Fjórða mótið í Bikarsyrpu TR hefst á föstudaginn

Bikarsyrpa Taflfélags Reykjavíkur er nýjung í mótahaldi á Íslandi. Syrpan samanstendur af nokkrum kappskákmótum og er ætluð börnum á grunnskólaaldri (fædd 1999 og síðar) sem ekki hafa náð 1600 skákstigum. Þar með gefst þeim tækifæri til að næla sér í alþjóðleg skákstig á skákmótum sem sérhönnuð eru fyrir þau.

Fjórða mótið í syrpunni hefst föstudaginn 1. maí og stendur til sunnudagsins 3. maí. Tefldar eru 5 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo við leggjum ætíð áherslu á að krakkarnir vandi sig og noti tímann vel, þá má gera ráð fyrir að margar skákir taki mun styttri tíma.

Mótið er sérstaklega hugsað fyrir krakka sem hafa sótt skákæfingar Taflfélagsins (og/eða annarra taflfélaga) reglulega síðastliðinn vetur eða lengur. Það er gott að byrja sem fyrst að keppa á kappskákmótum, en hingað til hefur þeim krökkum sem vilja tefla á “alvöru mótum” mestmegnis staðið til boða að taka þátt í opnum mótum. Þar er styrkleikamunurinn oft mikill, mótin taka langan tíma, auk þess sem marga krakka óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því.

Einungis börn og unglingar á grunnskólaaldri sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og krakkarnir njóta þess betur að tefla kappskákir. Tímamörkin eru líka styttri, og henta krökkunum betur en langar 90 mínútna skákir sem tíðkast á venjulegum kappskákmótum. Mótið uppfyllir öll skilyrði Alþjóða skáksambandsins FIDE og er reiknað til alþjóðlegra skákstiga sem gott er að byrja að safna snemma. Eins og á aðra viðburði félagsins þá er frítt í mótin fyrir krakka í Taflfélagi Reykjavíkur. Fyrir krakka í öðrum taflfélögum er þátttökugjaldið 1000 krónur fyrir hvert mót Bikarsyrpunnar.

Dagskrá:
1. umferð 17.30 á föstudegi (1. maí)
2. umferð 10.30 á laugardegi (2. maí)
3. umferð 14.00 á laugardegi (2. maí)
4. umferð 10.30 á sunnudegi (3. maí)
5. umferð 14.00 á sunnudegi  (3. maí). (Lokaumferð + verðlaunaafhending).

Sigurvegari fyrsta móts Bikarsyrpunnar var TR-ingurinn Mykhaylo Kravchuk, TR-ingurinn Aron Þór Mai sigraði á öðru mótinu og á því þriðja sigraði Fjölnisdrengurinn Jóhann Arnar Finnsson.

Skráning fer fram hér.

Vinsamlegast skráið þátttakendur sem fyrst, það hjálpar við undirbúning mótsins! Skráðir keppendur.

Bikarsyrpan samanstendur af fjórum mótum í vetur. Bikarar og medalíur eru í verðlaun fyrir efstu sætin í hverju móti, en auk þess verða veitt sérstök verðlaun fyrir samanlagðan árangur á mótunum.

Hlökkum til að sjá ykkur!

• Bikarsyrpa #1
• Bikarsyrpa #2
• Bikarsyrpa #3

Björn Ívar Karlsson Íslandsmeistari í Fischer Random 2015!

Síðastliðið föstudagskvöld fór fram Íslandsmótið í Fischer Random á skemmtikvöldi Taflfélags Reykjavíkur.

Margir sterkir skákmenn voru mættir til leiks og þeirra á meðal ríkjandi meistari frá síðasta ári, alþjóðlegi meistarinn Guðmundur Kjartansson. Hann sigraði þá með fádæma yfirburðum og fékk 11.5 vinninga úr 12 skákum. Fáir áttu von á því að það met yrði slegið í ár.

Björn Ívar Karlsson hin geðprúði skákkennari með meiru fór hamförum í byrjun mótsins í ár. Hann hóf leik með sigri á Óskari Long Einarssyni í fyrstu umferð og gerði sér svo lítið fyrir og sigraði Jón Viktor Gunnarsson í þeirri annarri. Í þriðju umferð mætti hann íslandmeistaranum Guðmundi Kjartanssyni og lagði hann einnig að velli. Arnar E. Gunnarsson reyndi svo að stöðva sigurgöngu hans í fjórðu umferð en hafði ekki erindi sem erfiði. Þegar fyrsta hlé var gert til Billjardbars heimsóknar leiddi því Björn Ívar með fullu húsi og hafði lagt að velli þrjá alþjóðlega meistara, já og Óskar Long! Næstir honum komu svo Guðmundur, Jón Viktor og Daði Ómarsson með þrjá vinninga.

Eftir að menn höfðu vætt kverkarnar var hafist handa við taflið að nýju. Nú var röðin komin að Doninum sjálfum, Róbert Lagerman að reyna að stöðva pilt. Hjó hann ansi nærri því og í æðisgengnu tímahraki átti hann fjórar sekúndur á klukkunni gegn einni sekúndu Björns. Sá síðarnefndi barði þó afar hratt og örugglega á seinustu sekúndunni og svo fór að Doninn sjálfur féll á tíma.

Margur meistarinn reyndi að stöðva Björn eftir þetta en hann reyndist í þvílíkum vígaham að enginn mátti sín gegn hörku hans og eftirfylgni við skákborðið. Svo fór að lokum að Björn Ívar kom í mark með fullu húsi vinninga, 12 af 12 mögulegum (!) og bætti því um betur frábæran árangur Guðmundar frá því í fyrra. Nokkuð ljóst er að þessi árangur verði ekki toppaður, nema þá að mótshaldarar bregði á þann leik að fjölga umferðum í framtíðinni. Til þess er allnokkurt svigrúm, enda eru Fischer Random stöðurnar alls 960 talsins.

Jafnir í öðru til þriðja sæti urðu alþjóðlegu meistararnir Guðmundur og Arnar Erwin með 9 vinninga eða heilum þremur vinningum á eftir hinum nýja Íslandsmeistara í Fischer Random. 

Taflfélag Reykjavíkur þakkar öllum þeim sem tóku þátt og óskar Birni Ívari innilega til hamingju með titilinn og frábæran árangur. Björn er nú kominn í pottinn fyrir lokamótið sem fram fer í maí en þá keppa sigurvegarar skemmtikvöldanna í vetur sín á milli um titilinn skemmtikvöldakóngur Íslands 2015.

Myndskreytt frásögn á heimasíðu TR.

Vesturbæjarbiskupinn fer fram 7. maí

Skákakademían og Vesturgarður standa fyrir Vesturbæjarbiskupnum sem tefldur verður 7. maí. Mótið fer fram í Hagaskóla er ætlað nemendum á grunnskólaaldri og eru krakkar úr Vesturbænum sérstaklega hvattir til að mæta.

Skráning fer fram á Skák.is (guli kassinn efst).

Upplýsingar um þegar skráða keppendur má finna hér.

 

Kasparov vann öruggan sigur á Short

Garry Kasparov vann öruggan sigur á Nigel Short 8½-1½ í einvígi þeirra á milli sem fram fór í Saint Louis um helgina. Tefldar voru átta hraðskákir og tvær atskákir. Kasparov virkaði stirður í fyrri daginn og hafði yfir þá 3½-1½. Síðari daginn hrökk þrettándi heimsmeistarinn heldur betur í gang og vann allar fimm skákirnar!

Ítarlega umfjöllun um einvígið má finna á Chess24.

 

Carlsen öruggur sigurvegari í Shamkir

Heimsmeistarinn í skák Magnus Carlsen (2863) vann öruggan sigur á minningarmótinu um Gashimov sem lauk í Shamkir í gær. Carlsen vann Mamedov (2651) í lokaumferðinni en öðrum skákum lauk með jafntefli.

Carlsen hlaut 7 vinninga í 9 skákum. Vann allar skákirnar með hvítu og gerði jafntefli í öllum með svörtu.

Vishy Anand (2791) átti mjög gott og varð annar með 6 vinninga. Wesley So (2788) og Caruana (2802) urðu jafnir í 3.-4. sæti með 5 vinninga. 

Carlsen hækkar verulega á stigum fyrir frammistöðuna og er nú kominn í 2876 skv. lifandi stigalistanum. Anand (2804) er kominn í annað sæti eftir að hafa hækkað jafnt og þétt síðustu misseri. Í næstum sætu eru Caruna (2803), Nakamura (2799) og Topalov (2798).

 

• Heimasíða mótsins
• Beinar útsendingar

Hraðkvöld hjá Hugin í kvöld

Hraðkvöld Hugins verður mánudaginn 27. apríl nk.  og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili Hugins í Álfabakka 14a í Mjóddinni. Í vetur verða svo hraðkvöldin fyrsta og síðasta mánudag í hverjum mánuði að því undanskildu þegar mánudag ber upp á stórhátíð.

Sigurvegarinn á hraðkvöldinu fær í verðlaun máltíð fyrir einn á Saffran eða pizzu frá Dominos Einnig verður dreginn út af handahófi annar keppandi sem einnig fær sama val. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Skákmót Vals fer fram á miðvikudaginn

Skákmót Vals, keppnin um VALS-Hrókinn fer fram í Valsheimilinu að Hlíðarenda miðvikudaginn 29. apríl og hefst kl. 18. Tefldar verða níu umferðir eftir svissneska kerfinu og verða tímamörkin 5 2, þ.e. 5 mínútur á alla skákina að viðbættum 2 sekúndum fyrir hvern leik. Keppt er um farandgripinn VALS-Hrókinn sem var gefinn af Jóhanni Eyjólfssyni fyrrverandi formanni Vals en gripurinn sem úr tré kom í leitirnar eigi alls fyrir löngu en fyrst var keppt um hann fyrir meira en 60 árum og meðal sigurvegara á þeim tíma voru Gunnar Gunnarsson og Björn Theódórsson. Núverandi handhafi Valshróksins er Jón Viktor Gunnarsson.

Fjölmörg önnur verðlaun verða veitt  m.a. varningur  frá HENSON fyrirtæki formanns skákdeildar Vals, Halldórs Einarsson. Allir skákunnendur er hvattir til að taka þátt í mótinu og gamlir Valsmenn og konur eru alveg sérstaklega velkomin.

Mótið nú er haldið af Skákdeild Vals í samvinnu við Skáksamband Íslands.

Valsmótið í skák hafi ekki farið fram um nokkurt skeið eða þar til að VALS-Hrókurinn kom í ljós og fór það fram eftir hléið vorið 2013. Þá sigraði Helgi Ólafsson örugglega. Í fyrra vann Jón Viktor Gunnarsson en það mót dró til sín meira en 50 þátttakendur. Mótið 2014 var haldið til minningar um Hermann Gunnarsson skákunnenda og einn frægasta afreksmann  sem Valsmenn hafa eignast. Hermann var meðal þáttakenda á mótinu 2013.

Von er á fjölmörgum öflugum skákmönnum til þátttöku en mótið fer fram eins og undanfarin ár í Lollastúku.  

Skráning fer fram á Skák.is (guli kassinn efst). Mótshaldar áskilja sér rétt til að takmarka þátttakendur við 50 ef þörf krefur. Upplýsingar um þegar skráða keppendur má finna hér.

Mótið verður reiknað til alþjóðlegra hraðskákstiga.

Hörðuvallaskóli Íslandsmeistari grunnskólasveita

Hörðuvallaskóli vann öruggan sigur á Íslandsmóti barnaskólasveita sem fór fram um helgina í Rimaskóla. Sveitin var skipuð ungum skákmönnum sem eru allir í sjötta bekk og leiddir áfram af Vigni Vatnari Stefánssyni. Strax í þriðju umferð tefldi skólinn við sveit Rimaskóla og var þá teningum kastað: 3.5 – 0.5 sigur! Sigrinum var fylgt eftir með 2.5 – 1.5 sigri gegn sterkri sveit Ölduselsskóla. Rétt eins og á Íslandsmóti grunnskólasveita um síðustu helgi var Hörðuvallaskóli því efstur eftir fyrri hlutann.

 

Í sjöttu umferð vannst svo öruggur sigur á Álfhólsskóla 3,5-0,5. Sveitin var komin með 3ja vinninga forskot sem hún hélt til loka. Öruggur og sanngjarn sigur jafnrar og góðrar sveitar.

Mikil barátta var um hin verðlaunasætin. Ölduselsskóli varð í öðru sæti þremur vinningum á eftir Hörðuvallaskóla. Rimaskóli og Álfhólsskóli komu í mark tveimur vinningum þar á eftir. Rimaskóli krækti í annað sætið eftir stigaútreikning.

Lokastaða efstu liða

• 1. Hörðuvallaskóli 31,5 v.
• 2. Ölduselsskóli 28,5 v.
• 3. Rimaskóli 26,5 v. (15 stig)
• 4. Álfhólsskóli 26,5 v. (13 stig)
• 5.-6. Álfhólaskóli b-sveit og Rimaskóli b-sveit 22 v. (12 stig)
• 7. Salaskóli 22 v. (10 stig)
• 8. Norðlingaskóli 21,5 (13 stig)
• 9. Grunnskólinn Hellu 21,5 v. (11 stig)
• 10. Rimaskóli c-sveit 21 v. (10 stig)
• 11. Salaskóli b-sveit 21 v. (9 stig)

Nánari lokastöðu má finna á Chess-Results.

Hörðuvallaskóli

1. Vignir Vatnar Stefánsson
2. Sverrir Hákonarson
3. Arnar Milutin Heiðarsson
4. Stephan Briem

Liðsstjóri sveitarinnar var Gunnar Finnsson.

Öldusselsskóli

1. Óskar Víkingur Davíðsson
2. Mykhaylo Kravchuk
3. Stefán Orri Davíðsson
4. Baltasar Máni Wedholm
5. Brynjar Haraldsson

Liðsstjóri sveitarinnar var Björn Ívar Karlsson.

Rimaskóli

1. Nansý Davíðsdóttir
2. Joshua Davíðsson
3. Kristófer Halldór Kjartansson
4. Mikael Maron Torfason

Liðsstjóri sveitarinnar var Jón Trausti Harðarson.

C-sveit Rimaskóla sigraði í flokki sveita 10 ára og yngri (1.-4. bekkur)

Álfhólsskóli og Rimaskóli urðu hnífjanir og efstar b-sveita.

C-sveit Rimaskóla vann ekki eingöngu keppni tíu ára og yngri heldur varð sveitin einnig efst c-liða

Salaskóli varð efstur d-liða.

Rimaskóli varð efstur e-liða.

Salaskóli varð efstur f og g-liða.

Borðaverðlaun á 1.-4. borði

1. Nansý Davíðsdóttir (Rimaskóla) 8 v.
2. Mykhaylo Kravchuk (Ölduelsskóla ) 8 v.
3. Arnar Milutin Heiðarsson (Hörðuvallaskóla) og Guðmundur Peng Sveinsson (Ingunnarskóla) 8v.
4. Stephan Briem (Hörðuvallaskóla) 9v. 

Stefán Bergsson, Omar Salama og Gunnar Björnsson önnuðust skákstjórn á mótinu. Liðsstjórar stóðu sig frábærlega og fá fyrir það miklar þakkir. Vert er að geta þátttöku sveita frá Hellu og Grindavík sem er mikið gleðiefni og sýnir gott starf sem Björgvin S. Guðmundsson Hellu og Siguringi Sigurjónsson Grindavík eru að vinna ásamt sínu fólki.

Myndaalbúm (HÁ) 

Skákþáttur Morgunblaðsins: Snjallsímasvindl, Wesley So og Nakamura

Þetta átti að vera skáklega útgáfan af Guðföðurnum: Michael Corleone (Al Pacino) gengur inn á salerni, nær í skammbyssu falda í vatnskassa gengur síðan aftur inn í matsalinn og sallar síðan niður borðnauta sína. Í skák-útgáfunni á stórmóti í Dubai fyrr í þessum mánuði hafði skákmeistari Georgíu, Gajos Nigalidze, falið snjallsíma inni á salerni. Annað veifið gerði hann sér ferð þangað inn til að sækja upplýsingar úr skákforriti símans sem starfaði á ofurkrafti á meðan skákinni stóð. En upp komst um strákinn Tuma: Andstæðingur hans Armeninn Tigran Petrosjan bað skákstjórann um að fylgjast með tíðum ferðum Georgíumannsins á salernið og niðurstaðan liggur nú fyrir. Gajos Nigalidze var rekinn úr mótinu með skömm og hlýtur vonandi langt keppnisbann.

Þetta mál er eitt fjölmargra sem komið hafa upp á seinni árum en þau frægustu eru svindl Frakkans Sebastian Feller á Ólympíumótinu í Khanty Manyisk 2010 og „Toilet-gate“-þrefið mikla vegna tíðra salernisferða Vladmir Kramniks í heimsmeistaraeinvíginu við Topalov í Kalmykíu haustið 2006. Þó að FIDE hafi þegar samþykkt hertar reglur sem varðar allt það tæknidót sem menn og konur geta borið á sér hefur fræjum tortyggni verið sáð í skáksölum heims.

Annað mál sem á sér sennilega skýringar í klaufaskap eða hugsunarleysi kom upp á dögnum hefur vakið mikla athygli fjölmiðla og varðar eina helstu vonarstjörnu skákarinnar í dag, Filippseyinginn Wesley So sem er í 8. sæti á stigalista FIDE . Hann settist nýlega að í Bandaríkjunum og naut um skeið styrks frá Webster-háskólanum St. Louis, vann milljón dollara mótið í Las Vegas rétt fyrir jólin og varð í 2. sæti á stórmótinu í Wijk aan Zee í ársbyrjun. Sem sagt: allt í lagi hjá pilti eða allt þar til á útmánuðum að upp blossaði einhvers konar forræðisdeila um þennan annálaða sómasvein. Af fréttum að dæma virðast helstu aðilar þess máls auk So vera móðir hans, Leny So, sem þrátt fyrir blóðböndin var bönnuð á vettvangi síðasta móts sonarins, og fósturforeldrar hans frá Minnesota. Í miðri orrahríðinni settist So niður til að tefla í fyrsta sinn á meistaramóti í St Louis í Mississippi-ríki. Sér til hugarhægðar var hann að krota einhver hvatningarorð á skorblað sitt og nýbúinn að leika sínum sjötta leik gegn Varuzhan Akobian í 9. umferð þegar dómarinn stöðvaði skyndilega skáklukkuna og dæmdi Akobian sigur. So hafði víst fengið viðvörun áður en fannst eins og ýmsum öðrum full langt gengið í refsigleðinni.

Mál Wesey So dró athygli frá sigurvegara bandaríska meistaramótsins í fjórða sinn, Hikaru Nakamura vann í fjórða sinn, So náði þrátt fyrir allt þriðja sæti. Í St. Louis tefldi Nakamura af miklum krafti og vann glæsilega sigra sbr. eftirfarandi viðureign:

Kayden Troff – Hikaru Nakamura

Benony-vörn

1. d4 Rf6 2. c4 e6 3. Rf3 c5 4. d5 exd5 5. cxd5 d6 6. Rc3 g6 7. g3 Bg7 8. Bg2 0-0 9. 0-0 He8 10. He1 a6 11. a4 Rbd7 12. e4 Rg4 13. Rd2 Rge5 14. Bf1 g5 15. h3 Df6 16. Dh5 Bh6 17. Rd1 g4 18. Re3 Bxe3 19. Hxe3 Dg7 20. hxg4 Rxg4 21. Hc3 Rdf6 22. Dh1 He5 23. Df3 Bd7 24. Dd3 Dh6 25. Bg2 Dh2 26. Kf1

26. ... Rxf2! 27. Kxf2 Bh3 28. Df1 Hxe4 29. Rxe4 Rxe4 30. Ke3 Bxg2 31. Df4 Rxc3 32. Dg5 Kf8 33. bxc3 He8 34. Kf2 Bh1

- og hvítur gafst upp.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 18. apríl 2015.

Skákþættir Morgunblaðsins

[Event "US Championships"] [Site "Saint Louis USA"] [Date "2015.04.09"] [EventDate "2015.03.31"] [Round "8"] [Result "0-1"] [White "Kayden W Troff"] [Black "Hikaru Nakamura"] [ECO "A62"] [WhiteElo "?"] [BlackElo "?"] [PlyCount "68"] 1.d4 Nf6 2.c4 e6 3.Nf3 c5 4.d5 exd5 5.cxd5 d6 6.Nc3 g6 7.g3 Bg7 8.Bg2 O-O 9.O-O Re8 10.Re1 a6 11.a4 Nbd7 12.e4 Ng4 13.Nd2 Nge5 14.Bf1 g5 15.h3 Qf6 16.Qh5 Bh6 17.Nd1 g4 18.Ne3 Bxe3 19.Rxe3 Qg7 20.hxg4 Nxg4 21.Rc3 Ndf6 22.Qh1 Re5 23.Qf3 Bd7 24.Qd3 Qh6 25.Bg2 Qh2+ 26.Kf1 Nxf2 27.Kxf2 Bh3 28.Qf1 Rxe4 29.Nxe4 Nxe4+ 30.Ke3 Bxg2 31.Qf4 Nxc3 32.Qg5+ Kf8 33.bxc3 Re8+ 34.Kf2 Bh1+ 0-1

Carlsen með hálf vinnings forskot á Anand fyrir lokaumferðina

Heimsmeistarinn Magnus Carlsen (2863) gerði jafntefli við Wesley So (2788) í áttundu og næstsíðustu umferð minningarmótsins um Gashimov sem er í gangi í Shamkir í Aserbaídsjan. Anand (2791) er annar hálfum vinningi á eftir sigur á Mamedyarov (2754). Wesley So (2788) og Caruana (2802) eru svo vinningi þar á eftir. 

Lokaumferðin fer fram á morgun og hefst kl. 9. Þá teflir Carlsen við Mamedov (2651) og Anand við Caruana (2802). 

Vert er að benda skákáhugamönnum á hópinn "Íslenskir skákmenn" á Facebook en þar eru skákirnar ræddar á meðan þær fara fram. Fjörlegar og skemmtilegar umræður!

• Heimasíða mótsins
• Beinar útsendingar