Íslandsmót barnaskólasveita fer fram á laugardaginn

Íslandsmót barnaskólasveita 1.-3. bekk 2017 fer fram í skákhöll Taflfélags Reykjavíkur, Faxafeni 12, laugardaginn 25. febrúar nk. 

Tefldar verða sjö umferðir eftir svissneska kerfinu. Umhugsunartími 8+2 á hvern keppenda. Mótið hefst kl. 14 og áætlað er að því ljúki með verðlaunaafhendingu um kl 17:00.

Hver skóli getur sent fleiri en eina sveit - en hver sveit er skipuð fjórum nemendum 1.-3. bekkjar (auk allt að fjögurra varamanna)

Þátttökugjöld kr. 7.500.- á sveit. Þó ekki hærri en kr. 15.000.- fyrir hvern skóla.

Veitt verða verðlaun fyrir efstu þrjár sveitirnar og einnig efstu b-e sveitir.

Einnig borðaverðlaun fyrir bestan árangur á 1.-4. borði. 

Skráning fer fram á Skák.is (guli kassinn efst). Skrá þarf sveitir í síðasta lagi 23. febrúar.

Upplýsingar um þegar skráðar sveitir má finna hér. 

HM kvenna: Og þá eru eftir átta

Þriðju umferð (16 manna úrslitum) Heimsmeistaramóts kvenna lauk í gær í Teheran. Átta skákkonur eru nú eftir. 

Úrslit 3. umferðar urðu sem hér segir:

• Wenjun Ju (2583) - Olga Girya (2458) 3½-2½
• Zhogyi Tan (2502) - Radmini Rout (2387) 3½-2½
• Harika Dronavalli (2539) - Sopiko Guramshili (2370) 3½-2½
• Nana Dzagnidze (2525) - Yang Shen (2479) 1-0
• Anna Muychuk (2558) - Le Thao Ngyyen Pha (2354) 2-0
• Antoneta Stefanova (2512) Nono Khurtsidze (2383) 1½-½
• Alexander Kosteniuk (2549) - Pia Cramling (2454) 4-2
• Shiqun Ni (2399) - Natalija Pogonia (2487) 1½-½

Frammistða Ni vekur athygli en hún var aðeins nr. 38 í stigaröð keppenda fyrir mót. Allar hinar sjö voru meðal níu stigahæsta keppendanna.

Fjórða umferð hefst kl. 11:30. Þar mætast:

Ju Wenjun		Tan Zhongyi
Harika Dronavalli		Dzagnidze, Nana
Muzychuk Anna		Stefanova Antoaneta
Kosteniuk Alexandra		Ni Shiqun

Nánar á Chess24.

• Heimasíða mótsins
• Beinar útsendinar

Skákmót öðlinga hefst á miðvikudaginn

Skákmót öðlinga 40 ára og eldri hefst miðvikudaginn 22. febrúar kl. 19.30 í félagsheimili T.R. að Faxafeni 12. Tefldar verða 7 umferðir eftir svissneska-kerfinu og er umhugsunartíminn 90 mínútur á alla skákina  auk 30 sekúndna viðbótartími á hvern leik. Núverandi Skákmeistari öðlinga er Stefán Arnalds.

Mótið verður jafnframt Íslandsmót 50 ára og eldri þar sem efsti keppandinn í hópi þeirra sem fæddir eru 1967 og fyrr hlýtur Íslandsmeistaratitilinn. Sigurvegari mótsins hlýtur titilinn Skákmeistari öðlinga. Verði keppendur jafnir að vinningum mun stigaútreikningur (tiebreaks) skera úr um lokaröð og þar með verðlaun.

Athugið að lokaumferð mótsins fer fram föstudaginn 31. mars.

Dagskrá:
1. umferð miðvikudag 22. febrúar kl. 19.30
2. umferð miðvikudag 1. mars kl. 19.30
3. umferð miðvikudag 8. mars kl. 19.30
4. umferð miðvikudag 15. mars kl. 19.30
5. umferð miðvikudag 22. mars kl. 19.30
6. umferð miðvikudag 29. mars kl. 19.30
7. umferð föstudag 31. mars kl. 19.30

Tvær yfirsetur (bye) eru leyfðar í umferðum 1-5 og fæst 1/2 vinningur fyrir hvora yfirsetu. Láta skal skákstjóra vita um yfirsetu fyrir lok umferðarinnar á undan.

Hraðskákmót öðlinga fer fram miðvikudaginn 12. apríl kl. 19:30 og að því loknu fer þar fram verðlaunaafhending fyrir bæði mót. Keppt er um veglegan farandbikar, en auk hans eru verðlaun fyrir þrjú efstu sætin, bæði í aðalmótinu og hraðskákmótinu.

Tímamörk
90 mín + 30 sek viðbót eftir hvern leik

Verðlaun
1. sæti kr. 40.000
2. sæti kr. 20.000
3. sæti kr. 10.000

Þátttökugjald (greiðist með reiðufé við upphaf móts)

kr. 5.000 – Innifalið er frítt kaffi allt mótið ásamt rjómavöfflum og öðru góðgæti á lokakvöldi

Skákstjórn

Þórir Benediktsson; [e-mail], s. 867 3109

Skráningarform

Skráðir keppendur

Oliver og Róbert í verðlaunasætum - silfur í landskeppninni

Það gekk ekki jafn vel í lokaumferðinni á NM í skólaskák og þeirri næstsíðustu og lukkan ekki í liði með íslensku krökkunum. Tveir íslenskir keppendur kræktu sér í verðlaunapening. Annars vegar var það Oliver Aron Jóhannesson sem varð annar í a-flokki og hins vegar var það Rólbert Luu sem krækti sér í brons í d-flokki. Íslensku krakkarnir urðu í öðru sæti í landskeppninni á eftir gestgjöfum Norðmanna. 

Myndum frá verðlaunaafhendingunni verður bætt við þegar þeir berast. 

Landskeppnin:

1. Noregur 35,5 v.
2. Ísland 33 v.
3. Finnland 32,5 v.
4. Svíþjóð 31 v.
5. Danmörk 30 v.
6. Færeyjar 18 v.

A-flokkur (1997-99)

Oliver Aron Jóhannesson gerði jafntefli en Dagur Ragnarsson tapaði. Oliver varð í öðru sæti með 4 vinninga. Dagur varð fjórði með 3,5 vinning. Tapaði bronsinu naumlega eftir þrefaldan stigaútreikning.

B-flokkur (2000-01)

Bárður Örn Birkisson vann í lokaumferðinni en Hilmir Freyr Heimisson tapaði. Bárður hlaut 3,5 vinninga og varð fimmti. Hilmir hlaut 3 vinninga og varð áttundi. 

C-flokkur (2002-03)

Vignir Vatnar Stefánsson og Nansý Davíðsdóttir unnu bæði. Vignir hlaut 3,5 vinninga og varð sjöundi. Nansý hlaut 2,5 vinning og varð í níunda sæti. 

D-flokkur (2004-05)

Róbert Luu gerði jafntefli í lokaumferðinni en Óskar Víkingur Davíðsson tapaði. Róbert hlaut 4 vinninga og varð þriðji. Var taplaus á mótinu. Óskar hlaut 3,5 vinninga og varð fimmti. 

E-flokkur (2006-)

Gunnar Erik Guðmundsson og Stefán Orri Davíðsson töpuðu báðir. Gunnar Erik hlaut 3 vinninga og Stefán Orri hlaut 2,5 vinninga.

Fjórir íslensku krakkanna hækka á stigum. Gunnar Erik mest allra eða um 57 stig. Róbert hækkar um 52 stig, Nansý um 23 stig og Oliver um 10 stig. 

 

• Heimasíða mótsins
• Beinar útsendingar
• Úrslitaþjónusta

Meistaramót Vinaskákfélagsins 2017

Meistaramót Vinaskákfélagsins í atskák verður haldið 23 febrúar, 9 mars og 16 mars. Ákveðið er að hafa skákmótið á 3 stöðum ef húsrúm leyfir. Þetta verður árlegt skákmót. 

• 23. febrúar verður það haldið í Vin Hverfisgötu 47.
• 9. mars verður það í Hlutverkasetrið Borgartúni 1.
• 16. mars verður það annaðhvort í Vin eða í Skáksambandinu / Skákskólanum í Faxafeni. Keppendum verður tilkynnt um það síðar. 

Skákmótið verður 8 umferðir. 3 skákir á kvöldi, nema síðasta kvöldið þá verða tefldar 2 skákir og verðlaunaafhending að þeim loknum.

Þetta verður opið skákmót fyrir alla.

Tímamörkin eru  15 mín. + 10 sek. uppbótartími á leik.

Mótið er reiknað til atskákstiga. Mótið hefst kl. 19:30. 

Verðlaun:

1. sætið eignarbikar + gullpeningur. Einnig verðum við með farandbikar en þetta skákmót verður síðan árlegt.
2. sætið silfurpeningur.
3. sætið bronzepeningur.
4. Einnig ætlar einn félagi í Vinaskákfélaginu að gefa andlitsteikningar af frægum skákmönnum. 

Veitingar: Kaffi og kökur verða á skákstað. 

Þátttökugjald á mótið er að félagsmenn greiði 500 kr., en 2.000 kr. fyrir aðra.

Ath. að Hollvinir Vinaskákfélagsins fá frítt á skákmótið.

Þið getið skráð ykkur á mótið á gula kassanum efst á síðunni á skak.is.

Skákþing Akureyrar: Þrenningin blífur!

Það fór eins og marga grunaði - þeir Andri, Jón Kristinn og Tómas sitja saman á toppnum eftir lokaumferð Skákþings Akureyrar nú í dag. Allir unnu þeir sínar skákir og halda því efsta sætinu með sex vinninga af sjö mögulegum. Úrslitin í lokaumferðinni: 

• Alex-Jón           0-1
• Sveinbjörn-Tómas   0-1
• Gabríel-Andri      0-1
• Ulker-Karl         0-1
• Fannar-Hreinn      0-1
• Heiðar-Ágúst       1-0

Lokastaðan er þá þessi:

1-3. Andri, Jón Kristinn og Tómas 6; 4-5. Karl og Hreinn 4; 6-7. Alex og Haraldur 3,5;  8-11. Gabríel, Heiðar, Sveinbjörn og Ulker 3, 12-13. Ágúst og Fannar 2. 

Nú verður blásið til úrslitakeppni um titilinn "Skákmeistari Akureyrar 2017". Þar mun þeir þremenningar tefla einfalda umferð sín á milli. Ef það nægir ekki til að útkljá málið verður teflt áfram með styttri umhugsunartíma; fyrst í atskákum og ef það dugar ekki verður tíminn styttur enn frekar. Nánar um það síðar.  

 

• Heimasíða SA
• Chess-Results

Barna- og unglingameistaramót Reykjavíkur verður haldið sunnudaginn 26.febrúar

Barna- og unglingameistaramót Reykjavíkur, sem jafnframt er Stúlknameistaramót Reykjavíkur, fer fram sunnudaginn 26. febrúar í félagsheimili T.R. að Faxafeni 12. Taflið hefst kl.13 og stendur til ca. kl. 17. Tefldar verða 7 umferðir eftir svissnesku kerfi með umhugsunartímanum 10 mínútur á skák, auk þess sem 5 sekúndur bætast við eftir hvern leik (10+5).

Mótið verður reiknað til alþjóðlegra atskákstiga.

Mótið er opið öllum börnum og unglingum, óháð taflfélagi eða búsetu, sem eru fædd árið 2001 eða síðar. Teflt verður í tveimur flokkum: opnum flokki og stúlknaflokki.

Verðlaun verða veitt fyrir þrjú efstu sætin í mótinu. Nafnbótina Unglingameistari Reykjavíkur 2017 hlýtur sá keppandi sem verður hlutskarpastur þeirra sem hafa lögheimili í Reykjavík eða eru meðlimir í reykvísku taflfélagi. Einnig verða veitt verðlaun fyrir þrjár efstu stúlkurnar. Nafnbótina Stúlknameistari Reykjavíkur 2017 hlýtur sú stúlka sem verður hlutskörpust þeirra stúlkna sem hafa lögheimili í Reykjavík eða eru meðlimir í reykvísku taflfélagi.

Til viðbótar verða veitt verðlaun fyrir efsta sætið í árgöngum 2001-2002, 2003-2004, 2005-2006, 2007-2008 sem og 2009 og yngri í báðum flokkum (opna flokknum og stúlknaflokknum).

Núverandi Reykjavíkurmeistarar eru Bárður Örn Birkisson og Esther Lind.

Skákmótið hefst kl. 13 og er aðgangur ókeypis. Skráning í mótið fer fram rafrænt og má nálgast skráningarformið hér. Einnig má finna skráningarformið í gula kassanum á skak.is. Upplýsingar um þegar skráða keppendur má nálgast hér.

NM í skólaskák: Íslendingar efstir í landskeppninni fyrir lokaumferðina

Það gekk afar vel hjá íslensku keppendum í fimmtu og næstsíðustu umferð NM í skólaskák sem er nú nýlokið. Íslensku skákmennirnir hlutu 7,5 vinning í 10 skákum. Sex skákir unnust, þrjár fóru jafntefli og aðeins ein skák tapaðist. Ísland hefur 29 vinninga. Norðmenn eru í öðru sæti með 27,5 vinning. Danir sem voru efstir fyrir umferðina áttu hræðilega umferð - fengu 2 vinninga og duttu niður í fimmta sæti. 

Dagur Ragnarsson og Oliver Aron Jóhannesson eru í toppbaráttunni í a-flokki og Róbert Luu og Óskar Víkingur Davíðsson í d-flokki. Lokaumferðin hefst kl. 13. 

Landskeppnin:

1. Ísland 29 v.
2. Noregur 27,5 v.
3.-4. Finnland og Svíþjóð 26 v.
5. Danmörk 25,5 v.
6. Færeyjar

A-flokkur (1997-99)

Dagur Ragnarsson vann glæsilegan sigur. Fórnaði drottningunni fyrir hrók og mann og nýtti sér stöðuyfirburði til sigurs á afar laglegan hátt. Oliver Aron Jóhannesson gerðu jafntefli. Þeir félagarnir eru í 2.-3. sæti með 3,5 vinninga.

B-flokkur (2000-01)

Hilmir Freyr Heimisson og Bárður Örn Birkisson unnu báðir. Hilmir Freyr hefur 3 vinninga og er í 3.-7. sæti. Bárður Örn hefur 2,5 vinninga. 

C-flokkur (2002-03)

Vignir Vatnar Stefánsson vann en Nansý Davíðsdóttir tapaði. Vignir hefur 2,5 vinninga en Nansý hefur 1,5 vinninga. 

D-flokkur (2004-05)

Óskar Víkingur Davíðsson og Róbert Luu gerðu jafntefli í innbyrðis skák. Þeir félagarnir hafa 3,5 vinning og eru í 2.-4. sæti. 

E-flokkur (2006-)

Gunnar Erik Guðmundsson og Stefán Orri Davíðsson unnu báðir. Gunnar hefur 3 vinninga og er í 3.-5. sæti og Stefán hefur 2,5 vinning.

Eins og áður sagði hefst lokaumferðin kl. 13. Áfram Ísland!

Fylgjast má með mótinu á heimasíðu mótsins auk þess sem Skák.is mun fylgjast vel með gangi mála um helgina.

 

• Heimasíða mótsins
• Beinar útsendingar
• Úrslitaþjónusta

Spennandi Skákkeppni vinnustaða lokið með sigri Skákakademíu Reykjavíkur

Skákkeppni vinnustaða var haldin 16.febrúar og voru sjö skáksveitir mættar til leiks. Skákakademía Reykjavíkur fór þar fremst í flokki með vel lesna skákkennara innanborðs. Önnur lið sem tóku þátt í mótinu voru Landspítalinn, Verslunarskóli Íslands, Mannvit, Logos lögmenn, Icelandair og Isavia.

Skákakademían var í nokkrum sérflokki og lagði alla andstæðinga sína að velli, flesta þó með minnsta mun. Skákkennararnir nældu sér í 13,5 vinning í skákunum 18 og voru þremur vinningum á undan næstu sveit. Þetta var annar sigur Akademíunnar í röð en alls hefur Akademían unnið fjórum sinnum frá því mótið hóf göngu sína á ný, eftir nokkurt hlé, árið 2012. Lyfjarisinn Actavis vann hins vegar mótið í tvígang árin 2014-2015.

Keppnin um 2.sætið var æsispennandi og munaði aðeins 1,5 vinning á 2.sæti og 5.sæti. Sveit Landspítalans sem hafði á að skipa mjög jafnri sveit varð sjónarmun á undan keppinautum sínum og hlaut 10,5 vinning í 2.sæti. Þetta er þriðja árið í röð sem Landspítalinn hreppir silfurverðlaunin. Hálfum vinningi á eftir Landspítalanum kom sveit Icelandair og nægði það til bronsverðlauna. Verslunarskóli Íslands hlaut 9,5 vinning í 4.sæti og sveit Isavia lauk tafli í 5.sæti með 9 vinninga. Það merkilega við sæti Isavia var að sveitin vann fjórar viðureignir, einni fleiri en keppinautar þeirra í 2.-4.sæti. Allar viðureignirnar unnust hins vegar með minnsta mun og stórt 0-3 tap gegn Landspítalanum í 1.umferð gerði það að verkum að sveitin varð að gera sér 5.sætið að góðu. Mannvit endaði í 6.sæti með 5,5 vinning og Logos lögmenn ráku lestina með 5 vinninga.

Ólafur Ásgrímsson var skákstjóri mótsins og eru honum færðar góðar þakkir fyrir. Þá fær Myllan sérstakar þakkir fyrir að sjá keppendum fyrir veitingum.

Nánari upplýsingar um mótið má nálgast á Chess-Results.

Myndskreytt frásögn 

NM í skólaskák: Íslendingar í toppbaráttunni - mikil spenna í landskeppninni

Það er mikil spenna á Norðurlandamótinu í skólaskák sem nú er í gangi í Drammen í Noregi. Íslendum gengur sérstaklega vel í a- og d-flokkum þar sem íslensku keppendurnir eru í toppbaráttunni. Ísland er í 2.-3. sæti í landskeppninni en Danir eru efstir.

Landskeppnin:

1. Danmörk 23,5 v.
2.-3. Ísland og Noregur 21,5 v.
4. Finnland 21 v.
5. Svíþjóð 20,5 v.
6. Færeyjar 12,5 v.

A-flokkur (1997-99)

Oliver Aron Jóhannesson og Dagur Ragnarsson gerðu stutt jafntefli í innbyrðis viðureign í gær. Oliver hefur 3 vinninga og er 2. sæti og Dagur hefur 2,5 vinninga og er í 3.-4. sæti.

B-flokkur (2000-01)

Hilmir Freyr Heimisson og Bárður Örn Birkisson töpuðu báðir í gær. Hilmir hefur 2 vinninga og og Bárður hefur 1½ vinning. 

C-flokkur (2002-03)

Vignir Vatnar Stefánsson vann en Nansý Davíðsdóttir tapaði. Þau hafa bæði 1,5 vinninga.

D-flokkur (2004-05)

Óskar Víkingur Davíðsson og Róbert Luu unnu báðir. Þeir hafa báðir 3 vinninga og eru efstir ásamt þremur öðrum. Þeir mætast í fimmtu umferð og þar með hafa Íslendingar mæst í öllum flokkum. 

E-flokkur (2006-)

Stefán Orri Davíðsson vann en Gunnar Erik Guðmundsson tapaði. Gunnar Erik hefur 2 vinninga en Stefán Orri hefur 1,5 vinninga. 

Fimmta umferð hófst kl. 8. Nú þegar hafa Bárður Örn og Gunnar Erik unnið sínar skákir. 

Fylgjast má með mótinu á heimasíðu mótsins auk þess sem Skák.is mun fylgjast vel með gangi mála um helgina.

 

• Heimasíða mótsins
• Beinar útsendingar
• Úrslitaþjónusta