Rúmlega 60 grunnskólakrakkar á Miðgarðsmótinu 2017

B sveit Rimaskóla vann Miðgarðsmótið annað árið í röð þegar 10 skáksveitir grunnskólanna í Grafarvogi tókust á í 6 umferða skólaskákmóti. Miðgarðsmótið er sveitakeppni grunnskólanna í Grafarvogi, og var haldið í sal Rimaskóla. Að þessu sinni sendu fjórir grunnskólar af sex skáksveitir til leiks og þar af átti Rimaskóli 6 þeirra. Rimaskólasveitirnar stóðu sig mjög vel en fengu harða samkeppni frá skáksveitum Kelduskóla og Foldaskóla.

Eins og áður kom fram þá sigraði B sveit Rimaskóla mótið líkt og í fyrra eftir spennandi einvígi allt mótið við A sveit Rimaskóla. B sveitin hlaut 30,5 vinninga. Í skáksveitinni eru bekkjarbræðurnir Joshua, Hilmir, Arnór, Anton Breki, Kjartan Karl og Bjarki, allir í 6. bekk. A sveit Rimaskóla varð í 2. sæti með 30 vinninga en sveitina skipuðu Nansý, Kristófer Halldór, Hákon, Mikael Maron, Róbert Orri og Valgerður, allt nemendur í 7 - 10. bekk. Þessar tvær skáksveitir voru í nokkrum sérflokki. Í næstu sætum komu sveitir Kelduskóla 21,5, E sveit Rimaskóla 21,5 og C sveit Rimaskóla 18 vinninga. Þessar fimm skáksveitir fengu bíómiða í verðlaun frá Landsbanka Íslands. Miðgarður þjónustumiðstöð færði öllum þátttakendum veitingar í skákhléi og afhenti þremur efstu sveitunum verðlaunapeninga, gull, silfur og brons. Loks var Rimaskóla afhentur hinn glæsilegi farandbikar mótsins sem skólinn hefur varðveitt sl 11 ár eða allt frá því að Miðgarðsmótið var haldið í fyrsta sinn árið 2006. 

Skákstjórar voru þeir Þorvaldur Guðjónsson Miðgarði og Helgi Árnason frá skákdeild Fjölnis. Liðstjórar voru þeir Jón Trausti Harðarson, Björn Ívar Karlsson og Stefán Bergsson.  

Lokastaðan: 

1. Rimaskóli B       30, 5      vinninga
2. Rimaskóli A       30
3. Kelduskóli A      21,5
4. Rimaskóli E        21,5  (stúlknasveit)
5. Rimaskóli C        18
6. Rimaskóli D        17
7. Foldaskóli A       16,5
8. Foldaskóli B       10 
9. Húsaskóli A        10
10. Rimaskóli F          5    ( sveit 1. - 3. bekkjar)

 

Batel og Vignir Reykjavíkurmeistarar

Barna- og unglingameistaramót Reykjavíkur sem og Stúlkameistaramót Reykjavíkur fór fram í gær í skákhöll Taflfélags Reykjavíkur.

Einhverjir þurftu að hætta við þátttöku sökum slæmrar færðar, en mótið var þó ágætlega fjölmennt og vel skipað.

Í Stúlknameistaramóti Reykjavíkur tóku 10 stúlkur þátt. Þar stóð baráttan helst á milli Batel Goitom Haile og Freyju Birkisdóttur. Úrslitin réðust í innbyrðisviðureign þeirra, en þar sigraði Batel í sviptingarsamri skák. Batel varð því efst með fullt hús vinninga og er því Stúlknameistari Reykjavíkur 2017.  Freyja varð örugglega í öðru sæti; tapaði aðeins niður punkt gegn Batel. Batel (10 ára og yngri) og Freyja (12 ára og yngri) urðu vitaskuld hlutskarpastar í sínum aldursflokki. Í þriðja sæti varð svo Soffía Arndís Berndsen.

Úrslit má annars sjá hér.

Þátttakendur í Barna- og unglingameistaramóti Reykjavíkur voru 17. Þar stóð keppnin aðallega milli Stephans Briem og Vignis Vatnars Stefánssonar. Þeir félagar gerðu jafntefli í innbyrðisskák og unnu alla aðra og urðu því efstir og jafnir. Stephan varð hærri á stigum og fékk því verðlaun fyrir sigur í mótinu, en þar sem hann er ekki félagsmaður í reykvísku taflfélagi, né á lögheimili í Reykjavík, fékk Vignir Vatnar Stefánsson verðlaun og titil sem Unglingameistari Reykjavíkur 2017. Bróðurleg skipting verðlaunanna þar. Í þriðja sæti varð Örn Alexandersson.  Stephan (14 ára og yngri) og Örn (12 ára og yngri) fengu aldursflokkaverðlaun, eins og Karl Andersson Claesson (16 ára og yngri), Ingvar Wu Skarphéðinsson (10 ára og yngri) og Einar Dagur Brynjarsson (8 ára og yngri).

Úrslit má annars sjá hér.

Myndskreytt frásögn á heimasíðu TR.

Bræðurnir enduðu í 6. og 7. sæti

Bræðurnir Bragi (2453) og Björn Þorfinnssyni (2404) enduðu í 6. og 7. sæti á alþjóðlegu móti í Kragerø í Noregi. Báðir hlutu þeir 5,5 vinninga í 9 skákum. Þeir gerðu stutt jafntefli í lokaumferðinni en Lie-bræðurnir sem sem urðu í 1. og 2. sæti voru þeim erfiðir í næstsíðustu umferð. Bræðurnir áttu góðan miðkafla og vann Björn t.d. litháíska stórmeistarann Eduardas Rozentalis (2576).

Þeir hækka báðir lítilsháttar á stigum. Björn hækkar um 7 stig en Bragi hækkar um 1 stig. 

• Heimasíða mótsins
• Úrslitaþjónusta
• Beinar útsendingar (Chess24)

Íslandsmót skákfélaga hefst á fimmtudaginn

Seinni hluti Íslandsmóts skákfélaga 2016-2017 fer fram dagana 2..-4. mars nk.  Mótið fer fram í Rimaskóla, Reykjavík.  Keppnin hefst (eingöngu í 1.deild) kl. 19.30 fimmtudaginn 2. mars. Aðrar deildir munu hefja taflmennsku föstudaginn 3. mars  kl. 20.00 og síðan  laugardaginn 4. mars. kl. 11.00 og kl. 17.00 sama dag. 

Þau félög sem enn skulda þátttökugjöld þurfa að gera upp áður en seinni hlutinn hefst.

Heimasíða mótsins

Atkvöld hjá Hugin í kvöld

Atkvöld verður hjá Huginn mánudaginn 27. febrúar 2017 og hefst mótið kl. 20:00. Fyrst eru tefldar 3 hraðskákir þar sem hvor keppandi hefur 4 mínútur + 2 sekúndur á hvern leik. Síðan verða  þrjár atskákir með umhugsunartímanum tíu mínútur + 5 sekúndur á hvern leik. Teflt er í félagsheimili Hugins í Álfabakka 14a í Mjóddinni. Mótið verður reiknað til hraðskák- og atskákstiga.

Sigurvegarinn á atkvöldinu fær í verðlaun máltíð fyrir einn á Saffran eða pizzu frá Dominos. Einnig verður dreginn út af handahófi annar keppandi sem fær sama val. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Jón Kristinn Akureyrarmeistari annað árið í röð!

Í dramatískri úrslitakeppni sem lauk í dag með skák Andra Freys Björgvinssonar og Jóns Kristins Þorgeirssonar reyndist skákgyðjan á bandi meistara Jóns Kristins, sem núorðið vinnur flest mót hér norðan heiða. Andri Freyr varð nauðsynlega að vinna skák dagsins til þess að framlengja úrslitakeppnina um 87. Akureyrarmeistaratitilinn í skák. Í þríkeppninni um titilinn hafði hann tapað fyrir Tómasi Veigari Sigurðarsyni sem svo mátti lúta í gras fyrir Jóni Kristni. Þeim síðastnefnda nægði því jafntefli til að landa sigrinum og titlinum. Hann mátti þó hafa sig allan við í dag. Skák þeirra félaga varð snemma mjög flókin, Jón tímanaumur og lét af hendi skiptamun fyrir spil. Allt var í járnum lengi vel og vörn Andra erfið, en um leið blasti við að liðsmunurinn væri honum í vil ef honum tækist að hrinda sókninni. Líklega fékk hann tækifæri til þess, en missti af því og með laglegum hnykk náði Jón svo að snúa á hann. Lauk skákinni með laglegri fléttu þar sem lokastefið var s.k. fjölskylduskák; riddari gafflaði bæði drottningu og kóng. Við það réð Andri ekki og lagði upp vopnin. Þeir þrír röðuðu sér því í efstu sætin:

1. Jón Kristinn Þorgeirsson    6+2

2. Tómas Veigar Sigurðarson    6+1

3. Andri Freyr Björgvinsson    6+0

Arnar Smári og Fannar Breki skólaskákmeistarar Akureyrar

SPRETTSMÓTIÐ, sem er Skákþing Akureyrar í yngri flokkum og skólaskákmó Akureyrar, var háð í gær, laugardaginn 25. febrúar. 

Í skólaskákinni var keppt í tveimur flokkum, 1-7. bekk og 8-10. bekk.

Á Skákþinginu var keppt um meistaratitil í þremur aldursflokkum, barnaflokki (fædd 2006 og síðar); flokki 11-12 ára (fædd 2004 0g 2005) og flokki 13-15 ára (fædd 2001-2003).

Tefldar voru sjö umferðir og urðu heildarúrslit þessi:

• Arnar Smári Signýjarson, Giljaskóla               5,5  (Skólaskákmeistari í eldri flokki, Akureyrarmeistari í flokki 13-15 ára)
• Fannar Breki Kárason, Glerárskóla                 5,5  (Skólaskákmeistari í yngri flokki, Akureyrarmeistari í flokki 11-12 ára)
• Gabríel Freyr Björnsson, Brekkuskóla              5
• Ágúst Ívar Árnason, Lundarskóla                   5
• Davíð Þór Þorsteinsson, Síðuskóla                 5
• Ingólfur Árni Benediktsson, Naustaskóla           4  (Akureyrarmeistari í barnaflokki)
• Tumi Snær Sigurðsson, Brekkuskóla                 4
• Jökull Máni Kárason, Glerárskóla                  3,5
• Vignir Otri Elvarsson, Lundarskóla                3
• Daði Örn Gunnarsson, Síðuskóla                    3
• Vilhjálmur Svanberg Arngrímsson, Lundarskóla      3
• Hallfríður Anna Benediktsdóttir, Naustaskóla      3
• Sölvi Steinn Sveinsson, Naustaskóla               3
• Snæbjörn Þórðarson, Naustaskóla                   2,5
• Heiðar Snær Barkarson, Naustaskóla                1

 Davíð Þór varð annar í eldri flokki í skólaskák, Tumi Snær varð þriðji.

Þeir Gabríel Freyr og Ágúst Ívar urðu í 2-3. sæti í yngri flokki.

Þeir Arnar Smári og Fannar Breki munu svo tefla til úrslita um sigurinn á mótinu og tiltilinn „Skákmeistari Akureyrar í yngri flokkum 2017“ nk. þriðjudag, 28. febrúar.

Skákþing Norðlendinga

Skákþing Norðlendinga 2017 verður haldið 24.-26. mars, á Kaffi Krók, á Sauðárkróki. Mótið hefst kl. 20.00 á föstudagskvöldið 24. mars, en þá verða telfdar 4 umferðir af 25 mínútna atskákum.  5. umferð kl. 11.00 og 6 umferð kl. 17.00 laugardaginn 25. mars og 7. umferð kl. 11.00 sunnudaginn 26. mars, en þá verður umhugsunartíminn 90 mínútur á skákina +30 sek. á hvern leik.  Að 7. umf. lokinni verður Hraðskákmót Norðlendinga haldið og hefst kl. 14.30 eða síðar.  Skákmeistari Norðlendinga getur aðeins orðið sá sem á lögheimili á Norðurlandi, en mótið er öllum opið. Skákdómari verður Ingibjörg Edda Birgisdóttir.

Verðlaun eru sem hér segir 1. sæti 45.000 kr.  2. sæti 30.000  3. sæti 20.00  4. sæti 15.000 5. sæti 10.000  Aukaverðlaun fær efsti skákmaður með minna en 1800 stig, 10.000 kr..  Verði menn jafnir að vinningum skiftast verðlaun  jafnt milli þeirra.

Skráning á skák.is (skak.blog.is) og einnig er hægt að skrá sig á jhaym@simnet eða í síma 865 3827, þar sem nánari upplýsingar gæti líka verið mögulegt að fá. Upplýsingar um þegar skráða keppendur má finna hér.

Skákmót öðlinga hafið

Vel skipað Öðlingamót hófst síðastliðið miðvikudagskvöld en mótið er hið fjölmennasta síðan 2011. Alls eru þátttakendur 36 talsins og skipar enginn annar en Fide-meistarinn Ingvar Þór Jóhannesson (2377) toppsætið í stigaröð keppenda. Næst Ingvari kemur skákdrottningin og stórmeistari kvenna, Lenka Ptacnikova (2210), og þá koma fjórir skákmenn sem allir hafa meira en 2100 Elo-stig, þeirra stigahæstur Þorvarður Fannar Ólafsson (2188). Þess má til gamans geta að Þorvarður, eða Varði eins og menn þekkja hann, hefur tekið þátt í öllum Öðlingamótunum síðan hann varð gjaldgengur í þau fyrir fimm árum.

Alls verða tefldar sjö umferðir og er mótið að þessu sinni aukinheldur Íslandsmót skákmanna 50 ára og eldri. Því tengdu er vert að nefna að hinn þaulreyndi Gunnar K. Gunnarsson (2115) er á meðal þátttakenda. Gunnar, sem hefur Íslandsmeistaratitil í farteskinu, er á 84. aldursári og mun vafalítið gera harða atlögu að fyrrnefndum titli 50 ára og eldri. Gunnar er ekki eini keppandinn sem er á níræðisaldri því kollegi hans, Guðmundur Aronsson (1639), er fæddur á því herrans ári 1936. Það er virkilega ánægjulegt að sjá þessa höfðingja á meðal þátttakenda og enn og aftur kemur í ljós að skáklistina er hægt að stunda langt frameftir aldri.

Í fyrstu umferð sem fór fram téð miðvikudagskvöld litu strax dagsins (kvöldsins?) ljós athyglisverð úrslit. Á efsta borði gerði Kristján Halldórsson (1909) sér lítið fyrir og landaði jafntefli gegn Lenku og þá lagði Kjartan Ingvarsson (1817) Hrafn Loftsson (2166) með svörtu mönnunum. Óskar Long Einarsson (1671) byrjaði sömuleiðis vel með sigri á Haraldi Baldurssyni (1983) en öðrum viðureignum lauk með sigri þess stigahærri.

Önnur umferð fer fram næstkomandi miðvikudagskvöld og hefst klukkan 19.30. Þá mætast á efstu borðum Ingi Tandri Traustason (1926) og Þorvarður, Björgvin Víglundsson (2185) og Kristinn Jón Sævaldsson (1934), sem og Gunnar og Sverrir Unnarsson (1925). Áhorfendur eru hvattir til að mæta – ávallt heitt á könnunni. Úrslit, myndir og skákirnar úr mótinu má finna á heimasíðu TR  en það er Daði Ómarsson sem sér um innslátt skáka.

• Chess-Results

Barna- og unglingameistaramót Reykjavíkur verður haldið í dag

Barna- og unglingameistaramót Reykjavíkur, sem jafnframt er Stúlknameistaramót Reykjavíkur, fer fram sunnudaginn 26. febrúar í félagsheimili T.R. að Faxafeni 12. Taflið hefst kl.13 og stendur til ca. kl. 17. Tefldar verða 7 umferðir eftir svissnesku kerfi með umhugsunartímanum 10 mínútur á skák, auk þess sem 5 sekúndur bætast við eftir hvern leik (10+5).

Mótið verður reiknað til alþjóðlegra atskákstiga.

Mótið er opið öllum börnum og unglingum, óháð taflfélagi eða búsetu, sem eru fædd árið 2001 eða síðar. Teflt verður í tveimur flokkum: opnum flokki og stúlknaflokki.

Verðlaun verða veitt fyrir þrjú efstu sætin í mótinu. Nafnbótina Unglingameistari Reykjavíkur 2017 hlýtur sá keppandi sem verður hlutskarpastur þeirra sem hafa lögheimili í Reykjavík eða eru meðlimir í reykvísku taflfélagi. Einnig verða veitt verðlaun fyrir þrjár efstu stúlkurnar. Nafnbótina Stúlknameistari Reykjavíkur 2017 hlýtur sú stúlka sem verður hlutskörpust þeirra stúlkna sem hafa lögheimili í Reykjavík eða eru meðlimir í reykvísku taflfélagi.

Til viðbótar verða veitt verðlaun fyrir efsta sætið í árgöngum 2001-2002, 2003-2004, 2005-2006, 2007-2008 sem og 2009 og yngri í báðum flokkum (opna flokknum og stúlknaflokknum).

Núverandi Reykjavíkurmeistarar eru Bárður Örn Birkisson og Esther Lind.

Skákmótið hefst kl. 13 og er aðgangur ókeypis. Skráning í mótið fer fram rafrænt og má nálgast skráningarformið hér. Einnig má finna skráningarformið í gula kassanum á skak.is. Upplýsingar um þegar skráða keppendur má nálgast hér.