Allt eftir bókinni í fyrstu umferð Meistaramóts Hugins

Fyrsta umferð Meistaramóts Hugins fór fram í kvöld. Alls tóku 32 skákmenn þátt í mótinu sem tekst prýðileg þátttaka þótt mótið hafi oft verið sterkara. Styrkleikamunur var mikill í kvöld og fór það svo að hinir stigahærri unnu ávallt hina stigalægri. Sumir þurftu þó að hafa verulega fyrir sínum skákum og má þar nefna Loft Baldvinsson (1986) gegn Guðmundi Agnari Bragasyni (1352) og Vigfús Óðin Vigfússon (1962) á móti Halldóri Atla Kristjánssyni (1307).

Úrslit fyrstu umferðar sem og pörun annarrar umferðar sem fram fer annað kvöld má finna á Chess-Results. 

• Heimasíða Hugins
• Chess-Results

Héðinn teflir á Ítalíu

Stórmeistarinn Héðinn Steingrímsson (2536) situr um þessar mundir að tafli á alþjóðlegu móti í Bratto á Ítalíu. Héðinn hefur 3 vinninga að loknum fjórum umferðum og er í 5.-10. sæti. Í dag vann króatíska stórmeistarann Miso Cebalo (2401).

Á morgun teflir hann við lettneska alþjóðlega meistarann Vladimir Sveshnikov (2380).

Alls taka 48 skákmenn þátt í mótinu. Þar af eru átta stórmeistarar og er Héðinn þriðji í stigaröð keppenda.

• Heimasíða mótsins
• Úrslitaþjónusta 
• Beinar útsendingar (hefjast kl. 12:30)

Skákkennsla í reykvískum grunnskólum að hefjast

Í þessari viku snúa nemendur aftur til starfa í grunnskólum landsins. Það þýðir að skákkennsla í skólum Reykjavíkur fer nú aftur á fullt. Vikuleg kennsla verður í 28 skólum. Fyrirkomulagið er mismunandi milli skóla, þó víðast hvar sé skákkennslan á stundatöflu og kennt í 3. og/eða 4. bekk.

Skákakademían hefur yfirumsjón með skipulagningunni í flestum skólanna en nokkrir skólar eru það sem kallast mega sjálfstæðir skákskólar þar sem kennari innan skólans sinnir kennslunni, t.d. Laugalækjarskóli.  Í ellefu skólum er stefnt á skáknámskeið eða skákkennslu í lotum/hringekjukerfi  hluta af skólaárinu. Enn á eftir að skipuleggja skákstarf í þremur skólum og ekki víst að skákkennsla verði í þeim, en skólar borgarinnar eru alls 42.

Eins og í fyrra munu Björn Ívar Karlsson og Siguringi Sigurjónsson kenna í flestum skólanna, en alls telja skákkennarar í borginni eitthvað yfir tíu. Skemmtilegt viðtal við Siguringa má lesa á heimasíðu Hróksins: http://hrokurinn.is/dreymir-um-ad-fleiri-skolar-taki-upp-skakkennslu-vidtal-vid-siguringa-sigurjonsson/

 Í upphafi hverrar viku í vetur mun Stefán Bergsson framkvæmdastjóri Skákakademíunnar kynna einn skóla í Reykjavík.  Hann ríður á vaðið með umfjöllun um skákstarf í Breiðagerðisskóla.

Fyrirspurnir um kennsluna í einstökum skólum má senda á [e-mail]

Skóli vikunnar: Breiðagerðisskóli

Gamlir nemendur: Fjölmargir skákmenn eru meðal gamalla nemenda við skólanum. Við gagnaöflun greinarinnar var haft samband við Jón Úlfljótsson, Einar Má Sigurðsson og Þröst Þórhallsson. Allt eru þetta gamlir nemendur og kom upp ár krafsinu að auk þeirra stunduðu nám við skólann þeir Júlíus Friðjónsson, Kristján Guðmundsson, Sævar Bjarnason, Ögmundur Kristinsson og fleiri af sterkri kynslóð skákmanna. Fyrir sterku liði skólans um miðjan tíunda áratuginn fór svo FIDE-meistarinn Davíð Kjartansson.

Íslandsmót barnaskólasveita: Skólinn var meðal þátttakenda á fyrsta Íslandsmóti barnaskólasveita sem fór fram árið 1990. Sveit Æfingaskóla KHÍ sigraði á mótinu en í henni voru bræðurnir Björn og Bragi Þorfinnssynir, Arnar Gunnarsson, Freyr Karlsson og Oddur Ingimarsson. Sveit Breiðagerðisskóla lenti í 21. sæti af 28. mögulegum. Fall er fararheill stendur einhvers staðar og á næstu mótum náðist betri árangur. 1992 náði sveit skólans fjórða sæti, 1993 sjötta sæti og 1994 tók skólinn bronzið. Þá sveit skipuðu Davíð Kjartansson, Þórir Júlíusson, Hlynur Hafliðason, Jóhannes I. Árnason og bróðir hans Einar Árnason. Árið eftir var þessi sveit óbreytt og sigraði þá örugglega á mótinu með 28v. af 36 mögulegum, fjórum vinningum á undan Lundarskóla Akureyri.  Næstu árin eftir varð skólinn ávallt á top10 en í kringum aldamótin minnkaði skákstarf við skólann og sveit hans hætti þátttöku á Íslandsmótinu í nokkur ár.

Síðustu ár: Skákakademía Reykjavíkur hefur nú umsjón með kennslu í skólanum fjórða árið í röð. Björn Ívar Karlsson sér um kennsluna rétt eins og í fyrra. Björn kenndi einnig við skólann 2011-12 en 2012-13 sinntu Róbert Lagerman, Stefán Bergsson og Inga Birgisdóttir kennslunni. Sú venja hefur myndast að kennsla fer fram í þriðja bekk. Þannig fá allir nemendur skólans í þriðja bekk einn skáktíma á viku en þrjár bekkjareiningar eru í þriðja bekk.

Verkefni vetursins: Skólinn mun eins og síðustu ár taka þátt í sveitakeppnum á vegum Taflfélags Reykjavíkur og Skáksambands Íslands. Þá mun skólinn taka virkan þátt í Skákdeginum þann 26. janúar næstkomandi. Áhugasömustu nemendur skólans hafa verið duglegir við að sækja æfingar Taflfélags Reykjavíkur og Víkingaklúbbsins.

Sérstaða skólans: Það eru eflaust ekki margir skólar á landinu þar sem tveir kennarar við skólann eru systur stórmeistara! Það skemmir ekki fyrir þá miklu velvild í garð skákarinnar að meðal kennaraliðsins eru sumsé tvær systur Helga Ólafssonar.

 

Meistaramót Hugins hefst í kvöld

Meistaramót Hugins (suðursvæði) 2014 hefst mánudaginn 25. ágúst klukkan 19:30. Mótið er 8 umferða opið kappskákmót sem lýkur 9. september. Leyft verður að taka 2 yfirsetur í 1.-6. umferð sem tilkynna þarf um fyrir lok næstu umferðar á undan. Vegleg og fjölbreytt verðlaun eru í boði. Umhugsunartíminn verður 1½ klst. á skákina auk hálfrar mínútu á hvern leik.

Skráning fer fram á Skák.is.

Mótið er öllum opið og er reiknað til alþjóðlegra skákstiga.

Teflt er á mánudögum, þriðjudögum og miðvikudögum.

• Skráðir keppendur

Aðalverðlaun:

1. 50.000
2. 40.000
3. 30.000

Aukaverðlaun

• Skákmeistari Hugins (suðursvæði): Kr. 10.000.
• Besti árangur undir  2000 skákstigum:  Skákbók hjá Sigurbirni að verðmæti kr. 5.000.
• Besti árangur undir 1800 skákstigum:  Skákbók hjá Sigurbirni að verðmæti kr. 5.000.
• Besti árangur undir 1600 skákstigum: Skákbók hjá Sigurbirni að verðmæti kr. 5.000.
• Besti árangur stigalausra: Skákbók hjá Sigurbirni að verðmæti kr. 5.000.
• Unglingaverðlaun (15 ára og yngri), skákbækur hjá Sigurbirni að verðmæti: 1.vl. kr. 5.000, 2. og 3.vl. kr. 4000.

Þátttökugjöld:

Félagsmenn kr. 3.500; aðrir 4.500-
Unglingar 15 ára og yngri: Félagsmenn: 2.500; Aðrir 3.500.
Allir titilhafar fá frítt í mótið

Umferðartafla:

• 1. umferð, mánudaginn, 25. ágúst, kl. 19:30
• 2. umferð, þriðjudaginn, 26. ágúst, kl. 19:30
• 3. umferð, miðvikudaginn, 27. ágúst, kl. 19:30
• 4. umferð, mánudaginn, 1. september, kl. 19:30
• 5. umferð, þriðjudaginn, 2. september, ágúst, kl. 19:30
• 6. umferð, miðvikudaginn, 3. september, kl. 19:30
• 7. umferð, mánudaginn, 8. september, kl. 19:30
• 8. umferð þriðjudaginn, 9. september, kl. 19:30

Skákþáttur Morgunblaðsins: Kínverjar ólympíumeistarar í fyrsta sinn

Kínverjar eru Ólympíumeistarar í opnum flokki í Tromsö eftir afar sannfærandi frammistöðu frá byrjun til enda. Sigur þeirra kemur ekki á óvart en ýmis gömul vígi voru á fallanda fæti. Þar beinast sjónir manna að Rússum sem ekki hafa unnið gull síðan í Bled 2002 og hefðu kannski mátt koma fram af meiri virðingu við Garrí Kasparov en hann leiddi liðið til sigurs fjórum sinnum frá því í Manila 1992.

Kínverjar hlutu 19 stig og 31½ vinning. Í 2. sæti komu Ungverjar og Indverjar náðu 3. sæti. Bæði liðin hlut 17 stig. Íslenska liðið í opna flokknum hafnaði í 39. sæti en stórt tap í síðustu umferð fyrir Egyptum setti okkur niður um 12 sæti. Frammistaða liðsins var þrátt fyrir allt nokkuð góð en lokaúrslitin vissulega vonbrigði.

Íslenska kvennaliðið hafnaði í 55. sæti í sínum flokki og er sveitin á svipuðum slóðum og í Istanbul fyrir tveimur árum. Í kvennaflokknum sigruðu Rússar örugglega.

Það bar til tíðinda rétt áður en lokaumferðin hófst að Judit Polgar lýsti því yfir að hún væri hætt taflmennsku. Þá féll það í grýttan jarðveg hjá mörgum er heimsmeistarinn Magnús Carlsen yfirgaf Tromsö og hélt heim á leið eftir tap í 10. umferð.

Við höfum náð að rifja það upp hérna í Tromsö, greinarhöfundur og Jón L. Árnason, liðsstjóri Íslands í opna flokknum, að nú eru 36 ár síðan við tefldum fyrst saman á Ólympíumóti - í Argentínu 1978. Þeir eru teljandi á fingrum annarrar handar skákmennirnir hér sem sátu að tafli í stúkunni á „Leikvangi minnisvarðanna" í Buenos Aires þá en þar hafði fyrr um árið farið fram úrslitaleikur HM í knattspyrnu. Sumir þessara eru liðsstjórar nú, t.d. Zoltan Ribli og Ulf Anderson og svo auðvitað Jón L. Manngangurinn hefur svo sem ekkert breyst en samt finnst okkur eins og skáklistin nái alltaf að endurnýja sig. Það sem breytist hinsvegar ekki er að menn eru alltaf að leika af sér. Hér hafa gengið um gólf nær allir bestu skákmenn og hrist fram úr erminni afleiki eins og enginn væri morgundagurinn. Dæmi:

Ol, Tromsö, 5. umferð:

Perunovic - Radjabov

Radjabov er einn besti skákmaður Azera. Á ferlinum hefur hann unnið Kasparov og hefur lengi verið talinn heimsmeistaraefni. En í þessari stöðu lék hann ...

22. ... dxe5 ??

( Þessi leikur er svo slakur að undrum sætir. Hvítur getur leikið 23. Dxf7+ Kxf7 24. Rxe5 og 25. Rxc6 með auðunninni stöðu. Annar sterkur leikur er 23. Rxe5 og jafnvel 23. Rh8. Serbinn Perunovic valdi hinsvegar öruggasta leikinn

23. Rxe7+ Hexe7 24. Dxc5

Og með manni yfir vann hann létt í 32. leikjum.

Íslenska liðið í opna flokknum hefur ekki alltaf verið að finna bestu leikina eins og dæmin sann. Við hefðum unnið Tyrki í næstsíðustu umferð ef Hjörvar Steinn hefði hitt á rétta leikinn í þessari stöðu:

10. umferð:

Esen - Hjörvar

Hjörvar hafi réttilega fórnað skiptamun og sá fram á að fá tvö peð og gott spil. Esen lék síðast 24. Hc1-c2 en 24. h3 var nauðsynlegt. Hjörvar lék lék nú...

24. ... Dxh2+??

„Sjáir þú góðan leik sittu þá aðeins lengur á höndunum. Það er kannski einhver betri í boði," sagði Ingvar Ásmundsson stundum. Svartur átti 24. ... Dxe5! Og hvítur gæti gefist upp, t.d. 25. Hec1 Dxh2+ 26. Kf1 Dh1+ 27. Ke2 He8+ 28. Kd3 Re5+29. Kd2 Dh4 og vinnur létt.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Laugardagsmogganum, 16. ágúst 2014

Skákþættir Morgunblaðsins

Meistaramót Hugins hefst á morgun

Meistaramót Hugins (suðursvæði) 2014 hefst mánudaginn 25. ágúst klukkan 19:30. Mótið er 8 umferða opið kappskákmót sem lýkur 9. september. Leyft verður að taka 2 yfirsetur í 1.-6. umferð sem tilkynna þarf um fyrir lok næstu umferðar á undan. Vegleg og fjölbreytt verðlaun eru í boði. Umhugsunartíminn verður 1½ klst. á skákina auk hálfrar mínútu á hvern leik.

Mótið er öllum opið og er reiknað til alþjóðlegra skákstiga.

Teflt er á mánudögum, þriðjudögum og miðvikudögum.

• Skráðir keppendur

Aðalverðlaun:

1. 50.000
2. 40.000
3. 30.000

Aukaverðlaun

• Skákmeistari Hugins (suðursvæði): Kr. 10.000.
• Besti árangur undir  2000 skákstigum:  Skákbók hjá Sigurbirni að verðmæti kr. 5.000.
• Besti árangur undir 1800 skákstigum:  Skákbók hjá Sigurbirni að verðmæti kr. 5.000.
• Besti árangur undir 1600 skákstigum: Skákbók hjá Sigurbirni að verðmæti kr. 5.000.
• Besti árangur stigalausra: Skákbók hjá Sigurbirni að verðmæti kr. 5.000.
• Unglingaverðlaun (15 ára og yngri), skákbækur hjá Sigurbirni að verðmæti: 1.vl. kr. 5.000, 2. og 3.vl. kr. 4000.

Þátttökugjöld:

Félagsmenn kr. 3.500; aðrir 4.500-
Unglingar 15 ára og yngri: Félagsmenn: 2.500; Aðrir 3.500.
Allir titilhafar fá frítt í mótið

Umferðartafla:

• 1. umferð, mánudaginn, 25. ágúst, kl. 19:30
• 2. umferð, þriðjudaginn, 26. ágúst, kl. 19:30
• 3. umferð, miðvikudaginn, 27. ágúst, kl. 19:30
• 4. umferð, mánudaginn, 1. september, kl. 19:30
• 5. umferð, þriðjudaginn, 2. september, ágúst, kl. 19:30
• 6. umferð, miðvikudaginn, 3. september, kl. 19:30
• 7. umferð, mánudaginn, 8. september, kl. 19:30
• 8. umferð þriðjudaginn, 9. september, kl. 19:30

Íslandsmót skákfélaga í Fischer Random hraðskák

Þá er komið að því sem allir skákmenn hafa verið að bíða eftir, fyrsta skemmtikvöldi starfsársins hjá T.R. Ýmsar skemmtilegar tillögur hafa komið um móthald fyrir skemmtikvöldin í vetur og það verður byrjað með trukki. Fyrsta Íslandsmót taflfélaga í Fischer random hraðskák mun fara fram næstkomandi föstudagskvöld!

Öll taflfélög eru hvött til að taka þátt og er frjálst að senda eins margar sveitir til leiks og þau kjósa. Samkvæmt venju verður reglulega gert hlé á taflmennskunni til hægt sé að bregða sér á Billjardbarinn og væta kverkarnar.

Fyrirkomulagið verður eftirfarandi:

1. Tímamörk eru 3 mínútur auk 2 sekúndna viðbótartíma á hvern keppanda.
2. Fjöldi skákmanna í hverri sveit eru fjórir og skal styrkleikaraðað eftir bestu samvisku. Sveitir skulu merktar A, B etc eftir styrkleika. Leyfilegt er að vera með tvo varamenn fyrir hverja sveit, sem koma þá inn á borð samkvæmt styrkleika.
3. Swiss, round robin eða double round robin eftir fjölda sveita. Stefnt að því að tefla allavegana 12 umferðir.
4. Leyfilegt er að fá einn lánsmann úr öðru félagi í sína sveit. Það hefur þó afleiðingar. Lán á stórmeistara kostar 3 vinninga, alþjóðlegur meistari kostar 2 vinninga, Fide meistari kostar 1 vinning og aðrir skákmenn kosta 1/2 vinning. Þessir vinningar verða dregnir frá í lok móts. Samþykki viðkomandi félags þarf að liggja fyrir til að lánið teljist löglegt.
5. Sú sveit sem hlítur flesta vinninga sigrar og fær nafnbótina Íslandsmeistari taflfélaga í Fischer Random. Séu tvær eða fleiri sveitir jafnar að vinningum ber sú sveit sigur úr býtum sem hefur flesta "matchpoints". Séu sveitir enn jafnar verður gripið til stigaútreiknings.
6. Gerð verða tvö hlé til Billjardbarsferða meðan á mótinu stendur. Verðlaunaafhending mun fara fram á Billjardbarnum.
7. Líkt og í íslandsmótinu í Fischer Random síðastliðið vor verða fjórar fyrstu stöðurnar gerðar opinberar degi fyrir mót.
8. Verðlaun:
   1.sæti Bikar og 8000 króna úttekt á billjardbarnum í formi veitinga.
   2.sæti Bikar og 5000 króna úttekt á Billjardbarnum í formi veitinga.
   3.sæti Bikar og 2000 króna úttekt á Billiardbarnum í formi veitinga.
9. Þátttökugjöld eru 500kr fyrir hvern skákmann.
10. Aldurstakmark er 20 ár og rétt er að geta þess að áfengisbann ríkir í húsakynnum Taflfélagsins.
    
    Skráningu lýkur á miðnætti kvöldið fyrir keppni!
     
    Bjór á stórlækkuðu verði allt kvöldið! Hlökkum til að sjá ykkur!

Framsýnarmótið fer fram um næstu helgi!

Framsýnarmótið 2014 verður haldið í Dvergasteini á Laugum í Reykjadal Þingeyjarsveit helgina 29-31 ágúst nk. Tefldar verða 7 umferðir alls, fyrstu fjórar með atksákartímamörkum (25 mín) en þrjár með 90 mín + 30 sek/leik.

Þátttökugjald 2000 kr en 1000 kr fyrir 16 ára og yngri.

Dagskrá:

Föstudagur 29 ágúst kl 20:00 1. umferð
Föstudagur 29 ágúst kl 21:00 2. umferð
Föstudagur 29 ágúst kl 22:00 3. umferð
Föstudagur 29 ágúst kl 23:00 4. umferð

Laugardagur 30 ágúst kl 11:00 5. umferð
Laugardagur 30 ágúst kl 17:00 7. umferð

Sunnudagur 31 ágúst kl 11:00 7. umferð

• Skráning í mótið er hér.
• Nánari upplýsingar hjá Hermanni Aðalsteinssyni í síma 821-3187

Hallgerður Hraðskákmeistari Hugins (suðursvæði) - Guðmundur sigraði á mótinu

Guðmundur Gíslason sigraði örugglega með 12,5 af 14 mögulegum á Hraðskákmóti Hugins í Mjóddinni sem fram fór fimmtudaginn 21. ágúst sl. Það voru Stefán Bergsson og Oliver Aron sem náðu að vinningum af Guðmundi. Oliver Aron Jóhannesson var jafn öruggur í öðru sæti með 11v. Síðan komu þrír skákmenn jafnir með 9v en það voru Hallgerður Helga Þorsteinsdóttir, Vigfús Ó. Vigfússon og Dagur Ragnarsson í þessari röð á stigum. Hallgerður var jafnframt efst Huginsmanna og er því Hraðskákmeistari Hugins hér fyrir sunnan.

27 keppendur tóku þátt sem er þokkaleg þátttaka. Skákstjórar voru Steinþór Baldursson og Vigfús Ó. Vigfússon.

Lokstöðuna má finna á Chess-Results.

Skákhátíð á Menningarnótt hefst á Vitatorgi kl. 14:30

Rétt eins og síðustu ár stendur Skákakademían fyrir skemmtilegum skákdegi á Menningarnótt. Nú verður aðaláherslan á Alheimsmótið í leifturskák. Keppendur munu aðeins hafa eina mínútu á klukkunni og tefla tvær skákir sín á milli. Þegar hafa nokkrir af bestu leifturskákmönnum borgarinnar staðfest þátttöku sína. Má þar á meðal nefna stórmeistarann Hjörvar Stein Grétarsson og Íslandsmeistarann Guðmund Kjartansson. Þá eru ónefndir landsliðsþjálfari kvenna Ingvar Þór Jóhannesson, formaður TR Björn Jónsson, formaður SFÍ Kristján Örn Elíasson og kantmaðurinn knái Halldór Brynjar Halldórsson sem fór mikinn í viðureign SA og Skákfélag Reykjanesbæjar sem háður var nýverið en þar krækti hann í ellefu vinninga af tólf sem dugðu þó skammt fyrir Norðanmenn. Keppendur verða alls um 12-14.

Samhliða taflmennskunni verða spilaðir skemmtilegir tónar á torginu góða þar sem Alheimsmótið fer fram. Herlegheitin fara fram á Vitatorgi sem er nýtt torg við Hverfisgötu, rétt neðan Vitastígs. Sjálft mótið hefst um 14:30. Að loknu móti munu meistararnir taka skákir við gesti og gangandi auk þess sem allir geta gripið í tafl sín á milli frá því tvö um daginn.

http://menningarnott.is/skakstud-skakakademiunnar