Wesley So á toppinn - Carlsen og Eljanov koma næstir

Bandaríski stórmeistarinn Wesley So (2808) heldur áfram að gera það gott í Sjávarvík í Hollandi. Í fimmtu umferð í gær, sem reyndar var tefld í Rotterdam, vann hann indverska stórmeistarann Harikrishna (2766) og er efstur með 4 vinninga. Heimsmeistarinn Magnus Carlsen (2840) og Pavel Eljanov (2755) koma næstir með 3,5 vinninga. Carlsen gerði jafntefli við fyrrum aðstoðarmann sinn Nepomniachtchi (2767) en Eljanov laut í grasi fyrir Aronian (2780) sem er fjórði með 3 vinninga.

Sjötta umferð hefst kl. 12:30. Þá teflir Carlsen við Aronian, So við Adhiban (2653) og Eljanov (2755) við Karjakin (2785).

Í fyrradag var frídagur á mótinu og var þá spilaður fótbolti. Carlsen og Loek van Wely voru þar liðsstjórar yfir sitthvoru liðinu. Carlsen leiddi lið sitt til sigurs 6-2. 

 

Austurríkismaðurinn Markus Ragger (2697) er efstur í b-flokki  með 4,5 vinninga. Ilia Smirin (2667) er annar með 4 vinninga 

 

Ítarlega umfjöllun um gang mála í gær má finna á Chess.com og á Chess24.

• Heimasíða mótsins
• Beinar útsendingar (heimasíða mótsins)
• Beinar útsendingar (Chess24)

Guðmundur Gunnarsson atskákmeistari Skákfélags Sauðárkróks

Atskákmót Skákfélags Sauðárkróks var haldið í fyrrakvöld. Fjórir tóku þátt og bar Guðmundur Gunnarsson sigur úr býtum með 2 vinninga og 3 stig, en Pálmi Sighvatsson var með jafnmarga vinninga og 2 stig og hlaut því annað sætið.  Þriðji var Hörður Ingimarsson með 1 vinning og 2 stig, en Jón Arnljótsson hlaut 1 vinning og 1 stig.  Umhugsunartíminn var 25 mínútur á skákina.

Fyrstu helgina í mars mun félagið senda sveit til keppni í seinni hluta Íslandsmóts Skákfélaga, en þar er Skákfélag Sauðárkróks í öðru sæti í fjórðu deild og á þokkalega möguleika á að komast upp í þá þriðju, en 3 efstu liðin ná þeim áfanga.

Helgina 24.-26. mars verður svo Skákþing Norðlendinga haldið á Króknum, í umsjá skákfélagsins.

Nú hafa 2 barna og unglingaæfingar verið haldnar, í Húsi frítímans, en þátttaka verið dræm. Þessum æfingum verður fram haldið og vonast eftir meiri þátttöku, en þær eru opnar og engin æfingagjöld eða mætingarskylda.

Æfingarnar eru kl. 17 til 18.30 á mánudögum og er Jón Arnljótsson umsjónarmaður þeirra.

Heimasíða Skákfélags Sauðárkróks

Þrír efstir á Nóa Síríus mótinu

Önnur umferð Nóa-Síríus mótsins var tefld í Stúkunni í gærkvöldi. Teflt var fjörlega í báðum flokkum og ljóst að leikgleðin réð ríkjum. Vel úthugsaðar leikfléttur voru galdraðar fram og lævísar gildrur lagðar fyrir óvarkára. 

Af A-flokki.

Á fyrsta borði, náði hinn ungi meistari, Örn Leó Jóhannsson, jafntefli gegn Jóhanni Hjartarsyni, stigahæsta skákmanni mótsins í spennandi skák. Stórmeistarinn var með svart og náði fljótlega að jafna taflið og ríflega það. Örn Leó lét af hendi skiptamun í tilraun til þess að blíðka goðin og fékk í kjölfarið vel teflandi stöðu með sterkan biskup á d4.

Hér lék Örn  Leó 35. Hh4 og svo virtist sem hvítur væri að ná að máta svartan en Jóhann var vandanum vaxinn og lék eina varnarleiknum í stöðunni þrátt fyrir að eiga ekki nema nokkrar sekúndur eftir á klukkunni....f6

36. Dxf6 Df5+
37. Dxf5 gxf5
38. Hf4 Hér hefði verið nákvæmara að leika (38. Hh5) og hvítur vinnur f peðið og er með einhverja vinningsmöguleika, þó svo svartur ætti að halda jöfnu með bestu taflmennsku.
38... Hf7
39. g4 Nú leysist skákin upp í jafntefli.
39... fxg4
40. Hxg4+ Kh7
41. Hh4+ Kg6
42. Hg4+ Kh7 Ef 42. ...Kf5 þá 43. Hf4+ og svo skiptir hvítur upp á hrókum og drepur peðið á a7, líklega með unnu tafli.

43. Hh4+ Kg6 Og hér sættust keppendur á skiptan hlut. 

Skák Friðriks Ólafssonar og Olivers Arons Jóhannessonar var frestað vegna veikinda. Halldór Grétar Einarsson lá fyrir Guðmundi Kjartanssyni sem fer vel af stað í mótinu. Lenka Ptácníková náði baráttujafntefli á móti Þresti Þórhallssyni en hún hafði staðið lakar langan hluta skákarinnar.  Vel gert hjá Lenku. TR-ingarnir, Benedikt Jónasson og Björn Þorfinnsson, háðu mikla rimmu sem endaði með jafntefli eftir að þeir félagar höfðu skipst á að hafa betra lungann úr skákinni. Daði Ómarsson vann ungstirnið Vigni Vatnar og Jón Hálfdánarson sigraði Jóhann Ingvason í vel tefldri skák. "Nú dugði þrekið alla skákina" sagði Jón að viðureigninni lokinni með tilvísan í fyrstu umferðina, þegar hann tapaði gegn Guðmundi Kjartanssyni eftir að hafa átt í fullu tré við alþjóðlega meistarann lengi tafls. 

Ögmundur Kristinsson landaði jafntefli með hvítu gegn Jóni L. Árnasyni í langri baráttuskák.

Fide meistararnir Þorsteinn Þorsteinsson og Ingvar Þór Jóhannesson slíðruðu sverðin snemma, meðan Magnús Örn náði að svíða Björn Halldórsson. Magnús hafði reyndar boðið Birni jafntefli fyrir tímamörkin en þá var staðan í dýnamísku jafnvægi og skammur tími aflögu en Björn heyrði það ekki og lék næsta leik eins og ekkert hefði í skorist.

 Hinn ungi Björn Hólm Birkisson vann góðan sigur á hinum þrautreynda Björgvini Víglundssyni. Björn Hólm var með svart og jafnaði taflið eftir byrjunina. Björn tefldi svo framhaldið af festu og staða Björgvins versnaði þar til eitthvað varð undan að láta í endataflinu.

Gauti Páll tefldi mjög vel gegn Sigurbirni Björnssyni og hélt jöfnu tafli alveg fram í endatafl, þegar hvor átti 4 peð auk biskups. Biskuparnir voru samlitir og Sigurbjörn náði að koma sínum peðum fyrir á gagnstæðum reitalit biskupunum meðan Gauti neyddist til að verja 3 peð með einum biskupi. Það var of mikið og Sigurbjörn hafði að lokum sigur. Kristján Eðvarðsson sigraði Guðlaugu Þorsteinsdóttur með snoturri fléttu, drottningarfórn sem Guðlaugu yfirsást. 

Upplýsingar um önnur úrslit umferðarinnar má finna á Chess-Results. 

Staðan í A-flokki: Efstir, með tvo vinninga af tveimur mögulegum, eru Guðmundur Kjartansson, Daði Ómarsson og Dagur Ragnarsson. Fast á hæla þeim, koma svo tíu sterkir skákmenn, Jóhann Hjartarsson, Þórhallsson Þröstur, Björn Þorfinnsson, Örn Leó Jóhannsson, Lenka Ptácníková, Helgi Áss Grétarsson, Andri Áss Grétarsson, Sigfússon Sigurður Daði, Benedikt Jónasson og Magnús Örn Úlfarsson. 

B-flokkur:

Í B-flokki bar það helst til tíðinda, að Ólafur Evert Úlfsson náði jafntefli á efsta borði gegn Agnari Tómasi Möller. Þá hafði Birkir Karl Sigurðsson betur gegn Jóni Eggerti Hallssyni í baráttuskák. Hinir ungu meistarar, Róbert Luu og Óskar Víkingur Davíðsson sættust á jafnan hlut. Þá vann Hörður Aron Hauksson sigur á Stefáni Orra Davíðssyni og stigahæsti maður flokksins, Jón Trausti Harðarson, hafði sigur á Ísaki Orra Karlssyni. Hrund Hauksdóttir vann Freyju Birkisdóttur en annars urðu úrslit í B-flokki með eftirfarandi hætti.

Staðan í B-flokki:

Birkir Karl Sigurðsson, Hörður Aron Hauksson, Stephan Briem og Hrund Hauksdóttir hafa öll tvo vinninga eftir tvær umferðir. Þar á eftir koma 7 með einn og hálfan; Óskar Víkingur Davíðsson, Róbert Luu, Jón Trausti Harðarson, Birkir Ísak Jóhannsson, Agnar Tómas Möller, Ólafur Evert Úlfsson og Svava Þorsteinsdóttir. 

Ljóst er að fjör fer að færast í leikinn í báðum flokkum. Þegar hefur verið parað fyrir næstu umferð og ljóst að margar áhugaverðar og spennandi viðureignir verða tefldar næsta þriðjudagskvöld í Stúkunni við Kópavogsvöll. Áhugasamir hvattir til þess að gera sér ferð í Kópavog. Heitt á könnunni sem endranær og bruðerí til þess að slá á spennuna.

Skákhuginn

Skákþing Reykjavíkur – Lenka sigraði Guðmund

Í þriðju umferð Skákþings Reykjavíkur mættust nokkrir af þeim sem má telja líklegt að verði á meðal þeirra efstu í mótinu þegar upp er staðið. Yfirleitt unnu þeir sterkari, þ.e. alþjóðlegir meistarar og Fide-meistarar unnu þá titillausu. Á efsta borði mættust hins vegar tveir titilhafar; alþjóðlegi meistarinn Guðmundur Kjartansson mætti stórmeistaranum Lenku Ptacnikovu. Lenka hafði sigur í þeirri viðureign og mætir Júlíusi Friðjónssyni í 4. umferð í kvöld skvöld. Þá mætast einnig Dagur Ragnarsson og Örn Leó Jóhannsson sem hafa báðir fullt hús, eins og Lenka.

Umferðin hefst kl. 19:30 í Skákhöllinni í Faxafeni.

• Heimasíða TR
• Chess-Results

Lundarnir á ferð í kvöld í PRO Chess League

Íslensku Lundarnir í Reykjavik Puffins liðinu munu tefla í 2. umferð í hinni nýstofnuðu PRO Chess League í kvöld klukkan 19:40. (nánar hægt að lesa hér úr fyrri frétt). Í fyrstu umferð skildi sveitin jöfn við sterka þýska sveit frá Hamburg 8-8 en í kvöld er komið að sveit frá Stokkhólmi, Stockholm Snowballs.

Lundarnir vöktu mikla athygli í fyrstu umferð fyrir bæði vaska framgöngu á skákborðinu og eins fyrir að vekja mikla athygli á liðinu í gegnum samfélagsmiðla. Auk verðlauna fyrir framgöngu í mótinu sjálfu eru veitt ýmis aukaverðlaun eins og fyrir besta bloggið, bestu vídeó og almennt bestu framgöngu á samfélagsmiðlum (vídeó+Facebook+twitter o.fl). Puffins fengu verðlaun í fyrstu vikunni fyrir besta framgöngu á samfélagsmiðlum en þau verðlaun eru veitt vikulega. Hér er lykil myndbandið í þeim sigri:

 

Fyrirkomulagið er sem fyrr atskákir 15 mínútur á mann og 2 sekúndur í viðbótartíma. Sveit Reykjavik Puffins í kvöld munu skipa: 

GM Jóhann Hjartarson
IM Bragi Þorfinnsson
IM Björn Þorfinnsson
IM Einar Hjalti Jensson
FM Ingvar Þór Jóhannesson

Einar og Ingvar munu skipta með sér tveim skákum en hinir tefla allar fjórar en sá háttur er á að teflt er við öll borð andstæðingana og því alls 16 skákir. Lið Stokkhólmarbúa er þannig skipað:

GM Georg Meier
GM Evgenij Agrest
GM Erik Blomqvist
WIM Inna Agrest

Hvernig er hægt að fylgjast með?

Bein útsending með lýsendum verður hægt að nálgast á chess.com/tv. Þar eru tveir lýsendur og flakka þeir aðeins á milli þar sem nokkrar aðrar viðureignir eru einnig í gangi. Reykjavik Puffins eru í svokölluðum Central riðli en þar eru að mestu lið frá Evrópu.

Einnig er hægt að skoða skákirnar beint inni á Chess.com þá er farið í LIVE chess og þegar þangað er komið er hægt að finna skákirnar í flipanum með kíkji á (gulur hringur á mynd) eða með því að rita /follow og svo notendanafn Íslendingana. (einnig gulur hringur þar sem sú skipun hefur verið rituð á mynd)

 

Best er að rita skipunina strax fyrir öll notendanöfnin, þá "poppa" allar skákirnar upp þegar þær byrja og verða í flipa hægra megin á skjánum þar sem hægt er að flakka á milli. Einnig er hægt að finna allar skákirnar sem eru í gangi undir sjónaukaflipanum.

Notendanöfn Reykjavik Puffins:

Jóhann - eldur16

Bragi - b-man

Björn - Hunninn

Einar - EinarHjalti

Ingvar - Zibbit

 

Einnig er um að gera að kíkja á íslenskir skákmenn og mynda þar umræðuþráð og einnig er um að gera að kíkja á Facebook síðu Puffins: https://www.facebook.com/rvkpuffins/ Þar er reynt eftir fremsta megni að segja frá gangi mála og eins er liðið á Twitter. Um að gera að like Facebook síðuna og followa á Twitter. Nota svo hashtaggið #thePuffins til að sýna stuðning :-) 

Eljanov með hálfs vinnings forskot á Carlsen og So

Úkraínumaðurinn Pavel Eljanov (2755) hélt áfram sigurgöngu sinni á Tata Steel-mótinu í Sjávarvík í gær. Fórnarlambið að þessu sinni var Indverjinn B. Adhiban (2653). Pavel hefur hlotið 3,5 vinninga í 4 skákum. Magnus Carlsen (2755) og Wesley So (2808) fylgja honum eins og skugginn og hafa 3 vinninga. Carlsen yfirspilaði Wei Yi (2706) í gær og So vann Van Wely (2695) fremur áreynslulaust. 

So, sem hefur ekki tapað skák í 47 skákum í röð, er þriðji á heimslistanum með 2815 skákstig. Eljanov hefur hækkað um þrjú sæti á sama lista og er kominn í tólfta sæti með 2767 skákstig. Carlsen hefur aukið forystuna á Caruna uppí 18 skákstig en fyrir mótið hafði hann aðeins 13 stiga forystu á Fabiano.

 

Austurríkismaðurinn Markus Ragger (2697) er í banastuði í b-flokki og er efstur með fullt hús. Ilia Smirin (2667) er annar með 3½ vinning.

Frídagur er í dag. 

Ítarlega umfjöllun um gang mála í gær má finna á Chess.com og á Chess24.

• Heimasíða mótsins
• Beinar útsendingar (heimasíða mótsins)
• Beinar útsendingar (Chess24)

Spennandi umferð á N-S mótinu í kvöld!

Önnur umferð hins firnasterka Nóa-Siríus móts (Gestamóts Hugins og Skákdeildar Breiðabliks) hefst kl. 19.00 í kvöld.

Helst ber til tíðinda að sjálfur Friðrik Ólafsson mætir til leiks og stýrir hvítu mönnunum gegn ungstirninu Oliver Aroni Jóhannessyni. Af öðrum viðureignum má nefna skák yngsta þátttakandans í landsliðsflokki 2016, Arnar Leós Jóhannssonar, gegn stigahæsta skákmanni mótsins, Jóhanni Hjartarsyni. Guðmundur Kjartansson lætur sverfa til stáls gegn Halldóri Grétari Einarssyni sem er stórhættulegur andstæðingur og sló í gegn á N-S mótinu í fyrra. Stórmeistararnir Þröstur Þórhallsson og Lenka Ptácníková leiða saman hesta sína af alkunnri keppnishörku og Benedikt Jónasson, lærisveinn Bobby Fischers, gerir aðra atrennu í sömu viku að húninum harðdræga pg lundanum ljúfa, Birni Þorfinnssyni. Líklegt verður að telja að Íslensk getspá sýni viðureigninni áhuga. 

Einnig er vert að vekja sérstaka athygli á skák brellumeistaranna geðþekku, Ögmundar Kristinssonar og Jóns L. Árnasonar, en samanlagt má áætla að þessir tveir kappar hafi plata fleiri andstæðinga upp úr skónum í hraðskák og jarðsett fyrir opnum tjöldum en nokkrir tveir aðrir núlifandi Íslendingar. Ljóst er að þeir Jón og Ögmundur munu ekki þæfast um í steindauðu endatafli heldur efna til almenns ófriðar snemma tafls. Gestir eru velkomnir í Stúkuna á Kópavogsvelli.

Sjá pörun á Chess-Results.

Eljanov efstur í Sjávarvík

Pavel Eljanov (2755) hélt forystunni á Tata Steel-mótinu í Sjávarvík eftir jafntefli við Harikrishna (2766) í 3. umferð gær. Úkraínumaðurinn viðkunnanlegi er efstur með 2½ vinning. Fimm skákmenn hafa 2 vinninga og þeirra á meðal er heimsmeistarinn Magnús Carlsen (2840) eftir jafntefli við Dmitry Andreikin (2736) sem verður meðal keppenda á GAMMA Reykjavíkurskákmótinu.

Wesley So (2808) var ljónheppinn í gær þegar Richard Rapport (2702) klúðraði unninni stöðu niður í tap. So hefur nú teflt 46 skákir í röð án taps og er kominn í þriðja sæti heimslistans með 2811,5. Það var einmitt á Reykjavíkurskákmótinu 2013 sem So náði þeim áfanga að fara yfir 2700 skákstig með stuttu jafntefli við Eljanov í lokaumferðinni. Árangur So síðan er með ólíkindum. 

Austurríkismaðurinn Markus Ragger (2697) er efstur í b-flokki með fullt hús. Ilia Smirin (2667) er annar með 2½ vinning.

Ítarlega umfjöllun um gang mála í gær má finna á Chess.com og á Chess24.

• Heimasíða mótsins
• Beinar útsendingar (heimasíða mótsins)
• Beinar útsendingar (Chess24)

Jón Kristinn Þorgeirsson er Íslandsmeistari í netskák

Akureyringurinn knái, Jón Kristinn Þorgeirsson (Jokksi99) sigraði af fádæma öryggi á Íslandsmótinu í netskák sem fram fór í fyrradag, sunnudag. Fullyrða má að Jón, sem um árabil hefur borið höfuð og herðar yfir aðra norðlenska skákmenn, hafi verið í algjörum sérflokki á mótinu. Jón fékk alls 10,5 vinninga í 11 skákum, 1,5 vinningum meira en næsti maður, og leyfði aðeins eitt jafntefli, gegn fráfarandi sexföldum Íslandsmeistara, Davíð Kjartanssyni (Yuwono).

FIDE-meistarinn Magnús Örn Úlafsson (AC130-Ghostrider) endaði í 2. sæti með 9 vinninga og FM Davíð Kjartansson (Yuwono) var í þriðja sæti með 8 vinninga.

Mótið í ár var nokkuð óhefðbundið, skipt var um vettvang fyrir mótið sem hefur átt lögheimili og varnarþing á skákþjóninum ICC um langt árabil, og teflt á Chess.com. Vistaskiptin reyndust vandasöm, en allt gekk upp á endanum og verður vart annað séð en að keppendur hafi tekið breytingunni vel.

57 keppendur tóku þátt í ár, flestir Íslendingar en einnig var nokkur fjöldi Grænlendinga sem ákveðið var að bjóða til þátttöku í ár. Tefldu þeir um óformlegan titil Grænlandsmeistara í netskák, en sæmdarheitið í þetta sinn hlaut meistarinn Ral Fleischer (SuperRal) frá Nuuk, en hann hlaut 5,5 vinninga úr skákunum 11. Brian Sørensen (privatbss) varð í 2. sæti, en hann hlaut alls 5 vinninga. Grænlendingar eru þegar farnir að undirbúa næsta mót og ætla sér enn stærri hluti árið 2017.

Keppendum eru færðar þakkir fyrir þátttökuna og vonumst við til að sjá sem flesta að ári.

• Skoða má öll úrslit og allar skákir mótsins hér.
• Lokastöðuna og úrslit í flokkum má svo skoða hér.

Aukaverðlaun

Aukaverðlaun eru í formi Demants áskriftaraðgangs á Chess.com

Demantsaðgangur veitir fullan aðgang að allri þjónustu vefsins. Sem dæmi má nefna byrjanagagnagrunn, skákþrautir, ýmiskonar skákkennsla, myndbönd og fleira.

Fimm mánuðir eru veittir fyrir 1. sæti og þrír fyrir 2. sæti í öllum flokkum.

 

U/2100

Tvíburarnir efnilegu, Björn Hólm (Bjorn_Holm) og Bárður Örn Birkissynir (Bardur_Orn), fengu einnig 8 vinninga líkt og Davíð, en voru með heldur lakari niðurstöðu eftir stigaútreikning. Þeir bræður vinna hins vegar U/2100 stiga flokkinn nokkuð örugglega, 1,5 vinningi á undan næsta manni. Björn reyndist vera með örlítið betri stöðu eftir stigaútreikning, eða 51 stig gegn 50,5 stigum Bárðar, og vinnur því 1. verðlaun í þeim flokki. Þess má til gamans geta að þeir bræður fengu einnig jafn marga vinninga á mótinu í fyrra og stigaútreikning þurfti til að skera úr um hvor væri ofar. 

U/1800

Ingvar Örn Birgisson (Harry_Kane) sigraði í flokki skákmanna með minna en 1800 skákstig, en hann endaði með 6,5 vinninga (36.25 stig). Aðalsteinn Thorarensen (adlthor23) var í 2. sæti í U/1800 stiga flokki, einnig með 6,5 vinninga (31.25) en örlítið lakari stig. 

Stigalausir

Knútur A Óskarsson (krummmi) sigraði nokkuð örugglega í flokki stigalausra, hlaut alls 6 vinninga, og Sveinbjörn Jón Ásgrímsson (SveinbjornJon) er í 2. sæti með 5 vinninga. 

Kvennaflokkur

Elsa María Kristínardóttir (EMK89) sigraði af miklu öryggi í kvennaflokki, hlaut alls sjö vinninga og endar í 8. sæti af 57 og Freyja Birkisdóttir (freyjab) var í 2. sæti. 

60 ára og eldri

FIDE-meistarinn Áskell Örn Kárason (Flatus) stóð sig best í flokki eldri og heldri skákmanna, en hann fékk alls sjö vinninga og endar í sjöunda sæti. Ögmundur Kristinsson (oddigulli) er í 2. sæti, hálfum vinningi á eftir Áskatli. 

15 ára og yngri

Ungstirnið Óskar Víkingur Davíðsson (Davidsson) sigraði af miklu öryggi í flokki yngri skákmanna, en hann fékk alls 6,5 vinninga. Halldór Atli Kristjánsson (CAustin9) er í 2. sæti með 4,5 vinninga.

Sjá nánar á heimasíðu Hugins.

Skákæfingar og kennsla að hefjast fyrir börn og unglinga í Þingeyjarsýslu

Sérstakar skákæfingar og kennsla fyrir börn á grunnskólaaldri í Þingeyjarsýslu hefjast miðvikudaginn 18. janúar. Skákæfingarnar verða ókeypis og fara þær fram í Seiglu – miðstöð sköpunar (áður Litlaulaugaskóli) í Reykjadal.

Frá síðasta skákmóti

Æfingarnar fara fram annan hvern miðvikudag til að byrja með og einn sunnudag í hverjum mánuði. Reiknað er með að hver æfing standi yfir í um einn og hálfan klukkutíma. Hluti af æfingatímanum verður nýttur til kennslu.

Æfingaáætlun í janúar og febrúar. (áætlun fyrir mars, apríl og maí birt síðar)

Miðvikudagur 18. jan      kl: 16:00
Sunnudagur 22. jan        kl: 13:30
Miðvikudagur 1. feb         kl: 16:00
Miðvikudagur 15. feb       kl: 16:00
Sunnudagur 26. feb         kl 13:30

Hermann Aðalsteinsson, Rúnar Ísleifsson, Smári Sigurðsson og Sigurbjörn Ásmundsson munu skiptast á um að sjá um skákæfingarnar í vetur. Einnig er stefnt að því að fá vanan skákkennara að sunnan í heimsókn eina helgi í vetur, en dagsetning liggur ekki fyrir.

Þar sem æfingarnar verða ókeypis er ekki nauðsynlegt að forskrá þátttakendur. Allur skákbúnaður verður til staðar.

Miklar líkur eru á því að hefðbundin skákmót fyrir börn og unglinga sem fara venjulega fram í mars og apríl í sýslunni verði haldin þegar einn af skákæfingartínumum er á áætlun í mars eða apríl. Eins er líklegt að samstarf verði við Skákfélag Akureyrar um barna og unglingamót með vorinu.

Allar nánari upplýsingar um fyrirkomulag skákæfinganna verða birtar á facebooksíðu skákfélagsins Hugins í Þingeyjarsýslu og eru foreldrar barna á svæðinu sem ekki eru nú þegar skráð þar hvött til að óska eftir aðgangi þar.