Barnaskákmót í Ráðhúsinu

Skákfélagið Hrókurinn stendur fyrir barnaskákmóti í Ráðhúsi Reykjavíkur, sunnudaginn 24. febrúar kl. 14. Mótið er opið öllum börnum, yngri en 15 ára, og er þátttaka ókeypis. Stúlkur verða sérstaklega boðnar velkomnar af Guðfríði Lilju Grétarsdóttur, forseta SÍ.
 
Tefldar verða 5 umferðir og eru mörg verðlaun í boði, m.a. frá Henson, Forlaginu, Glitni, Bónus o.fl. Sigurvegarinn fær verðlaunabikar frá Árna Höskuldssyni gullsmið og verðlaunapeningar eru fyrir efstu sætin.
 
Allir eru velkomnir. Skráning í [e-mail] og í Ráðhúsinu frá klukkan 13 á sunnudag.

Guðmundur norðurlandameistari!

Guðmundur Kjartansson varð rétt í þessu norðurlandameistari í skólaskák.  Hann varð í 1.-2. sæti í a-flokki en vann Færeyinginn Helga Dam Ziska á hálfu stigi eftir stigaútreikning.   Sverrir Þorgeirsson og Dagur Andri Friðgeirsson enduðu í 2. sæti og Daði Ómarsson í þriðja sæti.  Patrekur Maron Magnússon, sem vann fjórar skákir í röð, og Friðrik Þjálfi Stefánsson urðu í skiptu þriðja sæti en enduðu í fjórða sæti eftir stigaútreikning.

Páll Sigurðsson og Davíð Ólafsson voru liðsstjórar íslenska liðsins.   

Pistill Davíðs:

Úrslit hjá íslensku keppendunum urðu eftirfarandi:

Guðmundur Kjartansson (2307) - Anders G. Hagen, Noregur (2049)         1-0
Atli Freyr Kristjánsson (2019) - Rasmus Lund Petersen, Danmörk (1800) 1-0
Daði Ómarsson (1999) - Sverrir Þorgeirsson (2120)                               0,5-0,5
Erik Vaarala, Svíþjóð (1720) - Patrekur Maron Magnússon (1785)             0-1
Svanberg Már Pálsson (1820) - Jonathan Westerberg, Svíþjóð (1791)        0-1
Dagur Andri Friðgeirsson (1799) - Friðrik Þjálfi Stefánsson (1455)           0,5-0,5
Kristófer Gautason (1245) - Johan Salomon, Noregur (735)                       1-0
Valdemar Stenhammar, Svíþjóð (1021) - Dagur Ragnarsson (0)                 0-1
 
Í A-flokki sigraði Guðmundur eftir mikla baráttu.  Hann var síðastur að klára og voru spenntir Íslendingar og Færeyingar í kringum borðið.  Hann vann að lokum og hafði betur í stigaútreikningi um 1. sætið gegn alþjóðlega meistaranum Helga Dam Ziska frá Færeyjum.  Guðmundur Kjartansson er því Norðurlandameistari í A-flokki 2008!  Atli Freyr vann öruggan sigur á andstæðingi sínum og endaði í 6.-9. sæti.  Í B-flokki gerður Daði og Sverrir jafntefli eftir nokkra baráttu.  Góður árangur hjá þeim félögum sem enduðu í 2. og 3. sæti í flokknum.  Í C-flokki sigraði Patrekur andstæðing sinn í góðri skák en Svanberg tapaði fyrir þeim sem lenti í öðru sæti í flokknum.  Patrekur mjög nálægt því að ná verðlaunum en endaði í 4. sæti eftir stigaútreikning.  Svanberg endaði í 10. sæti.  Í D-flokki gerðu Dagur Andri og Friðrik Þjálfi innbyrðis jafntefli eftir litla baráttu.  Þeir hefðu gjarnan mátt tefla aðeins lengur því allar skákir í svona mótum eru góð æfing.  Dagur Andri endaði í 2. sæti í þessum flokki en Friðrik Þjálfi var óheppinn að ná ekki verðlaunum og endaði í 4. sæti.  Í E-flokki tapaði Kristófer eftir að hafa leikið illa af sér manni á meðan Dagur sigraði örugglega andstæðing sinn.  Dagur endaði í 4. sæti og Kristófer endaði í 5.-7. sæti.
 
Í heildina má segja að árangurinn á mótinu hafi verið mjög góður.  Flest allir íslensku keppendanna eru að ná 50% eða hærra vinningshlutfalli.  Ísland endaði í 2. sæti á eftir Noregi í keppni þjóðanna, en Norðmenn virtust vera með gríðarlega sterkt lið hér.
 
Lokastaðan í Landskeppninni:
Noregur    38 
Ísland       35,5
Svíþjóð      32
Finland      31,5
Danmörk   22,5
Færeyjar   21,5
 
Kveðja,
Davíð

 

Tenglar:

• Heimasíða mótsins
• Skákir í beinni
• Myndaalbúm
• Bloggsíða Karls Gauta

NM: Pistill fimmtu umferðar

Hinn geðþekki liðsstjóri á NM í skólaskák, Davíð Ólafsson, hefur sett saman pistil fyrir fimmtu umferð.  

Pistillinn:

Frábært gengi í 5. umferðinni 8,5 vinningar af 10 mögulegum í hús!  Það hlaut að koma að því að við næðum einni umferð með frábæru skori, enda eru drengirnir að leggja allt sitt í hverja umferð.
 
Úrslitin í morgun voru eftirfarandi:

Guðmundur Kjartansson (2307) - Michael Nguyen, Danmörk (2148)       1-0
Atli Freyr Kristjánsson (2019) - Johannas L. Kvisla, Noregur (2130)     0,5-0,5
Sverrir Þorgeirsson (2120) - Jon Kristian Harr, Noregur (1922)                1-0
Daði Ómarsson (1999) - Rogvi Egilstoft Nielsen, Færeyjar (1839)           1-0
Pætur Poulsen, Færeyjar (1140) - Patrekur Maron Magnússon (1785)     0-1
Runi Egholm Vörmadal, Færeyjar (1355) - Svanberg Már Pálsson (1820) 0-1
Erik Rönkä, Finland (1702) - Dagur Andri Friðgeirsson (1798)                  0-1
Peter Flermoen, Noregur (1996) - Friðrik Þjálfi Stefánsson (1455)             0-1
Kristófer Gautason (1245) - Farzam Firooznia, Danmörk (1000)               1-0
Dagur Ragnarsson (0) - Sjúrður Olsen, Færeyjar (1000)                          1-0
 
Í A-flokki vann Guðmundur góðan og fremur öruggan sigur þar sem hann hafði frumkvæðið allan tíman.  Atli Freyr gerði jafntefli þar sem andstæðingurinn tefldi grjótgarðinn og hélt sér fast.  Í B-flokki vann Sverrir góðan sigur eftir að hafa fengið örlítið verra út úr byrjuninni en snéri fljótlega á andstæðinginn og vann tvö peð sem gerði eftirleikinn auðveldan.  Daði sigraði andstæðing sinn í góðri skák.  Drengurinn sá telur ekki peðin þegar hann er í sókn!  Þegar ég sá stöðuna hjá honum hugsaði ég bara - "það er eins gott að sóknin gangi upp því annars er andstæðingurinn með fjögur samstæð frípeð!  Ekki þurfti ég að hafa frekari áhyggjur þar sem andstæðingur hans gafst upp skömmu síðar saddur lífdaga.  Í C-flokki sigraði Patrekur andstæðing sinn í góðri skák þar sem hann kláraði aðra umferðina í röð með snyrtilegri mannsfórn.  Svanberg sigraði sinn andstæðing áreynslulítið.  Í D-flokki vann Dagur Andri góðan sigur þar sem hann með mikilli þolinmæði braut niður vörn andstæðingsins sem reyndi að halda sér fast með Hrók og Biskup gegn Drottningu.  Friðrik Þjálfi tapaði frekar slysalega fyrir andstæðingi sínum.  Hann bar heldur mikla virðingu fyrir andstæðingnum sem teflir í þessum flokki eins og sá sem valdið hefur.  Friðrik þarf bara að átta sig á því að hann er engu verri skákmaður en þessir strákar sem hafa miklu fleiri skákstig en hann.  Ég spái því að Friðrik eigi eftir að hækka hratt á stigum í næstu mótum.  E-flokkurinn var líflegur að vanda.  Kristófer sigraði andstæðing sinn örugglega og var hálf fúll yfir því að hann gafst strax upp hróki undir.  Hann vildi fá að máta drenginn eftir kúnstarinnar reglum!  Það er ljóst að Ísland vinnur í keppninni um líflegasta skákmanninn.  Dagur Ragnarsson ber þann titil með sóma.  Hann er einstaklega opinn og líflegur drengur sem lifir sig vel inn í það sem hann er að gera.  Í skákinni í dag lenti hann skiptamun undir en var engu að síður með góða stöðu.  Að lokum kom að því að hann gat gaflað Biskup og Kóng andstæðings síns með Riddara.  Af mikilli innlifun skákaði hann Biskupinn af og um leið heyrðist hátt í skáksalnum "yeeesss".
 
Stemningin í hópnum hér í Danmörku er mjög góð og tóku yngstu drengirnir sig til í hádeginu og burstuðu Svía 4-0 í óopinberum landsleik í fótbolta.
 
Síðasta umferðin verður tefld klukkan 16 að dönskum tíma.  Við vorum að vísu svo óheppnir að Sverri og Daði tefla saman, sem og Dagur Andri og Friðrik Þjálfi.
 
Kveðja,
Davíð 

Tenglar:

• Heimasíða mótsins
• Skákir í beinni
• Myndaalbúm
• Bloggsíða Karls Gauta

NM: 8,5 vinningur af 10 mögulegum í fimmtu umferð!

Það gekk glimrandi vel hjá íslensku krökkunum í fimmtu og næstsíðustu umferð Norðurlandamótsins í skák sem fram fór í morgun.   Alls komu 8,5 vinningur í hús af 10 mögulegum!  Íslensku skákmennirnir hafa því hlotið 29,5 vinning af 50 mögulegum.  

Dagur Andri Friðgeirsson hefur flesta vinninga íslensku skákmannanna eða 4 vinninga, Guðmundur Kjartansson og Sverrir Þorgeirsson hafa 3,5 vinning og Daði Ómarsson, Patrekur Maron Magnússon, eftir 3 vinningsskákir í röð, Friðrik Þjálfi Stefánsson og Kristófer Gautason hafa 3 vinninga, Dagur Ragnarsson 2,5 vinning, og Atli Freyr Kristjánsson og Svanberg Már Pálsson 2 vinninga.  

Fljótlega er svo pistill Davíðs Ólafssonar liðsstjóra væntanlegur en á meðan beðið er eftir honum hvet ég skákáhugamenn til að lesa bloggsíðu Karls Gauta, skoða myndir frá mótinu eða lesa úttekt Björns Þorfinnssonar um mótið á Skákhorninu.

Tenglar:

• Heimasíða mótsins
• Skákir í beinni
• Myndaalbúm
• Bloggsíða Karls Gauta

NM: Sjö vinningar í fjórðu umferð!

Vel gekk hjá íslensku skákmönnunum í fjórðu umferð Norðurlandamótsins í skák sem fram fór í kvöld í Tjele í Danmörku.  Alls komu sjö vinningar í hús af 10 mögulegum!   Daði Ómarsson, Patrekur Maron Magnússon, Svanberg Már Pálsson, Dagur Andri Friðgeirsson, Friðrik Þjálfi Stefánsson og Kristófer Gautason sigruðu en Guðmundur Kjartansson og Sverrir Þorgeirsson gerðu jafntefli.   Dagur og Friðrik hafa 3 vinninga, Guðmundur og Sverrir hafa 2,5 vinning en aðrir minna.   Nýr pistill frá Davíð liðsstjóra hefur borist!

Rétt er að benda á að nú er komið myndaalbúm frá mótinu sem inniheldur alls 70 myndir frá Páli Sigurðssyni, sem er liðsstjóri ásamt Davíð.  Takk Palli og Davíð fyrir afar góðar upplýsingar frá skákstað!

Einnig er rétt að benda á blogg síðu Karls Gauta, föður Kristófer.  Sjá tengla í enda fréttarinnar. 

Pistill Davíðs:

Í 4. umferð urðu úrslit hjá íslensku keppendunum urðu eftirfarandi:
 
Simon Rosberg, Svíþjóð (2246) - Guðmundur Kjartansson (2307)                0,5-0,5
IM Helgi Dam Ziska, Færeyjar (2406) - Atli Freyr Kristjánsson                       1-0
Pohjala Henri, Finland (2039) - Sverrir Þorgeirsson (2120)                           0,5-0,5
Daði Ómarsson (1999) - Timmy Forsberg, Svíþjóð (2068)                               1-0
Patrekur Maron Magnússon (1785) - Runi Egholm Vörmadal, Færeyjar (1355) 1-0
Svanberg Már Pálsson (1820) - Pætur Poulsen, Færeyjar (1140)                    1-0
Dagur Andri Friðgeirsson (1798) - Daniel Ebeling, Finland (1845)                     1-0
Friðrik Þjálfi Stefánsson (1455) - Mattis Olofsson-Dolk, Svíþjóð (1435)             1-0
Valdemar Stenhammar, Svíþjóð (1021) - Kristjófer Gautason (1245)                 0-1
Dagur Ragnarsson (0) - Aryan Tari, Noregur (1299)                                         0-1
 
Í A-flokki gerði Guðmundur jafntefli í langri skák þar sem hann komst lítið áleiðis gegn þéttri taflmennsku andstæðingsins.  Atli Freyr tapaði fyrir alþjóðlega meistaranum frá Færeyjum í skemmtilegri skák þar sem allt var í háalofti allan tíman.  Í B-flokki gerði Sverrir jafntefli í mjög langri skák sem hann reyndi mikið að vinna. Það er reglulega gaman að sjá til Sverris á þessu móti þar sem hann teflir allar skákir í botn.  Daði vann mjög góðan sigur í sinni skák og sýndi þar kunnáttu sína í Svesnikov varíantinum.  Drengirnir í C-flokki áttu mjög góðan dag þar sem þeir unnu báðir tiltölulega auðvelda sigra.  Svanberg fékk strax betra tafl í sinni skák og landaði öruggum sigri.  Patrekur fékk þægilega stöðu upp úr byrjuninni og gerði út af við andstæðinginn með góðri mannsfórn.  Í D-flokki gekk einnig mjög vel.  Dagur Andri tefldi mjög aggresivt gegn sterkum andstæðingi og fórnaði manni fyrir sókn.  Að lokum náði hann að skipta út í þægilegt peðsendatafl sem hann vann örugglega.  Friðrik Þjálfi tefldi rólega og vandað að venju og átti í engum vandræðum með andstæðing sinn.  Í E-flokki var fjör að vanda.  Kristófer tefldi stíft til sigurs en missteig sig aðeins og tapaði skiptamun.  Harðjaxlinn úr eyjum lét það ekki á sig fá og nýtti biskupapar sitt vel og vann sannfærandi.  Dagur Ragnars fékk ágætis stöðu og stefndi skákin lengi vel í jafntefli, þar til honum varð illa á í messunni og tapaði.  Hann kemur örugglega sterkur til baka á morgun.
 
Fimmta umferðin fer fram í fyrramálið og hefst klukkan 9 að íslenskum tíma.
 
Hilsen fra Danmark,
Davíð 

Tenglar:

• Heimasíða mótsins
• Skákir í beinni
• Myndaalbúm
• Bloggsíða Karls Gauta

Patrekur Maron, Dagur Andri og Friðrik Þjálfi unnu í 3. umferð

Patrekur Maron Magnússon, Dagur Andri Friðgeirsson og Friðrik Þjálfi Stefánsson sigruðu í sínum skákum í þriðju umferð Norðurlandamótsins í skólaskák sem fram fór í morgun.  Atli Freyr Kristjánsson og Dagur Ragnarsson gerðu jafntefli en aðrar skákir töpuðust.

Guðmundur Kjartansson, Sverrir Þorgeirsson Dagur Andri og Friðgeir Þjálfi hafa allir 2 vinninga í sínum flokkum.   Atli Freyr Kristjánsson Dagur Ragnarsson hafa 1½ vinning en aðrir minna.

Nánari pistill frá Davíð Ólafssyni væntanlegur vonandi fljótlega.   

Úrslit 3. umferðar:

• Guðmundur Kjartansson (2307) - Mikko Niemi, Finland (2178) 0-1
• Michael Nguyen, Danmörk (2148) - Atli Freyr Kristjánsson (2019) ½-½
• Daði Ómarsson (1999) - Jon Kristian Haar, Noregur (1922) 0-1
• Sverrir Þorgeirsson (2120) - Lasse Ö. Lövik, Noregur (2052) 0-1
• Svanberg Már Pálsson (1820) - Patrekur Maron Magnússon (1785) 0-1
• Michael Vesterli, Danmörk (1269) - Dagur Andri Friðgeirsson (1798) 0-1
• Friðrik Þjálfi Stefánsson (1455) - Einar Gregersen, Færeyjar (1248) 1-0
• Dmitri Tumanov, Finland (1502) - Kristófer Gautason (1245) 1-0
• Zhou Qiyu, Finland (1642) - Dagur Ragnarsson (0) ½-½

• Heimasíða mótsins
• Skákir í beinni

NM í skólaskák: Guðmundur og Sverrir með fullt hús

Guðmundur Kjartansson (2307) sigraði færeyska alþjóðlega meistarann Helga Dam Ziska (2406) í 2. umferð a-flokks Norðurlandamótsins í skólaskák, sem fram fór í kvöld í Tjele í Danmörku og er efstur með fullt hús.  Sverrir Þorgeirsson hefur fullt hús í b-flokki.  Auk þeirra unnu Friðrik Þjálfi Stefánsson, Kristófer Gautason og Dagur Ragnarsson í sínum skákum.    Gefum Davíð Ólafssyni fararstjóra orðið:

Úrslitin hjá íslensku keppendunum í 2. umferð:
 
IM Helgi Dam Ziska, Færeyjar (2406) - Guðmundur Kjartansson (2307) 0-1
Mikko Niemi, Finland (2178) - Atlir Freyr Kristjánsson (2019) 1-0
Esben Nicolajsen, Danmörk (1828) - Sverrir Þorgeirsson (2120) 0-1
Lasse Ö. Lövik, Noregur (2052) - Daði Ómarsson (1999) 1-0
Patrekur Maron Magnússon (1785) - Katrine Tjölsen, Noregur (2084) 0-1
Lasse Nielsen, Danmörk (1570) - Svanberg Már Pálsson (1820) 1-0
Dagur Andri Friðgeirsson (1798) - Peter Flermoen, Noregur (1996) 0-1
Friðrik Þjálfi Stefánsson (1455) - Heðin Gregersen, Færeyjar (1192) 1-0
Kristófer Gautason (1245) - Zhou Qiyu, Finland (1642) 1-0
Dagur Ragnarsson (0) - Farzam Firooznia, Danmörk (1000) 1-0
 
Í A-flokki vann Guðmundur frábæran sigur á alþjóðlega meistaranum Helga Dam Ziska sem aldrei sá til sólar í skákinni (skákin var í beinni á netinu).  Guðmundur fékk nákvæmlega þá stöðu upp úr byrjuninni sem við vildum fá og sýndi að hann kann virkilega vel að tefla úr stöðunni.  Atli Freyr er að tefla mjög vel og var kominn með fínustu stöðu úr byrjuninni, en þá hringdi síminn!  Atli bættist þar með í hóp valinkunnra manna sem tapað hafa í Vodafone gambítnum.  Í B-flokki tapaði Daði eftir að hafa misstigið sig í byrjuninni.  Sverrir vann aftur á móti mjög sannfærandi sigur í sinni skák.  Í C-flokki tapaði Patrekur í mikilli baráttuskák og Svanberg varð á í messunni í endataflinu og tapaði jafnteflislegri stöðu.  Í D-flokki var alls ekki dagur Dags Andra sem átti slæman dag og tapaði illa.  Friðrik Þjálfi sigraði hins vegar í sinni skák eftir mikla baráttu og eiga báðir aðilar (Friðrik og Heðin) hrós skilið fyrir að nota tíman sinn vel.  Það er sjaldgæft að sjá keppendur í þessum flokki í tímahraki.  Friðrik hefur lofað að vinna fyrr á morgun og draga skákina ekki svona á langinn því þetta fer algjörlega með taugar móður hans sem fylgist vandlega með! Drengirnir í E-flokki áttu góðan dag.  Kristófer, eyjapeyi, sýndi hversu vel upp alinn hann er og bauð sætri stúlku jafntefli í unninni stöðu, en sú stutta hafnaði samstundis.  Sú stutta sá að sér í næsta leik og bauð þá Kristófer jafntefli, sem hann hafnaði - "you had your chance honey" og vann örugglega.  Dagur Ragnars átti besta "comebackið" frá fyrri umferðinni.  Harðákveðinn í því að tapa ekki aftur, nýtti hann tímann sinn miklu betur og vann örugglega.  Ef hann heldur svona áfram, þá mun hann eiga gott mót.
 
Allir keppendur biðja að heilsa heim og hefja leik í fyrramálið aftur.  Það ætti að vera a.m.k. ein skák með Íslendingi í beinni í fyrramálið. 

• Heimasíða mótsins
  

Íslandsmót stúlkna fer fram í dag

Íslandsmót stúlkna 2008 - einstaklingskeppni fyrir stúlkur á grunnskólaaldri fer fram sunnudaginn 10. febrúar nk. í húsakynnum Skáksambands Íslands, Faxafeni 12, Reykjavík og hefst kl. 13.00.

Teflt verður í tveimur flokkum:

• Fæddar 1992-1994
• Fæddar 1995 og síðar.

Tefldar verða 15 mín. skákir - umferðafjöldi fer eftir fjölda þátttakenda. 

Fjórar efstu stúlkurnar í yngri flokki tefla síðan um þátttökurétt í Norðurlandamóti stúlkna sem fram fer í Noregi 18.- 20. apríl nk. 

Veitt verða verðlaun í hverjum aldursflokki og dregið í happdrætti.

Rimaskóli sigraði á Íslandsmóti stúlknasveita

Skáksveit Rimaskóla sigraði á Íslandsmóti grunnskólasveita í stúlknaflokki sem fram fór i húsnæði Skákskólans í dag.  Sveitin fékk 25,5 vinning, einum vinningi meira en Grunnskóli Seltjarnarness, sem endaði í 2. sæti.  Þessar sveitir voru í nokkrum sérflokki.   Í þriðja sæti varð skáksveit Salaskóla.  Á morgun fer svo fram Íslandsmót stúlkna og hefst kl. 13.  

Alls tóku 8 sveitir þátt og tefldu allar við allar. 

Lokastaðan:

1. Rimaskóli 25.5 v. af 28
2. Grunnskóli Seltjarnarness 24,5 v.
3. Salaskóli A 20 v.
4. Hjallaskóli A 17,5 v.
5. Salaskóli B 7,5 v.
6. Hólabrekkuskóli 7 v.
7. Hjallaskóli B 5,5 v.
8. Rimaskóli B 4,5 v.

Borðaverðlaun:

1. borð: Jóhanna Björg Jóhannsdóttir Salaskóla A, Sigríður Björg Helgadóttir Rimaskóla A og Geirþrúður Anna Guðmundsdóttir Grunnskóla Seltjarnarness allar með 6 v. af 7.
2. borð: Stefanía Bergljót Stefánsdóttir Grsk. Seltjarnarness 7 af 7.
3. borð. Brynja Vignisdóttir Rimaskóla A 6,5 v.
4. borð. Ingibjörg Ásbjörnsdóttir Rimaskóla A 7 af 7.

Íslandsmót grunnskólasveita - stúlknaflokkur fer fram í dag

Íslandsmót grunnskólasveita 2008 - stúlknaflokkur fer fram laugardaginn 9. febrúar nk. í húsakynnum Skáksambands Íslands, Faxafeni 12, Reykjavík.

Hver skóli má senda fleiri en eina sveit.  Hver sveit er skipuð fjórum keppendum (auk varamanna).  Mótið hefst kl. 14.00 og tefldar verða 7 umferðir, 2 x 15 mín. eftir Monrad-kerfi.  Skráning fer fram á skrifstofu S.Í. sími 568 9141 kl. 10-13 virka daga og í tölvupósti:  [e-mail].

Á sunnudaginn fer svo fram Íslandsmót stúlkna.