Beinar útsendingar - námskeið fyrir áhugasama!

Allt of fáir í skákhreyfingunni hafa nægilega þekkingu til að hafa beinar útsendingar frá skákmótum og beinar útsendingar frá íslenskum skákmótum eru frekar undantekningar en regla. SÍ ætlar að reyna að bæta úr því og býður upp á námskeið fyrir þá sem vilja læra þessi fræði. Björn Ívar Karlsson og Omar Salama okkar helstu sérfræðingar í beinum útsendingum verða með námskeið fyrir áhugasama þriðjudaginn 21. febrúar kl. 19:30 í SÍ.

Þeir sem hafa áhuga eru hvattir til að mæta. Félög eru hvött til að senda fulltrúa en SÍ er tilbúið að lána búnað til félaga hafi þau beinar útsendingar frá einstaka mótum.

Einnig leitar SÍ að fleiri sérfræðingum til að aðstoða við einstaka mót, eins og t.d. Íslandsmót skákfélaga, svo þarna gæti falist smá "atvinnutækifæri" fyrir áhugasama.

Skráning fer fram í netfangið [e-mail]. Ekkert námskeiðgjald og meira að segja frítt kaffi innifalið!

Skákþáttur Morgunblaðsins: Guðmundur Kjartansson Skákmeistari Reykjavíkur 2017

Guðmundur Kjartansson varð skákmeistari Reykjavíkur 2017. Fyrsti sigur Guðmundar á þessum vettvangi en fyrir lokaumferðina hafði hann ½ vinnings forskot á Dag Ragnarsson og Lenku Ptacnikovu. Guðmundur hafði í 8. umferð unnið lykilskák gegn Birni Þorfinnssyni sem rakin var í síðasta pistli. Tap fyrir Lenku í 3. umferð hægði örlítið á ferð hans en þó ekki meira en svo að hann vann sex síðustu skákir sínar. Rétt fyrir síðustu áramótin vann Guðmundur alþjóðlegt mót í Færeyjum en næsta verkefni hans er þátttaka á Aeroflot-mótinu í Moskvu sem hefst 21. febrúar. Þar sem Björn Þorfinnsson vann Dag Ragnarsson og Lenka tapaði fyrir Guðmundi Gíslasyni náði Björn einn 2. sæti en lokaniðurstaðan varð þessi:

1. Guðmundur Kjartansson 8 v. (af 9) 2. Björn Þorfinnsson 7 v. 3.- 6. Lenka Ptacnikova, Guðmundur Gíslason, Dagur Ragnarsson og Daði Ómarsson 6½ v. 7.-10. Örn Leó Jóhannsson, Björgvin Víglundsson, Benedikt Jónasson og Jóhann Ingvason 6 v.

Á Nóa Síríus mótinu dró svo til tíðinda sl. þriðjudagskvöld þegar Daði Ómarsson vann Guðmund Kjartansson og náði forystu fyrir lokaumferðina ásamt Þresti Þórhallssyni. Þeir eru báðir með 4½ vinning en Daði fékk ½ vinnings yfirsetu í 3. umferð og hefur því unnið allar fjórar skákirnar sem hann hefur teflt og reiknast árangur hans uppá 3.237 Elo-stig; 100% árangur skorar hátt á Elo-kvarðanum!

Í 3.-7. sæti koma Guðmundur Kjartansson, Jóhann Hjartarson, Helgi Áss Grétarsson, Björgvin Jónsson og Jón Viktor Gunnarsson með 3½ vinning. Þröstur hefur hvítt gegn Daða í lokaumferðinni.

 

Dellutaflmennska Hou Yifan á Gíbraltarmótinu

Frægasta delluskák sem sögur fara af fór fram á heimsmeistaramóti stúdenta í Graz í Austurríki sumarið 1972. Tveir „ófúsir ferðalangar“, v-þýski stórmeistarinn og papýrusfræðingurinn Robert Hübner og bandaríski stórmeistarann Kenneth Rogoff, sem síðar haslaði sér völl á vettvangi hagfræðinnar, áttu að tefla á 1. borði í viðureign stórþjóðanna. Af einhverjum ástæðum vildu þessir heiðursmenn ekki tefla þennan dag og sömdu jafntefli án taflmennsku. Skákstjórinn greip inn í atburðarásina og krafðist þess að þeir tefldu „almennilega skák“. Ákveðið „afstöðuvandamál“ er ekki óþekkt meðal skákmanna og það braust fram með eftirminnilega hætti þennan dag. Aftur settust Hübner og Rogoff að tafli og tefldu eftirfarandi skák:

 

Hübner – Rogoff

1. c4 Rf6 2. Rf3 g6 3. Rg1 Bg7 4. Da4 O-O 5. Dxd7+ Dxd7 6. g4 Dxd2+ 7. Kxd2 Rxg4 8. b4 a5 9. a4 Bxa1 10. Bb2 Rc6 11. Bh8 Bg7

- Samið jafntefli.

Á opna mótinu á Gíbraltar, sem lauk um síðustu helgi með sigri bandaríska stórmeistarans Hikaru Nakamura, trúðu menn vart eigin augum þegar heimsmeistari kvenna, kínverska skákdrottningin Hou Yifan, gafst upp með hvítu eftir fimm delluleiki gegn Indverjanum Babu Lalith í lokaumferð mótsins: 1. g4 d5 2. f3 e5 3. d3 Dh4+ 4. Kd2 h5 5. h3 hxg4 og hvítur gaf.

Hou Yifan baðst síðar afsökunar á framgöngu sinni en sagði ástæðuna þá að mótsstjórnin á Gíbraltar hefði sveigt reglur um pörun á þann hátt að í sjö skákum af tíu hefði hún mætt konum og þeim viðureignum verið stillt upp sem einhvers konar uppgjöri við heimsmeistara kvenna. Hefði þetta haft slæm áhrif á sig og því hefði hún mótmælt með þessum hætti.

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 11. febrúar 2017

Skákþættir Morgunblaðsins

NM í skólaskák: Oliver í 1.-2. sæti - 5½ vinningur í hús - 2.-3. sæti í landskeppninni

Íslensku skákmennirnir hlutu 5½ vinning í 10 skákum í 3. umferð NM í skólaskák sem fram fór í Drammen í Noregi í morgun. Dagur Ragnarsson, Nansý Davíðsdóttir og Óskar Víkingur Davíðsson unnu sínar skákir. Fimm jatntefli komu í hús og tvær skákir töpuðust. Oliver Aron hefur byrjað best allra og hefur 2½ vinning og er í 1.-2. sæti. Allmargir íslensku keppendanna hafa 2 vinninga eins og lesa má um hér að neðan. 

Norðmenn eru efstir landskeppninni með 17½ vinning. Íslendingar eru skammt undan ásamt Dönum með 16½ vinning.

A-flokkur (1997-99)

Dagur Ragnarsson vann en Oliver Aron Jóhannesson gerði jafntefli. Oliver hefur 2½ vinning og er í 1.-2. sæti. Dagur hefur 2 vinninga og er í 3.-4. sæti. Þeir mætast í fjórðu umferð. Íslendignar hafa þar með mæst í öllum flokkum með d-flokki. 

B-flokkur (2000-01)

Hilmir Freyr Heimisson og Bárður Örn Birkisson gerðu stutt jafntefli í innbyrðis skák. Hilmir hefur 2 vinninga og er í 3.-4. sæti. Bárður hefur 1½ vinning. 

C-flokkur (2002-03)

Nansý Davíðsdóttir vann Vigni Vatnar Stefánsson með glæsilegri taflmennsku. Nansý hefur 1½ vinning en Vignir hefur ½ vinning. Vignir 

D-flokkur (2004-05)

Óskar Víkingur Davíðsson vann en Róbert Luu gerði jafntefli. Þeir eru í 2.-6. sæti með 2 vinninga. 

E-flokkur (2006-)

Gunnar Erik Guðmundsson gerði jafntefli en Stefán Orri Davíðsson tapaði. Gunnar hefur 2 vinninga og er í 2.-5. sæti. Stefán Orri hefur ½ vinning.

Fjórða umferð hefst kl. 14 í dag.

Fylgjast má með mótinu á heimasíðu mótsins auk þess sem Skák.is mun fylgjast vel með gangi mála um helgina.

 

• Heimasíða mótsins
• Beinar útsendingar
• Úrslitaþjónusta

NM í skólaskák: Oliver með fullt hús

Annarri umferð Norðurlandamótsins í skólaskák er nýlokið í Drammen í Noregi. Fimm vinningar í tíu skákum komu í hús. Oliver Aron Jóhannesson, Óskar Víkingur Davíðsson og Gunnar Erik Guðmundsson unnu sínar skákir. Oliver hefur byrjað best Íslendinganna og hefur fullt hús eftir tvær umferðir. 

Norðmenn eru efstir í óformlegu landskeppni með 12½ vinning. Finnar eru aðrir með 12 vinninga og Íslendingar þriðju með 11 vinninga.

A-flokkur (1997-99)

Oliver Aron Jóhannesson vann en Dagur Ragnarsson tapaði. Oliver hefur fullt hús en Dagur hefur 1 vinning.

B-flokkur (2000-01)

Hilmir Freyr Heimisson gerði jafntefli en Bárður Örn Birkisson tapaði. Hilmir hefur 1½ vinning en Bárður hefur 1 vinning. Þeir mætast í 3. umferð í fyrramálið.

C-flokkur (2002-03)

Nansý Davíðsdóttir gerði jafntefli en Vignir Vatnar Stefánsson tapaði. Þau hafa bæði ½ vinning og mætast á morgun.

D-flokkur (2004-05)

Róbert Luu og Óskar Víkingur Davíðsson unnu báðir. Róbert hefur 1½ vinning en Óskar hefur 1 vinning. 

E-flokkur (2006-)

Gunnar Erik Guðmundsson vann en Stefán Orri Davíðsson tapaði. Gunnar hefur 1½ vinning en Stefán hefur ½ vinning.

Þriðja umferð fer fram í fyrramálið og hefst kl. 8.

Fylgjast má með mótinu á heimasíðu mótsins auk þess sem Skák.is mun fylgjast vel með gangi mála um helgina.

 

• Heimasíða mótsins
• Beinar útsendingar
• Úrslitaþjónusta

HM kvenna: Og þá eru eftir sextán

Heimsmeistaramót kvenna er nú í gangi í Tehran í Íran. 64 skákkonur hófu þátttöku en teflt er eftir útsláttarfyrirkomulagi. Nú eru eftir sextán skákkonur og ýmislegt hefur gengið á og margar sterkar skákkonur fallnar úr leik.

Skákkonurnar sextán eru:

SNo.	Name	Res	SNo.	Name
1	Ju Wenjun		16	Girya Olga
15	Pham, Le Thao Nguyen		2	Muzychuk Anna
3	Kosteniuk Alexandra		14	Cramling Pia
13	Guramishvili Sopiko		4	Harika Dronavalli
5	Dzagnidze Nana		12	Shen Yang
11	Pogonina Natalija		6	Ni Shiqun
7	Stefanova Antoaneta		10	Khurtsidze Nino
9	Tan Zhongyi		8	Padmini, Rout

Sigur Guramsvili á Natalia Buksa var afar athyglisverður þó ekki sé meira sagt en lesa má um það á Chess24.

Allar skákkonurnar hafa þurft að hafa slæðu á meðan mótinu stendur. Var það til þess að sumar skákkonur sáu sér ekki fært um að taka þátt.

Fyrri þriðj umferðar (16 liða úrslita)er nú í gangi.

• Heimasíða mótsins
• Beinar útsendinar

NM í skólaskák: Sex vinningar í hús í fyrstu umferð

Íslensku krakkarnir á NM í skólaskák í Drammen í Noregi fengu 6 vinninga í 10 skákum í fyrstu umferð. Vel gekk sérstaklega í efstu flokkunum tveim en þar unnust allar fjórar skákirnar. Verr gekk í flokkum c-e en þar komu 2 vinningar í hús af 6 mögulegum. 

Norðmenn eru efstir í óformlegu landskeppni með 6½ vinning. Íslendingar eru aðrir með 6 vinninga.

Skák Vignis í c-flokki var einkar spennandi en þar fórnaði Vignir tveimur mönnum. Eftir miklar flækjur þar sem kóngur andstæðingsins var kominn á h5 lauk skákinni með þráskák. Bárður í c-flokki vann með einkar laglegri riddarafórn.

A-flokkur (1997-99)

Dagur Ragnarsson og Oliver Aron Jóhannesson unnu báðir.

B-flokkur (2000-01)

Hilmir Freyr Heimisson og Bárður Örn Birkisson unnu báðir.

C-flokkur (2002-03)

Vignir Vatnar Stefánsson gerði jafntelfi en Nansý Davíðsdóttir tapaði.

D-flokkur (2004-05)

Róbert Luu gerði jafntelfi en Óskar Víkingur Davíðsson tapaði.

E-flokkur (2006-)

Stefán Orri Davíðsson og Gunnar Erik Guðmundsson gerðu jafntefli í innbyrðis skák.

Önnur umferð hefst kl. 14.

Fylgjast má með mótinu á heimasíðu mótsins auk þess sem Skák.is mun fylgjast vel með gangi mála um helgina.

 

• Heimasíða mótsins
• Beinar útsendingar
• Úrslitaþjónusta

Íslandsmót barnaskólasveita (1.-3. bekkur) fer fram laugardaginn 25. febrúar

Íslandsmót barnaskólasveita 1.-3. bekk 2017 fer fram í skákhöll Taflfélags Reykjavíkur, Faxafeni 12, laugardaginn 25. febrúar nk. 

Tefldar verða sjö umferðir eftir svissneska kerfinu. Umhugsunartími 8+2 á hvern keppenda. Mótið hefst kl. 14 og áætlað er að því ljúki með verðlaunaafhendingu um kl 17:00.

Hver skóli getur sent fleiri en eina sveit - en hver sveit er skipuð fjórum nemendum 1.-3. bekkjar (auk allt að fjögurra varamanna)

Þátttökugjöld kr. 7.500.- á sveit. Þó ekki hærri en kr. 15.000.- fyrir hvern skóla.

Veitt verða verðlaun fyrir efstu þrjár sveitirnar og einnig efstu b-e sveitir.

Einnig borðaverðlaun fyrir bestan árangur á 1.-4. borði. 

Skráning fer fram á Skák.is (guli kassinn efst). Skrá þarf sveitir í síðasta lagi 23. febrúar.

Upplýsingar um þegar skráðar sveitir má finna hér. 

NM í skólaskák hófst í morgun í Drammen - 10 íslensk skákungmenni taka þátt

Norðurlandamótið í skólaskák hófst í morgun í Drammen í Noregi. Teflt er í fimm aldursflokkum og taka 10 íslenskir skákmenn þátt. Tólf skákmenn taka þátt í hverjum aldursflokki - tveir frá hverju Norðurlandanna. 

Fulltrúar Íslands eru (fremst er nr. í stigaröð keppenda)

A-flokkur (1997-99): 

3. FM Dagur Ragnarsson (2276)
5. FM Oliver Aron Jóhannesson (2224)

B-flokkur (2000-01):

3. Hilmir Freyr Heimisson (2192)
4. Bárður Örn Birkisson (2175)

C-flokkur (2002-03):

1. FM Vignir Vatnar Stefánsson (2384)
8. Nansý Davíðsdóttir (1897)

D-flokkur (2004-05):

3. Óskar Víkingur Davíðsson (1840)
8. Róbert Luu (1629)

E-flokkur (2006-)

4. Stefán Orri Davíðsson (1562)
10. Gunnar Erik Guðmundsson (1148)

Fararstjórar krakkanna eru Helgi Ólafsson og Guðmundur Kjartansson. Einn Íslendingaslagur er í fyrstu umferð en Stefán Orri og Gunnar Erik mætast í e-flokki. 

Tefldar eru sex umferðir tvær á dag föstudag til sunnudag. Umferðir hefjast kl. 8 og 14 að því undanskyldu að lokaumferðin á sunnudag hefst kl. 13.

Fylgjast má með mótinu á heimasíðu mótsins auk þess sem Skák.is mun fylgjast vel með gangi mála um helgina.

• Heimasíða mótsins
• Beinar útsendingar
• Úrslitaþjónusta

Skákmót öðlinga hefst á miðvikudaginn

Skákmót öðlinga 40 ára og eldri hefst miðvikudaginn 22. febrúar kl. 19.30 í félagsheimili T.R. að Faxafeni 12. Tefldar verða 7 umferðir eftir svissneska-kerfinu og er umhugsunartíminn 90 mínútur á alla skákina  auk 30 sekúndna viðbótartími á hvern leik. Núverandi Skákmeistari öðlinga er Stefán Arnalds.

Mótið verður jafnframt Íslandsmót 50 ára og eldri þar sem efsti keppandinn í hópi þeirra sem fæddir eru 1967 og fyrr hlýtur Íslandsmeistaratitilinn. Sigurvegari mótsins hlýtur titilinn Skákmeistari öðlinga. Verði keppendur jafnir að vinningum mun stigaútreikningur (tiebreaks) skera úr um lokaröð og þar með verðlaun.

Athugið að lokaumferð mótsins fer fram föstudaginn 31. mars.

Dagskrá:
1. umferð miðvikudag 22. febrúar kl. 19.30
2. umferð miðvikudag 1. mars kl. 19.30
3. umferð miðvikudag 8. mars kl. 19.30
4. umferð miðvikudag 15. mars kl. 19.30
5. umferð miðvikudag 22. mars kl. 19.30
6. umferð miðvikudag 29. mars kl. 19.30
7. umferð föstudag 31. mars kl. 19.30

Tvær yfirsetur (bye) eru leyfðar í umferðum 1-5 og fæst 1/2 vinningur fyrir hvora yfirsetu. Láta skal skákstjóra vita um yfirsetu fyrir lok umferðarinnar á undan.

Hraðskákmót öðlinga fer fram miðvikudaginn 12. apríl kl. 19:30 og að því loknu fer þar fram verðlaunaafhending fyrir bæði mót. Keppt er um veglegan farandbikar, en auk hans eru verðlaun fyrir þrjú efstu sætin, bæði í aðalmótinu og hraðskákmótinu.

Tímamörk
90 mín + 30 sek viðbót eftir hvern leik

Verðlaun
1. sæti kr. 40.000
2. sæti kr. 20.000
3. sæti kr. 10.000

Þátttökugjald (greiðist með reiðufé við upphaf móts)

kr. 5.000 – Innifalið er frítt kaffi allt mótið ásamt rjómavöfflum og öðru góðgæti á lokakvöldi

Skákstjórn

Þórir Benediktsson; [e-mail], s. 867 3109

Skráningarform

Skráðir keppendur

Skákmót öðlinga 40 ára og eldri hefst miðvikudaginn 22. febrúar kl. 19.30 í félagsheimili T.R. að Faxafeni 12. Tefldar verða 7 umferðir eftir svissneska-kerfinu og er umhugsunartíminn 90 mínútur á alla skákina  auk 30 sekúndna viðbótartími á hvern leik.
Mótið verður nú haldið í 26. sinn en núverandi Skákmeistari öðlinga er Stefán Arnalds.

Dagskrá:
1. umferð miðvikudag 22. febrúar kl. 19.30
2. umferð miðvikudag 1. mars kl. 19.30
3. umferð miðvikudag 8. mars kl. 19.30
4. umferð miðvikudag 15. mars kl. 19.30
5. umferð miðvikudag 22. mars kl. 19.30
6. umferð miðvikudag 29. mars kl. 19.30
7. umferð miðvikudag 5. apríl kl. 19.30

Tvær yfirsetur (bye) eru leyfðar í umferðum 1-5 og fæst 1/2 vinningur fyrir hvora yfirsetu. Láta skal skákstjóra vita um yfirsetu fyrir lok umferðarinnar á undan.

Mótinu lýkur miðvikudaginn 12. apríl kl. 19:30 með hraðskákmóti og verðlaunaafhendingu. Keppt er um veglegan farandbikar, en auk hans eru verðlaun fyrir þrjú efstu sætin, bæði í aðalmótinu og hraðskákmótinu.

Tímamörk
90 mín + 30 sek viðbót eftir hvern leik

Verðlaun
1. sæti kr. 40.000
2. sæti kr. 20.000
3. sæti kr. 10.000

Þátttökugjald (greiðist með reiðufé við upphaf móts)

kr. 5.000 – Innifalið er frítt kaffi allt mótið ásamt rjómavöfflum og öðru góðgæti á lokakvöldi

Skákstjórn

Þórir Benediktsson; [e-mail], s. 867 3109

Skráningarform

Skráðir keppendur

Nóa Síríus-mótið: Daði og Þröstur sigurvegarar á afar vel skipuðu Gestamóti Hugins og Breiðabliks

Þá er vel heppnuðu Nóa Siríus móti 2017 lokið. Alls tóku 72 skákmenn á öllum aldri þátt og hefur mótið aldrei verið sterkara en í ár.

A-flokkur

Daði Ómarsson og Þröstur Þórhallsson eru sigurvegarar í A-flokki hins Nóa-Siríus mótsins firnasterka sem lauk á þriðjudagskvöldið í Stúkunni við Kópavogsvöll. Þröstur ætlaði sér greinilega sigur gegn Daða í úrslitaskák þeirra tveggja, mætti við alvæpni og brá bitru sverði á loft með óvæntum byrjunarleik. Daði, sem var með svart, lét þó engan bilbug á sér finna. Hann varðist fimlega að hætti Gunnars á Hlíðarenda þó að hann ætti í höggi við einn skæðasta sóknarskákmann landsins og hélt ró þegar mest lá við. Þegar jafntefli var samið var Daði líklega kominn með ögn vænlegra tafl en jafnteflisboð Þrastar kom á réttu andartaki. Með jafntefli þessu tryggðu þeir félagar sér sigur á mótinu með 5 vinningum hvor í sex umferðum. Glæsilega gert hjá þeim báðum. Þó að Daði sæti yfir í einni umferðinni, reyndist hann hærri í stigaútreikningi. Flestir skákmenn vita hvers Daði er megnugur en fáir áttu þó von á slíkri frammistöðu. Meðalstig andstæðinga Daða voru 2.432 og árangur hans mælist 2.798 stig sem er með því allra hæsta sem sést hefur hér á landi á síðustu árum. Þröstur getur einnig vel við unað. Hann tefldi af feiknarlegu öryggi og leyfði einungis tvö jafntefli, hið fyrra við Lenku í annarri umferð, hið seinna gegn Daða í þeirri síðustu, eins og áður sagði. 

Á næst efsta borði gerðu lagasnillingarnir Jóhann Hjartarson og Björgvin Jónsson jafntefli í skák sem tefld var í botn. Jóhann virtist jafna taflið með svörtu eftir byrjunina og jafnvel fá aðeins betri stöðu í miðtaflinu. Björgvin tefldi hins vegar vel og undir lokin hafði hann peði meira í hróksendatafli en Jóhann var ekki í vandræðum með að halda jöfnu með virkjum kóngi á miðju borði. Björgvin átti ágætt mót, taplaus en gerði jafntefli í fjórum skákum. Jóhann Hjartarson, sem er ríkjandi Íslandsmeistari í kappskák og raunar hraðskák líka, tapaði fyrir Benedikt Jónassyni í fjórðu umferð og missti þar með möguleika á toppsæti. Benedikt fór á kostum í mótinu og það er alltaf gaman að fylgjast með Jóhanni enda sá stórmeistari okkar, auk Friðriks, sem náð hefur lengst á svarthvítu reitunum. Jóhann teflir ávallt ótrauður til sigurs og viðureignir hans einkennast af leikgleði og lítilli lognmollu - baráttu frá upphafi til enda.   

Guðmundur Kjartansson sigraði Helga Áss Grétarsson í baráttuskák. Upp kom peðaendatafl þar sem báðir náðu að vekja upp drottningu, Guðmundur þó fyrr og það gerði gæfumuninn eftir að Helga hafði orðið á örlítil ónákvæmni. Mikill fengur að fá Helga að skákborðinu í þessu sterka móti og Guðmundur sýndi  og sannaði enn hve þolgóður hann er þegar líða tekur á skákirnar, enda innbyrti hann flesta sína vinninga í endatöflum. 

Skák Jóns Viktor Gunnarssonar og Björns Þorfinnssonar var flókin og tvísýn. Jón Viktor fórnaði að lokum manni og náði að leggja stjörnublaðamanninn og félaga sinn hjá TR að velli í tímahraki hins síðarnefnda.

 

Þá lauk Þorsteinn Þorsteinsson ágætu móti með því að gera jafntefli með hvítu við stórmeistarann Jón L. Árnason í 32 leikjum.  Skákin einkenndist af átökum um frumkvæðið en jafnvægið var þó ætið innan seilingar. Jón hrifsaði þó til sín peð í drottningarendatafli sem gerði það að verkum að Þorsteinn sá þann kost vænstan að þráskáka. Þorsteinn fór taplaus í gegnum mótið en var lengi í gang. Jón L. var einnig greinilega að komast í gamalkunnan gír eftir brösuga byrjun.

Benedikt Jónasson sneri skemmtilega á Vigni Vatnar Stefánsson og Magnús Örn Úlfarsson tefldi vel gegn Halldóri Grétari Einarssyni og hafði sigur með laglegri mannsfórn: 

Hvítt: Magnús Örn Úlfarsson

Svart: Halldór Grétar Einarsson

Svartur lék síðast 13...Bd7-e6?

13...Hd8 hefði verið svarað með 14.e6! Bxe6 15.Bxc6+ bxc6 16.Rc7+ Kf8 17.Dxd8mát

Skást var 13. – e6 eins og Sigurður Daði lék með góðum árangri í Danaveldi árið 2005.

Hvítur fær þó góð færi fyrir peðið á e5 sem tapast ef hann teflir rétt!

14.Rxe7!

Nú er 14. – Kxe7 svarað með 15.Dd6+ Ke8 16.Bxc6+ bxc6 17.Dxc6+ Ke7 18.Dd6+ Ke8 19.Bg5! og svartur er niðurbrotinn!

14...b5 15.Rxc6 Dxa4 16.Dd2! og hvítur vann 

Önnur úrslit umferðarinnar má sjá á Chess-Results. 

Það var einstakur heiður að fá að hafa Friðrik Ólafsson meðal keppenda. Þó svo að þessi ljúfi baráttumaður sé kominn af léttasta skeiði, á hann enn létt með að stunda þessa göfugu hugarlist. Hann sér flestum lengra og ánægjan skín úr augunum þó svo að úthaldið sé kannski minna en það forðum var. 

Þá var sérstaklega gaman að laða aftur að skákborðinu gamla meistara á borð við Jón Hálfdánarson og Björn Halldórsson. Það brá fyrir gömlum töktum hjá hvorumtveggja og þó svo að stríðsgæfan hafi kannski ekki fallið þeim í skaut í stöku umferð, er ljóst að báðir eiga fullt erindi í svona sterkt mót, þrátt fyrir áratuga langa fjarveru frá kappsskák. Er það von mótshaldara að þeir færist í aukana á hvítum reitum og svörtum í kjölfar mótsins. 

Lokastaðan í A-flokki:

Daði Ómarsson og Þröstur Þórhallsson urðu jafnir og efstir með 5 vinninga. Í þriðja til fjórða sæti komu TR-ingarnir Guðmundur Kjartansson og Jón Viktor Gunnarsson sem áttu báðir gott mót. Guðmundur, sem er nýbakaður Skákmeistari Reykjavíkur, er greinilega í mjög góðu formi um þessar mundir. Hann tapaði í næstsíðustu umferð fyrir Daða en náði öðru sæti með sigri á Helga Áss Grétarssyni í síðustu umferð. Jón Viktor tók yfirsetu í fyrstu tveimur umferðunum en hlaut þrjá og hálfan vinning úr fjórum tefldum skákum. Sannarlega góður árangur og ljóst að hann hefði mætt Daða ef sjöundu umferð hefði verið til að dreifa. 

Lokastöðu má sjá á Chess-Results. 

B-flokkur

Lokaumferðin í B-flokki var æsispennandi. Svo fór að lokum að félagarnir úr Fjölni, Hörður Aron Hauksson og Jón Trausti Harðarson urðu eftir og jafnir með 5 vinninga hvor en fast á hæla þeirra í 3. sæti kom Stephan Briem með 4,5 vinninga. Þessir þrír unnu sér þátttökurétt í A flokki að ári. 

Úrslit umferðarinnar má finna á Chess-Results. 

Lokastöðuna má finna einnig á Chess-Results. 

Niðurlag

Aðstandendur mótsins, Skákfélagið Huginn og Skákdeild Breiðabliks, þakka boðsgestum þátttökuna, ljúfa samveru og snjöll tilþrif. Eins og þátttökulistinn ber með sér, er greinileg spurn eftir móti sem þessu, móti sem hefur verið þróað frá upphafi og lagað að óskum skákmannanna sjálfra. Skákstjóri var Vigfús Vigfússon sem stjórnaði af sinni alkunnu alúð og vandvirkni og á hann miklar þakkir skildar fyrir gott starf.