NM - Pistill fyrstu umferðar

Þá er Norðurlandamótið barna- og unglinga 2011 hafið. Teflt er í húsnæði Oslóarskákklúbbsins sem er fallegt og snyrtilegt. Eini gallinn er kannski sá að þegar allur þessi fjöldi keppenda, liðstjórar og foreldrar eru saman komin í húsnæðinu þá er rýmið að skornum skammti.

Eins og vant er þá kláruðu keppendur í E- og D-flokki sínar skákir fyrst.  Spennustigið var kannski full mikið hjá okkar mönnum því Heimir Páll og Oliver léku snemma slæmum fingurbrjótum sem var sérstaklega sárt í tilviki Olivers því hann var kominn með talsvert betra tafl. Með því að sitja aðeins á puttunum þá hefðu þeir auðveldlega komið auga á mistökin. Oliver og Jón Kristinn áttu í höggi við tvo afar sterka Norðmenn sem eru langstigahæstu menn flokksins og þurfti norðlenska ljónið sömuleiðis að játa sig sigraðað eftir snarpa  baráttu.

Vignir Vatnar, sem er nýorðinn átta ára gamall, sigraði örugglega í sinni skák og notaði gaffla og leppanir listilega vel út um allt borð. Hann átti líklega móment dagsins þegar hann var búinn að plata mann af andstæðingi sínum. Forsagan var sú að um morguninn höfðu fararstjórarnir orð á því að andstæðingarnir gætu brúkað skrítin orð á borðvið „J´adoube“  og „remi“ þegar verið væri að laga mennina og bjóða jafntefli. Litli kútur var greinilega orðinn fullur sjálfstraust því hann pikkaði í fararstjórann sinn og spurði: „Björn, hvað segja þeir við mann þegar þeir gefast upp?“.

Í C-flokki tefldu Emil og Dagur við sterka andstæðinga.  Lengi vel leit út fyrir að Emil væri að valta yfir andstæðing sinn og Dagur var sömuleiðis búinn að plata þriðja stigahæsta manninn upp úr skónum! Andstæðingar þeirra börðust þó á hæl og hnakka og svo fór að lokum að Dagur tapaði niður unninni stöðu en Emil knésetti sinn andstæðing.

Í B-flokki uppskáru Íslendingar einnig einn vinning.  Örn Leó tefldi afar góða skák gegn dönskum andstæðingi sem er sá þriðji stigahæsti í flokknum. Hann vann peð og sveið hann svo hægt og rólega í endatafli þar til Daninn féll á tíma með tapað tafl. Mögulega átti sá danski betri möguleika til að verjast en ég verð að hrósa taflmennsku Arnar enda tefldi hann rúmlega 50 leiki alltaf með minna en mínútu á klukkunni. Nökkvi tefldi við næst stigahæsta keppendann, sem sigraði í C-flokki Norðurlandameistaramótsins árið 2008, og lenti í leiðindarbeyglu í kóngsindverskri vörn. Eyjamaðurinn knái náði því miður ekki að snúa sig út úr erfiðleikunum þrátt fyrir góða baráttu og var hann hundfúll út í sjálfan sig því hann vissi vel hvar hann hafði farið út af sporinu.

Í A-flokki fengum við 2 vinninga í hús eins og búist var við enda eru Hjörvar og Sverrir stigahæstu menn flokksins. Hjörvar vann sína skák af miklu öryggi og sömuleiðis Sverrir sem vann úr sinni stöðu á afar lærdómsríkan hátt.

Heilt yfir var uppskeran ágæt úr fyrstu umferð enda voru menn að tefla við mjög sterka andstæðinga í flestum flokkum.  Pörun næstu umferðar er kominn upp og hefst baráttan eftir rúmlega klukkustund.

Áðan buðu Norðmenn uppá forláta pizzuveislu hér í félagsheimilinu sem vakti mikla lukku hjá öllum (meira að segja fararstjóra í aðhaldi!) og til þess að hausinn á keppendum væri í lagi þá voru yngstu keppendurnir sendir út í göngutúra með aðstandendum sínum.

Meira síðar!

Björn Þorfinnsson

Jóhanna og Elsa efstar á hraðkvöldi

Jóhanna Björg Jóhannsdóttir og Elsa María Kristínardóttir urðu efstar og jafnar á jöfnu og spennandi hraðkvöldi Hellis sem fram fór 14. febrúar sl. Þær fengu báðar 5,5v en Jóhanna var úrskurðuð sigurvegari á stigum. Það hefur svo ekki gerst áður að konur skipi tvö efstu sætin á þessum æfingum þótt þær hafi vissulega áður sigrað. Næstir komu svo Páll Andrason og Dagur Kjartansson með 4,5v

Lokastaðan á hraðkvöldinu:

• 1.    Jóhanna Björg Jóhannsdóttir       5,5v   (28,5 stig)
• 2.    Elsa María Kristínardóttir              5,5v   (26)
• 3.    Páll Andrason                               4,5v    (23)
• 4.    Dagur Kjartansson                       4,5v    (22,5)
• 5.    Vigfús Ó. Vigfússon                      4v       (29,5)
• 6.    Jón Úlfljótsson                              4v      (29)
• 7.    Eiríkur Örn Brynjarsson                 4v      (28,5v)
• 8.    Oliver Aron Jóhannesson              4v       (28)
• 9.    Birkir Karl Sigurðsson                    4v       (23,5)
• 10.  Kristófer Jóel Jóhannesson           4v       (19,5)
• 11.  Bjarni Sæmundsson                      3v       (29)
• 12.  Finnur Kr. Finnsson                       3v       (22,5)
• 13.  Jón Trausti Harðarson                   3v       (19)
• 14.  Pétur Jóhannesson                       1,5v    (21)
• 15.  Ívar Örn Halldórsson                     1v       (21,5)
• 16.  Björgvin Kristbergsson                   0,5v    (20)

Skákþing Goðans hefst í kvöld

Skákþing Goðans 2011 fer fram helgina 18.-20. febrúar nk. í sal Framsýnar-stéttarfélags að Garðarsbraut 26 á Húsavík. Mótið er öllum opið.

Tefldar verða 7 umferðir eftir monrad-kerfi, 4 atskákir og 3 kappskákir.
Mótið verður reiknað til Íslenskra og fideskákstiga.                                 

Dagskrá:
Föstudagur   18 febrúar  kl 20:00  1-4 umferð.   (atskák 25 mín )
Laugardagur 19 febrúar  kl 10:00  5. umferð.     (90 mín +30 sek á leik)
Laugardagur 19 febrúar  kl 15:00  6. umferð.       -------------------
Sunnudagur  20 febrúar  kl 10:00  7. umferð.       -------------------
 
Verðlaun verða með hefðbundnu sniði. 3 efstu í fullorðins flokki og 3 efstu í 16 ára og yngri.
Farandbikar fyrir sigurvegarann.
 
Þátttökugjald er 2000 krónur fyrir fullorna og 1000 krónur fyrir 16 ára og yngri. 
Skráning í mótið fer fram á heimasíðu Goðans. Einnig er hægt að skrá sig til leiks í síma 464 3187 eða 821 3187.
Listi yfir skráða keppendur er hér.

Núverandi skákmeistari Goðans er Rúnar Ísleifsson.

Þetta verður 8. skákþing Goðans og lista yfir titilhafanna er hér fyrir neðan:

2004    Baldur Daníelsson.
2005    Ármann Olgeirsson
2006    Ármann Olgeirsson      
2007    Smári Sigurðsson        
2008    Smári Sigurðsson
2009    Benedikt Þorri Sigurjónsson
2010    Rúnar Ísleifsson 
2011       ? 

Heimasíða Goðans

Daði sigraði á fimmtudagsmóti TR

Daði Ómarsson  sigraði með fullu húsi á fimmtudagsmótinu í TR í gær.  Að öðru leyti var baráttan hörð um næstu sæti en þar urðu þeir Eiríkur (Kolbeinn þ.e.a.s.) og Birkir Karl hlutskarpastir eftir harða baráttu við Elsu Maríu, Jón og Eirík Örn. Skákstjóri var Eiríkur K. Björnsson.  Lokastaðan í gærkvöldi varð:

1   Daði Ómarsson                   7      

2   Eiríkur K. Björnsson            6  

3   Birkir Karl Sigurðsson          5     

4   Elsa María Kristínardóttir      4.5    

5-8  Jón Úlfljótsson                4      

     Eiríkur Örn Brynjarsson        4     

     Gauti Páll Jónsson             4       

     Tjörvi Schiöth                 4      

9-11  Jon Olav Fivelstad            3.5    

      Sigurjón Haraldsson           3.5    

      Guðmundur Gunnlaugsson        3.5    

12-14 Pétur Jóhannesson             3      

      Davíð Sigurðsson              3     

      Kjell Valerhaugen             3     

15-16 Óskar Long Einarsson          2   

      Björgvin Kristbergsson        2    

17    Eysteinn Högnason             1    

NM í skólaskák: Noregspistill nr. 1

Klukkan er 19.13 á staðartíma og undirritaður situr í setustofunni á farfuglaheimilinu Haraldsheim. Á meðan liggur hinn fararstjórinn, Stefán Bergsson, afvelta í kojunni sinni með svefngrímu yfir augunum og tappa í eyrunum.  Ætla ég á engan hátt að vega að brothættri karlmennsku hans með því að grínast með þá staðreynd að miðaldra flugfreyja hefði verið fullsæmd af aðförunum hans við að undirbúa þennan stutta blund.

Ferðalagið til Noregs gekk vel og einhvern veginn rötuðum við á gististaðinn þökk sé góðum leiðbeiningum frá mótshöldurum.  Farfuglaheimilið Haraldsheim er eins þægilegt og farfuglaheimili getur orðið.  Um er að ræða fjögurra til sex manna herbergi  þar sem gist er í kojum og deila menn hreinlætisaðstöðu með allri hæðinni.  Það sem bjargar hinsvegar öllu er að á hverri hæð eru þægilegar stofur þar sem hröð nettenging er í boði, poolborð, spil og sjónvarp.

Aðeins er yfir einu að kvarta  en það er sú staðreynd að það tekur 30 mín. að ferðast á skákstað. Fyrst 10 mín. strætóferð og svo 20 mín. ganga - í tveimur áföngum. Það er ansi mikill munur frá tæplega 1-2 mín. rölti frá hóteli á skákstað sem boðið var uppá í Svíþjóð í fyrra. Það lítur því allt út fyrir það að dagarnir verði ansi langir hér í Osló því krakkarnir tefla tvær skákir á dag og við munum væntanlega ekki hafa tíma til að koma upp á farfuglaheimilið milli umferða.

Helstu áföll dagsins tengjast verðlagi í Noregi. Tónninn var settur strax í byrjun þegar Stefán Már, faðir Vignis, keypti sér Pepsi -flösku á 600 kr. og skömmu síðar fjárfesti Stefán fararstjóri í 200 kr. banana! Tilraun til ráns ferðarinnar átti sér hinsvegar stað þegar hópurinn fór út að borða um miðjan daginn. Við fundum flottan veitingarstað sem bauð upp á pizzahlaðborð fyrir 2.000 kr. á mann sem var ansi vel sloppið. Reyndar heimtuðu sumir að fara á McDonalds við misjafnan fögnuð annarra, förum ekki nánar út það. Þegar  að menn ætluðu að kaupa sér kókglas með matnum þá kostaði það 1.000 kr! Varð þá skyndilega kúvending úr kókpöntunum yfir í vatnspantanir sem var svo sem ágætt frá manneldislegum sjónarmiðum.  Menn töldu sig þarna hafa fundið hvað fáránlegasta verðlagið en botninn sló úr þegar Siggi Emilspabbi tékkaði á ræktinni, langaði að rífa aðeins í lóð og negla sér á brettið, en menn þurfa víst að snara 4000 kr. fram til að leyfa sér smá sprikl!

Nú er fundi með öllum hópnum nýlokið og klukkan farin að ganga tíu. Á þessum fundi var farið yfir morgundaginn en 1. umferð hefst 11:00 að norskum tíma og leggur hópurinn af stað frá Haraldsheim 09:15 undir handleiðslu hinnar leyndardómsfullu Irisar Brecker en menn bíða í ofvæni eftir þeim kynnum. Menn eru núna margir hverjir farnir að náttbuxna sig í gang og taka til skrínukosts síns. Það var nefnilega ákveðið eftir ferðina á veitingastaðinn um miðjan daginn að hver myndi bjarga sér um kvöldið hvað varðar næringu. Menn keyptu hinn ýmsa skrínukost; flestir ávöxtuðu sig í gang, sumir tóku vel til sykursins en sérstaklega var tekið eftir skrínukosti Björns fararstjóra. Björn er í heilsuátaki miklu og samanstóð skrínukostur hans af bláberjasojamjólk, blóðappelsínum, vatni og melónum! Hitaeiningasnautt það.

Framundan er langur og strangur dagur með tveimur umferðum. Mikil spenna er í keppendum og sérstaklega þeim yngstu í E-flokknum sem hafa verið til mikils sóma og eru nú lagstir til hvíldar. Allir keppendur hafa reyndar verið til sóma sem og hagað sér vel sem er langt frá því sjálfsagt þegar um ræðir svo stóran hóp.  Eins og áður segir hefur ferðin gengið vel og er það ekki síst að þakka þeim foreldrum og ömmu sem eru með í för sem hjálpa til við að hafa stjórn á hlutunum og sínum krökkum.

Það er hugur í mönnum  og spenna fyrir morgundaginn. Meira síðar.

Stefán og Björn

Fulltrúar Íslands eru (stigaröð keppenda í sviga - 12 keppendur í hverjum flokki):

A-flokkur (18-20 ára):

• 1. Hjörvar Steinn Grétarsson (2460)
• 2. Sverrir Þorgeirsson (2330)

B-flokkur (16-17 ára):

• 9. Örn Leó Jóhannsson (1940)
• 10. Nökkvi Sverisson (1805)  

C-flokkur (14-15 ára):

• 9. Emil Sigurðarson (1720)
• 11. Dagur Kjartansson (1660)

D-flokkur (12-13 ára):

• 8. Jón Kristinn Þorgeirsson (1645)
• 9. Oliver Aron Jóhannesson (1545)

E-flokkur (11 ára og yngri):

• 7. Vignir Vatnar Stefánsson (1225)
• 8. Heimir Páll Ragnarsson (1200)

Heimasíða mótsins

Vinverjar lögðu Selfyssinga

Skákfélag Vinjar lagði Skákfélag Selfoss og nágrennis í viðureign félaganna sem fram fór í Vin í gær.  44-37.  Hinn hógværi formaður SSON bendir þó í það í afar skemmtilegri grein sinni á heimasíðu SSON að sigurinn sé Flóamanna, 73-72, samtals en Selfyssingar lögð Vinverja í viðureign félaganna í Selfossi fyrr í vetur.

Bestum árangri Skákfélags Vinjar náðu þeir Hrannar Jónsson og Hrafn Jökulsson með 7,5 vinninga og Björn Sölvi var síðan með 6 vinninga.

Bestum árangri gestanna náðu þeir Úlfhéðinn Sigurmundsson og Magnús Matthíasson með 7,5 vinninga, Ingimundur, bróðir Úlfhéðins, var síðan með 5,5 vinninga.

Bent er aftur á heimasíðu SSON þar sem m.a. má finna myndaalbúm frá mótinu.

Skákþing Íslands 2011 - Áskorendaflokkur

Stjórn Skáksambands Íslands hefur ákveðið að keppni í áskorendaflokki 2011 fari fram dagana 15.  - 24. apríl  n.k. . Mótið mun fara fram í Faxafeni 12, Reykjavík.   Efstu tvö sætin gefa föst sæti í Landsliðsflokki 2012.

Dagskrá:

• Föstudagur, 15. apríl, kl. 18.00, 1. umferð
• Laugardagur, 16. apríl, kl. 14.00, 2. umferð
• Sunnudagur, Frídagur
• Mánudagur, 18. apríl, kl. 18.00, 3. umferð
• Þriðjudagur, 19. apríl, kl. 18.00, 4. umferð
• Miðvikudagur, 20. apríl, kl. 18.00, 5. umferð
• Fimmtudagur, 21. apríl, Frídagur
• Föstudagur, 22. apríl, kl. 11.00, 6. umferð
• Föstudagur, 22. apríl, kl. 17.00, 7. umferð
• Laugardagur, 23. apríl, kl. 14.00, 8. umferð
• Sunnudagur, 24. apríl, kl. 14.00, 9. umferð

Umhugsunartími:

90 mín. + 30 sek. til að ljúka.

Verðlaun:  

• 1. 40.000.-
• 2. 25.000.-
• 3. 15.000.-

Aukaverðlaun:

• U-2000 stigum           8.000.-
• U-1600 stigum           8.000.-
• U-16 ára                    8.000.-
• Kvennaverðlaun         8.000.-
• Fl. stigalausra            8.000.-

Aukaverðlaun eru háð því að a.m.k. 5 keppendur séu í hverjum flokki og eingöngu er hægt að vinna til einna aukaverðlauna.  Reiknuð verða stig séu fleiri en einn í efsta sæti.  Stigaverðlaunin miðast við íslensk skákstig.

Þátttökugjöld:

• 18 ára og eldri            3.000.-
• 17 ára og yngri           2.000.-

Skráning:

Skráningu skal senda í tölvupósti á [e-mail] eða tilkynna í síma 568 9141 virka daga kl. 10-13 í síðasta lagi 11. apríl 2011.  Hægt verður að skrá sig beint á Skák.is þegar nær dregur móti.         

Fimmtudagsmót hjá TR í kvöld

Fimmtudagsmót T.R. fer að venju fram í kvöld og hefst kl. 19.30.  Tefldar verða 7 umferðir með 7 mínútna umhugsunartíma.

Mótin fara fram í félagsheimili T.R., skákhöllinni að Faxafeni 12, og opnar húsið kl. 19.10.  Glæsilegur verðlaunapeningur er í boði fyrir sigurvegarann.

Mótin eru öllum opin og er aðgangseyrir kr. 500 fyrir 16 ára og eldri en frítt er fyrir 15 ára og yngri.  Boðið er upp á kaffi ásamt léttum veitingum án endurgjalds.

• Fimmtudagsmótin

Metþátttaka á MP Reykjavíkurskákmóti

Það stefnir í algjöra metþátttöku á MP Reykjavíkurskákmótinu, minningarmóti um Inga R. Jóhannsson, en nú þegar 3 vikur eru til móts eru 170 skákmenn skráðir til leiks.  Og fleiri met verða slegin, aldursmet, mesti fjöldi erlendra skákmanna og stórmeistara.  Og margir áhugaverðir keppendur eru með.  Yngsti stórmeistari heims, náfrændi eins þekktasta fótboltamanns heims, nokkrar af sterkustu skákkonum heims, og blindur skákmaður eru meðal keppenda.  Mótið er jafnframt Norðurlandamót í skák bæði í opnum flokki og kvennaflokki og á kvenkynið óvenju marga fulltrúa að þessu sinni.   

Stigahæstur keppenda er Úkraínumaðurinn Evgenij Miroshnichenko (2670).  Næstur í stigaröðinni er Luke McShane (2664), sem fékk flesta vinninga á London Chess Classic ásamt heimsmeistaranum Anand og stigahæsta skákmanni heims, Magnúsi Carlseni.  Þriðji í stigaröðinni er Ivan Sokolov (2657), sem var einn sigurvegara síðasta MP Reykjavíkurmóts. 

Meðal Norðurlandabúa má nefna, jafnaldra og félaga besta skákmanns heims, Magnúsar Carlsen, Jon Ludvig Hammer (2647)  Og að sjálfsögðu mætir heimavarnarliðið með stórmeistarana Hannes Hlífar Stefánsson, Héðin Steingrímsson og Henrik Danielsen fremsta í flokki.     

Stigahæsti skákmaður Afríku Ahmed Adly (2640) er einnig með.   Og ekki vantar goðsagnir en meðal keppenda er Lettinn Evgeny Sveshnikov (2521), sem kemur hingað ásamt syni sínum.

Sem fyrr má finna marga af yngstu og efnilegustu skákmönnum heims.   Yngsti stórmeistari heims í dag, Illya Nyzhnik (2530) mætir.   Það gerir einnig búlgarski alþjóðlegi meistarinn Kiprian Berbatov (2437) sem þykir mikið efni en hann tefldi með hinu sterka búlgarska Ólympíuliði í Síberíu síðasta haust.   

Og ekki má gleyma skákkonunum.  Ein stigahæsta skákkona heims, Harika Dronavalli (2520)  auðvitað kemur til leiks en meðal kvenna má nefna samlanda hennar Tania Sachdev (2391), frönsku skákkonuna Sophie Millet (2375) og sterkustu skákkonu Hvíta-Rússlands, Anna Sharevich (2332).  Sjá nýlegt viðtal við Önnu á ChessBase.

Og blindir eiga sinn fulltrúa í fyrsta skipti á Reykjavíkurskákmóti, því pólski alþjóðlega meistarinn Piotr Dukaczewski (2312) tekur þátt en hann er einn sterkasti blindi skákmaður heims.   

Af 170 skráðum keppendum koma 108 erlendis frá og eru samtals frá 31 landi!   Flestir koma frá Þýskalandi eða 19 en næstir koma Norðmenn (15) og Indverjar (10). Sumir keppendanna koma langt frá en þar má nefna keppenda frá Hondúras og Brasilíu.

Allar upplýsingar um mótið má finna á heimasíðu mótsins, Chess.is, og keppendalistann má nálgast á Chess-Results. 

Undrabörn í Kastljósi og á Eyjunni

MP Reykjavíkurskákmótið nálgast og þar verða nokkur met slegin.  Tvö þeirra eru vís, þátttökumet og aldursmet en meðal keppenda má nefna þau Vigni Vatnar Stefánsson, 7 ára, og Nansý Davíðsdóttur, 8 ára en þau eru langyngstu keppendurnir sem tekið hafa þátt í í tæplega hálfrar aldar sögu mótsins. 

Umfjöllun um þau og þátttöku þeirra var að finna í Kastljósinu í kvöld og í frétt Eyjunnar í gær.