Guðmundur heldur sínu striki í Stúkunni

Guðmundur Gíslason (2314) heldur áfram sigurgöngu sinni í áskorendaflokki Íslandsmótsins í skák. Í gær vann hann Lenku Ptácníková (2242). Sjötta sigurskákin í jafn mörgun skákum. Jóhann Ingvason (2121), sem vann Jón Kristinsson (2166), er annar með 4½ vinning. Dagur Ragnarsson (2316) og Kristján Eðvarðsson (2228) koma svo næstir með 4 vinninga. Fimm keppendur hafa svo 3½ vinning svo baráttan verður hörð um efstu tvö sætin sem gefa keppnisrétt í landsliðsflokki.

Sjöunda umferð fer fram í kvöld og hefst kl. 18:30. Þá mætast meðal annars:

• Dagur Ragnarsson (4) - Guðmundur Gíslason (6)
• Kristján Eðvarðsson (4) - Jóhann Ingvason (4½)
• Lenka Ptácníková (3½) - Hallór Grétar Einarsson (3½)
• Tómas Björnsson (3½) - Kristinn Jens Sigurþórsson (3½)
• Björgvin Víglundsson (3½) - Gylfi Þór Þórhallsson (3)

Áhorfendur eru velkmnir í Stúkuna. Birnukaffi hefur flutt sig um set og þar nú með aðsetur! 

• Heimasíða SÍ
• Beinar útsendingar
• Vefútsending
• Chess-Results

Lokaundankeppni Reykjavik Open Barna Blitz fer fram á morgun í TR

Eins og frá árinu 2009 stendur Skákakademía Reykjavíkur í samstarfi við taflfélög borgarinnar fyrir Reykjavík Open Barna-Blitz sem er hraðskákmót fyrir krakka í sjöunda bekk og yngri, það er fædd 2004 og síðar.

Taflfélag Reykjavíkur, Huginn, Skákdeild Fjölnis og Víkingaklúbburinn eru öll með undanrásir þar sem tvö sæti eru í boði í úrslitunum sem tefld verða laugardaginn 22. apríl.

Huginn: Mánudaginn 3. apríl í Mjóddinni (úrslit). Baltasar Máni Wedholm og Ísak Orri Karlsson unnu sér keppnisrétt í úrslitum. 

Víkingaklúbburinn: Miðvikudaginn 5. apríl í Víkinni(úrslit). Óskar Víkingur og Stefán Orri Davíðssynir unnu sér keppnisrétt í úrslitum.

Skákdeild Fjölnis: Miðvikudaginn 5. apríl í Rimaskóla (úrslit). Arnór Gunnlaugsson og Kristján Dagur Jónsson unnu sér keppnisrétt í úrslitum 

Taflfélag Reykjavíkur: Laugardaginn 8. apríl í Taflfélagi Reykjavíkur að Faxafeni 12, hefst 14:00.

 

Stóra páskaeggjamót KR á mánudagskvöldið

Það er jafnan hart barist á skákmótunum í KR- heimilinu hvort heldur er á mánudagskvöldum eða árdegismótunum á laugardagsmorgnum.  Það sem af er ári hafa margir fræknir kappar fagnað þar glæstum sigrum eða hafnað í öðru sæti ella eða enn neðar. Meðal sigursælla keppenda undanfarið hafa verið Magnús Sigurjónsson, Jón G. Briem, Guðfinnur Kjartansson, Stefán Þormar, Gunnar Gunnarsson, Bjarni Hjartarson  o.fl. að ógleymdum Björgvini Víglundssyni, tvöföldum Íslandsmeistara (bæði 50+ og 65 ára og eldri) sem gerði sér lítið fyrir og vann kappteflið um Friðrikskónginn með fullu húsi fyrr í vetur. 

Á mánudagskvöldið kemur verður svo haldið þar hið árlega Kapp- og Happ páskaeggjamót, þar sem 3 risa páskaegg frá sælgætisgerðinni SAMBÓ verða í vinning auk fjölda annarra girnilegra nammieggja frá GÓU. Bæði sigurvegarar í einstökum aldursflokkum karla og kvenna geta gert sér góðar vonir um að fara ekki tómhentir heim og eins þeir sem detta óvænt í lukkupottinn í mótslok þegar darraðardansinum lýkur.  

Um er að ræða 7 mínútna 11–13 umferða alvöru hraðskákmót, eftir keppendafjölda. Ýtt verður á klukkurnar kl. 19.30 og allir sem taflmanni geta valdið hjartanlega velkomnir til þátttöku.

Baltasar og Ísak Orri komnir í úrslit á Reykjavik Barna Blitz

Æfingin þann 3. apríl sl. var ekki alveg hefðbundin. Engin dæmi eða þemskák var á æfingunni og hraðskák reglum fylgt í hvívetna. Í verðlaun voru ekki aðeins medalíur eins og vanalega heldur gáfu tvö efstu sætin þátttökurétt í úrslitum Reykjavík Barna Bliz sem fram fer meðan á Reykjavíkurskákmótinu stendur.

Baráttan var jöfn um efstu sætin á æfingunni en þegar upp var staðið hafði Baltasar Máni Wedholm sigurinn með 6v í jafn mörgum skákum. Annar var Ísak Orri Karlsson með 5v. Úrslitin réðust í innbyrðis viðureign þeirra í fjórðu umferð þar sem Baltasar hafði sigur í spennandi skák sem hefði vel getað farið öðru vísi. Þeir tveir unnu sér því þátttökurétt í úrslitum Reykjavík Barna Blitz. Síðan komu jöfn með 4v Batel Goitom Haile og Rayan Sharifa. Batel sem tapaði aðeins gegn efstu mönnum hefði betur á stigum og hlaut þriðja sætið.
Í æfingunni tóku þátt: Baltasar Máni Wedholm Gunnarsson, Ísak Orri Karlsson, Batel Goitom Haile, Rayan Sharifa, Brynjar Haraldsson, Andri Hrannar Elvarsson,Óttar Örn Bergmann Sigfússon, Zofia Momuntjuk, Adrian Efraím Beniaminsson Fer, Wiktoria Momuntjuk, Bergþóra Helga Gunnarsdóttir, Alfreð Dossing, Sigurður Rúnar Gunnarsson, Hans Vignir Gunnarsson og Wihbet Haile.

Næsta mánudag 10. apríl 2017 verður páskaeggjamót Hugins og hefst það kl. 17.00, þ.e. nokkru fyrr en venjuleg mánudagsæfing. Páskaeggjamótið verður reiknað til hraðskákstiga. Eins og æfingarnar verður páskaeggjamótið í félagsheimili Hugins í Álfabakka 14a í Mjóddinni. Gengið er inn milli Subway og Fröken Júlíu og salurinn er á þriðju hæð.

Úrslitin í chess-results:

Halldór Pálsson með fullt hús á hraðkvöldi

Halldór Pálsson sigraði örugglega á hraðkvöldi Hugins sem haldið var mánudaginn 3. apríl sl. Halldór vann allar skákirnar sem hann tefldi á hraðkvöldinu og fékk 7v í jafn mörgum skákum. Sigurinn var tryggður fyrir síðustu umferð en samt engin ástæða til að slaka á. Annar var Magnús Magnússon með 5,5v. Síðan komu jafnir með 4v Vigfús Ó. Vigfússon og Atli Jóhann Leósson. Það hafði Vigfús betur á stigum og hlaut 3. sætið.

Eins og fyrri sigurvegarar sá Halldór um dráttinn í happdrættinu og valdi tölu Harðar Garðarssonar. Báðir völdu þeir pizzumiða frá Dominos. 

Lokastaðan á hraðkvöldinu:

1. Halldór Pálsson, 7v/7
2. Magnús Magnússon, 5,5v
3. Vigfús Ó. Vigfússon, 4v
4. Atli Jóhann Leósson, 4v
5. Hörður Garðarsson, 2,5v
6. Sigurður Freyr Jónatansson, 2,5v
7. Pétur Pálmi Harðarson, 2v
8. Finnur Kr. Finnsson, 0,5v

Úrslitin í chess-results:

Páskeggjamót Hugins fer fram á mánudaginn

Páskaeggjamót Hugins verður haldið í 25. sinn mánudaginn 10. apríl 2017, og hefst taflið kl. 17, þ.e. nokkru fyrr heldur en venjulegar mánudagsæfingar. Páskaeggjamótið kemur í stað mánudagsæfingar. Tefldar verða 7 umferðir með 7 mínútna umhugsunartíma. Mótið er opið öllum krökkum á grunnskólaaldri. Skráningarform er er á skak.is og eru væntanlegir þátttakendur beðnir um að skrá sig til að auðvelda undirbúning mótsins. Mótið verður reiknð til alþjóðlegra hraðskákstiga.

Allir þátttakendur keppa í einum flokki en verðlaun verða veitt í tveimur aðskildum flokkum. Páskaegg verða í verðlaun fyrir þrjú efstu sætin, bæði í eldri flokki (fæddir 2001 – 2004) og yngri flokki (fæddir 2005 og síðar). Sá sem er efstur í hverjum árgangi fær einnig páskaegg sem og efstu þrjár stúlkurnar á mótinu. Að auki verða tvö páskaegg dregin út. Enginn fær þó fleiri en eitt páskaegg. Lítið páskaegg verður svo fyrir þá sem ekki vinna til verðlauna.

Páskaeggjamótið verður haldið í félagsheimili Hugins í  Álfabakka 14a í Mjóddinni. Inngangur er milli Subway og Fröken Júlíu en salur félagsins er á þriðju hæð hússins.

Upplýsingar um þegar skráða keppendur má finna hér.

Sveinbjörn Sigurðsson látinn

Sveinbjörn Sigurðsson er fallinn frá 69 ára að aldri. Hann lést 3. apríl sl. Skákmenn hafa minnst Sveinbjörns á Facebook-hópi skákmanna. Hér má sjá nokkur minningarorð skákmanna um þennan mikla meistara.

Halldór Brynjar Halldórsson

Sveinbjörn var einstakur maður, gæðablóð mikið. Það vita þeir sem hann þekkja, þrátt fyrir áratuga stjórnarandstöðu hans norðan heiða.

Björn Þorfinnsson

Sveinbjörn er einn sá allra eftirminnilegasti. Blessuð sé minning meistarans. Hans verður saknað.

Sigurður Eiríksson

Átti leið um Eyrarlandveginn haustið 1968 á leið minni í MA. Þar var þessi góði maður. Átti samskipti við hann alla tíð síðan. Refur í skákinni en mikill öðlingur.

Gunnar Björnsson

Deildakeppnin verður ekki söm. Sveinbjörns verður sárt saknað.

Áskell Örn Kárason

Sveinbjörn er allur - lést sl. mánudagskvöld. Við Skákfélagsmenn minnumst hans með virðingu og hlýju. Þess má geta að Sveinbjörn varð 69 ára gamall þann 9. mars sl. Ef Bobby gamli Fischer væri á lífi hefði hann einmitt orðið 74 ára þennan sama dag. Þannig að drengstaulinn frá Brooklyn fékk Eyrarlandsgoðann í fimm ára afmælisgjöf - ef svo má segja. 9. mars allavega merkur dagur í skáksögunni!

Rúnar Sigurpálsson

Sveinbjörn var eftirminnilegur öllum sem honum kynntust. Jafnvígur á skák og bridge, á sínum yngri árum var hann afar efnilegur knattspyrnumaður og þeir sem muna eftir gullaldarliði knattspyrnudeildar Skákfélags Akureyrar muna eftir Sveinbirni dreifa spilinu með sínum öfluga vinstri fót, yfirferðin kannski ekki mikil en yfirsýnin þeim mun meiri. Blessuð sé minning hans.

Sigurður Arnarson

Þetta gæti verið síðasta myndin sem tekin var af kappanum. Situr fyrir framan merki Skákfélags Akureyrar og bíður eftir að fá að tefla við ungan félaga í SA.

Tómas Veigar Sigurðarson

Ég var líklega síðasti andstæðingur Sveinbjörns í kappskák. Við mættumst í lokaumferð SÞA í lok febrúar.

Mætti honum líka í einni af síðustu skákunum sem hann tefldi, sem voru tefldar á 10 mínútna móti hjá SA þann 9. mars, afmælisdag Sveinbjörns. Það mót var óhefðbundið, því við ákváðum að tefla tvöfalda umferð, sem tók 240 mínútur. Var það gert að undirlagi Sveinbjörns, sem sagði eitthvað á þessa leið "við erum mættir hér til þess að tefla" ;)

Við fráfall hans er skarð fyrir skildi sem erfitt verður að fylla.

Hvíldu í friði kæri vinur - Þín verður sárt saknað.

Mikael Jóhann Karlsson

Frábær maður sem stóð fast við bakið á ungum skákmönnum að hefja sín fyrstu skref í skák á Akureyri, stoppaði við hjá honum og spjallaði um allt milli himins og jarðar (oftast til gagnrýna hin ýmsu málefni) eftir nánast hvern skóladag, reyndist mér gríðarlega vel þegar ég hóf mín fyrstu skref á fullorðins skákmótum á Akureyri. Megi þessi mikli öðlingur hvíla í friði, aldrei mun ég gleyma honum.

Gauti Páll Jónsson

Ég er þakklátur fyrir að hafa kynnst honum í þau mörgu skipti sem við tefldum fyrir norðan og hann var alltaf til í spjall þegar maður rakst á hann á göngu um bæinn. Eftirminnilegt þegar ég hreinsaði eitt fámennt en góðmennt mót á Akureyri fyrir utan eina skák - þegar Sveinbjörn ruslaði mér upp! Blessuð sé minning hans.

 

Guðmundur með 1½ vinnings forskot

Guðmundur Gíslason (2314) er í miklu stuði í áskorendaflokki Skákþings Íslands. Í gær vann hann sína fimmtu skák í röð þegar hann lagði Tómas Björnsson (2179) að velli. Lenka Ptácníková (2242) sótti hart að Jóhanni Ingvasyni (2121) en tókst ekki að kreista fram vinning. Þau eru jöfn í 2.-3. sæti með 3½ vinning. Átta keppendur hafa 3 vinninga. Baráttan er því afar hörð um tvö efstu sætin sem gefa keppnisrétt í landsliðsflokki að ári. 

Sjötta umferð fer fram í kvöld og hefst kl. 18:30. Þá mætast meðal annars:

• Guðmundur Gíslason (5) - Lenka Ptácníková (3½)
• Jóhann Ingvason (3½) - Jón Kritinsson (3)
• Dagur Ragnarsson (3) - Bragi Halldórsson (3)
• Halldór Grétar Einarsson (3) - Tómas Björnsson (3)
• Kristján Örn Elíasson (3) Kristján Eðvarðsson (3)
• Einar Bjarki Valdimarsson (3) - Björgvin Víglundsson (2½)

Áhorfendur eru velkmnir í Stúkuna. Birnukaffi hefur flutt sig um set og þar nú með aðsetur! 

• Heimasíða SÍ
• Beinar útsendingar
• Vefútsending
• Chess-Results

Fullt út úr dyrum á páskaskákæfingu Fjölnis. Arnór og Kristján Dagur í úrslit Barnablitz

Það var aldeilis líf í tuskunum á páskaskákæfingu Fjölnis sem um leið var keppni um tvö laus sæti á úrslitakeppni Barnablitz 2017.  Barnablitzið er eftirsóknarverður hliðarviðburður á Reykjavík Open í Hörpunni og fer úrslitakeppnin fram laugardaginn 22. apríl. Páskaskákæfingin stóð undir nafni því að allir þátttakendur fengu að gjöf páskaegg og flest verðlaun voru líka páskaegg.

 

Það voru rúmlega 40 börn á aldrinum 6 – 16 ára sem sóttu æfinguna og var þeim skipt upp í þrjá hópa. Mest var undir í Barnablitz-hópnum þar sem hart var barist um tvö laus sæti í úrslitum.  Þegar upp var staðið í jafnri keppni þá reyndist Arnór Gunnlaugsson Fjölni einn efstur en í 2.–3. sæti komu jafnir í mark þeir Anton Breki Óskarsson Fjölni og Kristján Dagur Jónsson TR sem vann Anton Breka í síðustu umferð.

 

Til að skera úr um síðara sætið í úrslitakeppni Barnablitz þá þurftu þeir Anton Breki og Kristján Dagur að tefla tveggja skáka einvígi. Þar unnu þeir sitt hvora skákina með hvítu og varð þá að koma á bráðabana þar sem Kristján Dagur hafði hvítt og einni mínútu minni tíma eins og algengast er í slíkum tilfellum. Þar náði Kristján Dagur að leggja Anton Breka og tryggja sér sætið. Tveir jafnir keppendur sem lögðu mikið á sig í baráttunni og stóðu sveittir upp frá taflborðinu. Þeir Arnór og Kristján Dagur eru verðugir fulltrúar ungra skákmanna á mótinu.

Arnór vakti mikla athygli á Íslandsmóti grunnskólasveita fyrir stuttu þar sem hann í sveit Rimaskóla vann til borðaverðlauna og lagði alla sterkustu andstæðinga sína að velli. Kristán Dagur hefur verið afar virkur í barna-og unglingastarfi TR og náði frábærum árangri sl. haust á alþjóðlega skákmótinu Västerås Open í Svíþjóð þar sem hann hækkaði um 70 stig.

Skákæfingar Fjölnis halda áfram eftir páskaleyfi á miðvikudögum kl. 16.30 en vetrarstarfinu lýkur laugardaginn 29. apríl með glæsilegu Sumarskákmóti Fjölnis á Barnamenningarhátíð 2017. Mótið verður opið öllum skákáhugamönnum á grunnskólaaldri. Þar verða rúmlega 20 áhugaverðir vinningar í boði og lýst kjöri á afreksmanni-og æfingameistara Skákdeildar Fjölnis 2016 – 2017.

Páskaeggjasyrpan: Bjartur og Batel sigurvegarar móts nr.2

Páskaeggjasyrpa Nóa Síríus og Taflfélags Reykjavíkur hélt áfram um síðastliðna helgi og var skákhöllin sem fyrr full af kátum og súkkulaðiþyrstum börnum. Hafi fyrsta mótið þótt spennandi þá var þetta mót æsispennandi! Í yngri flokki urðu þrír keppendur efstir og jafnir en í eldri flokki urðu fjórir keppendur jafnir í 2.sæti.

Sigurvegari yngri flokks í fyrsta mótinu, Einar Tryggvi Petersen, hélt uppteknum hætti til að byrja með og vann hvern andstæðing sinn á fætur öðrum. Í sjöttu og næstsíðustu umferð kom þó loks að því að hann tapaði skák er Anna Katarina Thoroddsen lagði Einar Tryggva með svörtu mönnunum. Einar Tryggvi lét það ekki slá sig út af laginu heldur vann í síðustu umferð og lauk því tafli með 6 vinninga í skákunum 7. Sama árangri náði Anna Katarina sem vann sex skákir en tapaði einni. Bjartur Þórisson tefldi einnig mjög vel og vann fyrstu fjórar skákir sínar. Í 5.umferð tapaði hann fyrir Einari Tryggva en sú tapskák herti hann einungis því Bjartur vann síðustu tvær skákirnar og nældi sér því einnig í 6 vinninga. Eftir stigaútreikning varð ljóst að Bjartur hafði orðið hlutskarpastur, Einar Tryggvi hreppti 2.sætið og Anna Katarina það þriðja. Þeir Ólafur Fannar Pétursson og Daníel Davíðsson komu næstir með 5 vinninga í 4.-5.sæti. Anna Katarina varð því efst stúlkna, en næstar henni voru Soffía Berndsen og Bergþóra Helga Gunnarsdóttir með 4 vinninga.

Í eldri flokki varð Batel Goitom Haile í 1.sæti með 6 vinninga. Batel vann fyrstu sex skákir sínar en tapaði í síðustu umferð fyrir Frey Grímssyni. Það kom þó ekki að sök fyrir Batel því hennar helsti keppinautur í mótinu, Gunnar Erik Guðmundsson, tapaði einnig í síðustu umferð, en með sigri hefði hann náð Batel að vinningum. Gunnar Erik vann fimm skákir og tryggði sér 2.sætið í mótinu eftir stigaútreikning. Freyr Grímsson nældi sér einnig í 5 vinninga og bronsverðlaun. Þeir Árni Ólafsson og Gabríel Sær Bjarnþórsson luku jafnframt tafli með 5 vinninga en urðu eilítið lægri á stigum. Batel varð hlutskörpust stúlkna en næstar henni voru Ragna María Sverrisdóttir og Iðunn Helgadóttir með 4 vinninga.

Happdrættið var á sínum stað og sá sem hreppti páskaegg númer 6 að þessu sinni var Ingvar Wu Skarphéðinsson. Ingvar stóð sig jafnframt vel í mótinu og fékk 4 vinninga í 6.sæti eldri flokks.

Keppnin um bestan samanlagðan árangur er æsispennandi. Í yngri flokki er Einar Tryggvi efstur með 13 vinninga, Bjartur er næstur með 11,5 vinning og Anna Katarina er þriðja með 11 vinninga. Í eldri flokki er Batel efst með 12 vinninga, Gunnar Erik er í 2.sæti með 10 vinninga og Árni Ólafsson er þriðji með 9,5 vinning.

Þriðja og síðasta mót Páskaeggjasyrpunnar fer fram næstkomandi sunnudag og hefst það klukkan 13. Skráningarformið má nálgast hér fyrir neðan eða í gula kassanum á skak.is.

Taflfélag Reykjavíkur þakkar öllum þeim börnum sem lögðu leið sína í Faxafenið og gerðu Páskaeggjasyrpuna að þeirri skákveislu sem raunin varð. Sjáumst næsta sunnudag! 

Nánari upplýsingar um mótin: Chess-results

Skráning í síðasta mót Páskaeggjasyrpunnar: Skráningarform

Nánar á heimasíðu TR.