Skákþáttur Morgunblaðsins: Friðrik liðsstjóri gömlu meistaranna

Friðrik Ólafsson er liðsstjóri „Reynslunnar" sem þessa dagana etur kappi við úrvalslið kvenna í Marianske Lazne í Tékklandi, smábæ sem er rómaður fyrir heilsulindir.

Friðrik Ólafsson er liðsstjóri „Reynslunnar" sem þessa dagana etur kappi við úrvalslið kvenna í Marianske Lazne í Tékklandi, smábæ sem er rómaður fyrir heilsulindir. Friðrik er að þessu sinni í hlutverki liðsstjóra en Viktor Kortsnoj, Vlastimil Hort, Robert Hubner og Jan Timman heyja keppni á fjórum borðum gegn indversku skákdrottningunni Humpy Koneru, Katerinu Lahno frá Úkraínu og tékknesku skákkonunni Jönu Jackovu og Önnu Muzychuku frá Slóvakíu. Heiðursgestur er fyrrverandi heimsmeistari, Boris Spasskí.

Hinir nafntoguðu jaxlar af gamla skólanum eiga við ramman reip að draga; eftir fimm umferðir af átta höfðu konurnar náð öruggri forystu: 11½ : 8½.

Margvísleg vopnaviðskipti hafa átt sér stað millum sexmenninganna um áratuga skeið. Sumir hafa háð fleiri en eitt einvígi sín í milli. Þar ber hæst tvö mögnuð einvígi sem Spasskí og Kortsnoj háðu með tíu ára millibili en sigurvegarinn vann sér þá inn rétt til skora á heimsmeistarann. Spasskí vann í Kænugarði árið 1968 6½ : 3½ en í Belgrad í ársbyrjun 1978 snerist dæmið við og Kortsnoj vann 10½ : 7½.

16 ára Filippseyingur sló út Ivantsjúk og Kamsky

Fyrir daga Anand og kínversku skákbyltingarinnar voru Filippseyingar herraþjóðin á skáksviðinu í Asíu. Eftir mikinn uppgang á áttunda áratug síðustu aldar var eins og einhver stöðnun tæki við og lítil endurnýjun átti sér þar til nú að 16 ára Filippseyingur Wesley So kveður sér hljóðs á heimsbikarmóti FIDE sem stendur yfir í Khanty Mansiysk í Siberíu. Slær úr keppni tvo af sigurstranglegustu keppendunum, þá Vasilí Ivantsjúk og Gata Kamsky. Ekki vakti minni athygli hvernig nýjar reglur FIDE um mætingu urðu Kínverjunum Wang Yue og Li Chao að fótakefli í 3. umferð; rétt fyrir umferð virðist Wang Yue hafa „slakað jurt" til landa síns Li Chao en þar sem þeir stóðu í hvíldarherberginu og svældu hvor sína rettuna var skáklukkan sett í gang. Engin viðvera þýðir tap: þeir féllu báðir úr keppni.

Yfir 130 skákmenn hófu keppni á heimsbikarmótinu sem fram fer með útsláttarfyrirkomulagi. Gaman var að sjá Judit Polgar mætta til leiks. Hún sigraði Rúmenann í Nisipeanu í 2. umferð 4½ : 3½. Svo mætti hún Boris Gelfand. Fyrri kappskákinni af tveimur tapaði hún svo ekkert nema sigur dugði.

Baráttukraftur hennar í þessari mikilvægu skák er athyglisverður. Kraftmiklir leikir eru 19. g4 og 21. Rf5 en 21. Hxf7 virðist sterkara með hugmyndinni 21. ... Rxd2 22. Rf5! Gelfand er með dágóð færi en flækjurnar eiga illa við hann og þegar hann opnar allt upp á gátt með 27. f5 lifna biskuparnir við, 32. Hg6 er skemmtilegur lokahnykkur.

Heimsbikarmót FIDE:

Judit Polgar - Boris Gelfand

Vínartafl

1. e4 e5 2. Bc4 Rf6 3. d3 c6 4. De2 Be7 5. Rf3 0-0 6. Bb3 d6 7. 0-0 Rbd7 8. c3 a5 9. a4 b5 10. Bc2 Ba6 11. axb5 cxb5 12. Rbd2 Dc7 13. d4 a4 14. Bd3 Hfb8 15. Rh4 g6 16. f4 exf4 17. Rdf3 Rh5 18. Bd2 Rb6 19. g4 fxg3 20. Rg5 Rc4 21. Rf5 Bxg5 22. Bxg5 f6 23. Bh4 gxh2+ 24. Dxh2 Hf8 25. Be2 gxf5 26. Bxh5 fxe4 27. Df4 f5? 28. Kh1! Kh8 29. Hg1 Hf7 30. Bxf7 Dxf7 31. Dh6 Hf8

32. Hg6 - og svartur gafst upp.

Eftir þetta var gripið til skáka með styttri umhugsunartíma og þar varð Ísraelsmaðurinn hlutskarpari. Lokatölur urðu 3½ : 1½ .

Helgi Ólafsson [e-mail]

Skákþáttur Morgunblaðsins: Carlsen heimsmeistari í hraðskák og stigahæstur

NORSKA undrið Magnús Carlsson sem verður 19 ára gamall á mánudaginn sló tvær flugur í einu höggi á minningarmótinu um Mikhael Tal sem lauk í Moskvu í síðustu viku.

NORSKA undrið Magnús Carlsson sem verður 19 ára gamall á mánudaginn sló tvær flugur í einu höggi á minningarmótinu um Mikhael Tal sem lauk í Moskvu í síðustu viku. Í fyrsta lagi komst hann upp fyrir Búlgarann Topalov í efsta sætið á stigalista FIDE og í öðru lagi sigraði hann með glæsibrag á heimsmeistaramótinu í hraðskák sem á eftir fylgdi.

Þegar aðeins tvær umferðir af aðalmótinu voru eftir hafði Magnús gert jafntefli í öllum skákum sínum en á lokasprettinum reif hann sig upp og lagði Ponomariov og síðan Peter Leko. Samkvæmt óbirtum stigalista FIDE munar þó ekki miklu á efstu mönnum: 1. Magnús Carlsen 2.805,7 2. Venselin Topalov 2.805,1

Hvað varðar efsta sætið á minningarmótinu kom endasprettur Magnúsar of seint; Vladimir Kramnik, sem eins og Magnús átti við veikindi að stríða á meðan á mótinu stóð, hafði þá unnið þrjár skákir og stóð að lokum einn uppi sem sigurvegari. Í mótslok lét hann þess getið að hann væri staðráðinn í að endurheimta heimsmeistaratitilinn.

Lokaniðurstaðan varð þessi:

1. Vladimir Kramnik 6 v. 2.-3. Magnús Carlsen og Vasilí Ivantstjúk 5½ v. 4.-5. Levon Aronjan og Wisvanthan Anand 5 v. 6. Boris Gelfand 4½ v. 7. Ruslan Ponomariov 4 v. 8. Peter Svidler 3½ v. 9.-10. Peter Leko og Alexander Morozevich 3 v.

Sigurskák Magnúsar við Ponomariov fylgir hér á eftir. Í ensku árásinni kemur nýr „snúningur" í 11. leik, De1 og eins og svo oft áður snýst taflið um það hvort svartur nái að koma skipulagi á liðsafla sinn. Oft þarf ekki nema einn ónákvæman leik og 16. ...Dc5 virðist ekki svara kröfum stöðunnar. Magnús gerir sig reiðubúinn til að fórna á e6 með 17. Db3! og fyrsta sprengjan fellur í 19. leik. Það er svo 29. leikur hvíts sem endanlega gerir út um taflið. Gott dæmi um alhliða stíl Norðmannsins sem nýtur sín ekki síður í rólegri stöðubaráttu:

Magnús Carlsen - Ruslan Ponomariov

Sikileyjarvörn

1. e4 c5 2. Rf3 d6 3. d4 cxd4 4. Rxd4 Rf6 5. Rc3 a6 6. Be3 e6 7. f3 b5 8. Dd2 Rbd7 9. g4 h6 10. 0-0-0 Re5 11. De1 Dc7 12. h4 b4 13. Rce2 Rc4 14. Rf4 Rxe3 15. Dxe3 Db6 16. Bc4 Dc5 17. Db3 d5 18. exd5 Bd6 19. Rfxe6 fxe6 20. dxe6 Be7 21. Dd3 0-0 22. Bb3 Hd8 23. g5 Rh7 24. gxh6 Dh5 25. De4 Dxh6+ 26. Kb1 Ha7 27. Rf5 Hxd1+ 28. Hxd1 Df6

29. Hd7 Bxd7 30. exd7+ Kf8 31. Dd5

- og svartur gafst upp.

Heimsmeistaramótið í hraðskák sem fram fór strax á eftir dró til sín 22 skákmenn sem tefldu tvöfalda umferð. Mótið stóð í tvo daga. Framan af var Anand í fararbroddi en Magnús seig fram úr á lokasprettinum og vann glæsilegan sigur hlaut 31 vinning af 42 mögulegum sem er nálega 75% vinningshlutfall. Hann var með 10 vinninga af 10 mögulegum á þá fimm skákmenn sem komu næstir á töflunni:

1. Magnús Carlsen 31 v. (af 42) 2. Anand 28 v. 3. Karjakin 25 v. 4. Kramnik 24½ v. 5. Grichukm 24 v. 6.-7. Svidler og Ponomariov 23½ v.

Tímafyrirkomulagið var 3 2 eða þrjár mínútur á alla skákina og síðan tvær sekúndur til viðbótar á hvern leik. Þetta er sennilega of stíft því alltof mörgum skákum lauk með því að annar féll allt í einu á tíma í óljósri stöðu. Greinarhöfundur renndi yfir flestar skákir sigurvegarans en hægt var að fylgjast með mótinu í beinni útsendingu á ýmsum vefsíðum. Óhætt er að fullyrða að handbragðið hafi verið gott. En hjá honum og öðrum sem þátt tóku vantar dálítið upp á þá töfra sem einkenndu Tal. Að lokum:

Í síðasta pistli var sú ágæta kona Guðrún sögð Jónsdóttir en er Sigurjónsdóttir og er beðist velvirðingar á því.

Helgi Ólafsson [e-mail]

Skákþáttur Morgunblaðsins: Landsbyggðarkrakkar á heimsmeistaramóti

Íslendingar eiga fjóra keppendur á heimsmeistaramóti barna og unglinga sem nú stendur yfir í Kemer í Tyrklandi.

Íslendingar eiga fjóra keppendur á heimsmeistaramóti barna og unglinga sem nú stendur yfir í Kemer í Tyrklandi. Bjarni Jens Kristinsson teflir í flokki pilta 18 ára og yngri, Tinna Kristín Finnbogadóttir í sama aldursflokki stúlkna, Mikael Jóhann Karlsson teflir í flokki pilta 14 ára og yngri og Kristófer Gautason í flokki pilta 12 ára og yngri. Í þessu sama móti fyrir tveim árum voru íslensku þátttakendurnir níu talsins en keppnisflokkarnir eru 12 talsins og yngstu þátttakendur sjö eða átta ára gamlir.

Fækkun íslensku keppendanna nú er auðvitað samdráttareinkenni og þar við bætist að mótið er býsna nálægt próftíma framhaldsskólanna. Samsetning íslenska hópsins er þó athyglisverð því fulltrúar okkar koma úr hverjum landsfjórðungi. Eyjamaðurinn Kristófer Gautason má þannig heita fulltrúi Sunnlendinga en faðir hans, Karl Gauti Hjaltason sýslumaður, er formaður Taflfélags Vestmannaeyja og er syninum til halds og trausts á vettvangi í Tyrklandi. Frá Vesturlandi eða öllu heldur Hítardal á Mýrum kemur Tinna Kristín Finnbogadóttir. Mikael Jóhann Karlsson er réttur og sléttur Norðlendingur og býr á Akureyri og fulltrúi Austurlands er Bjarni Jens Kristinsson frá Fjósakambi í Hallormsstað. Fararstjóri og þjálfari hópsins er greinarhöfundur.

Samanburður við Norðurlönd, sem stundum er gripið til, er íslenskum ungmennum hagstæður á skáksviðinu en þar sem Tyrkland liggur nálægt ýmsum stórveldum skákarinnar þyngist róðurinn. Hér í eina tíð þótti það nær örugg ávísun á miklar framfarir að teflan austan járntjalds en þótt skákin hafi misst stöðu sína að einhverju leyti þar er skákhefðin engu að síður afar sterk. Fyrir hina fjölmörgu keppendur frá Rússlandi, Armeníu, Georgíu, Aserbaídsjan og ýmis önnur ríki Austur-Evrópu má ferðast skjótt á keppnisstað. Utar liggja hin nýju stórveldi skákarinnar Indland og Kína. Þessi lönd senda fjölmarga þátttakendur til leiks og því er þetta heimsmeistaramót ungmenna „djúpa laugin" í skákinni.

Sem stendur hefur Tinna Kristín náð bestum árangri með 3 vinninga af sex mögulegum en hinir koma í humátt á eftir.

Tinna hóf að tefla fyrir alvöru þegar Guðrún Jónsdóttir frá Glitstöðum í Norðurárdal tók fyrir nokkrum árum að stefna börnum og unglingum úr sveitinni í kring á skákæfingar í Borgarnesi. Hún varð í 2.-3. sæti ásamt Hallgerði Helgu Þorsteinsdóttur á Íslandsmóti kvenna á dögunum og hlýtur að knýja dyra hjá Ólympíuliði kvenna á næsta ári. Í 3. umferð vann hún sannfærandi sigur í skák sem hér fer á eftir. Útþensla peðanna á drottningarvæng var fyrirfram ráðgerð en svartur má gæta þess að riddari taki sér bólfestu á c5. Þegar svartur bjóst til gagnatlögu á drottningarvæng uggði hann ekki að sér því biskupinn sem réðst inn til atlögu á d7 tætti sundur peðakeðjuna með hinum óvænta 23. leik:

Kemer 2009; HM ungmenna 18 ára og yngri

Tinna Kristín Finnbogadóttir - Amira Hamza (Alsír)

Frönsk vörn

1. e4 e6 2. d4 d5 3. e5 c5 4. c3 Rc6 5. Rf3 Bd7 6. a3 cxd4 7. cxd4 f6 8. b4 Dc7 9. Bf4 Rge7 12. Bg3 f5 11. Rbd2 Rg6 12. h4 h5 13. Hc1 Db6 14. Rb3 Be7 15. Bd3 Rd8 16. O-O Ba4 17. Bc2 Bxb3 18. Bxb3 Rf7 19. Ba4+ Kf8 20. Dd3 a5 21. bxa5 Dxa5 22. Bd7 Rd8

23. Bxe6 Bxa3 24. Hb1 b5 25. Dxf5+ Ke7 26. Bxd5

- og svartur gafst upp.

Í Tyrklandi eru tefldar ellefu umferðir og lýkur mótinu nú um helgina.

Helgi Ólafsson [e-mail]

Skákþáttur Morgunblaðsins: Anand og Kramnik í forystu á minningarmótinu um Tal

Það voru góð tíðindi er Indverjinn Anand varði heimsmeistaratitil sinn í einvígi við Vladimir Kramnik í Þýskalandi fyrir ári síðan. Hann er verðugur heimsmeistari.

Það voru góð tíðindi er Indverjinn Anand varði heimsmeistaratitil sinn í einvígi við Vladimir Kramnik í Þýskalandi fyrir ári síðan. Hann er verðugur heimsmeistari. Innan skamms mun hann kljást við stigahæsta virka skákmanns heims, Venselin Topalov og mun einvígið fara fram í Sofia í Búlgaríu. Æskilegra hefði verið að finna „hlutlausan" vettvang fyrir þessa miklu keppni en Búlgarar buðu best og Topalov verður áreiðanlega dyggilega studdur af heimamönnum.

Anand er í sviðsljósinu þessa dagana á minningarmótinu um Tal í Moskvu. Þegar þetta er ritað er hann í efsta sæti ásamt Kramnik en báðir hafa þeir hlotið 3 ½ vinning úr fimm skákum. Aronjan er í 3. sæti en 80% jafnteflishlutfall heldur keppendum i einum hnapp, Magnús Carlsen hefur gert jafntefli í öllum skákum sínum illa haldinn af „háls-smugu", en það sjúkdómsheiti er komið frá afmælisbarni dagsins, Jóni L. Árnasyni.

Í sögulegu samhengi er þátttaka Anand athyglisverð; þetta er í fyrsta sinn síðan 1925 að „erlendur" heimsmeistari teflir á ofurmóti í Moskvu. Þá sótti Jose Raoul Capablanca borgina heim við gríðarlega athygli en frægasta viðureign hans úr þeirri ferð var þó skák utan móts - er hann tapaði í fjöltefli fyrir 14 ára pilti, Mikhael Botvinnik.

Til að skyggnast bak við sigur Anands yfir hinum fræðilega sterka Ungverja Peter Leko í 5. umferð er nauðsynlegt að hafa undir höndum aðra skák milli Frakkans Bacrot og Armenans Aronjan, sem nýlega var tefld á Evrópumóti landsliða í Novi Sad. Sennilega hefur Anand látið nokkur forrit „malla" yfir stöðum sem þar komu upp a.m.k. er erfitt að finna á tapleik Leko, flestir leikir hans eru t.d. fyrsta val „Rybku", þess öfluga tölvuforrits. Kannski var 30. ... Hc7 björgunarleikurinn en það er býsna langsótt.

Eitt atriði um byrjunina: 13. leikur hvíts byggist á hugmyndinni 13. ... Rxe5 14. Dxd4! Rf3+ 15. gxf3 Bxd4 16. Hfe1+ og vinnur. Leko brá á það ráð að gefa mann og satt að segja virtist hafa góðar bætur eða þar til Anand skilaði feng sínum til baka með 22. Rxd4. Leko gat reynt 23. ... Hf6 en hvítur heldur frumkvæðinu. Þessi skák er enn eitt dæmið um það hversu mikilvægar tölvurnar eru við undirbúning:

Minningarmótið um Tal; 5. umferð:

Wisvanathan Anand - Peter Leko

Slavnesk vörn

1. d4 d5 2. c4 c6 3. Rf3 Rf6 4. Rc3 e6 5. Bg5 h6 6. Bh4 dxc4 7. e4 g5 8. Bg3 b5 9. Be2 Bb7 10. O-O Rbd7 11. Re5 Bg7 12. Rxd7 Rxd7 13. Bd6 a6 14. a4 e5 15. Bg4 exd4 16. e5 c5 17. He1 Rxe5 18. Bxe5 O-O 19. Bxg7 Kxg7 20. Re2 f5 21. Bh5 f4

22. Rxd4 cxd4 23. He6 Bc8 24. Hg6 Kh7 25. axb5 Hf6 26. Hxf6 Dxf6 27. Dc2 Bf5 28. Dxc4 Hc8 29. Dd5 axb5 30. h3 Kh8 31. Dxb5 Hf8 32. Ha6 Dg7 33. Hd6 d3 34. Db6 De5 35. Bg6 d2 36. Bxf5 Dxf5 37. Dd4 Kh7 38. Dxd2 Hf7 39. f3 h5 40. Hd5 Dg6 41. Da5 Hg7 42. h4 Db1 43. Kh2 Dxb2 44. Hxg5 Hxg5 45. Dxg5

- og svartur gafst upp.

Helgi Ólafsson [e-mail]

Skákþáttur Morgunblaðsins: Vinsælasti meistarinn

Þegar Mikhael Botvinnik tók til við að tefla aftur skák sem farið hafði í bið í afar erfiðri stöðu í einu af heimsmeistaraeinvígjunum sem hann háði á sjötta áratug síðustu aldar tóku glöggir menn eftir því að hinn úr hófi fram vanafasti heimsmeistari...

Þegar Mikhael Botvinnik tók til við að tefla aftur skák sem farið hafði í bið í afar erfiðri stöðu í einu af heimsmeistaraeinvígjunum sem hann háði á sjötta áratug síðustu aldar tóku glöggir menn eftir því að hinn úr hófi fram vanafasti heimsmeistari var ekki með kaffibrúsann með sér. Slíkt var algjör nýlunda. Fáir vissu að þetta var gildra. Með því að skilja kaffibrúsann eftir vildi Botvinnik gefa þau skilaboð til mótstöðumanns síns Vasilís Smyslovs að staðan væri svo gjörsamlega vonlaus að ekki tæki því að taka kaffibrúsann með. Botvinnik vonaðist til þess að Smyslov myndi fyllast falskri öryggiskennd en hann hafði eftir margra klukkutíma rannsóknir á biðstöðunni fengið hugmynd að hreint ævintýralegri björgunarleið.

1987: Skammt var liðið á 17. einvígisskák Karpovs og Kasparovs og sá fyrrnefndi var á leið út af sviðinu í Lope de Vega-leikhúsinu í Sevilla inn í hvíldarherbergi sitt. Kasparov flýtti sér að leika; hann grunaði Karpov, sem átti erfitt með að muna langar leikjaraðir, um að geyma minnismiða í axlapúðum jakkans sem hann íklæddist. En Karpov fór samt inn í hvíldarherbergið.

Tortryggni og leynimakk og ýmis óhrein meðul voru alla tíð fylgifiskar sovéska skákskólans. En þegar Mikhael Tal kom fram á sjónarsviðið varð einhvern veginn léttara yfir mönnum. Sennilega hefur enginn skákmaður notið viðlíkra vinsælda og Tal. Leikgleði hans og hugdirfska bylti skákheiminum á sínum tíma; Tal kvaðst aldrei hafa verið gefinn fyrir flókna útreikninga við skákborðið heldur fylgdi hann innsæi og tilfinningu fyrir gildi frumkvæðis. Tal kom hingað til lands við ýmis tækifæri og var ávallt aufúsugestur. Hann féll frá 55 ára gamall árið 1992.

Sterkasta mót ársins, sem hófst í Moskvu sl. fimmtudag, er helgað minningu töframannsins frá Riga eins og Tal var jafnan kallaður. Þar eru samankomnir tíu af tólf stigahæstu skákmönnum heims, heimsmeistarinn Anand er meðal þátttakenda en stigahæsti keppandinn er Magnús Carlsen sem á dögunum rauf 2.800 stiga múrinn.

Töfluröðin er þessi: 1. Magnús Carlsen. 2. Alexander Morosevich. 3. Boris Gelfand. 4. Levon Aronjan. 5. Vasilí Ivantsjúk. 6. Wisvanathan Anand. 7. Peter Svidler 8. Ruslan Ponomariov. 9. Peter Leko. 10. Vladimir Kramnik.

Í þessu þétt skipaða móti verður skemmtilegt að fylgjast með hinum unga Magnúsi Carlssyni sem nýtur liðsinnis Kasparovs. Í fyrstu umferð lauk öllum skákunum með jafntefli en sú bitastæðasta var viðureign Magnúsar við Kramnik sem átti vinningsmöguleika undir lokin eftir miklar sviptingar í byrjun og miðtafli:

Magnús Carlsen - Vladimir Kramnik

Nimzoindversk vörn

1. d4 Rf6 2. c4 e6 3. Rc3 Bb4 4. Dc2 0-0 5. a3 Bxc3 6. Dxc3 d5 7. cxd5 Re4 8. Dc2 exd5 9. Bf4 Rc6 10. e3 He8 11. Rf3 g5 12. Bg3 g4 13. Re5 Rxe5 14. Bxe5 c5 15. Bd3 Bf5 16. De2 f6 17. Bxe4 Bxe4 18. Bg3 Da5+ 19. Dd2 Dxd2+ 20. Kxd2 c4 21. f3 gxf3 22. gxf3 Bg6 23. h4 Bh5 24. Ke2 He6 25. Be1 Kf7 26. Kf2 Hae8 27. Bd2 Hb6 28. Bc3 Hb3 29. a4 b6 30. Hhe1 Bg6 31. e4 dxe4

(Sjá Stöðumynd)

32. d5 a6 33. fxe4 Bxe4 34. d6 f5 35. Hg1 Ke6 36. Hg7 Kxd6 37. Hxh7 Bd3 38. Kf3 He4 39. h5 Hh4 40. Hg1 Be4+ 41. Ke3 Hh3+ 42. Kf4 Hf3+ 43. Kg5 b5 44. axb5 axb5 45. Kf6 Hbxc3 46. bxc3 Hxc3 47. Hg8 Hh3 48. Hc8 c3 49. Hhc7 c2 50. Kg5 Hh2 51. Hc3 Ke6 52. He8+ Kf7 53. Hb8 Hg2+ 54. Kf4 Ke6 55. He8+ Kd7 56. Hb8 Ke6 57. He8+ Kf6 58. Hf8 Ke6

- Jafntefli.

Að loknu minningarmótinu fer fram heimsmeistarakeppni í hraðskák.

Helgi Ólafsson [e-mail]

• Skákþættir Morgunblaðsins

 

Skákþáttur Morgunblaðsins: Krókur á móti bragði

Margar frægustu viðureignir skáksögunnar tengjast seinkaðri komu keppenda að skákborðinu. Alþjóðaskáksambandið hefur girt fyrir slíkt háttalag. Nú eiga allir að sitja við borðið þegar umferð hefst.

Margar frægustu viðureignir skáksögunnar tengjast seinkaðri komu keppenda að skákborðinu. Alþjóðaskáksambandið hefur girt fyrir slíkt háttalag. Nú eiga allir að sitja við borðið þegar umferð hefst. Sértu of seinn, þá tapar þú góurinn, er hin nýja dagskipun FIDE og hefur tekið gildi á Evrópumóti landsliða í Novi Sad. Andstæðingur Dags Arngrímssonar úr 1. umferð, Tékkinn Viktor Laznicka, var fimm sekúndum of seinn þegar hann mætti til leiks í næstu umferð og var þegar í stað dæmt tap. Annar möguleiki til að tapa án baráttu birtist í viðureign Búlgara og Englendinga í 3. umferð. Þegar allir Búlgararnir voru sestir eins og reglur gera ráð fyrir hringdi farsími 3. borðs mannsins Delchev. Fremur vandræðaleg uppákoma og félagar hans í liðinu, Toplaov og Cheparinov, vissu greinilega ekki hvort þeir áttu að hlæja eða gráta, ef marka má myndband af vefsíðu mótsins. En Cheparinov var áreiðanlega ekki skemmt þegar hann mætti áðurnefndum Viktor Laznicka í 6. umferð:

Cheparinov - Laznicka

Sikileyjarvörn

1.e4 c5 2. Rf3 e6 3. d4 cxd4 4. Rxd4 Rc6 5. Rc3 a6 6. Rxc6 bxc6 7. e5 Dc7 8. Bf4 f5 9. g4 Rh6 10. gxf5 Rxf5 11. Df3 Bb4 12. Bd3 O-O 13. Hg1 Bb7 14. O-O-O Bxc3 15. bxc3 c5 16. Dg4 Hf7 17. Bxf5 exf5 18. Dh5 Dc6 19. Hd3 Da4 20. Dh6 Dc6 21. Hd6 De4 22. e6 dxe6 23. Hxe6 Dc4 24. Be5

( Hvítur hefur uppi hótanir gagnvart g7. En svartur sá sér leik á borði. )

24. ... Bg2!

25. Hxg2 er nú svarað með 25. ... Df1+ og 26. ... Dxg2

25. Bxg7 Hxg7 26. He7! Dxc3

( Og nú er ekkert meira en jafntefli að hafa með 27. Hxg7 Dxg7 28. Dxg7 og 29. Hxg2+ o.s.frv. Cheparinov gáir ekki að sér.)

27. Hxg2?? Da1+! 28. Kd2 Hd8+

og hvítur gafst upp.

Íslenska liðið liggur þegar þetta er ritað í 33. sæti með 11½ vinning og 4 stig sem er heldur lakari frammistaða en vonir stóðu til en þeir geta lagað stöðu sína í lokaumferðunum. Ekki er uppörvandi fyrir þessa pilta að sitja undir stöðugum árásum frá aðila, nýsloppnum úr eins árs straffi, sem á vinsælu umræðuhorni Skákarinnar hefur verið að „þeysa spýju" yfir börn og unglinga í u.þ.b. tíu ár. Fátt virðist geta sefað huga þessa einstaklings nema þá helst er illa gengur og minnir hann þannig sífellt á púkann á fjósbitanum úr Þjóðsögum Jóns Árnasonar.

Úrslitaskák í fyrstu umferð

Margt bendir til þess að viðureign Lenku Ptacnikovu og Hallgerðar Helgu Þorsteinsdóttur í 1. umferð Íslandsmóts kvenna sem nú stendur og lýkur á sunnudag reynist úrslitaskák mótsins. Hallgerður sem á titil að verja mátti játa sig sigraða eftir langa og stranga viðureign en missti niður gjörunnið tafl í tímahraki. Keppendur í efsta flokki eru sex talsins og er Lenka sú eina sem hefur unnið báðar skákir sínar en þær Hallgerður, Harpa Ingólfsdóttir, Tinna Kristín Finnbogadóttir og Elsa María Kristínardóttir hafa allar einn vinning.

Helgi Ólafsson [e-mail]

Skákþáttur Morgunblaðsins birtist á Skák.is

Helgi Ólafsson farinn á ný að skrifa vikulega skákpistla fyrir Morgunblaðið.  Skákþættir Helga munu birtast í Sunnudagsmogganum en sá fyrsti birtist um helgina eftir alllangt hlé. 

Framvegis verða skákþættir Helga endurbirtir á Skák.is og verða birtir á sunnudagskvöldum eða mánudagsmorgnum framvegis.  Fyrsti þátturinn er hér:

Íslendingar töpuðu 1 ½ : 2 ½ fyrir Tékkum á Evrópumóti landsliða sem hófst á fimmtudaginn í Novi Sad í Serbíu. Íslenska liðið sem er skipað þeim Jóni Viktor Gunnarssyni, Degi Arngrímssyni, Birni Þorfinnssyni og Braga Þorfinnssyni er nr.

Íslendingar töpuðu 1 ½ : 2 ½ fyrir Tékkum á Evrópumóti landsliða sem hófst á fimmtudaginn í Novi Sad í Serbíu. Íslenska liðið sem er skipað þeim Jóni Viktor Gunnarssyni, Degi Arngrímssyni, Birni Þorfinnssyni og Braga Þorfinnssyni er nr. 32 í styrkleikaröðinni af 38 þátttökuþjóðum.

Það bar helst til tíðinda að Dagur Arngrímsson vann stórmeistarann Viktor Laznicka, og Bragi Þorfinnsson gerði jafntefli við Robert Cvek. Jón Viktor tapaði hinsvegar fyrir David Navara og Björn fyrir Vlastimil Babula. Tékkneska liðið er þrettánda í styrkleikaröðinni.

Margir af sterkustu skákmönnum heims taka þátt í Evrópumótinu t.a.m. Venselin Topalov sem er stigahæsti skákmaður heims. Á dögunum var gengið frá því að einvígi hans við Wisvanathan Anand um heimsmeistaratitilinn fari fram í Sofía í Búlgaríu í apríl nk. Nýr forsætisráðherra Búlgaríu, Boyko Borisov, hefur persónulega ábyrgst verðlaunafé sem nemur 2 milljónum evra.

Íslenska liðið er ágætlega frambærilegt og fylgja því góðar óskir. Það vekur þó athygli að sigurvegararnir frá síðasta Reykjavíkurmóti þeir Hannes Hlífar Stefánsson og Héðinn Steingrímsson eru ekki í liðinu að þessu sinni. Vegna kostnaðar virðist Skáksambandið hafa gefið mótið frá sér en styrkir þó íslensku þátttakendurna að einhverju leyti. Þessi afstaða vekur ýmsar spurningar. Fyrir liggur að mótið er ein öflugasta flokkakeppni sem um getur og ætti að vera á verkefnaskrá SÍ.

Önnur „ekki-þátttaka“ vekur mikla athygli. Magnús Carlsen, nýkominn frá miklum sigri í Kína, hætti við að tefla með Norðmönnum en hann mun taka þátt í minningarmóti um Mikhail Tal sem hefst í Moskvu í byrjun nóvember. Almennt er álitið að nýr þjálfari Magnúsar sjálfur Garrí Kasparov hafi ráðlagt Magnúsi að hvíla sig fyrir þátttöku í Moskvu.

Sigur Dags fylgir hér á eftir. Í flókinni og skemmtilegri baráttuskák missir hvítur tök á stöðunni og Degi tekst með nokkrum hnitmiðuðum leikjum að knýja fram sigur. Þegar hvítur féll á tíma eftir 38 leiki var staða hans sennilega töpuð.

EM - Novi Sad 2009; 1. umferð: Viktor Laznicka – Dagur Arngrímsson

Slavnesk vörn

1. d4 d5 2. c4 c6 3. Rf3 Rf6 4. e3 Bf5 5. Rc3e6 6. Rh4 Be4 7. f3 Bg6 8. Db3 Db6 9. Rxg6 hxg6 10. Bd2 Rbd7 11. Bd3 Be7 12. O-O g5 13. g3 Hd8 14. Hf2 Dxb3 15. axb3 a6 16. g4 O-O 17. Bf1 e5 18. h3 exd4 19. exd4 c5 20. He2 Bd6 21. Rxd5 Rxd5 22. cxd5 cxd4 23. Bxg5 f6 24. Bd2 Rc5 25. Ha3 Rd3 26. Ha2 Be5 27. b4 Bd6 28. b5 axb5 29. He4 Re5 30. Kg2 Hc8 31. b3 Ha8 32. Hxa8 Hxa8 33. Bxb5 Ha2 34. He2 d3 35. Hf2 Bc5 36. Be3 Ha5 37. Bxc5 Hxb5 38. b4 b6

- og hvítur féll á tíma.

Hjörvar vann átta skákir í röð

Hjörvar Steinn Grétarsson vann glæsilegan sigur í Haustmóti Taflfélags Reykjavíkur sem lauk í síðustu viku. Hjörvar hlaut 8 vinninga af 9 mögulegum í A-riðli og gerði sér lítið fyrir og vann átta fyrstu skákir sínar en tapaði í lokaumferðinni fyrir Sigurbirni Björnssyni. Hjörvar hækkar um tæp 40 stig fyrir frammistöðuna sem er reiknuð uppá 2587 elo-stig. Lenka Ptacnikova varð í 2. sæti með 6 ½ vinning en Ingvar Þ. Jóhannesson þriðji með 6 vinninga. Sigurður Daði Sigfússon varð efstur TR-inga í 4. – 5. sæti með 5 ½ vinning og hlýtur því nafnbótina Skákmeistari TR 2009. Í B-riðli sigraði Patrekur Maron Magnússon en Helgi Brynjarsson og Frímann Benediktsson komu næstir. Friðrik Þjálfi Stefánsson vann C-riðilinn og Örn Leó Jóhannesson D-riðilinn.

Helgi Ólafsson [e-mail]