Tvö íslensk skákmót tilnefnd sem besta skákmót ársins 2015

Tvö íslensk skákmót eru tilnefnd sem bestu skákmót heims á árinu 2015 af samtökum atvinnuskámanna (ACP). Annars vegar er það GAMMA Reykjavíkurskákmótiðsem haldið var í Hörpu í mars og hins vegar Evrópumót landsliðasem haldið var í Laugardalshöll í nóvember.

Reykjavíkurskákmótið er eitt sjö móta sem tilnefnt er sem besta opna mót ársins. EM landsliða er einn sex skákviðburða sem tilnefndur er sem besti opinberi skákviðburður ársins. 

Mikil viðurkenning fyrir íslenska skákhreyfingu. Úrslit verða ljós um miðjan apríl.

Tilnefnd mót eru: 

Round Robin Events

Tata Steel Chess, A Group, Wijk aan Zee, January

Gashimov Memorial, Shamkir, April

Norway Chess, Stavanger, June

Sinquefield Cup, Saint Louis, August

London Classic, London, December

 

Official Events

European Individual Championship, Jerusalem, March

World Team, Tsaghkadzor, April

World Cup, Baku, September/October

Women Grand Prix, Monaco, October

World Youth, Porto Carras, October

European Team Championship, Reykjavik, November

 

Open Events

Tradewise Gibraltar, La Caleta, January

Moscow Open, January

Reykjavik Open, March

Biel Open, July

Millionaire Chess, Las Vegas, October

Poker Stars Masters, Douglas, Isle of Man, October

Qatar Masters, Doha, December 

 

Rapid/Blitz Events

Petrov Memorial, Jurmala, March

European – ACP Women Rapid Championship, Kutaisi, June

World Rapid and Blitz Championship, Berlin, October

ACP Masters, Ashdod, December

Nánar á vef ACP.

Nýir íslenskir alþjóðlegir dómarar

Nýir íslenskir skákdómarar voru tilefndir á nýlegum FIDE-fundi í Moskvu. 

Ingibjörg Edda Birgisdóttir var tilnefnd var sem alþjóðlegur skákdómari (IA) og Kjartan Maack og Vigfús Ó. Vigfússon voru tilefndir sem FIDE-dómarar (FA).

Ingibjörg Edda var áður FIDE-dómari en fær nú aukin dómararéttindi.

Yfirlit yfir íslenska skákdómara með FIDE-réttindi má finna á heimasíðu SÍ.

 

Áfangastaður sem skákmenn vilja vitja - viðtal við Helga Ólafsson

Helgi Ólafsson með seinna bindið um sögu Reykjavíkurskákmótsins

Viðtal Stefán Gunnar Sveinsson sgs@mbl.

"Reykjavík er einfaldlega tákn í skákheiminum, einn af þeim áfangastöðum sem skákmenn vilja koma til," segir Helgi Ólafsson stórmeistari, en nýlega kom út seinna bindi ritverks hans, Reykjavíkurskákmót í 50 ár. Helgi tekur þar þráðinn upp þar sem fyrra bindinu sleppti og tekur saman sögu allra Reykjavíkurskákmótanna frá árinu 1992 og fram til 2014.

Reykjavíkurmótið hefur í seinni tíð verið "opið" mót þar sem hver sem er hefur getað tekið þátt óháð getu en var á árum áður boðsmót, þar sem sumum af sterkustu skákmönnum heims var boðið til þátttöku. "Þetta hefur hvort tveggja sinn sjarma," segir Helgi um þessa þróun sem orðið hefur á mótinu í tímans rás.

Glæsileg umgjörð Hörpunnar

"Aðalbreytingin hefur verið sú að það eru engin stigalágmörk, sem hefur gert mótið nokkuð skemmtilegt á síðustu árum," segir Helgi. Það sé ekki síst vegna þess hvað Harpan hafi reynst áhugaverður keppnisstaður. "Salurinn rúmar vel fjöldann, og Harpan vekur mikla athygli í umfjöllun um mótið, til dæmis á erlendum skákvefsíðum." Umgjörðin þyki þar hin glæsilegasta, en eini gallinn sem menn hafi orðið varir við sé að stöku sinnum berist tónlist inn í salinn frá öðrum viðburðum Hörpunnar. "Ég hef þó ekki frétt af því að það hafi truflað menn svo nokkru nemi, þó að menn séu vissulega misnæmir fyrir svona áreiti."

Það breyti því þó ekki að heildarsvipur mótsins hafi verið góður í seinni tíð. "Fólk er að koma hingað héðan og þaðan víðsvegar um heiminn. Til dæmis sigurvegarinn í ár, Gupta, kemur frá Indlandi í fimmta sinn til Reykjavíkur." Þá séu einnig keppendur frá Kína og fleiri löndum sem hafi lagt langan veg undir fót til þess að taka þátt í mótinu. "Það er mörgum sem finnst að þeir verði að koma til Reykjavíkur og tefla, þó það sé bara einu sinni," segir Helgi. 

Frægasta skák 21. aldarinnar

Helgi segir að þessar vinsældir megi rekja til þeirrar miklu sögu og dramatíkur sem fylgi íslenskri skáksögu. Þá hafi ungir skákmenn oft komið hingað, sem sumir hverjir séu nú meðal stærstu nafnanna í skákheiminum. 

Hann nefnir sem dæmi að árið 2004 hafi Magnús Carlsen, núverandi heimsmeistari, komið til landsins, 13 ára gamall, til þess að tefla á mótinu. "Samhliða því var haldið Reykjavík Rapid mótið, og þar vill svo til að hann teflir við Kasparov," segir Helgi. Sú skák eigi gott tilkall til þess að kallast frægasta skák sem tefld hafi verið á þessari öld, en hægt sé að finna umfjallanir um hana á netinu og víðar. Veki ekki síst athygli að undrabarnið Carlsen gerði jafntefli við Kasparov og var á tímabili með yfirhöndina í skákinni. "Þarna má segja að gamli og nýi tíminn hafi mæst," segir Helgi, sem rekur þessa skák í verki sínu. 

Viðbrigði fyrir unga skákmenn

Það séu þó ekki bara undrabörn eins og Carlsen sem hafi notið góðs af mótinu, heldur hafi íslensk ungmenni mörg hver fengið þar góða reynslu inn í framtíðina. "Þetta er mjög stór viðburður, eitt aðalmótið á árinu, og þarna fá þau ákveðna eldskírn," segir Helgi sem segir helst hægt að líkja þessu við muninn á stórmóti og venjulegu móti í golfi. "Það er því oft mikil unun að sjá unga skákmenn standa sig vel á þessu móti," segir Helgi að lokum.

-------------------

Viðtalið við Helga var birt í Morgunblaðinu 5. apríl sl. Viðtalið tók Stefán Gunnar Sveinsson. Stefáni Gunnari og Morgunblaðinu er þakkað kærlega fyrir að leyfa birtingu hér á Skák.is.

-------------------

Áhugasamir geta skráð sig fyrir bókinni hér á Skák.is (guli kassinn efst). Krafa verður þá stofnuð í netbanka. Þeir sem hafa þegar greitt bók en ekki fengið afhent geta nálgast eintak á skrifstofu SÍ á milli 9-13 - alla virka daga.

Einnig er hægt að óska eftir að eintak sé sent pósti með því að senda tölvupóst í netfangið [e-mail].

Ný fundargerð stjórnar SÍ

Nú liggur fyrir fundargerð stjórnar SÍ frá 21. mars sl. Meðal þess sem þá var rætt var:

• GAMMA Reykjavíkurskákið - farið yfir nokkra þætti
• Íslandsmótið í skák
• EM einstaklinga
• NM stúlkna - keppendalisti og fararstjóri 
• HM öldungasveita - ákveðið að styrkja þátttöku Gullaldarliðsins
• Ólympíumót 16 ára og yngri - ákveðið að senda lið 
• Landsliðsþjálfarar - Liðsstjórar fyrir Ól 2016 í Bakú ráðnir
• Reglugerð um EM/HM ungmanna

Fundargerðina má nálgast í heild sinni hér.

 

Þorsteinn Magnússon sigurvegari fimmtu Bikarsyrpu TR

Fimmta Bikarsyrpa Taflfélags Reykjavíkur var haldin um nýafstaðna helgi og settust ríflega 20 vösk skákungmenni við skákborðin. Mótið var æsispennandi allt fram í síðustu umferð og sáust mörg óvænt úrslit.

Strax í 1.umferð hófst fjörið er Adam Omarsson (1068) lagði Arnar Milutin Heiðarsson (1403) að velli með svörtu. Þá stýrði Benedikt Þórisson (1000) hvítu mönnunum til sigurs gegn Svövu Þorsteinsdóttur (1291). Kristján Dagur Jónsson (1189) gerði jafntefli við Daníel Erni Njarðarson (1409) í 2.umferð og hann vann Stefán Orra Davíðsson (1251) í 3.umferð. Í 4.umferð lenti Kristján Dagur hins vegar í klóm Þorsteins Magnússonar (1306). Þorsteinn vann skákina og var því efstur fyrir síðustu umferð ásamt Sæmundi Árnasyni (1260), en Sæmundur gerði sér lítið fyrir og lagði stigahæsta mann mótsins, Jón Þór Lemery (1575), í 4.umferð. Þeir Þorsteinn og Sæmundur höfðu áður gert innbyrðis jafntefli í 3.umferð. Í lokaumferðinni tefldi Þorsteinn af miklu öryggi og vann Guðmund Peng Sveinsson (0) á meðan Sæmundur tapaði fyrir Stefáni Orra.

Þorsteinn Magnússon er því sigurvegari fimmtu Bikarsyrpu TR. Hann hlaut 4,5 vinning í skákunum 5 og hækkar fyrir vikið um 18 skákstig. Í 2.sæti varð Stefán Orri Davíðsson með 4 vinninga og nældi hann sér jafnframt í 48 skákstig, sem reyndist mesta stigahækkun allra þátttakenda. Fjórir skákmenn koma í humátt á eftir með 3,5 vinning, þeir Sæmundur Árnason, Kristján Dagur Jónsson, Jón Þór Lemery og Jason Andri Gíslason. Stigaútreikningur færði Sæmundi Árnasyni bronsverðlaunin en Sæmundur hækkaði jafnframt um 26 skákstig.

Kristján Dagur Jónsson hækkaði næst mest allra á þessu móti en hann nældi sér í 39 skákstig. Hann tefldi mjög vel í mótinu og tefldi skákir sínar í botn, og alltaf til sigurs. Til marks um það þá tefldi hann 106 leikja maraþonskák í síðustu umferð gegn Ólafi Erni Ólafssyni þar sem Kristján Dagur reyndi að finna leið til sigurs í jafnteflislegu riddaraendatafli. Þrautseigjan skilaði sér að lokum, eftir miklar riddaratilfærslur, er Kristján Dagur fann vinningsleið og vann skákina. Það var ekki seinna vænna því aðeins vantaði 6 leiki upp á að Ólafur Örn hefði getað krafist jafnteflis á grundvelli 50 leikja reglunnar. Kristján Dagur, sem hefur mætt manna best á skákæfingar TR undanfarin misseri, þekkti greinilega alla króka og kima þessa endatafls. Það skilar sér því augljóslega bæði í vinningum og skákstigum að mæta vel á æfingar hjá Taflfélaginu og leysa þau verkefni sem þar eru lögð fyrir nemendur.

Sjötta Bikarsyrpa Taflfélags Reykjavíkur verður haldin dagana 27.-29.maí í húsakynnum félagsins. Þetta verður jafnframt síðasta Bikarsyrpan á þessu starfsári, en þráðurinn verður vitaskuld tekinn upp aftur næsta haust.

Myndskreytta frásögn má finna á heimasíðu TR.

Úrslit

Kjördæmamót Reykjaness í skólaskák 2016

Þetta er einstaklingsmót og er keppt í hinum hefðbundnu aldurshólfum sem hafa gilt frá því að fyrirbærið "Skólaskák" var sett á laggirnar árið 1979.
Mótið fer fram föstudaginn 8. apríl í Stúkunni við Kópavogsvöll.
Flokkarnir sem gefa rétt til þátttöku á kjördæmismóti eru annars vegar
7. bekkur og yngri og hins vegar unglingastig 8.-10.bekkur.

Staðsetning:
Keppt verður í stúkunni við Kópavogsvöll í aðstöðu Skákdeildar Breiðabliks.

Dagskrá:
Kjördæmamót unglingastigs kl: 8.30-11.30 (mæting kl 8:15)
Kjördæmamót 7. bekk og yngri kl: 12.00-15.00 (mæting kl 11:45)

Þátttökurétt hafa:
- nemendur í grunnskólum í Reykjaneskjördæmi í 7. bekk og yngri og 8.-10. bekk.
Frá hverjum skóla geta allir nemendur með skákstig fengið að keppa og að auki 2 stigalausir í hvoru aldurshólfi sem hafa sýnt sérstaklega góðan árangur í vetur.
Mikilvægt að skólar sendi fullorðinn ábyrgðarmann með sínum krökkum til að hjálpa til við eftirlit og til að halda uppi aga.

Tímamörk og umferðir:
10 mín á skákina og 7 umferðir.

Skráning:
Skráning á Skák.is (guli kassinn efst) fyrir kl. 12.00 á fimmtudegi 7. apríl 2016. Mikilvægt að umsjónarmenn með skákstarfi skrái sína nemendur til að tryggja að þeir sterkustu mæti til leiks.

Tveir efstu keppendur í eldri flokki vinna sér rétt til keppni á Landsmótinu í skólaskák og þrír efstu í yngri flokki.
Föstudaginn 15.apríl verða svo sérstök Kópavogsmót fyrir 1. , 2. og 3.-4.bekk, nánar auglýst í næstu viku.

Mótsstjóri verður Halldór Grétar Einarsson. Honum til aðstoðar verða skákennarar í Reykjaneskjördæmi.

Upplýsingar um þegar skráða keppendur má finna hér.

Wow air mótið hefst 11. apríl

Hið glæsilega Wow air Vormót Taflfélags Reykjavíkur hefst í skákhöll félagsins að Faxafeni 12mánudaginn 11. apríl  Mótið er nú haldið í þriðja sinn og hefur fest sig í sessi sem eitt af aðalmótum Taflfélags Reykjavíkur.

Tefldar verða sjö umferðir eftir svissneska kerfinu og er umhugsunartíminn 90 mínútur á fyrstu 40 leikina en eftir það bætast við 15 mínútur.  30 sekúndur bætast við eftir hvern leik alla skákina.  Teflt verður einu sinni í viku á mánudagskvöldum og hefjast umferðirnar kl. 19.30  Tvær yfirsetur (bye) verða leyfðar í umferðum 1-5.

Mótið er fyrst og fremst hugsað fyrir sterkari skákmenn og er frábær upphitun fyrir Skákþing Íslands sem hefst að móti loknu.

Í A – meistaraflokk hafa allir skákmenn með GM/IM/FM/WGM titil þátttökurétt, auk allra skákmanna með yfir 2200 Elo skákstig.

Í B – áskorendaflokk hafa allir skákmenn með yfir 2000 Elo skákstig þátttökurétt.

Skákmenn sem uppfylla stigalágmörkin 1. apríl eru gjaldgengir

Tveimur skákmönnum á stigabilinu 2000 – 2199 verður boðið sæti í A flokki.  Þau sæti eru fyrst og fremst hugsuð fyrir unga og upprennandi skákmenn á öllum aldri í mikilli framför.

Allt að fjórum skákmönnum sem ekki hafa tilskilin stig fyrir B flokkinn verður boðin þátttaka þar.  Þau sæti eru fyrst og fremst ætluð efnilegustu skákkrökkunum og unglingunum, en allir geta sótt um.

Hægt er að sækja um þessi 6 sæti með því að senda póst á [e-mail] eða hafa samband við formann félagsins Björn Jónsson í síma 8999268 eigi síðar en 4. apríl.

Sigurvegari Wow air Vormótsins í fyrra var Hannes Hlífar Stefánsson stórmeistari.  Sverrir Örn Björnsson sigraði í B flokki og annar varð Vignir Vatnar Stefánsson.  Þeir tveir unnu sér inn keppnisrétt í A – flokki í ár, en reyndar hefur Vignir þegar náð tilskyldum 2200 stigum til að keppa í flokknum!

Glæsileg verðlaun eru í mótinu í boði Taflfélags Reykjavíkur og vina okkar hjá Wow air.

A – Meistaraflokkur:

1. Flugmiði með Wow air á einn af áfangastöðum félagsins í evrópu (skattar og gjöld innifalið) plús 40.000 krónur

2. 40.000 krónur

3. 20.000 krónur

B – Áskorendaflokkur:

1. Flugmiði með Wow air á einn af áfangastöðum félagsins í evrópu (skattar og gjöld innifalið) plús 20.000 krónur

2. 20.000 krónur

3. 10.000 krónur

Auk þess verða veittir bikarar fyrir efsta sætið í hvorum flokki auk farandbikars fyrir sigurvegara A flokks.  Verðlaunapeningar fyrir annað og þriðja sætið í báðum flokkum.

Tvö efstu sætin í B – flokki veita þátttökurétt í A flokki að ári.

Umferðatafla:

1. umferð mánudag 11. apríl  kl. 19.30
2. umferð mánudag 18. apríl  kl. 19.30
3. umferð mánudag 25. apríl  kl. 19.30
4. umferð mánudag 02. maí  kl. 19.30
5. umferð mánudag 09. maí  kl. 19.30
6. umferð mánudag 16. maí   kl. 19.30
7. umferð mánudag 23. maí   kl. 19.30

Verðlaunaafhending mun fara fram laugardaginn 28. maí, kl. 14.00 fyrir upphaf umferðar í lokamóti Bikarsyrpu TR.

Tekið skal fram að 25% af verðlaunafé úr Wow air mótinu verður haldið eftir ef verðlaunahafar mæta ekki á verðlaunaafhendinguna til að taka við verðlaunum sínum án gildra ástæðna.

Ef fresta þarf skákum verða þær viðureignir tefldar á miðvikudagskvöldum kl. 19.30 (samhliða skákmóti öðlinga).

Þátttökugjald er kr. 5000 fyrir félagsmenn Taflfélags Reykjavíkur en kr. 10.000 fyrir aðra.

Þeir skákmenn sem skrá sig fyrir 7. apríl fá 50% afslátt af þátttökugjaldinu.  Frítt er fyrir titilhafa á mótið skrái þeir sig fyrir 7. apríl, annars kr. 5000.

Skráningarform

Skráðir keppendur

Ný reglugerð um val keppenda á HM og EM ungmenna

Stjórn SÍ hefur sett nýja reglugerð um val keppenda á HM og EM ungmenna. Verður stuðst við reglugerðina þegar til þess kemur að velja fulltrúa Íslands á EM ungmenna sem fram fer í Prag 17.-28. ágúst nk.

Eldri reglum er breytt í nokkrum veigamiklum atriðum

• Stuðst er við alþjóðleg skákstig - ekki íslensk skákstig
• Ekki er lengur tekin punktstaða á stigum - heldur má horfa á hæstu skákstig síðustu sex mánaða.
• Bætt er við nýjum flokki - efri afreksmörkum.
• Til staðar er þrenn mörk og miðast þau við:
• Efri afreksmörk - ef líklegt er að keppandi endi í efsta fjórðungi mótsins (SÍ greiðir allan kostnað)
• Afreksmörk - ef líklegt er að keppandi endi í efri helmingi mótsins (SÍ greiðir helming kostnaðar)
• Lágmörk - ef líklegt er að keppandi endi ofar en í neðsta fjórðungi mótsins (Keppandi greiðir allan kostnað

Til hliðjónar við afreks- og lágmörk er horft á keppendalista á HM og EM ungmenna 2015. Afreks- og lágmörk skulu endurskoðuð árlega.

Reglugerðina í heild sinni má nálgast á heimasíðu SÍ.

 

Íslandsmót barnaskólasveita - 4.-7. bekkur - fer fram í Rimaskóla næstu helgi

Tefldar verða níu umferðir eftir svissneska kerfinu. Fimm á laugardegi og fjórar á sunnudegi Umhugsunartími verður 15 mínútur á skák fyrir hvern keppenda. Taflið hefst kl. 13 á laugardeginum en kl. 11 á sunnudeginum.

Hver skóli getur sent fleiri en eina sveit. Í hverri sveit eru fjórir skákmenn. Keppendur skulu vera í 4. – 7. bekk. Ef sérstaklega efnilegir skákmenn finnast í 1. – 3. bekk er þeim leyfilegt að tefla með sínum skóla en þá aðeins í a-sveit hans! Í hverri sveit mega vera allt að þrír varamenn.

Þátttökugjöld kr. 7.500.- á sveit.  Þó ekki hærri en kr. 15.000.- fyrir hvern skóla.

Veitt verða verðlaun fyrir efstu b-e sveitir ásamt verðunum fyrir efstu sveitir af landsbyggðinni.

Veitt verða borðaverðlaun fyrir bestan árangur á 1.-4. borði. 

Sigurvegari mótsins hlýtur rétt til þátttöku á Norðurlandamóti barnaskólasveita sem fram fer í september næstkomandi í Noregi.

Skráning fer fram á Skák.is. Upplýsingar um þegar skráðar sveitir má finna hér.

Skráningu skal lokið í í síðasta lagi 8. apríl

Ath. Áríðandi er að sveitirnar séu skráðar fyrirfram.

Skákakademía Reykjavíkur sér um framkvæmd mótsins.

Ný reglugerð um mótið. 

 

Davíð fylgir Jóhanni í landsliðsflokk eftir spennandi lokaumferð

FIDE-meistarinn Davíð Kjartansson (2348) fylgir Jóhanni Ingvasyni (2171) í landsliðsflokk Íslandsmótsins í skák. Fyrir umferðina voru fimm keppendur jafnir í 2.-6. sæti með 5,5 vinning og ljóst að einhver þeirra fengi sætið. Af þessum fimm keppendum unnu aðeins tveir, þ.e. Lenka Ptácníková (2192) vann forystusauðinn Jóhann Ingvason (2171) og Davíð sem hafði sigur gegn Jóni Trausta Harðarsyni (2058).

Dagur Ragnarsson (2243) og Oliver Aron Jóhannesson (2177), sem höfðu 5,5 vinninga, gerðu jafntefli í innbyrðis skák og Björgvin Víglundsson (2164), sem einnig hafði 5,5 vinning, tapaði fyrir Vigni Vatnari Stefánssyni (2228). Eftir stóðu því aðeins Lenka og Davíð.

Davíð hafði svo annað sæti eftir stigaútreikning og sæti í landsliðsflokki sem fram fer á Seltjarnarnesi 31. maí - 11. júní nk.

Lokastöðuna má finna á Chess-Results.