Skák.is

Færsluflokkur: Íslenskar skákfréttir

23.6.2010 | 09:55

Annað Sumarskákmót Vinnuskólans fer fram í dag

Í sumar efnir Vinnuskóli Reykjavíkur í samstarfi við Skákakademíu Reykjavíkur til útiskákmóta á útitaflinu við Lækjartorg. Mótin verða haldin miðvikudaganna 16, 23. júní, 30. júní og 7. júlí og hefjast klukkan 12:30 og má búast við að mótin taki um 2 klst. Mótin verða með sama sniði og í fyrra en tefldar verða 5-6 umferðir með 7 mínútna umhugsunartíma. Mótaröðin er opin öllum og er að sjálfsögðu ókeypis að taka þátt. Þátttaka takmarkast við 40 keppendur og er því mikilvægt að keppendur mæti tímanlega.

Sú skemmtilega hefð var sett á í fyrra að úrslitaskák mótsins væri tefld á stóra útitaflinu, enda léttleikinn í fyrirrúmi. Verðlaunin verða afar fjölbreytt allt frá skákbókum, kaffivinningum og gjafakörfum frá Kaffitár auk dýrindis máltíða á Hamborgarabúllunni og The Deli.

Það er óskandi að veðurguðirnir leiki við skákmenn næstu fjóra miðvikudaga en engu að síður eru þátttakendur hvattir til að klæða sig eftir veðri!

Skákstjórar í sumar verða : Davíð Kjartansson, Björn Þorfinnsson, Bragi Þorfinnsson.

Myndaalbúm Sumarskákmótana

Íslenskar skákfréttir | Breytt s.d. kl. 10:01 | Slóð | Facebook | Athugasemdir (0)

23.6.2010 | 09:53

Skákir Stigamóts Hellis

Vigfús Ó. Vigfússon hefur slegið inn skákir Stigamóts Hellis (umferðir 5-7). Þær fylgja með fréttinni.

Veljið skák (36 alls):

Íslenskar skákfréttir | Slóð | Facebook | Athugasemdir (0)

22.6.2010 | 23:31

Lenka Íslandsmeistari kvenna í skák

Í kvöld fór fram verðlaunaafhending Íslandsmóts kvenna í skák. Lenka Ptácníková varð Íslandsmeistari kvenna í skák í þriðja sinn eftir 2-0 sigur á Jóhönnu Björg Jóhannsdóttir í úrslitaeinvígi en þær urðu efstar og jafnar með 4 vinninga í 5 skákum. Hallgerður Helga Þorsteinsdóttir varð í þriðja sæti með 3,5 vinning.

Þær þrjár skipa kvennalandslið Íslands á Ólympíuskákmótinu í Síberíu í haust ásamt Sigurlaugu R. Friðþjófsdóttur og Tinna Kristínu Finnbogadóttur.

Íslenskar skákfréttir | Breytt 23.6.2010 kl. 01:38 | Slóð | Facebook | Athugasemdir (0)

22.6.2010 | 12:18

Stefán sigraði á fyrsta sumarmóti Vinnuskólans og Akademíunnar

Fyrsta sumarmót Vinnuskóla Reykjavíkur og Skákakademíu Reykjavíkur fór fram miðvikudaginn 16. júní síðastliðinn við útitaflið í Lækjargötu. Mótið hófst kl.12.30 og voru tefldar fimm umferðir með 7 mín. umhugsunartíma. Veðrið var afar milt og gott þótt að sólin hafi ekki látið sjá sig nema þó akkúrat á meðan mótinu stóð! Alls tóku 28 skákmenn þátt í mótinu sem verður að teljast frábært og settu börn úr skákhópi Skákakademíu Reykjavíkur sem og unglingar úr Vinnuskólans í Reykjavík mikinn svip á mótið í bland við reyndari skákmenn.

Skákmótin eru liður í fræðslustarfi Vinnuskóla Reykjavíkur í að vekja áhuga unglinganna á skáklistinni, miðbæjarlífið og glæða bæinn mannlífi. Viðburðir sem þessi vekja óskipta athygli erlendra ferðamanna og gesta borgarinnar sem eiga leið hjá, og myndast því mjög skemmtileg stemmning í kringum mótin.

Úrslitaskákin fór fram á sjálfu útitaflinu og var tefld með klukku. Tilgangurinn var sá að afsanna að skák væri ekki íþrótt en viðbúið var að viðureignin yrði verulega athyglisverð ef keppendur kæmust í mikið tímahrak. Úrslitaskákin var spennandi og vel tefld af báðum keppendum þeim Stefáni Bergssyni og Oliver Aron þar sem Stefán syndi sennilega eina ótrúlegustu takta sem hafa sést á útitaflinu. Skemmtileg og bragðgóð verðlaun voru í boði Hamborgarabúllunnar sem fóru að sjálfsögðu afar vel í keppendur.

Mótið heppnaðist frábærlega og voru þátttakendur á öllum aldri. Næsta mót verður haldið á morgun 23 Júní og hefst það kl 12:30

Staða efstu manna :

1 Stefán Bergsson
2 Oliver Aron Jóhannesson
3. Sigríður Björg Helgadóttir
4 Kristinn Andri Kristinsson
5. Arnar Valgeirsson
6. Kristófer Jóel Jóhannesson
7. Hrund Hauksdóttir
8, Davíð Roach Gunnarsson

Skákstjórar : Björn Þorfinnsson og Davíð Kjartansson.

Íslenskar skákfréttir | Slóð | Facebook | Athugasemdir (0)

21.6.2010 | 23:03

Lenka Íslandsmeistari kvenna

Lenka Ptácníková (2267) sigraði Jóhönnu Björg Jóhannsdóttur (1738) í síðari einvígisskák þeirra um Íslandsmeistaratitil kvenna í skák. Lenka sigraði því í einvíginu 2-0 og er nú Íslandsmeistari í þriðja sinn!

Verðlaunaafhending fer fram kl. 19:30 í Skáksambandinu á morgun.

Ritstjóri óskar Lenku til hamingju með titilinn!

Allar skákir Íslandsmótsins sem og einvígisins fylgja með fréttinni.

Veljið skák (17 alls):

Íslenskar skákfréttir | Slóð | Facebook | Athugasemdir (0)

20.6.2010 | 23:08

Lenka sigraði í fyrri einvígisskákinni

Lenka Ptácníková (2267) sigraði Jóhönnu Björg Jóhannsdóttur (1738) í fyrri einvígisskák þeirra um Íslandsmeistaratitil kvenna í skák. Lenka hafði svart. Síðari einvígisskákin fer fram á morgun.

Íslenskar skákfréttir | Slóð | Facebook | Athugasemdir (0)

20.6.2010 | 23:04

Skákþáttur Morgunblaðsins: Afmælismót Friðriks Ólafssonar haldið í Djúpavík

Fyrr á þessu ári, nánar tiltekið hinn 26. janúar sl., varð fyrsti íslenski stórmeistarinn Friðrik Ólafsson 75 ára. Af því tilefni mun Hrókurinn efna til afmælishátíðar sem fram fer í Djúpavík og Norðurfirði í Árneshreppi um næstu helgi. Aðalmótið fer fram laugardaginn 19. júní í gömlu síldarverksmiðjunni í Djúpavík. Heiðursgestur er afmælisbarnið sjálft Friðrik Ólafsson en búist er við þátttöku fjölmargra öflugra skákmanna.

Baldur Möller Norðurlandameistari 1948 og 1950 lét þau orð eitt sinn falla að líta mætti á Friðrik sem brúna milli gamla tímans og hins nýja. Friðrik haslaði sér ótrauður völl á alþjóðavettvangi snemma á sjötta ártug síðustu aldar og vann hvert afrekið á fætur öðru. Tilþrifin á millisvæðamótinu í Portoroz 1958 þar sem Friðrik komst í hóp áskorenda eru enn í minnum höfð. „Friðriks-kynslóðin,“ eins og hún var samansett í hugum manna hér á landi kom þar fram að hluta með Tal fremstan í flokki, Petrosjan, Fischer, Gligoric og Larsen.

Meðal Íslenskra skákmanna voru aðeins Ingi R. Jóhannsson og mörgum árum síðar Guðmundur Sigurjónsson sem áttu einhverja möguleika gegn Friðriki á sjötta og sjöunda áratug síðustu aldar.

Sá danski, Bent Jörgen Larsen var með honum alla leið, allt frá því að þeir hittust fyrst á heimsmeistaramóti unglinga í Birmingham 1951. Á meira en 40 ára tímabili tefldu þeir 30 kappskákir. Sú síðasta var háð á 60 afmælismóti Friðriks í Þjóðarbókhlöðunni 1995. Bent vann og komst þá loks yfir, 15½ : 14½. Framan af á ferli þeirra var Friðrik greinilega fremri þó að hann hefði tapað einvíginu um Norðurlandameistaratitilinn 1956. Merkilegt er tímabil frá einvíginu '56 til viðureignar þeirra á Ólympíumótinu í Havana 1966 er þeir tefla 14 skákir og allar vinnast á svart.

Ég hygg að töfrar Friðriks hafi ekki síst legið í þeirri ógnarspennu sem hann náði að byggja upp í skákum sínum. Ókunnugum virtist hann stundum sólunda tíma sínum í furðulegustu atriði; aðrar skákir voru komnar vel af stað en Friðrik kannski að hugsa fyrsta leikinn. Kringum þetta spannst mikil umræða meðal hinna staðföstu fylgismanna Friðriks: Bergur Pálsson, Magnús Sigurjónsson og Jakob Hafstein svo nokkrir séu nefndir voru yfirleitt mættir og fögnuðu með Friðriki þegar vel gekk og það var oft.

Þegar Friðrik var kosinn forseti FIDE 1978 urðu ákveðin þáttaskil hjá honum hvað taflmennskuna varðaði. Fyrr á árinu höfðu áhorfendur flykkst í Kristalsal Hótel Loftleiða til að fylgjast með honum á Reykjavíkurskákmótinu. Þar laust þeim Bent Larsen enn og aftur saman og niðurstaðan varð einn frækilegasti sigur Friðriks yfir hinum glaðbeitta andstæðingi sínum:

8. Reykjavíkurskákmótið 1978:

Friðrik Ólafsson – Bent Larsen

Aljékíns-vörn

1. e4 Rf6 2. e5 Rd5 3. d4 d6 4. Rf3 g6 5. Bc4 Rb6 6. Bb3 Bg7 7. Rg5 d5 8. 0-0 Rc6 9. c3 Bf5

Hér var sennilega best að leik 9....f6 t.d. 10. exf6 exf6 11. He1+ Kf8 o.s.frv.

10. g4 Bxb1 11. Df3 0-0 12. Hxb1 Dd7

Hér og í næsta leik þráast Larsen við að reka riddarann af höndum sér með 12. ... h6.

13. Bc2 Rd8 14. Dh3 h6 15. f4!

Of seinn!

15....hxg5 16. f5 Re6 17. fxe6 dxe6 18. Bxg5 c5 19. Kh1 cxd4 20. cxd4 Hfc8

( STÖÐUMYND )

21. Bf5! gxf5 22. gxf5 Dc6 23. Hg1! Dc2 24. Hbe1 Kf8 25. f6

– og Larsen gafst upp enda stutt í mátið.

Helgi Ólafsson | helol@simnet.is

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.

Grein þessi birtist í sunnudagsmogganum, 7. júní 2010.

Skákþættir Morgunblaðsins

Íslenskar skákfréttir | Slóð | Facebook | Athugasemdir (0)

20.6.2010 | 22:02

Róbert Norðurfjarðarmeistari

Róbert Lagerman sigraði Norðurfjarðarmótinu sem fram fór í dag í Kaffi Norðurfirði. Mótið markaði loka skákhátíðirnar í Árneshreppi. Róbert hlaut 5 vinninga í sex skákum og var hálfum vinningi fyrir ofan næstu menn sem voru Jóhann Hjartarson, Hlíðar Þór Hreinsson, Guðmundur Gíslason, Hrafn Jökulsson og Gunnar Björnsson. Róbert var jafnframt skákstjóri mótsins svo skákstjórinn sló þarna við stórmeistaranum!

Alls tóku 22 skákmenn þátt í mótinu.

Nánari fréttir af skákhátíðinni í heild sinni eru væntanlegar á morgun sem og fjöldi mynda.

Íslenskar skákfréttir | Slóð | Facebook | Athugasemdir (0)

19.6.2010 | 18:39

Jóhann sigraði á Friðriksmótinu í Djúpavík

Stórmeistarinn Jóhann Hjartarson sigraði á afmælismóti Friðriks Ólafssonar sem fram fór í Djúpavík í Árneshreppi sem fram fór í dag. Sigurvegari tveggja síðustu ára, Helgi Ólafsson, varð annar og heiðursgesturinn sjálfur Friðrik Ólafsson varð þriðji.

Mótshaldið tókst mjög vel og mótshöldurum mótsins, Hróknum, til mikillar sóma.

Nánari fréttir og fleiri myndir væntanlegar á morgun eða á mánudag.

Íslenskar skákfréttir | Slóð | Facebook | Athugasemdir (0)

19.6.2010 | 01:43

Skákhátíðin í Arneshreppi hófst í kvöld

Skákatíðin í Árneshreppi hófst í kvöld með tvískákmóti. Friðrik Ólafsson, lék fyrsta leik mótsins er hann lék sinn fyrsta tvískákleik frá upphafi fyrir Hrafn Jökulsson. Lið Hrafns, forsetaliðið sigraði á mótinu en með honum í liði var Gunnar Björnsson auk þess sem varaforseti Hróksins, Róbert Lagerman, leysti Hrafn af liði í einstaka viðureignum.

Í öðru sæti urðu Hlíðar Þór Hreinsson og Skarphéðinn (vantar föðurnafn) og í þriðja sæti urðu Arnar Guðlaugsson og Guðmundur Kjartansson.

Hápunktur mótsins, afmælismóts Friðriks Ólafssonar fer fram á morgun og hefst kl. 13. Þar taka þátt m.a. Friðrik sjálfur, Jóhann Hjartarson, Helgi Ólafsson og Guðmundur Kjartansson.

Myndaalbúm mótsins

Íslenskar skákfréttir | Breytt s.d. kl. 01:45 | Slóð | Facebook | Athugasemdir (0)

« Fyrri síða | Næsta síða »