Hraðskákmót öðlinga fer fram í kvöld

Hraðskákmót öðlinga fer fram á morgun 8. maí kl. 19.30 í félagsheimili T.R. að Faxafeni 12. Mótið er opið fyrir alla 40 ára og eldri (f. 1972 og síðar). Tefldar verða 7 umferðir með 7 mínútna umhugsunartíma.

Í lok mótsins fer fram verðlaunaafhending fyrir Hraðskákmótið sem og Skákmót öðlinga sem lauk s.l. miðvikudagskvöld. Þátttökugjald er kr. 500 og er í því innifalið kaffi og góðgæti. Skákmenn 40+ eru hvattir til að fjölmenna!    

Sumarskákmót Fjölnis hefst kl. 17

Skákdeild Fjölnis lýkur starfsárinu með árlegu sumarskákmóti sem öllum áhugasömum skákkrökkum á grunnskólaaldri er heimilt að taka þátt í.

Teflt verður í hátíðarsal Rimaskóla. Rótarýklúbbur Grafarvogs gefur þrjá eignarbikara fyrir sigur í þremur flokkum, eldri, yngri og stúlknaflokki.

Þátttaka er ókeypis. Pítsa og gos kostar 300 kr í skákhléi. Vegleg verðlaun, mörg verðlaun og boðið upp á skemmtilegt skákmót sem lokið er á tveimur tímum.

Foreldrum velkomið að fylgjast með og þiggja kaffisopa. Endum skákárið með skemmtilegu skákmóti og mætum tímanlega. Skráning á staðnum.

Tefldar sex umferðir. Umhugsunartími er sjö mínútur. Skákstjórar verða þeir Helgi Árnason og Stefán Bergsson.

 

Norway Chess: Úrslit hraðskákar og pörun fyrstu umferðar

Það var mikið um dýrðir í Stavangri í dag þegar teflt var um töfluröðina í Ofurmótinu sem hefst á morgun. Keppendur tefldu 9.umferðir, allir við alla og lýsti Simen Agdestein, einn af skástu skákmönnum í sögu Noregs, atganginum í beinni útsendingu ásamt manninum með langa nafnið sem bar gæfu til þess að bomba bókasamningi á Helga okkar Ólafs.

Skipuleggjendur mótsins kættust örugglega mjög þegar draumapörun leit dagsins ljós í fyrstu umferð. Áskorandinn Carlsen mætti heimsmeistaranum Anand (trommusóló). Þeir sömdu fljótlega jafntefli eftir hörmulega leiðinlega skák (stemming fjarar). Carlsen fylgdi því svo eftir með því skíttapa fyrir Radjabov og landi hans, Jón Lúðvík Hammer, sem svo sannarlega er kominn út í djúpu laugina á þessu móti, gerði samviskusamlega uppá bak í fyrstu umferðum mótsins. Allt stefndi í norska tragedíu af bestu gerð. 

Carlsen er hinsvegar ekki verðandi heimsmeistari fyrir ekki neitt. Hann girti sig rækilega í brók og hóf að vega mann og annan. Þau undur og stórmerki áttu sér svo stað að Jón Lúðvík lagði sjálfan Anand með svörtu  mönnum og allt í einu var harmleikurinn orðinn af "en pur norsk jubileum". 

Á meðan Norsarnir voru i sviðsljósinu hjá Simen þá virtist Radjabov vera að læðast á brott með sigurinn en allt í einu lenti hann á vegg og Pétur Svidler tók forystuna. Hann leiddi mótið fyrir síðustu umferð og mætti þá engum öðrum en Magnusi Carlsen. Sú skák var eins og allar MC skákir síðustu ára. Pilturinn fékk ekkert út úr byrjuninni, sama og ekkert út úr miðtaflinu. Svo úðaði hann einhverjum peðum fram, nokkrir hróksleikir, smá peð í viðbót og Svidler gafst upp. Simen ærðist innra með sér af fögnuði og var í óða önn að reikna út hvort að Carlsen ynni mótið ekki örugglega á stigum  þegar Karjakin náði allt í einu að vinna sína skák og skjótast fram úr öllum.

Lokastaðan varð þessi:

1. Karjakin - 6,5

2. Carlsen - 6 (vann alla á stigum, kemur engum á óvart)

3. Anand - 6

4. Nakamura - 6

5. Svidler - 5,5

6. Radjabov - 5

7. Hammer - 3,5 

8. Wang - 3

9. Aronian - 2,5

10. Topalov - 1

Athygli vekur fráleit frammistaða Topalovs og slakur árangur Aronians sem er óumdeilanlega einn sterkasti hraðskáksmaður heims.

 Reglur mótsins eru þannig að sá sem vann hraðskáksmótið mátti velja sér stað í töfluröðinni. Karjakin var fyrstur og valdi sér númerið fimm! "HA?" spyrja menn sig eflaust því ég held að ansi margir hefðu valið nr.1 sem að tryggir viðkomandi hvítt í tveimur fyrstu umferðunum. Greinilega einhver þaulhugsuð rússnesk brella. Magnus kom næstur og valdi að sjálfsögðu nr.1 og svo koll af kolli. Síðastur til að velja sér númer var Topalov. Það var fátt um fína drætti í töfluröðinni, aðeins nr.10 og hvað þýddi það? Jú, auðvitað svart á Carlsen í fyrstu umferð. 

Eins og gefur að skilja völdu allir þeir sem voru í fimm efstu sætunum sér stöðu 1-5 í töfluröðinni og tryggðu sér þannig einu sinni oftar hvítt í mótinu. 

Pörun fyrstu umferðar er eftirfarandi:

1. Carlsen - Topalov

2. Anand - Aronian

3. Nakamura - Wang

4. Svidler - Hammer

5. Karjakin - Radjabov

Linkur með beinni útsendingu verður birtur á skak.is þegar hann liggur fyrir.