Páskaeggjafjörið er hafið hjá TR

Páskaeggjasyrpa Nóa Síríus og Taflfélags Reykjavíkur hófst síðastliðinn sunnudag og er óhætt að segja að kátt hafi verið í skákhöllinni. Hátt í 60 börn voru samankomin til þess að iðka skáklistina í von um að næla sér í nokkra vinninga og jafnvel eitt páskaegg að auki. Eins og gefur að skilja geta ekki allir hlotið verðlaun, en allir geta notið þess að glíma við skákgyðjuna í góðra vina hópi, ef hugurinn er þannig innstilltur. Mótshaldarar eru því fegnir að hafa ekki þurft að veita verðlaun fyrir afburða kátínu, brandarasmíðar, framúrskarandi söng eða snerpu í eltingaleik. Því erfitt hefði verið að skera úr um sigurvegara í þeim flokkum. Leikreglur skákmóta eru á hinn bóginn þeim kostum gæddar að auðvelt er að skera úr um sigurvegara; fjöldi vinninga er þægilegur mælikvarði að því leyti.

Í yngri flokki var mikil spenna á toppnum og margar stórskemmtilegar skákir tefldar. Líkt og gjarnan vill verða hjá yngstu iðkendunum þá skiptu skákirnar alloft um eigendur og stundum réðust úrslitin jafnvel á ólöglegum leik. Einn var sá skákmaður sem stóðst allar raunir og leysti öll verkefni sem fyrir hann voru lögð í skákunum sjö. Einar Tryggvi Petersen gerði sér lítið fyrir og vann allar sínar skákir í mótinu. Einar Tryggvi hefur verið iðinn við kolann að undanförnu og hafa skákþjálfarar TR tekið eftir stórstígum framförum hjá pilti. Í 2.sæti varð hinn reynslumikli Bjartur Þórisson með 5,5 vinning. Líkt og Einar Tryggvi þá hefur Bjartur verið sérlega duglegur að mæta á skákæfingar hjá TR undanfarin misseri. Þessir ungu og efnilegu piltar eru góður vitnisburður um að ástundun og framfarir haldast í hendur.

Fjórir upprennandi skákmeistarar röðuðu sér í þriðja sæti með 5 vinninga; Mikael Bjarki Hreiðarsson, Anna Katarina Thoroddsen, Jóhann Helgi Hreinsson og Soffía Berndsen. Í slíkum tilfellum er það tölvuforritið sem reiknar út hvaða skákmaður hafi orðið hlutskarpastur, byggt á andstæðingum hvers og eins. Mikael Bjarki hreppti 3.sætið að þessu sinni. Anna Katarina og Soffía Berndsen urðu efstar stúlkna í yngri flokki en Anna Katarina varð hærri á stigum.

Í eldri flokki var hörkukeppni um efstu sætin. Miklar sviptingar voru í skákum toppbaráttunnar er spennustigið náði hámarki undir lok mótsins. Í efstu sætin raðaði sér mikið keppnisfólk sem hefur sýnt stáltaugar í gegnum tíðina á mótum sem þessum. Svo fór að aðeins hálfur vinningur skildi að efstu tvö sætin. Hlutskarpastur varð Ísak Orri Karlsson með 6,5 vinning. Hann vann fyrstu fjórar skákir sínar en gerði svo jafntefli í 5.umferð gegn hinum síkáta Kristjáni Degi Jónssyni. Ísak Orri tryggði sér svo sigurinn í mótinu með því að vinna síðustu tvær skákir sínar. Í 2.sæti með 6 vinninga varð Batel Goitom Haile og vann hún alla andstæðinga sína að undanskyldum sigurvegaranum sem hún varð að játa sig sigraða gegn í 3.umferð. Í 3.-4.sæti urðu Gunnar Erik Guðmundsson og Karl Andersson Claesson, báðir með 5 vinninga. Gunnar Erik reyndist eilítið hærri á stigum og hreppti því 3.sætið. Batel varð efst stúlkna í eldri flokki, en næstar henni komu Freyja Birkisdóttir og Ásthildur Helgadóttir með 4,5 vinning.

Að loknu móti fór fram verðlaunaafhending og að henni lokinni var dregið í happdrætti. Það var mikil eftirvænting í salnum því happdrættisvinningurinn var bústið páskaegg númer sex frá Nóa Síríus. Sá heppni að þessu sinni var Arnar Páll Halldórsson. Sá lukkunnar pamfíll mun ekki þjást af súkkulaðiskorti um Páskana.

Nánari upplýsingar um úrslit og lokastöðu mótsins má nálgast á chess-results: Yngri flokkur – Eldri flokkur.

Mót númer tvö í Páskaeggjasyrpunni verður haldið næstkomandi sunnudag og fer skráning fram í skráningarformi sem nálgast má hér fyrir neðan. Einnig er hægt að finna skráningarblaðið í gula kassanum á skak.is. Mótið á sunnudag hefst klukkan 13.

Taflfélag Reykjavíkur þakkar öllum þeim börnum sem lögðu leið sína í Faxafenið og gerðu Páskaeggjaspyrpuna að þeirri skákveislu sem raunin varð. Sjáumst næsta sunnudag!

Myndskreytta frásögn má finna á heimasíðu TR.

Skráningarform

Undanrásir Reykjavík Open Barna-Blitz að hefjast

Eins og frá árinu 2009 stendur Skákakademía Reykjavíkur í samstarfi við taflfélög borgarinnar fyrir Reykjavík Open Barna-Blitz sem er hraðskákmót fyrir krakka í sjöunda bekk og yngri, það er fædd 2004 og síðar.

Taflfélag Reykjavíkur, Huginn, Skákdeild Fjölnis og Víkingaklúbburinn eru öll með undanrásir þar sem tvö sæti eru í boði í úrslitunum sem tefld verða sunnudaginn 23. apríl.

Tímasetningar undanrásanna liggja fyrir og eru eftirtaldar: 

Huginn: Mánudaginn 3. apríl í Mjóddinni, hefst 17:15.

Víkingaklúbburinn: Miðvikudaginn 5. apríl í Víkinni, 17:15. 

Skákdeild Fjölnis: Miðvikudaginn 5. apríl í Rimaskóla, hefst 16:30.

Taflfélag Reykjavíkur: Laugardaginn 8. apríl í Taflfélagi Reykjavíkur að Faxafeni 12, hefst 14:00.

 

Björgvin og Ingvar efstir á Öðlingamótinu – lokaumferð fer fram á föstudagskvöld

Það stefnir í æsispennandi lokaumferð í Skákmóti öðlinga en sjötta og næstsíðasta umferð fór fram í gærkveld. Það var hart barist og þrátt fyrir að helming tefldra skáka hafi lokið með jafntefli voru það síður en svo baráttulausar viðureignir. Ein af orrustunum sem lauk með skiptum hlut var bardagi Björgvins Víglundssonar (2185) og Þorvarðs F. Ólafssonar (2188) á efsta borði eftir mikla baráttu þar sem Þorvaður var orðinn knappur á tíma og staðan virtist frekar vera Björgvini í hag. Á sama tíma lagði Fide-meistarinn Ingvar Þór Jóhannesson (2377) Óskar Long Einarsson (1671) eftir mikinn svíðing í endatafli hvar hinn fyrrnefndi hafði yfir gríðarlega öflugu biskupapari að ráða gegn biskupi og riddara þess síðarnefnda. Peðsvinningur og útilokun hins hvíta riddara tryggði Ingvari sigur eftir laglega úrvinnslu.

Björgvin og Ingvar eru því efstir og jafnir með 5 vinninga og ljóst að úrslit ráðast ekki fyrr en í lokaumferðinni sem fer fram næstkomandi föstudagskvöld. Þorvarður er í 3.-4. sæti með 4,5 vinning ásamt Siguringa Sigurjónssyni (2021) sem lagði Gunnar K. Gunnarsson (2115) í fjörugri skák. Þrír keppendur koma næstir með 4 vinninga. Björgvin er enn efstur skákmanna 50 ára og eldri og stefnir allt í að hann tryggi sér Íslandsmeistaratitil þess aldurshóps. Í þeim hópi er Þór Valtýsson (1962) sá eini sem getur náð Björgvini að vinningum en þeir mætast einmitt í lokaumferðinni.

Rétt er að ítreka að lokaumferðin fer fram næstkomandi föstudagskvöld og hefst kl. 19.30. Búast má við rafmögnuðu andrúmslofti í Skákhöllinni enda sjálfur Öðlingameistaratitillinn í húfi ásamt Íslandsmeistaratitli 50 ára og eldri. Á efstu borðum mætast Siguringi og Ingvar, Þorvarður og Óskar, sem og Þór og Björgvin eins og áður kom fram.

• Chess-Results
• Skákirnar (pgn): 1 2 3 4 5 (6. umf væntanleg)

Áskorendaflokkur hefst á laugardaginn í Stúkunni

Áskorendaflokkur Íslandsmótsins í skák fer  1.-9. apríl nk. Teflt er í Breiðabliks-stúkunni í Kópavogi. Tefldar verða níu umferðir eftir svissneska kerfinu.

Verðlaun í áskorendaflokki eru sem hér segir: 

1. 75.000 kr.
2. 45.000 kr.
3. 30.000 kr. 

Verðlaun skiptast eftir Hort-kerfi séu menn efstir í verðlaunasætum í áskorendaflokki. Tvö efstu sætin gefa keppnisrétt í landsliðsflokki í ár sem fram fer á Hafnarfirði, 9.-20. maí nk.

Séu menn jafnir ræður stigaútreikningur.

Skráning

Þátttökugjöld eru 5.000 kr. Unglingar 15 ára og yngri (2000 og síðar) fá 50% afslátt. F3-félagar fá frítt í mótið.

Skráning fer fram á Skák.is (guli kassinn efst). Þátttökugjöld greiðist inn á reikning 101-26-12763, kt. 580269-5409 fyrir mót.

Upplýsingar um þegar skráða keppendur má finna hér.

Tímamörk

Áskorendaflokkur: 90 mínútur + 15 mínútur eftir 40 leiki. 30 sekúnda viðbótartími eftir hvern leik.

Dagskrá: 

1. umferð, laugardagurinn, 1. apríl, kl. 13:00
2. umferð, sunnudagurinn, 2. apríl, kl. 13:00
3. umferð, mánudagurinn, 3. apríl, kl. 18:30
4. umferð, þriðjudagurinn, 4. apríl, kl. 18:30
5. umferð, miðvikudagurinn, 5. apríl, kl. 18:30
6. umferð, fimmtudagurinn, 6. apríl, kl. 18:30
7. umferð, föstudagurinn, 7. apríl, kl. 18:30
8. umferð, laugardagurinn, 8. apríl, kl. 13:00
9. umferð, sunnudagurinn, 9. apríl, kl. 13:00

Jafnteflisreglur 

Takmarkanir eru settar á jafnteflisboð. Hún gengur út á það að ekki er heimilt að bjóða jafntefli fyrr en báðir keppendur hafa leikið 30 leiki. Á því má gera undantekningar sé þráteflt en þá verður að stöðva klukku, kalla á skákstjóra og koma með jafntefliskröfu. 

Yfirseta

Hægt er að taka tvær yfirsetur í umferðum 1-6 og fá fyrir hana hálfan vinning. Óska þarf eftir yfirsetunni með góðum fyrirvara og fylla út eyðublað þess efnis hjá skákstjóra.

Þegar skráðir keppendur

 

Varaforseti FIDE skrifar Kirsan - fram kemur að upptökur séu til af fundinum fræga

Á heimasíðu FIDE í dag er birt bréf Girogos Makropoulos, varaforseta FIDE og nú starfandi foreta (acting) til Kirsan Ilyumzhinov. Athygli vekur að svo virðist sem andstæðingar Kirsans stjórni alveg heimasíðu FIDE og einnig er áhugavert að Kirsan er ekki ávarpaður sem forseti FIDE.

Í bréfi Makropoulos kemur fram staðan nú sé sök Ilyumzhinovs sjálfs. Hann hafi aldrei verið hvattur til að segja af sér á stjórnarfundinum 26. mars sl. heldur hafi margoft sjálfur boðist til að hætta og hafi í lokin lýst því yfir að hann segði af sér og hafi svo endurtekið það tvisvar.

Einnig bendir Makro á að forsetinn hafi margoft á fundinum verið varaður við að nota stjórnarfundi FIDE til að leysa persónuleg mál. 

Að lokum bendir Makro að til séu upptökur af fundinum sem sanni að ásakanir Kirsan um valdarán eða kallað eftir afsögn sinni eiga sér enga stoð í raunveruleikanum. 

Bréfið í heild sinni má finna hér að neðan:

 

 

Páskaeggjamót Víkingaklúbbsins fer fram í dag

Páskaeggjamót Víkingaklúbbsins fyrir börn og unglinga verður haldið í Víkinni Víkingsheimilinu miðvikudaginn 29. mars. Tefldar verða 6. umferðir með 7 mínútna umhugsunartíma á mann og hefst mótið kl. 17.15. Allir krakkar eru velkomnir og keppt verður í einum flokki, en aukaverðlaun verða fyrir besta árangur í hverjum aldursflokki.

Allir fá páskaegg fyrir framistöðu sína og  þátttaka í mótinu er ókeypis.  Barna og unglingaæfingar Víkingaklúbbsins verða vikulega á miðvikudögum fram á sumar.

ATH:  Nauðsynlegt er að skrá sig (nafn og fæðingarár) til að tryggja þátttöku.  Skráning á mótið fer fram á ntefangið vikingaklubburinn(hjá)gmail.com og á Skák.is (guli kassinn efst).

Skráðir keppendur

Hörðuvallaskóli Íslandsmeistari grunnskólasveita

Íslandsmót grunnskólasveita fór fram síðustu helgina í Rimaskóla. Mótið var æsispennandi frá fyrstu umferðar til þeirrar síðustu. Fljótlega var ljóst að Hörðuvallaskóli og Laugalækjarskóli myndu berjast um titilinn. Fyrir lokaumferðina hafði Hörðuvallaskóli eins vinnings forskot á Laugalækjarskóla og mætust sveitirnar í lokaumferðinni. Þar höfðu kapparnir úr póstnúmeri 104 sigur 2½-1½ og þar með komu sveitirnar jafnar í mark. 

Sveitirnar tefldu til úrslita í gær. Tefld var tvöföld umferð og höfðu Hörðuvellingar betur í fyrri umferðinni 2½-1½. Strákarnir úr Laugadalnum svöruðu í sömu mynd og því þurfti að framlengja. Þar höfðu strákarnir úr Kópavogi betur 3-1 og Íslandsmeistaratitillinn því þeirra. Þeir vörðu því titilinn frá í fyrra. 

Báðar sveitirnar tefla fyrir Íslands hönd á Norðurlandamóti grunnskólasveita sem fram fer í haust á Íslandi.

Sveit Hörðuvallaskóla skipuðu:

1. Vignir Vatnar Stefánsson
2. Stephan Briem
3. Sverrir Hákonarson
4. Arnar Milutin Heiðarsson
5. Benedikt Briem

Liðsstjóri var Gunnar Finnsson

Lið Laugalækjarskóla skipuðu:

1. Aron Þór Mai
2. Alexander Oliver Mai
3. Jón Þór Lemery
4. Daníel Ernir Njarðarson
5. Jason Andri Gíslason

Liðsstjóri var Daði Ómarsson.

 

Rimaskóli varð í þriðja sæti.

 B-sveit Álfhólssóla varð efst b-sveita og c-sveit Rimaskóla varð efst c-sveita. 

Úrslitin á sjálfu mótinu má finna á Chess-Results.

Borðaverðlaunahafar urðu:

 

1. Vignir Vatnar Stefánsson (Hörðuvallaskóla) 9 af 9
2. Alexander Oliver Maí (Laugalækjarskóla) 9 af 9
3. Sverrir Hákonarson (Hörðuvallaskóla) 8,5 af 9
4. Arnór Gunnlaugsson (Rimaskóla) 7,5 af 9 

 

Pattstaða hjá FIDE

Peter Doggers hjá Chess.com birti í dag ítarlega fréttaskýringu um ástandið hjá FIDE. Eins og fram kom í frétt í gær á Skák.is birtist yfirlýsing þess efnis að Kirsan Ilyumzhinov hafi sagt af sér sem forseti FIDE.

Síðar sama dag neitaði Ilyumzhinov því og sagðist enn vera forseti FIDE. Hann hafi aldrei skrifað undir að hann hafi hætt. Í morgun birtist svar á heimasíðu FIDE undirrituð Nigel Freeman einum æðsta manni FIDE:

 

Dear Kirsan,

During the Presidential Board Meeting in Athens, you several times threatened to resign at and at the end of the meeting, three times you repeated: "I resign" before leaving the room.

At the request of board members, an Extraordinary Presidential Board meeting has been called on 10th April to discuss this issue.

 

Ilyumzhinov svaraði í dag og neitar því að hann hafi sagt af sér. Svo virðist allt hafi farið upp í loft á fundi meðal æðstu manna FIDE í Aþenu í fyrradag og forsetinn (fyrrverandi?) lýst því yfir að hann væri tilbúinn að hætta en ekki virðist sameiginlegur skilningur á því að hann hafi viljað hætta þá og þegar.

Síðar í dag hélt svo Kirsan blaðamannafund í Moskvu ásamt Andrei Filatov, forseta rússneska skáksambandsins og eins varaforseta FIDE sem virðist hans einasti stuðningsmaður meðal æðstu manna FIDE. 

Þar neitaði Kirsan því sem fyrr að hafa sagt af sér og tekur sérstaklega fram að hann hafi ekki skrifað undir neitt þess efnis.

Ástandið innan FIDE verður að teljast vægast sagt sérstakt. Erfitt er að sjá að hægt sé að ýta Kirsan úr embætti án þess að hann samþykki það. Það að hann hafi sagt á fundi að hann segi af sér (þótt það sé þrisvar sinnum) dugar vart eitt og sér neiti hann að staðfesta það. 

Í lögum FIDE segir:

Any elected or appointed official in FIDE can be removed from his position for cause. Cause is defined as being contrary to the spirit and text of the statutes and regulations of their office. The action must have the agreement of the Ethics Committee and requires a two third vote of the Executive Board or a majority in the General Assembly. (...)

Ef Kirsan hefur betur í þessari skák og heldur áfram er erfitt að sjá að hvernig aðrir æðstu yfirmenn FIDE eiga að geta haldið áfram störfum við þær aðstæður.

Þessi fréttaskýring Skák.is er að mestu byggð á ítarlegri fréttaskýringu Peter Doggers á Chess.com.

Björgvin efstur á Öðlingamótinu

 

Þegar tvær umferðir lifa af Skákmóti öðlinga er Björgvin Víglundsson (2185) einn efstur með 4,5 vinning en hann sigraði Siguringa Sigurjónsson (2021) í fimmtu umferð sem fór fram síðastliðið miðvikudagskvöld. Óskar Long Einarsson (1671), Ingvar Þór Jóhannesson (2377) og Þorvarður Fannar Ólafsson (2188) koma næstir með 4 vinninga. Óskar sigraði Lenku Ptacnikovu (2210) nokkuð óvænt með svörtu mönnunum, Ingvar Þór lagði Gunnar Kr. Gunnarsson (2115) og Þorvarður hafði betur gegn Vigfúsi Vigfússyni (1966). Öðlingamótið í ár er einnig Íslandsmót skákmanna 50 ára og eldri og er fyrrnefndur Björgvin efstur í baráttu þeirra en næstur honum með 3,5 vinning er Þór Valtýsson (1962).

Sjötta og næstsíðasta umferð fer fram næstkomandi miðvikudagskvöld en athygli er vakin á því að lokaumferðin fer fram næstkomandi föstudagskvöld, 31. mars. Báðar umferðir hefjast venju samkvæmt kl. 1930. Í næstsíðustu umferð mætast m.a. Björgvin og Þorvarður, Óskar og Ingvar, sem og Gunnar og Siguringi. Þá verður athyglisverður bardagi á fjórða borði þar sem reynsluboltarnir, Ögmundur Kristinsson (2015) og Þór leiða saman hesta sína.

Áhorfendur velkomnir – alltaf heitt á könnuni!

• Heimasíða TR
• Chess-Results
• Skákirnar (pgn): 1 2 3 4 5

 

Áskorendaflokkur hefst á laugardaginn í Stúkunni

Áskorendaflokkur Íslandsmótsins í skák fer  1.-9. apríl nk. Teflt er í Breiðabliks-stúkunni í Kópavogi. Tefldar verða níu umferðir eftir svissneska kerfinu.

Verðlaun í áskorendaflokki eru sem hér segir: 

1. 75.000 kr.
2. 45.000 kr.
3. 30.000 kr. 

Verðlaun skiptast eftir Hort-kerfi séu menn efstir í verðlaunasætum í áskorendaflokki. Tvö efstu sætin gefa keppnisrétt í landsliðsflokki í ár sem fram fer á Hafnarfirði, 9.-20. maí nk.

Séu menn jafnir ræður stigaútreikningur.

Skráning

Þátttökugjöld eru 5.000 kr. Unglingar 15 ára og yngri (2000 og síðar) fá 50% afslátt. F3-félagar fá frítt í mótið.

Skráning fer fram á Skák.is (guli kassinn efst). Þátttökugjöld greiðist inn á reikning 101-26-12763, kt. 580269-5409 fyrir mót.

Upplýsingar um þegar skráða keppendur má finna hér.

Tímamörk

Áskorendaflokkur: 90 mínútur + 15 mínútur eftir 40 leiki. 30 sekúnda viðbótartími eftir hvern leik.

Dagskrá: 

1. umferð, laugardagurinn, 1. apríl, kl. 13:00
2. umferð, sunnudagurinn, 2. apríl, kl. 13:00
3. umferð, mánudagurinn, 3. apríl, kl. 18:30
4. umferð, þriðjudagurinn, 4. apríl, kl. 18:30
5. umferð, miðvikudagurinn, 5. apríl, kl. 18:30
6. umferð, fimmtudagurinn, 6. apríl, kl. 18:30
7. umferð, föstudagurinn, 7. apríl, kl. 18:30
8. umferð, laugardagurinn, 8. apríl, kl. 13:00
9. umferð, sunnudagurinn, 9. apríl, kl. 13:00

Jafnteflisreglur 

Takmarkanir eru settar á jafnteflisboð. Hún gengur út á það að ekki er heimilt að bjóða jafntefli fyrr en báðir keppendur hafa leikið 30 leiki. Á því má gera undantekningar sé þráteflt en þá verður að stöðva klukku, kalla á skákstjóra og koma með jafntefliskröfu. 

Yfirseta

Hægt er að taka tvær yfirsetur í umferðum 1-6 og fá fyrir hana hálfan vinning. Óska þarf eftir yfirsetunni með góðum fyrirvara og fylla út eyðublað þess efnis hjá skákstjóra.

Þegar skráðir keppendur