Ólympíuskákmótið: 5. umferð í kvennaflokki

Ísland 1 ½ - Mexíkó 2 ½

Andstæðingar okkar í 5. umferð voru Mexíkó (meðalstig: 2082). Stelpurnar voru fullar sjálfstrausts fyrir umferðina, enda hafa þær verið að tefla vel. Sigrar okkar bæði gegn Englandi og Moldavíu hafa vakið athygli. Margeir Pétursson kom til Bakú í gær og tók meðal annars góða æfingu með okkur í dag þar sem við fórum yfir skákir gærdagsins. Hann færði okkur einnig sérstakar kveðjur frá íslenska landsliðshópnum í knattspyrnu sem gladdist víst mikið yfir sigri okkar á Englendingum í 3. umferð.

Lið Mexíkó var að mestu skipað ungum skákkonum sem mætti sennilega segja að séu efnilegar og ,,underrated‘‘ eins og margir skákmenn frá Suður-Ameríku. Við höfðum reyndar komist að því í undirbúningi okkar fyrir umferðina að þær virtust ekki vera neitt sérstaklega sterkar í byrjunum. Við lögðum því upp með að koma þeim aðeins á óvart.

Lenka hafði hvítt á 1. borði gegn WIM Diana Carime Real Pereyra (2136). Pereyra var með 4 vinninga í 4 skákum, fyrir umferðina, og hafði verið að tefla mjög sannfærandi. Hún hafði teflt vafasamt afbrigði í Sikileyjarvörn fyrr á mótinu og við fórum vel yfir það. Lenka tefldi af miklum krafti og Pereyra fékk algjörlega óteflanlega stöðu þar sem hún náði hvorki að virkja biskupinn á f8 né hrókinn á h8. Lenka bætti stöðuna jafnt og þétt og á hárréttum tímapunkti lét hún vaða og fórnaði manni fyrir óverjandi sókn.

Hér lék Lenka 22. Rdxe7! og eftir 22...Bxe7 23. Rxd6 Bxd6 24. Hxd6 Hc7 25. e5! hrundi svarta staðan.

Pereyra varðist ágætlega í framhaldinu en Lenka gerði engin mistök og skipti upp í endatafl þar sem hún hafði drottningu og sex peð gegn tveimur hrókum og þremur peðum. Hrókarnir unnu illa saman og á meðan ýtti Lenka samstæðum frípeðum sínum á g- og h-línunum sem Pereyra átti engin svör við. Glæsilegur sigur hjá Lenku sem er búin að eiga frábært mót hingað til.

Guðlaug hafði svart gegn WIM Alejandra Guerrero Rodriguez (2043) á 2. borði. Við áttum von á að Rodriguez myndi tefla Alapin afbrigðið gegn Sikileyjarvörn og bjuggum okkur vel undir það. Hún kom okkur á óvart með því að leika snemma b3 og upp kom frekar óvenjuleg staða þar sem hvítur stóð alltaf betur. Raunar var staða Gullu strategískt vafasöm í miðtaflinu en hún varðist af mikilli hörku og það var ekki auðvelt fyrir hvítan að finna eitthvað rakið þó staðan liti vel út. Eftir tímamörkin gat Rodriguez unnið peð á f4 og þá hefði Guðlaug átt erfiða vörn fyrir höndum. Sem betur fer tók sú mexíkóska þá ákvörðun að taka peðið með drottningu, í staðinn fyrir hrók, og þá gat Gulla leppað hvíta hrókinn á d4 sem leit mjög hættulega út fyrir hvítan.

Hér lék Rodriguez 43. Dxf4? í stað 43. Hxf4. Gulla svaraði með 43...Dc5! með hugmyndinni 44. Hd1 Hd8!

Ég hélt jafnvel að við værum að stela sigrinum á þessum tímapunki en Rodriguez fann einu vörnina sem byggðist á þráskák með 43. Dxf4 Dc5 44. Hb8 sem ekkert var hægt að gera við. Jafntefli niðurstaðan.

Hallgerður Helga hafði hvítt á 3. borði gegn WIM Lilia Ivonne Fuentes Godoy (2142). Halla ákvað að koma henni á óvart með því að drepa snemma með biskup á c6 í Sikileyjarvörn og leika b3 í framhaldinu, eins og Anand hafði teflt gegn Gelfand í einvígi þeirra hérna um árið. Hugmyndin var að reyna að fá upp stöðu þar sem væri hægt að tefla gegn tvípeði svarts á c-línunni í anda Nimzowitsch. Sú áætlun gekk fullkomlega upp og auk þess notaði sú mexíkóska mikinn tíma. Halla fékk mun betra tafl og náði að stilla öðrum riddaranum sínum upp á e4, sem ,,kontróleraði stöðunni algjörlega‘‘ eins og Margeir orðaði það. Engu að síður var ekki auðvelt að finna neitt rakið vinningsplan og staðan var svolítið vantefld. Godoy fór að sprikla á kóngsvængnum og var með hættulegar hótanir sem Halla þurfti að eyða töluverðum tíma í að finna vörn gegn. Hún fann mjög góða leið og gat á einum tímapunkti komist út í vænlegt, ef ekki unnið, endatafl.

Hér gat Halla leikið 27. Dxe6+ með hugmyndinni 27...Dxe6 28. Hxe6 Bf7 29. Rf5! sem þvingar strax fram vænlegt endatafl. Hún lék í staðinn 27. Rf5 sem er líka góður leikur en svartur fékk færi í framhaldinu sem Halla réð ekki við.

Halla missti af bestu vörninni og réð svo ekkert við spil svarts. Godoy komst með hrókinn niður á aðra reitaröð og ásamt sterkum biskup og hættulegu frípeði átti Halla enga vörn. Svekkjandi tap eftir vel útfærða skák.

Veronika hafði svart á 4. borði gegn WFM Miriam Parkhurst Casas (1993). Upp kom sjaldgæft afbrigði Sikileyjarvarnar þar sem sú mexíkóska lék snemma c4. Við vorum með stöðuna eftir 10 leiki á ,,eldhúsborðinu‘‘ fyrir skákina svo Veronika vissi alveg hvað hún var að gera. Eftir byrjunina skipti hún hins vegar um áætlun og ætlaði að losa um stöðuna með því að leika 12...d5. Sennilega hefði verið betra að leika 12...Bd4 og halda stöðunni lokaðri. Eftir að miðborðið opnaðist lifnuðu biskupar hvíts við og í framhaldinu vann Casas peð á e5. Í framhaldinu missti Veronika af leiðindar trikki sem sú mexíkóska lagði fyrir hana, tapaði manni og neyddist til að gefast upp.

Hér lék Veronika 22...Hfe8 og tapaði manni eftir 23. Db5 De6? 24. Hxa2! með hugmyndinni 24...Dxa2 25. Bc4. Þess í stað hefði hún átt góða varnarmöguleika með 22...Bb3.

Í stað þess að gefa manninn átti Veronika ágæta möguleika á því að halda stöðunni með því að blokkera peð hvíts á drottningarvængnum. Margeir benti á það eftir skákina að í þannig stöðutýpu væri gott að forðast uppskipti á drottningum, sem var mjög lærdómsríkt. Þessi skák fer í reynslubankann.

Svekkjandi tap 2½ - 1½ staðreynd eftir gott gengi í síðustu umferðum en ég var samt mjög ánægður með taflmennskuna að mörgu leyti. Lenka og Halla áttu vel útfærðar skákir og við hefðum átt að fá 2 vinninga úr þeim á góðum degi. Einnig náði Gulla í gott jafntefli með hörku vörn. Við gætum því hæglega haft 8 stig af 10 í 6.-16. sæti sem væri ótrúlegt. Við erum þess í stað í 31.-58. sæti með 6 stig (vorum í sæti 61. fyrir mótið á stigum). Það þýðir lítið að svekkja sig á þessu því við eigum erfiða viðureign gegn hörkusterku liði Perú (meðalstig: 2175) á morgun, með WGM Deysi Cori (2402) á 1. borði.

Í dag var kærkominn frídagar og sumir (ég), sem hafa lítið sofið síðan við komum til Bakú, gátu hvílt sig vel. Það er gott að halda góðri rútínu á skákmótum, það hafa reynsluboltar í greininni eins og Helgi Ólafsson kennt okkur. Engu að síður er líka mikilvægt að geta brotið rútínuna aðeins upp og við Ingvar og Gummi hvíldum hótelmatinn aðeins í kvöld og kíktum út á rómantískan, þokkalegan pítsustað. Aðrir fóru í skoðunarferðir, göngutúra, kíktu í búðir eða slökuðu á. Það segir ýmislegt um metnaðinn og andann sem ríkir í hópnum að á pítsustaðinum var mesta athyglin á skáksettinu sem Ingvar hafði auðvitað meðferðis.

Þangað til næst, bestu kveðjur frá Bakú.

Björn Ívar

Afmælismót TV: góð kjör á gistingu og góð peningaverðlaun

Afmælismót Taflfélags Vestmannaeyja fer fram komandi helgi en félagið er nú á sínu 90. ári. Helgi Ólafsson stórmeistari og Vestmanneyingur er stigahæstur skráðra keppenda sem eru nú um 20 talsins.

Enn er hægt að skrá sig til leiks á skak.is. Afar góð kjör fást á gistingu eða tveggja manna herbergi í uppábúnum rúmum á 5500 kr. samtals. Ef þrír í herbergi þá er herbergið samtals á kr. 7000. Alger kostakjör og er gistingin í göngufæri við skákstað. Áhugasamir um gistinguna hafi samband við Jóhannes í síma: 778-1500

Nánar um mótið má lesa hér; http://skak.blog.is/blog/skak/entry/2179051/

Steinþór Baldursson: Minning

Steinþór leigði bát í Tromsö fyrir dómarana og stóð að sjálfsögðu í stefni.

Steinþór Baldursson kom eins og stormsveipur inn í íslenskt skáklíf þegar sonur hans Felix byrjaði að tefla. Steinþór hafði skoðanir á hlutunum og þar fór mikill framkvæmdamaður. Á hann var hlustað með athygli og innan skamms var hann bæði kominn í stjórn Skáksambands Íslands og Taflfélagsins Hellis og reyndist gríðarlega öflugur stjórnarmaður.

Skákdómarinn Steinþór að störfum.

Að sjálfsögðu hafði gamli handboltadómarinn mikinn áhuga á skákdómgæslu og var mjög fljótlega kominn í hlutverk skákdómarans. Tæknikunnátta Steinþórs nýttist einnig mjög vel og var hann einn helsti sérfræðingur landsins í beinum skákútsendingum.

Íslensku dómararnir að störfum í Tromsó. Steinþórs er sárt saknað í Bakú.

Steinþór var einn allra öflugasti skákdómari landsins og hafði alþjóðleg dómararéttindi. Hann var einn skákdómara á Ólympíuskákmótinu í Tromsö 2014 og á Evrópumóti landsliða í Laugardalshöllinni 2015. Steinþór var þrautseigur með afbrigðum og lét veikindin sem minnst stöðva sig. Hans síðasta skákstjóraverkefni var dómgæsla á Íslandsmótinu á Seltjarnarnesi í maí-júní sl.

Það var gott að leita til Steinþórs. Hann var einstaklega úrráðagóður og reyndist mér oft mjög vel þegar ég þurfti ráð.

Garry Kasparov í góðum félagsskap.

Þegar Steinþór er borðinn til grafar eru ég og margir aðrir úr skákhreyfingunni staddir á Ólympíuskákmótinu í Bakú í Aserbaísjan. Okkur þykir leitt að geta ekki verið viðstödd útför Steinþórs, en við munum þess í stað kveðja okkar góða vin með okkar hætti í Bakú. Til Bakú stefndi Steinþór á að fara en því miður gekk það ekki eftir. Hans er sárt saknað.

Frasi Steinþórs, "gríðarlega vandað",  er mikið notaður í Bakú og mun lifa í skákhreyfingunni um ókomna tíð.

Skákhreyfingin hefur misst einn sinn besta mann. Margir í hreyfingunni hafa misst frábæran vin.

Claire, börnum Steinþórs, foreldrum hans og öðrum aðstandendum sendi ég einlægar samúðarkveðjur.

Gunnar Björnsson,
Forseti Skáksambands Íslands

Íslandsmót öldunga 65+ fer fram á laugardaginn

Íslandsmót öldunga  65 ára og eldri  verður haldið laugardaginn 10. september  nk. í Ásgarði, félagsheimili  FEB að Stangarhyl.  Að þessu sinni standa báðir skákklúbbar eldri borgara á Höfuðborgarsvæðinu, RIDDARINN og ÆSIR, sameiginlega að mótinu, sem áður hefur farið fram á vegum hins fyrrnefnda í Hafnarfirði.

Þetta er í þriðja sinn sem slíkt Íslandsmót með atskákarsniði fer fram í þessum aldursflokki.

Tefldar verða 9 umferðir með 10 mínútna umhugsunartíma auk  3 sekúndna viðbótartíma á leik. Fjórar umferðir verða tefldar fyrir hádegi en lokaumferðirnar fimm eftir hádegisverðarhlé.

Mótið hefst kl. 10 árdegis og lýkur um kl. 16.30  með verðlaunaafhendingu. 

Þátttökugjald er kr. 1000 og innifelur kaffi, svaladrykki og snarl meðan á móti stendur. Björgvin Víglundsson er núverandi Íslandsmeistari og  hefur unnið mótið í bæði skiptin sem það hefur verið haldið.  

Aðalverðlaun mótsins er kr. 50.000 ferðastyrkur á Norðurlandamótið í skák í Sastamala, Finnlandi, 22. -30. október nk.  Auk verðlaunagripa sem gefnir eru af Sportvöruverzluninni JÓA ÚTHERJA, verða veitt vegleg bókaverðlaun og aldursflokkaviðurkenningar (65-70; 71-75; 76-80; 81 og eldri). Vænst er góðrar þátttöku sem víðast hvar að af landinu.  

Mótsnefndina skipa fulltrúar "Öðlinganefndar SÍ" þeir: Einar S. Einarsson, formaður; Finnur Kr. Finnsson; Guðfinnur R. Kjartansson; Sigurður E. Kristjánsson og Össur Kristinsson.

Skráning fer fram á Skák.is (guli kassinn efst). Upplýsingar um þegar skráða keppendur má finna hér. 

 

Íslandsmót skákfélaga hefst 29. september - félagaskiptaglugginn lokar þann 9. september

Fyrri hluti Íslandsmóts skákfélaga 2016-2017 fer fram dagana 29. sept – 2. okt.  nk.  Mótið fer fram í Rimaskóla í Reykjavík.  1. umferð (eingöngu í 1.deild) mun hefjast kl. 19.30 fimmtudaginn 29. september. Aðrar deildir munu hefja taflmennsku föstudaginn 30. september. kl. 20.00 og síðan tefla 1. október  kl. 11.00 og kl. 17.00 sama dag.  Síðasta umferðin í fyrri hlutanum hefst kl. 11.00 sunnudaginn 2. október. 

Umhugsunartími er 90 mín. á skákina + 30 sek. viðbótartími bætist við eftir hvern leik.

Þátttökugjöld:

• 1. deild kr. 70.000.-
• 2. deild kr. 60.000.-
• 3. deild kr. 20.000.-
• 4. deild kr. 15.000.-

Skáksamband Íslands mun greiða fargjöld utan stór-Reykjavíkursvæðisins samkvæmt reikningum fyrir sveitir í 1. og 2. deild.  Miða skal við einn brottfararstað á hverju svæði, t.d. Akureyri, Egilsstaði, Ísafjörð.  Sami háttur verður hafður í 3. og 4. deild og áður, þ.e. þátttökugjöld höfð lág en sveitirnar verða sjálfar að sjá um ferðakostnað á skákstað.

Meðfylgjandi er 3. kafli skáklaga Skáksambands Íslands sem varða Íslandsmót skákfélaga og reglugerð um Íslandsmót skákfélaga.

Vakin er athygli á viðbót við 2. grein reglugerðar um Íslandsmót Skákfélaga:

2. gr.

Framkvæmdanefnd Íslandsmóts skákfélaga, sem skipuð er af stjórn Skáksambands Íslands, ákveður töfluröð og skipar skákstjóra og umsjónarmenn Íslandsmóts skákfélaga.  Öllum taflfélögum, sem eiga sveitir í 1. deild, ber að útvega einn skákstjóra.  

Athugið að tilkynningar v. Keppendaskrár Skáksambands Íslands skulu hafa borist SÍ í síðasta lagi 9. september nk. sbr. 18. gr. skáklaga. 

Vakin er athygli á eftirfarandi texta í 19. grein skáklaga:  „Fyrir upphaf 1.umferðar fyrri hluta ÍS skulu félögin skila inn styrkleikaröðuðum lista allra þeirra keppenda sem þeir hyggjast nota í keppninni.“ 

Þátttökutilkynningar þurfa að berast Skáksambandi Íslands fyrir 20. september með bréfi, tölvupósti ([e-mail]), símleiðis eða á Skák.is (guli kassinn). Að gefnu tilefni er minnt á að nauðsynlegt er að skrá sveitir í keppnina, ekki síst í 4. deild. 

Stjórn SÍ mælist til – af gefnu tilefni - að félögin skrái ekki fleiri sveitir til keppni en þau treysta sér til að manna í báðum hlutum keppninnar.

ÓL: Ísland blandar sér í toppbaráttuna í Bakú

Íslenska liðið í opnum flokki Ólympíuskákmótsins í Bakú vann Eistland í dag af miklu öryggi. Hjörvar Steinn Grétarsson, Jóhann Hjartarson og Bragi Þorfinnsson unnu sínar skákir en Guðmundur Kjartansson tapaði. Þessi 3-1 sigur tryggði liðinu 8 stig af 10 mögulegum og er sveitin því komin í hóp þjóða á borð við Rússland, Kína og Aserbaísjan.

Hjörvar Steinn Grétarsson (2547) hefur farið á kostum í mótinu til þessa og hefur unnið allar fimm skákir sínar. Aðeins þrír aðrir skákmenn hafa unnið allar fimm skákir sínar; Jan-Krzysztof Duda (2675) frá Póllandi, Santosh Gujrathi Vidit (2669) frá Indlandi og Ian Nepomniachtchi (2740) frá Rússlandi. Þá hefur Bragi Þorfinnsson (2430) einnig unnið allar sínar skákir en Bragi hefur teflt einni skák færra en Hjörvar Steinn.

Jóhann Hjartarson vann sína skák í dag með einkar laglegum hætti, en Guðmundur Kjartansson tapaði.

Kvennalið Íslands atti kappi við Mexíkó í dag og tapaði naumlega 1,5-2,5. Liðið var hársbreidd frá því að næla sér í jafntefli í viðureigninni. Eftir tap í 2.umferð gegn Ítalíu hafa hamskipti Lenku Ptacnikovu (2159) verið slík að engin mótherji hefur séð til sólar gegn henni, þó oft hafi þeim sýnst léttskýjað. Lenka hefur unnið síðustu þrjár skákir og hefur nú 4 vinninga í 5 skákum. Guðlaug Þorsteinsdóttir gerði jafntefli í dag, en Hallgerður Helga Þorsteinsdóttir og Veronika Steinunn Magnúsdóttir töpuðu sínum skákum.

Í 6.umferð opins flokks, sem hefst á fimmtudag klukkan 11 að íslenskum tíma, mætir Ísland liði Tyrklands. Í kvennaflokki mætir Ísland liði Perú. Báðar íslensku sveitirnar tefla því við andstæðinga sem hafa mun hærri meðalstig.

Í efstu sætum opins flokks eru Holland, Úkraína og Indland, öll með 10 stig. Úkraína hefur farið geysivel af stað og hefur lagt bæði Rússland og Kína að velli. Úkraína mætir ofursveit Bandaríkjanna í 6.umferð á meðan Holland og Indland leiða saman hesta sína. Í kvennaflokki eru tvær þjóðir með fullt hús, Rússland og Úkraína, en þessi lið mætast einmitt í næstu umferð.

Á morgun er eini frídagur mótsins.

Kennari verður skákkennari: Neskaupsstaður

Nesskóli Neskaupstað er þátttakandi í verkefninu Kennari verður skákkennari. Klara Sigríður Sveinsdóttir mun í vetur kenna nemendum sínum í fjórða bekk skák einu sinni í viku. Stefán Bergsson verkefnisstjóri heimsótti Klöru og nemendur hennar í morgun. Kennt var þrjá tíma fyrir hádegi og farið yfir skákleiki og kennsluaðferðir sem Klara getur nýtt sér í framhaldinu. Skólastjóri skólans er Einar Már Sigurðsson sem er mikil skákáhugamaður. Einar hafði frá ýmsu að segja og m.a. sögum af alþjóðlega skákmótinu á Neskaupstað árið 1984 sem Helgi Ólafsson vann. Skólinn fjárfesti í nýjum töflum og fara nemendur og Klara því vel búin inn í komandi skákvetur. Styrktaraðili heimsóknarinnar var Hótel Capitano.

Viðureignir dagsins: Eistland og Mexíkó

Fimmta umferð Ólympíuskákmótsins hefst kl. 11 í dag. Andstæðingar dagsins eru Eistar í opnum flokki og Mexíkóar í kvennaflokki.

Hannes Hlífar Stefánsson hvílir í dag gegn Eistum. 

Bein útsending.

Íslenska kvennaliðið mætir sveit Mexíkóa. Hrund Hauksdóttir hvílir. 

Bein útsending.

 

• Heimasíða mótsins
• Chess-Results
• Beinar útsendingar (hefjast kl. 11)

Bikarsyrpa TR hefst á föstudaginn

Bikarsyrpa Taflfélags Reykjavíkur hefur fest sig í sessi undanfarin misseri og fer nú af stað þriðja árið í röð. Mót syrpunnar í vetur verða fimm talsins og hefur umferðum hvers móts verið fjölgað í sjö.

Fyrir börn sem vilja taka framförum í skák þá er gott að byrja sem fyrst að tefla í kappskákmótum, en hingað til hefur þeim börnum sem vilja tefla á “alvöru mótum” einkum staðið til boða að taka þátt í opnum mótum. Þar er styrkleikamunur oft mikill og mótin taka langan tíma, auk þess sem mörgum börnum óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því. Þessi mótaröð TR er ekki síður sniðin að þörfum þeirra barna sem dreymir um að næla sér í sín fyrstu skákstig.

Einungis börn á grunnskólaaldri (fædd árið 2001 eða síðar) sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og börnin njóta þess betur að tefla. Tímamörkin eru jafnframt styttri, og henta börnum betur en langar 90 mínútna skákir sem tíðkast á hefðbundnum kappskákmótum fullorðinna. Mótin uppfylla öll skilyrði Alþjóða skáksambandsins FIDE og eru reiknuð til alþjóðlegra skákstiga.

Fyrsta mót Bikarsyrpunnar hefst föstudaginn 9. september og stendur til sunnudagsins 11. september. Tefldar eru 7 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo mikilvægt sé að börnin vandi sig og noti tímann vel, þá má gera ráð fyrir að margar skákir taki mun styttri tíma.

 

Dagskrá Bikarsyrpu I:

1. umferð: 09.september kl. 17.30 (fös).

2. umferð: 10.september kl. 10.00 (lau).

3. umferð: 10.september kl. 13.00 (lau).

4. umferð: 10.september kl. 16.00 (lau).

5. umferð: 11.september kl. 10.00 (sun).

6. umferð: 11.september kl. 13.00 (sun).

7. umferð: 11.september kl. 16.00 (sun).

Verðlaunaafhending fer fram strax að lokinni 7.umferð.

 

Tvær yfirsetur (bye) eru leyfðar í umferðum 1-5 og fæst 1/2 vinningur fyrir hverja yfirsetu. Tilkynna þarf skákstjóra um yfirsetu fyrir lok umferðarinnar á undan.

Þátttökugjald í mótið er 1.500kr. Börn sem eru félagar í TR greiða ekki þátttökugjald.

Sigurvegari mótsins hlýtur að launum bikar. Verðlaunapeningur eru veittur fyrir 2.sæti og 3.sæti. Sérstök verðlaun verða veitt næsta vor fyrir samanlagðan árangur í mótunum fimm, þar á meðal er veglegur farandbikar. Þá verða veitt sérstök verðlaun fyrir samanlagðan árangur fyrir börn sem eru félagar í TR, en það eru einkatímar hjá einhverjum af sterkustu skákmönnum félagsins; 1.sæti gefur 5 einkatíma, 2.sæti gefur 3 einkatíma og 3.sæti gefur 2 einkatíma.

Vinsamlegast skráið þátttakendur sem fyrst, það hjálpar til við undirbúning mótsins. Hlökkum til að sjá ykkur!

 

Skráningarform

Skráðir keppendur

Ólympíuskákmótið: 4. umferð í kvennaflokki

Moldavía 1 ½ - Ísland 2 ½

 

 

 

Við fengum lið Moldavíu í dag, með meðalstig 2167.

Lenka hafði svart gegn WIM Diana Baciu (2279) á 1. borði. Upp kom tískuvörn sem við höfðum litið á fyrir skákina og bjuggumst við einhverju bitlausu g3-afbrigði sem Baciu hafði teflt nokkrum sinnum áður. Sú moldavíska breytti þó útaf og lék snemma h3, Be3 og Dd2 og stillti upp í kóngssókn. Lenka lenti í krappri vörn og í miðtaflinu var hún með ,,koltapað í tölvunum‘‘. Hún fann þó leiðir til þess að gera úrvinnsluna flókna fyrir hvítan og á ótrúlegan hátt missti Baciu af vinningsleiðinni sem tölvan mat á +17,98! Lenka fór með kónginn á d6, beint í skotlínu hvítu mannanna og skyndilega var hún með unnið tafl því Baciu átti engar góðar skákir vegna lúmskra máthótanna Lenku. Á þessum tímapunkti gekk undirritaður um gólf og púlsinn var að nálgast 200! Á sama tíma heima á Íslandi var einn Björn Þorfinnsson að sturlast af spennu:

Hér lék Lenka 37...Kd6! og öllum fráskákum með riddarnum er auðvitað svarað með 38...Dd2 mát, takk fyrir!

Frábær baráttusigur Lenku, sem hefur unnið tvær skákir í röð gegn mjög sterkum andstæðingum.

Guðlaug hafði hvítt gegn IM Svetlana Petrenko (2176) á 2. borði. Upp kom kóngs-indversk vörn og Gulla fékk þægilega stöðu út úr byrjuninni. Petrenko var með veikt peð á f5 og óvirka menn á kóngsvængnum og hugsanlega hefði Gulla getað haldið pressunni og gert tilraun til að tefla til vinnings. Á þessum tímapunkti var staðan í viðureigninni að snúast okkur í hag og við það slakaði Gulla aðeins á klónni og hleypti Petrenko inn í skákina. 

Hér var spurning hvort 34. a4 hefði ekki gefið hvítum smá möguleika á að svíða skákina. Gulla lék í staðinn 34. He1 og missti aðeins tökin á stöðunni í framhaldinu.

Sú moldavíska nýtti tækifærið og sýndi góða tækni í framhaldinu. Gulla neyddist út í erfitt hróksendatafl og því varð því miður ekki bjargað.

Hallgerður Helga hafði svart gegn WFM Olga Hincu (2125) á 3. borði. Upp kom óvenjuleg leið gegn Grunfelds-vörn með 3. Rd2!? Hvítur fékk rýmra og betra tafl og Halla mátti sætta sig við þrönga og erfiða stöðu. Hún hefur sýnt það hingað til í mótinu að hún er hörku varnarskákmaður og þrátt fyrir að hafa þurft að leika riddaranum sínum til a8, þar sem hann mátt dúsa í 21 leik(!), barðist hún eins og ljón.

Halla var að enda við að leika 19...Ra8 þar sem hann valdar c7-peðið. Þar fékk hann að dúsa í 21 leik þangað til að birtist skyndilega og kláraði skákina!

Hincu gerði heiðarlega tilraun til þess að vinna skákina, setti mikla pressu á Höllu sem fann alltaf varnir við hótunum hvíts. Hincu fór svo með kónginn sinn alla leið á d5 en þá sprakk svarta staðan allt í einu út með skemmtilegu trikki, og Halla var skyndilega komin með frumkvæðið. 

34...b5! og svartur er allt í einu kominn með betra. Hrókurinn á a6 sveiflar sér yfir á e6 og riddarinn á a8 vaknar til lífsins. 35. Hxb5 gengur ekki því eftir 35...c6+ fellur hrókurinn á b5.

Halla tefldi óaðfinnanlega í framhaldinu og vann frábæran sigur sem skrifast algjörlega á ótrúlega þolinmæði og baráttuþrek.

Veronika hafði hvítt gegn WGM Elena Partac (2086) á 4. borði. Við höfðum fyrir skákina krufið afbrigði Partac í sikileyjarvörn og fundið ýmsar hugmyndir til þess að gera henn lífið leitt. Veronika fór með riddarann sinn til c4 samkvæmt planinu okkar og eftir að sú moldavíska hrókaði langt upphófst mikið kapplaup á báðum vængjum; Veronika sótti á drottningarvæng og Partac á kóngsvæng. Veronika var alltaf með betra tafl og vantaði aðeins herslumuninn upp á að fá vænlegt endatafl og leggja þar með stórmeistarann að velli. Í tímahraki beggja endutóku þær stöðuna tvisvar og þá var Veronika skynsöm og spurði mig hvort hún ætti að taka jafntefli, sem var hárrétt ákvörðun hjá henni.

33. Re8+ og sama staðan komin upp þrisvar. Mikilvægt jafnteli.

Á þessum tímapunkti voru stöðurnar hjá Lenku og Höllu að snúast okkur í hug svo jafntefli voru mjög góð úrslit. Áfram hélt yfirstressaður Björn Þorfinnsson:

Flott skák hjá Veroniku, sem var vel undirbúin og hafði trú á sér í dag.

Á sama tíma og við lögðum Moldavíu að velli var Bragi að innsigla öruggan 3 1/2 - 1/2 sigur gegn Færeyjum með óaðfinnanlegri úrvinnslu í endatafli. Það voru því stoltir og glaðir landsliðsmenn Íslands sem gengu út úr Kristalhöllinni og það var glatt á hjalla í rútunni á leiðinni heim á hótel!

Á morgun fáum við sveit Mexíkó (meðalstig: 2082) og erum fullar sjálfstrausts fyrir þá viðureign. Ég er ánægður með mjög margt í taflmennsku stelpnanna. Það sem hefur skynið í gegn er baráttuþrekið í erfiðum stöðum, sem hefur verið að skila mörgum vinningum í hús. Við gætum enn bætt tímanotkunina aðeins til þess að komast hjá tímahraki. Að sama skapi hefði ég getað gert betur sem liðsstjóri í dag og bent Guðlaugu á að bjóða jafntefli í betri stöðu þegar viðureignin var að snúast okkur í vil. Það er hins vegar lúxusvandamál en maður verður ekki betri nema að vera tilbúinn að gagnrýna sjálfan sig - jafnvel eftir góða sigra!

Þangað til næst, bestu kveðjur frá Bakú.

Björn Ívar