Jóhann Örn skákmeistari Ása

Jóhann Örn Sigurjónsson sigraði nokkuð örugglega á meistaramóti Ása sem fór fram í dag í Ásgarði, félagsheimili F E B, í Reykjavík í dag. Jóhann fékk 8½ vinninga af níu mögulegum. Stefán Þormar og Haraldur Axel Sveinbjörnsson urðu jafnir í öðru til þriðja sæti með 6½ vinning. Í hópnum 60 til 70 ára varð efstur Ásgeir Sigurðsson.  Valdimar Ásmundsson varð efstur í hópnum 70 til 80 ára og í hópnum 80 ára og eldri varð gamla skákkempan Sæmundur Kjartansson efstur.

Nánari úrslit:

• 1               Jóhann Örn Sigurjónsson                   8.5 vinninga
• 2-3            Stefán Þormar Guðmundsson             6.5
•                  Haraldur Axel Sveinbjörnsson             6.5
• 4-6            Valdimar Ásmundsson                        5.5
•                  Gísli Sigurhansson                             5.5
•                  Bragi G Bjarnarson                            5.5
• 7               Jón Víglundsson                                 5
• 8-11          Ásgeir Sigurðsson                              4.5
•                  Óli Árni Vilhjálmsson                          4.5
•                  Magnús V Pétursson                           4.5
•                  Baldur Garðarsson                             4.5
• 12-17        Hermann Hjartarson                           4
•                 Eiður Á Gunnarsson                             4
•                 Halldór Skaftason                                4
•                 Birgir Ólafsson                                    4
•                 Einar S Einarsson                                4
•                 Sæmundur Kjartansson                       4
• 18            Friðrik Sófusson                                  2.5
• 19            Viðar Arthursson                                 2
• 20            Hrafnkell Guðjónsson                          0.5

Myndaalbúm mótsins

Hin fjögur fræknu fyrir norðnorðwestan

Fjórir skáktrúboðar halda að austurströnd Grænlands, miðvikudaginn 13. apríl, og boða fagnaðarerindið í Ittoqqortoormiit eða Scoresbysundi.  Frá því að Hrafn Jökuls fór með með heilan her skákmeistara í fyrstu ferðina árið 2003 hafa verið farnar yfir tuttugu ferðir í öll þorp austurstrandarinnar og er þetta sú fimmta í Scoresbysund.

Þarna á nyrsta byggða bóli austurstrandarinnar munu væntanlega öll 80 börn grunnskólans eyða páskafríinu sínu í skólanum við taflmennsku en haldin verða nokkur mót og massív kennsla þar sem yfirkennari verður Ingibjörg Edda Birgisdóttir, fyrrum Íslandsmeistari kvenna.
 
Ekki væri hægt að leggja í svona ævintýraleiðangur ár eftir ár nema með velvilja fólks og fyrirtækja en að þessu sinni gefa: Eymundsson, Actavis og Cintamani öllum börnunum sem mæta vinninga, Bónus gefur öllum börnunum í skólanum páskaegg, Ís-spor gefur bikara og verðlaunapeninga á fjögur mót og Sölufélag íslenskra garðyrkjumanna passar upp á heilsu ferðalanga.
Færslur hafa verið birtar á Grænlandssíðu Hróksins:  http://godurgranni.blog.is/blog/godurgranni/
og þeim verður dælt inn næstu daga.

Annað leiðangursfólk að þessu sinni er: Hrund Þórsdóttir, skákáhugakona og blaðamaður, Tim Vollmer, skákáhugamaður og world class ljósmyndari og Arnar Valgeirsson frá Skákfélagi Vinjar.

Lengsta skákæfingin - sá elsti sigraði.

KR-ingar hröktust úr KR heimilinu í gærkvöldi vegna körfuboltans. Skákæfingin fór fram á "varavelli" skákdeildarinnar í Gallery Skák í Bolholti. Tefldar voru 13 umferðir með 10 mínútna umhugsunartíma eða í rúma 5 tíma án hvíldar. Páll G. Jónsson elsti þátttakandinn nærri 78 ára sigraði glæsilega og var sigur hans aldrei í hættu allt kvöldið, leiddi mótið lengst af á fullu húsi stiga.

Myndaalbúm

 

Meistaramót Skákskóla Íslands fer fram 27.-29. maí

Meistaramót Skákskóla Íslands fyrir starfsárið 2010/2011 hefst föstudaginn 27. maí og lýkur mótinu þann 29. maí, samtals þrír keppnisdagar. Mótið fer fram í húsakynnum skólans að Faxafeni 12. Þátttökurétt hafa allir nemendur skólans og allir þeir sem tekið hafa þátt í námskeiðum á vegum  skólans eða hlotið þjálfun á vegum skólans.  Núverandi meistari Skákskóla Íslands er Hjörvar Steinn Grétarsson.   

Nánari tilhögun mótsins verður tilkynnt síðar.

Afmælis- og Páskaskákmót Hressra Hróka 2011

Á morgun 13 apríl fer fram páskahraðskákmót Hressra Hróka í Björginni. Það vill svo til að formaður Hressra Hróka Emil Ólafsson verður 35 ára þannig að þetta verður í leiðinni hálfgert afmælismót honum til heiðurs. Það er reiknað með góðri þátttöku enda hafa 13 manns skráð sig á skákmótið sem hefst kl 13.00 þann 13. apríl. Margir kunnir kappar eru skráðir til leiks á mótinu og má þar nefna Kidda Óla sem er núverandi Páskaskákmeistari Hressra Hróka, Emil Ólafs, Guðmund Inga, Gunnar Björn, Björgúlf, Ingu Jónu, Valda og fleira gott fólk.

Skáksamband Íslands gefur bókavinninga á mótinu þannig að allir fá vinning óháð því i hvaða sæti þeir lenda á mótinu. Stærsti sigurinn er að vera með og verður spennandi að sjá hvernig fer. Að sjálfsögðu verður svo gert kaffihlé um hálf þrjú og sunginn afmælissöngur áður en seinni hluti mótsins fer fram.

Meðfylgjandi mynd er af Kidda Óla núverandi Páskaskákmeistara Bjargarinnar að tefla við Einar S. Guðmundsson á Jólaskákmóti Bjargarinnar 2010.

Áskorendaflokkur Skákþings Íslands hefst á föstudag

Stjórn Skáksambands Íslands hefur ákveðið að keppni í áskorendaflokki 2011 fari fram dagana 15.  - 24. apríl  n.k. . Mótið mun fara fram í Faxafeni 12, Reykjavík.   Efstu tvö sætin gefa föst sæti í Landsliðsflokki 2012.

Dagskrá:

• Föstudagur, 15. apríl, kl. 18.00, 1. umferð
• Laugardagur, 16. apríl, kl. 14.00, 2. umferð
• Sunnudagur, Frídagur
• Mánudagur, 18. apríl, kl. 18.00, 3. umferð
• Þriðjudagur, 19. apríl, kl. 18.00, 4. umferð
• Miðvikudagur, 20. apríl, kl. 18.00, 5. umferð
• Fimmtudagur, 21. apríl, Frídagur
• Föstudagur, 22. apríl, kl. 11.00, 6. umferð
• Föstudagur, 22. apríl, kl. 17.00, 7. umferð
• Laugardagur, 23. apríl, kl. 14.00, 8. umferð
• Sunnudagur, 24. apríl, kl. 14.00, 9. umferð

Umhugsunartími:

90 mín. + 30 sek. til að ljúka.

Verðlaun:  

• 1. 40.000.-
• 2. 25.000.-
• 3. 15.000.-

Aukaverðlaun:

• U-2000 stigum           8.000.-
• U-1600 stigum           8.000.-
• U-16 ára                    8.000.-
• Kvennaverðlaun         8.000.-
• Fl. stigalausra            8.000.-

Aukaverðlaun eru háð því að a.m.k. 5 keppendur séu í hverjum flokki og eingöngu er hægt að vinna til einna aukaverðlauna.  Reiknuð verða stig séu fleiri en einn í efsta sæti.  Stigaverðlaunin miðast við íslensk skákstig.

Þátttökugjöld:

• 18 ára og eldri            3.000.-
• 17 ára og yngri           2.000.-

Skráning:

Skráning fer fram á Skák.is.  Upplýsingar um skráða keppendur má nálgast hér.

Öðlingamót: Röðun 4. umferðar

Eiríkur Björnsson og Bjarni Hjartarson gerðu jafntefli í kvöld í frestaðri skák úr 3. umferð Skákmóts öðlinga.  Nú liggur því fyrir pörun í 4. umferð sem fram fer á miðvikudagskvöld.

Röðun 4. umferðar:

 

Bo.	Name	Pts.	Result	Pts.	Name
1	Thorsteinsson Thorsteinn	3		3	Gudmundsson Kristjan
2	Thorsteinsson Bjorn	2½		2½	Gunnarsson Gunnar K
3	Jonsson Pall Agust	2½		2½	Thorvaldsson Jon
4	Thorhallsson Gylfi	2		2	Kristinsdottir Aslaug
5	Halldorsson Bragi	2		2	Ragnarsson Hermann
6	Palsson Halldor	2		2	Ragnarsson Johann
7	Hjartarson Bjarni	2		2	Eliasson Kristjan Orn
8	Gardarsson Halldor	2		2	Bjornsson Eirikur K
9	Fridthjofsdottir Sigurl  Regin	2		2	Valtysson Thor
10	Bjornsson Yngvi	1½		1½	Loftsson Hrafn
11	Sigurdsson Pall	1½		1½	Jonsson Loftur H
12	Jonsson Sigurdur H	1½		1½	Gudmundsson Sveinbjorn G
13	Isolfsson Eggert	1		1	Baldursson Haraldur
14	Olsen Agnar	1		1	Jonsson Pall G
15	Hreinsson Kristjan	1		1	Jonsson Olafur Gisli
16	Eliasson Jon Steinn	1		1	Gunnarsson Sigurdur Jon
17	Adalsteinsson Birgir	½		½	Solmundarson Kari
18	Ingvarsson Kjartan	½		½	Hermannsson Ragnar
19	Johannesson Petur	½		½	Schmidhauser Ulrich
20	Thrainsson Birgir Rafn	0		0	Kristbergsson Bjorgvin

 

• Heimasíða TR
• Chess-Results

NM stúlkur – Pistill 5. umferðar

A-flokkur:
Hallgerður - Amalie Lindestrøm, Danmörku 1-0
Helene B Søndegaard, Danmörku 0-1 

Hallgerður tefldi mjög vel í dag og sigraði andstæðing sinn örugglega (sjá skákina hér að neðan).  Sýndi hún enn og aftur að hún höndlar pressu vel og skilar sínu þegar á þarf að halda.  Niðurstaðan - fyrsti norðurlandameistaratitill okkar stúlkna frá upphafi í höfn. Jóhanna átti einnig mjög góðan dag og landaði öruggum sigri á móti hinni dönsku Helene.   

Thorsteinsdottir,Hallgerdur - Lindestrom,Amalie Heiring [B30]
1.e4 c5 2.¤f3 ¤c6 3.¥b5 £c7 4.c3 g6 5.d4 cxd4 6.cxd4 ¥g7 7.¤c3 a6 8.¥a4 b5 9.¥c2 d6 10.¤d5 £b7 11.h3 ¥e6 12.¤f4 ¥d7 13.0–0 e6 14.¦e1 ¥c8 15.d5 Diagram  15...¤d8 16.dxe6 ¤xe6 17.£xd6 ¤e7 18.¥b3 ¤xf4 19.£xf4 0–0 20.¤g5 ¥e6 21.¤xe6 fxe6 22.¥xe6+ ¢h8 23.£g3 £b6 24.¥b3 ¦ac8 25.¥e3 £f6 26.¥g5 1–0  

Lokastaðan:

1. Hallgerður Helga Þorsteinsdóttir 4,5v (10.5 stig)
2. Erle A. M. Hansen, Noregi 4,5v (10 stig)
3. Jóhanna Björg Jóhannsdóttir 3v (12 stig)
4. Elise Forså, Noregi 3 v (10 stig)
5. Nicole Loginger, Svíþjóð 2.5v
6. Helene B Søndegaard, Danmörku 1.5v
7. Amalie Lindestrøm, Danmörku 1v
8. Caroline L Hansen, Svíþjóð 0v

 
Glæsilegur árangur hjá þeim stöllum í A-flokki, gull og brons. Þær tefldu heilt yfir mjög vel allan tíman og uppskáru eftir því.  B-flokkur:Hrund – Alise Haukenes, Noregi 1-0Elín – Sára Traber Olsen, Færeyjum 0-1 Hrund tefldi mjög vel á móti Alise frá Noregi og mátaði hana í um 30 leikjum (sjá skákina hér að neðan. Elín lenti í vandræðum fljótlega eftir byrjunina og tapaði gegn hinni færeysku Sáru sem átti mjög góðan dag og landaði góðum sigri. 

Hauksdottir,Hrund - Haukenes,Alise [B76]
1.e4 c5 2.¤f3 ¤c6 3.d4 cxd4 4.¤xd4 g6 5.¤c3 ¥g7 6.¥e3 ¤f6 7.¥e2 0–0 8.£d2 d6 9.f3 a6 10.0–0–0 ¤xd4 11.¥xd4 ¥e6 12.¤d5 ¤xd5 13.¥xg7 ¢xg7 14.exd5 ¥d7 15.h4 ¦c8 16.h5 ¦h8 17.h6+ ¢g8 18.£d4 f6 19.g4 ¢f7 20.g5 ¥f5 21.¥d3 ¥xd3 22.¦xd3 ¦e8 23.¦e1 £a5 24.¦e4 £xa2 25.¦a3 ¦xc2+ 26.¢xc2 ¦c8+ 27.¦c3 ¦xc3+ 28.£xc3 b5 29.gxf6 exf6 30.£c7+ ¢f8 31.£g7# Diagram   1–0  

 

 

Lokastaðan:

1. Jessica Bengtsson, Svíþjóð 4v
2. Louise Segerfelt, Svíþjóð 3,5v
3. Sára Traber Olsen, Færeyjum 3v (11 stig)
4. Hrund Hauksdóttir 3v (10,5 stig)
5. Maud Rødsmoen, Noregi 2,5v
6. Alise Haukenes, Noregi 2v
7. Kristine Larsen, Danmörku 2v
8. Sif Tylvad Linde, Danmörku 2v
9. Thea Nicolajsen, Danmörku 1,5v
10. Elín Nhung 1,5v

 Tvöfaldur sigur hjá sænsku stelpunum í þessum flokki.  Hrund missti af bronsinu með minnsta mun eftir stigaútreikning.  Þessi flokkur var gríðarlega jafn og spennandi og hefði getað endað hvernig sem var.  Það hefði þurft lítið til að bæði Hrund og Elín næðu mun betri sætum en því miður gekk þetta ekki upp í þetta skiptið.  Elín þarf að mæta ákveðnari til leiks og ég hafði það á tilfinningunni við að fylgjast með þessum flokki að Hrund sé síst lakari skákmaður en sænsku stelpurnar.   C-flokkur:

Ásta Sóley – Veronika 0-1

Þær vinkonur fengu það leiðinlega hlutskipti að tefla saman í síðustu umferð.  Að lokum fór svo að Veronika hafði sigur eftir snarpa baráttu. Það er ljóst að þessar stúlkur eru í mikilli framför og eiga án efa eftir að bæta sig hratt á næstu misserum.    

Lokastaðan:

1. Freja Vangsgaard, Danmörku 4v (10+12,5 stig)
2. Hanna B Kyrkjebø, Noregi 4v (10+12 stig)
3. Veronika Magnúsdóttir 3v (13 stig)
4. Marte B Kyrkjebø, Noregi 3v (12,5 stig)
5. Mette E Christensen, Danmörku 2,5v
6. Andrea Keitum, Danmörku 2,5v
7. Sara Hadi Mirza, Svíþjóð 2v
8. Ásta Sóley Júlíusdóttir 2v
9. Hanna Jacobsen, Færeyjum 2v

 Gríðarlega jafn og skemmtilegur flokkur þar sem einungis munaði tveimur vinningum á efstu og neðstu stúlkunum.  Veronika og Ásta Sóley eru algerlega á pari við aðrar stelpur í þessum flokki enda landaði Veronika bronsinu hér.  Þær eiga eflaust eftir að standa sig betur á næstu mótum erlendis þar sem mesta stressið ætti nú að vera farið úr þeim eftir að hafa prufað að tefla í móti erlendis. 

Dönsku mótshaldararnir stóðu sig með mikilli prýði og gekk allt þeirra skipulag upp frá a til ö.  Her sjálfboðaliða sá um að allt gengi smurt og voru allir sjálfboðaliðarnir í mörgum hlutverkum.  Flestir tóku þátt í að vera allt í senn, bílstjórar, aðstoðarmenn á skákstað og mötuneytisstarfsmenn – geri aðrir betur! Stelpunum vil ég einnig þakka fyrir frábæra ferð.  Þær stóðu sig með sóma og enda leitun að jafn glaðværum og skemmtilegum hópi.  

 Davíð Ólafsson

Skák og skemmtun í Vatnaskógi

Þeir 36 skákkrakkar sem dvöldu í skákbúðum Fjölnis og Skákakademíu Reykjavíkur helgina 9. og 10. apríl komu til baka sælir og þreyttir eftir stórskemmtilega og gagnlega dagskrá sem ekkert hlé var gert á nema yfir blánóttina. Skipulagið gekk út á skákkennslu og frjálsan leik við íþróttir og leiki í þessum sælureit sem sumarbúðir KFUM í Vatnaskógi eru. Skákkrakkarnir sem voru með í för voru á aldrinum 7 - 14 ára og mynduðu þau einn æðislegan hóp að mati okkar fararstjóranna, Helga Árnasonar frá Fjölni og Stefáni Bergssyni og Andreu M. Gunnarsdóttur frá Skákakademíu Reykjavíkur.

Gist var í Birkiskála sem er nýlegur og er á við þriggja stjörnu hótel. Fljótlega eftir komuna hófst skákkennslan af fullum krafti og náðu leiðbeinendur svo vel til krakkanna að kennslutímarnir teygðust hátt í tvær klukkustundir. Helgi Ólafsson sá um A hópinn en um B og C hópana sáu þau Stefán Bergsson, Sigríður Björg Helgadóttir, Ingvar Ásbjörnsson og Hörður Aron Hauksson. Í frjálsum tíma má segja að íþróttahúsið hafi heillað krakkana endalaust. Þar var boðið upp á boltaleiki, tvo stærðarinnar hoppukastala, borðtennis, snóker og þytboltaspil. Frjálsi tíminn var líka vel nýttur til þess að tefla tvískák í Birkiskála, til gönguferða og spila á spil sem krakkarnir komu með í ferðalagið. Úti við var skúraveður en 10 stiga hiti. Með reglulegu millibili var boðið upp á matar-og kaffitíma. Þar mátti hver þátttakandi fá sér eins og hann lysti af góðum og velútbúnum mat. Sælgætisgerðin Nói-Síríus kórónaði matinn með velútilátnum nammipokum sem þeir lögðu til skákbúðanna af miklum rausnarskap. Dagurinn var að sjálfsögðu tekinn snemma á sunnudagsmorgni. Þátttakendur settust að tafli eða fóru í göngutúra fyrir morgunverð, nýttu frjálsan tíma í íþróttahúsinu og tóku vel til matar síns í hádeginu þegar pítsur  voru á borðum. Skákbúðunum lauk með hraðskákmóti sem þeir Stefán, Ingvar og Hörður Aron stjórnuðu af yfirvegun. Mótinu lauk með verðlaunaafhendingu. Nói Síríus gaf 10 páskaegg í verðlaun og afhenti Helgi Árnason aðalskipuleggjandi skákbúðanna verðlaunin þeim Degi Ragnarssyni, Oliver Aroni Jóhannessyni, Vigni Vatnari Stefánssyni, Jóhanni Arnari Finnssyni og Róbert Leó Jónssyni fyrir fimm efstu sætin. Þær Rimaskólastúlkur Svandís Rós Ríkharðsdóttir, Nansý Davíðsdóttir og Heiðrún Anna Hauksdóttir fengu stúlknaverðlaunin og loks hlaut Mykael Kravchuk verðlaun í yngsta aldursflokki. Tíminn í skákbúðunum hafði liðið áfram eins og draumur en þreytan var farin að segja til sín þegar sest var upp í rútuna heim á leið.

Að mati okkar sem stóðum að skákbúðunum í Vatnaskógi er mikil þörf að koma skákbúðum á sem föstum lið í barna-og unglingastarfi skákfélaganna. Áhuginn er óskiptur til staðar og aðstaða til skákbúða til fyrirmyndar í Vatnaskógi, 70 km leið frá Reykjavík. Skákdeild Fjölnis og Skákakademía Reykjavíkur vill þakka veittan stuðning við skákbúðirnar; Íslandsbanki greiddi uppihald Fjölniskrakka, Nói Síríus bauð upp á velvalið nammi og páskaegg, Skáksamband Íslands lánaði töfl, Helgi Ólafsson skólastjóri Skákskóla Íslands veitti okkur ómetanlega aðstoð. Ingvar, Sigríður Björg og Hörður  Aron komu sterk að kennslunni og eyddu frjálsa tímanum í leik eða tafl við krakkana. Loks ber að nefna Sumarbúðastarf KFUM sem buðu upp á frábært samstarf. Þar ber að þakka þeim Ársæli framkvæmdarstjóra, Þóri staðarhaldara og Valborgu matráðsstúlku fyrir frábæra þjónustu.

Myndaalbúm fararinnar

Helgi Árnason

Skólaskákmót Hafnarfjarðar og Sýslumót Kjósarsýslu

Skólaskákmót Hafnarfjarðar verður haldið frá kl. 17-19 Þriðjudaginn 12 apríl. í Samkomusalnum í Íþróttamiðstöð Hauka að Ásvöllum.   Keppt er í 2 flokkum 1-7 bekk annarsvegar og 8-10 bekk hins vegar.

Sýslumót Kjósarsýslu í skák verður haldið frá kl. 16-18. miðvikudaginn 13. apríl í Flataskóla. (matsal). Keppt er í 2 flokkum. 1-7 bekk annarsvegar og 8-10 bekk hinsvegar. Mótið er opið krökkum í grunnskólum í Garðabæ, Álftanesi, Mosfellsbæ og Seltjarnarnesi.