Lokaumferð Wow air Vormóts TR fer fram í kvöld

Sjöunda og síðasta umferð Wow air Vormóts TR fer fram í kvöld. Stórmeistarinn Hjörvar Steinn Grétarsson (2511), hefur tveggja vinninga forskot í a-flokki, og hefur þegar tryggt sér á mótinu en hörð barátta er um önnur verðlaunasæti. Magnús Pálmi (2156) hefur vinnings forskot í b-flokki og hefur þar með tryggt sér a.m.k. skipt efsta sætið. Kíkjum á stöðu mála í báðum flokkum.

A-flokkur:

Hjörvar Steinn Grétarsson (2511) hefur fullt hús eftir 6 umferðir. Frábær árangur. Í 2.-4. sæti, með 4 vinninga, eru Hannes Hlífar Stefánsson (2541), Dagur Ragnarsson (2105) og Þröstur Þórhallsson (2435). Í 5.-6. sæti eru svo Guðmundur Kjartansson (2441) og Sigurður Páll Steindórsson (2215). Í umferð kvöldsins mætast meðal annars:

• Hjörvar (6) - Þröstur (4)
• Dagur R. (4) - Hannes (4)
• Sigurður Páll (3,5) - Guðmundur K. (3,5)
• Magnús Teitsson (3) - Friðrik Ólafsson (3)

B-flokkur:

Magnús Pálmi Örnólfsson (2156) leiðir í flokknum með 5 vinninga. Í 2.-4. sæti með 4 vinninga eru Kjartan Maack (2121), Hrafn Loftsson (2184) og Vignir Vatnar Stefánsson (1844). Í 5.-7. sæti koma svo Torfi Leósson (2175), Örn Leó Jóhannsson (1999) og Gauti Páll Jónsson (1618) með 3½ vinning. Í umferð kvöldsins mætast meðal annars:

• Magnús Pálmi (5) - Vignir Vatnar (4)
• Hrafn (4) - Kjartan (4)
• Örn Leó (3,5) - Gauti Páll (3,5)
• Arnaldur Loftsson (3) - Torfi (3,5) 

Umferðin í kvöld hefst kl. 19:30 og eru áhorfendur velkomnir.

• Heimasíða TR
• Chess-Results (a-flokkur)
• Chess-Results (b-flokkur)

Kælismiðjan Frost (Jón Kristinn) vann firmakeppnina!

Úrslitin í firmakeppni félagsins fóru fram sl. fimmtudag. Vel var mætt á úrslitakvöldið og áttu 15 fyrirtæki fulltrúa í þessari lokahrinu.  M.a. voru ekki færri en fimm formenn mættir til leiks, fjórir fyrrverandi ásamt núverandi formanni. Formenn framtíðarinnar voru örugglega líka á staðnum.  Baráttan um sigurinn á mótinu var jöfn og hörð, og stóð einkum milli Kælismiðjunar Frosts, Matar og marka og Securitas. Reyndist Kælismiðjan grimmust á lokasprettinum, enda tefldi fyrir hana nýbakaður Akureyrar- og Norðurlandsmeistari - og skólaskákmeistari Íslands!

Lokaniðurstaðan var þessi:

Kælismiðjan Frost	Jón Kristinn Þorgeirsson	12
Matur og mörk	Áskell Örn Kárason	11½
Securitas	Gylfi Þórhallsson	11
BSO	Smári Ólafsson	9½
Bautinn	Ólafur Kristjánsson	9
Landsbankinn	Þór Valtýsson	8
Rafeyri	Tómas V Sigurðarson	7½
Skíðaþjónustan	Haraldur Haraldsson	7½
Bakaríið v/ brúna	Sigurður Eiríksson	7
Olís	Símon Þórhallsson	7
Nýja kaffibrennslan	Haki Jóhannesson	5
Kjarnafæði	Karl Egill Steingrímsson	4½
Raftákn	Hjörleifur Halldórsson	3½
Íslensk verðbréf	Logi Rúnar Jónsson	2
TM	Benedikt Stefánsson	0

Skákþáttur Morgunblaðsins: Hjörvar Steinn með fullt hús á WOW-air mótinu

Keppni í landsliðsflokki á Skákþingi Íslands hefst í Stúkunni a Kópavogsvelli þann 23. maí nk. og eins og fyrir tveimur árum þegar mótið fór fram á þessum sama stað er það vel skipað en þessir 10 skákmenn eru skráðir til leiks: Hannes Hlífar Stefánsson, Héðinn Steingrímsson, Hjörvar Steinn Grétarsson, Stefán Kristjánsson, Henrik Danielsen, Bragi Þorfinnsson, Helgi Áss Grétarsson, Guðmundur Kjartansson, Þröstur Þórhallsson og Björn Þorfinnsson.

Þessa móts er beðið með talsverðri eftirvæntingu; Íslandsmeistaratitillinn gefur sjálfkrafa sæti í ólympíulið Íslands en nýr landsliðseinvaldur, Jón L. Árnason, mun velja ólympíuliðið eftir mótið. Hannes Hlífar Stefánsson á titil að verja en af öðrum þátttakendum hafa Héðinn Steingrímsson, Þröstur Þórhallsson og Henrik Danielsen áður hampað Íslandsmeistaratitlinum.

Ekki er hægt að útiloka neinn keppendanna í því að vinna þetta mót. Þar sem keppendur eru tíu en ekki tólf eins og venja er getur Dagur Arngrímsson ekki verið með og er það miður. Á Íslandsmótinu fyrir tveim árum var hann aðeins ½ vinningi á eftir efstu mönnum.

Dagur er í hópi nokkurra sem hafa verið að tefla á WOW-air móti Taflfélags Reykjavíkur. Þar er teflt einu sinni í viku og þetta hæga tempó virðist ekki vera að virka fyrir alla. Hjörvar Steinn Grétarsson hefur þar skotið öðrum keppendum langt aftur fyrir sig og hefur unnið allar fimm skákir sínar. Guðmundur Kjartansson er í 2. sæti með 3 ½ vinning en í 3.-8. sæti koma Dagur Ragnarsson, Hannes Hlífar, Dagur Arngrímsson, Stefán Kristjánsson, Ingvar Þ. Jóhannesson og Þröstur Þórhallsson allir með 3 vinninga.

Í B-flokki er Magnús Pálmi Örnólfsson efstur með 4 ½ vinning en Kjartan Maack er annar með 3 ½ vinning.

Hjörvar Steinn hafði unnið Hannes Hlífar og Stefán Kristjánsson fremur auðveldlega í fyrri umferðum og sl. mánudagskvöld mætti hann Degi Arngrímssyni:

Hjörvar Steinn Grétarsson - Dagur Arngrímsson

Hollensk vörn

1. d4 d5 2. c4 c6 3. Rf3 e6 4. e3 Bd6 5. b3

Skákin hefst með slavneskri vörn en Dagur snýr byrjuninni yfir í grjótgarðinn hollenska.

5. ... Rd7 6. Bb2 f5 7. Bd3 Re7?! 8. Re5 Bb4+!?

Það verður Degi að falli að hann leggur út í beinar aðgerðir án þess að hafa lokið liðsskipan. Ekkert var að því að hrókera stutt.

9. Rd2 Rxe5 10. dxe5 dxc4 11. Bxc4 Rd5 12. a3 Ba5 13. b4 Bb6 14. Dh5+!

Öflugur leikur sem miðar að því að hindra hrókun sem kemur t.d. fram í afbrigðinu 14. ... g6 15. Dh6.

14. ... Kf8 15. Df3 Kg8 16. e4 fxe4 17. Rxe4 Df8 18. Dg4

Hjörvar sá riddarafórnina, 18. Rf6+!, en ekki fundist hún áhættunnar virði. Eftir 18. ... gxf6 19. exf6 hótar hvítur 20. f7+ og 19. ... Df7 dugar skammt vegna 20. Dg4+ Kf8 21. Dg7+! og vinnur.

18. ... Df4 19. De2 Re3 20. fxe3 Dxe4 21. O-O

Hvítur lætur sér það í léttu rúm liggja þó e3-peðið falli. Samt var 21. Hd1 betri leikur.

21. ... Dxe3 22. Dxe3 Bxe3 23. Kh1 h5 24. Hf3 Bg5 25. Haf1 Kh7

Eina vonin lá í 25. ... Bd7 t.d. 26. f7 b5 27. Bb3 Be8! 28. Bxe6+ Kh7 og svartur er með í leiknum.

26. Bd3+ Kh6

27. h4!

- og svartur gafst upp. „Houdini" gefur upp að eftir 27. ... Bxh4 sé svartur óverjandi mát í átta leikjum sem hefst með 28. Bc1+ Bg5 29. Bxg5+ Kxg5 20. Hg3+ Kh6 30. Hf7! o.s.frv.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 11. maí 2014

Skákþættir Morgunblaðsins

[Event "Wow Air A-flokkur"] [Site "Reykjavik (Faxafen)"] [Date "2014.05.05"] [Round "5.1"] [White "Gretarsson, Hjorvar S"] [Black "Arngrimsson, Dagur"] [Result "1-0"] [ECO "D30"] [WhiteElo "2511"] [BlackElo "2382"] [PlyCount "53"] [EventDate "2014.??.??"] 1. d4 d5 2. c4 c6 3. Nf3 e6 4. e3 Bd6 5. b3 Nd7 6. Bb2 f5 7. Bd3 Ne7 8. Ne5 Bb4+ 9. Nd2 Nxe5 10. dxe5 dxc4 11. Bxc4 Nd5 12. a3 Ba5 13. b4 Bb6 14. Qh5+ Kf8 15. Qf3 Kg8 16. e4 fxe4 17. Nxe4 Qf8 18. Qg4 Qf4 19. Qe2 Ne3 20. fxe3 Qxe4 21. O-O Qxe3+ 22. Qxe3 Bxe3+ 23. Kh1 h5 24. Rf3 Bg5 25. Raf1 Kh7 26. Bd3+ Kh6 27. h4 1-0

Henrik endaði í 2.-5. sæti

Stórmeistarinn Henrik Danielsen (2483) endaði í 2.-5. sæti á Copenhagen Chess Challange sem lauk í dag í Kaupmannahöfn. Hann hlaut 6,5 vinning í 9 skákum. Danski alþjóðlegi meistarinn Jens Ove Fries-Nielsen (2384) vann mjög óvæntan sigur á mótinu og náði sínum öðrum áfanga að stórmeistaratitli.

Hannes Hlífar Stefánsson (2548) hlaut 6 vinninga og endað í 6.-9. sæti, Bragi Þorfinnsson (2459) hlaut 5,5 vinning og endaði í 10.-18. sæti og Þröstur Þórhallsson (2437) hlaut 5 vinninga og endaði í 19.-31. sæti.

Henrik var eini Íslendingurinn sem hækkar á stigum fyrir frammistöðu en hann hækkar um 3 stig. Aðrir lækka. Hannes um 9 stig og Bragi og Þröstur um 12 stig.

68 skákmenn tóku þátt í mótinu frá 9 löndum. Þar á meðal voru 7 stórmeistarar og jafnmargir alþjóðlegir meistarar. Íslendingarnir voru allir með átta stigahæstu keppenda mótsins.

• Heimasíða mótsins
• Chess-Results
• Beinar útsendingar (kl. 8 og 13)

Henrik í 1.-3. sæti fyrir lokaátökin á morgun

Henrik Danielsen (2483) er í 1.-3. sæti með 5,5 vinninga að loknum sjö umferðum á Copenhagen Chess Challange sem nú er í gangi. Henrik vann í dag báðar sínar skákir en andstæðingarnir voru bandaríski FIDE-meistarinn Kassa Korley (2390) og danski stórmeistarinn Carsten Höi (2397).  Jafnir Henrik í efsta sæti eru danski alþjóðlegi meistarinn Jens Ove Fries-Nielsen (2384) og, sterkasti skákmaður Færeyinga, alþjóðlegi meistarinn, Helgi Dam Ziska (2491). 

Hannes Hlífar Stefánsson (2548) og Bragi Þorfinnsson (2459) eru í 11.-18. sæti með 4,5 vinning og Þröstur Þórhallsson (2437) er í 19.-25. sæti með 4 vinninga.

Á morgun eru tefldar tvær síðustu umferðirnar. Í þeirri fyrri, sem fram fer í fyrramálið, teflir Henrik við Helga Dam.

68 skákmenn taka þátt í mótinu frá 9 löndum. Þar á meðal eru 7 stórmeistarar og jafnmargir alþjóðlegir meistarar. Íslendingarnir eru allir með átta stigahæstu keppenda mótsins.

• Heimasíða mótsins
• Chess-Results
• Beinar útsendingar (kl. 8 og 13)

Hannes og Henrik með 3,5 vinning eftir 5 umferðir

Það gekk ekkert sérstaklega hjá íslensku skákmönnunum í 4. og 5. umferð Copenhagen Chess Challange sem fram fóru í dag. Hannes Hlífar Stefánsson (2548) og Henrik Danielsen (2483) hafa 3,5 vinning og eru í 8.-15. sæti. Þröstur Þórhallsson (2437) og Bragi Þorfinnsson (2459) eru svo í 16.-29. sæti með 3 vinninga. Henrik vann Þröst í skák þeirra á millum í dag.

Á morgun eru tefldar 6. og 7. umferð.

Danski alþjóðlegi meistarinn Jens Ove Fries-Nielsen (2384) er efstur með 4,5 vinning en hann vann Henrik í dag og gerði jafntefli við Hannes.

68 skákmenn taka þátt í mótinu frá 9 löndum. Þar á meðal eru 7 stórmeistarar og jafnmargir alþjóðlegir meistarar.

• Heimasíða mótsins
• Chess-Results
• Beinar útsendingar (kl. 8 og 13)

Bræðurnir bestir á Vormót Skákskóla Íslands og Skákakademíu Kópavogs

 

 

 

Bræðurnir Björn Hólm og Bárður Örn Birkissynir urðu efstir á Vormóti Skákskóla Íslands og Skákaakademíu Kópavogs sem fram fór í Stúkunni á Kópavogsvelli á fimmtudaginn. Tefldar voru sjö umferðir með tímamörkunum 4 2 og vann Björn Hólm allar skákir sínar en Bárður tapaði einum vinningi niður gegn bróður sínum.

Með mótinu lauk vorönn Skákskóla Íslands/Skákakademíu Kópavogs en aðalumsjónarmaður þessarar starfssemi hefur verið Helgi Ólafsson skólastjóri Skákskóla Íslands. Honum til aðstoðar voru Halldór Grétar Einarsson og Lenka Ptacnikova. Mikil skákstarfssemi hefur verið í hinum glæsilegu húsakynnum Stúkunnar á Kópavogsvelli en nýverið fékk Breiðabik fullan yfirráðarétt yfir  Stúkunni og er gert er ráð fyrir að starfssemi skákdeildar Breiðabiks, sem samstarfsaðila  með Skákskóla Íslands og Skákakademíu Kópavogs, haldi áfram af fullum krafti næsta haust. Íslandsmótið í skák hefst í Stúkunni eftir viku.

Veitt voru verðlaun fyrir þrjú efstir sætin og komu þau í hlut Björns og Birkis og Guðmundar Agnars Bragasonar, stúlknaverðlaun hlaut Freyja Birkisdóttir sem er átta ára gömul systir þeirra bræðra en hún tefldi á Norðurlandamóti stúlkna i Bifröst á dögunum. Sérstök verðlaun fyrir ástundun og framfarir hlutu Jóhannes Þór Árnason, Sindri Snær Kristófersson og Stephan Briem. Í mótslok var þátttakendum boðið uppá á pizzur og gosdrykki.

Úrslit mótsins má finna á Chess-Results.

Myndaalbúm (HGE)

Vika í Íslandsmótið í skák

Íslandsmótið í skák hefst eftir viku. Eins og áður hefur komið fram verður um ræða sterkasta landsliðsflokk sögunnar þar sem sjö stórmeistarar taka þátt. Afar mikið er í húfi þar sem ólympíuliðin verða valin fljótlega að móti loknu og ljóst að góð frammistaða á mótinu gæti tryggt sæti í næsta landsliði Íslands.

Það stefnir einnig í mjög góðan áskorendaflokk. Nú þegar eru 34 keppendur skráðir til leiks. Stigahæstur skráðra keppenda er Einar Hjalti Jensson (2350). Næstir á stigum eru Davíð Kjartansson (2342), Guðmundur Gíslason (2319), Sigurður Daði Sigfússon (2290), Lenka Ptácníková (2267) og Daði Ómarsson (2240). Allt eru þetta skákmenn sem hafa teflt í landsliðsflokki.

Íslandsmót kvenna er hluti af áskorendaflokki. Flestar sterkustu skákkonur landsins hafa skráð sig til leiks. Má þar nefna Lenku, Hallgerði Helgu Þorsteinsdóttur (1982), Tinnu Kristínu Finnbogadóttur (1930), Jóhönnu Björg Jóhannsdóttir (1856), Elsu Maríu Kristínardóttur (1830) og Sigríði Björg Helgadóttur (1758).

Keppendalistann má nálgast á Chess-Results.

Skráning fer fram hér á Skák.is og eru skákmenn hvattir til að skrá sig sem fyrst til leiks!

Heimasíða mótsins

Verður ekkert Ólympíuskákmót í Tromsö í haust?

Stærsta frétt siðastu daga á erlendum skákfjölmiðlum hefur verið um vandræði mótshaldara í Noregi fyrir Ólympíuskákmótið í Tromsö 1.-15. ágúst. Svo virðist sem þeir séu undirfjármagnaðir um 300 milljónir íslenskra króna.

"We are with our back against the wall" er haft eftir Jøran Aulin-Jansson forseta norska skáksambandsins. Mótshaldarar hafa sett þrýsting á norsk stjórnvöld um aðstoð en þar virðist mönnum finnast nóg í lagt nú þegar en norsk stjórnvöld hafa þegar ábyrgst um 1.500 milljónir kr.

Svo virðist sem mótshöldurum hafi gengið verr að tryggja sér styrki einkaaðila en stefnt var að. Einnig bera mótshaldarar við að FIDE World Cup hafi kostað töluverðan pening en það er krafa FIDE að þeir sem halda Ólympíuskákmót haldi einnig World Cup.

Mótshaldarar hafa boðið aukin útgjöld á þátttökuliðin (Um 15.000 kr. á hvern keppenda) en því mótmælir FIDE og segir ekki hafa verið upphaflegu boði þeirra.

Í bréfi FIDE til mótshaldara segir m.a.:

We have seen the articles in the Norwegian press regarding the Tromso Olympiad, in particular where you are quoted. This is the first time that we are aware that there are any problems regarding the funding of the Olympiad. Perhaps, with hindsight, we should have realised when you unilaterally decided to ask for a €100 administration fee. As I have written several times, this was not in your original bid and is not accepted by FIDE. FIDE believes that if this had been disclosed in your bid, then the voting would have been different. This therefore cannot be charged. Please note 4.2.1 and 4.2.2 of the Regulations for the Chess Olympiad. Under 4.2.2, you are under obligation to keep the FIDE President informed of the financial aspects of the Olympiad, this you have not done. When I visit next week with Mr. Gelfer, I would be grateful if you could provide me with the required information under 4.2.1. 

This whole matter is of great concern to FIDE and we have received many questions from Federations and the press. There is also plenty of speculation over the internet and all this causes uncertainty about the event. Please confirm to us on behalf of the Organising Committee that there is no chance that the Tromso Chess Olympiad will be cancelled. Federations, Delegates and Commission members are not going to buy their tickets unless we get such a confirmation. So we need to put an end to all this speculation.
 

Forseti norska skáksambandsins svarar m.a.

FIDE claims we had not included  charges in our bid, but we claim we did include them. It is the same as they had during the Olympics two years ago.

Nánar má lesa um málið á eftirfarandi tenglum

• Bergensjakk
• Tromsö undirfjármagnað? (Chessbase) 
• Tromsö í vandræðum? (Chessvibes)
• Ólympíuskákmótið í meiri háttar óvissu (Chess24)

Að lokum smá fréttaskýring ritstjóra:

Ritstjóri heldur reyndar að mótið verði að sjálfsögðu haldið í Tromsö. Mótshaldarar séu í vandræðum og leita eftir stuðningi stjórnvalda sem fyrr eða síðar verði tryggður. Norsk stjórnvöld munu að sjálfsögðu ekki láta það spyrjast út að jafn ríkt land og Noregur geti ekki haldið Ólympíuskákmót á glæsilegan hátt. Málið hlýtur að leysast á næstu dögum eða vikum.

Svo er spurning hvaða áhrif þetta hafi á forsetakosningar FIDE.

Ný heimasíða Ása

Æsir hafa sett upp nýja vefsíðu. Hana má nálgast hér og er kominn á tenglasafnið á vinstri hluta Skák.is.