari, í 3.umferð. Virðist Björn hvergi banginn fyrir lokasprettinn. Á 4.borði vann Guðmundur Gíslason góðan sigur með hvítu mönnunum gegn Mikael Jóhanni Karlssyni. Guðmundur hefur hlotið 5,5 vinning og gefur ekkert eftir á lokasprettinum.

Á 5.borði bauð Björgvin Víglundsson upp á kennslustund í því hvernig best er að bera sig að við að tefla gegn staka peðinu margfræga. Öll spjót beindust að peðinu sem að lokum lá sært í valnum. Loftur Baldvinsson er ekki vanur að kippa sér upp við þó vanti peð í safnið og beitti hann sínum alþekktu klækjum til þess að reyna að valda sem mestum skaða í herbúðum Björgvins. Björgvin var þó vandanum vaxinn og vann skákina að lokum er hann hristi létta taktík fram úr erminni. Þótti gárungunum það býsna vel að verki staðið í ljósi þess að Björgvin var klæddur stuttermaskyrtu.

Af öðrum skákum bar hæst að Jóhann H. Ragnarsson reimaði á sig fléttuskóna og vann Jón Trausta Harðarson laglega. Guðmundur Kjartansson þurfti að hafa mikið fyrir því að leggja Birki Karl Sigurðsson að velli og Héðinn Briem hélt áfram að tefla vel og gerði jafntefli við Hörð Aron Hauksson. Stefán Bergsson lenti í miklu basli með Nansý Davíðsdóttur og lengi vel leit út fyrir að Stefán yrði að lúta í gras. Stefán er hins vegar brögðóttur, líkt og landsmenn allir vita, og hafði að lokum sigur eftir klukkuvandræði Nansýjar. Mykhaylo Kravchuk varðist vel gegn Ólafi Gísla Jónssyni og hlaut að launum hálfan vinning. Þá var hinn léttleikandi reynslubolti, Björgvin Kristbergsson, í miklu stuði og lagðist í þunga kóngssókn sem skilaði honum vinningi í sarpinn.

 

Óvæntustu úrslit umferðarinnar litu dagsins ljós á borði 24 hvar hinn stórefnilegi Hjörtur Kristjánsson (1352) stýrði svörtu mönnunum til sigurs gegn Jóni Úlfljótssyni (1794). Þá gerði Daníel Ernir Njarðarson (1319) jafntefli með svörtu gegn Elvari Erni Hjaltasyni (1772).

 

Að lokinni 7.umferð eru fjórir fræknir garpar efstir með 6 vinninga, þeir Jón Viktor Gunnarsson, Dagur Ragnarsson, Björn Þorfinnsson og Stefán Kristjánsson. Guðmundur Gíslason fylgir þeim eins og skugginn með 5,5 vinning.

 

8.umferð Skákþingsins fer fram næstkomandi miðvikudagskvöld. Þá mætast á efsta borði þeir Stefán Kristjánsson og Björn Þorfinnsson, á 2.borði glíma Guðmundur Gíslason og Jón Viktor Gunnarsson, og á því þriðja mætast Björgvin Víglundsson og Dagur Ragnarsson. Skákáhugamenn eru hvattir til þess að leggja leið sína í Taflfélagið og sjá með eigin augum er úrslitastund Skákþingsins rennur upp.

 

Öll úrslit Skákþingsins og pörun næstu umferðar eru aðgengileg hér.

Nánar á heimasíðu TR.

• Heimasíða TR
• Chess-Results

Friðriksmót í Vin í dag kl. 13

Vinaskákfélagið og Hrókurinn bjóða til Friðriksmótsins í skák, mánudaginn 25. janúar klukkan 13, í tilefni af Skákdegi Íslands og afmæli hins ástsæla meistara, Friðriks Ólafssonar.
 
Tefldar verða sex umferðir með 7 mínútna umhugsunartíma. Að vanda verða ljúffengar veitingar í boði og allir eru hjartanlega velkomnir.
 
Skáklífið hefur haldið áfram að blómstra í Vin í vetur. Þar eru fastar æfingar á mánudögum kl. 13, en heita má að teflt sé alla daga. Þá teflir Vinaskákfélagið fram tveimur sveitum á Íslandmóti skákfélaga, en úrslit ráðast í mars. A-sveit félagsins trónir á toppnum í 3. deild og B-sveitin er meðal þeirra efstu í 4. deild.