Skák.is

Færsluflokkur: Spil og leikir

3.9.2016 | 22:00

Ólympíuskákmótið: 2. umferð í kvennaflokki

Við mættum sterku liði Ítalíu í dag, sem er með meðalstig 2304. Ég var bjartsýnn fyrir viðureignina, þrátt fyrir að ítalska liðið hafi ekki verið árennilegt á pappírunum. Aðalliðið tefldi í dag, svo Veronika hvíldi. Lenka hafði því svart á fyrsta borði gegn hinni þrautreyndu IM Olgu Zimina (2389). Olga tefldi frekar bitlaust vængtafl og Lenka jafnaði taflið auðveldlega. Eftir mikinn þæfing í miðtaflinu lenti hún óþarflega í tímahraki sem kostaði hana yfirsjón. Lenka tapaði skiptamun í framhaldinu, eftir lúmskt trikk frá Olgu, og féll á tíma stuttu seinna, með tapað tafl. Þetta var skák sem hefði með réttu átt að enda með jafntefli. Tímanotkunin var að stríða okkur svolítið í dag og það er eitthvað sem við ætlum að bæta í umferðinni á morgun.

Hér lek IM Olga Zimina 35. Re4! sem vinnur lið eftir 35...Dxe5 36. Rg5+ eða 35...dxe4 36. Hxc5

Gulla hafði hvítt gegn FM Marinu Brunello (2376). Marina hefur teflt á Reykjavik Open, ásamt bróður sínum Sabino, svo við könnumst ágætlega við hana. Upp kom drottningarbragð og fljótlega skiptist upp á mönnum, sem létti talsvert á svörtu stöðunni, svo Gulla hafði ekki mikið upp á að tefla. Hugsanlega hefði hún átt að reyna að tefla upp á minnihlutaárás á drottningarvæng með Hb1 og svo b4 á einhverjum tímapunkti. Hún valdi aðra áætlun, að reyna að leika e4 en það gekk því miður ekki nógu vel. Í framhaldinu þurfti hún að taka á sig veikleika á kóngsvængnum og lenti í vandræðum í tímahrakinu. Hún tapaði liði í framhaldinu og neyddist til að gefast upp eftir að tímamörkunum var náð.

Í þessari stöðu lék Brunello 37...Re3 og Gulla neyddist til að gefa skiptamun með 38. Hxe3

Halla hafði svart gegn WFM Danielu Movileanu (2268). Upp kom Caro-kann vörn og eftir 4...Bf5 lék Daniela 5. Rc5!? (Spurning: Hver er upphafsmaður þessa leiks?) Halla tefldi framhaldið vel og jafnaði að öllum líkindum taflið þrátt fyrir að hafa tekið á sig veikt peð á c6. Í framhaldinu telfdi hún sennilega ekki nógu virkt og lenti í erfiðu endatafli, peði undir. Hún barðist hetjulega en sú ítalska sýndi afbragðs tækni (því miður!) og innbyrti sigurinn af öryggi.

Hér lék Halla 30...Hd2 og lenti peði undir eftir 31. Rb7. Hún hefði hugsanlega frekar átt að leika 30...Hb8 og tefla virka vörn eftir 31. b3 Hb4 og þar sem riddarinn á c5 fer ekki langt lendir svartur varla í miklum vandræðum með c6-peðið.

Hrund hafði hvítt gegn WFM Desiree Di Benedetto (2183). Hrund tefldi gamla og gleymda leið í uppskiptaafbrigði franskrar varnar sem við höfðum undirbúið mjög vel fyrir skákina (liðsstjórinn gleymir engu!). Di Benedetto virtist ekki þekkja afbrigðið vel og kom með mjög vafasama nýjung eftir langa umhugsun, 10...Df6?! í stað 10...Re7 sem er algengastur. Hrund hefði getað notfært sér þessa ónákvæmni með því að halda frumkvæðinu og setja pressu á svarta kónginn á miðborðinu með leikjum eins og 11. He1, 11. Rbd2 eða 11. Bg5. Hún eyddi smá tíma í að hirða peð á drottningarvængnum og missti aðeins þráðinn í framhaldinu, þrátt fyrir að vera enn með mun betra tafl. Í framhaldinu fékk Di Benedetto að hróka í friði og hafði auk þess biskupaparið gegn aðgerðalitlu riddarapari Hrundar. Sú ítalska nýtti sér stöðuyfirburðina í framhaldinu og vann af öryggi.

Di Benedetto lék síðast 10...Df6?! Hér gat Hrund tekið frumkvæðið með 11. He1+, 11. Rbd2 eða jafnvel 11. Bg5, með góðum færum. Hún lék í staðinn eðlilegum leik, 11. Dxa4, en tapaði við það mikilvægu tempói og svartur fékk smá svigrúm til að laga stöðuna.

4-0 tap var svekkjandi því stöðurnar bentu til annars eftir byrjunina. Það snérist eiginlega allt okkur í óhag þegar við lentum í tímahraki á öllum borðum. Við þurfum að passa betur upp á tímanotkunina á morgun; ekki eyða tíma að óþörfu, treysta á innsæið og okkar útreikninga - ekki andstæðinginn.

Andstæðingar okkar á morgun, í 3. umferð, er sterkt lið Englands (meðalstig: 2236) Liðsstjóri Englendinga er hinn sérkennilegi, en bráðskemmtilegi stórmeistari, Jonathan Speelman. Ég var mikill aðdáandi Speelmans þegar ég var ungur drengur, aðallega vegna frumlegrar taflmennsku hans. Eftir að IM Jón Viktor Gunnarsson tók Speelman í bakaríið á Ólympíumótinu í Istanbúl árið 2000 fór ég að halda minna upp á Speelman og meira upp á Jón Viktor! Speelman kom reyndar að máli við mig við upphaf 1. umferðar í gær og bað mig að skrifa undir mótmælabréf sem hann hafði sett saman, fyrir hönd liðsstjóranna á mótinu. Mótmælabréfið tengdist þeirri reglu á mótinu að keppendur og liðsstjórar þurfi að tilkynna skákdómurum sérstaklega ef þeir ætli að nota salernið. Eðlilega fannst Speelman þessi regla sérkennileg, enda er salernisaðstaðan inni á keppnissvæðinu, sem auk þess er rækilega girt af með málmleitartækjum og öryggisvörðum. Ég skrifaði að sjálfsögðu undir, enda ekki bara aðdáandi Speelmans heldur líka þess að geta farið á salernið án þess að biðja um leyfi.

Þangað til næst, bestu kveðjur frá Bakú.

- Björn Ívar

Skák.is

Spil og leikir | Breytt s.d. kl. 22:03 | Slóð | Facebook | Athugasemdir (0)

3.9.2016 | 21:46

Jón Viktor vann Ljósanæturmót HS Orku

Alþjóðlegi meistarinn Jón Viktor Gunnarsson vann ljósanæturmót HS Orku með fullu húsi í dag og tryggði sér með því vegleg peningaverðlaun. Í öðru sæti frekar óvænt var hinn ungi Fjölnismaður Jón Trausti Harðarson með 8,5 vinning af 11. Þriðji varð svo alþjóðlegi meistarinn Björn Þorfinnsson með 8 vinninga.

Röð		Nafn	Elo	Félag	Fl.	Vinn	Stig
1	IM	Jón Viktor Gunnarsson	2484	TR		11	72
2		Jón Trausti Harðarson	1976	Fjölnir		8½	71
3	IM	Björn Þorfinnsson	2533	TR		8	77
4	FM	Davíð Kjartansson	2341	Fjölnir		7½	76½
5		Örn Leó Jóhannsson	2158	SR		7	73½
6	FM	Guðmundur Stefán Gíslason	2278	TB		7	72½
7	IM	Sævar Jóhann Bjarnason	2057	TR		6½	70
8		Ólafur Gunnar Ingason	1898	SR		6½	60½
9		Þorvarður F Ólafsson	2202	TR		6	73½
10		Vigfús Óðinn Vigfússon	1865	Huginn		6	67
11		Páll Þórhallsson	1996	SR		6	66½
12		Bragi Halldórsson	2194	Huginn		6	64½
13		Smári Arnarson	0	TR		6	56
14		Gauti Páll Jónsson	1923	TR		5½	74
15		Hörður Aron Hauksson	1794	Fjölnir		5½	64
16		Páll Andrason	1957	TG		5	63½
17		Árni Ólafsson	1183	TR	U15	5	59
18		Snorri Sigurður Karlsson	1633	Haukar		5	59
19		Sólon Siguringason	1303	TG	U15	5	53½
20		Björn Kristinn Jóhannsson	0	SR		5	50½
21		Ingólfur Kristinsson	0	Njarðvík	U15	5	49

Veitt voru 2 aukaverðlaun. í flokki 14 ára og yngri varð efstur Árni Ólafsson úr TR sem var með 5 vinninga en ofar á stigum en Sólon Siguringason TG og Ingólfur Kristinsson Reykjanesbæ sem voru með jafn marga vinninga.

Nokkur óvænt úrslit voru í mótinu engin þó óvæntari en hjá Smára Arnarsyni sem er stigalaus gegn Braga Halldórssyni í fyrstu umferð en reiknað var með að stigalausir væru með 1000 stig. Alls munaði því 1194 stigum á þeim og því stjarnfræðilega lítill möguleiki á að Smári skyldi sigra skákina.

Alls tóku 28 manns þátt í mótinu og var gaman að sjá unga krakka úr Reykjanesbæ og stúlknahóp úr Grindavík sem settu mikinn svip á mótið.

Myndaalbúm mótsins má finna með því að smella hér.

Úrslit og lokastaðan.

Spil og leikir | Breytt s.d. kl. 21:48 | Slóð | Facebook | Athugasemdir (0)

3.9.2016 | 20:00

Skákþáttur Morgunblaðsins: Systkinin gera það gott á EM ungmenna í Prag

14125124_153524358420977_5698749473928475194_o (1)

Heimsmeistara- og Evrópumót ungmenna eru stærstu skákmótin fyrir unga skákmenn í dag. Þau eru haldin árlega og eru opin piltum og stúlkum í sex aldursflokkum á aldrinum 8-18 ára. Þar sem alþjóðlega skáksambandið, FIDE, hefur haft aðsetur í Rússlandi í meira en 20 ár hefur þróunin orðið sú að þessi mót hafa nær undantekningarlaust verið haldin í grennd við höfuðstöðvarnar; Tyrkland, Svartfjallaland, Slóvenía, Grikkland og Georgía eru nokkur lönd sem íslensk ungmenni hafa átt kost á að sækja heim á undanförnum árum.

Evrópumót ungmenna sem lýkur um helgina fer fram Prag í Tékklandi og þar tefla íslensku keppendurnir, sem er ellefu talsins, við geysiöflugt lið því austurblokkin með Rússa, Úkraínumenn, Asera og Armena, svo nokkrar þátttökuþjóðir séu nefndar, hefur að venju sterka viðveru.

Yngstu íslensku keppendurnir eru þeir Bjartur Þórisson 7 ára og Tómas Möller sem er 8 ára og tefla þeir í keppnisflokki drengja 8 ára og yngri. Ásamt Benedikt Þórissyni sem teflir í 10 ára flokknum fá þeir sér þannig reynslu sem síðar mun reynast dýrmæt. Það sést best á frammistöðu hinnar 10 ára gömlu Freyju Birkisdóttur sem hefur hlotið 4 vinninga af sjö mögulegum en hún tefldi á HM ungmenna í Grikklandi í fyrra og þekkir því vel til á þessum vettvangi.

Akureyringarnir Símon Þórhallsson og Jón Kristinn Þorgeirsson hafa virkað æfingalausir þrátt fyrir góða spretti. Það sama gildir um Gauta Pál Jónsson og Robert Luu. Þrír íslensku keppendanna tefldu á Ólympíumóti 16 ára og yngri í Slóvakíu á dögunum: Vignir Vatnar Stefánsson hefur ekki náð sér á strik og er með 3 ½ vinning af sjö mögulegum sem er nokkuð undir ætluðum árangri þó hann hafi yfirleitt skilað góðum árangri á þessum mótum. Tvíburabræðurnir Björn Hólm og Bárður Örn Birkissynir hafa hinsvegar náð góðum árangri og Bárður, sem er með 4 vinninga, hefur verið í mikilli framför undanfarin misseri. Þegar frammistaða Freyju bætist við geta þau systkin verið ánægð með sinn hlut í Prag. Í 6. umferð vann Bárður hollenskan skákmann á sannfærandi hátt í eftirfarandi skák:

EM ungmenna 2016:

Kevin Nguyen – Bárður Örn Birkisson

Spænskur leikur

1. e4 e5 2. Rf3 Rc6 3. Bb5 a6 4. Ba4 Rf6 5. d3 d6 6. c3 g6 7. h3 Bg7 8. Bg5 h6 9. Be3 O-O 10. Rbd2 Rh5 11. g3 Bd7 12. Bc2 De8!

Uppbygging svarts minnir á kóngsindverska vörn. Drottningin gefur f-peðinu lausan tauminn með því að valda riddarann á h5 óbeint.

13. De2 f5 14. O-O-O f4 15. gxf4 exf4 16. Bd4 Rxd4 17. Rxd4 b5

Hann gat líka leikið 17. ... c5, nú er ein hótunin 18. ... b4 o.s.frv.

18. R2f3 c5 19. Bb3+ Kh7 20. Rc2 Bc6 21. Hhe1 a5 22. Dd2?

Byrjun hvíts hefur verið stefnulaus og þessi leikur bætir ekki úr skák. Hann varð að forða biskupinum með 22. Bd5.

22. ... c4!

Króar biskupinn af.

23. dxc4 a4 24. cxb5 axb3 25. axb3 Bxb5 26. Dxd6 Hf6 27. Dd5 Bc6 28. Dd3 Hf7 29. Rfd4 Bd7 30. e5 He7 31. e6

E-peðið var að falla og ekkert mótspil hefst upp úr þessu.

31. ... Bxe6 32. De4 Ha6 33. b4 Bf6 34. b5 Hd6 35. Dd3 Bd7 36. c4 Hxe1 37. Hxe1

37. ... Hxd4!

Nú fellur enn meira lið. Eftirleikurinn er auðveldur.

38. Df3 Df7 39. Rxd4 Bxd4 40. De2 Bxh3 41. b4 Rg7 42. Hd1 Da7 43. Dd2 Da3+

- og hvítur gafst upp.

Helgi Ólafsson helol@simnet.is

Grein þessi birtist í Morgunblaðinu 27. ágúst 2016

Skákþættir Morgunblaðsins

Spil og leikir | Breytt 29.8.2016 kl. 08:29 | Slóð | Facebook | Athugasemdir (0)

3.9.2016 | 17:19

Tvö töp í dag - Mjög góð sigurskák Hjörvars

Það gekk ekki vel hjá íslenku liðunum í 2. umferð Ólympíuskákmótsins í Bakú í Aserbaísjan. Íslenska liðið í opnum flokki tapaði 1-3 fyrir sterku liði Tékka en kvennaliðið steinlá fyrir ítalska liðunu 0-4. Bæði liðin voru að tefla við umtalsvert sterkari sveitir.

Hjörvar Steinn Grétarsson (2547) vann mjög góðan sigur á stórmeistaranum Viktor Laznicka (2651). Ingvar, liðsstjóri, á án efa eftir að fara yfir þá skák.

Þriðja umferð fer fram á morgun og hefst kl. 11. Pörun liggur ekki fyrir enn.

Spil og leikir | Breytt s.d. kl. 17:31 | Slóð | Facebook | Athugasemdir (0)

3.9.2016 | 14:26

Ný alþjóðleg skákstig

Ný alþjóðleg skákstig komu út 1. september sl. Hannes Hlífar Stefánsson er sem fyrr stigahæsti skákamður landsins. Í næstu sætum eru Héðinn Steingrímsson og Hjörvar Steinn Grétarsson. Jón Magnússon er stigahæstur nýliða og tvíburabræðurnir Bárður Örn og Björn Hólm Birkissynir hækkuðu langmest allra frá ágúst-listanum.

Heildarlistann má finna hér.

Topp 20

No.	Name	Tit	Rtng	Gms	Diff
1	Stefansson, Hannes	GM	2574	9	-3
2	Steingrimsson, Hedinn	GM	2572	0	0
3	Gretarsson, Hjorvar Steinn	GM	2547	10	-9
4	Hjartarson, Johann	GM	2545	0	0
5	Olafsson, Helgi	GM	2539	0	0
6	Petursson, Margeir	GM	2512	0	0
7	Danielsen, Henrik	GM	2480	0	0
8	Arnason, Jon L	GM	2478	0	0
9	Kristjansson, Stefan	GM	2464	0	0
10	Gunnarsson, Jon Viktor	IM	2457	0	0
11	Gretarsson, Helgi Ass	GM	2448	0	0
12	Kjartansson, Gudmundur	IM	2442	0	0
13	Thorsteins, Karl	IM	2439	0	0
14	Gunnarsson, Arnar	IM	2431	0	0
15	Thorfinnsson, Bragi	IM	2430	9	-3
16	Thorhallsson, Throstur	GM	2411	0	0
17	Thorfinnsson, Bjorn	IM	2398	0	0
18	Ulfarsson, Magnus Orn	FM	2385	0	0
19	Jensson, Einar Hjalti	IM	2378	10	7
20	Arngrimsson, Dagur	IM	2378	0	0

Heildarlistann má finna hér.

Nýliðar

Þrír nýliðar eru á listanum. Stigahæstur þeirra er Jón Magnússon (1563). Næstir eru Steinþór Örn Gíslason (1156) og Tómas Möller (1028)

No.	Name	Tit	Rtng	Gms	Diff
1	Magnusson, Jon		1563	6	1563
2	Gislason, Steinthor Orn		1156	5	1156
3	Moller, Tomas		1028	9	1028

Mestu hækkanir

Tvíburabræðurnir Björn Hólm (111) og Bárður Örn (92) hækkuðu langmest allra frá ágúst-listanum. Þriðji varð Halldór Atli Kristjánsson (39).

No.	Name	Tit	Rtng	Gms	Diff
1	Birkisson, Bjorn Holm		2019	9	111
2	Birkisson, Bardur Orn		2120	9	92
3	Kristjansson, Halldor Atli		1417	4	39
4	Baldursson, Haraldur		1957	9	31
5	Bergsson, Stefan		2018	3	25
6	Thorsteinsdottir, Svava		1335	4	24
7	Johannesson, Oliver	FM	2255	9	23
8	Ptacnikova, Lenka	WGM	2159	5	23
9	Ingason, Sigurdur		1869	17	23
10	Thorarinsson, Pall A.		2292	9	22
11	Hardarson, Jon Trausti		2100	9	22
12	Lee, Gudmundur Kristinn		1778	3	22

Stigahæstu skákkonur landsins

Lenka Ptácníková (2159) er sem fyrr stigahæsta skákkona landsins. Í næstu sætum eru Guðlaug (2046) og Hallgerður Helga (2015) Þorsteinsdætur.

No.	Name	Tit	Rtng	Gms	Diff
1	Ptacnikova, Lenka	WGM	2159	5	23
2	Thorsteinsdottir, Gudlaug	WFM	2046	5	-5
3	Thorsteinsdottir, Hallgerdur		2015	5	1
4	Finnbogadottir, Tinna Kristin		1894	5	-37
5	Davidsdottir, Nansy		1842	0	0
6	Kristinardottir, Elsa Maria		1836	2	-2
7	Fridthjofsdottir, Sigurl. Regina		1802	10	-13
8	Hauksdottir, Hrund		1793	5	4
9	Magnusdottir, Veronika Steinunn		1777	14	-9
10	Helgadottir, Sigridur Bjorg		1769	0	0

Stigahæstu ungmenni landsins (20 ára og yngri)

Dagur Ragnarsson (2272) er stigahæsta ungmenni landsins. Í næstu sætum eru Oliver Aron Jóhannesson (2255) og Vignir Vatnar Stefánsson (2129).

No.	Name	Tit	Rtng	Gms	B-day	Diff
1	Ragnarsson, Dagur	FM	2272	9	1997	-2
2	Johannesson, Oliver	FM	2255	9	1998	23
3	Stefansson, Vignir Vatnar		2129	9	2003	-31
4	Birkisson, Bardur Orn		2120	9	2000	92
5	Thorgeirsson, Jon Kristinn		2102	9	1999	-49
6	Hardarson, Jon Trausti		2100	9	1997	22
7	Thorhallsson, Simon		2085	9	1999	-84
8	Jonsson, Gauti Pall		2082	9	1999	7
9	Birkisson, Bjorn Holm		2019	9	2000	111
10	Heimisson, Hilmir Freyr		1988	0	2001	0

Upplýsingar um stigahæstu skákmenn heims má finna hér.

Skrár tengdar þessari bloggfærslu:

Alþjóðleg skákstig, 1. september 2016

Spil og leikir | Breytt s.d. kl. 14:36 | Slóð | Facebook | Athugasemdir (0)

3.9.2016 | 08:31

Viðureignir dagsins: Tékkland og Ítalía

Íslenska liðið í opnum flokki mætir liði Tékka í dag. Bragi Þorfinnsson hvílir.

Bein útsending.

Íslenska kvennaliðið mætir sveit Ítalíu. Veronika Steinunn Magnúsdóttir hvílir.

Bein útsending.

Umferðin hefst kl. 11.

Spil og leikir | Breytt s.d. kl. 08:32 | Slóð | Facebook | Athugasemdir (0)

3.9.2016 | 07:00

Stórt start hjá SA í dag!

Nú þegar sumri hallar fara kóngar og drottningar á kreik. Riddarar, biskupar og peð. Og framhjáhlaupin byrja fyrir alvöru.

Við hjá Skákfélagi Akureyrar ætlum að hleypa okkar taflmönnum á skeið á STÓRA STARTMÓTINU laugardaginn 3.september. Þá er meiningin að kalla til leiks alla þá sem peði geta valdið og hafa minnsta grun um það hvernig riddarin hoppar um taflborðið. Við stefnum að fjölmennasta móti norðan heiða í áratugi - jafnvel aldir. Markmiðið er að ná saman minnst 40 þátttakendum.

Staður og stund: Íþróttahöllin við Skólastíg, ath gengið inn að sunnan um aðaldyr! Laugardaginn 3. september kl. 13.00

Á STÓRA STARTMÓTINU geta keppendur og gestir:

Kynnt sér haustdagskrá Skákfélagsins

Fengið sér kaffisopa

Skráð sig í félagið eða á vinalista á Facebook

Skráð sig á mót eða aðra viðburði félagsins

Tekið eina bröndótta

Teflt þrjár sjö mínútna skákir á Startmótinu - fyrri hluta

Gætt sér á veitingum í hléi í góðra vina hópi

Teflt allar sjö skákirnar á Startmótinu - fyrri og seinni hluta

Þeir sem vilja geta sumsé látið þrjár skákir nægja og hellt sér í veitingarnar eða ef skákviljinn er brennandi, teflt til þrautar allat umferðirnar sjö. Umhugsunartími fyrir hverja skák verður 7 mínútur.

Fjölmörg verðlaun verða í boði - aðallega þó ánægjan af því að tefla skák.

Sjáumst öll í höllinni laugardaginn 3. september!

Spil og leikir | Breytt 25.8.2016 kl. 17:14 | Slóð | Facebook | Athugasemdir (0)

3.9.2016 | 05:58

Ólympíuskákmótið hófst með látum í gær

Ólympíuskákmótið hófst í gær. Það 42. í sögunni. Vel gekk hjá íslensku liðunum sem fram hefur komið í pistlum Ingvars og Björns Ívars. Skipulagningin virðist vera að mestu leyti í góðu lagi. Það sem hefur truflað mig mest eru aðgangsmál en í FIDE-fulltrúar hafa enn sem komið er ekki aðgang að sjálfu keppnissvæðinu. Í gær fékk ég bara aðgang að áhorfendasvæðinu. Ég gafst fljótlega upp og fór fremur upp á hótel. Ég vonast eftir því að þetta komist í lag í dag.

Einnig fá afar fáir leyfi til að taka myndir og t.d. voru engar myndir teknar af karlaliðinu í gær. Ég hef einnig óskað eftir myndatökuleyfi sem ég vonast eftir að fá.

Töskurnar skiluðu sér loks í fyrrinótt. Það er settur mikill þrýstingur á mótshaldara og þeim bent á að í töskunum væru lyf sem væri einum liðsmanni lífsnauðsynleg. Yfirstjórn FIDE var blandað inní málin og það virkaði. Kjartan greyið þurfti að vaka til 4 um nóttu eftir töskunum. Mikil var gleði liðsmanna þegar töskurnar voru komnar.

Íslenski hópurinn er á þremur hótelum. Ég á sérhóteli, keppendur á öðru hóteli og skákstjórarnir á því þriðja. Þótt ótrúlegt megi vera hef ég ekki enn hitt á Róbert og Ingu! Það breytist í dag.

Andstæðingar dagsins í opnum flokki eru Tékkar. Sautjánda sterkasta liðið á pappírnum með meðalstigin 2631 á meðan við erum það 44. sterkasta með meðalstigin 2527. Jafntefli 2-2 væru stórgóð úrslit.

Við höfum aldrei mætt þeim á Ólympíuskákmóti en Íslendingar mættu Tékkóslóvakíu 12 sinnum á árunum 1930-1992. Minnistæður sigur vannst á þeim í lokaumferðinni í Manila 1992,2½-1½, sem fleytti Íslandi upp í sjötta sæti þess móts. Þá tefldi Jóhann Hjartarson á fyrsta borði og Hannes á því fjórða. Þeir gerðu báðir jafntefli. Jón L. Árnason vann sína skák.

Við höfum hins vegar þrívegis mætt Tékklandi á EM landsliða. Síðast í fyrstu umferð í Varsjá 2013. Viðureign sem tapaðist með minnsta mun.

Íslenska kvennaliðið mætir liði Ítalíu sem er það 20. sterkasta með meðalstigin 2304 til samanburðar við 2003 meðalstig íslenska liðsins. Róðurinn verður þungur í dag.

Íslenska kvennalandsliðið hefur 5 sinnum teflt við það ítalska. Síðast árið 2010 í Khanty-Mansiysk. Þá náðist afar gott 2-2 jafntefli gegn mun sterkari sveit. Jóhanna Björg Jóhannsdóttir var þá hetja íslenska liðsins. Lenka og Hallgerður gerðu góð jafntefli á 1. og 2. borði.

Stefnum á tvö góð úrslit í dag!

Umferðin hefst kl. 11.

Kveðja frá Bakú,
Gunnar

Spil og leikir | Breytt s.d. kl. 06:06 | Slóð | Facebook | Athugasemdir (0)

2.9.2016 | 20:58

Ólympíuskákmótið: 1.umferð opinn flokkur

Pörunin í fyrstu umferð í opnum flokki var þótt órúlegt megi virðast nákvæmlega sú sama og á Ólympíumótinu í Tromsö 2014. Eþíópíumenn voru mótherjar dagsins en þeir voru lagðir 4-0 fyrir fjórum árum. Þessi 100 milljónaþjóð er e.t.v. ekki þekkt fyrir afrek á skáksviðinu en þess þá heldur á hlaupabrautum.

Ákveðið var að Jóhann myndi hvíla í þessari umferð. Uppstillingin var því Hannes - Hjörvar - Guðmundur - Bragi. Stigahæstur andstæðinganna var fyrsta borð með rúm 2100 skákstig en aðrir voru með 1800-1900 stig. Borð 2 og 3 gáfu CM-titilinn þó hann virðist hafa verið fenginn á öðrum forsendum en skákstigum :-)

Skipuleggjendur voru full gjafmildir á tíma annarra þegar þeir boðuðu keppendur niður í móttöku hótelsins klukkan 13:45 til að ferðast um 5 km leið á skákstað. Okkar beið hálftíma bið í rútunni og svo nokkur bið á skákstað þar sem 1. umferð tafðist einnig um 15 mínútur. Að öðru leiti hefur skipulagið verið skrambi gott, mikið lagt í hlutina og gríðarlegt yfirframboð á sjálfboðaliðum.

Á leiðinni á skákstað sáum við eitt það stærsta fánaflykki sem nokkur okkar hefur séð. Eftir umferðina var google leit fljót að sýna að á ferðinni var stærsti fáni í heimi, 70x35m og gríðarlega tignarlegur.

&nbsp;

En snúum okkur að viðureigninni. Eþíópíumennirnir mættu í forláta gulum adidas göllum og voru fánalitirnir áberandi í búningnum. Við Íslendingar mættum einnig í flottum Henson jökkum sem hafa vakið mikla athygli og höfum við þurft að taka nokkur víkinga "HÚH" fyrir aðdáendur íslenska fótboltalandsliðsins.

1.borð - Hannes

Hannes fékk stigahæsta skákmann andstæðingana eins og vera ber og tefldi hann nokkuð furðulega í byrjuninni með tempótöpum eins og ..Re5 og nokkuð linkulega leiki. Snemma kom svo afleikur og Hannes vann peð.

Hér steindrap Hannes á finnur sex sem þýddi að svartur tapaði þvingað peðinu á d6 vegna óþægilegra riddaraleikja, Rb5 eða Rd5 eftir atvikum. Hannes vann nokkuð vel úr stöðuyfirburðunum þrátt fyrir að hafa ekki fundið "tölvukiller" á ákveðnum stað. Reyndar er það gott heilræði sem reyndasti lismaður okkar benti á að það væri óþarfi að fórna í unnum stöðum!

&nbsp;

Hannes endaði á að fá hróksendatafl sem hann vann auðveldlega.

2.borð - Hjörvar

Hjörvar tefldi gegn CM á 2. borði. Í byrjuninni hefði líklegast verið best fyrir Hjörvar að halda biskupaparinu en engu að síður var innsæi hans líklega rétt að hann hefði átt að hafa betri stöðu og færi eftir uppskiptin á c3. Hjörvar hefði þurft að tefla af krafi en gaf þessi í stað andstæðingi sínum færi á að laga stöðuna.

Svo fór að Eþíópubúinn sótti í sig veðrið eins og sönnum langhlaupara og lagaði stöðu sína og fékk loks mun betra tafl. Á einum tímapunkti átti hann gangandi þráksák en af dirfsku ákvað hann að tefla til vinnings. Það varð honum að falli þegar hann að lokum missti af þráskák.

Hér var De6+ aftur gangandi þráskák en þess í stað kom Df8+? og svarti kóngurinn lagði í leiðangur sem að lokum myndaði mátnet fyrir hvíta kónginn. Hurð skall nærri hælum en svona sleppa þessir bestu!

3. borð - Gummi

Í stuttu máli tefldi Gummi eins og herforingi. Hvítu mennirnir höguðu sér eins og sjálfur Karpov væri við stjórnvölinn. Staðan var bætt jafnt og þétt milli þess sem mennirnir voru hreyfðir fram og til baka og beðið átekta. Loks gaf svartur eftir og tapaði liði.

Hér kom Re5 og skiptamunur féll í kjölfarið og eftirleikurinn varð auðveldur þó skákin yrði sú lengsta í viðureigninni.

4. borð - Bragi

Andstæðingur Braga tefldi byrjunina rólega og var með verra en Bragi missti tökin aðeins og var með aðeins verra þó það væri ekki alvarlegt ástand.

Ekki varði það ástand þó lengi þegar hvítur lék illa af sér með Hc2??

Hér kláraði Bragi dæmið með ...f5 þar sem veikleikinn í borðinu kostar hrók eftir ...Dxc2 í næsta leik.

Á morgun í 2.umferð má segja að alvaran hefjist þegar við mætum grjótharðri sveit Tékka. Á fyrsta borði mun líklegast mæta til leiks Íslandsvinurinn David Navara sem iðullega er með skákstigin sín vel yfir 2700 stiga múrnum. Tékkar eru númer 17 í röðinni og því ljóst að verkefnið verður erfitt en þó engan veginn óyfirstíganlegt og mætum við galvaskir til leiks á morgun!

- Ingvar Þór Jóhannesson, liðsstjóri í opnum flokki. (myndir : Bidur Gautam)

Skák.is

Spil og leikir | Breytt 3.9.2016 kl. 10:01 | Slóð | Facebook | Athugasemdir (0)

2.9.2016 | 20:28

Tékkar og Ítalar á morgun

Pörun annarrar umferð Ólympíuskákmótsins í Bakú liggur fyrir. Bæði liðin tefla töluvert upp fyrir sig. Karlaliðið liðið teflir við lið Tékka en kvennaliðið teflir við Ítalíu.

Helsta stjarna Tékka er Íslandsvinurinn David Navara, 20. stigahæsti skákmaður heims.

Lið Tékklands er það 17. sterkasta á meðan lið Íslands er nr. 44 í stigaröðinni svo búast má við erfiðri viðureign.

Lið Tékka skipa