Skákþáttur Morgunblaðsins: Karlavígin falla

Judit Polgar tilkynnti í miðju ólympíumóti í Noregi árið 2014 að hún væri hætt taflmennsku og það var mikill sjónarsviptir að brotthvarfi hennar og ekki sjá að stöllur hennar myndu fylla skarðið sem hún skildi eftir. Hún hafði að vísu lent í smá hremmingum í viðureign gegn hinni kínversku Hou Yifan á opna mótinu í Gíbraltar árið 2012 en ein skák til eða frá gat aldrei breytt neinu í hinni mögnuðu afrekasögu.

Í lok síðasta mánaðar tókst Hou Yifan það sem Judit Polgar gerði nokkrum sinnum, að vinna mót skipað nokkrum af fremstu skákmönnum heims og má fullyrða að arftaki ungversku skákdrottningarinnar sé fundinn.

Þetta var í efsta flokki hinnar árlegu skákhátíðar í Biel í Sviss en þar tefldu 10 skákmenn og urðu úrslit þessi: 1. Hou Yifan 6½ v. (af 9) 2. Bacrot 6 v. 3. Harikrishna 5½ v. 4.-7. Ponomariov, Leko, Georgiadis og Morozevich 5 v. 8. Navara 4 v. 9. Vaganian 3 v. 10. Studer 1 v.

Gott auga fyrir taktískum vendingum er aðalsmerki Hou Yifan og kom það ágætlega fram í skák hennar við Armenann Vaganjan, sem lítið hefur sést til undanfarin ár. Vaganjan virtist reka sig á það sem stundum gerist meðal skákmanna sem fæddir eru upp úr miðri síðustu öld að þekking á byrjunum sem dugði ágætlega í eina tíð virkar fremur bitlaus í dag :

Biel 2017; 8. umferð:

Rafael Vaganjan – Hou Yifan

Drottningarindversk vörn

1. d4 Rf6 2. Rf3 e6 3. e3 b6 4. Bd3 Bb7 5. 0-0 d5 6. b3 Bd6 7. Bb2

0-0 8. Re5 c5 9. De2 Rc6 10. a3 Hc8 11. Rd2

Svona tefldi Artur Jusupov í gamla daga. Uppskipti á e5 myndu alltaf styrkja stöðu hvíts en Hou Yifan leyfir honum að standa þar. )

11. ... Re7 12. Had1 Dc7 13. c4 Re4 14. cxd5 Rxd2 15. Hxd2 Bxd5 16. Dh5 f5 17. Rc4 cxd4 18. Bxd4 Rg6 19. Rxd6

(Menn hvíts standa dálítið klaufalega einkum þó hrókurinn á d2. En þessi uppskipti bæta ekki stöðuna.

19. ... Dxd6 20. b4

20. ... Bxg2!

Skemmtilegur hnykkur sem byggir á valdleysi hróksins á d2.

21. Kxg2 Dxd4 22. Dxg6

Eftir 22. exd4 Rf4+ og 23. ... Rxh5 er svartur peði yfir með tiltölulega létt unnið tafl.

22. ... Dd5+ 23. e4 fxe4 24. Dxe4 Dg5+

Og hrókurinn fellur. Eftirleikurinn er auðveldur þar sem engin hætta steðjar að svarta kónginum.

25. Kh1 Dxd2 26. Dxh7+ Kf7 27. Dg6+ Ke7+ 28. Dxg7+ Hf7 29. Dd4 Df4 30. Dxf4 Hxf4 31. f3 Hd4 32. Be4 Hd2 33. Hg1 Hc3

– og Vaganian gafst upp. 

Anand, Aronjan og Vachier-Lagrave efstir í St. Louis

Heimsmeistarinn Magnús Carlsen er enn með í baráttunni um efsta sætið á Sinquefield-mótinu í St. Louis þrátt fyrir slysalegt tap úr vænlegri stöðu gegn Frakkanum Vachier-Lagrave í 4. umferð. Á það hefur verið bent að hann hefur ekki unnið mót með venjulegum umhugsunartíma eftir titilvörn sína í New York í fyrra. Honum hefur hins vegar gengið alveg glimrandi vel í hraðskák- og atskákmótum. Athygli vekur að Indverjinn Anand er efstur ásamt Frakkanum og Aronjan en staðan þegar tvær umferðir eru eftir: 1.-3. Anand, Aronjan og Vachier Lagrave 4½ v. (af 7) 4. Magnús Carlsen 4 v. 5.-6. Karjakin og Caruana 3½ v. 7. Svidler 3 v. 8.-10. Nakamura, So og Nepomniachtchi 2½ v.

Á mánudaginn hefst á þessum sama stað mót, hluti af Grand chess tour , þar sem tefldar eru at-skákir og hraðskákir. Garrí Kasparov verður meðal keppenda.

 

 

Helgi Ólafsson [e-mail]

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 12. ágúst 2017

Skákþættir Morgunblaðsins

Þorsteinn með enn ein góð úrslitin gegn stórmeistara

FIDE-meistarinn Þorsteinn Þorsteinsson (2279) náð enn einum góðum úrslitum gegn stórmeistara í sjöundu umferð EM öldunga sem fram fór í gær. Þorsteinn teflir í flokki 50+. Þorsteinn gerði jafntefli við franska stórmeistarann Eric Prie (2481) og hefur hlotið 2 vinninga í 3 skákum gegn stórmeisturum. Þorsteinn hefur 5 vinninga og er í 2.-6. sæti. Í dag teflir hann við enska skákmeistarann Neil Crickmore (2162).

Bragi Halldórsson (2116), sem teflir í flokki 65+, tapaði í gær fyrir svissneska FIDE-meistaranum Dragomir Vucenovic (2245) og hefur 3,5 vinninga. 

Báðir verða þeir í beinni í dag. Útsending hefst kl. 14.

51 skákmaður teflir í flokki Þorsteins og þar af eru sjö stórmeistarar. Þorsteinn er nr. 14 í stigaröð keppenda. 66 tefla í flokki Braga og þar af eru þrír stórmeistarar. Bragi er nr. 24 í stigaröð keppenda. 

• Heimasíða mótsins 
• Pörunarforrit
• Beinar útsendingar (Chess 24) - hefjast kl. 14

Kringluskákmót Víkingaklúbbsins fer fram á fimmtudaginn

Kringluskákmótið 2017 fer fram fimmtudaginn 24 ágúst, og hefst það kl. 17:00. Mótið fer fram í Kringlunni, en að mótinu stendur Víkingaklúbburinn skákfélag, með aðsetur í Víkingsheimilinu í Víkinni, í samstarfi við markaðsdeild Kringlunnar. Gera má ráð fyrir að margir af sterkustu skákmönnum þjóðarinnar muni taka þátt í því. Skákmenn eru hvattir til að skrá sig sem fyrst eftir að opnað verður fyrir skráningu. Mótið er öllum opið og er þátttaka ókeypis en skráning mun fara fram á Skák.is (Guli kassinn).

Hámarkfjöldi keppenda er 40 manns og því er ekki hægt að tryggja þátttöku nema að skrá sig til leiks. Einnig er hægt að skrá sig í síma 8629744 (Gunnar). Fyrirkomulag mótsins er þannig að keppendur draga fyritækjaspjald úr hatti, sem keppandinn síðan teflir fyrir í mótinu. Skráningu líkur kl 12.00 að hádegi á mótsdag. Tefldar verða 7 umferðir með 7 mínútna umhugsunartíma. Mótið verður reiknað til hraðskákstiga.

1. verðlaun 15.000 kr.
2. verðlaun 10.000 kr.
3. verðlaun 5000 kr.

Sigurvegarinn mótsins hlýtur titilinn Kringuskákmeistari 2017 og forlátan verðlaunagrip að auki. Þrjár efstu konur og þrjú efstu ungmenni 12. ára og yngri (fædd 2005 og yngri) fá sérstök verðlaun (Verðlaunagrip fyrir efsta sætið og verðlaunapeningur fyrir annað og þriðja sætið). Núverandi Kringlumeistari er Ingvar Þór Jóhannesson, sem telfdi fyrir Verkís. Skákstjórar á mótinu verða Haraldur Baldursson og Kristján Örn Elíasson.

Úrslit Kringlumótsins 2015 hér: og hér:
Kringlumóitið 2015, myndaalbúm hér:
Úrslit Kringlumótsins 2016 hér:

Þorsteinn gerði jafntefli við stórmeistara - er í 2.-4. sæti

FIDE-meistarinn Þorsteinn Þorsteinsson (2279) gerði jafntefli við armenska stórmeistarann Karen Movsziiszian (2502) í sjöttu umferð EM öldunga í gær en Þorsteinn teflir í flokki 50+. Þorsteinn hefur 4,5 vinninga og er í 2.-4. sæti. Þorsteinn teflir í dag við þriðja stórmeistarann í röð en sá er franskur og heitir Eric Prie (2481).

Bragi Halldórsson (2116), sem teflir í flokki 65+, tapaði í gær og hefur 3,5 vinninga. 

Báðir verða þeir í beinni í dag. Útsending hefst kl. 14.

51 skákmaður teflir í flokki Þorsteins og þar af eru sjö stórmeistarar. Þorsteinn er nr. 14 í stigaröð keppenda. 66 tefla í flokki Braga og þar af eru þrír stórmeistarar. Bragi er nr. 24 í stigaröð keppenda. 

• Heimasíða mótsins 
• Pörunarforrit
• Beinar útsendingar (Chess 24) - hefjast kl. 14

Íslandsmót kvenna hefst 25. ágúst

Íslandsmót kvenna fer fram helgina 25.-27. ágúst í húsnæði Skákskóla Íslands Faxafeni 12. Tefldar verða fimm umferðir eftir svissneska kerfinu. Teflt verður í einum flokki, þ.e. mótið opið öllum konum/stúlkum. 

Þátttökugjöld: Engin.

Umferðarfjöldi: Fimm umferðir

Tímamörk: 90 mín. + 30 sek. á leik 

Dagskrá:  

• 1. umferð, föstudaginn, 25. ágúst, kl. 19:30
• 2. umferð, laugardaginn, 26. ágúst, kl. 11:00
• 3. umferð, laugardaginn, 26. ágúst kl. 17:00
• 4. umferð, sunnudaginn, 27. ágúst, kl. 11:00
• 5. umferð, sunnudaginn, 27. ágúst, kl. 17:00

Verðlaun: 

1. 75.000.-
2. 45.000.-
3. 30.000.-

Verðlaun skiptast jafnt séu konar jafnar í verðlaunasætum. Teflt verður til úrslita um Íslandsmeistaratitilinn með styttri umhugsunarhtíma verði fleiri en ein efst.  

Skráning fer fram hér á Skák.is (guli kassinn efst).

Upplýsingar um þegar skráða keppendur má finna hér.

Mótið á Chess-Results.

Arnar Gunnarsson (Brim) sigraði á Borgarskákmótinu

Alþjóðlegi meistarinn Arnar Gunnarsson sem tefldi fyrir Brim og Fide meistarinn Ingvar Þór Jóhannesson sem tefldi fyrir Grillhúsið Tryggvagötu voru efstir og jafnir með 6,5 vinninga á 32. Borgarskákmótinu sem fram fór í Ráðhúsi Reykjavíkur mánudaginn 14. ágúst sl. Arnar var hálfu stigi hærri en Ingvar í fyrsta stigaútreikningi og því sigurvegari að þessu sinni með fyrirtækinu Brim sem hann tefldi fyrir. Þriðji var svo Björn Hóm Birkisson með 6v en hann tefldi fyrir KFC Ísland. Björn var eini titillausi keppandinn í sex efstu sætunum.

Fyrir lokaumferðina áttu fjórir keppendur möguleika á sigri en það voru Ingvar Þór Jóhannesson og Arnar Gunnarsson sem báðir voru með 5,5v og voru búnir að mætast og gera jafntefli í innbyrðis viðureign sinni en vinna aðra andstæðinga sína. Hinir tveir voru Helgi Ólafsson(Suzuki bílar) með 5v og Björn Hólm Birkisson einnig með 5v. Þeir tveir síðarnefndu þurftu að vinna skákir sína í lokaumferðinni og jafnframt að treysta á hagstæð úrslit í öðrum viðureignum. Stigin voru svo líka að þvælast fyrir Birni Hólm þannig að hann gat aðeins gert ráð fyrir 1.-2. sæti og öðru sæti á stigum. Í lokaumferðinni mættust Helgi Ólafsson og Arnar Gunnarsson, Ingvar Þór Jóhannesson og Daði Ómarsson (Íslandsstofa). Á meðan tefldi Björn Hólm við Bárð Örn Birkisson (Hótel Borg). Ingvar vann Daða og kláraðist sú skák fyrst af topp viðureignunum. Næst vann Björn Bárð og tryggði sér verðlaunasæti en jafnframt var ljóst að það dygði ekki til sigurs fyrst Ingvar vann. Þá voru Helgi og Arnar eftir og þar hafði Arnar sigur í rafmagnaðri viðureign. Arnar Gunnarsson bætti þar með við sínum fimmta sigri í Borgarskákmótinu. Arnar er einn af betri hraðskákmönnum landsins og sigursælasti skákmaðurinn í Borgarskákmótunum. 

Mótið í ár var vel sótt en alls tóku 64 keppendur þátt að þessu sinni. Skráning í mótið fór hægt að stað en á sama tíma var skráning fyrirtækja í mótið með miklum ágætum, þannig að fram eftir morgni skákdags voru fleiri fyrirtæki skráð í mótið heldur en skákmenn. Það hefur ekki gerst að fleiri fyrirtæki hefi verið í mótinu en skákmenn síðan hætt var að byrja taflið kl. 15 á virkum degi og mótið fært aftur til kl. 16. Þegar líða tók að hádegi fór fjöldi skákmann loks fram úr fyrirtækjunum og þegar upp var staðið voru skákmennirnir 13 fleiri en fyrirtækin en bilið hefur ekki verið minna í mörg Herrans ár. Þetta er örugglega velmegunarmerki þannig að skákmenn hafa meira að gera í vinnunni en áður og forsvarsmenn fyrirtækja og stofnana viljugri að vera með.

Yfir sjötíu ára aldursmunur var á yngsta og elsta keppenda mótsins þeim Bjarti Þórissyni (2009) og Finni Kr Finnssyni (1935)(Guðmundur Arason smíðajárn)  og stóðu þeir sig báðir með prýði. Yngri skákmenn settu að þessu sinni nokkurn svip á mótið með því að skipa tæpan þriðjung mótsins en þar fóru fremstir Björn Hólm Birkisson 6v og Dagur Ragnarsson (Grafia) 5v. Eins og oft áður var svo  Lenka Ptácniková (Samhentir-Kassagerð) fremst af konunum með 4,5v

Nokkur fjöldi áhorfenda var á mótinu, þá aðallega túristar sem staddir voru í Ráðhúsinu og fylgdust spenntir með af pallinum. Túristarnir voru samt heldur færri á meðan á móti stóð en í fyrra, enda að þessu sinni teflt í þeim sal sem Íslandskortið er að jafnaði og því minna um að vera fyrir þá í Ráðhúsinu. Töflin voru samt jafnt vinsæl meðal þeirra fyrir skákmótið.

Skákfélagið Huginn vill koma á framfæri þökkum til allra þeirra sem tóku þátt, Reykjavíkurborgar fyrir að hýsa mótið, Taflfélagi Reykjavíkur fyrir samstarfið og síðast en ekki síst þeim fjölmörgu fyrirtækjum sem styrktu mótið.

Sjáumst að ári!

Sjá nánar heimasíðu Hugins. 

Lokastaðan í chess-results.

Myndagallerí á heimasíðu TR.

 

 

 

Aronian efstur í St. Louis - Garry Kasparov ekki náð sér á strik

Armeninn Levon Aronian (2809) er efstur með 12 stig af 18 mögulegum af loknum atskákhluta at- og hraðskákmótsins í St. Louis. Veitt er 2 stig fyrir hvern vinning. Caruana (2807) og Nakamura (2792) eru næstir með 11 stig. Garry Kasparov (2812) hefur ekki náð sér á strik og rekstur lestina ásamt Navara (2737) og Anand (2783) með 7 stig. Í gær vann hann eina skák en tapaði tveimur. 

Í kvöld kl. 18 hefst svo hraðskákin og tefla þeir hraðskákir. Það verður afar fróðlegt að sjá "gamla manninn" kljást við ungu mennina með styttri umhugsunartíma. 

Lítið uppgjarhljóð virðist vera í þrettánda heimsmeistaranum á Twitter.

 

Then we must show them that blitz is for senior citizens tomorrow! https://t.co/kt9aR2olnp

— Garry Kasparov (@Kasparov63) August 16, 2017

 

Best er að fylgjast með mótinu í gegnum heimasíðu mótsins.

Nánar má lesa um gærdaginn á Chess24.

Myndir: Lennart Ootes (af Chess24).

• Heimasíða mótsins
• Beinar útsendingar

Fjöltefli Geðhjálpar og Vinaskákfélagsins

Fjöltefli Geðhjálpar og Vinaskákfélagsins verður haldið í húsnæði Geðhjálpar mánudaginn 21 ágúst kl. 16:00. Keppendur verða 10 manns frá athvörfum, búsetukjörnum, geðdeildum og fólki frá Kleppi. 1 til 2 frá hverjum stað. Engin skákmaður yfir 2000 skákstig mun tefla, þannig að þetta verða bara áhuga skákmenn sem verða þarna í fararbroddi. Hörður Jónasson og Hjálmar Sigurvaldason munu svo tefla við þau.

Teflt verður með klukku og er áætlað að skákmenn hafi 20 mín, en þeir Hörður og Hjálmar 30 mín. Verðlaun verða veitt öllum sem keppa þ.e. gullverðlaunapeningur sem á stendur "Fjöltefli á vegum Geðhjálpar og Vinaskákfélagsins 2017". Ennfremur mun Vinaskákfélagið vera með kaffi og kökur í samvinnu við Geðhjálp. Áhorfendur eru hjartanlega velkomnir.

Skráning er hjá Hörður Jónasson Sími 777-4477 og Netfang: [e-mail].

Þorsteinn vann stigahæsta keppendann - er í öðru sæti - Bragi vann líka

Þorsteinn Þorsteinsson (2279) vann stigahæsta keppenda mótsins, stórmeistarann, Zurab Sturua (2548) í 5. umferð EM öldunga í gær en Þorsteinn teflir í flokki 50+. Þorsteinn hefur 4 vinninga eftir þrjár vinningsskákir í röð og er í öðru sæti hálfum vinningi á efstir forystusauðnum, armenska stórmeistaranum Karen Movsziszian (2502).

Þorsteinn lýsir skákinni svo:

Ég var með hvítt og upp kom enski leikurinn. Taflið var í jafnvægi fram eftir en ég skapaði mér ákveðin sóknarfæri á kóngsvæng þegar ég lék af mér skiptamuni. Ég var þá með betra tafl fannst mér. Ég var með tvö peð upp í skiptamuninn en erfiða stöðu. Ég náði samt sem áður að halda í horfinu og skapa ný vandamál fyrir hann sem gerði það að verkum að hann notaði mikinn tíma þar til hann lék sjálfur af sér skiptamuni. Ég hafði tæplega efni á að leika af mér skiptamuninum en hafði það alls ekki sem þýddi að hann gafst upp skömmu síðar með tveimur peðum undir.

Skákina má nálgast hér.

Bragi Halldórsson (2116), sem teflir í flokki 65+, vann öruggan sigur á ísraelska skákmanninum Edward Gorzeltsen (1885) í gær. Skákina má finna hér. Bragi hefur 3,5 vinninga og er í 6.-16. sæti. Bragi mætir Svíanum Magnus Wahlbom (2194) í dag. 

Báðir verða þeir í beinni í dag. Útsending hefst kl. 14.

51 skákmaður teflir í flokki Þorsteins og þar af eru sjö stórmeistarar. Þorsteinn er nr. 14 í stigaröð keppenda. 66 tefla í flokki Braga og þar af eru þrír stórmeistarar. Bragi er nr. 24 í stigaröð keppenda. 

• Heimasíða mótsins 
• Pörunarforrit
• Beinar útsendingar (Chess 24) - hefjast kl. 14

Stórmót Árbæjarsafns og TR fer fram á sunnudaginn

Stórmót Árbæjarsafns og Taflfélags Reykjavíkur fer fram sunnudaginn 20. ágúst.

Þetta skemmtilega mót í sögulegu umhverfi er fyrir löngu orðinn fastur viðburður í skákdagatalinu.

Teflt verður í Árbæjarsafni og hefst taflið kl. 14. Tefldar verða 8 umferðir með umhugsunartímanum 4 mín á  skák auk 2 sek á hvern leik (4+2).

Veitt verða verðlaun fyrir þrjú efstu sætin, 15.000 kr., 10.000 kr. og 5.000 kr.

Þátttökugjald er 1500 kr. fyrir 18 ára og eldri, en ókeypis er fyrir yngri en 18 ára og er þátttökugjald jafnframt aðgangseyrir í  safnið. Þeir sem fá ókeypis aðgang í safnið, t.d. eldri borgarar og öryrkjar, borga ekkert þátttökugjald.

Þátttökugjald er greitt við inngang Árbæjarsafns.

Mótið verður reiknað til alþjóðlegra (Fide) hraðskákstiga. Skráning fer fram í gegnum hlekkinn hér að neðan.

Skráningarform

Skráðir keppendur