Ávaxtamótið í Sumarskákhöllinni

Skákakademían og Bananar ehf. bjóða skákáhugamönnum á öllum aldri á Ávaxtamótið 2012, sem haldið verður í Sumarskákhöllinni Þingholtsstræti 47, föstudaginn 29. júní klukkan 12. Á Ávaxtamótinu verða bornir fram gómsætir og exótískir ávextir, og því fagnað að Skákakademían hefur í sumar frábæra aðstöðu til námskeiðahalds fyrir börn og ungmenni, samhliða fjölmörgum skákviðburðum fyrir unga sem eldri.

Hraðskákmót verða í hádeginu alla föstudaga í júlí og er Ávaxtamótið 2012 hið fyrsta í þeirri syrpu.

Áður en Ávaxtamótið hefst mun Hjörvar Steinn Grétarsson, 19 ára landsliðsmaður í skák, segja frá þátttöku sinni á skákmótum sl. ár og skýra valdar skákir. Hjörvar Steinn er efnilegasti skákmaður Íslands og vantar aðeins 1 áfanga til að verða stórmeistari. Hjörvar stígur á svið kl. 11.10 og Ávaxtamótið hefst klukkan 12. Hjörvar Steinn verður meðal keppenda á mótinu, sem og ýmsir af okkar sterkustu skákmönnum.
 
Ávaxtamótið er opið öllum skákáhugamönnum og er þátttaka ókeypis. Tefldar verða 5 umferðir, og lýkur mótinu klukkan 13.

Sumarskákhöllin er við Þingholtsstræti 47, beint á móti breska og þýska sendiráðinu. Þar hefur Skákakademía Reykjavíkur aðsetur í sumar og þar eru í gangi námskeið fyrir börn og unglinga.
 
Skráning á Ávaxtaskákmótið er á www.skak.is en einnig er hægt að senda tölvupóst á [e-mail].

Lenka vann í 4. umferð í Prag

Lenka Ptácníková (2275) vann sína skák í 4. umferð alþjóðlegs skákmóts í Prag sem fram fór í dag.  Lenka hefur nú 3 vinninga og er í 4.-11. sæti.

Í mótinu taka þátt 43 skákmenn og þar af er einn stórmeistari og fjórir alþjóðlegir meistarar.  Lenka er nr. 9 í stigaröð keppenda.

Chess-Results

Faðir fær refsingu í svindlmáli - sonur sýknaður

Eins og kunnugt er kom upp svindlmál á N1 Reykjavíkurskákmótinu  Ungur norskur keppandi var talinn hafa svindlað með hjálp föður síns.  Skákstjórar dæmdu tap á keppandann í lokaumferðinni og var hann sviptur verðlaunum fyrir bestan árangur ungmenna. 

Fyrir þeim úrskurði var stuðst við að faðirinn hafði í farsíma sínum skáktölvuforrit þar sem finna mátti stöðu í skák sonarins og einnig var stuðst við vitnisburð vitna sem sögðust hafa séð föðurinn koma skilaboðum til sonarins með varamáli.  

Málið var tekið fyrir hjá norskum skákdómstóli.  Strákurinn var þar upphaflega dæmdur í eins árs bann en faðirinn í þriggja ára bann.  Því var áfrýjað og í dag féll endanlegur úrskurður að hálfu skákyfirvalda í Noregi.  Strákurinn var sýknaður en faðirinn fékk eins árs bann. 

Aðilar geta annað hvort áfrýjað málinu til norskra dómstóla eða til FIDE.  

Nánar má lesa um málið á Nettavisen.