Útiskákmót á Lækjartorgi á morgun

Skákakademía Reykjavíkur og Vinnuskóli Reykjavíkur standa á morgun, miðvikudag, að útiskákmóti við útitaflið á Lækjartorgi.  Mótið hefst kl. 13 og er öllum opið.  Ókeypis aðgangur.   Tefldar verða 5-6 umferðir með 7 mínútna umhugsunartíma og munu bragðgóð verðlaun (ís) vera í boði. Þetta verður næstsíðasta mótið á útitaflinu sem SR og Vinnuskólinn standa fyrir í sumar.

Hraðskákkeppni taflfélaga hefst eftir verslunarmannahelgi

Hraðskákkeppni taflfélaga, hefst eftir verslunarmannahelgi.  Þetta er í fimmtánda sinn sem keppnin fer fram en Taflfélag Reykjavíkur er núverandi meistari og hafa ásamt Helli unnið keppnina oftast eða sex sinnum hvort félag.   Auk þess hafa Hrókurinn og Skákfélag Hafnarfjarðar sigrað í einu sinni hvort félag í keppninni.

Hvet ykkur til að skrá ykkar félög til leiks sem fyrst en nú þegar hafa bæði Hellismenn og Bolvíkingar skráð sig.

Áætlunin er sem hér segir:

• 1. umferð (u.þ.b. 12 liða úrslit): Skuli vera lokið 15. ágúst
• 2. umferð (8 liða úrslit): Skuli vera lokið 22. ágúst
• 3. umferð (undanúrslit): Skuli vera lokið 28. ágúst (áður en áskorendaflokkur hefst)
• 4. umferð (úrslit): Fer fram á Bolungarvík, föstudaginn 11. september.

Skráning til þátttöku rennur út 7. ágúst nk.   Forráðamenn taflfélaga eru vinsamlegast beðnir um að hafa samband við umsjónarmann í netfangið [e-mail] eða í síma 820 6533.  Eða á Skákhorninu.

Tilkynna þarf eftirfarandi:

• Lið
• Liðsstjóri
• Símanúmer liðsstjóra
• Netfang liðsstjóra

Reglur keppninnar:

1.  Sex manns eru í hvoru liði og tefld er tvöföld umferð, þ.e. allir í öðru liðinu tefla við alla í hinu liðinu. Samtals 12 umferðir, eða 72 skákir.

2.  Heimalið sér um dómgæslu. Komi til deiluatriða er Ólafur S. Ásgrímsson yfirdómari keppninnar.

3.  Varamenn mega koma alls staðar inn. Þó skal gæta þess að menn tefli ekki oftar en tvívegis gegn sama andstæðingi og hafi ekki sama lit í báðum skákunum.

4.  Ætlast er til þess að þeir sem tefli séu fullgildir meðlimir síns félags. Aðeins má tefla með einu taflfélagi í keppninni.

5.  Liðsstjórar koma sér saman um hvenær er teflt og innan tímaáætlunar.  Komi liðsstjórar sér ekki saman um dagsetningu innan tímaramma getur umsjónaraðili ákvarðað tímasetningu.

6.  Verði jafnt verður tefldur bráðabani. Það er tefld er einföld umferð þar sem dregið er um liti á fyrsta borði og svo hvítt og svart til skiptist. Verði enn jafnt verður áfram teflt áfram með skiptum litum þar til úrslit fást.

7.  Heimalið bjóði upp á léttar veitingar, t.d. kaffi, gos, kökur eða kex.

8.  Viðureignirnar skulu fara innan 100 km. radíus frá Reykjavík nema að félög komi sér saman um annað.  Úrslitaviðureignin fer þó fram í Bolungarvík þann 11. september og er ábyrgst að ferðakostnaður verði greiddur fyrir aðallið hvors liðs.   

9.  Úrslitum skal koma til umsjónarmann eins fljótt og auðið er í netfangið [e-mail] og eigi síðar en 12 klukkustundum eftir að keppni lýkur.

10.Úrslit keppninnar verða ávallt aðgengileg á heimasíðu Hellis, www.hellir.blog.is , sem er heimasíða keppninnar, og á www.skak.is.

11.Mótshaldið er í höndum Taflfélagsins Hellis sem sér um framkvæmd mótsins.

Keppendalisti landsliðsflokks Íslandsmótsins í skák

Keppendalisti landsliðsflokks Íslandsmótsins í skák, sem fram fer á Bolungarvík, 11.-13. september nk., liggur nú fyrir.  Meðal keppenda eru 2 stórmeistarar, 5 alþjóðlegir meistarar og 4 fjórir FIDE-meistarar.  Meðalstigin er 2386 skákstig.  Ekki er mögulegt að ná stórmeistaraáfanga en 6,5 vinning þarf í áfanga að alþjóðlegum meistaratitli.  Aðeins einn keppendanna hefur áður orðið Íslandsmeistari en það er Jón Viktor Gunnarsson sem hampaði titlinum árið 2000.

Keppendalistinn:

 

Nr.	Nafn	Titill	Félag	Stig
1	Henrik Danielsen	SM	Haukar	2473
2	Jón Viktor Gunnarsson	AM	Bol	2462
3	Stefán Kristjánsson	AM	Bol	2462
4	Þröstur Þórhallsson	SM		2433
5	Dagur Arngrímsson	AM	Bol	2396
6	Björn Þorfinnsson	AM	Hellir	2395
7	Bragi Þorfinnsson	AM	Bol	2377
8	Róbert Lagerman	FM	Hellir	2351
9	Guðmundur Gíslason		Bol	2348
10	Davíð Ólafsson	FM	Hellir	2327
11	Ingvar Þór Jóhannesson	FM	Hellir	2323
12	Sigurbjörn Björnsson	FM	Hellir	2287
	Meðalstig			2386

 

Dagur og Björn gerðu jafntefli í 2. umferð í Quebec

Alþjóðlegu meistararnir Dagur Arngrímsson (2396) og Björn Þorfinnsso (2395) gerðu báðir jafntefli í 2. umferð meistaramóts Quebec sem fór í dag.  Dagur við rússneska stórmeistarann Vadim Malakhatko (2570) og Björn við Sylvain Barbeau (2357).  Jón Viktor Gunnarsson (2462) tapaði fyrir stórmeistaranum Nikola Mitkov (2526).  Dagur er í beinni útsendingu og er hægt að fylgjast með skák beint á vefsíðu mótsins.

Dagur hefur 1,5 vinning og er í 2.-6. sæti, Jón Viktor og Björn hafa 0,5 vinning og eru 16.-20. sæti.

Í 3. umferð, sem nú er gangi teflir Dagur við Mitkov eins og áður sagði, Björn við stórmeistarann Merab Gagunashvili (2574) og Jón Viktor við Barbeau.  

• Heimasíða mótsins
• Skákirnar í beinni

Rúnar sigraði á þriðja Sumarmóti Vinnuskólans og Akademíunnar

Þriðja sumarmót Vinnuskólans í Reykjavík og Skákakademíu Reykjavíkur fór fram í gær. Veðrið var ekki alveg eins gott og á undanförnum mótum en sem betur fer braust sólin fram rétt fyrir mótið og hún bætti svo sannarlega upp allhvassan vind sem blés á keppendur. Verra veður hafði þó engin áhrif á þátttökuna því 29 keppendur mættu til leiks og það þrátt fyrir að keppendur frá Vinnuskólanum hafi eingöngu verið þrír talsins.

Tefldar voru fimm umferðir með 7 mín. umhugsunartíma og var keppnisskapið svo sannarlega í lagi því aðeins fjögur jafntefli voru samin í mótinu! Hinn átta ára gamli Sigurður Kjartansson vann fyrstu tvær skákirnar sínar en mætti svo ofjarli sínum í þriðju umferð, Rúnari Berg. Rúnar hélt svo áfram að vera ofjarl annarra keppenda með sigri á Hauki Halldórssyni í fjórðu umferð og fyrir síðustu umferð var hann einn efstur ásamt Jorge Fonseca með fullt hús vinninga. Þeir mættust í síðustu umferð og lauk skákinni með jafntefli. Óvænt í þriðja sæti fyrir síðustu umferð var hinn níu ára gamli Mías Ólafarson með 3,5 vinninga en hann atti kappi við Hauk Halldórsson í síðustu umferð. Skákin var æsi spennandi og var tími Hauks orðinn verulega lítill þegar hann loks náði að snúa á drenginn með laglegri hróksfórn.

Rúnar og Jorge urðu því efstir í mótinu með 4,5 vinninga af 5 mögulegum og samkvæmt hefðinni var þeim gert að útkljá málið á stóra útitaflinu og það með aðeins 10 mín. umhugsunartímann. Sú skák var í jafnvægi lengi vel en þegar að tíminn var tekinn að styttast nokkuð og keppendurnir farnir að ganga ögn hraðar að klukkunni þá náði Rúnar að vinna skiptamun sem dugði honum örugglega til sigurs. Rúnar Berg telst því sigurvegari þriðja sumarmótsins!

Nokkrir keppendur urðu jafnir í þriðja sæti með fjóra vinninga en hæstur þeirra á stigum var Haukur Halldórsson, hinn öflugi liðsmaður Skákfélags Vinjar.

Sigurvegararnir, Rúnar og Jorge, voru verðlaunaðir með gómsætum verðlaunum frá Ísbúðinni á Ingólfstorgi en slík verðlaun hlaut einnig Kristófer Jóel Jóhannesson, sem efnilegasti keppandinn en hann hlaut 3,5 vinninga. Jafn honum að vinningum var svo áðurnefndum Mías Ólafarson en hann var verðlaunaður með pakka af Match Attax fótboltamyndum!

Næsta sumarmót fer fram miðvikudaginn 22.júlí kl.13.00

Útiskákmót á Lækjartorgi í dag

Skákakademía Reykjavíkur og Vinnuskóli Reykjavíkur standa að dag í að útiskákmóti við útitaflið á Lækjartorgi.  Mótið hefst kl. 13 og er öllum opið.  Ókeypis aðgangur.   Tefldar verða 6 umferðir með 7 mínútna umhugsunartíma og munu bragðgóð verðlaun (ís) vera í boði.

Slíkt útimót mun vera haldið alla miðvikudag út júlí.   

 

Björn Freyr í TV

Björn Freyr Björnsson (2166) er genginn til liðs við Taflfélag Vestmannaeyja. TV er um þessar mundir að styrkja a-lið sitt fyrir komandi átök í deildakeppninni en liðið vann sér sæti í efstu deild á síðustu leiktíð. Liðið mun styrkast enn frekar á næstu dögum dögum og vikum og verður það tilkynnt þegar það liggur fyrir.

 

Tómas í TV

Nú í vikunni gekk Tómas Björnsson, Vík, yfir í Taflfélag Vestmannaeyja, hann er með 2160 Íslensk stig og á skráðar 943 skákir og því með reyndustu skákmönnum hérlendis.

Eyjamenn bjóða Tómas velkominn í félagið en hann verður öflugur liðsmaður nú þegar félagið leggur kapp á að verða sterkir í 1 deildar keppninni í haust og ekki síður að freista þess að koma B-sveitinni upp í 3 deild.

Heimasíða TV

Heimamenn efstir á Landsmóti UMFÍ sem fram fer á Akureyri

Heimamenn í UMSE/UFA eru efstir á Landsmóti UMFÍ á Akureyri þegar fimm umferðum af 11 er lokið.  Þeir hafa 3,5 vinnings forskots á ÍBA en það lið skipa einnig heimamenn.  Í 3. sæti er HSB (Bolvíkingar) en þeir eiga eina umferðir til góða á Akureyrarliðin.   Núverandi meisturum Fjölnis hefur ekki vegnað vel og eru í sjötta sæti.

• Heimasíða UMFÍ
• Chess-Results (engin úrslit komin enn en hægt að finna liðskipan) 

Staðan:

Sæti	Félag	Vinningar
1.	UMSE/UFA	17
2.	ÍBA	13,5
3.	HSB	13	e. 4 umferðir
4.	ÍBV	12,5	e. 4 umferðir
5.	HSK	12
6.	UMFF	8,5
7.	UMSK	8	e. 4 umferðir
8.	UMSB	7	e. 4 umferðir
9.	UÍA	6,5
10.	HSÞ	2
	UMFN	m.e.

Daði sigraði á öðru Sumarmóti Vinnuskólans og Skákakademíunnar

Annað sumarmót Vinnuskólans í Reykjavík og Skákakademíu Reykjavíkur var vel sótt af keppendum og áhorfendum. Alls tóku 26 keppendur þátt í mótinu og var hart barist í veðurblíðunni.

Krakkar af skák- og leikjanámskeiði Skákakademíunnar voru áberandi í hópi þátttakenda sem og unglingar í Landnemahópi Vinnuskólans en einnig létu nokkrir kunnir meistarar sjá sig eins og Róbert Lagerman, Rúnar Berg, Daði Ómarsson, Stefán Bergsson, Ingi Tandri Traustason og Birgir Berndsen.

Það má því með sanni segja að mótið hafi verið litskrúðugt enda vakti það töluverða athygli meðal gangandi vegfarenda nutu veðurblíðunnar.

Daði Ómarsson og Rúnar Berg urðu efstir í mótinu með 4,5 vinninga af 5 mögulegum. Þeir gerðu innbyrðis jafntefli í baráttuskák en lögðu aðra andstæðinga sína að velli.  Til gamans ákváðu skákstjórarnir, Björn Þorfinnsson og Davíð Kjartansson, að tefld yrði ein úrslitskák á stóra útitaflinu með 10 mín. umhugsunartíma. Rúnar og Daði tóku vel í hugmyndina og varð úr hin besta skemmtun, sérstaklega í byrjun þar sem skákmennirnir úðuðu út leikjunum með ógnarhraða enda vill enginn lenda í tímahraki á þessu stóra borði! Þegar upp var staðið hafði Daði sigur og var því úrskurðaður sigurvegari mótsins.

Í þriðja sæti á stigum varð Ólafur Gauti Ólafsson en hann hlaut fjóra vinninga eins og nokkrir aðrir skákmenn. Ólafur vann fjórar fyrstu skákirnar sínar og var einn efstur fyrir síðustu umferð en varð að játa sig sigraðan eftir mikla baráttu gegn Daða Ómarssyni. 

Efnilegasti keppandinn var svo útnefndur Sigurður Kjartansson, átta ára gamall labbakútur úr Kópavogi en hann hlaut þrjá vinninga.

Skemmtilegu móti var svo slitið með því að sigurvegararnir fengu afhent gómsæt verðlaun frá Hamborgarbúllunni.

Næsta sumarmót verður haldið miðvikudaginn 15.júlí, kl.13.00. við útitaflið í Lækjargötu.