Hart barist í 1. umferð á Nóa-Siríus mótinu í gærkvöld

Nóa-Síríus mótið 2017, Gestamót Hugins og Skákdeildar Breiðabliks, var sett með viðhöfn í gær. Jón Þorvaldsson, einn af frumkvöðlum mótsins, bauð keppendur og gesti velkomna en sérstakur heiðursgestur var nýr fjármálaráðherra landsins, Benedikt Jóhannesson. Fram kom að mótið hefði vaxið upp í að vera eitt hið allra sterkasta og fjölsóttasta hér á landi með fjölda alþjóðlegra titilhafa, auk efnilegra skákmanna á öllum aldri.

Nýi fjármálaráðherrann, sem er sjálfur slyngur skákmaður, fór á kostum í setningarræðu sinni. Hann rukkaði Jón Þorvaldsson m.a. um verðlaun sem hann hefði lofað sér vegna sigurs á unglingaskákmóti hjá TR fyrir margt löngu. Sá Jón sér þann kosta vænstan að heita því í vitna viðurvist að afhenda Benedikt verðlaunin í loks N-S mótsins – 48 árum á eftir áætlun!

Benedikt var falið að leika fyrsta leikinn fyrir Jóhann Hjartarson í skák hans gegn Kristjáni Eðvarðssyni. Nýi fjármálaráðherrann kom á óvart með því að taka völdin af Jóhanni og leika 1. e4 í í stað 1. c4 sem Jóhann hafði hugsað sér. "Þetta er miklu hvassari og betri leikur," sagði Benedikt og uppskar mikinn hlátur viðstaddra.

Benedikt sagði m.a. að það væri sér ekkert sérstakt gleðiefni að hefja skák. Hitt væri miklu skemmtilegra að ljúka henni. Stakk Benedikt því upp á því að hann kæmi frekar í lok umferðarinnar og léki síðasta leiknum í skákinni! Var það mál manna að hin fjörlega setning mótsins hefði í raun verið fyrsta embættisverk nýs fjármálaráðherra og að honum hefði farist það afar vel úr hendi.

Mikill kraftur og leikgleði einkenndi taflmennskuna í fyrstu umferðinni. Þar gilti einu hvort menn tefldu eins og smurðar vélar vegna mikillar leikæfingar eða þyrftu nánast að rifja upp mannganginn vegna langrar fjarveru frá þátttöku í kappskákmótum. Allir nutu þess að spreyta sig á þessari göfugu list. Sumir uppskáru laun erfiðis síns, aðrir voru óheppnir á lokasprettinum eins og gengur.

A-flokkur

Jóhann Hjartarson (2540) tefldi með hvítu gegn Kristjáni Eðvarðssyni (2199) á efsta borðinu og var þar um hörkuviðureign að ræða. Kristján jafnaði taflið nokkurn veginn eftir byrjunina og virtist eiga í fullu tré við stórmeistarann framan af. Kristján lék hins vegar af sér þegar tímamörkin fóru að nálgast og mátti leggja niður vopnin stuttu síðar.

Jón L. Árnason (2471) stýrði hvítu mönnunum gegn Daða Ómarssyni (2197). Daði hrifsaði snemma til sín frumkvæðið og Jón mátti verjast með þröngt tafl. Á endanum lék hann ónákvæmt og mátti játa sig sigraðan. Þetta voru óvæntustu úrslit umferðarinnar.

Jón Hálfdánarson (2187) tefldi mjög vel lengi framan af gegn Guðmundi Kjartanssyni (2468) og var löngum með örlítið betra tafl. Guðmundur er hins vegar þekktur fyrir mikla seiglu og á endanum náði hann að snúa á kappann Jón í endataflinu. Þetta var sú skák sem síðast lauk í A-flokknum.

Helgi Áss Grétarsson (2448) tefldi með hvítu mönnunum gegn Björgvini Víglundssyni (2185) og einnig þar varð úr hörkuskák. Björgvin jafnaði taflið með svörtu mönnunum og virtist á tímabili vera með vænleg færi. Reynsla stórmeistarans sagði þó til sín á lokametrunum þar sem Helgi Áss innbyrti vinninginn örugglega – „skóflaði honum í sig“, ef svo má segja.

Baldur A. Kristinsson (2182) stóð lengi vel í Þresti Þórhallssyni (2414) en á krítísku augnabliki náði Þröstur að snúa taflinu sér í vil og innbyrða vinninginn.

Björn Þorfinnsson (2404) þurfti að hafa mikið fyrir vinningnum gegn hinum efnilega Bárði Erni Birkissyni (2175). Björn fórnaði peði í byrjuninni sem Bárður Örn hélt í langt fram í endataflið. Björn var með stöðuga pressu í gangi svo til alla skákina og í endataflinu féll Bárður Örn í þá gryfju að tefla of varfærið sem alls ekki má gegn Birni sem náði að vinna skákina eftir langt endatafl og miklar tilfæringar.

Hrafn Loftsson (2166)  tefldi við Vigni Vatnar (2404) og lengi var skákin jafnteflisleg. Vignir Vatnar vildi meira, náði að snúa á Hrafn í endataflinu og vinna skákina.

Guðmundur Gíslason (2332) fékk snemma betra tafl gegni Sæberg Sigurðssyni (2154) en sá síðarnefndi var ekki tilbúinn til að syngja sitt síðasta, varðist fimlega og hélt jöfnum hlut eftir langa baráttu.

Af öðrum óvæntum úrslitum má nefna sigur Mikaels Jóhanns Karlssonar (2130) á Sigurbirni Björnssyni (2289) og jafntefli Ögmundar Kristinssonar (2015) við Oliver Aron Jóhannsson (2224). Önnur úrslit voru eftir bókinni en sérstaklega ber þó að geta góðrar frammistöðu hinnar bráðefnilegu Nansýjar Davíðsdóttur (1897) sem veitti kappanum þaulreynda, Benedikt Jónassyni (2208), harða mótspyrnu.

B-flokkur

Í B-flokknum var nokkuð um óvænt úrslit. Birkir Ísak Jóhannsson (1540) gerðir sér litið fyrir og hélt jöfnum hlut gegn stigahæsta skákmanni B-flokksins, Jóni Traust Harðarsyni (2157). Freyja Birkisdóttir (1299) vann Alexander Oliver Maí (1837) og Orri Ísak Karlsson (1200) gerði jafntefli við Jón Þór Lemery (1736).

Næsta umferð

Önnur umferð mótsins fer fram þriðjudaginn 17. janúar kl. 19.00 og eru gestir velkomnir.

• Skákhuginn
• Chess-Results

 

Skákþing Reykjavíkur 2017 er hafið

Skákþing Reykjavíkur, það 86. sem haldið er, hófst sunnudaginn 8. janúar sl. og eru þátttakendur að venju skemmtileg blanda af meisturum, verðandi meisturum, efnilegum skákmönnum, venjulegum skákmönnum og óvenjulegum. Tæplega 60 keppendur ætla að berjast um titilinn Skákmeistari Reykjavíkur þetta árið, þar af einn stórmeistari kvenna, tveir alþjóðlegir meistarar og þrír Fide-meistarar. Helmingur keppenda er með 1850 stig eða meira. Skákmeistari Reykjavíkur 2016 var Jón Viktor Gunnarsson sem er ekki með að þessu sinni og því tekur nýr meistari við verðlaununum að loknu móti í byrjun febrúar.

Úrslit í fyrstu umferð voru algerlega eftir bókinni enda stigamunur víðast á bilinu 600 – 700 stig. Nánar um mótið (tilhögun og dagskrá) hér og um úrslitin hér. Næsta umferð verður tefld miðvikudaginn 11. janúar, kl. 19:30 og fer fjörið fram í Skákhöll TR í Faxafeni.

Nánar á heimasíðu TR

• Heimasíða TR
• Chess-Results

Nóa Síríus mótið - Gestamót Hugins og Breiðabliks hafið - fimm stórmeistarar með!

Nóa Siríus mótið 2017 – Gestamót Hugins og skákdeildar Breiðabliks, hófst í Stúkuloftum á Kópavogsvelli fyrr í kvöld, 10. janúar kl. 19.00. Um er að ræða eitt allra sterkasta skákmót ársins en það er nú haldið í sjöunda sinn. 

Mótið hefur aldrei verið veglegra en yfir 60 snjallir og efnilegir skákmenn á öllum aldri eru skráðir til leiks. Teflt verður í tveimur flokkum eins og á síðasta ári. Um fjörutíu keppendur eru skráðir til keppni í A-flokki þar sem þátttakendur hafa yfir 2000 eló skákstig, auk þeirra skákmanna sem unnu sér þátttökurétt með frammistöðu sinni í B-flokki á síðasta ári. Meðalstig keppenda í A-flokki eru vel yfir 2200 eló stig.  

Fimm stórmeistar eru skráðir til leiks og er á engann hallað þó svo Friðrik Ólafsson sé fyrst nefndur. Það er auðvitað einstakur heiður að fyrsti stórmeistari Íslendinga og goðsögn í lifanda lífi, hafi þegið boð um að tefla með á mótinu en Friðrik verður 82 ára, þann 26. janúar nk., meðan á því stendur.

Auk Friðriks eru stórmeistararnir Jóhann Hjartarson, Jón L. Árnason, Helgi Áss Grétarsson og Þröstur Þórhallsson skráðir til leiks ásamt alþjóðlegu meisturunum Guðmundi Kjartanssyni, Jóni Viktori Gunnarssyni, Birni Þorfinnssyni og Björgvini Jónssyni.

Lenka Ptacnikova, stórmeistari kvenna og Guðlaug Þorsteinsdóttir, Fide-meistari kvenna, taka einnig þátt í mótinu ásamt 12 öðrum sterkum Fide-meisturum. Margir upprennandi skákmenn af yngri kynslóðinni taka líka þátt í mótinu, því á keppendalistanum í A-flokki má finna þá Dag Ragnarsson, Oliver Aron Jóhannesson, Mikael Jóhann Karlsson, Örn Leo Jóhannsson og Jón Trausta Harðarson að ógleymdum Nansý Davíðsdóttur og Vigni Vatnari Stefánssyni en hann er yngsti keppandinn í A-flokki. 

Af fullþroska skákljónum má nefna kappana knáu Guðmund Gíslason,  Björgvin Víglundsson, Þorstein Þorsteinsson, Benedikt Jónasson og Kristján Eðvarðsson. Þá má geta þess að tekist hefur að laða nafntogaða skákjöfra aftur að taflborðinu, en þeir Jón Hálfdánarson og Björn Halldórsson tefla nú í fyrsta sinn á kappskákmóti eftir áratuga fjarveru.

A-flokkur á Chess-results

Í B-flokknum er yngri kynslóðin áberandi en etur þar kappi við sér reyndari meistara. Agnar Tómas Möller, einn aðaleigendi Gamma, trónir á toppi stigalista B-flokksins en fast á hæla honum kemur Birkir Karl sem nýlega var ráðinn landsliðsþjálfari ungmennaliðs Ástralíu! Þá eru þarna reyndir kappar eins og Frammarinn og hagfræðingurinn Jón Eggert Hallsson og Ólafur Evert Úlfsson, sigurvegari Opna flokksins í Haustmóti TR. Af hinum ungu meisturum má nefna Óskar Víking sem er í 3.sæti, Róbert Luu (5.sæti), Batel  (7.sæti), Stefán Orri Davíðsson (8.sæti), Freyja Birkisdóttur (11.sæti) og Stephan Briem stigahástökkvara ársins 2016 (12.sæti). Fjórar efnilegar stúlkur taka þátt í B-flokki sem er mjög ánægjulegt. Yngstu keppendur flokksins og mótsins, eru Adam Omarsson, Batel og Gunnar Erik, allir 9 ára gamlir. 

B-flokkur á Chess-results

Pistill Óskars Víkings frá Benidorm

Ég fór á skákmót á Benidorm í byrjun desember, sem var eiginlega skákhátíð. Það er hægt að sjá hana hér: http://www.ajedrezenelbali.com/ en það er mikið á spænsku svo að það tekur smá tíma að skilja síðuna. Það var fullt í gangi, skákmót á kvöldin og liðakeppni ungmenna fyrir spænsk skákfélög, en það var líka mót fyrir A flokk undir 2300 Elo stigum og annar B flokkur undir 2000 Elo stigum.

Ég tók þátt í tveimur mótum og tefldi átta skákir af tíu í B flokki og fimm skákir af sjö í ungmennamóti undir 12 ára. Þar fékk ég fjóra vinninga af fimm, en ég ætla að segja ykkur af B flokknum frekar. Það voru 414 keppendur í flokknum frá 30 löndum en það voru langflestir frá Spáni og margir gamlir karlar. Einn keppandinn var tvífari Lofts Baldvins, og var meira að segja í köflóttri skyrtu líka.

Fyrsta skákin var á móti  Carmelo Jose  Navarro Molina (1943) og ég tefldi Alapain varíant í sikileyjarvörn og gerði jafntefli við hann. Þessir Spánverjar tefla flestir drottningarpeðsopnun svo að þetta mót var fín æfing í að tefla á móti henni. Næsta skák var á móti Ramon Nogues Fernandez (1925) en ég stóð mig hörmulega í nimso indverskri vörn og tapaði verðskuldað. Eftir það þá fór ég á ágæts skrið og vann þrjár skákir í röð, fyrst á móti frekar slökum gaur, Carlos Gines Perez Dominguez (1447). Síðan var ég frekar heppinn á móti Arturo Lopez Heras (1846) þar sem ég var með eiginlega tapað og svo jafntefli og svo náði ég að vinna. Þriðja vinningsskákin í röð var á móti Luis Iglesias Fernandez (1849) þar sem ég vann í drottningarendatafli.

Skákin á móti Luis Iglesias, ekki Enrique Iglesias samt. Hann var bara hress þarna áður en skákin byrjaði, en ekki alveg eins hress þegar hún var búin.

Þá tapaði ég skák númer sex á móti Bruno Palomo Ruiperez (1942). Ég tefldi Ruy Lopez og var undir snemma í skákinni. Þá var ég bara búinn að tefla á móti Spánverjum en fór að tefla á móti Skota, Alastair Dawson (1853). Hann tefldi Reti og klúðraði skákinni niður og ég endaði með vinning. Svo tefldi ég aftur á móti 16 ára Spánverja í áttundu og síðustu umferðinni minni í B-flokknum, sem var Lluis Navarro Rico (1880). Hér er sú skák: 

(4) Davidsson,Oskar Vikingur (1707) - Navarro Rico,Lluis (1880) [C07]

Bali (8), 08.12.2016 

1.e4 e6 2.d4 d5 3.Nd2 c5 4.Ngf3 cxd4 5.Nxd4 a6 6.Bd3 Nc6 7.Nxc6 bxc6 8.0–0 Bc5 9.Nb3 Bb6 10.e5 Ne7 11.Be3 Bc7 12.f4 Bb6 13.Qf3 g6 14.Qf2 Rb8 15.Rad1 Bxe3 16.Qxe3 Qb6 17.Rf3 Qxe3+ 18.Rxe3 Rg8 19.Rf1 h6 20.Rh3 h5 21.Rf2 Kf8 22.c3 Kg7 23.Re3 Rb6 24.h3 h4 25.g4 hxg3 26.Rxg3 Rh8 27.Rh2 Rh4 28.Rg4 Rh6 29.h4 Rh5 30.Rg5 Rxg5+ 31.hxg5 Rb8 32.Nc5 a5 33.a4 d4 34.c4 Rb4 35.b3 Rb8 36.Bc2 Nf5 37.Bxf5 exf5 38.Rd2 Kf8 39.Rxd4 Ke7 40.Rd6 Rb6 41.Kf2 Be6 42.Ke3 Bc8 43.Kd3 Be6 44.Kd4 Bc8 45.Kc3 Ke8 46.Rf6 Ke7 47.Kc2 Ke8 48.e6 fxe6 49.Nxe6 Bxe6 50.Rxe6+ Kf7 51.Rd6 Rb8 52.Rxc6 Re8 53.Rf6+ Kg7 54.c5 Re4 55.c6 Re2+ 56.Kd3 Re1 57.Kd2 Re7 58.Kd3 Re1 59.Kc4 Rf1 60.Kb5 Rb1 61.Kb6 Rxb3+ 62.Kc7 Rb4 63.Kd7 Rxf4 64.c7 Rd4+ 65.Rd6 

1–0

Útsýnið af svölunum, stutt á ströndina

Ég mæli alveg með þessu móti fyrir Íslendinga, því að það eru svo mörg mót í gangi að það er auðvelt að finna eitthvað sem passar fyrir mann, bæði krakka og fullorðna. Hótelið er mjög gott og íslenski fáninn var fyrir utan það á meðan við vorum á hótelinu. Við bjuggum á 26. hæð og veðrið var gott, svona um 18 stig á hverjum degi og hægt að fara niður á strönd líka í labbitúr eða í sjóinn. Það var líka hægt að kaupa sér gistingu með fullu fæði, og það voru rosa hlaðborð á hverjum degi og síðan er líka ódýrt að ferðast þangað.

Keppnisaðstaða í A flokki, undir 2300 stigum

Keppnisaðstaðan er fín hjá B flokknum, en samt er eiginlega flottari aðstaða þar sem A flokkurinn teflir. Á báðum stöðum voru þeir með heilan her af dómurum sem voru allir rosalega næs, en eiginlega enginn talar ensku nema yfirdómarinn sem var smá feitur, með fína slaufu og svitnaði mörgum lítrum í hverri umferð.

Það var keppt klukkan hálf fimm um eftirmiðdaginn, sem var mjög þægilegt. Þá er maður ekki að tefla mikið lengur en til klukkan átta en ég tefldi nokkuð margar langar skákir. Svo er hægt að undirbúa sig um morguninn. Ég var mjög ánægður með ferðina, ég byrjaði í sæti númer 251 og endaði í sæti nr. 74 þrátt fyrir að sleppa síðustu tveimur umferðunum og hækkaði mig um 133 Elo stig eftir mótin tvö. Ég þakka Skáksambandi Íslands fyrir stuðninginn.

Óskar Víkingur Davíðsson

Íslandsmótið í netskák fer fram 15. janúar

XXI. Íslandsmótið í netskák fer fram sunnudaginn 15. janúar Mótið fer fram á vefsíðunni Chess.com og hefst kl. 20:00. Mótið er öllum opið og er teflt er einum flokki.

 

Mótið var áður á dagskrá þann 30. desember s.l., en því miður þurfti að aflýsa mótinu vegna óviðráðanlegra aðstæðna.

Í fyrstu var talið að tæknibilun hefði orðið til þess að fjöldi þátttakenda gat ekki opnað mótið. Nú liggur fyrir að svo var ekki. Orsökin reyndist vera allt önnur og mannlegri, en í ljós kom að fjöldi keppenda misskildi kerfið og tókst ekki að opna mótið með réttum hætti.

Það er því afar mikilvægt að allir, sérstaklega þeir sem gátu ekki tekið þátt síðast, kynni sér vel leiðbeiningar sem bæði má finna hér og verða sendar í tölvupósti á skráð netfang þátttakenda.

Athugið að þeir sem eru með ókeypis aðgang að Chess.com geta aðeins teflt í þremur mótum í hverri viku. Gæta verður að því að sá kvóti hafi ekki klárast fyrir mótið.

 

Davíð Kjartansson er núverandi Íslandsmeistari í netskák, en hann hefur unnið mótið oftast allra eða sex sinnum!

Það er Skákfélagið Huginn sem stendur fyrir mótinu.

Spurningar eða athugasemdir er hægt að senda á netfangið [e-mail]

 

ATHUGIÐ

• ATH. Nauðsynlegt er að keppendur séu fyrirfram skráðir og búnir að opna mótið áður en það hefst. Beinn tengill á mótið verður auglýstur (hér) sólarhring fyrir mót.
• Mótið er tímastillt og fer sjálfkrafa af stað kl. 20, sunnudaginn 15. janúar. Ekki verður hægt að bæta keppendum í mótið eftir að það hefst, ekki einu sinni skráðum keppendum.
• Lokað verður fyrir skráningu kl. 18:00, sunnudaginn 15. desember – Ekki verður tekið við skráningum eftir þann tíma.
• Athugið að þeir sem eru með ókeypis aðgang að Chess.com geta aðeins teflt í þremur mótum í hverri viku. Gæta verður að því að sá kvóti hafi ekki klárast fyrir mótið.

 

1. Skráning. Athugið að ljúka verður báðum skrefum til að vera skráður í mótið.

Allir verða að fara á síðu mótsins á Chess.com og smella á „Join“ þar. Athugið að síða mótsins er EKKI mótið sjálft.

Vinsamlegast athugið að ljúka þarf báðum skrefum hér að neðan til að vera fullskráður í mótið.

1.1. Annars vegar er nauðsynlegt að fylla út skráningarformið, en öðruvísi er ekki hægt að bera kennsl á keppendur vegna verðlauna.

1.2. Hins vegar þurfa keppendur að skrá sig í hóp mótsins á Chess.com, en öðruvísi sjá þeir ekki mótið á vefnum. Athugið að hópur mótsins á Chess.com er ekki mótið sjálft.

 

Þeir sem skráðu sig til leiks fyrir mótið þann 30. desember, þurfa ekki að skrá sig aftur. Hægt er að skoða keppendalistann hér og athuga hvort notandanafn sé ekki örugglega litað grænt, þá er skráningin í gildi og í lagi.

Þeir sem ekki ljúka báðum skrefunum, eru ekki skráðir í mótið og geta ekki tekið þátt. Hægt er að skoða keppendalistann hér og athuga hvort notandanafn sé ekki örugglega litað grænt, þá er skráningin í lagi.

 

2. Tímamörk og leiðbeiningar til að opna mótið

Svona lítur mótsglugginn út – Nauðsynlegt er að smella á „Join“ þarna og það verður að gerast FYRIR upphaf móts.

Tímamörk eru 3 + 2 (3 mínútur + 2 viðbótarsekúndur á hvern leik). Tefldar eru 11 umferðir.

2.1. Einfaldast er að nota beinan tengil á mótið (verður auglýstur sólarhring fyrir mót) og smella á „Join“ takkann (eins og á myndinni hér til hliðar). Join takkinn birtist kl. 19, sunnudaginn 15. janúar.

2.2. Mikilvægt er að það sé gert áður en mótið hefst, en ekki verður hægt að bæta við keppendum eftir að mótið er hafið, ekki einu sinni skráðum keppendum.

 

Öruggast er að opna mótið með beina tenglinum (auglýstur sólarhring fyrir mót) strax kl. 19, sunnudaginn 15. janúar og smella á „join“.

Athugið að þeir sem eru með ókeypis aðgang að Chess.com geta aðeins teflt í þremur mótum í hverri viku. Gæta verður að því að sá kvóti hafi ekki klárast fyrir mótið.

Lendi keppendur í vandræðum með að opna mótið, er nauðsynlegt að láta vita af því strax (kl. 19) svo mögulegt sé að leysa úr því. Senda skal póst á netfangið [e-mail].

Vefstjóri Chess.com verður á svæðinu til að fylgjast með, og leðibeina, ef eitthvað er að.

 

Ókeypis að skrá notanda

Þeir sem ekki eru skráðir á Chess.com geta skráð sig á vef þeirra en það er ókeypis.

Bent er á að einfalt er að endurnýja lykilorð, hafi það tapast, með því að fara á þessa slóð – https://www.chess.com/forgot – og skrá þar inn netfang.

Athugið að þeir sem eru með ókeypis aðgang að Chess.com geta aðeins teflt í þremur mótum í hverri viku. Gæta verður að því að sá kvóti hafi ekki klárast fyrir mótið.

Æfingamót fyrir Íslandsmótið í netskák í kvöld, mánudag

Í kvöld (mánudag) kl. 20 fer fram æfingamót á skákþjóninum Chess.com. Mótið er hugsað fyrir þá sem lentu í vandræðum með að opna mótið þann 30. desember s.l. eða eru ekki vissir um hvernig kerfið virkar.

Þeir sem eru skráðir í Íslandsmótið í netskák – hér – þurfa ekki að skrá sig sérstaklega í æfingamótið.

Aðrir skrá sig sbr. leiðbeiningarnar hér að neðan.

Skráðir keppendur geta opnað æfingamótið með beina tenglinum á mótið. -. Ágætt er að fara þar inn kl. 19 og smella á „join“ í glugganum sem opnast.

Mótið er tímasett og fer sjálfkrafa af stað kl. 20. Ekki er hægt að bæta við keppendum eftir að mótið hefst, ekki einu sinni skráðum keppendum.

Tefldar verða sjö umferðir með umhugsunartímanum 3+2.

 

Spurningar eða athugasemdir er hægt að senda á netfangið [e-mail]

 

1. Skráning. Athugið að ljúka verður báðum skrefum til að vera skráður í mótið.

Allir verða að fara á síðu mótsins á Chess.com og smella á „Join“ þar. Athugið að síða mótsins er EKKI mótið sjálft.

Vinsamlegast athugið að ljúka þarf báðum skrefum hér að neðan til að vera fullskráður í mótið.

1.1. Annars vegar er nauðsynlegt að fylla út skráningarformið, en öðruvísi er ekki hægt að bera kennsl á keppendur vegna verðlauna.

1.2. Hins vegar þurfa keppendur að skrá sig í hóp mótsins á Chess.com, en öðruvísi sjá þeir ekki mótið á vefnum. Athugið að hópur mótsins á Chess.com er ekki mótið sjálft.

 

Þeir sem skráðu sig til leiks fyrir mótið þann 30. desember, þurfa ekki að skrá sig aftur. Hægt er að skoða keppendalistann hér og athuga hvort notandanafn sé ekki örugglega litað grænt, þá er skráningin í gildi og í lagi.

Þeir sem ekki ljúka báðum skrefunum, eru ekki skráðir í mótið og geta ekki tekið þátt. Hægt er að skoða keppendalistann hér og athuga hvort notandanafn sé ekki örugglega litað grænt, þá er skráningin í lagi.

Nánar á Skákhuganum.

"Bókin" hafði betur í fyrstu umferð Skákþings Akureyrar

Skákþing Akureyrar, hið 79. í röðinni, hófst í gær í Skákheimilinu. Þrettán keppendur mættu til leiks. Eins og fyrirsögnin ber með sér fór allt eftir bókinni, þ.e. í öllu skákum dagsins varð sá stigahærri ofan á. Þetta gerist víst nokkuð oft, en vonandi ekki alltaf. Við bíðum komandi umferða og sjáum til. En í dag lauk þessu sem hér segir:

• Ulker Gasanova-Jón Kristinn Þorgeirsson       0-1
• Haraldur Haraldsson-Fannar Breki Kárason      1-0
• Alex C. Orrason-Andri Freyr Björgvinsson      0-1
• Tómas V. Sigurðarson-Gabríel F. Björnsson     1-0
• Ágúst Ívar Árnason-Sveinbjörn Sigurðsson      0-1
• Karl Egill Steingrímsson-Heiðar Ólafsson      1-0

Hreinn Hrafnsson sat hjá.

Næsta umferð verður tefld eftir viku og þá eigast þessi við:

• Jón Kristinn og Tómas Veigar
• Sveinbjörn og Haraldur
• Andri Freyr og Hreinn
• Fannar Breki og Karl Egill
• Garbíel Freyr og Ulker
• Heiðar og Alex Cambray
• Ágúst Ívar situr hjá

Heimasíða SA

Fréttir af barna- og unglingastarfi Hugins - hefst eftir hlé í dag

Skákfélagið Huginn er með barna- og unglingaæfingar í Mjóddinni á mánudögum fyrir krakka á grunnskólaaldri. Svo hafa einnig verið séræfingar fyrir félagsmenn í Mjóddinni á þriðjudögum og laugardögum eftir því sem til hefur fallið. Á æfingunum eru tefldar 5-6 umferðir með umhugsunartímanum 7 eða 10 mínútum.Þátttakendur leysa dæmi og farið er í grunnatriði með byrjendum eftir því sem tími vinnst til. U.þ.b einu sinni í mánuði er félagsæfing þar sem er þemaskák og um miðbik æfingarinnar er gert hlé þegar pizzzurnar koma. Í öðrum tímum er kennsla þar sem farið er í byrjanir, dæmi og endtöfl allt eftir þörfum þeirra sem taka þátt.. 

Óskar Víkingur Davíðsson er efstur í stigakeppni Huginsæfinganna í Mjóddinni með 34 stig. Þrátt fyrir fjarveru í lok nóvember og desember vegna þátttöku í öðrum mótum er forysta hans örugg því annar er Stefán Orri Davíðsson með 20 stig. Jöfn í þriðja og fjórða sæti koma Batel Goitom Haile og Einar Dagur Brynjarsson með 19 stig. Það hefur verið góð mæting á haustmisseri en það hafa 14 þátttakendur mætt á 12 eða fleiri æfingar af 17 mögulegum. Þar af hafa þrír mætt á þær allar en það eru Einar Dagur Brynjarsson, Óttar Örn Bergmann Sigfússon og Rayan Sharifa. Næsta æfing sem er fyrsta æfing eftir jólafrí verður  mánudaginn 9. janúar 2017 og hefst kl. 17.15. Þar er um að ræða félagsæfingu þar sem skipt er í tvo flokka eftir styrkleika og aldri og höfð þemaskák í 2. og 3. umferð í eldri flokki. Að þessu sinni verður staða úr Skoska leikum tekin fyrir en það hefur ekki verið gert áður, þrátt fyrir dálæti umsjónarmanns æfinganna á þeirri byrjun. Skákir, stöðumyndir og upplýsingar um upphafsstöðu hafa verið sendar til félagsmanna. Næsta almenna æfing verður mánudaginn 16. janúar. Æfingarnar eru í Álfabakka 14a í Mjóddinni. Inngangur milli Fröken Júlíu og Subway og salurinn er á 3 hæð.

Í lok vetrar verða veitt bókarverðlaun handa þeim sem mætt hafa best yfir veturinn og til þeirra sem sýnt hafa verulegar framfarir yfir veturinn og þeirra sem eru efstir í stigakeppninni. Staðan í stigakeppninni og listi yfir þá sem hafa mætt best er hér fyrir neðan.

Með besta mætingu eru:

• Einar Dagur Brynjarsson, 17 mætingar
• Óttar Örn Bergmann Sigfússon, 17 mætingar
• Rayan Sharifa, 17 mætingar
• Brynjar Haraldsson, 16 mætingar—-„——
• Óskar Víkingur Davíðsson, 16 mætingar
• Stefán Orri Davíðsson, 15 mætingar
• Andri Hrannar Elvarsson, 14 mætingar
• Batel Goitom Haile, 14 mætingar
• Gunnar Freyr Valsson, 14 mætingar
• Zofia Momuntjuk, 14 mætingar
• Bjartur Freir Heide Jörgensen, 13 mætingar
• Brynjólfur Yan Brynjólfsson, 13 mætingar
• Wiktoria Momuntjuk, 13 mætingar
• Einar Tryggvi Petersen, 12 mætingar
•  

Efstir í stigakeppninni:

1. Óskar Víkingur Davíðsson 34 stig
2. Stefán Orri Davíðsson 20 stig
3. Batel Goitom Haile 19 stig
4. Einar Dagur Brynjarsson 19 stig
5. Þórdís Agla Jóhannsdóttir 13 stig
6. Andri Hrannar Elvarsson 12 stig
7. Óttar Örn Bergmann Sigfússon 11 stig
8. Einar Tryggvi Petersen 10 stig
9. Rayan Sharifa   7 stig

Atkvöld hjá Hugin í kvöld

Atkvöld verður hjá Huginn mánudaginn 9. janúar 2017 og hefst mótið kl. 20:00. Fyrst eru tefldar 3 hraðskákir þar sem hvor keppandi hefur 3 mínútur + 2 sekúndur á hvern leik. Síðan verða  þrjár atskákir með umhugsunartímanum tíu mínútur + 5 sekúndur á hvern leik.. Teflt er í félagsheimili Hugins í Álfabakka 14a í Mjóddinni. Mótið verður reiknað til hraðskák- og atskákstiga.

Sigurvegarinn á atkvöldinu fær í verðlaun máltíð fyrir einn á Saffran eða pizzu frá Dominos. Einnig verður dreginn út af handahófi annar keppandi sem fær sama val. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Skákþing Reykjavíkur hefst í dag kl. 13 - enn hægt að skrá sig

Skákþing Reykjavíkur hefst sunnudaginn 8. janúar kl. 13. Tefldar verða níu umferðir eftir svissnesku kerfi. Tímamörk eru 90 mínútur og bætast við 15 mínútur eftir 40 leiki. 30 sekúndur bætast við eftir hvern leik alla skákina. Teflt er í húsnæði Taflfélags Reykjavíkur að Faxafeni 12.

Keppendur geta tekið tvær yfirsetur (bye) í umferðum 1-6. Leggja skal inn ósk um yfirsetu til skákstjóra áður en parað er í viðkomandi umferð. Hálfur vinningur fæst fyrir yfirsetu.

Athygli er vakin á því að umferðir á sunnudögum hefjast kl. 13:00.

Dagskrá

1. umferð sunnudag 8. janúar kl. 13.00
2. umferð miðvikudag 11. janúar kl. 19.30
3. umferð sunnudag 15. janúar kl. 13.00
4. umferð miðvikudag 18. janúar kl. 19.30
5. umferð sunnudag 22. janúar kl. 13.00
6. umferð miðvikudag 25. janúar kl. 19.30
7. umferð sunnudag 29. janúar kl. 13
8. umferð miðvikudag 01. febrúar kl. 19.30
9. umferð föstudag 03. febrúar kl. 19.30

Hraðskákmót Reykjavíkur fer fram sunnudaginn 5. febrúar kl. 13 og verður þá jafnframt verðlaunaafhending fyrir Skákþingið.

Tímamörk

90 mín á 40 leiki, síðan 15 mín, auk 30 sek eftir hvern leik alla skákina.

Skákstjórn

Yfirdómari mótsins verður Ríkharður Sveinsson ([e-mail] / s.772 2990).

Aðalverðlaun

• 1. sæti kr. 120.000
• 2. sæti kr. 60.000
• 3. sæti kr. 30.000

Stigaverðlaun

• Besta frammistaða miðað við eigin stig (rating performance – eigin stig) – kr. 10.000.
• U2000 og U1800 – kr. 10.000.
• U1600, U1400, U1200, stigalausir – bókaverðlaun.

Æskulýðsverðlaun

• Bókaverðlaun fyrir efstu stúlkuna og efsta piltinn í árgangaflokkum 2001-2003, 2004-2007, 2008 og yngri.

Fide stig gilda við úthlutun stigaverðlauna (íslensk stig til vara). Hver keppandi getur aðeins hlotið ein aukaverðlaun (ofangreind röð verðlauna gildir).

Þátttökugjöld (greiðist með reiðufé við upphaf móts).

kr. 5.000 fyrir 18 ára og eldri.
kr. 2.500 fyrir 17 ára og yngri.

Skráningarform

Skráðir keppendur

Keppt er um titilinn “Skákmeistari Reykjavíkur 2017” og hlýtur sá keppandi sem verður efstur þeirra sem eiga lögheimili í Reykjavík, eða eru félagsmenn í reykvísku skákfélagi, titilinn og farandbikar til varðveislu í eitt ár. Núverandi Skákmeistari Reykjavíkur er alþjóðlegi meistarinn Jón Viktor Gunnarsson.

Verði keppendur jafnir að vinningum í þremur efstu sætunum, verður verðlaunum skipt (Hort útreikningur), en stigaútreikningur (tiebreaks) látinn skera úr um verðlaunasæti. Í öðrum verðlaunaflokkum ganga verðlaun óskipt til þess sem hefur flest stig eftir stigaútreikning. Stigaútreikningur verður eftirfarandi: 1. Sonneborn-Berger 2. Innbyrðis úrslit 3. Fjöldi sigra 4. Median Buchholz.

Skákþing Reykjavíkur er reiknað til alþjóðlegra skákstiga. Skákir mótsins verða slegnar inn og birtar á pgn formi.

Vinsamlegast mætið tímanlega á skákstað til að staðfesta skráningu og greiða þátttökugjald. Skráningu lýkur 15 mínútum fyrir auglýst upphaf móts, þ.e. kl. 12.45.