Sjötta mót Bikarsyrpu TR fer fram helgina 27.-29. maí

Bikarsyrpa Taflfélags Reykjavíkur heldur áfram þegar sjötta og síðasta mót syrpunnar fer fram helgina 27.-29. maí og hefst fyrsta umferð föstudaginn 27. maí kl. 17.30. Mótum syrpunnar hefur verið fjölgað og telur hún alls sex kappskákmót sem eru ætluð börnum á grunnskólaaldri (fædd 2000 og síðar) sem ekki hafa náð 1600 skákstigum. Þar með gefst þeim tækifæri til að næla sér í alþjóðleg skákstig á skákmótum sem sérhönnuð eru fyrir þau.

Tefldar eru 5 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo við leggjum ætíð áherslu á að krakkarnir vandi sig og noti tímann vel, þá má gera ráð fyrir að margar skákir taki mun styttri tíma.

Mótið er sérstaklega hugsað fyrir krakka sem hafa sótt skákæfingar TR (og/eða annarra taflfélaga) reglulega síðastliðinn vetur eða lengur. Það er gott að byrja sem fyrst að keppa á kappskákmótum, en hingað til hefur þeim krökkum sem vilja tefla á “alvöru mótum” mestmegnis staðið til boða að taka þátt í opnum mótum. Þar er styrkleikamunurinn oft mikill, mótin taka langan tíma, auk þess sem marga krakka óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því.

Einungis börn og unglingar á grunnskólaaldri sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og krakkarnir njóta þess betur að tefla kappskákir. Tímamörkin eru líka styttri, og henta krökkunum betur en langar 90 mínútna skákir sem tíðkast á venjulegum kappskákmótum. Mótið uppfyllir öll skilyrði Alþjóða skáksambandsins FIDE og er reiknað til alþjóðlegra skákstiga sem gott er að byrja að safna snemma. Frítt er í mótin fyrir krakka í Taflfélagi Reykjavíkur en fyrir krakka í öðrum taflfélögum er þátttökugjaldið 1000 krónur fyrir hvert mót Bikarsyrpunnar.

Dagskrá:
1. umferð 17.30 á föstudegi (27. maí)
2. umferð 10.30 á laugardegi (28. maí)
3. umferð 14.00 á laugardegi (28. maí)
4. umferð 10.30 á sunnudegi (29. maí)
5. umferð 14.00 á sunnudegi (29. maí). (Lokaumferð + verðlaunaafhending).

Ein yfirseta (bye) er leyfð í umferðum 1-3 og fæst fyrir hana 1/2 vinningur. Tilkynna þarf skákstjóra um yfirsetu fyrir lok umferðarinnar á undan.

Vinsamlegast skráið þátttakendur sem fyrst, það hjálpar við undirbúning mótsins!

Skráningarform

Skráðir keppendur

Bikarsyrpan samanstendur af sex mótum í vetur. Bikarar og medalíur eru í verðlaun fyrir efstu sætin í hverju
 móti auk áskrifta á Chess.com eða Chesskid.com. Þá verða veitt sérstök verðlaun fyrir samanlagðan árangur á mótunum þar sem í boði verða 5 einkatímar hjá alþjóðlegum meistara fyrir fyrsta sætið, 3 tímar fyrir annað sætið og 2 tímar fyrir þriðja sætið.

Hlökkum til að sjá ykkur!

Úrslitakeppni eldri flokks Landsmóts á fimmtudagskvöldið klukkan 20:00

Fjórir keppendur urðu jafnir og efstir í eldri flokki á Landsmótinu í skólaskák. Þeir tefla úrslitakeppni á fimmtudagskvöldið kemur í SÍ. Taflið hefst klukkan 20:00.

Keppendur eru: Björn Hólm Birkisson, Bárður Örn Birkisson, Hilmir Freyr Heimisson og Aron Þór Maí.

Tefld verður einföld umferð allir við alla með tímamörkunum 10 03. Dregið verður í töfluröð á staðnum.

EM lokið: Björn vann í lokaumferðinni

Björn Þorfinnsson (2410) vann sína skák í lokaumferð EM einstaklinga sem fram fór í gær í Gjakova í Kósovó. Hannes Hlífar Stefánsson (2581) og Guðmundur Kjartansson (2457) gerðu jafntefli. Héðinn Steingrímsson (2574) tapaði fyrir Evgeny Najar (2681) sem fór illa með íslensku keppendurnar í lokaumferðunum tveimur en hann vann Hannes í næstsíðustu umferð.

 

Héðinn hlaut 6½ vinning, Hannes og Björn 6 vinninga og Guðmundur 5½ vinning. Héðinn hækkar um 3 stig fyrir frammistöðu sína en hinir lækka. Hannes um 5 stig, Gummi um 13 stig og Bjössi um 14 stig.

Rússneski stórmeistarinn Ernesto Inarkiev (2686) sigraði á mótinu. Lettinn Kovolenko (2644) varð annar.

Nánar verður sagt frá mótinu í lokapistli sem væntanlegur í dag eða á morgun.

 

• Heimasíða mótsins
• Beinar útsendingar
• Chessbomb (beinar útsendingar)
• Chess-Results 

 

Héðinn vann Beliavsky og fær lykilskák gegn Evrópumeistaranum - umferðin hefst 9:15

Stórmeistarinn Héðinn Steingrímsson (2574) vann goðsögnina Alexander Beliavesky (2624) í tíundu og næstsíðustu umferð EM einstaklinga sem fram fór í gær í Gjakova í Kósovó. Björn Þorfinnsson (2410) tefldi við enn einn 50+ Kósovóbúann og vann að þessu sinni en Hannes Hlífar Stefánsson (2581) og Guðmundur Kjartansson (2457) töpuðu gegn sterkum stórmeisturum.

Héðinn hefur 6½ vinning, Hannes hefur 5½ vinning en Guðmundur og Björn hafa 5 vinninga. 

Héðinn fær í dag algjörlega lykilskák í dag en þá teflir hann við Evrópumeistarann Evgeny Najer (2681). Sigur gæti tryggt Héðni keppnisrétt á Heimsbikarmótinu í skák sem fram fer Batumi í Georgíu haustið 2017. 

Skák Héðins verður í beinni og hefst útsendingin kl. 9:15.

Úrslit 10. umferðar

Pörun 11. umferðar

Rússneski stórmeistarinn Ernesto Inarkiev (2686) er efstur á mótinu en hann hefur 8½ vinning. Landi hans, Aleksey Goganov (2600) er í 2.-4. sæti með 7½ vinning ásamt Pólverjanum Radoslaw Wojtaszek (2722) og Lettanum Igor Goganov (2600).

 

• Heimasíða mótsins
• Beinar útsendingar
• Chessbomb (beinar útsendingar)
• Chess-Results 

 

Stefán Orri sigraði á Meistaramóti Skákskóla Íslands í flokki keppenda undir 1600 elo stigum

Hinn níu ára gamli Stefán Orri Davíðsson varð einn efstur á Meistaramóti Skákskóla Íslands í flokki keppenda undir 1600 elo stigum sem lauk í gær, sunnudag. Stefán Orri hlaut 6 ½ vinning úr átta skákum og varð vinningi á undan næsta manni. Hann var með vænlega stöðu gegn Guðmundi Agnari Bragasyni í lokaumferðinni en bauð jafntefli sem Guðmundur þáði og þar með var sigurinn tryggður.

Alls tóku 20 ungmenni þátt í mótinu sem hófst á föstudaginn og voru  tefldar átta umferðir með tímamörkunum 30 30. Verðlaun voru beitt fyrir þrjú efstu sætin og varð niðurstaðan þessi:

1. Stefán Orri Davíðsson 6 ½ v. ( af 8)
2. Daníel Ernir Njarðarson 5 ½ v.
3. Alec Sigurðarson 5 v.  

Nokkrir aðrir skákmenn voru einnig með 5 vinninga en voru lægri á stigum. Þá var keppt til verðlauna í flokki þeirra sem voru með 1200 elo stig og minna  og varð niðurstaðan þessi:

1. Freyja Birkisdóttir 4 v.
2. Örn Alexandersson 4 v.
3. Magnús Hjaltason  4 v.

Nokkrir aðrir þátttakendur fengu líka fjóra vinninga en voru lægri á mótsstigum. 

Mótstaflan á Chess-Results.

Seinni hluti Meistaramóts  Skákskólans hefst næstkomandi föstudag kl. 16 en rétt til þátttöku þar hafa skákmenn sem eru yfir 1600 elo stigum.  Þar verða tefldar sex umferðir eftir tímafyrirkomulaginu 90 30.

Nigel Short vann allar skákirnar seinni dag MótX-einvígisins!

Nigel Short mætti grimmur til leiks síðari daginn í MótX-einvíginu í skák gegn Hjörvari Steini Grétarssyni, sem skipulagt var af Hróknum. Short vann allar þrjár skákir dagsins og sigraði í einvíginu með 4,5 vinningi gegn 1,5. Einvígið var frábær skemmtun og fjöldi áhugamanna á öllum aldri lagði leið sína í Salinn í Kópavogi, auk þess sem þúsundir fylgdust með beinum útsendingum á internetinu.

 

Short og Hjörvar tefldu alls sex skákir. Hjörvar, sem er yngsti stórmeistari Íslands, mætti ákveðinn til leiks og var Short stálheppinn að sleppa með jafntefli í fyrstu skákinni. Í annarri skákinni náði Hjörvar að láta kné fylgja kviði og sigraði í vel útfærðri skák. Short náði sér hinsvegar á strik í þriðju  skákinni og jafnaði metin.  Það var síðan alger einstefna af hálfu enska meistarans seinni keppnisdaginn, enda tefldi hann frábærlega. Hjörvar varðist af mikilli hörku og hugkvæmni, en varð að játa sig sigraðan.

 

Illugi Gunnarsson menntamálaráðherra afhenti verðlaun í mótslok og bar lof á skipuleggjendur og bakhjarla fyrir að koma einvíginu í kring. Glíman við Short væri dýrmæt fyrir Hjörvar Stein, sem er bjartasta von Íslands í skákinni. Hrafn Jökulsson forseti Hróksins afhenti ráðherra, forsvarsmönnum MótX og bæjarstjóra Kópavogs minjagrip og þakkaði stuðning þeirra við þennan skemmtilega og spennandi viðburð.

 

Það er skammt stórra högga á milli hjá Hróknum, því á mánudag halda Hróksmenn til Nuuk, höfuðborgar Grænlands, þar sem hin árlega Flugfélagshátíð fer í hönd. Með í för verða Nigel Short og Jóhann Hjartarson, sem um árabil var stigahæsti skákmaður Norðurlanda. Short og Jóhann tefla einvígi í Nuuk á þriðjudag, auk þess sem efnt verður til fjölmargra viðburða í samvinnu við skákfélagið í Nuuk.

Gummi vann - aðrir með jafntefli - spennandi pörun á morgun

Guðmundur Kjartansson (2457) vann sína skák í níundu umferð EM einstaklinga sem fram fór í Gjakova í Kósovó í dag. Hannes Hlífar Stefánsson (2581) og Héðinn Steingrímsson (2574) gerðu báðir jafntefli við stigaháa andstæðinga. Hannes við Englendinginn Dawid Howell (2671) og Héðinn við hinn úkraínska Martyun Kravtsiv (2641). Hannes og Héðinn hafa báðir 5½ vinning og þurfa nauðsynlega að vinna í lokaumferðunum tveimur til að eiga möguleika á keppnisrétti á Heimsbikarmótinu í skák sem fram fer í Batumi í Georgíu í haust en 23 efstu sætin veita þar keppnisrétt. 

Úrslit 9. umferðar

Boði verður uppá mjög spennandi pörun fyrir íslensku skákmennina á morgun. Hannes teflir við sjálfan Evrópumeistarann Evgeniy Najer (2681), Héðinn mætir goðsögninni Alexander Beliavesky (2624) og Guðmundur fær Úkraínumanninn sterka Andrei Volokitin (2642).

Pörun 10. umferðar

Bæði Hannes og Héðinn verða í beinni á morgun. Útsendingin hefst kl. 13:45.

Rússneski stórmeistarinn Ernesto Inarkiev (2686) er efstur á mótinu en hann hefur 8 vinninga. Landi hans, Aleksey Goganov (2600) er í 2.-3. sæti með 7 vinninga ásamt Pólverjanum Radoslaw Wojtaszek (2722).

 

 

• Heimasíða mótsins
• Beinar útsendingar (kl. 13:45)
• Chessbomb (beinar útsendingar)
• Chess-Results 

 

Stefán Orri efstur á Meistaramóti Skákskólans

Stefán Orri Davíðsson er efstur á Meistaramóti Skákskóla Íslands þegar tefldar hafa verið fimm umferðir af átta. Stefán Orri vann Freyju Birkisdóttur í fimmtu umferð og er með 4½ vinning en hann mætir Halldóri Atla Kristjánssyni í sjöttu umferð sem hefst kl. 10 í fyrramálið.  Mótið tekur til ungra skákanna sem eru með minna en 1600 alþjóðleg elo-stig. Áttunda og síðasta umferðin er á dagskrá kl. 16 á morgun, sunnudag.  

Daníel Ernir Njarðarson er í 2. sæti með 4 vinninga en í 3. – 5. sæti eru Alec Sigurðarson og Halldór Atli með 3½ vinning.  Þetta er fyrri hluti meistaramótsins og eru keppendur 20 talsins.

Seinni hluti Meistaramóts  Skákskólans hefst næstkomandi föstudag kl. 16 en rétt til þátttöku þar hafa skákmenn sem eru yfir 1600 elo stigum. 

Mótstöflu má finna á Chess-Results.

Skákþáttur Morgunblaðsins: Hannes, Héðinn, Guðmundur og Björn tefla á EM í Kósovó

Hannes Hlífar Stefánsson, Héðinn Steingrímsson og Guðmundur Kjartansson unnu fremur lágt skrifaða andstæðinga í fyrstu umferð Evrópumóts einstaklinga sem hófst við góðar aðstæður í bænum Gjakova í Kósovó á fimmtudaginn. Björn Þorfinnsson glímdi hinsvegar við einn af stigahæstu keppendum mótsins, Úkraínumanninn Jurí Kryvoruchko og gerði jafntefli með svörtu eftir 36 leikja hörkubaráttu. Hægt var að fylgjast með þessari viðureign á hinu vinsæla vefsvæði Chess24. Þessir fjórir eru fulltrúar Íslands á þessu sterka opna móti en keppendur eru 239 talsins. Tefldar verða ellefu umferðir.

Stigahæstu keppendur mótsins eru Tékkinn Navara, Pólverjinn Wojtaszek, Rússinn Vitiugov og Úkraínumaðurinn Ponomariov. Skákin er í hávegum höfð í Kósovó að sögn Gunnars Björnssonar, forseta SÍ, og kemur það m.a. til af því að evrópska skáksambandið var eitt af fyrstu íþróttasamtökunum til að viðurkenna Kosovo inn í sín samtök. 

Biskupsfórnin á h7

Biskupsfórnin á h7 eða h2 er fyrirbrigði í skákinni sem flestir þokkalegir skákmenn kunna að forðast. Snillingur á borð við Mikhael Tal sat þó a.m.k. einu sinni „vitlausa megin“ borðsins þar sem fórnin kom við sögu er hann mætti Lev Polugajevskí. Síðar kom á daginn að Polu hafði bruggað launráð í félagi við Boris Spasskí sem var að undirbúa seinna heimsmeistaraeinvígi sitt við Tigran Petrosjan. Fórnin, fræðilega séð, magnast að áhrifum ef önnur fylgir á hliðarreitnum, g7 eða g2 eins og nokkur dæmi sanna. Séu skilyrðin sérstaklega góð nær fórnin að brjóta niður allar varnir. Útfærslan fylgir oft kunnuglegum leikbrögðum. Í rússnesku deildarkeppninni á dögunum þar sem athyglin beindist að áskorandanum Karjakin og hann var ekki að standa sig neitt sérstaklega vel en Kramnik hinsvegar í banastuði og annar harðskeyttur skákmaður Jan Neopmniachtchi kom biskupsfórnin snemma fyrir í skák sem Nepo tefldi við hinn unga Sjugirov. Sá er svo sem enginn veifiskati og getur státað af sigri yfir Magnús Carlsen í aðeins 25 leikjum:

Minsk 2016:

Jan Nepomniachtchi – Sanan Sjugirov

Petroffs vörn

1. e4 e5 2. Rf3 Rf6 3. Rxe5 d6 4. Rf3 Rxe4 5. c4 Be7 6. d4 0-0 7. Bd3 Rg5 8. Rc3 Bg4?

Þessi slaki leikur hefur sést komið nokkrum sinnum áður og enginn komið á auga á fléttuna sem leynist í stöðunni.

9. Bxg5! Bxg5

- sjá stöðumynd

10. Bxh7+! Kxh7 11. h4!

Þarna er hugmyndin komin fram. Hörfi biskupinn til h6 eða f6 kemur 12. Rg5+ og vinnur manninn til baka með vinnings stöðu. Best er sennilega 12. .. Bxh4 en svarta staðan er ekki gæfuleg eftir 13. Dd3+ Kg8 14. Hxh4 þó að engan rakinn vinnings sé að finna eftir 14.... f5.

11.... Bd2+

Kýs að gefa manninn til baka fyrir ekki neitt.

12. Dxd2 He8+ 13. Kf1 Bxf3 14. Dd3+ Kg8 15. Dxf3 Rd7 16. Hd1 Df6 17. Dxf6

Hvítur hefur ekkert á mót endatafli peði yfir. Úrvinnsla þessarar yfirburðastöðu vefst ekki fyrir honum.

17.... Rxf6 18. f3 d5 19. c5 b6 20. cxb6 axb6 21. Kf2 b5 22. a3 b4

Annars nær hvítur að skorða b-peðið með – Ra2.

23. axb4 Hab8 24. b5 c6 25. Hhe1 cxb5 26. Hxe8+ Hxe8 27. Hc1 Ha8 28. Rxb5 Ha4 29. Hc8+ Kh7 30. g4 Hb4 31. Rd6 Hxd4 32. Kg3

Fumlaus úrvinnsla hefur leitt til vinningsstöðu og Sjugirov gafst upp, f7-peðið er dæm til að falla og kóngsstaða svarts í molum.

Grein þessi birtist í Morgunblaðinu 14. maí 2016

Skákþættir Morgunblaðsins

[Event "Russian Team Championship"] [Site "Sochi RUS"] [Date "2016.05.05"] [EventDate "2016.05.01"] [Round "5.2"] [Result "1-0"] [White "Ian Nepomniachtchi"] [Black "Sanan Sjugirov"] [ECO "C42"] [WhiteElo "2703"] [BlackElo "2674"] [PlyCount "63"] 1. e4 e5 2. Nf3 Nf6 3. Nxe5 d6 4. Nf3 Nxe4 5. c4 Be7 6. d4 O-O 7. Bd3 Ng5 8. Nc3 Bg4 9. Bxg5 Bxg5 10. Bxh7+ Kxh7 11. h4 Bd2+ 12. Qxd2 Re8+ 13. Kf1 Bxf3 14. Qd3+ Kg8 15. Qxf3 Nd7 16. Rd1 Qf6 17. Qxf6 Nxf6 18. f3 d5 19. c5 b6 20. cxb6 axb6 21. Kf2 b5 22. a3 b4 23. axb4 Rab8 24. b5 c6 25. Rhe1 cxb5 26. Rxe8+ Rxe8 27. Rc1 Ra8 28. Nxb5 Ra4 29. Rc8+ Kh7 30. g4 Rb4 31. Nd6 Rxd4 32. Kg3 1-0

MótX-einvígið: Frábær skemmtun og spenna í Salnum

Skákmeistararnir Nigel Short og Hjörvar Steinn Grétarsson eru jafnir eftir fyrri dag MótX-einvígisins í Salnum í Kópavogi. Fyrstu þrjár skákirnar voru tefldar á laugardag og voru allar bráðfjörugar og spennandi. Fyrstu skákinni lauk með jafntefli eftir miklar sviptingar, Hjörvar Steinn vann góðan sigur í annarri skákinni en Nigel Short jafnaði metin í síðustu skák dagsins. Seinni hluti einvígisins fer fram á sunnudag og hefst klukkan 14.

 

Skákfélagið Hrókurinn skipuleggur MótX-einvígið og í setningarávarpi fagnaði Hrafn Jökulsson, forseti félagsins, því að geta boðið skákunnendum upp á viðureign meistaranna tveggja. Nigel Short er goðsögn í skákheiminum og tefldi um heimsmeistaratitilinn við Garry Kasparov 1993, sama ár og Hjörvar Steinn fæddist. Hjörvar er yngsti stórmeistari Íslendinga og eru miklar vonir við hann bundnar.

 

Friðrik Ólafsson, fyrsti stórmeistari Íslands og fv. forseti FIDE, ávarpaði fjölmarga gesti við setningarathöfn í Kópavogi og óskaði keppendum góðs gengis, áður en Ármann Kr. Ólafsson bæjarstjóri lék fyrsta leikinn fyrir Short.

 

Hjörvar tefldi skínandi vel í fyrstu skákinni og byggði upp vinningsstöðu. Í tímahraki í endatafli tókst Short að losna úr klemmunni og slapp með skrekkinn. Ungi Íslendingurinn gaf hinsvegar engin grið í annarri einvígisskákinni og vann mjög góðan sigur. Í þriðju skákinni sýndi Short afhverju hann hefur verið í fremstu röð um áratugaskeið og þjarmaði hægt og bítandi að Hjörvari, sem varð að játa sig sigraðan.

 

Fjölmargir skákáhugamenn fylgdust með fyrri degi MótX-einvígisins við frábærar aðstæður í Salnum. Seinni hálfleikur hefst á sunnudag klukkan 14 og þá verða þrjár skákir tefldar til viðbótar. Allir eru velkomnir og aðgangur er ókeypis.

 

Fyrsta einvígisskákin

Önnur einvígsskákin

Þriðja einvígsskákin

 

Facebook-síða MótX-einvígisins