Stúlknameistaramót Reykjavíkur fer fram í dag

Stúlknameistaramót Reykjavíkur fer fram í Skákhöllinni í Faxafeni laugardaginn 5. apríl nk. og hefst kl. 14.

Tefldar verða sjö umferðir eftir Monrad-kerfi og er umhugsunartími fyrir hverja skák 15 mínútur á hvorn keppanda.

Þetta er í fimmta skipti sem Taflfélagi Reykjavíkur heldur mótið, en þess má geta að Hallgerður Helga Þorsteinsdóttir hefur borið sigur úr býtum fjögur ár í röð!

Keppt er í þriðja sinn um veglegan farandbikar sem hjónin Ólafur S. Ásgrímsson og Birna Halldórsdóttir gáfu. Einnig verða eignarbikarar fyrir þrjú efstu sætin.

Öllum stúlkum á grunnskólaaldri í landinu er heimil þátttaka og geta unnið eignarbikar, en titilinn og farandbikarinn hreppir sú sem efst er að vinningum þeirra er búsettar eru í Reykjavík.

Að lokinni verðlaunaafhendingu verður pizzuveisla fyrir keppendur í boði TR. Skráning fer fram á staðnum og hefst kl.13:30. Skákstjóri verður Sigurlaug R. Friðþjófsdóttir.

Skákþing Norðlendinga

Skákþing Norðlendinga verður haldið á Bakkaflöt í Skagafirði helgina 11-13. apríl nk. Tefldar verða 4 umferðir með atskákfyrirkomulagi á föstudagskvöldi. Tvær kappskákir á laugardegi og ein á sunnudegi. Að loknu skákmótinu verður haldið Hraðskákmót Norðlendinga.

Skákþing Norðlendinga hefur verið haldið frá árinu 1935, en þá varð Sauðkrækingurinn Sveinn Þorvaldsson skákmeistari Norðlendinga. Núverandi skákmeistari er Áskell Örn Kárason.

Boðið verður uppá gistingu og veitingar á Bakkaflöt og er áætlað að kostnaður verði milli 15-18.000 fyrir einstakling. Þ.e. mótsgjöld, gisting, morgunmatur, hádegismatur og kvöldverður. Bakkaflöt er í um 10 km. fjarlægð frá Varmahlíð. Þar er góð aðstaða fyrir gesti. Heitir pottar og lítil sundlaug. Sjá nánar:  http://www.bakkaflot.com/

Auk þess sem keppt verður um sæmdarheitið Skákmeistari Norðurlands, sem eingöngu er veitt Norðlendingum, verða veitt peningaverðlaun - 30.000 krónur fyrir fyrsta sæti, 20. 000 fyrir annað sæti og 10.000 fyrir þriðja sæti. Þá verða veitt aukaverðlaun. Norðlendingar sem aðrir eiga möguleika á að keppa um peningaverðlaunin. Ef þátttaka verður góð, getur verðlaunafé hækkað.  Mótið verður reiknað til alþjóðlegra stiga.

Dagskrá. 

Mæting á Bakkaflöt kl. 19:30 föstudagskvöldið 11. apríl (kvöldmatur fyrir þá sem það vilja frá kl. 18:30)

• Á föstudagskvöldinu verða tefldar 4 atskákir (25. mín umhugsunartími). Áætluð lok eru kl. 24:00 
• 5. umf. Kl. 10.00 12. apríl (umhugsunartími 90 mín + 30 sec)
• 6. umf kl. 16.00 12 apríl (umhugsunartími 90 mín + 30 sec)
• 7. umf. Kl. 10.00 13 april (umhugsunartími 90 mín + 30 sec)

Gisting og fæði 

Boðið er upp á gistingu og fæði á Bakkaflöt á meðan á móti stendur. Sjá www.bakkaflot.com Um er að ræða:

• Gistingu 2 nætur
• Kvöldmatur á föstudegi.
• Morgunmatur á laugardag og sunnudag
• Hádegismatur laugardag ( um kl. 14.00) Kaffi laugardag um kl. 17:00.  Kvöldmatur laugardag (um kl. 20.00)
• Boðið verður upp á kaffi og hressingu á meðan á móti stendur.
• Kaffiveisla verður að lokinni 7 umferð á sunnudegi í boði Sparisjóðs Skagafjarðar Kl: 15:00
• Hægt verður að kaupa einstakar máltíðir.

Verð fyrir allan pakkann aðeins 15.100,- Að auki verða keppendur að greiða mótsgjald kr. 1500,-  

Skráðir keppendur:

• Áskell Örn Kárason
• Björn Þorfinnsson
• Davíð Örn Þorsteinsson
• Einar K. Einarsson
• Guðmundur Gunnarsson
• Hörður Ingimarsson
• Jakob Sævar Sigurðsson
• Jón Arnljótsson
• Kjartan Guðmundsson
• Sigurður H. Jónsson
• Stefán Bergsson
• Unnar Ingvarsson

Hraðkvöld hjá Helli

Hraðkvöld hjá Helli verður haldið mánudaginn 7. apríl í Hellisheimilinu í Mjódd og hefst kl. 20.  Eins og venjulega eru tefldar 7 umferðir með 7 mínútna umhugsunartíma þannig að mótið tekur tiltölulegan stuttan tíma!  Ljúffeng verðlaun í boði! Von er á að einhverjir af þátttakendum á alþjóðlega unglingamóti Hellis verði með á hraðkvöldinu. 

Sigurvegarinn fær pizzu fyrir tvo frá Domionos auk þess sem einn heppinn útdreginn keppandinn fær sömu verðlaun. 

Þátttökugjald er kr. 300 fyrir félagsmenn en kr. 500 fyrir aðra.

Þátttökugjald er kr. 200 fyrir 15 ára og yngri félagsmenn en kr. 300 fyrir aðra.

Teflt er í Hellisheimilinu, Álfabakka 14a.  

Allir velkomnir

Kona í hverju liði á Íslandsmóti skákfélaga?

Í fyrri frétt um aðalfund SÍ misfórst að birta lagabreytingartillöngu frá Lenku Ptacnikovu, Guðfríði Lilju Grétarsdóttur og Páli Sigurðssyni um að ein kona skuli hið minnsta tefla í hverju liði.

Lagabreytingartillögur

lagðar fram af Lenku Ptacnikovu, Guðfríði Lilju Grétarsdóttur og Páli Sigurðssyni fyrir aðalfund 3. maí 2008 

Skáklög SÍ

3. kafli Íslandsmót skákfélaga 

19. grein

Keppendur skulu vera fullgildir félagsmenn þeirra taflfélaga sem þeir tefla fyrir.  Raða skal keppendum í sveitir og borð eftir styrkleika.  Ekki er leyfilegt að breyta röð keppenda eftir að keppni hefst.  Keppandi getur flust upp eða niður um sveit hvenær sem er keppninnar en heildarröð keppenda verður að haldast.  Komi lið ekki til keppni án orsaka tapar það skákum á öllum borðum.  Komi slíkt fyrir tvisvar skal liðið dæmt úr keppninni.  Í hverri viðureign skal a.m.k. helmingur liðsmanna hverrar sveitar vera íslenskir ríkisborgarar eða hafa verið með lögheimili sitt á Íslandi undanfarið ár. 

Breytingartillaga: 

Í lok 19. greinar bætist við eftirfarandi klausa:

Frá og með Íslandsmóti skákfélaga 2009-2010 skal að minnsta kosti ein stúlka/kona vera í sérhverri sveit mótsins.

Greinargerð:

Í löndum eins og Frakklandi, Spáni, Bretlandi og víðar er það ófrávíkjanleg regla að ein stúlka/kona sé í hverri sveit þegar félög og lið keppa um meistaratitilinn í skák. Þessi tillaga er því lögð fram með fyrirmyndum erlendis frá. Hugsunin er einföld: Með því að skylda félög til að hafa a.m.k. eina konu í sveitinni hjá sér á Íslandsmóti skákfélaga er tryggt að sérhvert félag í landinu hlúi á einhvern hátt að skákiðkun stúlkna/kvenna og leggi kapp á að þjálfa þær og hafa með í liðinu. Þetta hvetur um leið félögin til að leggja sig fram við að kveikja áhuga stúlkna/kvenna á skák, leita uppi áhugasamar stúlkur/konur og tryggja þátttöku nýrra kvenna sem annars væru ekki með á skákmóti. Þá er einnig mun líklegra að þær sem tefla með liði á Íslansmóti skákfélaga verði með á öðrum og fleiri skákmótum. Ef þessi breytingatillaga yrði að veruleika mundi íslenskt skáklíf sjá margfalt fleiri íslenskar konur en áður hafa sést saman á skákmóti. 

Framkvæmd þessarar tillögu vex án efa ýmsum í augum en þá er til þess að líta að vel virðist hafa tekist til í þeim löndum sem þetta hefur verið tekið upp. Það væri í það minnsta vel þess virði að láta á þetta reyna og sjá hvernig til tekst. Hér er lagt til að þetta taki gildi frá og með árinu 2009-2010 þannig að félögin hafi rúmt ár til að undirbúa breytinguna. Næsta Íslandsmót skákfélaga 2008-2009 færi því fram með hefðbundnum hætti en mótið þar á eftir yrði með konu í hverri sveit. 

Í þessu samhengi er vert að taka fram að í reglugerð um Íslandsmót skákfélaga er lagt upp með að einungis 6 séu í liði í öðrum deildum en fyrstu deild. Full ástæða er til að endurskoða þessa reglu og spyrja hvort ekki eigi að hafa 8 liðsmenn í öllum sveitum allra deilda, þar af eina konu. Þetta þarf hins vegar ekki lagabreytingu heldur ítarlega umræðu á aðalfundi og umboð til stjórnar um að breyta reglugerðinni. Ef samþykkt er að ein kona skuli vera í hverri sveit væri í það minnsta ástæða til að hafa 7 liðsmenn í öllum öðrum deildum en fyrstu deild (þar væru áfram 8), en eðlilegast væri etv. að í öllum deildum væri sami fjöldi liðsmanna, alls átta. Þetta þarf sem fyrr segir að ræða á komandi aðalfundi.

Dagur Andri unglingameistari Reykjavíkur

Dagur Andri Friðgeirsson, 13 ára og  Hallgerður H Þorsteinsdóttir, 15 ára, sem jöfn urðu í efsta sæti og á dögunum á Unglingameistaramóti Reykjavíkur, háðu einvígi um Unglingameistaratitil Reykjavíkur í Skákhöllinni á fimmtudagskvöld. Tefldar voru fyrst tvær skákir með fimmtán mínútna umhugsunartíma, sama tíma og í mótinu.

Lauk þeirri viðureign svo að bæði náðu sigri með hvítu og voru því enn jöfn. Var þá umhugsunartíminn styttur í tíu mínútur og náði Dagur Andri að knýja fram sigur í báðum skákunum og ljúka þar með einvíginu með 3-1 sigri. Dagur Andri er fæddur í janúar 1995 og er sterkasti skákmaður landsins í sínum aldursflokki.

Verðlaun voru afhent af mótsstjóranum Óttari Felix Haukssyni formanni Taflfélags Reykjavíkur.

Úrslit á Boðsmóti Hauka: Þorvarður sigraði Inga

Í gærkvöldi fór fram 2. umferð Boðsmóts Hauka í húsakynnum Skákskólans.  Úrslit urðu sem hér segir:

A-Riðill:

Stefán - Helgi 0-1
Björn - Tinna  Frestað
Torfi - Árni   0-1

Staðan:

Helgi   1,5
Árni    1 + frestuð
Torfi   1
Tinna  0,5
Björn   2 frestaðar
Stefán 0

B-Riðill

Kjartan - Gísli         1-0
Ingi - Þorvarður        0-1
Guðmundur - Sigurbjörn  0-1

Staðan:

Kjartan     2
Þorvarður  2
Sigurbjörn 2
Gísli         0
Ingi         0
Guðmundur 0

C-Riðill

Hjörvar - Marteinn    1-0
Omar - Oddgeir        1-0
Hrannar - Geir        Frestað

Staðan:

Omar     2
Hjörvar  1 + frestuð
Geir       1
Oddgeir  0,5
Hrannar  0,5
Marteinn 0

D-Riðill

Þórir - Stefán        0-1 (án ábyrgðar)
Jorge - Einar         1-0
Aðalsteinn - Róbert   Frestað

Staðan:

Stefán F 2
Jorge     2
Róbert   1 + frestuð
Aðalsteinn  0+ frestuð
Þórir      0
Einar     0

Heimasíða Hauka 

Góð heimsókn Skákskólans til Bolungarvíkur

Á dögunum fékk Grunnskóli Bolungarvíkur góða heimsókn frá Skákskóla Íslands. Það var skákmaðurinn Davíð Kjartansson sem sótti Bolvíkinga heim og miðlaði af kunnáttu sinni til nemdenda grunnskólans. Hann tefldi auk þess fjöltefli við nemendur GB [Innskot ritstjóra:  Hér er átt við Grunnskóla Bolungarvíkur, ekki Gunnar Björnsson] og að kvöldi dags bauð Taflfélag Bolungarvíkur til opins skákmóts sem vakti mikla lukku.

Davíð hóf heimsókn sína á að fara inn í 1. til 3. bekk þar sem hann kenndi skák og lukkaðist það vel. Þá fór hann inn í 4. til 6. bekk og var með umræður um gildi skákarinnar í bæði leik og starfi. Að lokum fengu nemendur að tefla undir leiðsögn skákmeistarans.

Að skákkennslu lokinni bauð Davíð Kjartansson upp á fjöltefli og skráðu 54 nemendur grunnskólans sig til leiks. Davíð vann allar skákir nema tvær, hann gerði jafntefli til Sigurð Bjarna Benediktsson úr 6.bekk og Patryk Ringwelski úr 1.bekk og sat hann m.a. annars í klukkutíma og 40 mín að tafli.  Eftir fjölteflið tók Davíð á móti þeim 7 unglingum sem hafa verið að æfa skák og fór hann meðal annars í skákþrautir, byrjanir og fleira. 

Loks um kvöldið var haldið opið skákmót þar sem allir voru velkomnir og mættu 21 til leiks en þar af voru 8 fullorðnir og voru úrslitin þannig að: Í 1. til 2. sæti voru Davíð Kjartansson og Magnús Sigurjónsson með 6 vinningam, í 3. sæti var Unnsteinn Sigurjónsson með 5 1/2 vinning og í 4. til 5. sæti lentu Falur Þorkelsson og Daníel Ari Jóhannson. 

Sjá nánar frétt Víkara (m.a. myndir frá heimsókninni)

Arnar Gunnarsson sigraði og fékk fyrstu Grand Prix könnuna

Það var fámennt en góðmennt Grand Prix skákmót TR og Fjölnis fimmtudagskvöldið 3. apríl. Í fyrsta sinn fékk sigurvegarinn Grand Prix könnu til merkis um sigur. Það fór vel á því að sigursælasti Grand Prix skákmaðurinn eftir áramót, Arnar Gunnarsson, skyldi vinna öruggan sigur og fá merkta Grand Prix könnu fyrstur allra. Könnurnar verða framvegis afhentar sigurvegurum Grand Prix mótanna og eru þær í líki taflmanna. Kanna Arnars er í líki riddara. Hann sigraði alla andstæðinga sína. Í öðru sæti var nafni sigurvegarans Arnar Þorsteinsson og Kristján Örn Elíasson varð þriðji. Þeir hlutu allir CD diska að launum. Mótið var að venju bráðskemmtilegt en þátttakan þyrfti sannarlega að vera meiri. Skákstjóri að þessu sinni var Helgi Árnason. Mótin halda áfram næstu fimmtudaga.

Bókin 61 minnisstæð skák eftir Fischer virðist ekki vera til

Fyrr í vetur kom um það kvittur að bókin 61 minnisstæð skák (61 Memorable Games) væri komin út og væri gefin út með leyfi sjálfs Fischers.  Um þetta var skrifað mikið á netinu og komst málið m.a. á síður DV og Helgi Ólafsson blandað í málin að ósekju.  Nú hefur komið í ljós að þetta átti við ekkert að styðjast og flest bendir til þess að ekki einu eitt eintak hafi verið prentað af bókinni.

Sjá nánar tengil á Skákhorninu þar sem fram kemur að sá sem á bak við þetta standi sé að öllum líkindum Bandaríkjamaður að nafni Ed Trice.   

 

Bragi vann í áttundu umferð

Alþjóðlegi meistarinn Bragi Þorfinnsson (2406) sigraði  danska FIDE-meistarann Daniel V. Pedersen (2258) í áttundu umferð Scandinavian Open sem fram fór í dag.  Henrik Danielsen (2506) gerði jafntefli við sænska stórmeistarann Stellan Brynell (2463) og Björn Þorfinnsson (2368) og Sverrir Þorgeirsson (2120) gerðu jafntefli.

Efstur er danski stórmeistarinn Lars Scandorff (2526) með 6 vinninga.  Henrik er í 2.-3. sæti með 5,5 vinning ásamt  danska FIDE-meistaranum Nokolaj Mikkelsen (2390).   Bragi og Björn eru í 8.-12. sæti með 3,5 vinning og Sverrir er í 14. sæti með 1,5 vinning.  

Í níundu umferð, sem hefst í fyrramælið mætast:

• Henrik - AM Esben Lund (2403)
• Bragi - Mikkelsen
• FM Daniel Semcesen (2349) - Björn
• Axel Smith (2458) - Sverrir

Alls taka 14 skákmenn þátt í mótinu en alls eru tefldar 11 umferðir.  Meðal þátttakenda eru fjórir stórmeistarar.

 

• Heimasíða mótsins
• Skákir mótsins