Skák.is

Færsluflokkur: Spil og leikir

2.9.2016 | 19:37

Ólympíuskákmótið: 1. umferð Kvennalandsliðsins

Eftir langt og strangt ferðalag en góða hvíld síðasta sólarhringinn var loksins komið að upphafi mótsins. Það var eftirvænting í hópnum fyrir 1. umferð. Umgjörðin í kringum mótið er mögnuð og tilkomumikil. Það fer ekki framhjá nokkrum manni að hér í Bakú fer fram Ólympíuskákmót. Alls staðar eru skilti, auglýsingar og upplýsingabásar sem tengjast mótinu. Fjöldi sjálfboðaliða í tengslum við mótið er ótrúlegur. Öryggisgæslan á svæðinu hefur einnig vakið sérstaka athygli okkar en rúturnar sem flytja keppendur til og frá skákstað fá lögreglufylgd með blikkandi ljósum. Vopnaðir lögreglumenn og öryggisverðir eru einnig víða. Af þessum sökum tók það smá tíma fyrir undirritaðan, sem er liðsstjóri og þjálfari kvennaliðsins, að komast inn á skákstaðinn fyrir umferð í dag. Þannig er mál með vexti að ég er með insúlíndælu, sem ég lifi ekki án og get því ekki tekið af mér, og það tók sex öryggisverði töluverðan tíma að samþykkja að tækið væri hvorki skákreiknir né sprengja. Að þessari rannsókn lokinni fékk ég að fara í keppnissalinn, liðsmönnum til mikillar skemmtunar!

Lið Íslands í kvennaflokki á mótinu er þannig skipað:

1. Lenka Ptacnikova 2159

2. Guðlaug Þorsteinsdóttir 2049

3. Hallgerður Helga Þorsteinsdóttir 2015

4. Hrund Hauksdóttir 1793

Varamaður: Veronika Steinunn Magnúsdóttir 1777

Andstæðingar okkar voru kornungar stúlkur frá Maldíveyjum, sem eru nr. 134 í röðinni af 140 keppnisliðum. Við erum nr. 61. Guðlaug hvíldi í umferðinni í dag. Einungis andstæðingur Lenku, Mohammed Shahudha (1022), á 1. borði var með skákstig, svo við vissum ekki alveg við hverju mátti búast. Það var þó fljótlega ljóst að skákþekking maldívsku stúlknanna var takmörkuð. Lenka fékk fljótlega yfirburðarstöðu, vann peð, hafði biskupaparið og alla stöðuna. Eftir að hafa hrókað langt og stillt upp í kóngssókn opnaði Lenka taflið með d5 og þá hrundi allt hjá svörtum.

Hér lék Lenka 20. d5! og vann létt eftir 20...exd5 21. cxd5 Dxd5? 22. Bf6 Hde8?? 23. Bc4

Hallgerður Helga hafði svart gegn Abdulla Zaura (0). Upp kom Caro-Kann vörn og þrátt fyrir vafasama byrjunartaflmennsku fékk Zaura þolanlega stöðu. Halla vildi refsa henni strax en missti af 19. g3 og fékk tæknilega tapað tafl. Hún tók þá mjög skynsamlega ákvörðun og fór út stöðu þar sem hún var skiptamun og peði undir en hafði þó töluverðar bætur sem fólust í sterkum riddara á f5 og lélegum biskup hvíts á c1, sem rakst í eigin peð. Zaura hefði þurft að tefla nokkuð nákvæmt til þess að nýta sér liðsyfirburðina en henni varð strax á í messunni með 25. He5??

25...Rxd4! 26. cxd4? Dxd4+ 27. De3? Bxe5! og eftirleikurinn var auðveldur.

Hrund hafði hvítt gegn Mohamed Shareef Aishah Alya, sem er einungis 10 ára gömul. Byrjunartaflmennskan hennar var mjög vafasöm. Hrund nýtti sér það vel, tefldi mjög nákvæmt, og refsaði henni grimmilega.

12...Bd6?? 13. Rxc6 dxc6 14. e5 og Hrund vann auðveldlega í framhaldinu.

Veronika hafði svart gegn Rilwan Nuha, 11 ára gamalli. Rilwan tefldi á óhefðbundinn hátt, eins og liðsfélagar hennar, og Veronika nýtti sér mistök hennar í miðtaflinu og vann mann. Nokkrum leikjum síðar stytti sú maldvíska þjáningar sínar með því að leika sig beint í mát.

14. b3?? Be5 15. Dd3 h6 16. Rf3 Bxc3 17. Dxc3 d5 og manni yfir vann Veronika stuttu seinna.

Á morgun fáum við lið Ítalíu sem er afar sterkt, með meðalstig 2304. Þangað til þá, bestu kveðjur frá Bakú.

- Björn Ívar Karlsson

Spil og leikir | Breytt s.d. kl. 21:20 | Slóð | Facebook | Athugasemdir (0)

2.9.2016 | 16:58

Tveir 4-0 sigrar í fyrstu umferð Ólympíuskákmótsins

Fyrsta umferð Ólympíuskákmótsins fór fram í dag. Íslensku sveitirnar unnu báðar góða 4-0 sigra. Karlalið gegn sveit Eþíópíu og kvennaliðið gegn Maldíveyjum. Sigur kvennaliðsins var mjög öruggur en smá lukka var yfir sigri Hjörvars á öðru borði í viðureigninni gegn Eþíópíu.

Myndir David Llada.

Skákir dagsins:

Liðsstjórar sveitanna munu gera betri grein fyrir skákum dagsins í pistlum.

Spil og leikir | Breytt s.d. kl. 17:00 | Slóð | Facebook | Athugasemdir (0)

2.9.2016 | 15:49

Kennari verður skákkennari: Hvammstangi

Stefán Bergsson hélt hringferð sinni um landið áfram í morgun. Viðkomustaður dagsins í verkefninu Kennari verður skákkennari var Grunnskóli Húnaþings vestra á Hvammstanga. Skólinn er nokkuð fjölmennur enda þjónar hann nær öllum íbúm Húnaþings vestra sem telur 1250 manns. Í hverjum árgangi er einn bekkur og nemendafjöldi kringum 15 í hverjum bekk. Kennsla dagsins fór fram í fyrsta til fjórða bekk og var hver bekkur í eina kennslustund í skák. Stefán kenndi nemendum sem höfðu flestir einhvern grunn í skák. Þorbjörn Gíslason umsjónarkennari í þriðja bekk fylgdist með kennslunni. Þorbjörn sem er fyrrum bréfskákmaður mun í vetur kenna yngstu nemendum skólans skák og tekur þátt í verkefninu fyrir hönd skólans.

Þorbjörn ásamt nemendum sínum.

Suzuki umboðið er helsti styrktaraðili ferðarinnar og Hótel Hvammstangi styrkti kennsluna í Grunnskóla Húnaþings vestra.

Spil og leikir | Slóð | Facebook | Athugasemdir (0)

2.9.2016 | 09:45

Ólympíuskákmótið: Viðureignir dagsins

Beinar slóðir á viðureignir dagsins á Ólympíuskákmótinu Bakú eru:

Umferðin hefst kl. 11.

Spil og leikir | Slóð | Facebook | Athugasemdir (0)

2.9.2016 | 07:00

Ljósanæturmót HS Orku fer fram á morgun

Skákfélag Reykjanesbæjar í samstarfi við HS Orku halda Ljósanæturmót laugardaginn 3.sept kl.13:00. Tefldar verða 11 umferðir með 7 mínútna umhugsunartíma og í einum opnum flokki. Staðsetning í Njarðvíkurskóla og skráning hér að ofan í gula kassanum. Lokað verður fyrir skráningu ef fjöldi fer yfir 80 keppendur.

Verðlaunarfé frá HS Orku er 100.000 kr. og mun deilast.

1.verðlaun 40.000 kr.
2.verðlaun 25.000 kr.
3.verðlaun 15.000 k.r

Sérstök unglingarveðlaun fyrir 14 ára og yngri 10.000 kr. og fyrir óvæntustu úrstlitin 10.000 kr.

Mæting 12:45 og staðfesta skráningu hjá Palla

Upplýsingar um þegar skráða keppendur má finna hér.

Mótstjóri verður Páll Sigurðsson

Spil og leikir | Breytt 30.8.2016 kl. 13:12 | Slóð | Facebook | Athugasemdir (0)

2.9.2016 | 06:31

Eþópía og Maldvíeyjar í fyrstu umferð - Reynsluboltarnir hvíla í dag

Eþíópía og Maldíveyjar verða andstæðingar Íslands í fyrstu umferð Ólympíuskákmótsins sem hefst kl. 11 í dag. Bæði liðin eru mun veikari en íslensku liðin á pappírnum.

Hjá körlunum hvílir Jóhann Hjartarson en hjá konunum hvílir Guðlaug Þorsteinsdóttir.

Umferð dagsins

Spil og leikir | Breytt s.d. kl. 06:46 | Slóð | Facebook | Athugasemdir (0)

2.9.2016 | 06:11

Flest eftir bókinni í annarri umferð á Meistaramóti Hugins

Önnur umferð í Meistaramóti Hugins sem lauk í kvöld var jafn róleg og tíðindalítil og sú fyrsta var viðburðarríka. Sá sem var stigahærri vann að jafnaði þann stiglægri nema í skák þeirra Óskars Víkings Davíðssonar (1666) og Stephan Briem (1569) þar sem sæst var á skiptan hlut. Miðað við reynslu mína af viðureign við Stephn í fyrstu umferð er spurning hvort telja eigi það óvænt úrslit. Þótt úrslitin væru eftir bókinni þá var mikil barátta á öllum borðum og engin stutt viðureign nema þar sem símagambíturinn réð úrslitum. Þeir stigalægri velgdu þeim stigahærri undir uggum og gáfum ekki sinn hlut fyrr en í fulla hnefana. Mér sýndist við lauslega skoðun á viðureignum að Mikael Jóhann þurfa að sækja sigurinn djúpt á móti Þorsteini Magnússyni og eins komst ég ekki hjá því að fylgjast með skákinni á næsta borði þar sem Jón Trausti kreisti vinning út úr skákinni við Heimi Pál en þeir voru síðastir til að ljúka umferðinni.

Að lokinni annarri umferð eru fimm skákmenn efstir og jafnir með 2 vinninga. Þriðja umferð fer fram á mánudagskvöldið 5. september og hefst kl. 19.30. Eftir þá umferð hljóta línur að fara að skýrast nokkuð.

Staðan eftir 2 umferðir í chess-results.

Heimasíða Hugsins.

Spil og leikir | Slóð | Facebook | Athugasemdir (0)

1.9.2016 | 21:37

Glæsileg setningarathöfn – veislan hefst kl. 11 í fyrramálið.

Opnunarhátið Ólympíuskákmótsins í Bakú var einkar glæsileg í kvöld. Greinilegt að Aserar hafa lagt mikla vinnu og peninga í mótið. Meðal viðstaddra var Ilham Aliyev forseti landsins. Það var athyglisvert vart að hlusta á setningu mótsins en ræðuhöld gengu mikið að upphefja hans og föður hans Heydar Aliyev, fyrrum forseta landsins og þeirra afrek við uppbyggingu skáklífs.

Og það eiga þeir fyllilega skilað. Núverandi forseti landsins og hefur staðið sem klettur á bakvið aserskt skáklíf og pabbinn, sem er algjör þjóðhetja hér, stóð einnig mjög þétt á bakvið skáklífið á meðan hann lifði. Skilst mér meðal annars á frásögnum þeirra sem til þekkja að hann hafi tekið Kasparov uppá sína arma útvegað honum þjálfara og húsnæði þegar hann var ungur. Fengið honum allt til sem til þurfti.

Kasparov, sem er ekki þekktur fyrir að þakka mikið fyrir sig, orðaði það svo síðar í viðtali:

I always said that Heydar Aliyev has done a lot for me to become the Champion. He created proper conditions for playing. If not him, maybe I wouldn't become the Champion in 1982 and 1984

Töskuleysi hefur hrjáð hópinn. Við fengum þeir fréttir í kvöld að 9 af 13 töskum hafi skilað sér. Ekki vitum við enn hvaða 9 töskur það eru en þeim á að skila til okkur í kvöld/nótt. Frekar óþægilegt en verslunareigendur í Bakú hafa notið góðs af þessu af þessu ástandi. Forseti og varaforseti SÍ fóru t.d. í verslunarleiðangur í dag og keyptu reyndar meira í sumarútsölu í Pierre Cardin en til stóð.

Verðlagið hér er mjög lágt í samanburði við Reykjavík og auðvelt að gera góð kaup. Hluti hópsins notaði daginn til að heimsækja gamla bæinn. Aðrir hvíldu sig og söfnuðu kröftum eftir langt og strang ferðalag og mikinn tímamismun.

Umferð morgundagsins hefst kl. 11. Ekki liggur enn fyrir hverjir verða andstæðingar morgundagsins þrátt fyrir klukkan sé orðin 1:30.

Hægt verður að nálgast allar upplýsingar um hvernig megi fylgjast með viðureignum morgundagins á Skák.is. Einnig er bent á Facebook-hópinn “Íslenskir skákmenn” en þar verður vel fylgst með Ólympíuskákmótinu.

Kveðja frá Bakú,
Gunnar Björnsson

Spil og leikir | Breytt 2.9.2016 kl. 19:38 | Slóð | Facebook | Athugasemdir (0)

1.9.2016 | 18:33

Meistaramót Hugins hófst í gærkvöldi.

Það var engin lognmolla í fyrstu umferð Meistaramóts Hugins sem hófst í gærkvöldi. Draumur skákstjórans um rólega og stutta fyrstu umferð rættist ekki því síðast skák klárðist ekki fyrr en um miðnætti og sjálfur bar hann nokkra ábyrgð á þessu með að vera næst síðastur til að klára.

Það komu tvenn óvænt úrslit í í fyrstu umferð. Héðinn Briem vann Dag Ragnarsson í þeirri skák sem lengst stóð, eftir að Dagur fórnaði manni í jafnteflislegri stöðu. Héðinn var þegar þar var komið sögu mjög tímanaumur og þurfti að tefla lengi við þær aðstæður en reyndist vandanum vaxinn. Hann viðurkenndi samt eftir skákina að hann hefði verið orðinn svo skekinn af atganginum að hann hefði verið að því kominn að leika peði afturá bak. Mikael Jóhann Karlsson lék af sé manni á móti Heimi Páli Ranarssyni og þurfti að lúta í lægra haldi. Vigfús var svo hætt kominn á móti Stephan Briem en hafði sigur í tímahrakinu undir lok skákar.

Önnur umferð verður tefld í kvöld og hefst kl. 19.30. Þá mætast m.a. Aron Þór – Davíð, Sævar – Jón Eggert og Heimir Páll -Jón Trausti.

Úrslit 1. umferðar í chess-results:

Spil og leikir | Slóð | Facebook | Athugasemdir (0)

1.9.2016 | 16:58

Kennari verður skákkennari: Hringferð hófst á Húnavöllum

Skák eflir skóla - kennari verður skákkennari hefur hafið göngu sína þetta skólaárið. Verkefnið sem er samstarfsverkefni menntamálaráðuneytisins og Skáksambands Íslands er nú unnið annað árið í röð. Inntak verkefnisins er að kenna almennum kennurum að kenna skák. Tólf skólar víðs vegar af á landinu taka þátt. Kennsla hófst í skólum á höfuðborgarsvæðinu í fyrstu skólaviku. Helmingur skólanna er á landsbyggðinni og heimsækir Stefán Bergsson verkefnisstjóri þá í hringferð sinni um landið í þessari og næstu viku. Hringferðin hófst í Húnavallaskóla í Austur-Húnavatnssýslu í morgun. Í Húnavallaskóla sjá Grímur Guðmundsson og Áslaug Inga Finnsdóttir um skákkennsluna. Skákkennslan er kennd í samkennslu fjórða til sjötta bekkjar; á stundaskrá einu sinni í viku. Grímur sem er smíðakennari og húsvörður skólans hefur töluverðan skákgrunn en hann var nemandi í Laugalækjarskóla í skólastjóratíð Þráins Guðmundssonar heitins. Í skákkennslunni í morgun kenndi Stefán nemendum og kennurum nokkra skákleiki fyrir nemendur til að æfa sig, fór yfir einföld mátstef og helstu atriði í byrjun tafls. Í fyrramálið verður Grunnskóli Vestur-Húnavatnssýslu á Hvammstanga heimsóttur.