Henrik efstur fyrir lokaumferðina

Stórmeistarinn Henrik Danielsen (2510) gerði jafntefli við stigahæsta keppenda mótsins pólska stórmeistarann Lukasz Cuborowski (2541) í áttundu og næstsíðustu umferð minningarmótsins um Emanuel Lasker sem fram fór í dag í Barlinken í Póllandi.  Henrik er efstur fyrir lokaumferðina, hefur 6 vinninga.   

Annar er hvít-rússneski alþjóðlegi meistarinn Nikolai Alivadin (2385) með 5,5 vinning en fjórir skákmenn hafa 5 vinninga.    

Í níundu og síðustu umferð, sem fram fer á morgun, teflir Henrik við pólska alþjóðlega meistarann Aleksander Czerwoński (2407).   Skákin hefst kl. 8 í fyrramálið og verður í beinni. 

Alls teflir 21 skákmaður í mótinu, og þar af fjórir stórmeistarar.  

• Heimasíða mótsins
• Skákirnar í beinni - byrjar kl. 14

Blindur grænlenskur skákmaður með í Djúpuvík - síðustu forvöð að skrá sig

Sextán ára gamall grænlenskur piltur, Paulus Napatoq, sem verið hefur blindur fá fæðingu verður meðal keppenda á Minningarmóti Páls Gunnarssonar í Djúpavík 20. og 21. júní.

Paulus kemur alla leið frá þorpinu Ittoqqortoormiit, en engin byggð er norðar á austurströnd Grænlands. Þangað hafa liðsmenn Hróksins farið síðustu 2 árin, og það var í fyrra sem Paulus lærði mannganginn á undraskömmum tíma. Við það tækifæri var Paulus gerður að heiðursfélaga í Hróknum.

Þegar Hróksmenn voru aftur á ferð í Ittoqqortoormiit um páskana sigraði Paulus á skákmóti, þar sem keppendur voru 70, og sýndi að hann er engum líkur.

Hann fer líka létt með að aka hundasleða og fer allra sinna ferða í þessu litla þorpi, þar sem 700 kílómetrar eru í næstu byggð.

Smellið hér til að lesa meira um ferðir Hróksins í nyrstu byggðum Grænlands.

Mikill áhugi hefur verið á mótinu.  Allt gistirými í Hótel Djúpavík er nú bókað, sömuleiðis allt svefnpokapláss í Finnbogastaðaskóla, en nóg pláss er á tjaldstæðum. Örfá önnur gistirými eru eftir í hreppnum.

Keppendur ættu að skrá sig sem allra fyrst, því búast má við að loka þurfi skráningu á næstu dögum!

Mót til heiðurs Guðfríði Lilju á mánudag

Mánudaginn 9. júní, klukkan 13:00 halda Skákfélag Vinjar og Hrókurinn stórmót til heiðurs Guðfríði Lilju Grétarsdóttur sem nýlega hefur látið af störfum sem forseti Skáksambands Íslands. 

Mótið verður haldið í Vin, Hverfisgötu 47 og tefldar verða fimm umferðir eftir Monrad kerfi þar sem umhugsunartími er 7 mínútur.

Þeir heiðursfeðgar, Bragi Kristjónsson og Ari Gísli Bragason í Bókinni ehf, hafa tekið saman vinninga, sem eru bækur um - eða eftir - Guðfríði, Lilju, Björn, Óttar og Felix, en þeir Björn Þorfinnsson og Óttar Felix buðu sig einmitt fram til forseta fyrir síðasta aðalfund Skáksambandsins. Bragi deilir út vinningum af alkunnri snilld.

Veglegir happadrættisvinningar verða einnig, m.a. skákborð áritað af sjálfum Garry Kasparov, þar sem eðalskákkallar fylgja með. 

Skákstjórar eru þeir Robert Lagerman og Hrannar Jónsson. 

Að móti loknu verður boðið upp á kaffihlaðborð  a la Vin, sem aldrei hefur brugðist. 

Vin er athvarf Rauða kross Íslands fyrir fólk með geðraskanir og er að Hverfisgötu 47 í Reykjavík. Hrókurinn hefur staðið fyrir æfingum á mánudögum í u.þ.b. fimm ár og Skákfélag Vinjar er aðili að Skáksambandi Íslands. Síminn i Vin er 561-2612

Magnús Valgeirsson skákmeistari Fljótsdalshéraðs

Magnús Valgeirsson er skákmeistari Fljótsdalshéraðs þótt enn sé einni skák ólokið.  Magnús fékk fullt hús á mótinu, vann alla fjóra andstæðinga sína.  Annar varð Guðmundur Ingvi Jóhannsson.

Staðan:

• 1. Magnús Valgeirsson 4 v. af 4
• 2. Guðmundur Ingi Jóhannsson 3 v.
• 3. Einar Ólafsson 1 v. + fr.
• 4. Jón Björnsson 1 v.
• 5. Haraldur Brynjólfsson 0 v. + fr.

Heimasíða SAUST

Helgi Ólafsson teflir í Djúpuvík

Það er ljóst að hart verður barist í Djúpuvík eftir 2 vikur.

Hinn margfaldi Íslandsmeistari Helgi Ólafsson mætir til leiks á Minningarmóti Páls Gunnarssonar í Djúpavík. Þetta eru frábærar fréttir, enda er Helgi einhver skemmtilegasti og sókndjarfasti skákmaður sem Íslendingar hafa eignast.

Helgi (f. 1956) varð þriðji stórmeistari Íslendinga, á eftir Friðrik Ólafssyni og Guðmundi Sigurjónssyni. Hann hefur margoft teflt fyrir Íslands hönd með miklum sóma. Þá er hann skólastjóri Skákskóla Íslands og hefur unnið mikið starf með ungum skákmönnum.

Skákmenn og gestir ættu að skrá sig tafarlaust, því allt gistirými í Árneshreppi er að fyllast.

Allar upplýsingar um mótið: Smelltu hér!

Gissur og Pálmi og Bragi sigruðu á Mjóddarmóti Hellis

Bragi Halldórsson, sem tefldi fyrir Gissur og Pálma og Arnar E. Gunnarsson, sem tefldi fyrir Glitni urðu efstir og jafnir á Mjóddarmóti Hellis, sem fram fór í dag rétt eins og í fyrra.  Þá sigraði Arnar eftir stigaútreikning en nú snérist þetta við því nú hafði Bragi betur eftir tvöfaldan stigaútreikning. 

Mótið var sterkt.  Til að byrja með var það Bjarni Sæmundsson sem stal senunni en hafði fullt hús eftir fyrstu umferðirnar og hafði m.a. lagt Guðmund Kjartansson að velli.   Arnar og Bragi voru hins vegar seigir að vanda.  

Lokastaðan:

 

Nr.	Fyrirtæki	Skákmaður	V.	Stig	Stig2
1	Gissur og Pálmi	Bragi Halldórsson	6	23,5	26,5
2	Glitnir	Arnar E. Gunnarsson	6	23,5	25,5
3	Gámaþjónustan	Omar Salama	5
4	Reykjavíkurborg	Róbert Harðarson	5
5	Kaupþing	Hjörvar Steinn Grétarsson	5
6	Kaffi París	Björn Þorfinnsson	4½
7	ÍTR	Bjarni Sæmundsson	4
8	Landsbanki Íslands	Gunnar Björnsson	4
9	VISA Ísland	Sæbjörn Guðfinnsson	4
10		Vigfús Ó. Vigfússon	4
11	Bakarameistarinn	Sigurður G. Daníelsson	4
12		Magnús Matthíasson	4
13	Gullsmiðurinn í Mjódd	Guðmundur Kjartansson	3½
14	Fröken Júlía	Davíð Ingi Ragnarsson	3
15	Happdrætti Háskólans	Kristján Örn Elíasson	3
16	Opin kerfi	Birkir Karl Sigurðsson	3
17	Sorpa	Finnur Kr. Finnsson	3
18	SPRON	Björgvin Kristbergsson	3
19	Hitaveita Suðurnesja	Páll Sigurðsson	2
20	Sjálfstæðisflokkurinn	Sæþór Atli Harðarson	2
21	OLÍS	Jón Halldór Sigbjörnsson	2
22	Verkfræðistofa Sigurðar Thoroddsen	Sóley Lind Pálsdóttir	2
23	Suzuki bílar	Franco Soto	1
24		Róbert Óðinn Kristjánsson	1

Skákstjórar voru Gunnar Björnsson og Vigfús Ó. Vigfússon.

Henrik efstur eftir jafntefli

Stórmeistarinn Henrik Danielsen (2510) gerði jafntefli við pólska alþjóðlega meistarann Urban Klaudiusz (2465) í sjöundu umferð minningarmótsins um Emanuel Lasker sem fram fór í Barlinek í Póllandi í dag.  Henrik er sem fyrr efstur, hefur 5½ vinning. 

Í áttundu og næstsíðustu umferð, sem fram fer á morgun, teflir Henrik við pólska stórmeistarann Lukasz Cuborowski (2541), sem er stigahæstur keppenda.  

Alls teflir 21 skákmaður í mótinu, og þar af fjórir stórmeistarar.  

• Heimasíða mótsins
• Skákirnar í beinni - byrjar kl. 14

Mjóddarmót Hellis hefst kl. 16 - enn hægt að skrá sig

Mjóddarmót Hellis fer fram föstudaginn 6. júní í göngugötunni í Mjódd.  Mótið hefst kl. 16 og er mótið öllum opið, þátttaka ókeypis en keppendur verða af öllum styrkleika.  Tefldar verða sjö umferðir með sjö mínútna umhugsunartíma.  Skráning fer í tölvupósti í netfangið [e-mail].  Þátttaka er ókeypis!

Nú hafa m.a. skráð sig til leiks alþjóðlegi meistarinn Arnar Gunnarsson og FIDE-meistarnir Björn Þorfinnsson, Róbert Harðarson og Guðmundur Kjartansson.

Verðlaun eru sem hér segir:

• 1. 10.000
• 2.   6.000
• 3.   4.000

Skráning:

• Tölvupóstur: [e-mail]
• Sími: 866 0116

Henrik með vinningsforskot eftir sigur

Stórmeistarinn Henrik Danielsen (2510) sigraði pólska FIDE-meistarann Mateusz Bronowicki (2307) í sjöttu umferð minningarmótsins um Emanuel Lasker sem fram fór í Barlinek í Póllandi í dag.  Henrik er sem fyrr efstur, hefur 5 vinninga og vinnings forskot á næstu menn.  

Í sjöundu umferð, sem fram fer á morgun, teflir Henrik við pólska alþjóðlega meistarann Urban Klaudiusz (2465).

Alls teflir 21 skákmaður í mótinu, og þar af fjórir stórmeistarar.  

• Heimasíða mótsins
• Skákirnar í beinni - byrjar kl. 14

Henrik efstur eftir jafntefli

Stórmeistarinn Henrik Danielsen (2510) gerði jafntefli við hvít-rússneska alþjóðlega meistarann Nikolai Alivadin (2384) í fimmtu umferð minningarmótsins um Emanuel Lasker sem fram fór í Barlinek í Póllandi í dag.  Henrik er sem fyrr efstur, hefur 4 vinninga.

Í sjöttu umferð, sem fram fer á morgun, teflir Henrik við pólska FIDE-meistarann Mateusz Bronowicki (2307)

Alls teflir 21 skákmaður í mótinu, og þar af fjórir stórmeistarar.  

• Heimasíða mótsins
• Skákirnar í beinni - byrjar kl. 14